mnong_2020_mng_mlt_mat_book/mat/17.json

{
  "1": "Pro nar ta kơi, Yang Yêsu ndơm kăn Pê-trôih wăt Yakơ jêh iên Yôhan, ŏh kăn, jêh hư̆n Khua Yang ndơm gu hên sak băk čơng tŏng ju mlăm dôn yôk jua.",
  "2": "Khua Yang mlih săk jăn ta măt hên, jêh iên môh măt Khua Yang đat ang blăh di măt nar, jêh iên ao Khua Yang ĕh đat ndrơm pơp ang.",
  "3": "Jêh iên tŏ hư̆n, kăn Mô-ih ta Ê-li nôh ƀlang ta hên, tŏng ngơi ta Khua Yang.",
  "4": "Mông hư̆n, kăn Pê-trôih pŏk dơk, ngơi ta Yang Yêsu: \"Wơ Khua Yang, băn gŭk ta o găl ngăn. Ndă Khua Yang khơñ, ăñ jrăng lăm ndŏk ta o pei mlăm tư̆m, ƀơn ta Khua Yang, ƀơn ta Mô-ih jêh iên ƀơn ta Êli.",
  "5": "Jăng jai hôm kăn ngơi, măp gu mau, ju klŏ ñuôi tŭk ram ang dơr ĕh sak guôm hên, jêh iên măp gu, mau dơk ngơi băh ñuôi tŭk tŏ, klăh iêu: “Ho jêng Kuôn khăp khơñ ngăn ăñ ji, ăñ čhô̆ brơn ngăn ta Kuôn. Ăn gưt dơk Kuôn hư̆n.”",
  "6": "Jăng jai tŏng pơp hư̆n, băl ƀing kna hên bê̆ čhư̆p măt jêh iên bhŭng tlŏh nŏh.",
  "7": "Jêh hư̆n Yang Yêsu sak mơñ jêh iên bi tŏng hên, jêh iên ngơi: \"Ăn dŏk tŏng tê̆ jêh iên ei ru bhŭng.\"",
  "8": "Ƀê̆ dăh jai hên ngơk măt tŏng tê̆, so hôm hên so nêh čuôm gu ju nau Yang Yêsu.",
  "9": "Jăng jai hên jư̆r băh yôk, Yang Yêsu tơ-tă ta hên, klăh iêu: \"Ei ru têh sơm pơp jêh pu me so ta nêh dơ-dêh tăl trôh mông Kuôn Nêh wêh dŏk brêh băh tŭk khư̆t.\"",
  "10": "Băl ƀing kna hư̆n lup Khua Yang, klăh iêu: \"Kơt iên pơp mhŏ băl tơ-ti pơp bhiên ngơi kăn Êli jrăng trôh luôr?\"",
  "11": "Mông hư̆n, Khua Yang pŏk dơk, Khua Yang ngơi: \"Khă kăn Ê-li jrăng trôh jêh iên wêh mkra djăp bruă.",
  "12": "Ƀê̆ dăh ăñ ngơi ta pu me klăh iêu kăn Ê-li jêh trôh ru, jêh iên so hên gư̆t năl kăn. Mlih ta iên, hên mhŏ ta kăn hui si pơp hên khơñ. Ăt klăh iên ya, Kuôn Nêh jrăng tŭ pơp knap mñai yơng băh hên.",
  "13": "Mông hư̆n kăh, băl ƀing kna wơng klă pơp Khua Yang ngơi ta hên yơng ta kăn Yôhan Ƀap-tit.",
  "14": "Jêh trôh tŭk băl uôn lan, mau ju nau nêh tlơ tlau sak mơñ Khua Yang, čuôn krŭng ta măt Khua Yang.",
  "15": "Jêh iên dăn: \"Wơ Khua Yang, dăn đač kuôn tlau ăñ ƀă, bơ yơng kăn jêng nêh lu nggŏh săk jêh iên kjham ngăn, ĕh khăng bông kăn mŏng ĭñ, jêh iên khăng lăč mŏng dak. ",
  "16": "Ăñ sak ndơp ru kăn ta băl ƀing kna Khua Yang, ƀê̆ dăh so dơi hên lăm băh kăn ôh.\"",
  "17": "Ƀê̆ dăh, jai wêh ngơi, Yang Yê-su lăh: \"Wơ găp pôl so đăo jêh iên rai lêč, dŏng ŏk hôm yau ăñ jrăng gŭk băk pu me? Ŏk dư̆t yau hôm dơi ăñ gĭr ta pu me? Ăn ndơp kuôn hư̆n ta ăñ o.\"",
  "18": "Yang Yêsu ô̆t lăh yang djŏh, jêh iên ĕh du băh kăn ku sei, jêh iên kăn dơi băh mŏng mông hư̆n rŏk.",
  "19": "Jêh hư̆n, băl ƀing kna sak tŏng tuôm dêh ta ju nau Yang Yêsu, hên lup: \"Pơp mhŏ so dơi hi prŏh yang djŏh?\"",
  "20": " Jêh iên Yang Yêsu ngơi ta hên: \"Yơng pơp đăo pu me ƀê̆ ir. Bơng yơng ngĭn ngăn, ăñ ngơi ta pu me, ndă pu me mau pơp đăo ndrơm ju mlăm nggăr pai bi gu, pu me dơi ngơi ta yôk ho: \"Ăn yĕh băh tŭk ho du tŭk tŏ, ăt ĕh jrăng du ya, jêh iên so mau ju mta pơp so dơi pu me mhŏ ƀă.\"  ",
  "21": "[ Ƀê̆ dăh pôl čak ho so ĕh du ndă so mau pơp kuôl dăn jêh iên ngăl sông sa.]",
  "22": "Mông hư̆n, jăng jai hên tŏng ƀư̆n ta Galilê, Yang Yêsu ngơi ta hên: \"Nai jrăng jao Kuôn Nêh mŏng plang ti nêh,",
  "23": "jêh iên hên jrăng lăm khư̆t Khua Yang, jêh hư̆n mŏng nar tal pei, Khua Yang jrăng lŏ wêh dŏk brêh.\" Băl ƀing kna bêng pơp nguôt nư̆ng.",
  "24": "Mông hư̆n, jêh hên sak trôh ta uôn Ka-pe-na-um, băl rư̆ng jia hih ƀư̆n sak tŏng tuôm ta kăn Pê-trôih jêh iên lup: \"So khua me tôh jia ta hih ƀư̆n lăh?\"",
  "25": "Kăn ngơi: \"Mau.\" Jêh iên jai mông mư̆t mŏng hih, Yang Yê-su lup kăn luôr, klăh iêu: \"Simôn, đô̆ nă me mĭn? Băl mtao mŏng teh dih ho hên sŏk prăk mdăh rư̆ng jia u băh nêh? Băh ŏh kuôn hên tơm mdăh băh nêh ta ling?\"",
  "26": "Kăn lăh: \"Băh nêh ta ling\", Yang Yêsu ngơi ta kăn: \"Ndă kơt iên ŏh kuôn dơi ndrŏh.\"",
  "27": "Ƀê̆ dăh no di tlĕh băn lăm păk bông hên, jăng jai me sak trôh dak sĭ, ăn me ndar ka, jêh iên ñư̆p ka gĕh tal luôr hư̆n. Jêh hư̆n pơk dơk ĕh, me jrăng so ju siêc-lơ. Sŏk prăk hư̆n sak ndơp ta hên no di tôh jia ta ăñ wăt me."
}