mnong_2020_mng_mlt_mat_book/mat/17.json

{
  "1": "Pro nar ta kơi, Yang Yêsu ndơm kăn Pê-trôih wăt Yakơ jêh iên Yôhan, ŏh kăn, jêh hư̆n Khua Yang ndơm gu hên sak băk čơng tŏng ju mlăm dôn yôk jua.",
  "2": "Khua Yang mlih săk jăn ta măt hên, jêh iên môh măt Khua Yang đat ang blăh di măt nar, jêh iên ao Khua Yang ĕh đat ndrơm pơp ang.",
  "3": "Jêh iên tŏ hư̆n, kăn Mô-ih ta Ê-li nôh ƀlang ta hên, tŏng ngơi ta Khua Yang.",
  "4": "Mông hư̆n, kăn Pê-trôih pŏk dơk, ngơi ta Yang Yêsu: \"Wơ Khua Yang, băn gŭk ta o găl ngăn. Ndă Khua Yang khơñ, ăñ jrăng lăm ndŏk ta o pei mlăm tư̆m, ƀơn ta Khua Yang, ƀơn ta Mô-ih jêh iên ƀơn ta Êli.",
  "5": "Jăng jai hôm kăn ngơi, măp gu mau, ju klŏ ñuôi tŭk ram ang dơr ĕh sak guôm hên, jêh iên măp gu, mau dơk ngơi băh ñuôi tŭk tŏ, klăh iêu: “Ho jêng Kuôn khăp khơñ ngăn ăñ ji, ăñ čhô̆ brơn ngăn ta Kuôn. Ăn gưt dơk Kuôn hư̆n.”",
  "6": "Jăng jai tŏng pơp hư̆n, băl ƀing kna hên bê̆ čhư̆p măt jêh iên bhŭng tlŏh nŏh.",
  "7": "Jêh hư̆n Yang Yêsu sak mơñ jêh iên bi tŏng hên, jêh iên ngơi: \"Ăn dŏk tŏng tê̆ jêh iên ei ru bhŭng.\"",
  "8": "Ƀê̆ dăh jai hên ngơk măt tŏng tê̆, so hôm hên so nêh čuôm gu ju nau Yang Yêsu.",
  "9": "Jăng jai hên jư̆r băh yôk, Yang Yêsu tơ-tă ta hên, klăh iêu: \"Ei ru têh sơm pơp jêh pu me so ta nêh dơ-dêh tăl trôh mông Kuôn Nêh wêh dŏk brêh băh tŭk khư̆t.\"",
  "10": "Băl ƀing kna hư̆n lup Khua Yang, klăh iêu: \"Kơt iên pơp mhŏ băl tơ-ti pơp bhiên ngơi kăn Êli jrăng trôh luôr?\"",
  "11": "Mông hư̆n, Khua Yang pŏk dơk, Khua Yang ngơi: \"Khă kăn Ê-li jrăng trôh jêh iên wêh mkra djăp bruă.",
  "12": "Ƀê̆ dăh ăñ ngơi ta pu me klăh iêu kăn Ê-li jêh trôh ru, jêh iên so hên gư̆t năl kăn. Mlih ta iên, hên mhŏ ta kăn hui si pơp hên khơñ. Ăt klăh iên ya, Kuôn Nêh jrăng tŭ pơp knap mñai yơng băh hên.",
  "13": "Mông hư̆n kăh băl ƀing kna wơng Khua Yang čiêng ngơi ta kăn Yôhan Ƀaptit.",
  "14": "Jăng jai hên trôh tŭk băl uôn lan, mau ju nau nêh hư̆n sak tŏng tuôm Khua Yang, čuôn krŭng ta măt Khua Yang.",
  "15": "Jêh iên dăn: \"Wơ Khua Yang, dăn đač kuôn tlau ăñ bơ yơng kăn jêng lu nggŏh săk, knap mñai ngăn, ĕh khăng bông kăn mŏng ĭñ, jêh iên khăng lăč mŏng dak. ",
  "16": "Ăñ sak ndơp kăn ta băl ƀing kna Khua Yang, ƀê̆ dăh hên so dơi lăm băh kăn ôh.",
  "17": "Khua Yang Yêsu ngơi: \"Wơ găp pôl so đăo jêh iên rai lêč, dŏng ŏk ăñ jrăng dơi hôm gŭk yau băk pu me? Ŏk dư̆t yau ăn dơi hôm gĭr ta pu me? Ăn ndơp kuôn hư̆n ta ăñ o.\"",
  "18": "Yang Yêsu ô̆t lăh yang djŏh, jêh iên ĕh du băh kăn ku sei, ku sei dơi băh mŏng mông hư̆n.",
  "19": "Mông hư̆n, băl ƀing kna tŏng tuôm dêh ju nau Yang Yêsu, hên lup: \"Pơp mhŏ hi so dơi prŏh Yang djŏh?\"",
  "20": " Yang Yêsu wêh lah ta hên: \"Bơ yơng pơp đăo pu me ƀê̆ ir. Ăñ ngơi ngăn ta pu me, ndă pu me mau pơp đăo ram ndrơm nggăr pai bi gu, ăt pu me dơi ngơi ta yôk, klăh iêu: \"Ăn du băh tŭk ho gŭk tŭk dơ-dêh! Ĕh ăt jrăng du, jêh iên so mau ju mta pơp pu me so dơi mhŏ.\"  ",
  "21": "Ƀê̆ dăh pôl čak ho so khơñ du ndă so mau pơp kuôl dăn jêh iên ngăl sông sa.",
  "22": "Jăng jai hên hôm gŭk ta Galilê, Yang Yêsu ngơi ta băl ƀing kna Khua Yang: \"Nai jrăng jao Kuôn Nêh mŏng plang ti nêh,",
  "23": "jêh iên hên jrăng lăm khư̆t Khua Yang, trôh nar tal pei, Khua Yang jrăng wêh brêh. Băl ƀing kna bêng pơp nguôt nư̆ng.",
  "24": "Jăng jai jêh hên du ta uôn Kapenaum, băl rư̆ng jia hih ƀư̆n sak tŏng tuôm ta kăn Pêtrôis hên lup: \"Khua me so čiêng tôh jia hih ƀư̆n lăh?\"",
  "25": "Kăn ngơi: \"Mau ya! Jăng jai Pêtrôis mư̆t mŏng hih, Khua Yang lup kăn luôr, klăh iêu: \"Simôn! đô̆ nă me mĭn? Băl mtao mŏng tĕh dih ho, u băh nêh hên jrăng rư̆ng jia? Băh ŏh kuôn tơm mdăh băh nêh ta ling?\"",
  "26": "Kăn lăh: \"Băh nêh ta ling!\" Yang Yêsu ngơi ta kăn: \"Ndă kơt iên ŏh kuôn dơi ndrŏh.\"",
  "27": "Ƀê̆ dăh no di so lăm păk bông băl rư̆ng jia, ăn me sak trôh dak sĭ ndar ka, jêh iên ñư̆p ka gĕh tal luôr hư̆n. Pơk dơk ĕh, me jrăng so ju siêk-lơ. Ăn sŏk prăk hư̆n sak ndơp ta băl rư̆ng jia no di tôh jia ta ăñ jêh iên ta me."
}