mnong_2020_mng_mlt_mat_book/mat/18.json

{
  "1": "Mông hư̆n, băl ƀing kna sak trôh ta Yang Yêsu, hên lup: \"Nêh tơm jêng ram ngăn mŏng Uôn Yang Trôk?\"",
  "2": "Yang Yêsu kuôl ju nau ku sei trôh ta Khua Yang, ăn gŭk mŏng mbar hên,",
  "3": "Jêh iên ngơi: \"Ăñ ngơi ngăn ta ŏh mi, nư̆k ngăn yơh ŏh mi jrăng so dơi mư̆t mŏng Uôn Yang Trôk, ndă ŏh mi so lăm mlih jêh iên ñjêng ndrơm klăh di ku sei dêt.",
  "4": "Hư̆n yơh, nêh tơm lăm jêng kuôn nê̆ săk tơm ndrơm ku sei ho, nêh hư̆n jrăng jêng ram ngăn mŏng Uôn Yang Trôk.",
  "5": "Nêh tơm sŏk năn ăñ ruôm ju nau ku sei dêt klăh iêu, hư̆n jêng jêh ruôm ăñ.",
  "6": "Ƀê̆ dăh nêh tơm lăm ndơp ju nau mŏng băl ku sei jêh đăo ta ăñ mhŏ tĭh. Jêng găl hĭn, kăt păl tak mau ta ko kăn hư̆n jêh iên čĕ mŏng dak sĭ jru.",
  "7": "Knap mñai ta tĕh dih yơng băh pơp lăm tih! Bơ yơng pơp lăm tih ĕh jrăng mau. Ƀê̆ dăh, knap mñai ta nêh lăm ñjêng pơp păk bông ta nai.",
  "8": "Ndă ti mdăh jŏng ŏh mi lăm ndơp ŏh mi păk bông, ăn ndăč lat jêh iên čĕ ĕh du wăč băh ŏh mi. Găl hĭn ŏh mi lư̆t ti mdăh lư̆t jŏng dơi dơn pơp brêh, ta hôm nư̆m ti mdăh jŏng ƀê̆ dăh nai čĕ mŏng war iñ hui hai.",
  "9": "Ndă măt ŏh mi lăm ndơp ŏh mi păk bông, ăn liêk lat ĕh jêh iên čĕ ĕh du wăč băh ŏh mi. Găl hĭn, ŏh mi tiêh ju đăh măt dơi dơn pơp brêh, ta hôm nư̆m bar đăh măt ƀê̆ dăh nai čĕ mŏng wăr iñ ĕh sa hui hai.",
  "10": "Ăn ñjrăng, man mưč ju nau ku sei mŏng pôl ho. Bơ yơng ăñ ngơi no ŏh mi gư̆t, mŏng Uôn Yang Trôk, băl myang băl ĕh khăng so môh măt Bap ăñ tŏng trôk.",
  "11": "\tBơng yơng Kuôn Nêh jêh trôh no di lăm tlĕh nêh rai nga.",
  "12": "\tĐa lăh oh mi jrăng mĭn? Ndă ju nâo nêh mâo ju hiêng kuôn biêp, ƀê̆ dăh ju mlăm mŏng pôl ĕh sak suô̆ nga, gĕh ya nêh hân jrăng lơi sân jăt sân mlăm ta dơl yôk, jêh iên sak juôi biêp suô̆ truông lăh?",
  "13": "\tNdă dơi so kuôn biêp. Ăñ ngơi ngăn ta oh mi klăh iêu, nêh hân jrăng čhô̆ brơn ram hĭn yơng biêp eh suô, ta sân jăt sân mlăm kuôn biêp so eh suô̆.",
  "14": "\tKơt iên ya, Bap oh mi di tŏng trôk so khơñ ju nâo mŏng pôl băl ku sei ho jrăng khât nga.",
  "15": "\tNdă ju nâo oh mi d'dêh mhŏ tĭh ta pu me, ăn sak têh ta kăn hân gât pơp tĭh kăn jêh mhŏ, jăng jai čuôm gu mâo pu me ta kăn hân. Ndă kăn hân iêt pu me, pu me jrăng dơi wêh hôm oh mi tơm.",
  "16": "\tɃê̆ dăh, ndă nêh hân so khơñ iêt pu me, ăn ndơm băk ju nâo mdăh bar nâo nêh gre băk, no di pơp ngơi băh bar mdăh pei nâo nêh têh sơm broă hân čiêng ta broă hân dơi lăm klă. ",
  "17": "\tJêh iên, ndă nêh hân ăt so čiêng iêt pŏng hên, ăn têh broă hân ta Pôl Ƀrăh. Ndă nêh hân ăt so čiêng iêt băl Pôl Ƀrăh, ăn oh mi dlăng nêh hân ndrơm uôn lan d'dêh jêh iên băl rư̆ng jia.",
  "18": "\tĂñ ngơi ngăn ta oh mi, năn pơp oh mi kăt mŏng dôn tĕh jrăng hôm kăt tŏng trôk, jêh iên năn pơp oh mi rŭh mŏng dôn tĕh jrăng dơi rŭh tŏng trôk.",
  "19": "\tĂñ wêh ngơi ngăn ta oh mi, ndă bar nâo mŏng oh mi mâo ƀơn nuih nhăm ju băk mŏng dôn tĕh, djăp mta pơp hên kuôl dăn. Bap ăñ, Mtao gŭk tŏng trôk, jrăng dơi mhŏ lĕ mơt broă hân ta hên.",
  "20": "\tBơ yơng u tŭk mâo bar mdăh pei nâo sŏk năn ăñ ƀân ju băk, ăñ jrăng gŭk mŏng mbar hên.",
  "21": "\tMông hân, Pêtrôs sak lup Yang Yêsu: \"Wơ Khoa Yang, ndă mâo ju nâo oh mi mhŏ tĭh ta ăñ, ŏk dŏ ăñ jrăng đač ta nêh hân? Gĕh ya! Trôh ta pŏh dŏ?\"",
  "22": "\tYang Yêsu ngơi: \"Ăñ so ngơi ta me jêng pŏh dŏ. Ƀê̆ dăh, Pŏh jăt ta pŏh dŏ.",
  "23": "\tKlăh iên, Uôn Yang Trôk ndrơm ta ju nâo mtao hân khơñ lăm jêh ră nuôn ta băl dâk kăn.",
  "24": "\tJăng jai mtao dư̆ng ksiêm ră nuôn, nai sak ndơp ta mtao ju nâo nêh đuôm nuôn trôh ta măt bâo ta-lâng.",
  "25": "\tɃê̆ dăh, yơng nêh hân so dơi mâo pơp čiu nuôn, hân jêng mtao yoa tăč săk kăn tơm wăt ta ur, kuôn jêh iên djăp mta pơp mâo no di čiu nuôn.",
  "26": "\tHân yơh jêng kăn čuôn krŭng k'kôh ta mtao, jêh iên dăn: \"Wơ mtao! Dăn wêh gĭr ta ăñ, ăñ jrăng čiu ta mtao djăp mta pơp.\"",
  "27": "\tYơng tŏng đač mŏng nuih nhăm, hân yơh mtao kăn dâk hân ăn kăn du jêh iên đač un lĕ nuôn kăn ya.",
  "28": "\tɃê̆ dăh jêh kăn du băh iên jêh iên tŏng tuôm ju nâo nêh mhŏ broă băk hôm đuôm nuôn kăn ju hiêng đơ-niê. Kăn kŏng ti jêh iên tlăn ko pŏng ĕh, kăn ngơi: \"Ăn me čiu nuôn ăñ lak gơñ.\"",
  "29": "\tPŏng ĕh čuôn krŭng kôh dăn: \"Dăn gĭr ta ăñ, jêh hân ăñ jrăng čiu ta me.\"",
  "30": "\tɃê̆ dăh kăn so khơñ. Mlih ta iên, kăn đŏh pŏng ĕh sak nggruôn mŏng war tăl trôh mông čiu lĕ djăp mta pơp nêh hân hôm nuôn.",
  "31": "\tJăng jai băl dâk d'dêh so broă kăn mhŏ klăh iên, hên dlăng so găl. Hên sak têh ta mtao lĕ mơt broă kăn mhŏ.",
  "32": "\tHân yơh mtao kuôl kăn trôh jêh iên ngơi: \"Wơ băl dâk djŏh ƀai, ăñ jêh đač lĕ mơt nuôn ta me bơ yơng me kôh dăn ta ăñ.",
  "33": "\tPơp mhŏ me so čiêng tŏng đac̆ ta oh mi me, nrơm klah di ăñ jêh đac̆ ta me.",
  "34": "\tMtao hao nuih jêh iên jao kăn ta khoa war sak nggruôn tăl trôh mông kăn čiu lĕ mơt nuôn kăn hôm đuôm.",
  "35": "\tHân yơh, Bap ăñ gŭk tŏng trôk ăt jrăng mhŏ ta pu me klăh iên ya, ndă ju nâo nêh mŏng pu me so mâo nuih nhăm đač un ta oh mi pu me tơm."
}