mnong_2020_mng_mlt_mat_book/mat/8.json

{
  "1": "Jăng jai Yang Yêsu jư̆r băh yôk, mau ŏk nêh uôn lan sak gre Khua Yang.",
  "2": "Tŏ hư̆n, mau ju nau nêh dư̆n lôt trôh čuôn krŭng kơ-kôh ta Khua Yang jêh iên ngơi: ‘Wơ Khua Yang, ndă Khua Yang khơñ, Khua Yang ăt dơi lăm băh ăñ.\"",
  "3": "Yang Yêsu yơr ti bi ta săk kăn jêh iên ngơi: \"Ăñ khơñ! Ăn ƀrăh gơñ.\"Mông hư̆n rŏk, kăn hư̆n ƀrăh lĕ mơt dư̆n lôt.",
  "4": "Jêh hư̆n Yang Yêsu ngơi ta kăn: \"Ăn me kăh, man têh pơp ho ta nai ôh. Ƀê̆ dăh ăn sak lăm ƀlang me tơm ta khua mhŏ yang jêh iên ăn myơr pơp mhŏ yang klăh di kăn Môis jêh tơ-tă, no di lăm nư̆k ta hên.\"",
  "5": "Jăng jai Yang Yêsu jêh mư̆t mŏng uôn Kapenaum, mau ju nau khua ka han trôh dăn ta Khua Yang.",
  "6": "Klăh iêu: “Wơ Khua Yang, dư̆k ăñ ji ĕh wiên bê̆ mŏng hih jêh iên ji kôr ngăn.\"",
  "7": "Yang Yêsu ngơi ta kăn: \"Ăñ jrăng trôh lăm băh ta kăn hư̆n.\"",
  "8": "Ƀê̆ dăh khua ka han wêh lăh:  “Wơ Khua Yang, ăñ so năng ruôm Khua Yang mư̆t mŏng hih ăñ ôh, ƀê̆ dăh čuôm gu Khua Yang ngơi ta dơk, kăn dư̆k ăñ ji jrăng băh.",
  "9": "\tYơng ăñ ăt jêng ju nâo nêh gŭk mŏng sô̆ pơp dơi, jêh iên ăñ mâo ŏk băl ka han gŭk mŏng sô̆ ăñ. Ăñ ngơi kăn ho, sak gơñ! Kăn hân jrăng sak, ngơi ta kăn dơ-dêh, trôh gơñ! Kăn hân jrăng trôh, jêh iên ngơi ta dâk ăñ, mhŏ broă ho! Kăn jrăng mhŏ.\"",
  "10": "\tJăng jai Yang Yêsu tŏng kơt iên, Khoa Yang hĭ hă jêh iên ngơi ta băl jăng jai sak gre Khoa Yang: \" Ăñ ngơi ngăn ta pu me, ăñ ñăm tuôm so ju nâo nêh mâo pơp đăo ram klăh iêu mŏng Israel.",
  "11": "\tĂñ ngơi no di oh mi gât, ŏk nêh jrăng trôh băh nar lôh mdăh băh nar ñăp, hên jrăng gŭk băk jhưng Apraham, Y-sak jêh iên Yakôp mŏng uôn Yang Trôk.",
  "12": "\tɃê̆ dăh băl kuôn čar tơm di, nai jrăng čĕ ta tŭk ngo măng ta ling, tŭk jrăng mâo ôr ñim jêh iên kriêt sêk.",
  "13": "Jêh hân Yang Yêsu ngơi ta kăn khoa ka han: \"Ăn me du! Đô̆ nă me đăo broă hân jrăng jêng ta me klăh iên.\"Jêh iên kăn dâk hân dơi băh trĭp mông hân ya.",
  "14": "\tJăng jai Yang Yêsu mât mŏng hih kăn Pêtrôs, Khoa Yang so mei ur kăn Pêtrôs hôm kuôp kăt ktang bê̆ ta jhưng.",
  "15": "\tYang Yêsu bi ta ti de jêh iên kuôp kăt du băh de. Jêh hân, de dŏk rŏk mhŏ broă drông Khoa Yang.",
  "16": "Trôh mông mho, uôn lan ndơp trôh ta Yang Yêsu ŏk nêh yang djŏh mât. Khoa Yang yoa pơp ngơi prŏh băl yang djŏh hân, jêh iên lăm băh lĕ băl kuôp ji.",
  "17": "\tHân yơh jêng lăm nâk pơp ngơi têh luôr Êsai jêh ngơi klăh iêu: \"Săk Khoa Yang tơm sŏk añ pơp kuôp ji băn di wăt ta pơp koet wiên băn mơh.\"",
  "18": "Jăng jai Yang Yêsu so ŏk nêh gŭk jum dar Khoa Yang, Khoa Yang tơ-tă ăn sak gao hang đăh tŏ dak sĭ Galilê.   ",
  "19": "Mông hân, ju nâo khoa tơ-ti pơp bhiên trôh tŏng tuôm ta Khoa Yang, kăn ngơi: “Wơ Khoa! Ăñ jrăng hui gre me sak grăp tŭk.\"",
  "20": "Khoa Yang Yêsu wêh ngơi ta kăn: \"Pik mâo trôm, sâm mâo suôn, ƀê̆ dăh Kuôn Nêh so mâo tŭk kơl bôk.\"",
  "21": "\tJu nâo nêh dơ-dêh mŏng băl ƀing kna ngơi ta Khoa Yang: “Wơ Khoa Yang, ăn ta ăñ dơi sak tăp bap ăñ luôr.\"",
  "22": "Ƀê̆ dăh Yang Yêsu ngơi ta kăn: \"Ăn gre ăñ, jêh iên lơi nêh khât tăp nêh khât hên di.\"",
  "23": "\tJăng jai Yang Yêsu jêh hao plŭng, băl ƀing kna hui gre Khoa Yang mât mŏng plŭng.",
  "24": "\tTŏ hân, mâo čal yak pôh ram mŏng dak sĭ, tăl plŭng ĕh rŏng krăm yơng bêng dak. Ƀê̆ dăh Khoa Yang Yêsu hôm bê̆.",
  "25": "Băl ƀing kna sak le Khoa Yang ngĕh, hên ngơi: “Wơ Khoa Yang, dăn dŏng hi ƀă: Băn jrăng khât yơh ho!\"",
  "26": "\tYang Yêsu wêh ngơi ta hên: Wơ băl ƀê̆ pơp đăo, pơp mhŏ pu me bhŭng?\" Jêh hân Khoa Yang dŏk, ôt čal wăt dak sĭ. Kơi hân, mâo pơp nge ngêt ngăn yơh.",
  "27": "\tɃê̆ dăh hên hơ̆ hă ngăn, tŏng lup ndăng hên: \"Năn Nêh ho jêng tăl čal jêh iên dak sĭ ăt ĕh gưt ya?”",
  "28": "Jăng jai Yang Yêsu jêh trôh hang đăh tŏ jêh iên mât mŏng wăl Gadara, mâo bar nâo nêh yang djŏh mât trôh tŏng tuôm ta Khoa Yang. Hên trôh băh tŭk tu môč jêh iên đhir ngit ngăn, tăl lĕ mơt nêh so năñ nơn sak găn truông hân.",
  "29": "Tŏ hân, băl ĕh ôr driêu, klăh iêu:  “Wơ Kuôn Yang Trôk, năn pơp hi mâo ta me? Geh ya! Me trôh ta o no di lăm knap hi luôr ta mông kčăh?\"",
  "30": "\tMông hân, mâo ju pôl sâr ŏk jăng jai ĕh sa dŏng băh tŭk hên ei so wăč.",
  "31": "\tBăl yang djŏh lư̆k lư̆k dăn Yang Yêsu, klăh iêu: \"Ndă Khoa Yang prŏh băl hi, dăn ăn ta hi mât mŏng pôl sâr tŏ hân.\"",
  "32": "Jêh iên, Yang Yêsu ngơi ta ĕh: \"sak gơñ! Hân yơh băl yang djŏh du jêh iên mât mŏng pôl sâr. Tŏ hân, lĕ mơt pôl sâr dŏng băh dôn yôk tuôt tŏng mŏng dak sĭ jêh iên khât krăm mŏng dak.",
  "33": "\tɃê̆ dăh, băl kĕ sâr du tuôt mŏng uôn ram, têh sơm lĕ broă hân, wăt broă trôh ta băl nêh jêh yang djŏh mât.",
  "34": "Tŏ hân, lĕ ju uôn sak tŏng tuôm ta Yang Yêsu. Jăng jai hên so Khoa Yang, hên dăn Khoa Yang du băh wăl uôn hên di.  "
}