mnong_2020_mng_mlt_mat_book/mat/6.json

{
  "1": "Ăn dlăng nâk no di oh mi so mhŏ broă găl oh mi ta măt kuôn nêh ăn nai dơi so. Ndă kơt iên, oh mi jrăng so dơi dơn pơp khôm Bap oh mi di gŭk tŏng trôk.",
  "2": "\tHân yơh, jăng jai oh mi phă gai, man ô̆h kei ta măt tơm, ndrơm băl pra mhŏ găl khăng mhŏ mŏng hih bân jêh iên ta truông ram, no di nêh dơ-dêh nơ-nei. Ăñ ngơi ngăn ta oh mi, hên jêh dơn pơp khôm ta hên ru.",
  "3": "Bê̆ dăh jăng jai oh mi phă gai, man ăn ti kêu gât broă ti ma jăng jai mhŏ,",
  "4": "\tno di pơp phă gai oh mi di so nai dơi so. Jêh iên, Bap oh mi di, Mtao khăng so mŏng tŭk ndăp jrăng khôm ta oh mi.",
  "5": "\tJăng jai oh mi kuôl dăn, man mhŏ klăh di băl pra mhŏ găl, yơng hên khơñ dŏk kuôl dăn mŏng hih ƀân jêh iên ta kêng truông, no di ăn nai so, Ăñ ngơi ngăn ta oh mi, hên jêh dơn pơp khôm ta hên ru.",
  "6": "\tɃê̆ dăh, ting ju oh mi, jăng jai kuôl dăn, ăn mât mŏng dŭ lăm oh mi di jêh iên čăng lat ƀăng jêh hân kuôl dăn ta Bap. Mtao khăng mâo măt mŏng tŭk ndăp. Jêh hân Bap oh mi di, Mtao khăng so mŏng tŭk ndăp jrăng khôm ta oh mi.",
  "7": "\tJăng jai oh mi kuôl dăn, man ngơi lư̆k lư̆k năn pơp so yuôm, ndrơm băl uôn lan dơ-dêh khăng mhŏ, yơng hên mĭn mơn pơp ngơi ŏk Yang jrăng iêt pơp kuôl dăn.",
  "8": "\tHân yơh, man ndrơm klăh hên. Yơng Bap oh mi di gât pơp oh mi khơñ luôr ta oh mi dăn ta Yang.",
  "9": "\tKlăh iên, ăn oh mi kuôl dăn klăh iêu: “Wơ Bap hi gŭk tŏng trôk, ăn năn Bap mâo pơp nơ-nei ƀrăh ngôr.\"",
  "10": "Dăn čar Khoa Yang trôh, dăn pơp Khoa Yang khơñ dơi jêng mŏng tĕh dih ndrơm tŏng trôk.",
  "11": "\tDăn ăn ta hi nar o pơp sông sa grăp nar.",
  "12": "\tDăn đač un pơp tih hi, ndrơm hi jêh đač un ta nêh tơm lăm tih ta hi.",
  "13": "\tEi ru ndơp hi mŏng pơp mblơm, ƀê̆ dăh dăn tŏng tlĕh hi băh yang djŏh.",
  "14": "\tNdă di oh mi đač un pơp tih ta nêh dơ-dêh, Bap oh mi tŏng trôk ăt jrăng đač un ta oh mi ya.",
  "15": "\tɃê̆ dăh, ndă oh mi so đač un ta pơp tih nêh dơ-dêh, Bap oh mi ăt so đač ta pơp tih oh mi ya.",
  "16": "Jăng jai oh mi ngăl sa, man ƀlang môh măt ênguôt ndrơm băl pra mhŏ găl khăng mhŏ, yơng hên khăng lăm ƀlang môh măt huôñ ro no di nai gât năl hên ngăl sa. Ăñ ngơi ngăn ta oh mi, hên jêh dơn pơp khôm hên di ru.",
  "17": "\tɃê̆ dăh ting ju oh mi, jăng jai oh mi ngăl sa, ăn ñŏh dak ƀâo kăh tŏng bôk jêh iên tuih măt.",
  "18": "no di so blang ta nêh d’dêh gât jăng jai oh mi ngăl sa, ƀê̆ dăh ăn blang ta Bap Mtao mŏng tŭk ndăp, jêh iên Bap oh mi, Mtao so mŏng tŭk ndăp, jrăng khôm ta oh mi.",
  "19": "Man thêm ñăt ta tơm pơp yuôm tŏng dôn teh, tŭk mâo t’reh briñ sa lăm rai jêh iên mâo băl klĕ mât muôc̆ sŏk ndăp.",
  "20": "Mlih tŭk hân, ăn ñăt thêm ta tơm pơp yuôm tŏng trôk, tŭk so mâo t’rĕh mdăh briñ lăm rai, jêh iên ta tŭk băl blăc̆ so dơi mât mdăh sŏk ndăp.",
  "21": "Yơng u tŭk ngăn drăp oh mi gŭk, nuih nhăm oh mi ăt jrăng gŭk ta iên ya.",
  "22": "Kuôn măt jêng iñ kđen ta săk jăn. Hân yơ̆h, ndă di măt oh mi găl, lĕ mơt săk jăn oh mi jrăng bêñ ta pơp ang.",
  "23": "Ƀê̆ dăh ndă măt oh mi djŏh, lĕ mơt săk jăn oh mi bêñ pơp ngo măng. yơng hân ndă pơp ang mŏng oh mi hôm jêng ngo măng, pơp ngo măng hân kjam ngin ngăn.",
  "24": "So mâo nêh dơi mhŏ broă ta bar nâo khoa, yơng nêh hân jrăng hao nuih khoa ho jêh iên khăp ta khoa tŏ, mdăh  ndĕh kriêng ta khoa ho jêh iên mưc̆ mac̆ ta khoa tŏ. Oh mi so dơi mhŏ broă Yang Trôk wăt ta pơp ndrŏng săh.",
  "25": "Hân yơ̆h, Ăñ ngơi ta oh mi blăh iêu man rung răng ta pơp brê̆h tơm, blah di năn pơp băn jrăng sa mdăh di năn pơp băn jrăng ñêt, blăh di mŏng săk jăn tơm năn pơp jrăng c̆ât soh. geh ya! pơp brêh yuôm hĭn ta pơp sa jêh iên săk jăn yuôm pơp c̆ât soh?",
  "26": "Ăn dlăng nâ̆k pôl sâm tŏng trôk. Ĕh so tuôm răh mdăh riêk, ăt so tuôm ñăt thêm mŏng năm, ƀê̆ dăh Bap oh mi tŏng trôk ăt ruông ĕh. Oh mi so yuôm hĭn ta sâm lah?",
  "27": "Mâo mơh nêh mŏng oh mi mơn pơp rung răng dơi lăm mbăc̆ ƀê̆ pơp brêh tơm dŏng nê̆ ya?",
  "28": "Pơp mhŏ oh mi rung răng ta c̆hum ao, ăn oh mi mĭn ta kao diêm bri mŏng lŏ, dlăng ĕh đô̆ nă c̆ăt jêng. Ĕh so mhŏ broă, ĕh ăt so rui brai.",
  "29": "Ƀê̆ dăh ăñ ngơi no di oh mi gât, khă mtao Salômôn ta lĕ mơt pơp drư̆h ang kăn di ăt so dơi sŏh ao nhăp blăh di ju mlăm kao diêm bri  mŏng lŏ hân.",
  "30": "Wơ băl ƀê̆ pơp đăo hân, ndă di Yang Trôk lăm sŏh ta kao mŏng lŏ, jêng pơp nar o hôm, tŏng o nai c̆ĕ mŏng war iñ klăh iên, so Yang Trôk lăm sŏh ta oh mi pơp nhăp găl hĭn ta iên lah?",
  "31": "Hân yơ̆h, man rung răng jêh iên ngơi:’ năn pơp băn sa ho? Năn pơp băn jrăng ñêt ho? Mdăh năn pơp băn jrăng sŏh ho?’",
  "32": "Yơng uôn lan d’dêh, ăt khăng juôi pơp ho, bơyơng Bap tŏng trôk oh mi di gât khañ oh mi khơñ mâo lĕ mơt pơp hân.",
  "33": "Ƀê̆ dăh luôr hĭn ăn sak juôi uôn Yang Trôk ta pơp kpă Yang Trôk di, jêh iên lĕ mơt pơp hân jrăng dơi ăn ta oh mi.",
  "34": "Iên yơ̆h, man rung răng ta nar tŏng o, yơng nar tŏng o jrăng mĭn ta nar tŏng o. Grăp nar mâo djăp pơp dlĕh knap ta nar hân ru."
}