mnong_2020_mng_mlt_mat_book/mat/13.json

{
  "1": "Ăt mŏng nar hư̆n ya, Khua Yang du băh hih jêh iên sak gŭk ta hang dak sĭ.",
  "2": "Băl uôn lan tŏng ƀư̆n jư̆m dar Khua Yang ŏk ngăn, tăl Khua Yang jư̆r gŭk tŏng plŭng, băl uôn lan hên dŏk tŏng hang tê̆.",
  "3": "Khua Yang sŏk pơp hơ-hôr tơ-ti lăh hên ŏk pơp. Khua Yang ngơi klăh iêu: “Mau ju nau nêh sak răh nggăr til. ",
  "4": "Jăng jai kăn răh, ju khăn ĕh lăč ta truông păh jêh iên sư̆m sak dôñ lĕ mơt. ",
  "5": "Ju khăn dơ-dêh ĕh lăč mŏng tŭk teh mau ndrĕh, čuôm gu mau ƀê̆ teh ngăn, ĕh bư̆l so jru jêh iên ĕh huôn rŏk. ",
  "6": "Ƀê̆ dăh trôh mông măt nar jua tŏng tê̆, dôh nar đat băh tê̆, bơ yơng so mau rĕh hư̆n ĕh ro rŏk. ",
  "7": "Ju khăn dơ-dêh ya ĕh lăč mŏng puôm luôk tŏ, puôm luôk ĕh čăt pư̆m tŏng tê̆, til hư̆n ĕh tiêl dan. ",
  "8": "Mau ya ju khăn dơ-dêh ĕh lăč mŏng teh găl, til hư̆n ĕh ple. Mdăh ju nggăr ĕh ple ju hiêng, ju nggăr pro jăt, mdăh ju nggăr pei jăt. ",
  "9": "Nêh tơm mau tôr, ăn iêt!",
  "10": "Băl ƀing kna sak mơñ Khua Yang jêh iên hên lup klăh iêu: “Pơp mhŏ Khua Yang yua pơp hơ-hôr tơ-ti ta hên klăh iên?”",
  "11": "Khua Yang ngơi ta hên klăh iêu: “Bơ yơng pu me jêh Khua Yang ăn gư̆t grăp pơp yuôm ndăp mŏng uôn Yang Trôk ru, ƀê̆ dăh hên ñăm Khua Yang ăn gư̆t ôh.",
  "12": "Bơ yơng Khua Yang jrăng lŏ mbăč nêh tơm jêh mau, hên jrăng mau khăñ khăh. Ƀê̆ dăh nêh tơm so mau, Khua Yang jrăng sŏk hlao năn pơp jêh hên mau ya.",
  "13": "Bơ yơng hư̆n yơh ăñ tơ-ti hên ta pơp hơ-hôr, bơ yơng hên dlăng ƀê̆ dăh so hên so, hên iêt ƀê̆ dăh so hên tŏng jêh iên so hên wơng ju mta pơp nơn.",
  "14": "Kơt iên, yơng ta hên ho, jêh ĕh ñjêng nư̆k klăh di pơp kăn Êsai ngơi klăh iêu; ‘Pu me iêt ya, ƀê̆ dăh so pu me wơng, pu me dlăng ya ƀê̆ dăh so pu me so nơn. ",
  "15": "Bơ yơng nuih nhăm băl uôn lan ho jêh krăk dăng, tôr hên jêh tư̆k jêh iên măt hên ĕh ñư̆m. Ndă măt hên dơi so, tôr hên dơi tŏng jêh iên nuih nhăm hên dơi wơng, hên jrăng niêl mlih jêh iên ăñ jrăng lăm băh hên.’",
  "16": "Ƀê̆ dăh găl jôn ta kuôn măt pu me, bơ yơng dơi ĕh so. Găl jôn ta tôr pu me, bơ yơng dơi ĕh tŏng!",
  "17": "Ngĭn ngăn ăñ ngơi ta pu me, ŏk băl têh luôr, ŏk băl kpă tlŏh nŏh hên khơñ so pơp pu me so, ƀê̆ dăh so dơi hên so. Tlŏh nŏh hên khơñ tŏng pơp jêh pu me tŏng, ƀê̆ dăh so dơi hên tŏng. ",
  "18": "Nar o, ăn pu me iêt pơp hơ-hôr yơng ta nêh răh nggăr til.",
  "19": "Đơ nêh tơm jêh iêt pơp đăo uôn Yang Trôk, ƀê̆ dăh so dơi hên wơng, bơ yơng yang djŏh ĕh sak tlĕ pơp jêh hên iêt mŏng nuih nhăm hên. Pơp hư̆n čiêng ngơi ta nggăr til ĕh lăč mŏng truông păh.",
  "20": "Nggăr til ĕh lăc mŏng tŭk mau ndrĕh, čiêng ngơi ta nêh iêt pơp đăo, mhăč rŏk hên sŏk dơn ta pơp čhô̆ brơn. ",
  "21": "Ƀê̆ dăh mŏng nuih nhăm hên so mau rĕh, ĕh gŭk čuôm gu ƀhiêu, trôh mông hên tuôm pơp knap mñai, pơp nai mhŏ djŏh yơng băh pơp đăo, ĕh păk bông rŏk. ",
  "22": "Đơ nggăr til ĕh lăč mŏng puôm luôk, čiêng ngơi ta nêh iêt pơp đăo, ƀê̆ dăh bơ yơng hên rŭng răng ir ta pơp brêh lŏng săk wăt ta pơp hên khăp khơñ ta ngăn drăp, hư̆n yơh ĕh lăm tiêl pơp đăo jêh iên so dơi ĕh mau ple ôh. ",
  "23": "Ƀê̆ dăh đơ nggăr til lăč ta tĕh găl, hư̆n jêng nêh iêt pơp đăo jêh iên wơng pơp đăo. Hên jrăng mau ŏk ple, mau nggăr jrăng ple khăñ ju hiêng, ĕh ƀơ-ƀă pro jăt, jêh iên ĕh ƀơ-ƀă ya pei jăt.",
  "24": "Yang Yêsu pơ-prơ ta hên ƀơn pơp hơ-hôr dơ-dêh. Khua Yang ngơi: \"Uôn Yang Trôk ndrơm klăh di ju nau nêh sak răh til găl mŏng lŏ kăn.",
  "25": "Ƀê̆ dăh jăng jai lĕ mơt nêh mdei bê̆, nêh rŏh kăn hư̆n trôh jêh iên răh til băt djŏh mŏng ba kăn jêh hư̆n du.",
  "26": "Jăng jai ba nhăr jua jêh iên mau ple, mông hư̆n băt djŏh ăt pơl ya.",
  "27": "Lĕ băl dư̆k kăn tơm hih sak ngơi ta kăn: \"Wơ khua, geh ya! Nggăr til găl gu me răh mŏng lŏ me lak lăh? Pơp mhŏ mông ho wêh mau băt djŏh?\"",
  "28": "Kăn tơm hih ngơi ta hên: \"Băl rŏh ăñ mhŏ bruă ho. \"Băl dư̆k lup kăn: \"Ndă iên, me khơñ ya hi sak dŏk lĕ băt hư̆n?\"",
  "29": "Ƀê̆ dăh kăn ngơi: \"Ei ru, bơ yơng jăng jai dŏk băt, ơn pu me c̆ang dŏk băt wăt ju băk ta ba.",
  "30": "Lơi iên, lĕ bar jrăng nhăr jua ju băk tăl trôh dơm riêk. Mông riêk, ăñ jrăng tơ-tă băl riêk. Luôr ngăn, ăn dŏk lĕ mơt băt jêh hư̆n tŏng ƀư̆n ĕh čăp ju băk jêh iên jhu. Đơ ba găl, ăn kuôm lăm mư̆t mŏng năm ăñ ji.",
  "31": "Jêh hư̆n Yang Yêsu wêh pơ-prơ ta hên ƀơn pơp hơ-hôr ya. Khua Yang ngơi: \"Uôn Yang Trôk ndrơm klăh di nggăr pai bi, mau ju nau nêh sak răh mŏng lŏ kăn.",
  "32": "Gĕh ngăn, ho jêng nggăr ku êt hĭn mŏng lĕ mơt grăp mta nggăr. Ƀê̆ dăh trôh ram, ĕh jêng ram hĭn lĕ mơt grăp tơm jhi mŏng kăr. Ĕh jêng tơm jhi, jêh hư̆n sư̆m tŏng trôk dơi mhŏ suôn ta mbăh dhan ĕh.",
  "33": "Jêh hư̆n Yang Yêsu wêh prơ ta hên ƀơn pơp hơ-hôr dơ-dêh ya. \"Uôn Yang Trôk ndrơm klăh di tiêt pei, mau ju nau u ur sŏk lŭk ta pei kŏ ƀhŭk, tăl trôh mông lĕ ƀhŭk hư̆n ĕh dang.",
  "34": "Yang Yêsu ngơi lĕ mơt pơp hư̆n ta pôl uôn lan ta pơp hơ-hôr, so mau ju mta pơp Khua Yang tơ-ti hên, so tuôm yua pơp hơ-hôr ôh.",
  "35": "Pơp ho no di lăm nư̆k pơp jêh ngơi ta khua têh luôr, klăh iêu: \"Ăñ jrăng pơk dơk ăñ ngơi ta pơp hơ-hôr. Ăñ jrăng ngơi lĕ pơp ndăp dŏng băh mhei lăm ñjêng tĕh dih.\"",
  "36": "Jêh hư̆n Yang Yêsu du băh pôl uôn lan ŏk sak mư̆t mŏng hih. Băl ƀing kna Khua Yang sak ngơi ta Khua Yang: \"Dăn lơ-lang ta hi pơp hơ-hôr ngơi ta băt djŏh mŏng lŏ.\"",
  "37": "Khua Yang Yêsu ngơi klăh iêu: \"Nêh răh nggăr til găl jêng Kuôn Nêh.\"",
  "38": "Lŏ ba jêng dôn tĕh, jêh iên nggăr til găl, ho jêng kuôn so Yang Trôk. Băt djŏh jêng kuôn so yang djŏh di.",
  "39": "Jêh iên băl rŏh răh băt jêng yang djŏh. Dơm riêk jêng nar tôč dư̆t jêh iên băl riêk jêng băl myang.",
  "40": "Hư̆n yơh, klăh di băt jêh čăp ju tŭk jêh iên jhu ta iñ, mŏng nar tôč dư̆t bruă ăt jrăng trôh klăh iên.",
  "41": "Kuôn Nêh jrăng yua băl myang Yang di, jêh iên hên jrăng sak kuôm čĕ lĕ du băh Uôn Yang di, ju băk ta lĕ mơt pơp lăm tih wăt băl mhŏ tih.",
  "42": "Băl myang jrăng čĕ ĕh mŏng war iñ, tŭk hư̆n mau pơp ôr ñim jêh iên kriêt sêk.",
  "43": "Mông hư̆n, băl kpă jrăng đat ang klăh di măt nar mŏng Uôn Yang Trôk Bap hên di. Nêh mau tôr, ăn iêt!",
  "44": "Uôn Yang Trôk klăh di ngăn drăp yuôm srôm mŏng lŏ tê̆ hư̆n. Mau nêh dơi so ĕh ƀê̆ dăh wêh srôm hư̆t. Bơ yơng brơn dơi so ĕh, kăn du blŏ lĕ pơp kăn mau no di ruôt lŏ hư̆n.",
  "45": "Wêh ya! Uôn Yang Trôk klăh di ju nau nêh tăč blŏ, sak juôi mai yuôm.",
  "46": "Jăng jai jêh kăn dơi so ju mlăm mai, mau nŏh yuôm ram. Kăn du blŏ lĕ mơt pơp kăn mau no di dơi ruôt ĕh.",
  "47": "Wêh ya, Uôn Yang Trôk klăh di ju mlăm jal jêh nai trah mŏng dak sĭ jêh iên dơi ñư̆p nư̆m mta pôl ka.",
  "48": "Jăng jai bêng jal, nêh trah đŏh jal ta hang. Jêh hư̆n hên gŭk kuôm lĕ ka găl mŏng bai, ƀê̆ dăh lĕ mơt pơp so yuôm nai ndrŏh lat.",
  "49": "Bruă jrăng klăh iên ya mŏng nar tôč dư̆t. Lĕ băl myang jrăng trôh tŏng jăh băl ƀai ta băl kpă.",
  "50": "Băl myang jrăng čĕ hên mŏng war iñ, tŭk hư̆n mau pơp ôr ñim jêh iên kriêt sêk.",
  "51": "Ŏh mi dơi wơng lĕ mơt pơp ho ya? Băl ƀing kna ngơi : \"Ư! wơng ru.\"",
  "52": "Jêh hư̆n Yang Yêsu ngơi ta hên: \"Hư̆n yơh, đơ băl tơ-ti pơp bhiên jêh ñjêng ƀing kna Uôn Yang Trôk, ăt ndrơm klăh di nêh tơm hih ƀlang pơp yuôm mhei wăt pơp yau mŏng năm kăn.\"",
  "53": "Jêh Khua Yang Yêsu tơ-ti lĕ mơt pơp hơ-hôr hư̆n, Khua Yang du băh tŭk hư̆n.",
  "54": "Jêh hư̆n Yang Yêsu wêh du plŏ ta uôn tơm, tơ-ti lăh uôn lan mŏng hih ƀư̆n. Ta kơi hư̆n hên hơ̆ hă tŏng ngơi ndăng hên: \"U băh tŭk nêh ho dơi mau pơp gư̆t mĭn jêh iên pơp dơi myang klăh iên?\"",
  "55": "So gĕh kăn hư̆n jêng kuôn tlau kăn trăh phat lăh? So gĕh mei kăn de Mari lăh? So gĕh ŏh mi kăn jêng Yakơ, Yôsep, Simôn jêh iên Yuđa ĕh di?",
  "56": "So gĕh ya lĕ mơt ŏh u ur kăn hên gŭk băk băn ta o lăh? Ndă klăh iên, u băh tŭk kăn dơi mau lĕ mơt pơp ho?",
  "57": "Hên hao nuih bơ yơng Khua Yang. Ƀê̆ dăh Yang Yêsu ngơi ta hên: \"Grăp tŭk so nai mưč nêh têh luôr, čuôm gu ta uôn tơm wăt ta hih tơm.\"",
  "58": "Khua Yang so mhŏ ŏk pơp myang ta iên ôh, bơ yơng nuih nhăm hên so đăo!"
}