mnong_2020_mng_mlt_mat_book/mat/13.json

{
  "1": "Mŏng nar hư̆n, Yang Yêsu du băh hih, jêh iên gŭk ta hang dak sĭ.",
  "2": "Ju pôl uôn lan ŏk ngăn gŭk jŭm dar Khua Yang, hư̆n yơh Khua Yang sak hao mŏng plŭng jêh iên gŭk tŏng iên. Jăng jai uôn lan ŏk hên dŏk ta hang.",
  "3": "Jêh hư̆n Yang Yêsu tơ-ti hên ŏk mta ta pơp hơ-hôr. Khua Yang ngơi: \"Tŏ hư̆n, mau ju nau nêh mhŏ lŏ sak răh til.",
  "4": "Jăng jai kăn răh, mau nggăr til ĕh lăč ta kêng truông, hư̆n yơh sư̆m sak čŏh lĕ.",
  "5": "Nggăr til dơ-dêh ĕh lăč ta tŭk ŏk mau ndrĕh, ta iên so mau ŏk tĕh găl. Mhăč rŏk, ĕh dơi huôn, yơng teh ngăn so jru.",
  "6": "Ƀê̆ dăh jăng jai dôh nar đat, ĕh jrăng ƀa lĕ yơng so mau rĕh, hư̆n yơh ĕh ro răñ.",
  "7": "Nggăr dơ-dêh lăč mŏng mbar tơm luôk. Ŏk tơm luôk ĕh čăt jêh iên dlăn lĕ nggăr til.",
  "8": "Mau nggăr dơ-dêh mơh ĕh lăč ta tĕh găl jêh iên mau ple, ju nggăr ĕh ple ju hiêng, ju nggăr ĕh ple pro jăt, ju nggăr ĕh ple pei jăt.",
  "9": "Nêh mau tôr, ăn iêt.",
  "10": "Băl ƀing kna trôh ngơi ta Yang Yêsu: \"Pơp mhŏ Khua Yang tơ-ti uôn lan ta pơp hơ-hôr?\"",
  "11": "Yang Yêsu têh: \"Ŏh mi jêh dơn pơp đač no di dơi wơng pơp ndăp yuôm Uôn Yang Trôk di, ƀê̆ dăh hên ho so dơi ăn pơp gư̆t wơng klăh iên.\"",
  "12": "Bơ yơng nêh tơm jêh mau, nêh hư̆n jrăng wêh ăn, jêh iên nêh hư̆n jrăng mau khăñ khăh. Ƀê̆ dăh nêh so mau, lĕ mơt pơp kăn hư̆n dơi mau ăt nai jrăng sŏk lĕ băh kăn.",
  "13": "Hư̆n yơh jêng, pơp mhŏ ăñ tơ-ti hên ta pơp hơ-hôr. Hên so tŭ mơh, ăt ndrơm klăh di ñăm so. Hên tŏng tŭ mơh, ăt ndrơm klăh di so tŏng, so wơng.",
  "14": "Pơp têh luôr kăn Êsai ăn ta hên jêh lăm nư̆k ru, klăh iêu: \"Tôr pu me jêh iêt ru, ƀê̆ dăh ngĭn ngăn jrăng so wơng. Măt pu me jêh tuôm so ru, ƀê̆ dăh ngĭn ngăn jrăng so dơi gư̆t năl.",
  "15": "Yơng nuih nhăm uôn lan ho jêh jêng ngo măng, hên jŏk tôr, hên ñư̆m măt. No di măt so dơi so, no di tôr so tŏng, no di nuih nhăm so wơng jêh iên so plŏ ta kơi, no di dơi ăñ lăm băh un.",
  "16": "Ƀê̆ dăh găl jôn yơh ta măt ŏh mi, yơng dơi so, jêh iên găl jôn yơh ta tôr ŏh mi, yơng dơi tŏng.",
  "17": "Yơng ăñ ngơi ngăn ta ŏh mi, ŏk nêh têh luôr jêh iên nêh kpă khơñ so lĕ mơt bruă ŏh mi dơi so, ƀê̆ dăh so dơi so. Hên khơñ iêt pơp ŏh mi iêt, ƀê̆ dăh so dơi iêt.",
  "18": "Klăh iên, ăn ŏh mi iêt pơp hơ-hôr ta ju nau nêh mhŏ lŏ răh til.",
  "19": "Jăng jai ju nau nêh iêt pơp đăo băh Uôn Yang Trôk ƀê̆ dăh so wơng, hư̆n yơh yang djŏh trôh jêh iên tlĕ nga, năn pơp jêh răh mŏng nuih nhăm nêh hư̆n. Ho jêng nggăr til ĕh lăč ta kêng truông.",
  "20": "Nggăr til jêh răh mŏng tŭk ŏk mâo ndrĕh, hư̆n jêng nêh iêt pơp đăo, hên sŏk mhăč ta pơp čhô̆ brơn.",
  "21": "Ƀê̆ dăh nêh hân so mau rĕh mŏng kăn, hư̆n jêng dơi ñôt čuôm bhiêu gu. Jăng jai pơp knap mdăh ñâp nggruôn trôh yơng băh pơp đăo, hên jrăng mhăč rŏk du ta kơi.",
  "22": "Nggăr til dơi răh mŏng mbar tơm luôk, ho jêng nêh iêt pơp đăo, ƀê̆ dăh ŏk pơp mĭn ta pơp brêh nar o jêh iên pơp mblơm băh prăk kăk lăm dlăn pơp đăo jêh iên so dơi mau ple ôh.",
  "23": "Ƀê̆ dăh đơ nggăr til lăč ta tĕh găl, hư̆n jêng nêh iêt pơp đăo jêh iên wơng pơp đăo. Hên jrăng mau ŏk ple, mau nggăr jrăng ple khăñ ju hiêng, ĕh ƀơ-ƀă pro jăt, jêh iên ĕh ƀơ-ƀă ya pei jăt.",
  "24": "Yang Yêsu pơ-prơ ta hên ƀơn pơp hơ-hôr dơ-dêh. Khua Yang ngơi: \"Uôn Yang Trôk ndrơm klăh di ju nau nêh sak răh til găl mŏng lŏ kăn.",
  "25": "Ƀê̆ dăh jăng jai lĕ mơt nêh mdei bê̆, nêh rŏh kăn hư̆n trôh jêh iên răh til băt djŏh mŏng ba kăn jêh hư̆n du.",
  "26": "Jăng jai ba nhăr jua jêh iên mau ple, mông hư̆n băt djŏh ăt pơl ya.",
  "27": "Lĕ băl dâk kăn tơm hih sak ngơi ta kăn: \"Wơ khua, geh ya! Nggăr til găl gu me răh mŏng lŏ me lak lăh? Pơp mhŏ mông ho wêh mâo băt djŏh?\"",
  "28": "Kăn tơm hih ngơi ta hên: \"Băl rŏh ăñ mhŏ bruă ho. \"Băl dâk lup kăn: \"Ndă iên, me khơñ ya hi sak dŏk lĕ băt hư̆n?\"",
  "29": "Ƀê̆ dăh kăn ngơi: \"Ei ru, bơ yơng jăng jai dŏk băt, ơn pu me c̆ang dŏk băt wăt ju băk ta ba.",
  "30": "Lơi iên, lĕ bar jrăng nhăr jua ju băk tăl trôh dơm riêk. Mông riêk, ăñ jrăng tơ-tă băl riêk. Luôr ngăn, ăn dŏk lĕ mơt băt jêh hư̆n tŏng ƀư̆n ĕh čăp ju băk jêh iên jhu. Đơ ba găl, ăn kuôm lăm mư̆t mŏng năm ăñ ji.",
  "31": "Jêh hư̆n Yang Yêsu wêh pơ-prơ ta hên ƀơn pơp hơ-hôr ya. Khua Yang ngơi: \"Uôn Yang Trôk ndrơm klăh di nggăr pai bi, mau ju nau nêh sak răh mŏng lŏ kăn.",
  "32": "Gĕh ngăn, ho jêng nggăr ku êt hĭn mŏng lĕ mơt grăp mta nggăr. Ƀê̆ dăh trôh ram, ĕh jêng ram hĭn lĕ mơt grăp tơm jhi mŏng kăr. Ĕh jêng tơm jhi, jêh hư̆n sư̆m tŏng trôk dơi mhŏ suôn ta mbăh dhan ĕh.",
  "33": "Jêh hư̆n Yang Yêsu wêh prơ ta hên ƀơn pơp hơ-hôr dơ-dêh ya. \"Uôn Yang Trôk ndrơm klăh di tiêt pei, mau ju nau u ur sŏk lŭk ta pei kŏ ƀhŭk, tăl trôh mông lĕ ƀhŭk hư̆n ĕh dang.",
  "34": "Yang Yêsu ngơi lĕ mơt pơp hư̆n ta pôl uôn lan ta pơp hơ-hôr, so mau ju mta pơp Khua Yang tơ-ti hên, so tuôm yua pơp hơ-hôr ôh.",
  "35": "Pơp ho no di lăm nư̆k pơp jêh ngơi ta khua têh luôr, klăh iêu: \"Ăñ jrăng pơk dơk ăñ ngơi ta pơp hơ-hôr. Ăñ jrăng ngơi lĕ pơp ndăp dŏng băh mhei lăm ñjêng tĕh dih.\"",
  "36": "Jêh hư̆n Yang Yêsu du băh pôl uôn lan ŏk sak mư̆t mŏng hih. Băl ƀing kna Khua Yang sak ngơi ta Khua Yang: \"Dăn lơ-lang ta hi pơp hơ-hôr ngơi ta băt djŏh mŏng lŏ.\"",
  "37": "Khua Yang Yêsu ngơi klăh iêu: \"Nêh răh nggăr til găl jêng Kuôn Nêh.\"",
  "38": "Lŏ ba jêng dôn tĕh, jêh iên nggăr til găl, ho jêng kuôn so Yang Trôk. Băt djŏh jêng kuôn so yang djŏh di.",
  "39": "Jêh iên băl rŏh răh băt jêng yang djŏh. Dơm riêk jêng nar tôč dư̆t jêh iên băl riêk jêng băl myang.",
  "40": "Hư̆n yơh, klăh di băt jêh čăp ju tŭk jêh iên jhu ta iñ, mŏng nar tôč dư̆t bruă ăt jrăng trôh klăh iên.",
  "41": "Kuôn Nêh jrăng yua băl myang Yang di, jêh iên hên jrăng sak kuôm čĕ lĕ du băh Uôn Yang di, ju băk ta lĕ mơt pơp lăm tih wăt băl mhŏ tih.",
  "42": "Băl myang jrăng čĕ ĕh mŏng war iñ, tŭk hư̆n mau pơp ôr ñim jêh iên kriêt sêk.",
  "43": "Mông hư̆n, băl kpă jrăng đat ang klăh di măt nar mŏng Uôn Yang Trôk Bap hên di. Nêh mau tôr, ăn iêt!",
  "44": "Uôn Yang Trôk klăh di ngăn drăp yuôm srôm mŏng lŏ tê̆ hân. Mau nêh dơi so ĕh ƀê̆ dăh wêh srôm hât. Bơ yơng brơn dơi so ĕh, kăn du blŏ lĕ pơp kăn mau no di ruôt lŏ hư̆n.",
  "45": "Wêh ya! Uôn Yang Trôk klăh di ju nau nêh tăč blŏ, sak juôi mai yuôm.",
  "46": "Jăng jai jêh kăn dơi so ju mlăm mai, mau nhŏ yuôm ram. Kăn du blŏ lĕ mơt pơp kăn mau no di dơi ruôt ĕh.",
  "47": "Wêh ya, Uôn Yang Trôk klăh di ju mlăm jal jêh nai trah mŏng dak sĭ jêh iên dơi ñâp nư̆m mta pôl ka.",
  "48": "Jăng jai bêng jal, nêh trah đŏh jal ta hang. Jêh hư̆n hên gŭk kuôm lĕ ka găl mŏng bai, ƀê̆ dăh lĕ mơt pơp so yuôm nai ndrŏh lat.",
  "49": "Bruă jrăng klăh iên ya mŏng nar tôč dư̆t. Lĕ băl myang jrăng trôh tŏng jăh băl ƀai ta băl kpă.",
  "50": "Băl myang jrăng čĕ hên mŏng war iñ, tŭk hư̆n mau pơp ôr ñim jêh iên kriêt sêk.",
  "51": "Ŏh mi dơi wơng lĕ mơt pơp ho ya? Băl ƀing kna ngơi : \"Ư! wơng ru.\"",
  "52": "Jêh hư̆n Yang Yêsu ngơi ta hên: \"Hư̆n yơh, đơ băl tơ-ti pơp bhiên jêh ñjêng ƀing kna Uôn Yang Trôk, ăt ndrơm klăh di nêh tơm hih ƀlang pơp yuôm mhei wăt pơp yau mŏng năm kăn.\"",
  "53": "Jêh Khua Yang Yêsu tơ-ti lĕ mơt pơp hơ-hôr hư̆n, Khư̆a Yang du băh tŭk hư̆n.",
  "54": "Jêh hư̆n Yang Yêsu wêh du plŏ ta uôn tơm, tơ-ti lăh uôn lan mŏng hih ƀư̆n. Ta kơi hư̆n hên hơ̆ hă tŏng ngơi ndăng hên: \"U băh tŭk nêh ho dơi mau pơp gư̆t mĭn jêh iên pơp dơi myang klăh iên?\"",
  "55": "\tSo gĕh kăn hân jêng kuôn tlâo kăn trăh phat lăh? So gĕh mei kăn de Mari lăh? So gĕh oh mi kăn jêng Yakơ, Yôsep, Simôn jêh iên Yuđa ĕh di?",
  "56": "So gĕh ya lĕ mơt oh u ur kăn hên gŭk băk băn ta o lăh? Ndă klăh iên, u băh tŭk kăn dơi mâo lĕ mơt pơp ho?",
  "57": "\tHên hao nuih bơ yơng Khoa Yang. Ƀê̆ dăh Yang Yêsu ngơi ta hên: \"Grăp tŭk so nai mưč nêh têh luôr, čuôm gu ta uôn tơm wăt ta hih tơm.\"",
  "58": "\tKhoa Yang so mhŏ ŏk pơp myang ta iên ôh, bơ yơng nuih nhăm hên so đăo!"
}