mnong_2020_mng_mlt_mat_book/mat/13.json

{
  "1": "Mŏng nar hư̆n ya, jêh du băh hih hư̆n, Yang Yêsu sak gŭk ta kêng hang dak sĭ.",
  "2": "Băl uôn lan tŏng ƀư̆n jư̆m dar Khua Yang ŏk ngăn. Tăl Khua Yang sak hao mŏng plŭng, gŭk tŏng iên, jêh iên băl uôn lan hên dŏk tŏng hang tê̆.",
  "3": "Jêh hư̆n Khua Yang yua pơp hơ-hôr tơ-ti lăh hên ŏk pơp, ngơi klăh iêu: \"Dlăng ho, mau ju nau nêh sak răh nggăr til. ",
  "4": "Jăng jai kăn răh nggăr til, ju khăn ĕh lăč ta kêng truông păh, trôh mông sư̆m sak jêh iên ĕh čŏh lĕ mơt. ",
  "5": "Ju khăn dơ-dêh ĕh lăč mŏng tŭk teh mau ndrĕh, hư̆n jêng tŭk so mau ŏk teh ngăn ôh. Mhăč rŏk, til ĕh huôn, bơ yơng teh ĕh bư̆l so jru. ",
  "6": "Ƀê̆ dăh trôh mông măt nar jua tŏng tê̆, dôh nar đat tŏng ĕh jêh iên ĕh ro bơ yơng so mau rĕh. ",
  "7": "Ƀê̆ dăh ju khăn dơ-dêh ya ĕh lăč mŏng tơm luôk, tơm luôk ĕh čăt pư̆m tŏng tê̆, jêh iên ĕh hăm nggăr til. ",
  "8": "Ƀê̆ dăh ju khăn dơ-dêh ya ĕh lăč tŏng teh găl jêh hư̆n ĕh mau ple, ju nggăr ĕh ple ju hiêng, ju nggăr pro jăt, ju nggăr pei jăt. ",
  "9": "Nêh tơm mau tôr, ăn iêt!",
  "10": "Jêh hư̆n băl ƀing kna hên sak mơñ, hên lup Khua Yang: “Pơp mhŏ Khua Yang yua pơp hơ-hôr tơ-ti ta băl uôn lan?”",
  "11": "Ƀê̆ dăh, Khua Yang wêh ngơi ta hên, klăh iêu: “Pu me jêh Khua Yang ăn gư̆t grăp pơp yuôm ndăp mŏng uôn Yang Trôk ru, bơ hên so Khua Yang ăn ôh.",
  "12": "Bơ yơng nêh tơm jêh mau, nai jrăng \nwêh mbăč hư̆t ta kăn, jêh iên kăn jrăng dơi mau khăñ khăh hĭn ya. Ƀê̆ dăh nêh tơm so mau, nai jrăng sŏk hlao băh kăn năn pơp jêh kăn mau ya.",
  "13": "Yơng băh pơp ho yơh, ăñ tơ-ti hên ta pơp hơ-hôr, bơ yơng hên dlăng tŭ mơh, ăt so dơi hên so; jêh iên hên iêt tŭ mơh, so dơi hên tŏng, ăt so dơi hên wơng ya.",
  "14": "Jêh iên ĕh lăm nư̆k pơp nêh têh luôr Ê-sai ngơi ta hên klăh iêu; 'Khă iêt pơp tơ ti, pu me jrăng iêt ya, ƀê̆ dăh ngĭn ngăn so dơi pu me wơng, ndă pu me dlăng, pu me jrăng dlăng ya, ƀê̆ dăh ngĭn ngăn so dơi pu me so nơn. ",
  "15": "Bơ yơng nuih nhăm băl uôn lan ho jêh krăk dăng, tôr hên tŏng ta pơp dlĕh dlan, jêh iên măt hên ĕh ñư̆m, ơn hên dơi so ta măt, tŏng ta tôr, dơi wơng ta nuih nhăm, jêh hư̆n hên jrăng niêl mlih, jêh iên ăñ jrăng lăm băh hên.",
  "16": "Ƀê̆ dăh găl jôn ta măt pu me di, bơ yơng dơi ĕh so jêh iên tôr pu me, bơ yơng dơi ĕh tŏng.",
  "17": "Ngĭn ngăn, ăñ ngơi ta pu me klăh iêu ŏk băl têh luôr wăt băl kpă tlŏh nŏh hên khơñ so pơp pu me so, ƀê̆ dăh so dơi hên so, jêh iên hên khơñ tŏng pơp jêh pu me tŏng, ƀê̆ dăh so dơi hên tŏng. ",
  "18": "Hư̆n yơh, ăn pu me iêt pơp hơ-hôr yơng ta nêh răh nggăr til.",
  "19": "Đơ nêh tơm iêt pơp đăo uôn Yang Trôk, ƀê̆ dăh so dơi hên wơng, yang djŏh ĕh sak jêh iên tlĕ lĕ pơp jêh nai răh mŏng nuih nhăm hên. Ho jêng nggăr til ĕh lăč mŏng truông păh.",
  "20": "Bơ nggăr til ĕh lăc mŏng tŭk mau ndrĕh, hư̆n jêng nêh iêt pơp đăo jêh iên hlŏng sŏk rŏk pơp đăo ta nuih nhăm čhô̆ brơn;",
  "21": "ƀê̆ dăh nêh hư̆n so mau rĕh mŏng hên, jêh iên čuôm gu ĕh brêh ƀhiêu; jêh hư̆n trôh mông tuôm pơp knap mñai mdăh pơp nai mhŏ djŏh yơng băh pơp đăo, nêh hư̆n ĕh păk bông rŏk. ",
  "22": "Đơ nggăr til ĕh lăč mŏng puôm luôk, ho jêng nêh iêt pơp đăo, ƀê̆ dăh au hên rŭng răng ir ta pơp brêh ho jêh iên hên khăp khơñ ta pơp ndrŏng săh hư̆n yơh ĕh lăm tiêl pơp đăo jêh iên so dơi ĕh mau ple ôh. ",
  "23": "Bơ nggăr til ĕh lăč mŏng teh găl, hư̆n jêng nêh iêt pơp đăo jêh iên gư̆t wơng, nêh hư̆n jrăng mau ple ŏk, jêh iên ju nggăr ĕh ple ju hiêng, ju nggăr pro jăt, ju nggăr pei jăt.”",
  "24": "Khua Yang lŏ wêh ngơi ju mta pơp hơ-hôr dơ-dêh ta hên, klăh iêu: “Uôn Yang Trôk ndrơm klăh di ju nau sak răh nggăr til găl mŏng lŏ kăn. ",
  "25": "Ƀê̆ dăh mông nai bê̆, rŏh kăn di sak jêh iên ĕh răh nggăr băt ju băk ba mi jêh iên ĕh du.",
  "26": "Trôh mông ba ĕh čăt jua jêh iên ĕh lôh, mông hư̆n băt ăt ĕh pơl ya.",
  "27": "Mông hư̆n, băl dư̆k nêh tơm lŏ hư̆n, hên sak dlăng, jêh iên ngơi ta kăn: Wơ khua, so lăh geh nggăr til găl jêh me răh mŏng lŏ me lak lăh? Mă kơt iên, băt u băh tŭk ĕh mau?’ ",
  "28": "Ƀê̆ dăh kăn ngơi ta hên: ‘Băl rŏh ru mhŏ bruă hư̆n.’ Jêh hư̆n băl dư̆k ngơi ta kăn; ‘Ndă iên, me khơñ ya hi sak ta iên, hi dŏk lĕ băt hư̆n?’",
  "29": "Ƀê̆ dăh khua ngơi klăh iêu: ‘Ei ru, ơn dăh jăng jai pu me dŏk băt, pu me čang dŏk li ba mi ju băk ta băt. ",
  "30": "Lơi bar mta hư̆n ĕh čăt jêng ju băk tăl trôh dơm riêk, jêh iên trôh mông riêk ăñ jrăng tơ-tă ta băl riêk: Luôr hĭn ăn hên dŏk lĕ mơt băt jêh iên čăp ĕh ju tŭk no di jhu lat ĕh, ƀê̆ dăh ăn hên ñăt lĕ mơt ba mi mŏng năm ăñ ji tŏ.’”",
  "31": "Khua Yang lŏ wêh sŏk pơp hơ-hôr dơ-dêh ya tơ-ti hên klăh iêu: “Uôn Yang Trôk ndrơm klăh di nggăr pai bi ju nau nêh răh mŏng lŏ kăn. ",
  "32": "nggăr pai hư̆n, kuôn nê̆ hĭn ta lĕ mơt nggăr dơ-dêh, ƀê̆ dăh trôh mông ĕh čăt jua, mông hư̆n ĕh ñjêng ram hĭn lĕ mơt ta grăp pai jêh iên tăl ĕh ñjêng jhi dlei, tăl sư̆m srai dơi ĕh sak mhŏ suôn tŏng mbăh dhan ĕh ya.”",
  "33": "Khua Yang wêh sŏk pơp hơ-hôr dơ-dêh ya tơ-ti hên klăh iêu: “Uôn Yang Trôk ndrơm klăh di pei ju nau nêh u ur sŏk tŏng lŭk mŏng thŭng ƀhŭk, tăl trôh mông ĕh dang lĕ mơt ƀhŭk hư̆n.”",
  "34": "Khua Yang wêh sŏk pơp hơ-hôr dơ-dêh ya tơ-ti hên klăh iêu: “Uôn Yang Trôk ndrơm klăh di pei ju nau nêh u ur sŏk tŏng lŭk mŏng thŭng ƀhŭk, tăl trôh mông ĕh dang lĕ mơt ƀhŭk hư̆n.”",
  "35": "o di lăm nư̆k lĕ mơt pơp nêh têh luôr ngơi klăh iêu: “Ăñ jrăng pŏk dơk ngơi pơp hơ-hôr, ăñ jrăng lơ-lang lĕ mơt pơp yuôm ndăp dŏng băh mhei rih ñjêng trôk teh.”",
  "36": "Jêh ăn băl uôn lan du, Yang Yêsu mư̆t mŏng hih. Băl ƀing kna sak ngơi ta Khua Yang klăh iêu: “Dăn Khua Yang lơ-lang pơp hơ-hôr yơng ta băt ĕh gŭk mŏng lŏ hư̆n ta hi.”",
  "37": "Khua Yang têh ta hên klăh iêu: “Nêh sak răh nggăr til găl, čiêng ngơi ta Kuôn Nêh,",
  "38": "lŏ čiêng ngơi ta dôn teh, nggăr til čiêng ngơi ta ŏh kuôn čar Yang Trôk, băt čiêng ngơi ta ŏh kuôn yang jhat. ",
  "39": "Băl rŏh răh băt hư̆n čiêng ngơi ta yang jhat, dơm riêk čiêng ngơi ta nar tôč dư̆t, nêh riêk čiêng ngơi ta băl myang. ",
  "40": "Đô̆ nă nai dŏk băt jêh iên nai jhu mŏng iñ, ăt klăh iên ya mŏng nar tôč dư̆t teh dih o tlak. ",
  "41": "Kuôn Nêh jrăng yua nêh myang Yang di tŏng ƀư̆n lĕ mơt băl djŏh wăt ta lĕ mơt băl mhŏ ƀai du băh čar Yang di, ",
  "42": "jêh iên Khua Yang jrăng čĕ mŏng war iñ, hư̆n jêng tŭk ôr ñim jêh iên kriêt sêk.",
  "43": "Mông hư̆n, đơ băl kpă hên jrăng đat ang klăh di măt nar mŏng čar Bap hên di. Nêh tơm mau tôr, ăn iêt!”",
  "44": "Uôn Yang Trôk ndrơm klăh di pơp yuôm bhăn nai tăp bư̆l mŏng lôk lŏ, mau ju nau nêh ban ĕh jêh iên kăn srôm. Kăn čhô̆ brơn jêh iên kăn du hih, kăn blŏ lĕ mơt ngăn drăp kăn jêh iên kăn ruôt lŏ hư̆n.”",
  "45": "Uôn Yang Trôk ndrơm klăh di ju nau nêh tăč bro sak juôi mai yuôm. ",
  "46": "jêh dơi kăn so mai yuôm hư̆n, kăn blŏ lĕ mơt ngăn drăp kăn jêh iên kăn ruôt mai yuôm hư̆n.” ",
  "47": "Uôn Yang Trôk ndrơm klăh di ju nau nêh ñư̆p ka trăh jal mŏng dak sĭ, kăn dơi ñư̆p djăp mta pôl ka. ",
  "48": "Trôh mông jal kăn jêh bêng, kăn đŏh jal tŏng gung, jêh iên kăn gŭk mŏng sô̆, kăn săč lĕ mơt ka găl kăn ăn tŭk dêh, pơp djŏh kăn čĕ ta ling. ",
  "49": "Bruă jrăng klăh iên ya mŏng nar tôč dư̆t. Lĕ băl myang jrăng trôh tŏng jăh băl ƀai ta băl kpă.",
  "50": "Băl myang jrăng čĕ hên mŏng war iñ, tŭk hư̆n mau pơp ôr ñim jêh iên kriêt sêk.",
  "51": "Ŏh mi dơi wơng lĕ mơt pơp ho ya? Băl ƀing kna ngơi : \"Ư! wơng ru.\"",
  "52": "Jêh hư̆n Yang Yêsu ngơi ta hên: \"Hư̆n yơh, đơ băl tơ-ti pơp bhiên jêh ñjêng ƀing kna Uôn Yang Trôk, ăt ndrơm klăh di nêh tơm hih ƀlang pơp yuôm mhei wăt pơp yau mŏng năm kăn.\"",
  "53": "Jêh Khua Yang Yêsu tơ-ti lĕ mơt pơp hơ-hôr hư̆n, Khua Yang du băh tŭk hư̆n.",
  "54": "Jêh hư̆n Yang Yêsu wêh du plŏ ta uôn tơm, tơ-ti lăh uôn lan mŏng hih ƀư̆n. Ta kơi hư̆n hên hơ̆ hă tŏng ngơi ndăng hên: \"U băh tŭk nêh ho dơi mau pơp gư̆t mĭn jêh iên pơp dơi myang klăh iên?\"",
  "55": "So gĕh kăn hư̆n jêng kuôn tlau kăn trăh phat lăh? So gĕh mei kăn de Mari lăh? So gĕh ŏh mi kăn jêng Yakơ, Yôsep, Simôn jêh iên Yuđa ĕh di?",
  "56": "So gĕh ya lĕ mơt ŏh u ur kăn hên gŭk băk băn ta o lăh? Ndă klăh iên, u băh tŭk kăn dơi mau lĕ mơt pơp ho?",
  "57": "Hên hao nuih bơ yơng Khua Yang. Ƀê̆ dăh Yang Yêsu ngơi ta hên: \"Grăp tŭk so nai mưč nêh têh luôr, čuôm gu ta uôn tơm wăt ta hih tơm.\"",
  "58": "Khua Yang so mhŏ ŏk pơp myang ta iên ôh, bơ yơng nuih nhăm hên so đăo!"
}