mnong_2020_mng_mlt_mat_book/mat/3.json

{
  "1": "Mŏng nar hư̆n kăn Yôhan Ƀap-tit sak tơ-ti pơp đăo mŏng tač ndrăñ čar Yuđê ,",
  "2": "ngơi klăh iêu: “Ăn pu me niêl mlih, bơ yơng uôn Yang Trôk jêh trôh mơñ!”",
  "3": "Bơ yơng ho jêng nêh yơng băh nêh têh luôr Êsai ngơi klăh iêu: “Mau dơk nai ôr tĕh mŏng tač ndrăñ! Ăn mkra truông Yang di, lăm tŏng lĕ mơt ndrôih Khua Yang!”",
  "4": "Kăn Yôhan ho sŏh ao ta nuôk lak đa, kăn đuôt yăn nuôi ta sei tau, pơp kăn sa jêng krăh jêh iên dak wei bri. ",
  "5": "Mông hư̆n lĕ mơt băl uôn lan mŏng uôn Yêrusalem, čar Yuđê wăt ta lĕ mơt băl uôn lan jư̆m dar wăl dak kruông Yôđan, sak ta kăn gơ-gu. ",
  "6": "Jêh iên jăng jai hên sơm pơp tih ta kăn  kăn mhŏ ƀap-tem ta hên mŏng dak kruông Yôđan,",
  "7": "Jăng jai kăn Yôhan so ŏk băl Pharisi jêh iên băl Sađusê sak tŭ ƀap-tem, kăn ngơi ta hên: “Wơ pôl nhuôr bêh khơih! Nêh tơm sơm ta pu me, no di pu me du plăč băh pơp hao nuih jrăng trôh?",
  "8": "Kơt iên, ăn pu me mau ple năng ta pơp niêl mlih, ",
  "9": "jêh iên đăm pu me rña săk no di ngơi; ‘Pang yo hi jêng Abraham,’ bơ yơng ăñ ngơi nư̆k ta pu me no di pu me gư̆t, Yang Trôk dơi mblư̆ bôk mau ho no di ĕh ñjêng ŏh kuôn ta kăn Abraham!",
  "10": "Nar o, sung jêh nai kơng tŏng tơm jhi ru! Kơt iên, năn tơm jhi so ĕh mau ple găl nai jrăng kăl jêh iên nai jhu mŏng iñ. ",
  "11": "Bruă ăñ jêng, ăñ mhŏ ƀap tem ta pu me mŏng dak no di pu me gư̆t niêl mlih pơp tih. Ƀê̆ dăh Mtao jrăng trôh ta kơi ăñ ho, mau pơp myang gao hĭn ta ăñ, ăñ so năng no di ñôt jep ta Khua Yang. Hư̆n jêng Mtao jrăng mhŏ ƀap tem pu me ư ta Yang Ngăt Găl jêh iên ta iñ. ",
  "12": "Khua Yang ñôt dông jêh iên prôh ngôr tŭk prăh ba Yang di, jêh hư̆n Khua Yang jrăng tŏng ƀư̆n lĕ mơt ba mŏng năm tŏ, đơ no ba ta djhôp ĕh Khua Yang jrăng jhu mŏng iñ so gư̆t khư̆t.”",
  "13": "Mông hư̆n, Khua Yang Yêsu sak băh čar Ga-li-lê tê̆ trôh ta kăn Yôhan mŏng dak kruông Yôđan, no di yua kăn Yôhan mhŏ ƀap tem. ",
  "14": "Ƀê̆ dăh kăn Yôhan ơ̆ jêh iên kăn ngơi ta Khua Yang: “Ăñ ho jêng nêh geh Khua Yang mhŏ ƀap tem, pơp mhŏ Khua Yang lŏ mhŏ hư̆t ta ăñ klăh iêu?” Yang Yêsu ngơi ta kăn:",
  "15": "“Nar o, ăn me mhŏ yơh! Bơ yơng găl hĭn ăn băn lăm jêh lĕ mơt bruă kpă!” Jêh hư̆n kăn Yôhan gưt dơk Khua Yang. ",
  "16": "Jêh gu mhŏ ƀap tem, Yang Yêsu dŏk du băh dak. Mông hư̆n ĕh pŏk tal trôk băh tê̆, Khua Yang so Yang Ngăt Găl Yang Trôk jư̆r băh tê̆ klăh di sư̆m tơp jêh iên jrăm tŏng Khua Yang. ",
  "17": "Mông hư̆n rŏk mau dơk ngơi băh trôk klăh iêu: “Ho jêng Kuôn khăp khơñ ăñ ji, găl nuih nhăm ăñ mŏng djăp bruă!”"
}