mnong_2020_mng_mlt_mat_book/mat/19.json

{
  "1": "Bruă ĕh trôh hư̆n jăng jai jêh lĕ pơp  Yang Yê-su tơ-ti, Khua Yang du băh Ga-li-lê jêh iên sak trôh ta wăl Yuđê đăh tŏ hang dak kruông Yôđăn.",
  "2": "Mau pôl uôn lan ŏk ngăn gre Khua Yang jêh iên Khua Yang lăm băh pơp kuôp ji hên ta iên.",
  "3": "Băl Pha-ri-si sak tŏng tuôm ta Khua Yang, no di lông dlăng Khua Yang jêh iên lup: \"Dơi ya ju nau nêh tlơ-tlau kăn  ndrŏh ur kăn bơ yơng djăp mta pơp lăh?\"",
  "4": "Jai wêh lăh, Khua Yang ngơi: \"Pu me ñăm tuôm dlăng mŏng ră ngơi lăh Mtao rih ñjêng dŏng băh mhei bôk jêh lăm jêng hên, ju nau tlơ-tlau ta ju nau u ur,",
  "5": "jêh iên ngơi: 'Yơng kơt iên, băl tlơ-tlau jrăng yĕh băh mei jêh iên bap no di tŏng tlăč băk ur kăn, jêh hư̆n lĕ bar jrăng ñjêng ƀơn lŏng săk' lăh?\"",
  "6": "Kơt iên, hên so hôm jêng bar ôh, ƀê̆ dăh jêng ƀơn lŏng săk gu. Hư̆n yơh, năn pơp jêh Yang Trôh tŏng tlăč ju băk, kuôn nêh so dơi wêh tŏng tlăh.\"",
  "7": "Hên lup Khua Yang: \"Ndă iên! Pơp mhŏ kăn Môis tơ-tă hi, ăn mhŏ ju pŏk ră tăm lơi jêh iên ndrŏh ur?\"",
  "8": "Khua Yang ngơi: \"Yơng pơp krăk dăng nuih nhăm pu me hư̆n Môis ăn dơi ndrŏh ur, ƀê̆ dăh dŏng băh luôr bôk lak so mau klăh iên.",
  "9": "Ăñ ngơi no pu me gư̆t, nêh tơm ndrŏh ur so gĕh yơng băh pơp dŏng tư̆r, jêh iên gŭk nêh dơ-dêh, kăn hư̆n jêng nêh mhŏ tih dŏng tư̆r. Nêh tơm gŭk ur jêh nai ndrŏh hư̆n ăt jêng nêh mhŏ tĭh dŏng tư̆r ya.",
  "10": "Băl ƀing kna tŏng ngơi ta Yang Yêsu: \"Ndă băl tlơ-tlau mhŏ ta ur klăh iên, năn pơp yuôm wêh čiêng gŭk ur hư̆t.\"",
  "11": "Ƀê̆ dăh Yang Yêsu ngơi ta hên: \"So mau grăp nêh dơi dơn pơp tơ-ti ho ƀă, čuôm gu nêh tơm nai dơi ăn pơp hư̆n gu.\"",
  "12": "Bơ yơng mau nêh nên dŏng băh mhei lai săk, jêh iên mau nêh nên yơng băh plang ti nêh. Ăt mau ya nêh yơng Uôn Yang Trôk kăn lăm ñjêng nên kăn tơm. Nêh tơm dơi sŏk dơn pơp tơ-ti ho ăn sŏk dơn yơh.",
  "13": "Năng hư̆n, nai sak ndơp băl ku sei dêt ta Khua Yang, no di Khua Yang bi ti ta băl ĕh jêh iên kuôl dăn, ƀê̆ dăh băl ƀing kna ƀuăh hên.",
  "14": "Jêh iên, Yang Yêsu ngơi: \"Lơi băl ku sei sak trôh ta ăñ, man ghă băl ĕh. Bơ yơng Uôn Yang Trôk thêm ta nêh tơm ndrơm klăh di ku sei.\"",
  "15": "Khua Yang bi ti ta băl ĕh jêh iên Khua Yang du băh iên.",
  "16": "Tŏ hư̆n, mau ju nau nêh sak tuôm ta Yang Yêsu, Jêh iên lup: \"Wơ Khua Yang! năn bruă găl ăñ jrăng mhŏ no di dơi dơn pơp brêh hui hai?\"",
  "17": "Yang Yêsu ngơi ta kăn: \"Pơp mhŏ me lup ăñ ta bruă găl? Čuôm gu mau ju nau Mtao jêng găl jôn, ƀê̆ dăh ndă me khơñ dơi dơn pơp brêh, ăn ñôt lĕ mơt pơp bhiên.\"",
  "18": "Kăn hư̆n wêh lup Khua Yang: \"Năn pơp bhiên hư̆n?\" Khua Yang Yêsu ngơi: \"Man lăm khư̆t nêh, man mhŏ tĭh dŏng tư̆r, man tlĕ blăč, man têh sơm huôk,",
  "19": "ăn mpŭ ta mei bap, jêh iên khăp ta nêh kiêu ma ndrơm săk jăn tơm.\"",
  "20": "Kăn tlau nu sak ngơi ta Khua Yang: \"Ăñ jêh gưt djăp mta pơp bhiên hư̆n. Năn pơp hôm ăñ ñăm mhŏ?\"",
  "21": "Yang Yêsu ngơi ta kăn: \"Ndă me khơñ dơi nư̆m nơn, ăn sak blŏ lĕ mơt pơp me mau jêh iên phă gai ta băl ƀun, jêh hư̆n me jrăng mau pơp yuôm bhăn tŏng trôk. Ta kơi hư̆n, ăn du ta o jêh iên gre ăñ.\"",
  "22": "Ƀê̆ dăh jêh kăn tlau nu tŏng pơp Yang Yêsu ngơi, kăn du ta pơp nguôt nư̆ng bơ yơng kăn mau ŏk pơp no.",
  "23": "Yang Yêsu ngơi ta băl ƀing kna: \"Ăñ ngơi ngăn ta pu me, nêh ndrŏng mư̆t mŏng Uôn Yang Trôk dlĕh ngăn.\"",
  "24": "Ăñ ăn pu me gư̆t, lak đa mư̆t mŏng trôm nư̆ng lưih hĭn ta nêh ndrŏng mư̆t mŏng Uôn Yang Trôk.",
  "25": "Jăng jai băl ƀing kna tŏng klăh iên, hên hơ̆ hă ngăn, jêh iên lup: \"Ndă kơt iên nêh tơm dơi tlĕh?\"",
  "26": "Yang Yêsu dlăng ta hên jêh iên ngơi: \"Bruă hư̆n nêh so dơi mhŏ ôh, ƀê̆ dăh ta Yang Trôk, lĕ mơt bruă dơi gơ-gu.\"",
  "27": "Jêh hư̆n Pêtrôis lup Khua Yang: \"Dlăng ho! Hi jêh ndrŏh lĕ mơt grăp mta pơp mau no di gre Khua Yang. Ndă kơt iên năn pơp hi dơi dơn?\"",
  "28": "Yang Yêsu ngơi ta hên: \"Ăñ ngơi ngăn ta pu me, mŏng nŭk mhei, jăng jai Kuôn Nêh gŭk tŏng Jhưng Mtao guh ang, pu me jêng nêh jêh gre ăñ, pu me ăt jrăng gŭk ta măt bar jhưng mtao, phat dôih măt bar găp pôl Israel.",
  "29": "Nêh tơm jêh ndrŏh hĭh tư̆m, ŏh mi, rôh mei, mei, bap, ur, kuôn mdăh tĕh lŏ yơng băh năn ăñ, jrăng dơi dơn khăñ ju hiêng dŏ jêh iên dơi dơn pơp brêh hui hai.",
  "30": "Ƀê̆ dăh mau ŏk nêh khăng ñjêng bôk jrăng ñjêng hư̆t ta kơi, jêh iên mau nêh băh kơi dư̆t jrăng ñjêng bôk."
}