mnong_2020_mng_mlt_mat_book/mat/13.json

{
  "1": "Mŏng nar hư̆n ya, jêh du băh hih hư̆n, Yang Yêsu sak gŭk ta kêng hang dak sĭ.",
  "2": "Băl uôn lan tŏng ƀư̆n jư̆m dar Khua Yang ŏk ngăn. Tăl Khua Yang sak hao mŏng plŭng, gŭk tŏng iên, jêh iên băl uôn lan hên dŏk tŏng hang tê̆.",
  "3": "Jêh hư̆n Khua Yang yua pơp hơ-hôr tơ-ti lăh hên ŏk pơp, ngơi klăh iêu: \"Dlăng ho, mau ju nau nêh sak răh nggăr til. ",
  "4": "Jăng jai kăn răh nggăr til, ju khăn ĕh lăč ta kêng truông păh, trôh mông sư̆m sak jêh iên ĕh čŏh lĕ mơt. ",
  "5": "Ju khăn dơ-dêh ĕh lăč mŏng tŭk teh mau ndrĕh, hư̆n jêng tŭk so mau ŏk teh ngăn ôh. Mhăč rŏk, til ĕh huôn, bơ yơng teh ĕh bư̆l so jru. ",
  "6": "Ƀê̆ dăh trôh mông măt nar jua tŏng tê̆, dôh nar đat tŏng ĕh jêh iên ĕh ro bơ yơng so mau rĕh. ",
  "7": "Ƀê̆ dăh ju khăn dơ-dêh ya ĕh lăč mŏng tơm luôk, tơm luôk ĕh čăt pư̆m tŏng tê̆, jêh iên ĕh hăm nggăr til. ",
  "8": "Ƀê̆ dăh ju khăn dơ-dêh ya ĕh lăč tŏng teh găl jêh hư̆n ĕh mau ple, ju nggăr ĕh ple ju hiêng, ju nggăr pro jăt, ju nggăr pei jăt. ",
  "9": "Nêh tơm mau tôr, ăn iêt!",
  "10": "Jêh hư̆n băl ƀing kna hên sak mơñ, hên lup Khua Yang: “Pơp mhŏ Khua Yang yua pơp hơ-hôr tơ-ti ta băl uôn lan?”",
  "11": "Ƀê̆ dăh, Khua Yang wêh ngơi ta hên, klăh iêu: “Pu me jêh Khua Yang ăn gư̆t grăp pơp yuôm ndăp mŏng uôn Yang Trôk ru, bơ hên so Khua Yang ăn ôh.",
  "12": "Bơ yơng nêh tơm jêh mau, nai jrăng \nwêh mbăč hư̆t ta kăn, jêh iên kăn jrăng dơi mau khăñ khăh hĭn ya. Ƀê̆ dăh nêh tơm so mau, nai jrăng sŏk hlao băh kăn năn pơp jêh kăn mau ya.",
  "13": "Yơng băh pơp ho yơh, ăñ tơ-ti hên ta pơp hơ-hôr, bơ yơng hên dlăng tŭ mơh, ăt so dơi hên so; jêh iên hên iêt tŭ mơh, so dơi hên tŏng, ăt so dơi hên wơng ya.",
  "14": "Jêh iên ĕh lăm nư̆k pơp nêh têh luôr Ê-sai ngơi ta hên klăh iêu; 'Khă iêt pơp tơ ti, pu me jrăng iêt ya, ƀê̆ dăh ngĭn ngăn so dơi pu me wơng, ndă pu me dlăng, pu me jrăng dlăng ya, ƀê̆ dăh ngĭn ngăn so dơi pu me so nơn. ",
  "15": "Bơ yơng nuih nhăm băl uôn lan ho jêh krăk dăng, tôr hên tŏng ta pơp dlĕh dlan, jêh iên măt hên ĕh ñư̆m, ơn hên dơi so ta măt, tŏng ta tôr, dơi wơng ta nuih nhăm, jêh hư̆n hên jrăng niêl mlih, jêh iên ăñ jrăng lăm băh hên.",
  "16": "Ƀê̆ dăh găl jôn ta măt pu me di, bơ yơng dơi ĕh so jêh iên tôr pu me, bơ yơng dơi ĕh tŏng.",
  "17": "Ngĭn ngăn, ăñ ngơi ta pu me klăh iêu ŏk băl têh luôr wăt băl kpă tlŏh nŏh hên khơñ so pơp pu me so, ƀê̆ dăh so dơi hên so, jêh iên hên khơñ tŏng pơp jêh pu me tŏng, ƀê̆ dăh so dơi hên tŏng. ",
  "18": "Hư̆n yơh, ăn pu me iêt pơp hơ-hôr yơng ta nêh răh nggăr til.",
  "19": "Đơ nêh tơm iêt pơp đăo uôn Yang Trôk, ƀê̆ dăh so dơi hên wơng, yang djŏh ĕh sak jêh iên tlĕ lĕ pơp jêh nai răh mŏng nuih nhăm hên. Ho jêng nggăr til ĕh lăč mŏng truông păh.",
  "20": "Bơ nggăr til ĕh lăc mŏng tŭk mau ndrĕh, hư̆n jêng nêh iêt pơp đăo jêh iên hlŏng sŏk rŏk pơp đăo ta nuih nhăm čhô̆ brơn;",
  "21": "ƀê̆ dăh nêh hư̆n so mau rĕh mŏng hên, jêh iên čuôm gu ĕh brêh ƀhiêu; jêh hư̆n trôh mông tuôm pơp knap mñai mdăh pơp nai mhŏ djŏh yơng băh pơp đăo, nêh hư̆n ĕh păk bông rŏk. ",
  "22": "Đơ nggăr til ĕh lăč mŏng puôm luôk, ho jêng nêh iêt pơp đăo, ƀê̆ dăh au hên rŭng răng ir ta pơp brêh ho jêh iên hên khăp khơñ ta pơp ndrŏng săh hư̆n yơh ĕh lăm tiêl pơp đăo jêh iên so dơi ĕh mau ple ôh. ",
  "23": "Bơ nggăr til ĕh lăč mŏng teh găl, hư̆n jêng nêh iêt pơp đăo jêh iên gư̆t wơng, nêh hư̆n jrăng mau ple ŏk, jêh iên ju nggăr ĕh ple ju hiêng, ju nggăr pro jăt, ju nggăr pei jăt.”",
  "24": "Khua Yang lŏ wêh ngơi ju mta pơp hơ-hôr dơ-dêh ta hên, klăh iêu: “Uôn Yang Trôk ndrơm klăh di ju nau sak răh nggăr til găl mŏng lŏ kăn. ",
  "25": "Ƀê̆ dăh mông nai bê̆, rŏh kăn di sak jêh iên ĕh răh nggăr băt ju băk ba mi jêh iên ĕh du.",
  "26": "Trôh mông ba ĕh čăt jua jêh iên ĕh lôh, mông hư̆n băt ăt ĕh pơl ya.",
  "27": "Mông hư̆n, băl dư̆k nêh tơm lŏ hư̆n, hên sak dlăng, jêh iên ngơi ta kăn: Wơ khua, so lăh geh nggăr til găl jêh me răh mŏng lŏ me lak lăh? Mă kơt iên, băt u băh tŭk ĕh mau?’ ",
  "28": "Ƀê̆ dăh kăn ngơi ta hên: ‘Băl rŏh ru mhŏ bruă hư̆n.’ Jêh hư̆n băl dư̆k ngơi ta kăn; ‘Ndă iên, me khơñ ya hi sak ta iên, hi dŏk lĕ băt hư̆n?’",
  "29": "Ƀê̆ dăh khua ngơi klăh iêu: ‘Ei ru, ơn dăh jăng jai pu me dŏk băt, pu me čang dŏk li ba mi ju băk ta băt. ",
  "30": "Lơi bar mta hư̆n ĕh čăt jêng ju băk tăl trôh dơm riêk, jêh iên trôh mông riêk ăñ jrăng tơ-tă ta băl riêk: Luôr hĭn ăn hên dŏk lĕ mơt băt jêh iên čăp ĕh ju tŭk no di jhu lat ĕh, ƀê̆ dăh ăn hên ñăt lĕ mơt ba mi mŏng năm ăñ ji tŏ.’”",
  "31": "Khua Yang lŏ wêh sŏk pơp hơ-hôr dơ-dêh ya tơ-ti hên, klăh iêu: “Uôn Yang Trôk ĕh ndrơm klăh di ju nau nêh kăn sŏk ju mlăm nggăr pai bi kăn sak răh mŏng lŏ kăn. ",
  "32": "nggăr pai hư̆n, wăt di lăh ĕh kuôn nê̆ hĭn ta lĕ mơt nggăr dơ-dêh, ƀê̆ dăh trôh mông ĕh čăt jua, mông hư̆n ĕh  ram hĭn ta lĕ mơt grăp pai mŏng mir jêh iên tăl ĕh ñjêng jhi dlei, tăl sư̆m trôk ĕh sak jêh iên mhŏ suôn tŏng mbăh dhan ĕh.”",
  "33": "Khua Yang wêh sŏk pơp hơ-hôr dơ-dêh tơ-ti hên: “Uôn Yang Trôk ĕh ndrơm klăh di ju nau nêh u ur de sŏk pei, de tŏng lŭk băk pei thŭng ƀhŭk tăl trôh mông ƀhŭk hư̆n ĕh dang lĕ.”",
  "34": "Yang Yêsu ngơi grăp pơp hư̆n ta băl uôn lan ta pơp hơ-hôr, jêh iên so mau ju mta pơp Khua Yang tơ ti ta hên so Khua Yang yua pơp hơ-hôr ôh,",
  "35": "no di ĕh lăm nư̆k pơp băh nêh têh luôr ngơi, klăh iêu: “Ăñ jrăng pŏk dơk ăñ ta  pơp hơ-hôr. Ăñ jrăng têh sơm lĕ mơt pơp yuôm ndăp dŏng băh mhei rih ñjêng trôk teh.”",
  "36": "Jêh hư̆n, Khua Yang yĕh băh uôn lan, Khua Yang du mư̆t mŏng hih. Băl ƀing kna Yang di sak mơñ Khua Yang, ngơi klăh iêu: “Dăn Khua Yang lơ-lang pơp hơ-hôr yơng ta băt ĕh gŭk mŏng lŏ hư̆n ta hi.”",
  "37": "Mông hư̆n, Khua Yang wêh ngơi, klăh iêu: “Nêh răh nggăr til găl, čiêng ngơi ta Kuôn Nêh,",
  "38": "jêh iên lŏ čiêng ngơi ta dôn teh, jêh iên nggăr til găl, ho jêng ŏh kuôn čar Yang Trôk. Ƀê̆ dăh, băt čiêng ngơi ta ŏh kuôn băl djŏh ƀai di. ",
  "39": "jêh hư̆n băl rŏh, jêng nêh sak răh băt, čiêng ngơi ta yang jhat. Jêh iên dơm riêk čiêng ngơi ta nar tôč dư̆t, jêh iên nêh riêk čiêng ngơi ta băl myang. ",
  "40": "Kơt iên, đô̆ nă nai ƀư̆n băt ju tŭk jêh iên  jhu mŏng iñ, bruă ĕh jrăng trôh klăh iên ya mŏng nar tôč dư̆t o tlak. ",
  "41": "Kuôn Nêh jrăng yua băl myang Yang di, jêh iên hên jrăng tŏng ƀư̆n lĕ mơt đơ pơp ĕh lăm păk bông wăt ta băl mhŏ bruă djŏh ƀai du băh čar Khua Yang, ",
  "42": "Jêh iên hên jrăng čĕ băl ĕh mŏng war iñ, hư̆n jêng tŭk jrăng mau pơp ôr ñim jêh iên kriêt sêk.",
  "43": "Mông hư̆n, đơ băl kpă hên jrăng đat ang klăh di măt nar mŏng čar Bap hên di. Nêh tơm mau tôr, ăn iêt.”",
  "44": "Uôn Yang Trôk ĕh ndrơm klăh di pơp yuôm bhăn nai bư̆l mŏng lôk lŏ, pơp hư̆n mau ju nau nêh jêh kăn ban ĕh  kăn lŏ srôm hư̆t. Mŏng nuih nhăm kăn bêng čhô̆ brơn, kăn du hih, kăn blŏ lĕ mơt djăp mta pơp kăn mau jêh iên kăn ruôt lŏ hư̆n.”",
  "45": "Kơt iên ya, uôn Yang Trôk ĕh ndrơm klăh di ju nau nêh tăč bro, sak juôi mai yuôm. ",
  "46": "Jêh iên, trôh mông kăn dơi so mai yuôm hư̆n, kăn du, kăn blŏ lĕ mơt djăp mta pơp kăn mau jêh iên ruôt ĕh.” ",
  "47": "Kơt iên iên ya, uôn Yang Trôk ĕh ndrơm klăh di ju mlăm ñuôl nai čĕ mŏng dak sĭ jêh iên nai đŏh tŏng tê̆ geh djăp mta pơp, ",
  "48": "trôh mông ñuôl jêh bêng, nai đŏh tŏng gung, jêh iên nai gŭk mŏng sô̆, nai săč lĕ mơt pơp găl ăn mŏng bai, bơ pơp so tŭ dưn, nai čĕ ta ling. ",
  "49": "Djăp mta pơp ăt klăh iên ya mŏng nar tôč dư̆t: Băl myang jrăng sak, jêh iên tŏng jăh băl djŏh ƀai du băh nêh kpă,",
  "50": "jêh iên hên jrăng čĕ lĕ mơt băl hư̆n mŏng war iñ, hư̆n jêng tŭk jrăng mau pơp ôr ñim jêh iên kriêt sêk. ",
  "51": "Dơi ya pu me wơng lĕ pơp tơ-ti ho lăh? Băl ƀing kna ngơi ta Khua Yang: “Hi wơng ya!” ",
  "52": "Mông hư̆n, Khua Yang ngơi ta hên: “Yơng băh pơp ho đơ băl khua tơ-ti pơp bhiên hên riêm ta uôn Yang Trôk \n ĕh ndrơm klăh di ju nau nêh tơm hih, kăn sŏk băh năm kăn tŏ pơp yuôm yau wăt ta pơp yuôm mhei.\" ",
  "53": "Jêh gu Yang Yêsu tơ-ti lĕ pơp hơ-hôr ho, Khua Yang du băh iên.",
  "54": "Khua Yang du ta uôn tơm jêh iên Khua Yang tơ-ti mŏng hih kôh mpŭ, tăl grăp nau nêh iêt nai dlăng ndrơh gơ-gu, hư̆n nai ngơi klăh iêu: “U băh tŭk nêh ho sŏk pơp gư̆t mĭn jêh iên pơp myang ho?",
  "55": "Kăn ho so lăh geh kuôn tlau nêh trăh phat lăh? Geh ya mei kăn jêng Mari, ŏh mi kăn jêng Yakơ, Yôsep, Simôn, Yuđa lăh?",
  "56": "Rôh mei kăn so lăh hên gŭk băk băn gơ-gu lăh? U băh tŭk dơi kăn mau djăp mta pơp hư̆n klăh iên?",
  "57": "Kơt iên, hên păk bông bơ yơng Khua Yang. Ƀê̆ dăh Khua Yang Yêsu ngơi ta hên klăh iêu: “Băl mưč nêh têh luôr, băh gu jêng nêh mŏng uôn kăn tơm wăt ta nêh mŏng hih nhăk kăn tơm gu.”",
  "58": "Ta iên, so ŏk ôh Khua Yang mhŏ pơp myang, bơ yơng so hên mau pơp đăo. "
}