\id COL
\ide UTF-8
\h Bakolosaayi
\toc1 Bakolosaayi
\toc2 Bakolosaayi
\toc3 col
\mt Bakolosaayi
\c 1
\cl Ensuula 1
\p
\v 1 Pawulo omutume wa Kristo Yesu olw'okutaka kwa Katonda, ne Timoseewo ow'oluganda,
\v 2 era abatukuvu, ab'oluganda abeesigwa mu Kristo ab'omu Kolosaayi: ekisa kibbenga gye muli n'emirembe ebiva eri Katonda Itawaisu.
\p
\v 3 Twebalya Katonda Itaye wa Mukama waisu Yesu Kristo, nga tubasabira enaku gyonagyona,
\v 4 bwe twawulire okwikiriria kwanyu mu Kristo Yesu, n'okutaka kwe mulina eri abatukuvu bonabona,
\v 5 olw'eisuubi eryagisibwe mu igulu, lye mwawulire eira mu kigambo eky'amazima ag'enjiri,
\v 6 eyaizire gye muli; era nga bw'eri mu nsi gyonagyona, ng'ebala ebibala era ng'ekula, era nga ne mu imwe, okuva ku lunaku bwe mwawulire ne mutegeera ekisa kya
\v 7 Katonda mu mazima; nga bwe mwayigiriziibwe Epafula omwidu munaisu omutakibwa, niiye muweereza omwesigwa owa Kristo ku lwaisu,
\v 8 era eyatukobeire okutaka kwanyu mu Mwoyo.
\p
\v 9 Feena kyetuva tetulekaayo, okuva ku lunaku bwe twawulire, okubasabira n'okubeegayirira kaisi mwizulibwe okutegeeranga by'ataka mu magezi gonagona n'okutegeera eby'Omwoyo,
\v 10 okutambulanga nga bwe kisaanira Mukama waisu olw'okusiimibwa kwonakwona, nga mubalanga ebibala mu buli kikolwa ekisa, era nga mukuliranga mu kutegeera Katonda;
\v 11 nga muyinzisibwanga n'obuyinza bwonabwona, ng'amaani ag'ekitiibwa kye bwe gali, olw'okugumiikiriza kwonakwona n'okuzibiikiriza awamu n'okusanyuka;
\v 12 nga mwebalya Itawaisu, eyatusaanyizirye ife omugabo ogw'obusika obw'abatukuvu mu musana,
\v 13 eyatulokoire mu buyinza obw'endikiriria, n'atutwala mu bwakabaka obw'Omwana we omutakibwa;
\v 14 imwe tubbenga n'okununulwa, niikwo kusonyiyibwa kw'ebbiibi byaisu:
\v 15 oyo niikyo ekifaananyi kya Katonda ataboneka, omuberyeberye ow'ebitonde byonabyona;
\v 16 kubanga mu oyo ebintu byonabyona mwe byatondeirwe, mu igulu ne ku nsi, ebiboneka n'ebitaboneka, oba nga ntebe gya bwakabaka, oba bwami, oba kufuga, oba masaza; ebintu byonabyona byatondeibwe niye, era no ku lulwe;
\v 17 naye niye w'oluberyeberye mu byonabyona, era ebintu byonabyona bibbaawo mu iye.
\v 18 Era oyo nigwo omutwe gw'omubiri, niye kanisa: oyo nirwo oluberyeberye, omuberyeberye ow'omu bafu; iye kaisi abbenga ow'oluberyeberye mu byonabyona.
\v 19 Kubanga Itawaisu yasiimire okutuukirira kwonakwona okubbanga mu iye;
\v 20 n'okutabaganyisia ebintu byonabyona eri iye mwene mu iye, bwe yamalire okuleeta emirembe olw'omusaayi gw'omusalaba gwe; mu iye okutabaganyisia oba eby'oku nsi oba eby'omu igulu.
\v 21 Mwena, bwe mwabbaire eira banaigwanga era abalabe mu kulowooza kwanyu mu bikolwa ebibbiibi, naye atyanu yabatabaganyisirye
\v 22 mu mubiri ogw'enyama ye olw'okufa, okubanjula abatukuvu, ababulaku mabala abatasiisikibwa mu maiso ge:
\v 23 bwe mubba obubeezi mu kwikirirya, nga mugumire, nga temusagaasagana, so nga temuviire mu isuubi ly'enjiri gye mwawulire, eyabuulirwe mu bitonde byonabyona ebiri wansi w'eigulu; nze Pawulo gye nafuukire omuweereza waayo.
\p
\v 24 Atyanu nsanyukire mu bibonoobono byange ku lwanyu, era ntuukirizia ebibulaku mu kubona enaku kwa Kristo mu mubiri gwange olw'omubiri gwe, niiyo e kanisa;
\v 25 nze gye nafuukire omuweereza waayo, ng'obuwanika bwa Katonda bwe buli bwe naweeweibwe gye muli, okutuukirirya ekigambo kya Katonda,
\v 26 ekyama ekyagisiibwe okuva eira n'eira n'emirembe n'emirembe: naye atyanu kyoleseibwe eri abatukuvu be,
\v 27 Katonda be yatakire okutegeeza obugaiga obw'ekitiibwa eky'ekyama kino bwe buli mu b'amawanga, ekyo niye Kristo mu imwe, eisuubi ery'ekitiibwa:
\v 28 niiye gwe tubuulira ife, nga tulabula buli muntu, era nga tuyigiriza buli muntu mu magezi gonagona, kaisi twanjule buli muntu ng'atutukiriire mu Kristo;
\v 29 n'okufuba kye nfubira era, nga mpakana ng'okukola kwe bwe kuli, okukolera mu nze n'amaani.
\c 2
\cl Ensuula 2
\p
\v 1 Kubanga ntaka imwe okumanya okufuba bwe kuli okunene kwe nina ku lwanyu n'abo ab'omu Lawodikiya, ne bonabona abatabonanga maiso gange mu mubiri;
\v 2 emyoyo gyabwe kaisi gisanyusibwe, nga bagaitibwa wamu mu kutakagana, n'okutuuka ku bugaiga bwonabwona obw'okumanyira kimu okw'amagezi, bategeerenga ekyama kya Katonda, niye Kristo,
\v 3 omuli obugaiga bwonabwona obw'amagezi n'obw'okutegeera nga bugisiibwe.
\v 4 Ekyo kye ntumula nti omuntu yenayena alemenga okubabbeeyabbeeya mu bigambo eby'okusendasenda.
\v 5 Kubanga newankubaire nga mbulayo mu mubiri, naye mu mwoyo ndi naimwe, nga nsanyuka era nga mbona empisa gyanyu ensa, n'obunywevu obw'okwikiriria kwanyu mu Kristo.
\p
\v 6 Kale nga bwe mwaweweibwe Kristo Yesu Mukama waisu mutambulirenga mutyo mu iye,
\v 7 nga mulina emizi, era nga muzimbibwa mu iye, era nga munywezebwa okwikiriria kwanyu, nga bwe mwayigirizibwe, nga musukirira okwebalya.
\p
\v 8 Mwekuume tewabbengawo muntu abanyaga mu bufirosoofo n'eby'obubbeyi ebibulamu, okusengereryanga ebyayigirizibwe abantu okusengereryanga eby'oluberyeberye eby'ensi, okutali kusengererya Kristo
\v 9 kubanga mu oyo nimwo mutyama okutuukirira kwonakwona okw'obwakatonda ng'omubiri bwe guli,
\v 10 era mwatuukiririre mu iye, nigwo mutwe ogw'okufuga n'obuyinza bwonabwona
\v 11 era mwakomoleibwe mu oyo obukomole obutakomolebwa na mikono, mu kwambula omubiri ogw'enyama, mu kukomolebwa kwa Kristo;
\v 12 bwe mwaziikirwe awamu naye mu kubatizibwa, era kwe mwazuukiriremu olw'okwikirirya okukola kwa Katonda, eyamuzuukizirye mu bafu.
\v 13 Mwena bwe mwabbaire nga mufwire olw'ebyonoono byanyu n'obutakomolebwa mubiri gwanyu, yabafiire balamu wamu naye, bwe yamalire okutusonyiwa ebyonoono byaisu byonabyona;
\v 14 n'okusangula endagaano eyawandiikibwe mu mateeka, eyatwolekeire, eyabbaire omulabe waisu: yoona n’agitoolamu wakati mu ngira, bwe yagikomereira ku musalaba:
\v 15 bwe yayambulire kimu obwami n’amasaza, n'abiwemuukirirya mu lwatu, bwe yabiwangulire ku igwo.
\p
\v 16 Kale omuntu yenana tabanenyanga mu by'okulya oba mu by'okunywa, oba olw'embaga oba olw'omwezi oguboneka oba olwa sabbiiti:
\v 17 ebyo nikyo ekiwolyo ky'ebyo ebyaba okwiza; naye omubiri nigwo gwa Kristo.
\v 18 Omuntu yenayana tabanyagangaku mpeera yanyu mu kwewombeeka kw'ataka yenka n'okusinzanga bamalayika, ng'anywezeria mu ebyo bye yaboine, nga yeegulumiririzia bwereere mu magezi ag'omubiri gwe,
\v 19 so nga tiyegisire Mutwe, omuva omubiri gwonagwona, enyingo n'ebinywezia nga biguleetera era nga bigugaita wamu, nga gukula n'okukulya kwa Katonda.
\p
\v 20 Oba nga mwafiilire wamu ne Kristo okuleka eby'oluberyeberye eby'ensi, kiki ekibeeteekesia wansi w'amateeka, ng'abakaali abalamu mu nsi nti
\v 21 Tokwatangaku, so tolegangaku, so tokomangaku
\v 22 (ebyo byonabyona biweerawo mu kukolebwa) okusengereryanga ebiragiro n'okuyigiriza eby'abantu?
\v 23 Ebyo birina kimu ekifaananyi eky'amagezi mu kusinza Katonda abantu kwe bagunja bonka, ne mu kwewombeeka ne mu kubonyaabonya omubiri; naye babulaku kye bigasa n'akadidiiri olw'okwegomba kw'omubiri.
\c 3
\cl Ensuula 3
\p
\v 1 Kale oba nga mwazuukirire wamu ne Kristo, musagirenga ebiri waigulu, Kristo gy'ali ng'atyaime ku mukono omulyo ogwa Katonda.
\v 2 Mulowoozenga ebiri waigulu, so ti ebiri ku nsi.
\v 3 Kubanga mwafire, n'obulamu bwanyu bugisiibwe wamu ne Kristo mu Katonda.
\v 4 Kristo, obulamu bwaisu, bw'alibonekera, era mwena kaisi ne mubonekebwa wamu naye mu kitiibwa.
\p
\v 5 Kale mufiikye ebitundu byanyu ebiri ku nsi; obwenzi, obugwagwa, okwegomba okw'ensoni, omuwudu omubbiibi, n'okuyaayaana, niikwo kusinza ebifaananyi;
\v 6 olw'ebyo obusungu bwa Katonda bwiza ku baana abatawulira;
\v 7 era mwena mu ebyo niimwo mwe mwatambuliranga eira, bwe mwabbaire abalamu mu ibyo.
\v 8 Naye atyanu era mwena mutoolewo byonabyona, obusungu, ekiruyi, eitima, okuvuma, okuloogya eby'ensoni mu munwa gwanyu:
\v 9 temubbeyagananga mwenka na mwenka; kubanga mwamweyambwireku omuntu ow'eira wamu n'ebikolwa bye,
\v 10 ne muvaala omuntu omuyaka, afuulibwa omuyaka olw'okutegeera mu kifaananyi ky'oyo eyamutondere:
\v 11 awo tewasobola kubbaawo Muyonaani n'Omuyudaaya, okutayirirwa n'obutatayilirwa, munaigwanga, Omusukusi, omwidu, ow'eidembe: naye Kristo nibyo ebintu byonabyona ne mu byonabyona.
\p
\v 12 Kale muvaalenga ng'abalonde ba Katonda, abatukuvu era abatakibwa, omwoyo ogw'ekisa, obusa, okwewombeeka, obuteefu, okugumiikirizia;
\v 13 nga muzibiikirizagananga, era nga musonyiwagananga mwenka na mwenka, omuntu yenayena bw'abbanga n'ensonga ku muntu mwinaye; era nga Mukama waisu bwe yabasonyiwire imwe, era mwena mutyo:
\v 14 ku ebyo byonabyona era muvaale okutakagana, nikyo ekintu ekinyweza okutuukirira.
\v 15 Era emirembe gya Katonda giramulenga mu myoyo gyanyu, era gye mwayeteirwe mu mubiri ogumu; era mubbenga n'okwebalya.
\v 16 Ekigambo kya Kristo kibbenga mu imwe n'obugaiga mu magezi gonagona; nga muyigirizagananga era nga mulabulagananga mwenka na mwenka mu zabbuli n'enyembo n'ebiyiiye eby'Omwoyo, nga mwembera Katonda mu kisa mu myoyo gyanyu.
\v 17 Era buli kye mwakolanga, mu kigambo oba mu kikolwa, mukolerenga byonabyona mu liina lya Mukama waisu Yesu, nga mwebalya Katonda Itawaisu ku bubwe.
\p
\v 18 Abakali, muwulirenga baibawanyu, nga bwe kiri ekisa mu Mukama waisu.
\v 19 Abasaiza, mutakenga bakali banyu, so temubakwatirwanga bukambwe.
\v 20 Abaana abatobato, muwulirenga bakaire banyu mu byonabyona, kubanga ekyo niikyo ekisiimibwa mu Mukama waisu.
\v 21 Baitwabwe, temunyiizanga baana banyu, balemenga okwiririra omwoyo.
\v 22 Abaidu, muwulirenga bakama banyu ab'omu mubiri mu byonabyona, ti mu kuweereza okw'okungulu ng'abasiimibwa abantu, wabula mu mwoyo ogubula bukuusa, nga mutya Mukama waisu:
\v 23 buli kye mwakolanga mukolenga n'omwoyo, nga ku bwa Mukama waisu so ti ku bwa bantu;
\v 24 nga mumaite nga mulisasulibwa Mukama waisu empeera ey'obusika: muli baidu ba Mukama waisu Kristo.
\v 25 Kubanga ayonoona aliweebwa kabite nga bwe yayonoonere: so wabula kusosola mu bantu.
\c 4
\cl Ensuula 4
\p
\v 1 Bakama baabwe, mugabirenga Abaidu banyu eby'obutuukirivu n'okwenkanyankanyanga; nga mumaite nga era mwena mulina Mukama wanyu mu igulu.
\p
\v 2 Munyiikirirenga mu kusaba, nga mumoganga mu kusaba mu kwebalya;
\v 3 ate nga mutusabira feena, Katonda okutwigulirawo olwigi olw'ekigambo, okutumula ekyama kya Kristo, n'okusibibwa kye nasibiirwe;
\v 4 Kaisi nkyolesenga, nga bwe kiŋwanire okutumula.
\v 5 Mutambulirenga mu magezi eri abo ab'ewanza, nga mweguliranga eibbanga.
\v 6 Ebigambo byanyu bibbeenga n'ekisa enaku gyonagyona, nga bituukamu omunyu, kaisi mumanye bwe kibagwaniire okwiramu buli muntu yenayena.
\p
\v 7 Tukiko, ow'oluganda omutakibwa era omuweereza omwesigwa era mwidu munaisu mu Mukama waisu, alibategeeza ebifa gye ndi byonabyona:
\v 8 gwe ntuma gye muli olw'ensonga eno, kaisi mutegeere ebifa gye tuli era asanyusie emyoyo gyanyu;
\v 9 wamu ne Onnessimo, ow'oluganda omwesigwa omutakibwa, ow'ewanyu, Balibategeeza ebifa wano byonabyona.
\p
\v 10 Alisutaluuko, musibe munange, abasugiirye, ne Mako, mwiwa wa Balunabba, (gwe mwalagirwe; bw'aliiza gye muli, mumwanirizanga),
\v 11 ne Yesu ayetebwa Yusito, ab'omu bakomole: abo bonka niibo abakozi banange olw'obwakabaka bwa Katonda, abansanyusanga.
\v 12 Epafula, ow'ewanyu, omwidu wa Kristo Yesu, abasugiirye, afuba enaku gyonagyona ku lwanyu mu kusaba kwe, kaisi mwemererenga nga muli batuukirivu era nga mutegeerera kimu mu byonabyona Katonda by'ataka.
\v 13 Kubanga ndi mujulizi we ng'alina emirimu mingi ku lwanyu, n'ab'omu Lawodikiya, n'ab'omu Kiyerapoli.
\v 14 Luka, omusawo omutakibwa, ne Dema babasugiirye.
\v 15 Musugirye ab'oluganda ab'omu Lawodikiya, ne Nunfa, n'ekanisa ey'omu nyumba yaabwe.
\v 16 Era ebbaluwa eno bw'emalanga okusomerwa mu imwe, era mugisomere ne mu kanisa ey'Abalawodikiya; era mwena musome eriva mu Lawodikiya.
\v 17 Era mukobe Alukipo nti Weekuumenga okuweereza kwe waweweibwe mu Mukama waisu, okukutuukirirya
\v 18 Kuno niikwo kulamusa kwange n'omukono gwange nze Pawulo. Mwijukirenga okusibibwa kwange. Ekisa kibbenga naimwe.