cnw_reg/67-REV.usfm

\id REV
\ide UTF-8
\rem The text in this file was extracted from C:/DCS/Chin, Ngawn/WORD/66. REVELATION. docx.
\mt Thuphuan
\h Thuphuan
\mt Thuphuan
\toc1 Thuphuan
\toc2 Thuphuan
\toc3 rev
\s Thu lam huai
\c 1
\p
\v 1 Zisuh Khrih thuphuan hi. Hi thuphuan cu huncan a ngei ngawl sung a cang tuk mite a sila na dek tutei lakah, lak tuk in Khrih sungah Pathian piak mi thu hi. Khrih in a vancung mi hah in a sila na dek tu Johan nelah hi thuphuan lak hi.
\v 2 Johan in a muh mi hempoh Pathian thu le Zisuh Khrih tuah a seng mi theihpih nak tetti te hilh hi.
\v 3 Huncan a nai zo hang, kamsang tei phuan mi thu zo in a sial nak hang, a ngat mi thu hempoh a cingkem tu cu thupha muicu nei hi.
\p
\v 4 Kei mah Johan in Asia ngam ah a um kohhran salih tei hum ah lai kuat ngan ing. A bosa huncan ah hei hihen, a tu huncan ah le tunung ten a heng tuk mipai nelpen hei hihen, thukhen nak tohkham mai ah a um mi hawvang salih tei lakah hei hihen,
\v 5 Muantaak mi thu tetti theihpih in a thi mitei sung pen a masabel in a hing tu, hi leihum kumpi hempoh uktu a himi Zisuh nelpen hei in hihen, a hehpih nak le daihnak cu nohtei lakah um ta hen. Ohte cu it in a thisan tuah ohtei sualnak a som hang,
\v 6 A Pa Pathian mai ah ohte kumpi hihnak in hihen, thiampi hihnak ah hei in a pia tupa cu a tu le kumkhua minthan nak le huham um ta hen. Amen.
\q
\v 7 Zo in. Topa cu meingo tuah heng hi. Mah cengten Topa a sun tu hempoh ten a muhtei mit tuah Topa cu mu haw tuk hi. Leihum ah a um miphun hempoh cu Topai hang a awmcum in kap haw hi. A man mi hi. Amen.
\p
\v 8 A tu um in a bosa huncan ah hei a um tunung ten, a heng tuk huham tuah a dim mi Pathian cu, “Kei cu Alpha le Omega ing hi” tin, thupia hi.
\s Thuphuan a muh nak sungah mihing capa a muh nak
\p
\v 9 Zisuh sungah haksat cimnak hei hihen, uknak ngam hei hihen, supnak hei hihen, nang muhte tuah haksat cimnak a thuak tu nang muhtei U nau kei mah Johan cu Pathian thu le Zisuh tuah a seng mi theihpih thu tetti phuannak hang, Patmos tin sam mi tuikulh ah heng ing hi.
\v 10 Topa Pathian ni ten kei cu hawvang sungah um in lemle tum aw bang ka nungpen awnthawm na sezet za ing hi.
\v 11 Mahmi aw, “Na muh mi thu cu lai sungah ngan in, Efisa khua, Symarna, Pergamos, Thyatria, Sardis, Philadelphia, Loadicia khua ah a um mi kohhran salih tei lakah pia in hi” tin, ti hi.
\v 12 Mah cengten kei mah tuah otpih dun a aw nging cu mu tukin ka zoh kik ten, sui meikhuat salih hei hihen,
\v 13 Sui meikhuat salih a lai ah mi capa tuah a bang ve mi pakhat mu ing. A mah cu a ke tian puancual pi silh in, a awm ah sui taipom tuah het hi.
\v 14 A lu le a sam cu a ngo mi tuu mul bang in hihen, vukpak bang in ngo hi. A mit vang meilio bangin alh hi.
\v 15 A ke vang mei tuah hal kang a kok mi dal ngek tuah bang ve hi. A aw vang tuipi thuanthum aw bang hi.
\v 16 A taklam khut ah vang aksi salih cawi hi. A kam sung a lang le lang pen a hiam zet mi nam suak tul hi. A mitmai cu a huham tuah a vak mi ni bang hi.
\v 17 A mah ka muh ten a ke bul ah lum in mithi bang um ing. Mah cengten a mah cu kei ma hum a khut taklam ah nga in, “Lau pah sin. Kei cu a patnak le a tawpnak ing.
\v 18 A nungmi pa hei hi ing. Kei cu thi zo ing. A kumkhua a nung mipa ing. Thihnak le hell ngam vang keiman uk ing.
\v 19 Mah hang, na muh mi thu te a tuin a cang mi thu te le a heng tuk laih mi thu te ngan in hi.
\v 20 Ka taklam ah a lang mi aksi salih le sui meikhuat thuthup a sel mi a tihnop nak aksi salih cu kohhran salih tei na dek tu a hih hang, meikhuat salih cu kohhran salih te hi.
\s Efisa kohhran ca thuthangpha
\c 2
\p
\v 1 Efisa khua ah a um mi kohhran na dek tu vancung mi cu hitin lai kuat ngan in. A taklam khut ah aksi salih cawi in, sui meikhuat salih a lai ah a hawh tupan hitihbang in thupia hi.
\v 2 Na bawl mi hempoh na zuamnak le supnak te thei ing. Nang cu mi ngilo ten a deih ngawlnak thu le nangmah le nangmah nungzui hitin a sam haw ta vang, nungzui tu a hi ngawl mite cu thu dong kan cek in a muhte cu zol thu a son mite haw hitin na muh mi thu te vang thei ing.
\v 3 Nang cu supnak tuah ka min hang haksat cimnak thuak in, thazang kiam ngawlnak thu hei hihen thei ing.
\v 4 Mah naven, nang cu a masa keimah na it nak cu zam san zo ci.
\v 5 Mah hang, nang cu na cak awng nak mun ngai sung in sualsih nak tuah na dek in. Mah tin bawl ngawl sualsih nak na nei ma tale na nelah hung in, na meikhuat khung cu a umnak pen thawn sak tung hi.
\v 6 Mah naven kei mah a haw tu Nicolus nungzui tei ngamtat cu nangman haw ci tin, son tuk um hi.
\v 7 Hawvang in kohhran te thu a piak mi cu beng a nei tuin za ta hen. Nehnak a co tupa cu Paradise huan sungah a um mi nunnak thingkung a ngah ei tukin phalnak pia tung hi.
\s Smyrna
\p
\v 8 Smyrna khua sungah a um mi kohhran na dek tu vancung mi cu hitin laikuat ngan in. A patnak le a tawpnak pa cu thi zo naven a nung leh tupan hitihbang in thupia hi.
\v 9 Haksat cimnak na thuak mi hempoh kei man thei ing. A thungai in nang cu hauhsak nak tuah a dim in um ci. Judah mi hi ngawlin Satan pawlpi sungah a um mitei lakpen na thuak mi sonsiat nak awnkam cu kei man thei ing.
\v 10 Nang cu na thuak tuk mi pakhat no hei lau pah sin. Zo in. Nang cu culnak le thuaknak tuk thu Dawimang pan nohtei sung pen mi hekkhat te thawng sung ah koih tuk toh hi. Nohten nisawm sung haksat cimnak thuak tuk uh ci. Thihnak tian thuak in muantaak nak tuah ngak in.
\v 11 Hawvang in kohhran te itihbang in thupia hum tih cu beng a nei tupan za ta hen. Nehnak a co tupan veinih thihnak cu ituk mahten thuak tuk ma hi.
\s Pergamos
\p
\v 12 Pergamos khua sungah a um mi kohhran na dek tu vancung mi cu hitin laikuat ngan in. A lang le lang a hiam zet mi nam nei tupan hitihbang in thupia hi.
\v 13 Nang cu a lai mun ah khung cim tih cu kei man thei ing. Mah lai mun ah Saihtan khunnak tohkham um hi. Saihtan umnak sungah nohtei sung pen thahnak a thuak tu Antipas cu muantaak nak nei mi ni huncan ah hei in nang cu ka min len lo ci. Keimah na upnak thu cu zamsan ma ci.
\v 14 Mah naven, Isarel miphun ten zuk milim mai ah a koih mi biakpiak nak sa ei tuk in hihen, dan tuah a dik ngawl mi nu le pa sualnak bawl tuk in hihen, a muhtei mai ah sual tik thei in a koih mi thu cu Balaam in Balak kumpi hilh hi.
\v 15 Mah bang bok nohtei sungah Nicolus pawl sungah a tum mitei hilh mi pomnak tuah ngamta a nung mite vang um uh ci.
\v 16 Mah hang sualsik un. Mah ahima tale kei cu na nelah a man lang heng in, ka kam sung pen a hiam zet mi nam tuah a muhte do tung hi.
\v 17 Hawvang in kohhran te itihbang in thupia hum tih cu beng a nei tuin za ta hen. Nehnak a co tupai mana cu keiman pia tung. Mahmi suang hum ah minthak ngat mipa sial ngawl a kuamah in mahmi minthak cu thei ma hi.
\s Thyatira
\p
\v 18 Thyatira khua sungah a um kohhran na dek tu vancung mi cu hitin lai ngan in. Mei lio alh bang mi mit de lenglung dal tuah a bang ve ke a um mi Pathian capa in hitihbang in thupia hi.
\v 19 Na ngamtat nunnak, itnak, na deh nak, upnak, supnak hei hihen, tu nung ten ngamtat nun tuk mite a bosa hun in ngamtat nak sang, a tam saw mi hei hihen kei man thei ing.
\v 20 Mah naven, ka na dek tu sila te dan tuah a dik ngawl mi nu le pa sual nak hei hihen, zuk milim mai ah biakpiak nak an ei tuk in hihen, kamsang nu tin a mah le mah sam nak a nei tu na nupi Jezebel in, a sual tik thei mi phalnak cu nangmah a piak hang, nang cu ka sonsiat nak tuk um hi.
\v 21 Kei man a mah sualsik tukin huncan pia naven, a man a deihnak thu tuah a dik ngawl mi nu le pa sual bawl nak hang, sualsih nuamnak thinlung nei ma hi.
\v 22 Zo in. Keiman a mah cu zaunak ihkhun ah koih tung. A mah hei dan tuah a dik ngawl mi nu le pa sualnak bawl in, mah tihbang sualsih ngawl ngamtat nak a nei tute vang nasezet haksat cimnak heng tik tung.
\v 23 A canu le capa te vang haksat thihnak tuah thukhen tung. Mah cengten kei cu thinlung le sunglam lungmu cek tupa hihnak thu cu kohhran venghawng in thei haw tuk hi. Nohtei nuncan ngamtat nak bang tek in sual thaman pia tung.
\v 24 Mah naven, hilh sualnak tin a muhtei sam mi bang Satan pai thuthup tin sam mite thei ngawlin Thyatira khua pen a tang mi hempoh tei lakah ka hilh mi cu nohtei hum ah a dang vanpuak tuk koih mang hi.
\v 25 Nohtei sungah a um mi thu bek cu ka hensuk leh tian kho zet len lo un.
\v 26 Neh tupa le ka na tawp tian a cingkem tu cu miphun hempoh uk theih nak ka piak hang,
\v 27 A man lei bel te a suk keh bang, thik thiangkhut tuah a muhte uk tuk hi. Hi thu cu kei man ka pai nel pen co mi uknak tuah a bang ve mi hi.
\v 28 Kei man ni kong hong aksi vang a mah pia tung hi.
\v 29 Hawvang in kohhran te thu a piak mi cu beng a nei tuin za ta hen.
\s Tardis
\c 3
\p
\v 1 Tardis khua sungah a um na dek tu vancung mi cu hitin lai kuat ngan in. Pathian hawvang salih le aksi salih a um mipan hitin thupia hi. Na deh mi nate kei man thei ing. Nang cu a nung mi hitin min nei naven, a thi mipa hi ci.
\v 2 Ngallin nak tuah ngak in. A thi awn li toh a tang mite cingkem in. Itahum titale na deh mi nate cu ka Pathian mai ah cangkim hitin, mu mang hi.
\v 3 Mah hang nang cu itihbang um in na zak awng mi thu phawk in hi thu te cingkem in. Sualsik in. Nang cu ngallin nak tuah na ngak ma tale nguca bang na umnak ah heng tung hi. Ka hen suk tuk huncan nazi vang nangman thei tuk ma ci.
\v 4 Mah naven Tardis khua sungah a muhtei van silh a bal tik ngawl tu dawm laih no um hi. A muhte cu co taak mi a hih hang, puan ngo silh in kei mah tuah hawh langkhat haw tuk hi.
\v 5 Neh tupan mah tihbang puan ngo silh tuk hi. Kei man nunnak laibu sung pen lawl hihim tuk mang hi. Kei man a min cu ka pai mai ah hei hihen, Topai vancung mitei mai ah hei hihen phuang tung hi.
\v 6 Hawvang in kohhran te thu a piak mi cu beng a nei tuin za haw ta hen.
\s Philadelphia
\p
\v 7 Philadelphia khua sungah a um mi na dek tu vancung mi cu hitin lai kuat ngan in. Mi thiangtho mi, midik pa, David kumpi pai tawh a keng tu, a kua mah hi hon theih ngawl a hong tu, a kua mah hi hon theih ngawl a khak tupan hitin, thupia hi.
\p
\v 8 Na nuncan ngamtat keiman thei ing. A kuamah hi khah theih ngawl mi kongka cu na mai ah keiman hong zo ing. Itahum titale, nang cu thazang ngilnak dawm laih no nei in ka thu awnkam cingkem zo ci.
\v 9 Ka min cu zam san ma ci. Judah mi hihnak tiamhem in Saihtan pawlpi sungah zol thu a son thei mite cu na ke bulah hung bia tikin, kei cu nang muhte ih nak thu a muhte thei tik hi.
\v 10 Nang cu supnak tuah a seng mi ka thu zui hang, hi leihum ah a um tu hempoh cek tukin leihum ah a heng tuk mi culnak huncan sungah keiman nangmah cing tung hi.
\v 11 Kei cu a man lang in heng tung. Na lukhu cu a kua mah long tuk ngawl in na nelah a um mi cu khozet len in.
\v 12 Kei man neh tupa cu ka Pathian i baikinn khuam in cang tik tung. A mah cu ituk mahten a pawlam ah suak tul thei tuk ma hi. Kei cu ka Pathian min hei hihen, ka Pathian khuapi cu Pathian vanhum pen a heng mi Jerusalem khua min thak hei hihen, ka min thak hei hihen a ma hum ah ngan tung hi.
\v 13 Hawvang in kohhran te thu a piak mi cu beng a nei tuin za ta hen.
\s Loadicea
\p
\v 14 Loadicea khua sungah a um mi kohhran na dek tu vancung mi cu hitin laikuat ngan in. Amen ti tupa, muantaak dikcang nak theihpih tu Pathian a bawl mi sung pen a masa bel pan hitin, thupia hi.
\v 15 Na bawl mi nate kei man thei ing. Nang cu dap le dap ma, sa le sa ma ci. Kei cu nangmah dap tale dap, a hima tale a sa pakhat cu deih ing.
\v 16 Nang cu hi tihbang in a sa le hi ngawl, a dap le hi ngawl, a sa, a dap in na um hang nang cu ka kam sung pen siak tul tuk toh ing.
\v 17 Nang man, “Kei cu hausa milian hang kul mi le sap mi imah um ma hitin, ti ci. Mah naven nang cu thinkham nak tam lei ta mipa, hehpih huai zet pa, mizawng pa, mitcaw pa le thacang in a tu hihnak thu cu nangman thei ma ci.
\v 18 Nang cu milian hausa tuk in mei tuah hal mi sui hihen, thacang puan silh ngawl midang tei mai ah zahcak um tuk ngawl in na silh tuk puan ngo hei hihen, na mit khua mu leh tuk in mit noih tuk hei hihen, ka nelpen lei tuk in nang cu kei man ngaihsut nak pia ing.
\v 19 Kei man ka ihmi hempoh tei sualnak lak in a muhte thu hilh thei ing. Mah hang, nasezet sualsik in.
\v 20 Zo in. Kei cu kongka mai ah ding in kheng ing hi. A kua a bang in ka aw za in kongka cu a hon tale a ma umnak ah kei cu tum in a mah tuah an ei tuk. Amah vang keimah tuah an ei tuk hi.
\v 21 Kei cu nehnak hang ka Pa tuah Pai tohkham khunnak hum ah kei mah tuah khun kawmnak thu pia tuk hi.
\v 22 Hawvang in kohhran te thu a piak mi cu beng a nei tuin za haw ta hen hi” tin, thupia hi.
\s Vanhum Tohkham
\c 4
\p
\v 1 Mah cengten ka zo le vanhum kongka hong in um hi. A masa bel ka zak mi aw cu, “Hi lai mun ah kai in. Hi a heng mi thu cengten a cang tuk mi thu te nangmah lak tung hi” tin, ti hi.
\v 2 Mah cengten, hawvang cu kei man co ngah cih in vanhum ah tohkham khunnak pakhat um hi. Tohkham hum ah a khung tupa vang um hi.
\v 3 A mah cu jasper le Sardine suang man pha bang, tohkham elkim ah uical bang emerald suang manpha tuah a bang ve mi um hi.
\v 4 Tohkham elkim ah a dang tohkham kul luan li um hi. Mahmi tohkham hum ah kum Upa kul luanli ten puan ngo silh in, a lu hum ah sui lukhu khu in khung haw hi.
\v 5 Tohkham khunnak sung pen khuaphelep nak, awnthawm nging le vanthum aw vang nging hi. Tohkham mai ah Pathian hawvang salih tih mi meikhuat salih vak in um haw.
\v 6 Tohkham mai ah suangval ngo sise tuah a bang ve mi thalang tuipi um hi. Tohkham a sunglam ah hei hihen, a elkim ah hei hihen, mit tuah a pumpi venghawng in a dim mi nganhing pali um hi.
\v 7 A pakhat nak nganghing cu pawpi tuah bang ve hi. A panih nak nganhing cu khui no tuah bang ve hi. A pathum nak nganhing cu mihing mitmai um hi. A pali nak nganhing cu a lengli mi mu vanlai bang hi.
\v 8 Nganhing pali te cu ha paluk ten nei haw. A elkim le a sunglam ah mit a dim um hi. A mun sun le zan cawl ngawl in, “A tu ah hei hihen, a bosa hun ah hei um in a heng tuk laih mi huncan ah huham tuah a dim mi Pathian cu a thiangtho, a thiangtho, a thiangtho hi” tin, au haw hi.
\p
\v 9 Tohkham hum ah khung in kumkhua a nung mipai huham, minthan nak le hehpih nak cu nganhing pali ten a thangphat haw ten,
\v 10 Upa kul luanli ten tohkham hum a khung tupai mai ah bopkhup in kumkhua a nung mipa bia in, a muhtei lukhu te tohkham mai ah a koih cengten,
\v 11 Kumkhua a nung mi Pathian aw, Topa in na hempoh bawl zo hi. Mahmi thu te a deihnak hang a bawl mite hi. Mah hang, Topa cu huham, minthan nak le sunloih nak co taak hi” tin, ti haw hi.
\s Lai zial le tuu no
\c 5
\p
\v 1 Mah cengten tohkham hum ah a khung tupai taklam khut sungah a sunglam le a pawlam ah lai ngan in, tacik salih tuah a khet mi lai zial pakhat keiman mu ing.
\v 2 Mah cengten thazang ngilnak a nei tu vancung mi pakhat in, “A kon lai zial hong in mahmi tacik cu a kon khok taak hum,” tin aw nging zet tuah a au mi keiman mu ing.
\v 3 Mah naven vanhum hei hihen, leihum ah hei hihen, leipi nuai ah hei hihen lai zial hong tuk in a hima tale a zo thei tu pakhat no hei um ma hi.
\v 4 Mahmi lai zial cu hong tuk ahima tale zo tuk in a taak mi pakhat no hei a um ngawl hang, kei cu nasezet kap ing.
\v 5 Mah cengten kum U pa tei sung pen pakhat in, “Kap pah sin. Zo in. Judah miphun sung pen a suak mi pawpi, David cikhaih a hi mipan a nehnak hang mahmi lai zial le tacik salih hong thei zo ing hi” tin, kei mah cu ti hi.
\v 6 Mah cengten tohkham pen nganhing pali le Upa tei a lai ah a thah sa bang tuu no a ding li mi cu kei man mu ing. Mahmi tuu no cu leihum hempoh ah a hah mi Pathian hawvang salih cu mit salih le ki salih um hi.
\v 7 A mah cu hung in tohkham hum ah a khung tupai a taklam khut pen lai zial cu la hi.
\s A cotaak mi tuu no
\v 8 Mahmi lai zial a lak ten nganhing pali le U pa kul luanli ten, mi thiangtho tei thunget nak tih mi paknam tui meihal nak tuah a dim mi sui khuat hei hihen, pheveu hei keng in tuu no mai ah bop khup bia in,
\v 9 Topa cu thah a thuaknak hang awnnam kim awn tu miphun hempoh tei sung pen kei muhte la in, a thisan tuah Pathian ca tuk tan hi.
\q
\v 10 A muhte cu ohtei Pathian ca uknak ngam pakhat le thiampi te a can tik hang, a mun leihum ah uk haw tuk hi” tin, ti haw hi.
\p
\v 11 Mah cengten, ka zo le tohkham, nganhing pali le Upa tei elkim pen vancung mi tampi tei aw cu za ing. A muhte sial tale sial zawh ngawl in tam hi.
\v 12 A mun aw nging zet tuah, “Thihnak a thuak tu tuu no cu huham, hauhsak nak, cihnak, thazang ngilnak, minthan nak, sunloih nak le thupha mui cu cotaak mipa hi” tin, au haw hi.
\p
\v 13 Vanhum, leipi, leipi nuai le tuipi sungah a um mi nganghing hempoh le na hempoh ten, “Thupha mui cu, minthan nak, sunloih nak le huham te cu tohkham hum ah a khung tupa le tuu no sungah a cat ngawl in kumkhua pen kumkhua um ta hen hi” tin, a au haw cu kei man za ing.
\p
\v 14 Mah cengten nganhing pali in, “Amen” tin ti haw hi. Upa ten bopkhup in bia haw hi.
\s Lai zial hum pen tacik pakhat nak
\c 6
\p
\v 1 Mah cengten, tuu no tacik salih sung pen pakhat a hon mi cu ka zoh ten nganhing pali sung pen pakhat in vanthum aw bang mi aw tuah, “Hung in hi” tin a tih mi cu kei man za ing.
\v 2 Mah cengten, ka zo le cipuh ngo pakhat um in mahmi cipuh hum a khung tupa cu thalcang keng hi. A man lukhu pakhat cu ngah in nehnak hum ah nehnak co vawk tuk in tul hi.
\s Tacik panih nak
\p
\v 3 Tuu no in a panih nak tacik a hon ten, nganhing panih hung in hi” tin, a tih mi cu kei man za ing.
\v 4 Mah cengten a san zet mi cipuh pakhat tul hi. Mahmi cipuh hum ah a khung tupan mihing tampi te that tik tuk in leihum pen daihnak a lon saknak tuk thu co hi. A ma nelah nam ngeng pi pia hi.
\s Tacik pathum nak
\p
\v 5 Tuu no in a pathum nak tacik a hon ten a pathum nak nganhing in, “Hung in hi” tin, a tih mi cu kei man za ing. Mah cengten ka zo le cipuh hang um in, cipuh hum ah a khung tupan cuai tehnak cawi hi.
\v 6 Nganhing pali tei a lai pen a tul awnkam aw tuah a bang ve mi aw cu sangvut cang khuat khat cu piakhat tuah ngah hi. Sangvut cang khuat thum cu ngah hi. Sathau le cabit tui bo tik pah sin hi” tin, a tih mi cu kei man za ing.
\s Tacik pali nak
\p
\v 7 Tuu no in tacik pali nak a hon ten nganhing pali nak in, “Hung in hi” tin, a tih mi aw cu kei man za ing.
\v 8 Mah cengten ka zo le pawl zianzuan cipuh pakhat um in, cipuh hum ah a khung tupa cu thihnak tih mi min nei hi. Thihnak ngam cu a ma nungah zui hi. A man leipi khenli khen khat cu uk in ngalnam tuah in hihen, ningkial pamnak hei hihen, leihum ah a um mi sahang haksat nak tuah hei in hihen, mihing te that tuk in thuneih nak co haw hi.
\s Tacik panga nak
\p
\v 9 Tuu no in tacik panga nak a hon ten Pathian thu hang in hihen, a muhtei co mi a theihpih nak tetti a phuan hang in hihen, thahnak a thuak mitei hawvang te biakpiak nak tatan nuai ah kei man mu ing.
\v 10 A mun, “A thiangtho dikcang mi Topa, ohtei thisan ca tuk leihum ah a um mite thukhen ngawl in ituk huncan tian um tuk hum tin aw nging zet tuah au haw hi.
\v 11 Mah cengten a muhte pakhat ten puanngo a piak cengten, a muhte bang thahnak thuak tuk in a muhtei na dehpih U le nau te cangkim nak ah a hen laih ngawl in dawm laih daiden no um hih tuk ung hitin, a muhtei lakah thupia hi.
\s Tacik pa luknak
\p
\v 12 Tuu no in tacik paluk nak a hon ten ka zo le hinhing nasezet hing in, ni cu kel mul tuah tahcih kawm mi bang hang, hade cu thisan bang in cang hi.
\v 13 Vanhum pen aksi te huihpi na sezet a theu ten theipi kung in a ngah sen te a zuk bang leihum ah cak haw hi.
\v 14 Vanhum vang lai zial bang tham in mual le tuipi kulhnak hempoh a muhtei umnak mun pen thawn haw hi.
\v 15 Leihum kumpi, Upa thunei tute, ngalbawi Upa te, milian hausa te, thazang ngilnak a nei tute pen pan in sila le mi luat hempoh lei kua sung pen hei hihen, mual hum ah a um suang hei hihen, suangkua hol sungah ngelh in,
\v 16 “Kei muhte delh in tohkham hum ah a khung tupai mitmai le tuu no thinuuk nak pen khamsak in kei muhte sel in hi.
\v 17 A thinuuk nak a lang mi nipi heng zo hi. A kon thuak zo tuk hum hi” tin, ti haw hi.
\s Isarel miphun sung pen tacik khet a co tute
\c 7
\p
\v 1 Mah cengten vancung mi pa li cu lei ningkil li ah ding in leihum ah hei hihen, tuipi hum ah hei hihen, thingkung a um mi hum hempoh hei hihen, huih theu tik tuk ngawl in lei ningkil li huih te a colh haw mi cu kei man mu ing.
\v 2 A nung mi Pathian tacik a tel vancung mi pakhat ni suahnak lam pen a kai to mi cu keiman mu ing. A man lei le tuipi tamsiat nak a nei tu vancung mi pali aunak aw cu,
\v 3 “Ohtei Pathian sila na dek tutei cal hum ah tacik a khet ceng lak lawh leipi, tuipi le thingkung hempoh te haksat nak cang tik pah sin” tin, nging zet in au haw hi.
\v 4 Mah cengten tacik khet sa mitei mipum cazin cu kei man za ing. Isarel miphun nam hempoh sung pen 144,000 tacik khetnak co haw hi.
\q
\v 5 Judah miphun sung pen 12,000 thawng heinih tacik khetnak co in, Ruben miphun sung pen 12,000 thawng heinih, Gad miphun pen 12,000 thawng heinih,
\v 6 Asher miphun sung pen 12,000 thawng heinih, Naptali miphun sung pen 12,000 thawng heinih, Manaseh miphun sung pen 12,000 thawng heinih,
\v 7 Simon miphunsung pen 12,000 thawng heinih, Levi miphun sung pen 12,000 thawng heinih, Isakhar miphun sung pen 12,000 thawng heinih,
\v 8 Zebulun miphun sung pen 12,000 thawng heinih, Josep miphun sung pen 12,000 thawng heinih, Bezamin miphun sung pen 12,000 thawng heinih cu tacik khetnak co haw hi.
\s Haksat cimnak nasezet sung pen a suak tul mipi te
\p
\v 9 Mah cengten ka zo le awnnam kim awntu miphun hempoh sung pen suak tul in, a kua mah hi sial zawh ngawl mihing tampi hulawm khawm puanngo a silh tutei khut sungah olive kang cawi in, tohkham le tuu no mai ah ding haw hi.
\v 10 A mun, “Nunpat nak cu tohkam hum ah a khung tu ohtei Pathian le tuu no sungah um hi” tin, nging zet au haw hi.
\p
\v 11 Vancung miten tohkham pen pan kum Upa te le nganhing pali tei elkim ah ding haw hi. A mun tohkham mai ah bopkhup Pathian bia in,
\v 12 “Amen” ohtei Pathian cu a kumkhua mui cu thupha, minthan nak, cihnak, thangphat nak, sunloih nak, huham thawmngeng nak um ta hen Amen” tin, ti haw hi.
\p
\v 13 Mah cengten kum Upa tei sung pen pakhat in, “Puanngo silh mi a muhte cu a kua te hum? I lai pen hung uh kam” tin, kei mah cu dong hi.
\v 14 Kei man, “A muhte cu haksat cimnak nasezet sung pen a heng tul mite haw hi. Amun a muhtei silh mi puan cu tuu no thisan tuah sawp in thiangtho sise haw hi.
\q
\v 15 Mah hang a muhte cu Pathian tohkham mai ah um in Topai biakinn sungah sun le zan in Topa bia haw tuk hi. Tokham hum ah a khung tupa vang a muhte tuah um lang khat tuk hi.
\q
\v 16 A muhte cu ningkial dangdum nak um leh tuk ma toh hi. Ni hi vak nak le a satnak um leh ma zo hi.
\q
\v 17 Itahum titale tohkham sungah a um tuu no in a muhte uk in, nunnak ciktui nung khuk sung ah pui tuk hi. Pathian in a muhtei mit hitui hempoh huksak tuk hi” tin, ti hi.
\s Tacik salih nak
\c 8
\p
\v 1 Tuu no in tacik salih nak a hon ten, vanhum sungah nazi lang pawl tuk daiden no um hi.
\v 2 Mah cengten Pathian mai ah a ding mi vancung mi salih te kei man mu ing. A muhtei lakah lemle salih pia hi.
\p
\v 3 A dang vancung mi pakhat in paknam tui biakpiak nak suikhuat keng in, biakpiak nak taitan bulah hung in a dinten, mi thiangtho tei thunget nak te tuah kom in tohkham mai ah a um mi sui biakpiak nak taitan hum ah pia tuk in, paknam tui tampi a mah pia hi.
\v 4 Paknam tui a khu cu mi thiangtho tei thunget nak bang vancung mi khut sung pen Pathian mai ah kai hi.
\v 5 Mah cengten vancung mi in paknam tui khuat keng in biakpiak nak mei a dim tik cengten, leihum ah vawk in khua phelep nak, aw thawm nging nak, vanthum le hinhing nak te heng hi.
\p
\v 6 Mah ten lemle salih a um mi vancung mi salih ten, lemle cu tum tukin ngal ling haw hi.
\s A veikhat nak lemle
\p
\v 7 Vancung mi pakhat nak in lemle a tum ten, thisan tuah a tawh hel mi nial le mei suak in leihum ah khia suk hi. Mah cengten leipi sehthum suah sehkhat kang in, thingkung seh thum seh khat le hampa hing dimdem te kang khawng hi.
\s A veinih nak lemle
\p
\v 8 Vancung mi panih nak in lemle a tum ten, mei alh li mi mualpi bang cu tuipi sungah vawk hi. Mah cengten tuipi cu seh thum suah seh khat thisan in cang hi.
\v 9 Tuipi sungah a um mi nganhing seh thum suah seh khat thi haw. Tembaw seh thum suah seh khat vang sia hi.
\s A vei thum nak lemle
\p
\v 10 Vancung mi pathum nak in lemle a tum ten, meikhuat bang in a vak mi aksi pi cu vanhum pen cak in, ngun tuipi seh thum suah seh khat hum ah le cik tui hum ah cak hi.
\v 11 Mahmi aksi min cu saingam a hih hang, tui cu seh thum suah seh khat kha hi. Tui kha a hih hang mihing tampi thi haw.
\s A vei li nak lemle
\p
\v 12 Vancung mi pali nak in lemle a tum ten, ni seh thum suah seh khat, hade seh thum suah seh khat cu a nawt dunnak hang, aksi te seh thuam suah seh khat thim hi. Ni hi seh thum suah seh khat cu a vak nak pai in hade vang a vaknak pai bok hi.
\p
\v 13 Mah cengten ka zo le vanhum a laizang pen a leng li mi mu vanlai in, “Vancung pathum tei tum tuk a tang mi lemle aw hang, leihum ah a um mi hempoh te thupha um ma, thupha um ma, thupha um ma uh ci,” tin aw nging zet tuah a au mi cu kei man za ing.
\s A pa nga nak lemle
\c 9
\p
\v 1 Vancung mi panga nak in lemle a tum ten, vanhum pen leihum ah a cak mi aksi pakhat cu kei man mu ing. Mahmi aksi cu sonzawh ngawl in a thuk mi kua tawhcang cu pia hi.
\v 2 A man sonzawh ngawl in a thuk mi kua cu a hon ten, mei kampi meikhu bang in mei khu te cu mah kua sung pen suak tul in, kua sung pen a suak tul mi meikhu hang ni le van hang nuai cu thim hi.
\v 3 Mah cengten mei khu sung pen khau te leihum ah suak tul haw hi. A muhte cu aikam huham bang huham thuneih nak nei haw hi.
\v 4 Leihum ah a um mi hampa kung le thingkung hing dimdem te le thingkung hempoh haksat nak um tik ngawlin, cal hum ah Pathian tacik khet a um ngawl mi hempoh te bek haksat nak um tik tuk in a muhte cu thukham pia hi.
\v 5 Mah bek sial ngawl mihing te that ngawl in ha nga sung bawlsiat nak pia tuk hi. Mihing tei thuak mi haksat nak cu mihing te aikam peh a thuak mi haksat nak tuah bang ve tuk hi.
\v 6 Mahmi ni sungah mihing tampi in thihnak zei haw tuk hi. Mah naven mu haw tuk ma. A thi nuam haw ta vang thihnak cu a muhtei lakpen tai tuk hi.
\v 7 Khau tei mel cu ngaldo tukin bawl mi cipuh mel bang tuk hi. A lu hum ah sui lukhu bang mi a um hang, a muhtei mitmai cu mihing mel bang hi.
\v 8 A mun numei tei sam bang a um hang, a muhtei ha cu pawpi ha tuah bang ve hi.
\v 9 Amun thik lumphaw tuah a bang ve mi awmdat a um hang, a muhtei hazap mi aw cu ngaldo puai nak ah a tai cipuh tampi tei aw tuah bang ve hi.
\v 10 A mun aikam bang in ling a nei mi a mei a um hang, a mei sungah ha nga sung siatnak a cang tik thei mi huham um hi.
\v 11 A muhtei kumpi cu Hebru awn in Abaddon tih hei in hihen, Greek awn in Apollyon kua tawp nei ngawl tin sam mi vancung mi hi.
\p
\v 12 Thu sia pakhat cu bo zo hi. Mah cengten thu sia panih heng tuk laih hi.
\s A paluk nak lemle
\p
\v 13 Vancung mi paluk nak in lemle a tum ten, Pathian mai ah a um mi sui biakpiak nak ki pali lakpen a suak tul mi aw cu,
\v 14 Lemle a nei mi vancung mi paluk nak in, “Eupharete ngun tuipi bul ah a ken mi vancung mi pali hah un hi” tin, a tih mi cu kei man za ing.
\v 15 Mah cengten mihing seh thum suah seh khat cu that tuk in nazi pakhat, nikhat, kumkhat ca bawl mi vancung mi pali hah haw hi.
\v 16 Cipuh hum khung thiam ngalhang mipum thawng zanih hi. A muhtei mipum sial cu kei man za ing.
\v 17 Mah bang bok thuphuan muhnak sungah cipuh te le cipuh khung ngalhang te cu hi tihbang in hi. Cipuh khung thiam ngalhang tei lak pen mei alh bang in a san, a dum, kat bang aile lumphaw te um hi. Cipuh tei lu cu pawpi lu tuah bang ve in a muhtei kam sung pen mei lio alh, mei khu le kat te suak tul hi.
\v 18 A muhtei kam sung pen a suak tul mei lio alh, mei khu le kat tih mi hi haksat nak pathum hang, mihing seh thum suah seh khat thi haw tuk hi.
\v 19 Cipuh thazang ngilnak cu a muhtei kam sung le a mei ah um hi. A muhtei a mei cu ngul tuah bang ve in, lu nei in mahmi lu tuah mihing te haksat nak pia hi.
\v 20 Mahmi haksat nak hang thi ngawl in a tang mite cu khawsia te hei hihen, sui, ngun, dalsan, suang, thing ta tuah bawl mi mit nei ngawl, beng nei ngawl, hawh thei ngawl, sui zuk milim, ngun zuk milim, dalsan zuk milim, suang zuk milim, thing ta zuk milim te hei hihen, bia tuk ngawlin a khut tuah bawl mite cu sualsik ngawlin um haw hi.
\v 21 A muhtei bawl mi cu mi thahnak, aisan nak, dan tuah a dik ngawl mi nu le pa sualnak le ngukcak nak hang, sualsik ngawl in um haw hi.
\s Thazang ngilnak a nei mi vancung mi pakhat le laizial no pakhat
\c 10
\p
\v 1 Mah cengten thazang ngilnak a nei vancung mi pakhat in meingo silh in, vanhum pen a hung li mi cu kei man mu ing. A lu humah uical um in a mitmai cu ni bang hi. A ke vang meiling khuam bang hi.
\v 2 A khut sung pen a phalh mi laizial no pakhat um hi. A taklam ke cu tuipi hum ah hei hihen, a veilam ke cu leihum ah koih hi.
\v 3 Pawpi hawk bang aw nging zet tuah au hi. Mah tihbang in a au ten vanthum aw vei salih cu a muhtei aw tuah nging haw hi.
\v 4 Vanthum aw a nging vei salih cengten, kei man sialsiah nak lai ka ngat laih tak vanhum pen aw cu, “Vanthum ten a nging mi aw cu tacik khet in. Sialsiah lai ngan pah sin” tin, aw kei man za ing.
\v 5 Mah cengten tuipi hum ah le leihum ah a ding vancung mi in a taklam khut cu vanhum ah dang to in,
\v 6 Kumkhua a nung mi vanhum le leihum sungah a um mite hei hihen, leipi le leipi hum ah a um mite hei hihen, tuipi le tuipi sungah a um hempoh te hei hihen, sem suah tupa cu sal in, “Ngei tuk ma toh hi.
\v 7 Vancung mi salih nak in lemle a tum mi aw ni ten Pathian thu thup a sel mi cu a na dek tu kamsang tei lakah a hilh zo bang, cangkim nak ah heng tuk hi” tin, ti hi.
\v 8 Mah cengten ka zak mi vanhum pen aw cu, “Tuipi le leihum ah a ding mi vancung khut sungah a um a phalh sa mi laizial cu a hawh la in hi” tin, kei ma nelah ti leh hi.
\v 9 Mah hang kei cu vancung mi nelah hawh in, laizial no cu kei mah pia tuk in ka nget ten a man, “Laizial no cu la in ei in. Hi cu na pum sungah a hen ten kha tuk naven na kam pen khuai tui bang hum tuk hi” tin kei ma nelah ti hi.
\v 10 Kei man vancung mi khut pen laizial no cu la in ka eih ten, ka kam pen hum naven eih celhten ka pum sung pen kha hi.
\v 11 Mah cengten, “Nang cu miphun tampi, uknak ngam, awnphun nam kim, kumpi te tuah a seng mi kamsang thuphuan nak nei bet tuk laih ci” tin a tih mi thupiak cu kei man co ing.
\s Theihpih tu tetti panih
\c 11
\p
\v 1 Mah cengten thiangkhut tuah a bang ve mi pumpeng pakhat cu kei mah a piak cengten, “Ding in Pathian biakinnn le biakpiak nak taitan cu teh in, mah lai mun ah biakpiak nak a nei tute sial in.
\v 2 Biakinn tual cu teh pah sin. Miphun dang te piak mi a hih hang, teh ngawlin zam in. A mun a thiangtho mi khuapi cu ha sawmli le ha nih sung a ke tuah pal haw hi.
\v 3 Ka theihpih nak panih a piak hang, a mun thangkhau puan silh in ni (1,260) thawngkhat zanih le sawm luk sung kamsang bawl nak tuah phuang haw tuk hi” tin, ti hi.
\v 4 A muhte cu hi leihum bawi tei mai ah a um mi Olive kung panih le meivak nak khuam panih te hi.
\v 5 Mihing pakhat in a mun haksat nak a bawl nuam tale a muhtei kam sung pen mei cu suak tulin, a ngal te kang khawng tik tuk hi. Mihing pakhat in a mun haksat nak a bawl nuam tale a man mah bang bok thahnak thuak tuk hi.
\v 6 A mun kamsang bawl mi ni sungah nguah zu tuk ngawl in vanhum a khah theihnak, nguntui, tuikhuk thisan a cang tik theihnak, a muhtei deih mi hempoh huncan ten haksat nak phun kim tuah leihum dan tat theih nak thu nei haw hi.
\v 7 A mun a theihpih cengten son zawh ngawl a thuk mi kua sung pen, a kai to mi sahang cu a muhte tuah ngal do nehnak co in a muhte that tuk hi.
\v 8 A muhtei Topa cu thinglamteh humah a thah mi umnak mun cu Sadom tih hei in hihen, Izip tih hei in hihen, kua thukpi tin sam mi khuapi lamzin ah a luang a tang te zam tuk hi.
\v 9 Mah cengten awn phun kim tuah awn tu miphun nam kim ten ni thum le lang sung a luang te mu in phum phal ngawlin kham haw tuk hi.
\v 10 Hi leihum ah a um tu hempoh in a muhtei luang pumpi a muh haw ten, lungdam in um haw tuk hi. Pakhat le pakhat laksawng pia in um haw tuk hi. Itahum titale kamsang panih in hi leihum ah a um mi hempoh te bawlsiat tuk hi.
\v 11 Mah naven, nithum le lang a kim ten Pathian nal pen nunnak cu a mu sungah tum in a mun a mu ke tuah ding haw tuk hi. A muhte a mu tu hempoh in lau zet haw tuk hi.
\v 12 Mah cengten vanhum pen a nging zet mi aw cu, “Hi lai mun ah kai to in hi” tin a mu panih lakah a tihmi a zak ten, a muhte cu meingo tuah vanhum ah kai to haw hi. A ngal ten a muhte zo leng haw tuk hi.
\v 13 Mah huncan nazi ah hei nasezet hinhing nak cang in khuapi seh sawm suah seh khat cu cim hi. Hinhing nak hang, mihing thawng salih thi haw hi. A tang laih miten lau in vanhum Pathian minthan nak cu thangphat haw hi.
\p
\v 14 A veinih haksat cimnak cu bo ta hi. A vei thum a haksat cimnak cu heng cih nom tuk hi.
\s A salih nak lemle
\p
\v 15 Vancung mi salih nak in lemle a tum ten vanhum pen aw nging zet suak tul in, “Hi leihum uknak ngam cu ohtei kumkhua Topa le Khrih a ma ngam in cang zo hi. Topa in kumkhua uk tuk hi” tin, ti hi.
\p
\v 16 Mah cengten Pathian mai a muhtei tohkham khunnak hum ah a khung tu Upa kul luanli ten Pathian cu bopkhup bia in,
\v 17 Huham thawmngeng nak tuah a dim mi a tu huncan le a bosa huncan, a heng tuk laih mi kumkhua Pathian, a huham thawmngeng nak keng in a uk nak hang Topa cu lungdam thu hilh ing.
\q
\v 18 Miphun hempoh in thinuuk haw. Mah naven Topai thinuuk nak heng zo hi. A thisa mite thukhen tuk in hihen, Topai sila nadek tu tih mi kamsang te hei hihen, mi thiangtho te hei hihen, Topa Upat launak a nei tu Upa naupang te hei hihen, laksawng pia tuk in hihen, leihum siatsuah nak a nei tute siatsuah tuk in hihen, a hun heng zo hi” tin, ti haw hi.
\p
\v 19 Mah cengten vanhum ah a um mi Pathian biakinn hong in, biakinn sungah Topai thukham thingkuang mu ing. Khuaphelep nak, aw thawm nging nak, vanthum nak, hinhing nak tuah nasezet in nial zu tuk hi.
\s Numei, naupang le ngulpi
\c 12
\p
\v 1 Mah cengten a nasezet a lamdang mi cu keiman mu ing. Numei pakhat in ni cu silh in, hade cu a ke nuai ah sik pek hi. A lu hum ah aksi heinih a um mi lukhu cu khu hi.
\v 2 Numei nu cu naupai in nau hing tuk haksat cimnak hang au hi.
\v 3 Vanhum ah thasiah huai a lamdang a heng leh mi cu ngulpi san in lu salih, ki sawm tuah a lu hum ah lukhu salih cu khu hi.
\v 4 A mei tuah vanhum aksi seh thum suah seh khat cu dok in leihum ah khia suk hi. Mahmi ngulpi cu nau hing tuk kuan numei nui mai ah ding in nau a hin ten a capa cu thon tuk in ngak hi.
\v 5 Numei nu in miphun hempoh te thik ceipi tuah uktu tuk capa hing hi. A capa cu Pathian nelah hei in hihen, tohkham khunnak ah hei la in thiak hi.
\v 6 Numei nu vang ngam lakah tai hi. Mah lai mun ah ni (1,260) thawngkhat zanih le sawm luk sung a mah cawm le vak tuk in Pathian bawl mi umnak mun pakhat um hi.
\s Vanhum a pawlam ah khiak co mi ngulpi
\p
\v 7 Mah cengten vanhum ah ngaldo nak um hi. Michael le a nungzui vancung miten ngulpi cu do haw.
\v 8 Ngulpi in a nungzui ten do kik leh haw naven neh haw ma hi. Vanhum ah a umnak tuk mun um ma hi.
\v 9 Mah cengten leihum hempoh zol in Dawihmang tih mipa hei hihen, Saihtan tih hei in hihen sam co mi tang laih ngulpi cu leihum ah khiak suk co hi. A mah le a nungzui tute vang khiaksuk co haw zo.
\v 10 Mah cengten vanhum pen a nging zet mi aw cu, “Ohtei Pathian nunpat nak, huham, uknak ngam le Topa Khrih sungah a um mi uknak cu a tuin heng zo hi. Itahum titale ohtei U le nau te Pathian mai ah a sun a zan mawhsiat tu a ngal te khiaksuk co zo.
\q
\v 11 U le nau te cu tuu no thisan hang in hihen, a muhtei theihpih nak thu tuah nehnak co in thihnak tiang thuak in a nunnak hei pamhei sa ma hi.
\q
\v 12 Mah hang, vanhum le vanhum miten lungdam un. Leipi le tuipi cu thupha mui cu um ma hi. Itahum titale Dawihmang pa cu a ma huncan dawm laih no bek um tih a theih hang, nasezet thinuuk nak tuah nohtei umnak ah heng zo hi” tin, a tih mi cu kei man za ing.
\s A hil in bawl siatnak a co mi numei nu
\p
\v 13 Ngulpi cu hi leihum ah a khiak suk a muhten, capa a hing tu numei cu hil in bawl siat hi.
\v 14 Numei nu in ngam lak sung a ma umnak ah leng thei tukin, a ngeng zet mi mu vanlai ha panih pia hi. Numei cu mah lai umnak ngulpi mai pen suak ca in, ha luk sung cingkem in cawm tuk hi.
\v 15 Ngul in numei nu cu tui sungah taivawk tik tuk in a nungpen tui cu ngun tuipi bang in a kam sung pen mut tul hi.
\v 16 Mah naven, leihum pi in numei nu cu bawm hi. Leipi in a kam cu kau in ngulpi kam sung pen a muh tul mi nguntui pi cu hem tuk hi.
\v 17 Mah cengten, ngulpi cu numei hum ah a thinuuk in Pathian thukham a zui tute le Zisuh tuah a seng mi theihpih nak tetti a co tute cu numei nui miphun sung pen a tang mi a muhte tuah ngaldo tuk in hawh zo hi.
\v 18 Tuipi mawk philnel humah ding hi.
\s Tuipi sungpen a kai to mi sahang
\c 13
\p
\v 1 Mah cengten ki sawm le lu salih a nei mi sahang pakhat tuipi sung pen a kai to mi cu keiman mu ing. A ki hum ah lukhu sawm a um hang, a lu hum ah Pathian mawhsiat mite um hi.
\v 2 Ka muh mi sahang cu tavang tuah bang ve hi. A ke cu vom ke tuah bang ve hi. A kam cu pawpi kam bang hi. Ngulpi in a huham, a tokham le a thuneih nak huham cu a mah pia hi.
\v 3 Sahang lu pakhat cu thi tuk tian in a thah mi bang a hi ta vang a thi tik thei mi liam ma cu dam hi. Mah cengten hi leihum hempoh lamdang zet in sahang nungah zui haw hi.
\v 4 Mah bek sial ngawl ngulpi in sahang thu neihnak a piak hang, a mun sahang cu bia haw tuk hi. A mun, “A kon sahang tuah bang ve hum? A kon a mah cu do ngam tuk hum” tin, tiin sahang cu bia haw hi.
\v 5 Sahang in nasezet awnkam tuah hei in hihen, Pathian cu a sual mi awnkam tuah a son theihnak a dim in, ha (42) sawm hanih sung thu neihnak tuah uk tuk hi.
\v 6 Mah cengten Pathian cu a sual mi awnkam son thiam nak tuah Topai min hei in hihen, Topai deubuk hei hihen, vanhum ah a um mite hei hihen, zotsak nak awnkam son hi.
\v 7 A man mi thiangtho te ngal do in nehnak thu a co ten, awnphun nam kim awntu miphun hempoh uknak thu hei nei hi.
\v 8 Thihnak thuak tu tuu no laibu sungah leipi po pat pen pan min a ngat ngawl mi hi leihum ah a um tu hempoh sahang bia haw tuk hi.
\v 9 Beng a nei mi in za ta hen.
\q
\v 10 Midang tei mat mipa cu a pumpak loli mat co tuk hi. Nam tuah mi that thei tupa cu nam tuah thah co tuk hi. Hi thu sungah mi thiangtho te thuak zawh nak le muantaak nak nei haw tuk hi.
\s Leipi sung pen a suak tul mi sahang
\p
\v 11 Mah cengten leipi sung pen a suak tul mi a dang sahang pakhat cu kei man mu ing. A mah cu tuu no ki tuah a bang ve mi ki panih nei in ngulpi bang awn hi.
\v 12 Sahang a pakhat nak hi thuneih nak hempoh cu mang hi. Hi leihum ah a um mi hempoh thihnak pen a dam tik thei mi a pakhat nak sahang bia tik hi.
\v 13 Mah bek sial ngawl nasezet a lamdang thasiah huai te bawl in mipi mai ah vanhum pen leihum ah mei cu khia suk tik hi.
\v 14 A man pakhat nak sahang mai ah phalnak a co mi thasiah huai hang, hi leihum ah a um tu hempoh zol in nam liam ma a vei ta vang, a nung mi sahang zuk milim cu bawl tuk in hi leihum ah a um tu mihing hempoh te tik hi.
\v 15 Sahang zuk milim awn thei tuk in le sahang zuk milim a bia ngawl tu hempoh that tuk in a bawl theihnak thu cu zuk milim sungah nunnak a piak theih mi thu nei hi.
\v 16 Sum a ngah thei mipa, mi zawng pa, sila pa, mi luat pa, naupang Upa hempoh in a taklam khut ah in hihen, a cal ah hei in hihen, tacik senthu nak co tuk in hihen,
\v 17 Sahang min a hima tale a min sial mi tacik a um ma tale a kua mah in lei thei tuk ngawlin thukhen hi.
\v 18 Hi thu sungah in cihnak um hi. Cih thiamnak a nei tupan sahang nambat sial nak cu sial hen. Mihing sial mi hi. A nambat sial cu 666 zaluk le sawm le paluk hi.
\s Tuu no le mihing 144,000
\c 14
\p
\v 1 Mah cengten ka zo le tuu no cu Zion mual hum ah ding hi. Tuu no min le Pai min te a mu cal hum ah ngat mi 144,000 te tuah langkhat in um haw hi.
\v 2 Mah cengten tuipi aw thawm tuah hei in hihen, vanthum nging zet bang vanhum pen aw cu keiman za ing. Mah tih cun ka zak mi aw cu phaidak tum thiam tei phaidak tum aw tuah bang ve hi.
\v 3 A mun tohkham mai ah hei hihen, nganhing pali le kum Upa tei mai ah hei in la thak sa haw tuk hi. Leihum pen a tat mi mihing 144,000 thawng sawmli le thawngli sial ngawl a kuamah in mahmi la cu sa thei tuk ma hi.
\v 4 A muhte cu khanglai a him mite hi haw hi. A muhte cu tuu no hawhnak hempoh ah a zui haw hang, Pathian le tuu no ca in ngah a ngah masa bel hi tuk in mihing tampi tei lak sung pen a tat mite hi.
\v 5 A muhtei kam sungah zol thu um ma hi. A muhte cu sual a nei ngawl mite hi.
\s Vancung mi pathuam tei au mite
\p
\v 6 Mah cengten a dang vancung mi pakhat cu vanhum zangzawl ah a leng li mi cu kei man mu ing. A mah cu hi leihum ah a um awnphun namkim awn tu miphun hempoh tei lakah kumkhua a kho mi a sunglawi thuthangpha keng hi.
\v 7 A man aw nging zet tuah, “Pathian thukhen nak huncan heng zo a hih hang, Topa cu launak tuah a minthan nak cu thangphat un. Vanhum, leihum, tuipi le ciktui nung a bawl tupa cu bia un hi” tin, au hi.
\p
\v 8 Mah cengten a panih nak vancung mi in a zui hang, “A dan thu tuah a dik ngawl mi nu le pa sualnak hang, a heng mi nasezet a thinuuk nak cabit tui cu miphun hempoh a do tu Balilon khuapi cu cim zo hi, cim zo hi” tin, au hi.
\p
\v 9 Vancung mi a pathum nak in a muhtei nungpen zui in aw nging zet, “Sahang le a ma zuk milim bia in a cal hum ah hei hihen, a khut hum ah hei hihen, a sialsiah nak tacik a co tupa cu,
\v 10 Pathian thinuuk nak khuaihai sungah i ma mah a lawi ngawl in buak mi, Topan a nasezet thinuuk nak cabit tui cu in tuk hi. A man vancung mi a thiangtho te le tuu no mai kat meipi sungah bawl siatnak thuak tuk hi.
\v 11 A muhtei thuak mi bawl siatnak meikhu cu a kumkhua in kai hi. Sahang le a ma zuk milim bia in, a min sialsiah nak tacik a co tupa cu a sun a zan colhdam nak um tuk ma hi” tin, au hi.
\v 12 Pathian dan thukham hei hihen, Zisuh Khrih sungah upnak hei hihen, cingkem tu mi thiangtho ten hi thu sungah thuak zawh nak thu um hi.
\p
\v 13 Mah cengten vanhum pen aw cu, “Ngan in. A tu pen pan Topa Pathian sungah a thi mite cu thupha mui cu um hi” tin, a son mi cu kei man za ing. Hawvang thiangtho in, “Man zuh hi. A mun a muhtei zuamnak pen colhdam nak ngah haw tuk hi. A muhtei bawl mi nate vang a muhte tuah zui haw tuk hi” tin, thupia hi.
\s Hi leihum ah ankung tampi a cop nak
\p
\v 14 Veikhat ka zo leh ten a ngo mi meingo a um hang, meingo hum a lu hum ah sui lukhu khu in a khut sungah a hiam zet phio a keng tu mihing tuah a bang ve mi pakhat khung hi.
\v 15 Mah cengten a dang vancung mi pakhat cu biakinn sung pen tul in, meingo hum ah a khung tupa cu “Hi leihum ah ankung cop tuk cang san zo, cangah tuk huncan a hen zo hang Topai phio cu hah in cang at toh in hi” tin, aw nging zet tuah au hi.
\v 16 Meingo hum ah a khung tupan a phio cu leihum lam a ah ten leipi cu at hi.
\p
\v 17 Mah cengten a dang vancung mi pakhat in vanhum sungah a um mi biakinn sung pen tul in, a khut sungah a hiam zet mi phio um hi.
\v 18 Mah cengten mei hum ah thuneih nak uktu a dang vancung mi pakhat in biakpiak nak taitan sung pen tul in a hiam zet mi phio a keng tupa cu, “Sabit ngah te a min zo hang, a hiam zet mi na nam cu hah in hi leihum pen cabit bawk te at in hi” tin, aw nging zet in ti hi.
\v 19 Vancung mi in a phio cu hi leihum pi cu a ah ten, hi leihum pen cabit bawk te at in Pathian nasezet thinuuk nak tuah a seng mi cabit ngawinak khuk sungah sung suk hi.
\v 20 Khuapi pawlam ah a um mi cabit ngawinak khuk sungah a ngawi ten, thisan cu cabit ngawinak pen suak tul in, cipuh kamkaih tian sang in, falong 1,600 thawngkhat le zaluk tian hi.
\s Haksat cimnak kum salih a keng tu vancung mi salih
\c 15
\p
\v 1 Mah cengten vanhum ah nasezet a lamdang thasiah huai tih mi haksat cimnak kum salih a keng tu vancung mi salih cu keiman mu ing. Mahmi haksat cimnak hang, Pathian thinuuk nak nasezet cu cangkim nak ah heng tuk hi.
\p
\v 2 Mei tuah tawh hel mi thalang tuipi bang hei hihen, sahang, a ma zuk milim le a min sial nak nambat hum ah nehnak a co tuten Pathian phaidak keng in, thalang tuipi hum ah a din haw mi cu kei man mu ing.
\v 3 A mun Pathian sila na dek tu Mosi la le tuuno la te sa in, “Huham tuah a dim kumkhua a nung mi Pathian, Topai bawl mi nate cu a sunglawi thasiah huai mi hi. Mi phun hempoh tei kumpi, Topai lamzin te cu a dik in a man mi hi.
\q
\v 4 Kumkhua a nung Pathian aw, a kon Topa cu lau ngawl a min thangphat ngawl in um tuk hum? Topa pakhat bek cu thiangtho hi. Topan a dikcang mi thukhen nak te lang ciangzet a hih hang, miphun hempoh Topai mai ah hung in bia haw tuk hi” tin, ti haw hi.
\p
\v 5 Mah cengten ka zo le vanhum sungah a um mi theihpih nak deubuk biakinn cu hong in a um hang,
\v 6 Haksat cimnak kum salih a keng tu vancung mi salih te biakinn sung pen tul haw hi. A mun a thiangtho sise mi puan silh in a awm ah sui tuah het hi.
\v 7 Nganhing pali sung pen pakhat in kumkhua a nung mi Pathian thinuuk nak tuah a dim sui khuathai salih cu vancung mi salih te pia hi.
\v 8 Pathian huham thawmngeng nak hang, biakinn cu meikhu tuah a dim in vancung mi salih tei haksat cimnak a bo laih ngawl tian biakinn sungah a kua mah tum thei tuk ma hi.
\s A veikhat thinuuk nak khuathai
\c 16
\p
\v 1 Mah cengten biakinn sung pen aw nging zet mi cu, “Hawh ta un. Pathian nasezet thinuuk nak khuathai salih cu leihum ah buak suk un hi” tin, vancung mi salih tei lakah a tih mi cu kei man za ing.
\p
\v 2 Vancung mi pakhat nak hawh in a khuathai cu leihum ah a buak suk ten, sahang sialsiah nak tacik a nei tupa le a ma zuk milim a bia tutei sungah a nasezet mi uilut po hi.
\s A veinih thinuuk nak khuathai
\p
\v 3 Vancung mi panih nak in a thinuuk nak khuathai cu tuipi hum ah a buak suk ten, tui cu mithi sa thisan bang tuipi sungah a um mi nganhing hempoh thi khawng hi.
\s A veithum thinuuk nak khuathai
\p
\v 4 Vancung mi pathum nak in a khuat hai cu ngun tuipi sungah le ciktui hum ah a buak suk ten, tui cu thisan in cang hi.
\v 5 Mah cengten tui tuah a seng mi vancung mi pakhat in, “A tu um in a bosa huncan hei in a um mi, mi thiangtho Topa’n hi thu te thukhen nak cu a dik mi hi.
\q
\v 6 A mun mi thiangtho tei thisan, kamsang tei thisan a luan tik zo hang, Top’n mahmi thisan cu a muhte in tik zo hi. A mun mah tihbang thuak tuk in a co taak mi hi” tin, a tih mi cu kei man za ing.
\p
\v 7 Biakpiak nak taitan vang, “A man mi hi. Thawmngeng nak tuah a dim mi kumkhua a nung Pathian, Topa thukhen nak te a dik a man mi hi” tin, a tih mi cu kei man za ing.
\s A veili thinuuk nak khuathai
\p
\v 8 Vancung mi pali nak in a khuathai cu ni hum ah a buak ten, ni in mihing te mei tuah a kang tik theih nak thu nei hi.
\v 9 A sa leita mihing ten ni sa kang thuak in, hi haksat cimnak te uktu Pathian min cu camsiat haw tuk hi. Pathian thangphat tukin sualsik haw ma hi.
\s A veinga thinuuk nak khuathai
\p
\v 10 Vancung mi panga nak in a khuathai cu sahang tohkham hum ah a buak suk ten, sahang uknak ngam cu khuathim cang in mihing tampi in a muhtei thuak le cimnak hang a muhtei lei cu pet haw tuk hi.
\v 11 Mihing tampi in a muhtei thuak mi haksat nak le uilut a po hang, vanhum ah a um mi Pathian cu tamsiat haw tuk hi. A muhtei bawl nak te a sualsik haw ma hi.
\s A veiluk thinuuk nak khuathai
\p
\v 12 Vancung mi paluk nak in a khuat hai cu Eupharate ngun tuipi hum ah a buak suk ten, nisuah nak ngam pen kumpi tei ca lamzin bawl tuk in ngun tuipi cu kang tik tuk hi.
\v 13 Mah cengten ngulpi kam sung pen hei hihen, sahang kam pen hei hihen, simphuk tuah a bang ve a nawngkai mi hawvang pathum a suak tul mi cu kei man mu ing.
\v 14 A hawvang te thasiah huai a bawl thei mi khawsia tei hawvang te hi. A mu hawvang cu leihum hempoh ah a um mi kumpi te, thawmngeng nak tuah a dim mi Pathian ni pi sungah ngaldo tuk in hulawmkhawm tik haw hi.
\v 15 Zo un. Kei cu nguca bang in hung tung. Puan silh ngawl thacang in a zahcak nak cu mihing tei muh mi bang um tuk ngawl in, a silh mi puan kem in ngallin nak tuah a ngak tupa cu thupha mui cu um hi.
\p
\v 16 A hawvang ten kumpi te cu Hebru awnlai tuah Armagadon tin sam mi umnak mun ah hulawm tik haw hi.
\s A vei salih thinuuk nak khuathai
\p
\v 17 Vancung mi salih nak in a khuathai cu vanhum huih sungah a buak suk ten, biakinn sungah a um mi tohkham pen aw nging zet a suak tul mi cu, “Ceng zo ing hi” tin, ti hi.
\v 18 Mah cengten khuaphelep nak, aw thawm nging nak, vanthum nak te heng in nasezet hin hing hi. Leihum ah mihing te a um pen pat in mah tihbang mi a lamdang nasia mi hinhing cang awng ma hi.
\v 19 Khuapi cu seh thum suah bal kek in, uknak ngam khuapi te vang cim khawng hi. Pathian in a thinuuk nak tuah a seng mi nasezet a thinuuk nak cabit tui pia tukin Babilon khuapi cu phawk hi.
\v 20 Tuipi kulh a um mi hempoh tham khawng in, mual te vang muh tuk um leh ma zo hi.
\v 21 Vanhum pen pawng zakhat a ngit mi nial cu mihing tampi tei hum ah cak suk hi. Hi haksat cimnak cu nasezet a hih hang, mihing tampi in nial haksat nak hang, Pathian cu tamsiat haw hi.
\s A san zet mi sahang hum ah numei khung
\c 17
\p
\v 1 Mah cengten khuathai salih a um mi vancung salih sung pen pakhat cu hung in, kei mah tuah otpih dun in, “Hung in. Tui tampi hum ah a khung su zuak nu thuak tuk mi thukhen nak cu nangmah lak tung hi.
\v 2 Hi leihum kumpi te a mah tuah dan thu a dik ngawl mi nu tuah sualnak bawl in, hi leihum ah a um tu hempoh te vang a ma dan thu tuah a dik ngawl mi nu le pa sualnak cabit tui kham haw hi” tin a tih cengten,
\v 3 Keimah cu hawvang thiangtho in ngam lakah pui hi. Mah cengten lu salih le ki sawm a nei, Pathian minthan nak a zawnsak tu min tuah a dim in a um tu, sahang san zet hum ah a khung mi numei nu pakhat cu kei man mu ing.
\v 4 Numei nu cu mepian le a san zet mite silh in, sui, suang manpha le kep suang te tuah bawl mi a khut sungah a nawngkai mite le a dan thu a dik ngawl mi nu tuah a sualnak bal a dim mi sui khuat keng hi.
\v 5 A cal hum ah ngat mi lai a sel thuthup min cu, “Babilon khuapi su zuak te tuah leihum pen a nawngkai mitei nu hi.
\p
\v 6 Numei nu cu mi thiangtho tei thisan, Zisuh theihpih tetti a nei tutei thisan tuah ngui in a um mi cu kei man mu ing. Kei man a mah ka muhten lamdang sa zet ing.
\s Sahang le a hum ah a khung tu numei a tihnop nak
\v 7 Mah cengten vancung mi in, “Nang ita thasiah in um nge cim? Numei nu le a mah a paw tu lu salih le ki sawm a um, sahang tei sel mi thuthup cu nangmah lak tung hi.
\v 8 Na muh mi sahang cu a bosa huncan ah a um zo mi cu a tuin um ma hi. A ngei ngawlin a thuk zet mi kua sung pen kai to in, siatnak ah heng tuk hi. Hi leihum ah a um mitei lak pen leihum a po pat pen pan, nunnak laibu sungah min cazin a tel ngawl mite a bosa in a um awng zo mi cu a tuin um ma zo hi. A ngei ngawl in a heng tuk mi sahang cu mu in lamdang sa haw tuk hi.
\v 9 Hi thu sungah cihnak tuah a dim mi theihnak um hi. Lu salih cu numei nui khun mi mual salih hi.
\v 10 Kumpi salih vang hi bok hi. Pa nga lam cu sung in pakhat cu a tuin um hi. A dang pakhat cu heng ma laih hi. A heng ta vang dawm laih sung no bek kho tuk hi.
\v 11 A bosa huncan ah um in a tu huncan ah a um ngawl mi sahang a liat nak kum pi hi. A mah cu salih sung pen pakhat a hih hang, siatnak ah heng tuk hi.
\v 12 Na muh mi ki sawmkhat cu uknak ngam a co laih ngawl mi kumpi sawmkhat te hi. Mah naven a mun sahang tuah kumpi uknak cu hun com no sung co haw tuk hi.
\v 13 Mah kumpi ten thinkhat lungcun in a muhtei thu neih nak huham cu sahang pia haw tuk hi.
\v 14 A mun tuu no cu do in, tuu no in neh tuk hi. Itahum titale tuu no cu to hempoh tei Topa, kumpi hempoh tei kumpi hi. Topa tuah a um langkhat tute vang samnak a co tu, a tennak a co tu le muantaak mite hi haw hi” tin, ti hi.
\v 15 Mah cengten vancung mi in, “Na muh mi su zuak umnak tui te, uknak ngam te, awnphun nam kim a mang tu miphun te hi.
\v 16 Na muh mi ki sawm le sahang te cu su zuak nu te haw in, a hauhsak nak hempoh te siat suah haw tuk hi. A silh mi puan vang duh sak in a taksa ei haw tuk hi.
\v 17 Itahum titale Pathian in a thu awnkam a kim tian, a mun thinkhat lungcun in a muhtei uknak ngam cu sahang nelah a piak hang, Pathian tuptah ngaihsut nak bang dek tuk in a muhtei thinlung sungah khum tum hi.
\v 18 Na muh mi numei nu cu hi leihum kumpi te uktu khuapi hi” tin, kei ma nelah ti hi.
\s Babilon khuapi a cak nak
\c 18
\p
\v 1 Mah cengten vancung mi pakhat in huham thawmngeng nak a dim tuah vanhum pen a tolhsuk mi cu kei man mu ing. A minthan nak hang leihum cu vak hi.
\v 2 A man aw nging zet tuah au in, “Babilon khuapi cu cim zo hi, cim zo hi. Khawsia umnnak cang zo hi. A thiangtho ngawl mi hawvang tei kua in cang zo. A thiangtho ngawl a nawngkai mi va no phunkim umnak mun in cang zo.
\q
\v 3 Miphun hempoh ten dan tuah a dik ngawl nu le pa sualnak tuah a seng mi nasezet thinuuk nak cabit tui a in haw hang, hi leihum kumpi te cu a mah hei dan tuah a dik ngawl mi nu le pa sualnak bawl in, hi leihum sum bawl tute cu a sual ngamtat nop nak hang, hausa haw tuk hi” tin, ti hi.
\q
\v 4 Mah cengten vanhum pen a dang aw pakhat cu, “Ka miphun te aw, nohten a ma sualnak sungah tel tuk ngawl in hihen, a thuak tuk mi haksat nak pakhat thuak kha tuk ngawl in hihen, a ma nel pen suak tul un.
\q
\v 5 Itahum titale a sual cu vanhum tian khong a hih hang, a ma sualnak te Pathian in phawk leng hi.
\q
\v 6 A piak sa mi bang a mah pia leh ta un. A bawl mi sualnak hum ah letnih in lul leh ta un. A tohhel sa mi khut sungah a ma ca, a letnih tokhel in pia ta un.
\q
\v 7 A man a mah le mah khaisang in a hauhsak nak bang a mah nasezet bawl siatnak, thinkham lungkham kahnak bawl ta un. Kei cu kumpi nu ing. Meivong hi kha mang hi. Thinkham lungkham kah nak cu ituk mah ten tawk tuk mang hi” tin ti in a thinlung sung pen a tih hang in hi.
\q
\v 8 Itahum titale a thuak tuk mi haksat cimnak cu thihnak, thinkham lungkham nak le ningkial dangdum nak te ni khat sung a ma hum ah heng in a mah cu mei tuah kang tum tuk hi. Itahum titale a mah thukhen tu kumkhua Pathian cu thazang ngilnak tuah a dim hi.
\s Babilon a caknak hang leihum mitei kahnak
\v 9 A mah hei dan tuah a dik ngawl mi nu le pa sual a bawl hang, hauhsak nak tuah a ngamta tu hi leihum kumpi te cu a mah a kang mi meikhu te a muh haw ten, a ma ca a awmcum in kap haw tuk hi.
\v 10 A mun a thuak tuk mi bawlsiat nak a lau haw hang khuala pi ah ding in, “A ngeng zet mi khuapi, thazang ngilnak a nei mi Babilon khuapi, nang cu thinnop nak tuk um ma hi, thinnop nak tuk um ma hi. Mah hang na thuak tuk mi nazi pakhat sung thukhen nak ah heng zo hi” tin, ti haw hi.
\p
\v 11 Hi leihum ah a um mi sum bawl tute vang a muhtei van te a lei tu tuk pakhat no hei a um ngawl hang, a ma ca thasia lungkham in kap haw tuk hi.
\v 12 A muhtei van te cu sui, ngun, suangman pha, suangkep man pha, puanthan nem, mepian puan nem, puu puan, a san zet mi puan than, thing nam tui phunkim, sai ho phun nam kim, a man nei mi thing, dal, suang ngo tuah bawl mi van phun nam kim,
\v 13 Cinnamon namtui, hang namtui, pak namtui, sathau namtui, sangvut ngawi vam, frankensen, cabit tui, sathau, sangvut cang, khui, tuu, cipuh, cipuh leng, sila, mihing hawvang te hi.
\v 14 Na thinlung deihnak a ngah te cu na nelpen pai zo hi. Nangmah cu thau nak tuah a ngui tik thei mite le a mawi tik thei mite vang na nelpen pai zo hi. Hi thu te cu ituk mahten mu leh tuk ma toh ci.
\v 15 A ma hang hausa mite cu mahmi thil van a neih mi sum bawl tuten, a thuak tuk mi bawl siatnak a lau haw hang a khuala pi pen ding in, thasiat nak tuah kap haw hi.
\v 16 Puan nem, mepian le a san zet mi puan te silh in sui, suangman pha le kep suang te tuah bawl mi khuapi, nang cu thinnop nak um ngawl mi, thinnop nak um ngawl mi in cang ta cim maw.
\q
\v 17 Itahum titale hizah loli tian hauhsak nak cu hun can com no sung siatsuah nak co hi” tin, ti haw tuk hi. Tembaw nei tu hempoh, mun hempoh ah a hawh tu te le tembaw na dek tute, tuipi sungah na dek tu hempoh te vang khuala pi ah ding in,
\v 18 A mah a kang li toh mi mei khu a muhten, “Hi khuapi tuah a bang ve mi khuapi ai khuapi um hum” tin, au haw tuk hi.
\v 19 A mun a lu hum ah leivul koih thasiat nak tuah kap haw in, “A muhtei a manpha thil van hang, tuipi sungah a um mi tembaw a nei tu hempoh hausa tik tu a ngeng zet mi khuapi nang cu hun can dawm laih no sung siatsuah nak na co hang thinnop nak um ngawl, thinnop nak um ngawl in cang ta cim maw” tin, au haw hi.
\q
\v 20 Vanhum pen pan mi thiagtho te, a nungzui kamsang te, a mah zo in lungdam un. Pathian cu nohtei lam ah um in a mah cu thukhen zo hi” tih cu kei man za ing.
\s Babilon khuapi a dawl tawpnak
\p
\v 21 Mah cengten thazang ngilnak a nei vancung mi pakhat cu a ngeng zet mi an ngawinak suangpi a bang mi suangpi pakhat keng in tuipi sungah a khiak ten, “Babilon khuapi cu nasezet vawk keh in muh tuk hei in um leh ma zo hi.
\q
\v 22 Phaidak tum thiam, kitha tum thiam, pheveu tum thiam, lemle tum thiam tei tum mi aw cu nang ma sungah za leh him tuk ma toh ci. An cang ngawinak aw vang nang ma sung pen za leh hihim tuk ma toh ci.
\q
\v 23 Mei khuat vak nak vang nang ma sungah vak leh hihim tuk ma toh hi. Mohuai tupa le mo nu tei aw cu nang ma sungah za leh hihim tuk ma toh ci. Itahum titale na sum bawl tute cu hi leihum uk tu bawi te hi. Mi phun hempoh in nang ma aisan nak hang zol sang haw zo hi.
\q
\v 24 Kamsang te, mi thiangtho te le hi leihum ah thahnak a thuak tu hempoh tei thisan cu mahmi khuapi sungah mu hi” tin, ti hi.
\s Babilon a caknak hang vancung mitei lungdam nak
\c 19
\p
\v 1 Mah cengten vanhum ah hulopkhawm nak a nei mitei a nging zet mi aw cu kei man za ing. A mun, “Halleluijah. Nunpat daihnak, minthan nak le huham cu Pathian tuah a seng mi hi.
\q2
\v 2 Itahum titale Topai thukhen nak te a dik a man mi hi. Dan tuah a dik ngawl mi nu le pa sualnak hang, hi leihum pi a sia tik thei mi su zuak nupi cu Topan thukhen zo hi. Topai sila na dek tutei thisan cu a ma khut pen a luang mi sual dan tat zo hi” tin, ti haw hi.
\p
\v 3 Mah cengten a mun, “Halleluijah tih hei in hihen, a meikhu cu a kumkhua in kai hi” tih hei in ti haw hi.
\p
\v 4 Kum Upa kul luanli te le nganhing pali ten, bopkhup in tohkham hum ah a khung tu Pathian bia in, “Amen, Halleluijah” tin, ti haw hi.
\p
\v 5 Tohkham hum pen a suak tul mi aw cu, “Pathian na dek tute le Pathian launak a nei tu a ngeng a neu hempoh, ohtei Pathian cu thangphat un hi” tin, ti hi.
\s Tuuno mo puai
\p
\v 6 Mah cengten mi tampi tei au thawm hei hihen, tui thum aw tampi hei hihen, nasezet vanthum aw te tuah a bang ve mi aw cu, “Halleluijah, thawmngeng nak tuah a dim mi ohtei Pathian in uk tuk hi.
\q
\v 7 Ohten lungdam thanop no um tuk hung hi. Topai minthan nak cu thangphat tuk hung hi. Itahum titale tuu no mo puai nak huncan heng zo. Mo nu in a mah le mah ngallin nak bawl zo hi.
\q
\v 8 Mo nu in a thiangtho sise mi puan nem a silh nak thu um hi. Puan nem cu mi thiangtho tei dikcang nak hi” tin, a tih mi cu kei man za ing.
\p
\v 9 Mah cengten vancung mi in, “Tuu no mo puai taak eih samnak a co tu hempoh thupha mui cu co haw tin a ngat mi hi” tin ka nelah a hilh cengten, hi thu te cu Pathian a dik a man mi awnkam te hi” tin, ti hi.
\v 10 Keiman a muhte bia tukin a ke bulah bopkhup ing. A man bawl pah sin. Kei cu a na deh pih ing hi. Zisuh theihpih tetti a co tu na U le nau tei na dehpih hei hi ing. Pathian cu bia in. Itahum titale kamsang tei hilh mi hawvang hi” tin, ti hi.
\s Cipuh ngo hum ah a khung tupa
\p
\v 11 Mah cengten ka zo le vanhum cu hong in cipuh ngo pakhat um hi. Cipuh hum ah a khung tupa cu muantaak mipa, midik pa tin sam nak a co tupa hi. A dikcang nak tuah thukhen in ngal do hi.
\v 12 A mit te cu mei lio alh bang a hih hang, a lu hum ah lukhu te khu hi. Mahmi cu a mah sial ngawl a kuamah in thei ma hi.
\v 13 A man thisan sungah nip mi puan silh in, a min cu Pathian awnkam thu tin sam hi.
\v 14 Vancung ngalkap ten a thiangtho mi puan nem ngo silh cipuh ngo khung in, a nungah zui haw hi.
\v 15 A kam sung pen miphun hempoh dantat tuk in a hiamzet mi nam suah tul hi. A man a muhte cu thik thiangkhut tuah uk tuk hi. A mah cu a huham thawmngeng nak tuah a dim mi Pathian nasezet thinuuk nak tuah a seng mi thinuuk nak, cabit tui ngawinak khuk pal tuk hi.
\v 16 A silh mi puan le a kawng ah, “Kumpi hempoh tei kumpi, to hempoh tei Topa” tin, ngat mi min samnak um hi.
\s Sahang le a ngalkap tei sunnak
\p
\v 17 Mah cengten ni sungah a ding mi vancung mi pakhat cu kei man mu ing. A man vanhum zang zawl ah a leng li mi vano hempoh, “Pathian taak eih nak puai pi ah hung in hulawm khawm un.
\v 18 Kumpi tei sa, ngal bawi tei sa, ngalkap tei sa, cipuh le cipuh khung tutei sa, mi luat mite le sila te pen pan U pa naupang hempoh tei sa cu hung in ei un hi” tin, aw ngingzet tuah au hi.
\p
\v 19 Mah cengten sahang pen pan hi leihum kumpi te le a muhtei ngalkap te, cipuh a khung tupa le a ngalkap te do tuk in a hulopkhawm mi cu kei man mu ing.
\v 20 Mah naven kamsang a tiamhem mite tuah mat co hi. Kamsang a tiamhem mi cu sahang mai ah thasiah huai te bawl in mah thaisiah huai a bawlnak hang, sahang tacik co in a ma zuk milim a bia tu mite a zol tupa hi. A mu panih in kat tuah a kang mi mei nimpi sungah a nung in khia haw tuk hi.
\v 21 A tang laih mite cu cipuh khung tupai kam sung pen a suak tul mi nam tuah thah co tuk hi. Vano hempoh ten a muhtei sa cu khampek ei haw tuk hi.
\s Hetcip ken nak a thuak tu Saihtan
\c 20
\p
\v 1 Mah cengten vancung mi pakhat in sonzawh ngawl a thuk mi kua tawh le thik khau ngengpi cu a khut ah cawi in, vanhum pen a tolh suk mi cu kei man mu ing.
\v 2 A man tang laih ngulpi Dawihmang Saihtan tih mi ngulpi cu man in, kum thawngkhat thik khau tuah ken cih hi.
\v 3 Kum thawngkhat a bo laih ngawl tian miphun hempoh zol tuk ngawl thu, sonzawh ngawlin a thuk mi kua sungah khia suk khahkhum in a hum ah tacik khen hi. Mahmi huncan cengten, a mah cu dawm laih no sung luatnak pia tuk hi.
\s Mi thiangtho te Khrih tuah langkhat in a uk haw nak
\p
\v 4 Mah cengten tohkham te vang kei man mu ing. Tohkham hum a khung tute cu thukhen nak a co tute hi. Sahang le a zuk milim a bia ngawl tute, a muhtei tacik cu a cal hum ah a khet ngawl mite, a khut ah tacik khet co ngawl in Zisuh theihpih nak tetti le Pathian thu hang, ngawng talhnak a thuak tutei hawvang te kei man mu ing.
\v 5 A tang laih mi thisa te cu kum thawngkhat uknak a bo laih ngawl tian nung leh haw tuk ma hi. Hi thu cu a veikhat a thawh lehnak hi.
\v 6 A veikhat thawh lehnak sungah a tel tupa cu thupha mui cu co tu mi thiangtho pa hi. Veinih thihnak cu a muhtei hum ah ituk mah ten thu neihnak um tuk ma hi. A muhte cu Pathian le Khrih hi thiampi te a hih haw hang, Khrih tuah kum thawngkhat sung uk haw tuk hi.
\s Thahnak a thuak tu Saihtan donak
\p
\v 7 Kum thawngkhat a bo ten, Saihtan cu a mah khah khup nak thawng inn sung pen luatnak co in,
\v 8 Lei ningkil li ah a um mi Gog le Magog tih mi miphun hempoh te zol tuk in hihen, ngaldo tukin hulopkhawm nak hei hihen, suak tul tuk hi. A muhtei mipum sial cazin cu tuipi mawk philnel zah in tam hi.
\v 9 A mun hi leihum ah kai to in mi thiangtho tei ngalkap bu hei hihen, ih huai mi khuapi hei hihen um cih in kilcih haw hi. Mah cengten vanhum pen mei cak in a muhte cu kang tum hi.
\v 10 A muhte a zol tu Saihtan cu sahang le kamsang sual tei umnak mun kat tuah toh hel mi mei nimpi sungah vawk co tuk hi. A mun mah lai umnak mun ah sun le zan a cat ngawl bawl siatnak thuak haw tuk hi.
\s A dawl bel thukhen nak
\p
\v 11 Mah cengten tohkham ngo pi le tohkham hum ah a khung tupa cu kei man mu ing. Vanhum le leihum cu a mai pen tham in, a muhtei umnak tuk mun um ma zo hi.
\v 12 A thisa mi Upa naupang te tohkham mai ah a din haw mi cu kei man mu ing. Laibu te cu phalh hi. Nunnak laibu tih mi a dang laibu vang phalh hi. A thisa mite cu a nuncan ngamtat bang in laibu sungah a khum sa bang thukhen nak thuak haw tuk hi.
\v 13 Tuipi in a ma sungah a thi mite cu ap tuk hi. Thih nak le hell ngam te hei in a ma sungah a um mi thi te cu ap haw tuk hi. Mah cengten mihing hempoh a muh tei nuncan ngamtat bang thukhen nak thuak haw tuk hi.
\v 14 Mah cengten thihnak le hell ngam cu mei nimpi sungah vawk co haw tuk hi. Hi mei nimpi cu veinih thihnak hi.
\v 15 Nunnak laibu sungah min a tel ngawl tu hempoh mei nimpi sungah vawk co haw tuk hi.
\s Van thak le lei thak
\c 21
\p
\v 1 Mah cengten van thak le lei thak cu kei man mu ing. Itahum titale a masa vanhum le leipi cu tham in, tuipi te vang um ma zo hi.
\v 2 A thiangtho khuapi tih mi Jerusalem khuapi thak cu mo pai ca bawl mi mo nu bang bawl in, Pathian nel vanhum pen a tolhsuk mi cu kei man mu ing.
\v 3 Mah cengten vanhum pen aw nging zet cu, “Zo in. Pathian umnak deubuk cu mihing tei lakah a um hang, Topa cu a muhte tuah um tuk hi. A muhte vang Topai miphun a hih haw hang, Pathian a mah loli a muhte tuah um in, a muhtei Pathian hi tuk hi.
\v 4 Topan a muhtei mit hitui hempoh huk sak tuk hi. Thihnak um tuk ma toh hi. Thasiat nak, kahnak le natnak um leh tuk ma toh hi. Itahum titale a bosa hun laih in a cang mi hempoh tham khawng zo hi” tin, a tih mi cu kei man za ing.
\v 5 Tohkham hum ah a khung tupan, “Zo in. Kei man na hempoh a thak in cang tik zo ing hi” tin a tih cengten, “ngan ing. Hi thu te cu muantaak mi awnkam a man mi hi” tin, thupia hi.
\v 6 “Na deh ceng zo ing. Kei cu Alpha le Omega ing. A pat nak le a tawp nak ing. Dang a dum mi in nunnak cik tui nung cu a man kul ngawl in kei man pia tung.
\v 7 Nehnak a co tupa’n hi thu hempoh a lo co tuk hi. Kei cu a Pathian hi tung hi. A mah cu ka capa hi tuk hi.
\v 8 Mah naven launak a nei thei tute, um ngawl tute, a dindeih huai mite, mi that thei te, dan tuah a dik ngawl mi nu le pa sualnak a bawl tute, aisan thiamnak a bawl thei mite, zuk milim a bia thei mite le mi zol thei mi hempoh kat le mei nimpi sungah a muhtei ca in thuak haw tuk hi. Hi thu cu veinih thih nak hi” tin, thupia hi.
\s Jerusalem khuapi thak
\p
\v 9 Mah cengten a dawl ta bel haksat cimnak tuah a dim mi, khuathai salih a keng tu vancung mi salih sung pen pakhat hung in kei mah tuah otpih in, “Hung in. Tuu no nupi a himi mo nu cu na nelah kei man lak tung hi” tin, ti hi.
\v 10 Vancung mi in mual mawi ngeng pi hum ah hawvang thiangtho tuah kei mah a pui ten, Pathian nel vanhum pen a tolh suk a thiangtho mi Jerusalem khuapi thak cu kei mah lak hi.
\v 11 Mah khuapi cu Pathian minthan nak tuah a dim, a vak al cu suangval thiang kilkel tuah bang ve in a sunglawi suang manpha tuah bang ve hi.
\v 12 Mah khuapi cu a sangzet mi khantian um in kongka heinih um hi. Kongka pi te cu vancung mi heinih um in mahmi kongka hum ah Isarel miphun nam heinih tei min vang ngan hi.
\v 13 Ni suahnak lam kongka pi pathum, saklam ah kongka pi pathum, hanglam ah kongka pi pathum, ni tum nak lam ah kongka pi pathum um hi.
\v 14 Khuapi khantian nak a tawphah heinih um mahmi hum ah tuu no nungzui tu heinih tei min ngan hi.
\v 15 Kei mah otpih tupan khuapi hei hihen, kongka te hei hihen, khuapi khantian te hei hihen teh tuk in a tehnak tuk sui pumpeng kung cawi hi.
\v 16 Khuapi cu a ning kil li nei in, a zal lam le a vang cu bang ve hi. Vancung mi in sui pumpeng kung tuah khuapi cu teh in peng 1,380 thawngkhat le za thum le sawmliat a um hang khuapi a zal lam, a vang, a sanglam cu bang ten hi.
\v 17 Khuapi khantian pang a sah lam cu a teh ten, vancung mi tehnak bang mi mihing tehnak tuah pi 216 zanih le heiluk um hi.
\v 18 Khuapi khantian nak pang cu jasper suang manpha tuah tiang cih in, khuapi cu a thiang kilkel thalang tuah a bang mi sui a ngek hi.
\v 19 Khuapi khantian nak pang a tawphah suangman pha phun nam kim tuah bawl mi hi. A pakhat nak suangman pha cu jasper suang manpha, panih nak suang manpha cu sapphire, a pathum nak cu khalsidoni, a pali nak cu emerald suang man pha,
\v 20 A pa nga nak sardonyx suang man pha, a pa luk nak cu sardius suang man pha, a salih nak kharaisawlaih suang man pha, a liat nak cu beril suang man pha, a kuah nak cu topaz suang man pha, a sawm nak cu krisoprasa suang man pha, a heikhat nak cu jasin suang man pha, a heinih nak cu amathis suang man pha te hi.
\v 21 Khuapi kongka heinih te cu kep suang man pha heinih a hih hang, kongka pi pakhat ah kep suang pakhat tuah bawl hi. Khuapi sung lamzin pi cu paihlet in muh vawk theih a thiang kikel thalang bang mi sui a ngek hi.
\v 22 Khuapi sung biakinn cu kei man mu mang hi. Itahum titale huham thawmngeng nak tuah a dim mi Pathian le tuu no cu mah khuapi biakinn hi.
\v 23 Pathian minthan nak in mah khuapi vak tik in tuu no cu mah khuapi mei khuat a hih hang mah khuapi cu vak tik tuk in ni le hade te kul leh ma zo hi.
\v 24 Miphun hempoh in mahmi khuapi vak nak cu muang in hung haw tuk hi. Hi leihum kumpi te vang a muhtei minthan nak te mah khuapi ah keng haw tuk hi.
\v 25 Mah lai mun ah zan tih a um ngawl hang, khuapi kongka te cu sun huncan ah hei in khak tuk ma hi.
\v 26 Mi phun hempoh ten minthan nak le Upat nak te mah khuapi ah keng haw tuk hi.
\v 27 A thiang ngawl a nawngkai mi le mi zol ngamta tu cu mah lai khuapi ah pakhat no hei tum tuk ma hi. Tuu no laibu sungah min a khum mite bek tum haw tuk hi.
\s Nun nak tui a luang ngun tuipi
\c 22
\p
\v 1 Mah cengten vancung mi in suangval bang a thiangtho sise mi nunnak tui a luang ngun tuipi cu kei mah lak hi. Ngun tuipi cu Pathian le tuu no tohkham khunnak pen a luang tul mi hi.
\v 2 Khuapi lamzin lai ah hei hihen, ngun tuipi a lang nih ah hei hihen, nunnak thing kung um hi. Nunnak thing kung cu a ngah nam heinih ngah in ha sial ngah a pia thei mi nunnak thing kung um hi. A ceh vang miphun hempoh tei damnak tuk hi.
\v 3 Tam siatnak a co tu pakhat no hei um ma toh hi. Pathian le tuu no tokham cu mah khuapi ah a um hang, Topai nadek tu sila ten Topa cu bia haw hi.
\v 4 A mun Topai mit mai mu haw tuk hi. Topai min cu a muhtei cal hum ah um tuk hi.
\v 5 Mah khuapi ah zan um tuk ma hi. Mei vaknak kul tuk ma hi. Ni vaknak vang kul ma hi. Itahum titale a nung mi Pathian in a muhtei sungah vaknak kuat in a muhte cu a kumkhua in uk tuk hi.
\s Hun can naizet zo hi
\p
\v 6 Mah cengten vancung mi in, “Hi thu te cu muantaak a man mi awnkam hi. Kamsang tei hawvang a nei tu kumkhua a nung mi Pathian cu a ngei ngawl in, a cang tuk mi thu hempoh a na dek tute lak tuk in a vancung mi hah suk tuk hi” tin, ti hi.
\v 7 “Zo in. Kei cu a man lang in hung tung. Hi laibu sung pen kamsang tei hilh mi thu a cingkem tute cu thupha mui cu um hi.
\p
\v 8 Kei mah Johan in hi thu hempoh a mu tu le a za tu ing. Kei man ka muh mi le zaknak ka neih cengten, hi thu te a lak tu vancung mi ke bulah bia tuk in bopkhup ing.
\v 9 A man, “Mah tin bawl pah sin. Kei cu nangmah pen pan na U le nau kamsang te le hi laibu sungah a tel mi awnkam a cingkem tutei na deh pih ing hi. Pathian cu bia in hi” tin, ti hi.
\p
\v 10 Mah cengten a man, “Hi laibu sung pen kamsang tei phuan mi awnkam cu hup pah sin. Itahum titale a huncan nai zo hi.
\v 11 Phat ngawl nak a bawl tupa cu bawl hih ta hen. A dindeih huai a bawl tupa cu bawl hih ta hen. Midik pa’n dikcang nak cu bawl hih ta hen. Mi thiangtho pa’n a thiangtho cu bawl hih ta hen.
\p
\v 12 “Zo in. A man lang in hung tung hi. Ka piak tuk mi sual tha man keng in mi hempoh a muhtei bawl mi sualnak bang pia tung hi.
\v 13 Kei cu Alpha le Omega ing. A pat nak le a tawpnak ing.
\v 14 A muhtei silh mi puan te sawp in, nunnak thing kung tuah a seng mi co in kongka pi pen khuapi sungah tumnak a co tute cu thupha mui cu um haw hi.
\v 15 A pawlam pen uico te, aisan tute, dan tuah a dik ngawl mi nu le pa sual nak a bawl tute, mi that tute, zuk milim a bia tute le zol thu deih in a nung ca khua sa mite haw hi.
\p
\v 16 Keimah Zisuh in kohhran ca hi thu te cu nang muhtei lakah theihpih nak nei tuk in ka vancung mi hah ing. Kei cu David ci le ham ing. Ni konghong aksi vak nak hei hi ing.
\p
\v 17 Hawvang le mo nu in, “Hung in hi” tin ti hi. A za tupa’n, “hung in hi” tin, ti ta hen. Dang a dum mipa cu hung hen. Deihnak a nei tu mi hempoh in nunnak tui cu a man pia ngawl in la hen.
\p
\v 18 Hi laibu sungah a tel kamsang tei phuan mi a za tu hempoh tei lakah ka theihpih nak cu a kua hempoh in, hi thu sungah a thak a bet tale Pathian in hi laibu sungah a ngat sa mi haksat nak te a ma hum ah heng tik tuk hi.
\v 19 Mi pakhat in kamsang phuan mi laibu sung pen awnkam hek khat te a vawk tale laibu sungah ngat mi nunnak thingkung pen hei hihen, a thiangtho mi khuapi hei hihen, a mah tuah a seng mi thu cu Pathian in vawk sak tuk hi.
\p
\v 20 Hi thu te theihpih nak nei tupan, “A man mi hi. Kei cu a man lang in hung tung hi” tin, thupia hi. Amen. Topa Zisuh aw tolhsuk toh in.
\p
\v 21 Topa Zisuh hehpih nak cu mi thiangtho tei lakah um ta hen. Amen