cnw_reg/60-JAS.usfm

\id JAS
\ide UTF-8
\rem The text in this file was extracted from C:/DCS/Chin, Ngawn/WORD/59. JAMES. docx.
\mt Jeim
\h Jeim
\mt Jeim
\toc1 Jeim
\toc2 Jeim
\toc3 jas
\s Awnkam tuah otpih nak
\c 1
\p
\v 1 Pathian le Topa Zisuh Khrih sila kei mah Jeim cu mun hempoh ah theh keh in a um miphun heinih tei lakah otpih ing.
\s Nok sak culnak le ngilcang nak
\v 2 Ka U le nau te aw, nohten nok sak culnak phunkim na tawh uh ten lungdam nak tataak hi tin, ngai sung ta un.
\v 3 Itahum titale, nohtei upnak a cul ten thinsau nak khang tik hi tih cu nohten thei ta un.
\v 4 Nohten imah sapnak um ngawl a cangkim ngilcang in na um theihnak tuk, thinsau nak a cangkim tian bawl un.
\v 5 Nohtei sung pen cih thiamnak a deih tu a um tale mawhsiat nak bawl ngawl in, ihempoh a muhtei lakah phal zet a pia tu Pathian nelah ngen hen.
\v 6 Mah naven, thin ceh mawhnak um ngawl upnak thinlung tuah ngen in. Itahum titale, thin ceh mawh nak a nei tupa cu huih theu ten tuipi lumlet bang in phia thei hi.
\v 7 A man Pathian nel pen pakhat ngah tung hitin, ngaisung ma hen.
\v 8 Mah tihbang mite cu thinlung panih nei in a bawl mi hempoh ah thinlung a thiang ngawl mipa hi.
\v 9 Niamta cuh mi U le nau ten a mah khaisan nak a co ten lungdam hen.
\v 10 Sum ngah thei tupan a haksat cimnak sungah lungdam hen. Itahum titale, a mah cu hampa kung pak bang in tham tuk hi.
\v 11 Ni cu a satnak tuah a suah tul ten hampa kung vuai in ko hi. Mah ten a pak cu zulh in a mawi nak hempoh sia hi. Mah bang bok sum ngah thei mipa vang a na dehnak sungah vuai in tham thei hi.
\v 12 Noksak culnak a thuak tupa cu thupha mui cu um hi. Itahum titale, culnak neh in Topa a it thei tute cu thukam a piak mi nunnak lukhu ngah tuk hi.
\v 13 Sualsoh nak a thuak tupa cu, “Pathian in keimah sualsoh hi” tin ti ma hen. Itahum titale, phat ngawl nak cu Pathian sualsoh nak ah heng thei ma hi. Topan a kuamah sualsoh awng ma hi.
\v 14 Mihing deihnak ah a zui tu cu sualsoh nak sungah heng thei hi.
\v 15 Duhhap nak thinlung ci pai in sualnak hing thei hi. Sualnak vang nase dedeuh a ngeng ten thihnak cang tik thei hi.
\v 16 Ka ihmi U le nau te aw, sual bawl pah sun.
\v 17 A cangkim a sunglawi mi laksawng hempoh hum lampen a heng mi a hih hang, vaknak tei pai lakpen heng hi. A pa cu a thek thei ngawl mi le a thawn thei mi lim um ma hi.
\v 18 Topa’n a semsuah mi hempoh sung pen ohte cu ngah a ngah masa bel cang tuk in, a deihnak bang thudik awnkam tuah ohte cang tik hi.
\s A thu zaknak tuah zui in a mannak
\v 19 Ka ihmi U le nau te aw, hi thu te thei ta un. Mi hempoh in zaknak thu sungah a man lang awnkam otnak ah hei hihen, thinuuk nak ah manlang pah sun.
\v 20 Itahum titale mihing thinuuk nak cu Pathian dikcang nak thu heng tik thei ma hi.
\v 21 Mah hang a bal mi hempoh le sualnak a dim let mi hempoh vawk in, nohtei sungah a koih tum mi thu cu thinnem nak tuah co un. A thu cu nohtei thinlung hawvang nunpan thei hi.
\v 22 A thu cu zui le man nak a nei tu in cang ta un. Nangmah le nangmah zol in a za thong men tupa in um pah sun.
\v 23 A kua a bangin a thu za in zuinak le mannak a nei ma ta le thalang mai ah a mah le mah zo cop tuah bang ve hi.
\v 24 Itahum titale a mah le mah a zoh cengten, mundang ah hawh in a mel cu hai cop paih thei hi.
\v 25 Mah naven, luatnak tuah a peh pai mi thu cu pha zet zo in a cingkem tupa cu a zaak mi thu phawk ngil ngawl in, nunpih nak a nei tupa hi. A man a bawl mi cu a nunnak sungah thupha co tuk hi.
\v 26 Mihing pakhat in biaknak lam sunsak tupa ing hi tin a ngaisung ta le a lei cu sup ngawlin a thinlung deihnak a zol tale a ma biaknak lam a sunsak in a nun cu a thupi nak um ma hi.
\v 27 Pa Pathian mai ah thiangtho in a bal a um ngawl mi nuncan ziaza cu nu le pa nei ngawl naupang te le meivong te haksat nak a thuak haw ten, zohnak, a mah le mah vang hi leihum a bal mi pen luat tuk in a cingkep tuk mi hi.
\s Mi deidan pah sun
\c 2
\p
\v 1 U le nau te aw, minthan nak tuah a dim mi ohtei Topa Zisuh Khrih cu upnak thu sungah deidat nak nei pah sun.
\v 2 Sui khut zungbut tuah a mawi mi van a silh tu, a bal van silh in mi zawng panih cu nohtei pumkhawm nak biakinn sungah na tum uh ten,
\v 3 A mawi mi vansilh tute zo in a pha mi umnak mun ah khung in tih hei in hihen, mizawng te cu lai ah khin um ten, mah ahima tale hi lai mun ka ke ngak nak nuai ah khung in hi tih hei in hihen, nohten na ti uh ta le,
\v 4 Nohten pakhat le pakhat lak lawh ah mihing te deidan in phat ngawl nak na ngaihsut uh hang, thukhen tu hima uh cim maw.
\v 5 Ka ihmi U le nau te aw, ngai un. Pathian in hi leihum ah mizawng te upnak sungah hauhsa mi hihnak ah hihen, Topa a it tute cu thukam mi uknak ngam lo luah tu hihnak ah hei hihen, a ten mi hima maw.
\v 6 Nohten mizawng te imah sumsial ngawlin um zo uh ci. Sum ngah thei mite cu nohten bawlsiat thei hima maw. A muhte cu thukhen nak zung ah sam zo haw ma maw.
\v 7 Nohtei sam mi min sunglawi cu a mun mawhsiat nak awnkam nei haw ma maw.
\v 8 Nohten Laithiangtho bangin nohtei elkim ah a um mipa cu nangmah na ih bangin na it in tih mi a sunglawi thukham cu thungai in cingkem tale a pha mi na bawl zo uh ci.
\v 9 Mah naven deidat nak a nei tale nohten sualnak bawl na hih uh hang, sual palcat tupa hitin dan thukham hang a sualnak lang tuk hi.
\v 10 Itahum titale dan thukham hempoh a cingkem thei ta vang pakhat a sual tale dan thukham hempoh palcat hi.
\v 11 Itahum titale, “Nu le pa sualnak bawl pah sin” hi tih mi thukham pia tupa in, “Mi that pah sin” tih hei in hihen thukham pia hi. Mah hang nang cu nu le pa sualnak na bawl ngawl ta vang mi that tale dan thukham palcat tupa hi ci.
\v 12 Mah hang luatnak thu tuah a peh pai mi thu hang, thukhen nak a co tutei awnkam bang nung un.
\v 13 Itahum titale lainat nak a nei ngawl mipa cu lainat nak um ngawl mi thukhen nak cu thuak tuk hi. Lainat nak in thukhen nak cu neh thei hi.
\s Upnak tuah nunpih in dehnak
\p
\v 14 Ka U le nau te aw, mi pakhat in kei man upnak nei ing hitin a tih ta vang, dehnak a um ma tale imah nemcuam nak um ma hi. Mahmi upnak in a mah cu pan thei ni maw.
\v 15 U le nau numei le pano te van silh tuk nei ngawl thacang um in, ni sial a kul an vang a neih ngawl ten,
\v 16 Nohtei sung pen mihing pakhat in, “Dai den no tul in ngamlum zet no uum in khampek ei un hi” tin, a muhte tiin a muhtei pumpi taksa ca kul mi hempoh pia ngawl in a um tale nemcuam nak i um hum?
\v 17 Mah bang bok upnak vang dehnak a um ma tale a mah bek a um hang a thi hi.
\v 18 Mah naven, “Nangman upnak nei in keiman dehnak nei ing hi” tin, mi hekkhat in tih tuk hi. Mah a hih hang dehnak tel ngawl mi upnak cu kei mah lak in hi. Kei man ka dehnak tuah ka upnak cu nangmah lak tung hitin, son tuk um hi.
\v 19 Pathian pakhat bek um hi tih cu nangman um ci. Pha hi. Khuasia te hei in um in a lau can tawtok haw hi.
\v 20 Misil pa aw, dehnak um ngawl mi upnak, nemcuam nak a um ngawl mi cu nang thei nuam a cim?
\v 21 Ohtei pa Abraham in a capa Isak cu biakpiak nak taitan hum ah biakpiak nak a bawl ten, dehnak hang midik hihnak ah heng hima maw?
\v 22 Upnak cu a dehnak tuah bawl mi a hih hang, a dehnak hang upnak cangkim nak ah heng hi tih cu nang man thei ci.
\v 23 “Abraham in Pathian a up hang a upnak cu a dikcang nak hitin ngaisung hi” tih mi Laithiangtho cu cangkim nak ah heng hi. Abraham cu Pathian ngualcam hi” tin, sam co hi.
\v 24 Mihing cu upnak bek hang dikcang nak ah heng hitin ngaihsut nak thu cu nohten thei zo uh ci.
\v 25 Mah bang bok suzuak nu Rahab in nungzui tute a co cengten, lamzin dang pen hah in a bawl phat nak hang dikcang nak heng hima maw.
\v 26 Itahum titale hawvang a um ngawl mi luang pumpi cu a thi a hih bang in, dehnak um ngawl mi upnak cu a thi hi.
\s Kam le lei kepnak
\c 3
\p
\v 1 Ka U le nau te aw, hilh tu saza ohten a nase saw in thukhen tuk hi tih cu thei in, hilh tu saza hihnak tam tik pah sun.
\v 2 Itahum titale ohtei venghawng in sualnak tampi bawl thei hung hi. Awnkam tuah a sual ngawl tupa cu cangkim mipa hi. A mah le mah a pumpi a kemcop thei tupa hi.
\v 3 Cipuh neh thei tukin a kam kaih bawl ten a pumpi venghawng hek tik thei hi.
\v 4 Lawng cu zo in. Lawng ngengpi cu huihtheu nasazet in a mut vawk ta vang, lawng hotnak a neu no tuah a deihnak ah hek tik thei hi.
\v 5 Mah bang bok lei cu neu no naven nasezet in ngal thei hi. Izah tak in a tam mi thing cu son tham ngawl a neu no mi mei in kang tik thei hi tih cu zo in.
\v 6 Lei cu mei hi. Phat ngawlnak hi leihum vang hi bok hi. Mah bang bok lei cu ohtei taksa peng sungah um in pumpi hempoh bal tik hi. A mah vang hell meikang nak cu thuak hi.
\v 7 Mihing hempoh cu sahang ngamsa le vano phunkim pen pan a bok in a vak mi le tui sungah a um mi ngamsa phunkim a beem tik theih bang in beem tik thei zo hi.
\v 8 Mah naven lei cu a beem tik thei tu pakhat no hei um ma hi. Lei cu kep theih ngawl a sia suak bel mi a hih hang, thi tik thei mi ngu a dim tuah um hi.
\v 9 Ohten lei tuah Pa Pathian hehpih nak thangphat, Pathian a ma mel bang bawl mi mihing cu lei tuah mitam thei hung hi.
\v 10 Kam pakhat bek sung pen thangphat nak le mitam nak suak tul hi. U le nau te aw mah tihbang cu a pha ngawl mi hi.
\v 11 Ciktui nak pakhat sung pen tui hum le tui kha suak tul thei maw.
\v 12 U le nau te aw, thei kung in Olive ngah te ngah thei maw. Cabit kung in thei ngah te ngah thei maw. Mah bang bok a al mi tui cu a hum mi tui in cang thei ma hi.
\s Hum lam pen a heng mi cih thiamnak
\p
\v 13 Nohtei sungah a kon cih thiamnak a nei tu um hum? A mah cu cihnak hi nun nemnak tuah a pha mi nuncan ziaza a bawl nak hang, a bawl mite lak hen.
\v 14 Mah naven nohtei thinlung sungah a khazet mi iiksik nak le hauhdun nak a um tale thudik cu do in ngalnak, mizol nak bawl pah sun.
\v 15 Mah tihbang mi cihnak cu humlam pen a heng mi cih thiamnak hi ngawlin, lei thi sa a hihnak tuah in hihen, khuasia cih thiamnak tuah a peh pai mi hi.
\v 16 Itahum titale, iksik nak le hauhdun a umnak ah buai nak le a sia suak mi sualnak phunkim um thei hi.
\v 17 Mah naven, humlam pen a heng mi cih thiamnak cu a masa bel thiangtho hi. Mah cengten daihnak thinlung, lungnem nak thinlung le lungduai nak thinlung nei in, lainat nak le ngah pha a dim in deidat nak, tiamhem nak te um ma hi.
\v 18 Daihnak a cang tik tutei sungah dikcang nak cicang a ngah cu vawh thei haw hi.
\s Pualthau nak le niamkhiat nak
\c 4
\p
\v 1 Nohtei sungah a um mi ngaldo nak le hauhdun nak cu a lai pen heng hum? Nohtei pumpi sung pen do dunnak neih mi nohtei thi le sa deihnak thinlung pen a heng mi hima maw?
\v 2 Nohtei duhhap nak hang ngah ma uh ci. Tual thah nak hei hihen, nasezet deihnak thinlung na neih uh hang in hihen, deihnak cangkim thei ma uh ci. Ngaldo nak le hauhdun nak bawl hang ngah ma uh ci. Itahum titale thu na nget uh ngawl hang hi.
\v 3 Thungen ta vang a ngah ngawl nak cu nohtei thi le sa deihnak ah mang tuk in a sual in thunget nak hang ngah ma uh ci.
\v 4 Dan tuah a dik ngawl mi nu le pa sualnak, leihum pawlkom nak te cu Pathian tuah do dunnak hi tih cu nohten thei ma uh cim maw. Hi leihum tuah pawlkom nak a nei nuam tute cu Pathian ngal hi.
\v 5 Laithiangtho in, “Topa cu ohtei sungah a um mi hawvang cu micing thei thinlung nei hi” tin a thupi ngawl in sonnnak hitin nohten ngaisung uh cim maw.
\v 6 Mah naven, Topan a sunglawi saw mi a hehpih nak pia hi. Mah a hih hang, “Pathian in paulthau mi ngal te do in niamkhiat nak a nei tuten a hehpih nak co tik hi” tin, Laithiangtho in ti hi.
\p
\v 7 Mah hang Pathian deihnak ah zui un. Dawihmang pa cu kham un. Nohtei lakpen tai tuk hi.
\v 8 Pathian nelah zuan un. Topa cu nohtei lakah nek tuk hi. Sualnak a nei mite aw, nohtei khut thiangtho tik un. Thinlung panih a nei mite aw, nohtei thinlung thiangtho tik un.
\v 9 Thin nau nak, thinkham nak tuah kap un. Nohtei nuihnak cu thasiat nak cang tik in nohtei lungdam nak cu thasiat nak in cang tik un.
\v 10 Pathian mai ah nangmah le nangmah niamkhiat in um un na, nang muhte khaisang tuk hi.
\p
\v 11 U le nau te aw, pakhat le pakhat mawhsiat nak bawl pah sun. U le nau pakhat le pakhat mawhsiat nak hang, dan thukham thukhen tupa hi. Nang cu mah tihbang in dan thukham thukhen tale dan thukham zui in a mang tupa hi ngawl in, thukhen tupa hi ci.
\v 12 Dan thukham a pia tupa, thukhen tupa cu pakhat bek um hi. A mah cu nunpat theih nak le siatsuah theih nak hei nei hi. Midang te thukhen thei tu nang cu a kua nge cim?
\s Ohtei deihnak le Pathian deihnak
\p
\v 13 “Tuni ahima tale zingten hi khuapi a hima tale mah khuapi ah hawh in kumkhat sung um, sum bawl in nemcuam nak co tuk hung hi” tin a ti thei mite aw, a tuin ngai un.
\v 14 Nohten zing huncan itin cang tuk tih thei ma uh ci. Nohtei nunnak cu itihbang in cang tuk hum? Nohten dawm laih sung no lang in mah cengten a pai thei mi meikhu bang hi.
\v 15 Mah hang, “Pathian deihnak a um tale ohten a nung in hi na bawl tuk hung, mah a hima tale mahmi na bawl tuk hung hi” tin, nohten son thei uh ci.
\v 16 Mah naven a tuin nohten pualthau ngalnak nei uh ci. Mah tihbang mi ngalnak hempoh a pha ngawl mite hi.
\v 17 Mah a hih hang, a kua a bang a pha mi na bawl tuk thei leng napi in a bawl ma tale a ma ca in sual hi.
\s Hau sa milian mitei ca ngallin piak nak
\c 5
\p
\v 1 Hau sa milian mite aw, a tuin ngai un. Nohtei hum ah a heng tuk mi haksat cimnak hang kap un.
\v 2 Nohtei hauhsak nak cu muat in nohtei van te vang lung no ten ei zo.
\v 3 Nohtei sui le ngun te sal kai zo. Sal a kai mite hei cu nohtei lamah theihpih tu tetti a hih hang, nohtei taksa cu mei bang ei tuk hi. Ni dawl ta bel huncan sungah nohtei neihnak te khawl zo uh ci.
\v 4 Zo un. Nohtei lo sungah ancang at tute a piak mi na dek tute cu nohten zol in, na deh thaman pia ngawl in au li haw hi. An cang at tutei au nak aw vang, vanhum Pathian beng sungah heng zo.
\v 5 Nohten hi leihum nopnak zui in um zo uh ci. Thah tuk in koih mi ni ten, nang muhtei thinlung cu thau zet tuk in cawm zo uh ci.
\v 6 Nohten midik pa cu sual nak um hitin ngaisung in that zo uh ci. A man nohte cu do ma hi.
\s Pathian ngahnak
\p
\v 7 Mah hang U le nau te aw, Topa Pathian a hen suk leh tian thinsau nak tuah ngak un. Lo bawl tupan lei pen man a nei mi an kung a ngui a ngah cu nguah masa le cuk nguah a zuk tian thinsau zet in ngak thei hi.
\v 8 Nohten thinsau un. Nohtei thinlung cu kho tik un. Itahum titale Topa a hensuk tuk hun heng awn zo hi.
\v 9 U le nau te aw, thukhen nak pen luat tuk in pakhat le pakhat el dunnak bawl pah sun. Thukhen nak a nei tupa cu kongka bul ah ding zo hi.
\v 10 U le nau te aw, haksat cimnak le thinsau nak tuah peh pai in Topa Pathian min tuah thuthangpha phuang tu kamsang ten cun tuk mi thu cu lak haw zo hitin, ngaisung ta un.
\v 11 Thuakzawh nak a nei mite cu thupha mui cu um hitin ohte sam haw hi. Job thinsau nak cu nohten thei zo uh ci. A dawl bel ten Pathian bawl mi thu hang, Topa cu lainat nak nei in ningnat nak tuah a dim mipa a hihnak thu cu nohten mu zo uh ci.
\s Thudik tuah a bang ve mi awnkam
\p
\v 12 U le nau te aw, na hempoh sungah mi tamnak cu a cuang in pial un. Vahum hihen, leipi hihen, a dang thukam pakhat bawl tuk in hihen, sal in bawl pah sun. Nohten a himi cu, “Hi zuh hi” tin a hi ngawl mi cu, “Hima hi” tin tih bek in ti un. Mah a hima tale thukhen nak thuak tuk ci.
\s Cangkheng in thunget nak
\p
\v 13 Nohtei sungah haksat cimnak a thuak tu a um tale thungen hen. Lungdam nak a um tale Saam la cu sa hen.
\v 14 Nohtei sungah tidam ngawl um tale a man kohhran sung Pasta cu sam in, a mun Topa Pathian min suang mi na cu sathau noih in a ma hum ah thungen haw hen.
\v 15 Upnak tuah thungen mi na dam tik tuk in, Topa Pathian in a mah tho tik tuk hi. A man sualnak a bawl pang tale a sualnak ngaidam tuk hi.
\v 16 Mah a hih hang, nohten tidam nak co tukin pakhat le pakhat a sualnak te phuang in pakhat le pakhat ca thungen un. Midik pai thinlung tak in thunget nak cu huham tampi um hi.
\v 17 Elijah cu eimuhte bang hi leihum ah a nung mipa naven, nguah zu tuk ngawl in nasezet thunget ten kumthum le ha luk leihum ah nguah zu ngawl in um hi.
\v 18 Mah cengten a man veikhat thungen leh in, vanhum pen nguah zu tik hi. Leipi in an ngui a ngah te cang tik hi.
\p
\v 19 U le nau te aw, nohtei sung pen mi pakhat in thudik lamzin pen pial in mihing pakhat in a mah cu a sam leh thei tale,
\v 20 Mi sual pa cu sualnak lamzin pen a sam leh thei tupa cu hawvang thihnak pen nunpan in a sualnak tampi te sel thei tuk hi tih cu ngaisung un.