cnw_reg/55-1TI.usfm

\id 1TI
\ide UTF-8
\rem The text in this file was extracted from C:/DCS/Chin, Ngawn/WORD/54. 1 TIMOTHY. docx.
\mt 1 Timote
\h 1 Timote
\mt 1 Timote
\toc1 1 Timote
\toc2 1 Timote
\toc3 1ti
\s Awnkam tuah otpih nak
\c 1
\p
\v 1 Ohtei nunpan tu Pathian le Ohtei muansan mi Khrih Zisuh thupiak nak bang, Khrih Zisuh nungzui tu kei mah Paul cu,
\v 2 Upnak hang ka capa ngangai a himi Timote nelah lai ngan ing. Pa Pathian le ohtei Topa Zisuh nelpen a hehpih nak, lainat nak le daihnak cu na nelah um ta hen.
\s A sual mi hilhnak le dan thukham man sualnak
\p
\v 3 Mecidonia ngam ah a hawh laih tak nangmah thu ka sosuah nak bang, nang cu Efisa khua ah um hih in mi hing hekkhat tei a dang thu hilhnak um tuk ngawl in hihen,
\v 4 Tangthu le a bo thei ngawl miphun nam cazin a thupi bawlnak um tuk ngawl in hihen thupia in. Mah mi thu cu upnak sungah a um mi Pathian na dehnak sang el dunnak bek cang tik hi.
\v 5 Hi thupiak nak a bulpi cu a thiangtho mi thinlung, a thiangtho mi theihnak thinlung le a man mi upnak pen a heng mi itnak hi.
\v 6 Mi hekkhat in mahmi thu pial in a thupi ngawl awnkam sonnak ah hek haw zo.
\v 7 A mun a muhtei awnkam thu cu a kho zet mi thu te hei thei ngawl dan thu hilh tu saza hihnak nuam haw hi.
\v 8 Mah naven ohten dan thukham bang a mang uh tale a pha a hihnak cu ohten thei hung hi.
\v 9 Mahmi dan thukham cu midik ca hi ngawl in dan nei ngawl mite le thu ngai ngawl mite, Pathian thei ngawl mite le mi sual te, mi thiangtho ngawl mite le Pathian sumsial ngawl mite, nu le pa a that thei mite, mithat thei mite,
\v 10 Dan thu tuah a dik ngawl mi nu le pa sualnak, pano le pano, numei le numei sualnak te, mihing zuak te, thuman ngawl a son thei mite le a cangkim a man thu do thei mi a dang thu hempoh ca a um mi thu cu kohten thei ung.
\v 11 Hi thu cu mui cu thupha a nei tu Pathian minthan nak tuah a dim mi thuthangpha tuah bang ve hi. Mahmi thuthangpha cu kei mah upnak ap zo hi.
\s Paul thuphuan nak
\p
\v 12 Kei mah thazang tuah a dim tik tu ohtei Topa Zisuh Khrih hehpih nak thangphat ing. Itahum titale Topa’n kei mah cu a na dek tuk a piak hang, muantaak a co tupa tin a ngaihsut nak hang hi.
\v 13 Kei cu tu ma suan in sonsiat mipa, mi bawl siat thei pa, mi sual pa hi awng naven upnak um laih ngawl cun theihnak nei ngawl in, mah tin bawl nak hang a hehpih nak cu kei man co ing.
\v 14 Ohtei Topa Pathian hehpih nak cu Zisuh Khrih hum ah a um mi upnak le itnak cu tampi nei ing.
\v 15 Khrih Zisuh in mi sual te nunpan tuk in hi leihum ah heng hi tihmi awnkam cu a dik mi awnkam a hih hang, a venghawng co taak mi awnkam thu hi. Sual nak a nei mi hempoh sung pen kei cu a ngeng bel ing.
\v 16 Mah naven a hehpih nak ka co mi cu Khrih Zisuh in a sia bel mi ka sungah ihempoh thinsau nak a laknak thu hang, Topa cu upnak tuah kumkhua nunnak co tuk mitei ca kei mah cu tepteh tuk in hi.
\v 17 Kumkhua kumpi, a sia thei ngawl mit in muh laih ngawl mi Pathian pakhat bek sungah a tu le a kum khua a minthan nak um ta hen. Amen.
\p
\v 18 Ka capa Timote, nangmah camcawh in hilh mi kamsang awnkam cu na nelah pia ing hi. Hi thu cu na upnak le theihnak thinlung thiangtho len in, kamsang tei hilh mi bang a pha mi ngal do theihnak tuk mi thu hi.
\v 19 Mi hekkhat in mahmi theihnak a vawk haw hang, upnak thu sungah tembaw sia haw zo.
\v 20 A muhtei sung pen Hy-me-nae’us le Alexanderte tel haw. A mun Pathian mawhsiat nak bawl tuk ngawl, thu hilhnak thuak tuk in a muhte cu Satan khut sungah ap zo ing.
\s Thunget nak tuah a seng mi thu cahnak
\c 2
\p
\v 1 Mah a hih hang mi hempoh ca in hihen, kumpi te le hum lam uktu hempoh ca in hihen, a hehpih nak, thunget nak, a ngetsak nak le lungdam thangphat nak nei tuk in a masa in kei man sosuah ing.
\v 2 Hi thu cu ohten Pathian sungah lungdam nak le thinlung thiangtho a dim nei in daihnak tuah nung thei tuk in hi.
\v 3 Mah tihbang in bawl cu a pha mi hi. Ohtei nunpan tu Pathian mai ah deih awh huai co taak mi hi.
\v 4 Mi hempoh nunpat nak co in thudik thu thei tukin Pathian deihnak um hi.
\v 5 Pathian pakhat bek um hi. Pathian le mihing tei lak lawh ah lemnak a bawl tu pakhat um hi. Mahmi mihing cu Zisuh Khrih hi.
\v 6 A mah cu mi hempoh tan tukin a nunnak pia hi. Hi thu cu huncan a kim ten theihpih sonnak tetti hi.
\v 7 Kei cu mah theihpih sonnak tetti ca thuthangpha phuang tu tuk in hihen, nungzui tu hihnak in hihen, upnak le thudik thu cu miphun dang tei lakah hilh tu saza hihnak in hihen, apnak a piak mi cu co ing. Kei cu zol thu um ngawl in a man mi thu hilh ing.
\s Numei le pano tei ca thu cahnak
\p
\v 8 Mah a hih hang pano ten thinuuk nak, el dunnak um ngawl a thiangtho mi khut dang thungen tuk in deih ing.
\v 9 Mah bang bok numei ten zohmawi mi van silh in, Upat nak le nunnem nak tuah nangmuh le nangmuh van silh in, samphek le sui, suangval, a man nei mi van te silh ngawl in,
\v 10 Pathian U pat maizah tuk in thukam nak bawl mi numei tuah a lemcang a pha mi na tuah nangmuh le nangmuh silh tuk in deih ing.
\v 11 Numei in na hempoh ah thungaih nak tuah dai den no um tuk in cung hen.
\v 12 Numei in thu hilhnak, pano humah thu neihnak pia mang hi. Numei cu dai den no um tuk mi hi.
\v 13 Itahum titale Adam cu a masa bawl in mah cengten Evua bawl hi.
\v 14 Mah bek sial ngawl Adam cu zol co ma hi. Numei nu cu zol co in sualnak ah heng hi.
\v 15 Mah naven numei ten a thiangtho mi upnak, itnak, a thiangtho mi sungah um tale nau a hinnak hang nunpat co tuk hi.
\s Kohhran huai tutei sungah a neih kul mi a hihnak
\c 3
\p
\v 1 “Mi pakhat in Pasta cang tukin deihnak a nei tale a mah cu na pha dek nuam hi” tin, tih mi awnkam cu a man mi awnkam hi.
\v 2 Mah hang, Pasta cu mawhsiat nak pen a luat tu, zi pakhat bek a nei tu, thu dik a man nei tu, mah le mah ukcop thei tu, nuncan a mawi nei tu, mikhual vak thiam, thu hilh a thiam tu hi tuk hi.
\v 3 A mah cu cabit tui a in thei ngawl, pualthau ngawl in nun nem mi, a thiangtho ngawl in sum a zei ngawl tu, hauhphuan a bawl thei ngawl tu, sum deihnak a nei ngawl tu,
\v 4 A innsung sang pha zet no cingkem thei in a canu le capa te a thiangtho mi nunnak tuah thungaih nak a nei tik tu hi tuk hi.
\v 5 A innsung sang itihbang in uk tuk hum tih a thei ngawl tu cu Pathian kohhran itihbang cingkem thei tuk hum?
\v 6 A mah cu umtu thak mihing hi ngawl in, ngalnak hang Dawihmang pa tuah a bang ve mi sual thukhen nak sungah a caak tuk lau nak um hi.
\v 7 Mah bek sial ngawl mawhsiat nak thuak in Dawihmang pai thang sungah caak tuk ngawl in, kohhran a pawlam ah U pat maizah nak co tupa hi tuk hi.
\v 8 Mah bang bok kohhran Deacon te vang a thiangtho mi nun nei haw hi. Lei panih a nei ngawl mi, cabit a kham thei ngawl tu, a thiangtho ngawl mi khan tohnak a nei tu hi ngawl in,
\v 9 Upnak thu thup te a thiangtho mi theihnak tuah a len khim mite hi tuk.
\v 10 A mun a masa cek nak a thuak nung ten mawhsiat nak a um ma tale kohhran Deacon na dek haw hen.
\v 11 Mah bang bok zite vang a thiangtho mite hi tuk hi. Mi son sia thei mite hi ngawl in, thudik thuman a nei tu, na hempoh ah muantaak mi hi tuk hi.
\v 12 Kawhhran Deacon ten zi pakhat bek a nei tu, a innsung sang a canu le capa te pha zet no uk thei tu hi tuk.
\v 13 Itahum titale Deacon cu na pha zet no a dek tute a muhtei ca a pha mi hei hihen, Zisuh Khrih a upnak sungah ngal hannak hei hihen nemcuam nak co haw hi.
\s Pathian sungah lungdam nak a sel mi thu thup
\p
\v 14 Hi thu te na nelah ka ngat nak thu cu na nelah a manlang heng thei tuk in muansan ta vang,
\v 15 Ka vaidawl hei in thudik a bulpi a himi, a nung mi Pathian kohhran cu Pathian innsung ah itihbang nung thei tuk mi cu na theihnak tuk in hi.
\v 16 Pathian thu sungah lungdam nak a sel mi thu thup cu a thu ngai in a sunglawi hi. Topa cu thi le sa tuah lang in hawvang thiangtho hang midik hitin sialsiah nak co in, vancung mitei muhnak, thuthangpha cu miphun dang tei lakah phuang in hi leihum miten um haw zo hi. A minthan nak tuah hum lam ah pui zo hi.
\s Sualnak tuah hetcip
\c 4
\p
\v 1 Hawvang thiangtho in ciang zet a phuan mi thu cu tu nung huncan ten thinlung sung thiksa nawt nak a thuak cengten, zol thu son thei mitei thu ipnak hang, mi hek khat ten upnak vawk in,
\v 2 Mizol thiam mi thinlung theihnak sungah hihen, khuasia pathian tuah a seng mi thu hilhnak sungah hei hihen, mipha a tiam hem hang hi.
\v 3 A mun nupi neihnak cu kham in um tu le thudik a thei tute cu a hehpih nak theih mi thinlung tuah mang tuk in, Pathian semsuah mi an te cang tik haw tuk hi.
\v 4 Pathian semsuah mi hempoh cu pha hi tin lungdam nak thinlung nei tale vawk tuk pakhat no hei um ma hi.
\v 5 Itahum titale, Pathian thu hang in hihen, thunget nak hang in hihen, na hempoh thiangtho hi.
\s Zisuh Khrih i na dek tu sila pha
\p
\v 6 Hi thu te cu U le nau tei lakah na hilh tale nang cu na up mi upnak thu hilhnak hang in hihen, Zisuh Khrih thu hilh tu saza pha hi tuk ci.
\v 7 Pi tek in a son theih a thupi ngawl tangthu te vawk in, Pathian thu sungah lungdam nak tuah nangmah le nangmah hilh in hi.
\v 8 Taksa pumpi thu hilhnak cu a thupi nemcuam nak dawm no hei pia ma hi. Pathian thu sungah lungdam nak cu a tu le a kumkhua in thukam a hih hang, na hempoh ah nemcuam nak um hi.
\v 9 Na hempoh sungah nemcuam nak um thei hi tih mi thu cu muantaak mi awnkam a hih hang, a venghawng in co taak mi thu hi.
\v 10 Mah hang mi hempoh a cuang in nunpan tu Pathian sungah ohtei muannak bang, cim zet in na dek hung hi. Mawhsiat nak vang co hung.
\v 11 Hi thukham hempoh hilh in.
\v 12 Na khanno laih a kua mah in sumsial ngawl um ma hen. Na awnkam in hihen, nunnak sungah hei hihen, thinlung sungah hei hihen, upnak sungah hei hihen, a thiangtho mi sungah hei hihen, um tutei ca tepteh tuk in um in hi.
\v 13 Ka hen leh lak lawh tian Laithiangtho sialnak, thazang piak nak le thu hilhnak te pha zet bawl in.
\v 14 Thuphuan nak co in Pasta ten khut suannak tuah nangmah ap mi laksawng cu sumsial ngawlin um pah sin.
\v 15 Na khan tohnak cu mi hempoh lakah lang tuk in, hi thu te ngaisung in zuam in.
\v 16 Mah le mah hei hihen, nangma thu hilhnak hei hihen, a cat ngawl ngalling in um in. Mah tin na bawlnak hang nangmah le nangmah hei hihen, a ngai tute hei nunpan tuk hi.
\c 5
\p
\v 1 Kum Upa pano te nasezet mawhsiat pah sin. Pa bang ngaisung in sosuah in. Khangno tangval te cu U le nau bang in hihen,
\v 2 Kum Upa numei te na nu bang ngaisung in, khanglai te cu a thiangtho mi hihnak a dim tuah na U nu bang ngaisung in sosuah in.
\v 3 Meivong a man ngai mi numei te cu bawm in Upat in.
\v 4 Mah hang meivong in canu, capa a nei tale a tu le ca ten a masa innsung sang cingkem tuk in hihen, mahmi thu cu Pathian deih mi thu hi.
\v 5 A thungai meivong a hih hang, a mah bek a um mi numei in Pathian cu muang in a sun a zan cat ngawl in thungen le leng thei hi.
\v 6 Nopnak sungah a um mi meivong cu nung napi in thi zo hi.
\v 7 A muhte cu mawhsiat nak um tuk ngawl in hi thu te hilh un.
\v 8 A innsung sang a cingkhawi ngawl tu cu upnak thu el hi. Um ngawl tute sang sual saw hi.
\v 9 Meivong nu cu kum sawmluk a kim ma tale, cazin sungah khum pah sun. Pasal pakhat bek a nei awng mi,
\v 10 A pha mi nuncan ziaza nunnak, mi thiangtho tei ke somsak nak, mikhual vak thiamnak, mizawng haksa mite bopnak, a pha mi hempoh zuamnak hang pahcoih nak co tuk hi.
\v 11 Khang no meivong te cu cazin sialnak sungah khum pah sun. Itahum titale, a mun Khrih thu hilhnak cu sup zo haw ma hi. Pasal a neih nuamnak a um ten,
\v 12 A mun a masa upnak a vawk haw hang, sual thukhen nak thuak tuk hi.
\v 13 Mah bek sial ngawl innkhat nung innkhat vak in thazawng thei haw hi. Thazawng bek sial ngawl son kul ngawl mi thu te son thei haw hi.
\v 14 Mah hang khangno laih meivong te cu pasal nei ca cawi in innsung sang cingkep nak, mawhsiat nak thu um tuk ngawl in deih ing.
\v 15 Mi hek khat ten lamzin pial in Saihtan nungah zui haw zo.
\v 16 Umtu numei, pano sungah meivong, pavong a um tale kohhran vanngit pua tik ngawlin a mah loli in cawm hen. Mah tin a bawl tale kohhran in a thungai in a kul mi meivong te noksak nak um ngawl in bawm thei tuk hi.
\p
\v 17 Phazet cingkem tu Pasta te, a cuang in a thuphuan nak le a thu hilhnak hang zuamnak tuah a dek tu Pasta te cu laksawng a letnih in cotak haw tin ngaisung un.
\v 18 Itahum titale, “Cangcil tu khui cu a kam ken pah sin” tih hei in hihen “Na dek tupa cu deh thaman cotaak hi” tih hei in, ti hi.
\v 19 Theihpih nak a son tu tetti panih a um ma tale kohhran Pasta hum ah mawhsiat nak thu ngai pah sin.
\v 20 A tang laih midang ten launak nei tuk in sual a bawl tu hempoh tei mai pen liat in.
\v 21 Nang cu hi thu te khenkhuai nak um ngawl in cingkep nak hang, a kua mah mitmai zo ngawl in Pathian le Khrih Zisuh pen pan a ten mi vancung mitei mai ah hei hihen, kei man nangmah cu nasezet sosuah ing.
\v 22 A kuamah hum ah na khut ha pah sin. Mi dang tei sual sungah hei tel kha pah sin. Nangmah le nangmah thiangtho tik in.
\v 23 Na hapum pi nemcuam tuk in hihen, a tu le tuin na thuak mi natnak hang in hihen, a tu pen pan tui bek in ngawl in, cabit tui dawm laih no cu in, in hi.
\v 24 Mihing hekkhat tei sualnak te thukhen nak ah hei a hen laih ngawl in lang zo hi. Mi hek khat tei sualnak cu dawl lam ten lang thei hi.
\v 25 Mah bang bok a pha mi nate vang ciangzet in lang thei hi. Mah tihbang in a lang laih ngawl mite vang sel theih ma hi.
\s To U pat nak
\c 6
\p
\v 1 Pathian min tuah a thu mawhsiat nak um tuk ngawl in, na dek tu sila in a topa cu naseset Upat taak hitin ngaisung hen.
\v 2 A topa cu umtu a hitale, U le nau hi tin ngaisung in Upat ngawl in um pah sin. Na deh nak hang nemcuam nak a co tu muantaak mipa, ih huai mi a hih hang na dehnak nei sesem hen. Hi thu te cu sosuah in thu hilh un.
\p
\v 3 A dang thu hilhnak pia in, ohtei Topai awnkam tih mi a thiangtho mi awnkam hei hihen, Pathian na dehnak sungah lungdam thu hilhnak a co tute cu,
\v 4 A man ngal in imah theihnak nei ngawl thu dotnak awnkam te sonkhawm in, awnkam el dunnak hang iksik nak, huahdun nak, mi iiknak, a pha ngawl mi ngaihsut nak, mizawt demnak heng thei hi.
\v 5 Mah tihcun theihnak thinlung thudik cu sia in, Pathian na dehnak sungah nemcuam nak um hitin a mun ngaisung haw hi. Mah tihbang a muhte cu pial un.
\v 6 Mah naven lungkim mi thinlung a um tale Pathian na dehnak sungah lungdam nak cu nasezet nemcuam nak a man hi.
\v 7 Itahum titale ohten hi leihum ah imah nei ngawl a hen uh bang a tul uh ten hei in, imah keng thei tuk ma hung tih cu lang zet hi.
\v 8 Mah a hih hang in eih tuk, silh tuk hempoh lungkim in um ta un.
\v 9 Mah hang sum ngah nuamnak a nei tuten sualsoh nak sungah hei hihen, thang sungah hei hihen, mihing te siatnak sungah a heng tik thei a lauhuai duhhap silnak phunkim sungah hei hihen heng thei haw hi.
\v 10 Itahum titale, sum deihnak cu phat ngawlnak hempoh a bulpi hi. Mi hekkhat in sum a deih nak hang upnak lamzin pial in haksat thinkham nak tuah a mah le mah sunkhil hi.
\s Upnak tuah a pehpai in a pha mi donak
\p
\v 11 Pathian mihing aw, nang cu hi sualnak te pial in. Upnak, itnak, supnak, dikcang nak, Pathian na dehnak sungah lungdam nak te pha zo tuk in zuam in.
\v 12 Upnak tuah a peh pai a pha mi do nak do in kumkhua nunnak cu nei in. Nang cu hi nunnak ca in samnak co hang, theihpih sonnak tampi mai ah a pha mi upnak phuang zo ci.
\v 13 Ohtei Topa Zisuh a hensuk leh lak lawh tian nang cu mawhsiat nak a them no hei um tuk ngawl in, a thukham cu cingkem in.
\v 14 Na hempoh a nung tik tu Pathian mai ah hei hihen, Ponti-us Pilate kumpi nelah a pha mi phuansuah nak ah theihpih nak a son mi Zisuh mai ah hei hihen, kei man nang cu thukham pia ing.
\v 15 Hun can a kim ten Pathian in Khrih cu heng tik tuk hi. Pathian cu thupha um in uknak pakhat bek a nei tu, kumpi tei kumpi, to hempoh tei Topa hi.
\v 16 A kua mah nek ngam ngawl mi vak nak sungah a um tu a kua hum? Mihing pakhat no hei in Topa cu mu awng ngawl bang in, muh vang muh thei ma hi. Mahmi Pathian cu a minthan nak le a huham ngilnak um ta hen.
\s Hausa tei ca thupiak nak te
\p
\v 17 Leihum hauhsak nak sungah lungdam ngalpih nak um tuk in hihen, a kho ngawl mi hauhsak nak cu muang ngawl in lungnop nak ca na hempoh hauhsak nak a pia tu Pathian hum ah muansan nak nei tuk in hihen,
\v 18 A pha mi bawl in a pha mi nuncan ziaza a dim cu phalzet in zuamnak tuah a pia thei mi thinlung a neih haw hang;
\v 19 Kumkhua nunnak co tuk in tu nung huncan ten a pha mi thu cu a mun bawl thei tuk in thukham pia in.
\s Nangma nelah ap mi cu kem in
\p
\v 20 Timote aw, na nelah ap mi thu cu kem in. Pathian tuah a peh pai ngawl a thupi ngawl awnkam le theihnak hitin, sual zet hitin a sam haw mi donak te pial in.
\v 21 Mi hekkhat ten mahmi cihthiam theihnak nungah zui in, upnak lamzin pen pial haw zo. A hehpih nak cu nohtei lakah um ta hen. Amen.