cnw_reg/50-EPH.usfm

\id EPH
\ide UTF-8
\rem The text in this file was extracted from C:/DCS/Chin, Ngawn/WORD/49. EPHESIANS. docx.
\mt Efisa
\h Efisa
\mt Efisa
\toc1 Efisa
\toc2 Efisa
\toc3 eph
\s Awnkam tuah otpih nak
\c 1
\p
\v 1 Pathian deihnak tuah Khrih Zisuh nungzui tu kei mah Paul cu Khrih Zisuh sungah thukam nak a nei tu Efisa khua ah a um mithiangtho tei lakah laikuat ing.
\p
\v 2 Topa Zisuh Khrih le ohtei Pa Pathian nelpen a hehpih nak le daihnak cu nohtei lakah um ta hen.
\s Pathian hauhsak nak thupha mui cu
\p
\v 3 Ohten Pathian mai pen hehpih itnak a thiangtho sualnak pen luat tuk in;
\v 4 Hi leihum a semsuah laih ngawl ohte cu Khrih sungah a ten ham zo bang in vanhum tuah a seng mi thu cu na hempoh a thiangtho thupha mui cu te Khrih hang, ohtei lakah a piak mi ohtei Topa Zisuh Khrih Pa Pathian cu thupha mui cu um ta hen.
\v 5 Pathian in a ihmi a capa hang, ohtei lakah a piak mi a hehpih minthannak thangphat tuk in hi.
\v 6 Ohte cu Zisuh Khrih hang a canu capa hihnak tuk, a deihnak bang leipi a semsuah laih ngawl in teng ham zo.
\v 7 Pathian hehpih nak a tampi bang in ohte a capa i thisan tuah a tatnak tih mi sual le khelhnak te ngaihdam hehpih nak cu a capa i hang co zo hung.
\v 8 Pathian in a hehpih nak cu ohtei sungah a hauhsak dim tik in theihnak le cih nak hempoh tuah;
\v 9 Pathian thinlung sungah khum nak a neih mi a hehpih deihnak thuthup sel mi cu a hehpih nak hang ohte thei tik hi.
\v 10 Thuthup a sel mite hun le can a kim ten vanhum ah a um mite hei hihen, leihum ah a um mite hei hihen, na hempoh Khrih sungah komcih khawng tukin hi.
\v 11 Ohten na hempoh te a ma deihnak tuah thukhen cat nak a neih mi bang, a bawl tupai ngaihsut tuptah nak bang a ten ham zo hang, Khrih hang in lo co zo hung hi.
\v 12 Itahum titale, Khrih muansan nak a nei ham tu ohtei hang Pathian min thangphat tuk in hi.
\v 13 Nohte vang nohtei nunpat nak tuah a seng mi thuthangpha a sunglawi thudik awnkam cu Topai sung pen za in, Topa upnak hang thukam a piak mi hawvang thiangtho tuah a seng mi tacik khet nak co zo uh ci.
\v 14 Hawvang thiangtho a nei mi nohte tatsuah nak na co uh tian ohtei lo co tuk in a hamnak hi. Pathian min thangphat tuk na hi hung hi.
\s Thangphat nak le thunget nak
\p
\v 15 Mah hang, nohten Topa Zisuh cu upnak tuah mi thiangtho te na ihnak thu ka zak ten,
\v 16 Nohtei hang a cat ngawl lungdam thangphat in, nohtei ca thungen ing.
\v 17 Thunget nak ka neih mi cu ohtei Topa Zisuh Khrih Pathian huham thawmngeng nak nei a Pa Pathian a sunglawi Topa theihnak nei tuk in cihnak hei hihen, mulet in theihnak hei hihen, nohtei lakah a piak tuk thu;
\v 18 Samnak a neih hang muansan co mi cu i nate hum tih hei hihen, mi thiangtho tei co mi hauhsak nak cu izahtak in ngeng hum tih mi hei hihen;
\v 19 Umtu ohtei lakah laknak a neih mi nasezet a ngeng mi huham thawmngeng nak cu izahtak in ngeng hum tih mi hei hihen, nang muhte thei tik tuk in nohtei theihnak mit vak tik tuk in thungen ing.
\s Khrih sungah a um mi Pathian huham
\v 20 Pathian huham cu Khrih sungah nung tik in, Khrih cu a thi mitei lak sung pen tho leh tik hi;
\v 21 Na hempoh uktu, thu a nei le leng tu, huham tuah uktu, a tu le a kumkhua tin a sam mi minthan nak hempoh hum ah vanhum a khut taklam ah khung tik hi.
\v 22 Na hempoh te Khrih i ke nuai ah koih in, Topa cu na hempoh humah lu cangtik kohhran ca in pia hi.
\v 23 Kohhran cu na hempoh tuah a dim cangkim nak tih mi Khrih i pumpi hi.
\s Thihnak pen nunnak ah
\c 2
\p
\v 1 Nohten a bosa huncan cu leihum deihnak ah zui in, vanhum huihlak huham uktu kumpi tih mi elnak a nei mitei sungah nadeh nak a nei tu hawvang i deihnak bangin;
\v 2 Sual le khelhnak sungah ngamtat nak hang, mahmi sual le khelh nak sungah thi in a um mi nang muhte hei Pathian in nung tik zo hi.
\v 3 Ohtei venghawng a bosa huncan in a muhtei sungah umnak hang, thi le sa deihnak sungah nuncak nak hei in hihen, thinlung deih nak a dim tuah zui hang a tang laih a muhtei bawl mi bang thinuuk nak a co tute hi zo hung hi.
\v 4 Mah naven, hehpih nak tuah a dim Pathian in ohte a ihnak a ngeng leita hang;
\v 5 Sual le khelh bawl nak sungah a thi mi ohte cu Khrih tuah nung tik zo hi. Hehpih nak bek in nunpat nak co hi.
\v 6 Zisuh Khrih hang ohte cu tho leh tik in, vanhum ah umnak pia zo hi.
\v 7 Itahum titale, Topai hang ohtei sungah a hehpih nak bawlin, a hehpih nak tampi cu tunung ten a cat ngawl ciangzet lang tuk hi.
\v 8 Itahum titale, nohte a hehpih nak cu upnak hang nunpat nak co zo uh ci. Nohtei dehnak hang hi ngawlin Pathian piak mi laksawng hi.
\v 9 Bawl phatnak hang nunpat nak ah heng hima hi. Mah ahih hang a kua mah in ultun tuangkhawn nak um ma hi.
\v 10 Itahum titale, ohten a pha mi nuncan ziaza zui tuk in, Zisuh Khrih sungah a bawl mi semsuah hi zo hung. Mahmi nuncan ziaza pha sungah ohten ngamtat nun nei tuk in, Pathian in ohte cu bawl ham zo hi.
\s Khrih sungah pumkhat hihnak
\p
\v 11 Mah hang, khut tuah pumpi sungah a um mi vun lek talhnak nei mi tin samnak hang, vun lek talhnak a nei ngawl mi tin samnak a nei miphun dang mihing tei sungah nohte cu a bosa huncan laih thi le sa hihnak bang na um uh nak te hei hihen;
\v 12 Mah hun laih nohten Khrih cu thei ma uh ci. Isarel mite tuah hei in pawlkom nak um ma hi. Thukam nak tuah a tel mi thukhaam thu tuah hei in seng kha ma uh ci. Muansan nak nei ngawl, leihum ah Pathian nei ngawl in na um uh mi cu nohten phawk leh ta un.
\v 13 Nohte cu a bosa hun in khuala kang zet ah um naven, a tu cun Zisuh Khrih sungah Khrih thisan hang a bul ah heng zo uh ci.
\v 14 Itahum titale, Topa cu ohtei lemdun nak le daihnak thu a hih hang ohtei panih cu pumpkhat ah cang tik in huat dunnak khantian pi subal hi.
\v 15 Dan thukham tuah a seng mi thukham cu a pumpi taksa tuah vawksak zo hi. Hi thu cu mihing panih a ma sungah pakhat bek mithak hihnak tuah semsuah in lemdun nak le daihnak cang tik hi.
\v 16 Thinglamteh hum ah a ngal te that in, thinglamteh hang ohtei panih cu pumpi taksa pakhat sungah Pathian tuah lemdun pawlkom tik tuk in hi.
\v 17 Mah cengten Khrih vang tolhsuk leh in khuala pi ah a um nang muhte vang, daihnak tuah a seng mi a sunglawi thuthangpha cu phuang hi.
\v 18 Mah tihcun Khrih hang kohtei panih cu thinlung hawvang pumkhat hihnak tuah Pa Pathian nelah tum theihnak thupia zo hi.
\v 19 Mah hang, nohte cu miphun dang tei ca hima zo. Mi khual hima zo. Mi thiangtho tei miphun te hi zo uh ci. Pathian inn sungsang hi uh ci.
\v 20 Itahum titale, nungzui tute penpan kamsang te tin tih mi innkhuam humah nohte cu a peh thuah in sak mi hi zo uh ci.
\v 21 Mahmi innkhuam ning ah suang cu Zisuh Khrih hi. Mahmi suang le inn pakhat cu a khawthu pehtuah in, Topa Pathian sungah a thiangtho mi biakinn hihnak tuah khang to hi.
\v 22 Mahmi biakinn ah Pathian cu hawvang thiangtho tuah cengcih tuk in, nohte cu kohte tuah sa kawm cih zo hi.
\s Miphun dang tei lakah Paul na dehnak
\c 3
\p
\v 1 Mahmi thu hang, kei mah Paul cu Zisuh Khrih thu hang thawngta ing.
\v 2 Nohtei ca ka nelah a piak mi Pathian hehpih nak tuah a seng mi na dehnak cu nohten zaknak na neih zo uh bang miphun dang nohtei ca in thuak ing.
\v 3 A hehpih nak thuthangpha na dehnak a piak mi a bosa hun in kei cu dawmlaih no lai ngat mi bang, Pathian in thuthup te a phuansuah nak hang kei mah thei tik hi.
\v 4 A thu awnkam sial tale Khrih i thuthup sel mi cu kei man itin theihnak nei thei hum tih mi cu nohten thei uh ci.
\v 5 Mahmi thuthup cu a thiangtho mi nungzui tu te le kamsang tei lakah a tu huncan in hawvang thiangtho hang a honsak zo bang, a dang huncan sung mihing tei lakah theih tiknak um ma zo hi.
\v 6 Mah thuthup sel mite cu miphun dang ten thuthangpha hang, Judah miphun te tuah lo co in pumkhat sakhat cang in, Khrih tuah a seng mi thukam cu pehtuah nak co haw hi.
\p
\v 7 Pathian in a huham thawmngeng nak tuah a piak mi ka nelah hehpih nak laksawng ka co mi bang in, mah thu phuannak ah saza hihnak in heng zo ing.
\v 8 Muh suah zawh ngawl mi Khrih ii hauhsak nak a dim thuthangpha cu miphun dang tei lakah phuang tuk in hihen;
\v 9 Na hempoh Khrih hang semsuah tu Pathian sungah a bosa huncan laih pen pan thuthup sel mi cu mah thuthup tuah a seng mi na dehnak cu itihbang in cang hum tih mi mi hempoh tei lakah langciang zet tuk in hihen, mi thiangtho hempoh tei lakpen a neubel sangin a neu saw mi kei mah cu a hehpih nak pia zo hi.
\v 10 Itahum titale, ohtei Topa Zisuh Khrih thu hang kumkhua a ngaihsut mi bang in;
\v 11 Vanhum a sang bel umnak mun ah thu neih hang, a uknak thu hempoh Pathian a lamdang mi cihnak te kohhran hang a tuin thei tik tuk hi.
\v 12 Topa upnak tuah ohten ngalhan nak thinlung hei hihen, upkho muannak tuah a ma nelah nek thei tuk in hihen, Topai nelpen ohten co ngah zo hung.
\v 13 Mah hang nohtei ca haksat cim ka thuak nak hang, thinkiam thanem tuk ngawl in hehpih kun ing. Mahmi thu te cu nohtei minthan nak hi.
\p
\v 14 Hi thu hang kei cu vanhum ah hei hihen;
\v 15 Leihum ah a um mi hempoh innkua pakhat min sungah co tuk in a um mi a Pa Pathian nelah khukdin thungen ing.
\v 16 Thunget mite cu hawvang thiangtho hang, nohtei a sunglam mihing cu huham tuah kho tik tuk in;
\v 17 Upnak tuah Khrih cu nohtei thinlung sungah ceeng tuk in, nohten itnak sungah a zung sa in a bulkhim no na neih uh hang;
\v 18 Nohten mi thiangtho te bang a vaang, a zal, a thuk, a sang te khenkhuai theih thiam tuk in hihen;
\v 19 Mai cihthiam nak tuah theih zawh ngawl mi Khrih itnak cu thei tuk in hihen, nohten bawl theihnak na neih uh hang Pathian cangkim nak a venghawng a dim nei tuk in thungen ing.
\p
\v 20 Ohtei sungah a bawl tu huham na dehnak a nei mi bang in, ohtei thunget mi le ngaihsut nak sang a lamdang cuang bawl tuk in thil tih theih nak a nei tu cu Pathian hi.
\v 21 Zisuh Khrih hang, kohhran sungah a tu le a kumkhua a minthan nak um ta hen. Amen.
\s Khrih i pumpi sungah pumkhat hihnak
\c 4
\p
\v 1 Mah hang, a samnak co tu nohten man nei zet a pha mi kalsuan nun nei tuk in, Topa Pathian ca thawngta mi kei man nohte sosuah ing.
\v 2 Na hempoh ah niamkhiat nak, lungnem nak, thinsau nak a dim tuah pakhat le pakhat itnak thinlung tuah thuak zawhnak nei ta un.
\v 3 Daihnak tuah pawlkom nak hang, hawvang thiangtho sungah pumkhat hihnak zuam ta un.
\v 4 Nang muhte a samnak tuah a seng mi muansan nak pakhat bek um hi.
\v 5 Topa pakhat, upnak pakhat, baptisma pakhat bek um hi.
\v 6 Na hempoh ohtei Pa Pathian pakhat bek um hi. Mahmi Pathian cu na hempoh ohtei hum ah um hi. Na hempoh cu ohtei lakah pungzai in um hi. Na hempoh ohtei sungah hei in um hi.
\v 7 Mah naven Khrih in laksawng a piak tuk huncan tian ohten a hehpih nak cu pumpak tek in co zo hung.
\v 8 Mah bang bok Laithiangtho a heng mi cu, “A sang nak mun ah kai to mi tampi te pui tuk in mihing tei lakah laksawng cu pia hi” tin, heng hi.
\p
\v 9 Kai to tin a tih ten a pat in leipi nuai ah a tolhsuk nak thu a tihnop a hima tale i thu a tihnop nak tuk laih hum?
\v 10 Tolhsuk nak a nei tupa cu mi dang hima hi. Na hempoh cangkim nei tuk in na hempoh vanhum a sangbel nak ah um mite kalvawk in kai nak a nei tupa hi.
\v 11 Mah cengten Topan mi hekkhat te nungzui tu hihnak in hihen, a hekkhat te kamsang hihnak in hihen, a hekkhat te thuthangpha phuang tu in hihen, a hekkhat te Pasta in hihen, a hekkhat te hilh tu saza in hihen na pia hi.
\v 12 Hi thu cu ohtei venghawng in upnak tuah Pathian capa theihnak sungah pumkhat cang ngilcang mi hi tuk in;
\v 13 Khrih a cangkim bang in a hen theih nak tuk, Khrih i pumpi tuah khan tohnak na dek tuk mi thiangtho tei a bawl tuk in koih hi.
\v 14 Itahum titale, midang ten dupdelh nak le a zol theih mi sualsoh nak hang, ohte cu na hempoh huihtheu in a lengkek thei mi naupang te bang um ngawl in;
\v 15 Itnak thinlung le thudik thu phuang in lu hihnak nei tu Khrih cu na hempoh ah khangto tuk in hi.
\v 16 Mahmi a lu pen pan pumpi a venghawng bopnak a nei tu nguhmang hempoh a khawthu pehtuah nak tuah komkhawm in, pumpi khen pakhat tek a muhtei deh mi na tek dehnak a neih haw hang, a mah le mah cu itnak tuah khangto hi.
\s Nunthak tuah nunnak
\p
\v 17 Mah hang a tanglaih Grik mite cu a thupi nak um ngawl mi ngaihsut nak tuah a kalsuan bang, nohten kalsuan nun nei leh tuk ngawl in Topa Pathian thupiak nak bang thu cah ing.
\v 18 A muhtei cihthiam theihnak thinlung mitcaw in theihnak imah a neih haw ngawl hang, Pathian nunnak pen khen in um haw zo.
\v 19 A mun zahcak nak thinlung nei ngawl in a dindeih huai nuncan ziaza phunkim te, zuamin a muh le muh lei thi sa deihnak ah ap haw zo.
\v 20 Mah naven Zisuh thu cu zilnak nei ma ci;
\v 21 Khrih sungah thudik thu a um bang bok in a thu hilhnak le zaak nak te na nei ngai uh tale:
\v 22 Nohten mizol in deihnak te hang siatnak ah heng tuk mi a bosa hun laih in nun lun ngamtat nak tuah a seng mite vawk ta un.
\v 23 Nohten thinlung thak co tuk uh ci;
\v 24 Thudik thu tuah a seng mi dikcang nak le a thiangtho Pathian mel bang in semsuah nak a co tu mithak vanthuam silh ta un.
\p
\v 25 Mah hang mizol ngawl in a man mi awnkam bek pakhat le pakhat son ta un. Itahum titale, ohte cu taksa pumpi pakhat sungah a um mite hung hi.
\v 26 Thinuuk ta vang sual bawl pah sun. Thinuuk nak dai ngawl in ni tumpih pah sin.
\v 27 Dawihmang pa cu huncan pia pah sun.
\v 28 Nguca thei mipa cu tunung ten nguca leh ngawl toh in mizawng haksa mite pia thei tuk in, nang ma khut tuah na dek in zuam in.
\v 29 A dindeih huai mi awnkam cangkhat no hei, nohtei kampen tul tik pah sin. A za tutei nemcuam nak nei tuk in a pha mi awnkam bek mang ta un.
\v 30 Pathian hawvang thiangtho cu khuangai tik pah sin. Nohte a tatnak ni hun le can a kim tian hawvang thiangtho tuah tacik khetnak co zo uh ci.
\v 31 Na hempoh ah thincom nak, thinuuk nak, thangsiat nak, awnkam hang tuah mivap nak, mi nautat nak awnkam te hei hihen, na hempoh ah iksik nak hei hihen, nohtei lakpen vawk ta un.
\v 32 Pakhat le pakhat hehpih dunnak, lungnem nak, Pathian cu Khrih hang nohtei sualnak a ngaihdam bang, pakhat le pakhat sual ngaihdam ta un.
\c 5
\p
\v 1 Mah hang, nohte cu Pathian ihmi canu le capa te na hih zo uh bangin Pathian nundan tuah zui ta un.
\v 2 Khrih in ohte a ihnak hang Pathian mai ah ngimnam tui um tik tuk in, mah le mah apnak tuah biakpiak nak nei in ohtei ca nunnak a piak mi bang, nohten itnak thu sungah nung ta un.
\p
\v 3 A dik ngawl mi nu le pa sualnak, a nawngkai mi thinlung sualnak phunnam kim, duhhap nak nate cu pial thei tuk in awnkam tuah hei in otpih pah sun.
\v 4 A mawi ngawl a nawngkai mi awnkam te pial in lungdam thangphat nak bek in na mang ta un.
\v 5 A dik ngawl mi nu le pa a sual tu, a nawngkai mi sual a bawl tu, milim zuk bia in sual a bawl tu, mi pakhat no hei in Khrih tuah Pathian uknak ngam sungah lo co haw tuk ma hi tih cu nohten thei zo uh ci.
\s Vaknak le khuathim nak
\v 6 A thupi nak imah um ngawl mi awnkam tuah a kua mah in nohte zol ma hen. Itahum titale, hi sualnak te hang Pathian thinuuk nak cu thungaih ngawlnak a nei mitei hum ah heng tuk hi.
\v 7 Mah hang a muhte tuah phialdun pah sun.
\v 8 Itahum titale, a bosa huncan in nohte cu khuathim sungah um awng naven, a tuin Topa Pathian sungah vaknak cang zo uh ci. Mah a hih hang, vaknak i canu le capa te bang um ta un.
\v 9 Vaknak i a thupi nemcuam nak cu na hempoh phatnak, dikcang nak, thuman in nunnak hi.
\v 10 Topa Pathian deih mi cu aite hum tih mi nohten na zil ta un.
\v 11 A thupi nak um ngawl mi khuathim nate tuah phialdun nak na neih uh ngawl bek sial ngawl, mahmi sualnak te pholhsuah ta un.
\v 12 Itahum titale, a mun ngamdai cen pen bawl mi sualnak te awnkam son laih sungah hei in a nawngkai mi tel laih hi.
\v 13 A langzet mi sual a bawl hempoh vaknak hang lang hi. A lang tik thei mi na hempoh vang vak nak hi.
\v 14 Mah hang, a hihbu mite tho un. Thihnak pen tho leh zo hi. Khrih vaknak cu nohtei lakah pia tuk hi” tin, ti hi.
\s Khristian nunnak ah kho zet in
\p
\v 15 Mah hang misil te bang ngawl in cihnak a nei mite bang phatak zet nuncak kalsuan tuk in ngalling in um ta un.
\v 16 Tu ni hun le can te a sia zet zo hang hun le can te phatak zet mang ta un.
\v 17 Mah hang, ngalling ngawl mi hi tuk ngawl in Topa Pathian deihnak khenkhuai in theihnak a nei tuin um ta un.
\v 18 Sual palcat tik thei mi cabit tui le a ngui thei mite pial in, hawvang thiangtho a dim tuah na um ta un.
\v 19 Saam la penpan a thiangtho mi la phunkim te pakhat le pakhat sonnak le sialnak nei in, thinnem nak thinlung tuah Pathian mai ah thangphat nak la sa un.
\v 20 Na hempoh ah a hehpih nak ngeng lei ta hitin, ohtei Topa Zisuh min suang in a Pa Pathian mai ah a cat ngawl in lungdam ta un.
\v 21 Khrih cu Upat launak tuah pakhat le pakhat nemkhiat in um ta un.
\s Nupi le Pasal te
\p
\v 22 Nupi te aw, Topa Pathian thu na ngaih uh bang in na pasal uknak na ngai bok ta un.
\v 23 Itahum titale, Khrih cu kohhran hum ah lu a hih bang pa no te aw na zi tei humah lu hi uh ci. Khrih cu a ma pumpi nunpan tu hi.
\v 24 Kohhran in Khrih uknak thu a ngaih bang, numei ten pasal tei uknak cu ihempoh thu ah ngai ta un.
\v 25 Pasal te aw, Khrih in kohhran a ih bang in nohten na zi uh te na it bok ta un.
\v 26 Kohhran cu thiangtho in sualnak um ngawl a hih hang;
\v 27 A bal a ninnak, ti khaang can-iakuak tih um ngawl U pat nak a nei mi kohhran cu Khrih in a mah pia thei tuk in, Pathian awnkam tui sungah a somnak hang thiangtho tik tuk in kohhran ca a nunnak pia hi.
\v 28 Mah bang bok pasal ten a mah le mah a ih bang bok in a zi cu it bok tuk hi. A zi a it tu te cu a mah le mah a it tu hi.
\v 29 A pumpi taksa a hua tu pakhat no hei um ma hi. Khrih in kohhran a cawm bang nang muhtei taksa cu cawmnak nei thei tuk uh ci.
\v 30 A thu ngangai in ohte cu Topa Pathian i taksa, a nguh te a hih uh hang a sunglawi mi Topai pumpi khen khat te hung hi.
\v 31 Mahmi thu hang pano cu a nu le pa zam a zi tuah um in, a muhtei panih cu pumkhat sakhat in cang haw tuk hi.
\v 32 Hi thu cu a sel mi a thuthup hi. Mah tin son ten Khrih le kohhran cu a tihnop nak hi.
\v 33 Mah hang nohten na pumpak tek uh itnak na neih uh bang, na zi cu na it bok ta un. Zi ten na pasal te Upat un.
\s Canu le capa te le nu le pa te
\c 6
\p
\v 1 Canu le capa te aw, Pathian deihnak bang in na nu le pai awnkam thu na ngai ta un. Nu le pa tei thu ngaihnak cu a dik mi thu hi.
\v 2 Nu le pa Upat in. Hi thukham te cu na ngam sung pen thupha co in;
\v 3 Nunsau nak co tuk na hih hang thukam tuah a seng mi a masabel thukham hi.
\v 4 Pa te aw, canu le capa tei thuakzawh tuk ngawl tian bawl pah sun. Pathian deihnak bang thuhilh in cawm ta un.
\s Sila te le to
\p
\v 5 Sila te aw, Khrih awnkam thu na ngaih uh bang can tawtoh lau in a thiangtho mi thinlung tuah leihum na to tei thu ngai ta un.
\v 6 Mihing tei thinlung a nem tik thei mi bang muh theihnak bek pen na deh nei mite hi ngawl in Khrih i sila te bang zuamnak thinlung tuah Pathian na cu dek ta un.
\v 7 Mihing tei na deh nak bek dek tu hi ngawl in, Topa Pathian i na deh mi bang in a thiangtho mi ngaihsut nak tuah na dek ta un.
\v 8 A pha mi nuncan ziaza a nei tute cu sila hihen, mi luat hihen, Topa Pathian khut sung pen thupha co haw tuk hi tih cu thei ta un.
\p
\v 9 To Upa te aw, nohten hi tihbang in na bawl ta un. A muhte cu thumli in na bawl pah sun. Nang muhte le a muhtei Topa cu vanhum ah a um hang, mahmi Topa cu mitmai zo ma hi tih cu thei ta un.
\s Pathian ngalthuam kim
\p
\v 10 A tang laih mi thu te cu U le nau te aw, Topa Pathian hang in hihen, huham thawmngeng tuah in hihen, thazang ngilnak a dim tuah na um ta un.
\v 11 Dawihmang pai dupdelh ngaihsut nak te kham thei tuk in, Pathian bawl mi ngalthuam van phunkim cu silh ta un.
\v 12 Itahum titale, ohte cu thi le sa a nei mi ngal te tuah zuamdun a do mite hima hung. Uk tute, thuneih nak huham te, hi leihum khuathim sung uktu kumpi te, zuamdun in do hung hi.
\v 13 Mah hang, Dawihmang pai ni a hen ten na hempoh te ceng khozet ding thei tuk in, Pathian ngalthuam van phunkim silh ta un.
\v 14 Mah hang thudik thu tuah nohten na taipom het in, dikcang nak lumphaw silh un;
\v 15 Daihnak tuah a seng mi thuthangpha phuang in a bawl sa mi kedam tuam in ding un.
\v 16 Dawihmang pai meibang a alh mi thalcang kapnak kham thei tuk in, upnak tihmi lumphaw cu silh thuah bet ta un.
\v 17 Nunpat nak thu tih mi thik lukhu hihen, Pathian thunung tih mi Hawvang nam keng ta un.
\v 18 A cat ngawl in thinlung tak in thunget nak nam kim tuah thunget nak nei un. Mah tihbang thungen tuk thazang kiam ngawl in kei mah penpan mi thiangtho hempoh tei ca thunget nak tuah cingkem dun ta un.
\v 19 Kei man kam ka kau ten son tuk mi thu kei mah a piak hang, a sunglawi thuthangpha tuah a seng mi thuthup sel cu ngalhang zet phuang tuk in, kei ma ca thunget sak un.
\v 20 Itahum titale, thuthangpha thu hang thikkhau tuah kencih thuak mi ai-awh tupa ing hi. Hi tihbang in kencih nak thuak ta hei in, kei cu phuan a kul mi bang ngalhang zet thuthangpha phuang thei tukin thunget sak un.
\s Dawl tabel vai cahnak
\p
\v 21 Nohten ka nelpen a heng mi thu te thei tuk in, Pathian nelah muantaak nak a nei tu saza ka ihzet mi Tych’-i-cus cu na hempoh nohtei lakah hilh tuk hi.
\v 22 Nohten kohtei thu thei tuk in le a mah cu nohtei thinlung nop tik tuk in, a mah cu nohtei lakah hah tung hi.
\p
\v 23 U le nau tei lakah daihnak um ta hen. Pa Pathian le Topa Zisuh Khrih piak mi upnak le itnak um ta hen.
\v 24 Ohtei Topa Zisuh Khrih cu a thungai a it tutei lakah a hehpih nak heng ta hen. Amen.