cnw_reg/48-2CO.usfm

\id 2CO
\ide UTF-8
\rem The text in this file was extracted from C:/DCS/Chin, Ngawn/WORD/47. 2 CORINTHIANS. docx.
\mt 2 Korin
\h 2 Korin
\mt 2 Korin
\toc1 2 Korin
\toc2 2 Korin
\toc3 2co
\s Awnkam tuah otpih nak
\c 1
\p
\v 1 Pathian deihnak bang Zisuh Khrih nungzui tu keimah Paul le Timote cu Korin khua ah a um Pathian kohhran penpan Akhaia ngam sungah a um mi thiangtho tei lakah laingan ing.
\p
\v 2 Topa Zisuh Khrih le ohtei Pathian nelpen a hehpih nak le daihnak cu nohtei lakah um tahen.
\s Thazang pia tu Pathian
\p
\v 3 Ohtei Topa Zisuh Khrih hi Pa le Pathian a hehpih nak tuah a dim mi Pathian, lungngam nak hempoh a pia tu Pathian cu thupha mui cu um ta hen.
\v 4 Pathian in ohtei thuak mi haksat nak hempoh sung pen ohte cu lungngam nak pia hi. Pathian nelpen ohtei co mi lungngam nak hang, haksat nak phunkim a thuak mitei lakah ohte lungngam nak pia tuk hi.
\v 5 Itahum titale, Khrih hang ohtei haksat thuaknak a tam leita bang bok in Khrih hi hehpih nak hang kohtei ca thuaknop nak tampi hi.
\v 6 Mah a hih hang, kohten haksat cimnak ka thuak uh ta hei in hihen, nohtei lakah thazang piak nak le nunpat nak tuk in hi. Ohten haksat cimnak a thuak uh mi bang, nohten thinsau nak thinlung tuah mahmi thazang piaknak le nunpat nak cu cangkim thei hi.
\v 7 Nohtei ca kohten muansan nak kho zet nei ung. Itahum titale, nohten haksat cimnak na thuakpih uh bang thazang piak nak te na conak uh thu kohten thei zo ung.
\v 8 U le nau te aw, Asia ngamah kohtei haksat cim thuaknak thu cu thei ngawlin na um tuk uh deih mang hi. Kohten ohtei haksat cimnak thuak zawh tuk ngawl tian in haksat cimnak a thuak uh hang, nung tuk hei ngaisung ngawl tian in;
\v 9 Kohten thihnak dan thuak zo tin mah le mah thinlung sung pen nei zo ung. Hi thu te cu mah le mah muang tuk ngawl in a thi sa mite a tho leh tik thei tu Pathian muang tuk in hi.
\v 10 Pathian in ohte cu mah tih loli tian haksat cim thuaknak pen nunpan zo hi. A tu hei in nunpan laih hi.
\v 11 Nohte bopnak nei in ohtei ca thunget nak nei tale tu nungten hei nunpan tuk laih hi tin kohten upnak le muansan nak nei ung. Mah tihbang a hitale, mitam sawn ten bopnak hang ohtei lakah a heng mi laksawng cu a tamsaw mihing te zo in, ohtei ai in lungdam thangphat haw tuk hi.
\s A thiangtho mi thinlung
\p
\v 12 Ohtei ultun lungdam nak cu hihtih bang in hi. Ohten hi leihum ah a cuang in nohtei mai pen leihum cihnak suang ngawl Pathian hehpih nak bek muang in, Pathian nelpen a heng mi a thiangtho thinlung tuah a nunkhua sak nak thu, ohtei theihnak thinlung tuah theihpih nak tetti hi.
\v 13 Ohten sial in theihnak na neih uh sial ngawl, a dang thu hihim nohtei lakah ngat mi um ma hi.
\v 14 A dang thu te ngan in pia mang hi. Nohten Topa Zisuh Khrih ni ten, ohtei ultun lungdam nak thu a hih bang in nohten kohtei thanau nak hang lungkim nak na neih uh bang a cat ngawl nei tuk in kohten muang in um ung.
\s Khualzin a thawn nak thu
\p
\v 15 Kei cu hi thu te upkho nak hang, nohten hehpih nak co leh tuk in nohtei lakah hawh masa tuk ngaisung ing.
\v 16 Nohtei umnak lam cu tawn vawk in Mesidonia ngam hawh cengten, Mecidonia ngampen nohtei lakah kik leh in Judah ngam tian, nang muhtei hehpih hetnak tuah hawh tung hi tin ngaisung ing.
\v 17 Mah tin ngaihsut nak ka neih ten, kei man ngaihsut thawthong mi um maw. Mah ahima tale ngaihsut nak ka neih mi cu thi le sa ngaihsut nak hang awnkam otnak ka neih cihten, “Mah ngai zuh hi, mah ngai zuh hi tih mi le mah kha ma hi, mah kha ma hi” tin, hi nen tih maw.
\v 18 Pathian cu thukam tuah a dim mi a hih hang, nohtei lakah a piak mi lai cu a man mi hi tih hei in hihen, “A man le man ngawl” hei hihen, a tihnop nak hima hi.
\v 19 Kei mah penpan Timo-the-us le Silvanas ten nohtei lakah a phuan haw mi Pathian capa Zisuh Khrih sungah, “Mah ngai hi, mah ma hi” tih um ngawl in Topai sungah, “A thungai a man mi bek um hi” tin a tihnop nak bek um hi.
\v 20 Mahmi Topa cu Pathian thukam hempoh ohtei hang, a minthan nak lang tuk in ohten Amen tin Topai hang in ti hung hi.
\v 21 Kei muhte le nang muhte Khrih sungah um tik in thupha muicu pia tu cu Pathian hi.
\v 22 Mahmi Pathian in ohte tacik khen in, ohtei thinlung sungah hawvang thiangtho pia hi.
\p
\v 23 Kei cun ka nunnak tuah amahkhan in, Pathian theihpihnak tetti nei ing hi tin tih mi Korin khua ah hawhnak ka neih hih ngawl laih cu nang muhte ka hehpih nak hang bek hi.
\v 24 Kohten nohtei upnak kelet tuk um ma hi. Nohtei lungdam nak tuk nang muhte tuah na deh langkhat nak a nei mi ung hi. Itahum titale, nohten upnak tuah ding zo uh ci.
\c 2
\p
\v 1 Mah bek sial ngawl thanau nak tuah nohtei lakah hung leh tuk ma toh ing tin, thinlung khencat zo ing.
\v 2 Itahum titale, nang muhte thanau nak ka nei tik tale mah tihbang in thanau tik sial ngawl a kon kei mah lungdam tik tuk hum?
\v 3 Ka lungdam nak thu nohtei venghawng lungdam nak thu cu lungkim nak ka neih hang, ka hen ten kei mah lungdam tik tute thanau nak bawl tuk ngawl in a humpen laingan in kuat zo ing.
\v 4 Nohten thinkham nak le thanau nak thinlung le mit hitui tampi cakin, nohtei lakah laikuat ngan in pia ing. Nohtei thinnat nak tuk laikuat ngat mi hima hi. Itnak thinlung ka neih mi cu nohtei theih tuk in ngan ing.
\p
\v 5 Mi pakhat in thanau nak a bawl ngai a hitale, nohtei lakpen mi hekkhat te bek in thanau nak piang tik hi. Nang muhte nasezet thukhen nuam mang hi.
\v 6 Mihing a tamsawn tei dantat a thuak mi sual dantat nak cu cangkim zet hi.
\v 7 Mah hang, mah tihbang mipa cu thanau nak ngengpi nei in a ngaihsut hak tuk ngawl in, nohten thudang tuah a sual ngaihdam in a mah cu thapia tuk in bawl kul hi.
\v 8 Mah hang, nohten a mah cu a man mi itnak na neih uh mi cu ciangzet lak thei tuk in hehpih kun ing.
\v 9 Mah bek sial ngawl nohten na hempoh thungaih nak hihen, thu ngaih ngawlnak hei hihen, theih nuamnak ka deih hang, nang muhte culnak tuah a humpen laikuat ngan ing.
\v 10 Mi pakhat sual cu ngaidam uh ci. A sualnak vang kei man ngaidam ing. Itahum titale, keiman mi pakhat sual cu ngaidam nak ka nei awng tale nohten zo in Khrih thu tuah ngaidam uh ci.
\v 11 Mah ahima tale, Satan in ohte neh tuk hi tih mi cu launak um hi. A ngaihsut nak te ohten thei zo hung hi.
\s Mesidonia ngam khualzin nak
\p
\v 12 Mah bek sial ngawl Khrih thuthangpha phuang tuk Troas khua ah kei cu heng in, Topa Pathian ka nelah kongka a hotsak ten;
\v 13 Ka nau Titu cu ka tawh ngawl hang thinnop him ngawl in a muhtei lakah ngaihdam kut cengten, Mesidonia ngam ah hawh ing.
\s Thihnak ahima tale nunnak hi na dehnak
\p
\v 14 Ohten Khrih tuah a cat ngawl nehnak co tuk in hihen, Topa theihnak ngim namtui cu ohtei hang khua hempoh ah pungzai tuk in hihen, hehpih nak a nei tu Pathian min thangphat nak um ta hen.
\v 15 Itahum titale, ohten nunpat mitei lakah hihen, a thi mitei lakah hihen, Pathian cu Khrih hi ngimnam tui mite hung hi.
\v 16 A thi mite cu thih tian in thihnak hi ngimnam tui te hi haw hi. Nunpat nak a co tute cu nunnak tian nunnak hi ngimnam tui te hi. Mah ahih hang hi thu te tuah a kua co tak hum?
\v 17 Pathian awnkam thu nung a liplet mite tuah ohte cu bang ve ngawl in a thiangtho mi thinlung nei in Pathian deihnak thinlung tuah Pathian mai ah Khrih thuthangpha phuang haw hi.
\s Nunnak a nei mi an te
\c 3
\p
\v 1 Ohten mah le mah pahcoih bang in um hung maw? Mah ahima tale pahcoih nak lai cu nohtei lakah mi dang te pia tik tuk in hihen, nohten midang te pia tik tuk in hien, kohten mi hekkhat te bang deihnak neih mi um haw maw?
\v 2 Nohten, kohtei thinlung hum ah ngat mi lai, mi hempoh ten thei in a sial theih mi lai hi uh ci.
\v 3 Itahum titale, nohte cu cati tuah ngat mi lai hima uh ci. A nung mi Pathian hawvang thiangtho tuah ngat mi hei hihen, suangpek hum ah ngat mi hi ngawl in taksa tuah a dim mi Khrih hi lai ciangzet lang in ngat mi hi uh ci.
\v 4 Ohte cu Khrih hang Pathian mai ah mah tihbang mi upkho nak a nei mite hung hi.
\v 5 Mah hang, ohten huham cu suang in mai thu in na pakhat ngaihsut theihnak nei ma hung hi. Pathian nel bek pen thil ti theihnak heng hi.
\v 6 Thukhaam thak saza a cang thei mi thil tih theihnak cu Pathian in ohte pia zo hi. Mah tin tih ten, thukham lun a tihnop nak hima hi. Hawvang thu a tihnop nak hi. Thukhaam lun cu mi that thei hi. Hawvang thu cu nunnak hi.
\v 7 Mah bek sial ngawl a pai thei mi vaknak cu Mosi mitmai pen a suak tul mi vaknak hang, Isarel miphun ten a mitmai cang a zoh theih tuk ngawl tian suanghum ah lai cang ngat mi thihnak thu cu huham a dim tuah a um ngai a hitale;
\v 8 Mah sang ngawl in hawvang thu cu huham a dim tuah um saw tuk hima maw?
\v 9 Sual thukhen theihnak a nei thei mi thu cu huham a um a hitale, mah sang ngawlin dikcang nak a cang tik thei mi thu cu huham a dim tuah um saw tuk mi hi.
\v 10 A heng tuk laih mi huham a thupi lei ta hang, huham a neih awng mi thu cu a huham pai hi.
\v 11 Vawk mi thu cu huham a nei tale, a kho mi thu cu huham nei saw tuk hi.
\p
\v 12 Mah tihbang mi upnak le muansan nak a neih hang, ohtei sel theih tuk hihim um ma hi. A man bang in phuang haw hi.
\v 13 Vawk mi thu a tawp nak cu Isarel miphun ten pha zet no mu tuk ngawl in, Mosi in a mitmai a tuam bang in ohten bawl ma hung hi.
\v 14 A mun thinlung khoh in a um hang a tu tian Laithiangtho a sial haw ten, a thinop nak cu khuh in um hi. Itahum titale, Khrih hang bek in mahmi a khuhnak thu vawksak thei hi.
\v 15 A tu tian hei in, Mosi Laithiangtho a sial haw ten a muhtei thinlung khuh in um laih hi.
\v 16 Mah naven, Topai lam ah thinthek nak a neih ten mahmi a khuh cu vawk sak tuk hi.
\v 17 Topa Pathian tin tih ten hawvang thu a tihnop nak hi. Pathian hi hawvang thu cu ngaihdam nak pia thei hi.
\v 18 Ohtei venghawng in mitmai khuh hong in thalang zoh mi bang, hawvang thu Topa cu vaknak a hah mi bang in ohten huham minthan nak te khang to in a ma mel bang in thek zo uh ci.
\s A sunglawi mi thuthangpha vaknak
\c 4
\p
\v 1 Mah hang, ohten mah tihbang mi thu na dehnak a nei tu a hih hang, a hehpih lainat nak a co mi bang thanau nak thinlung pen luat zo hung hi.
\v 2 A thup no zahcak huai bawl mite cu vawk ta un. Mi dupdelh ngamtat nak, Pathian awnkam thu cu lumlet zol ngawl in, thudik thu bang ciah a phuan hang, Pathian mai pen mi hempoh tei theihnak thinlung bang thangphat taak mi nuncan ziaza tuah nung ta un.
\v 3 Kohtei phuan mi thuthangpha cu sinkhup in a um tale siatnak ah a heng mitei lak bekah sinkhup in um hi.
\v 4 Mah tihbang in um ngawl tute cu Pathian mel tihmi Khrih huham tuah a dim mi thuthangpha a vaang-al vaknak pia thei tuk ngawl in, hi leihum uknak a nei tu Pathian in a muhtei mit cu thim tik hi.
\v 5 Kohten keimu thu hilhnak nei ma ung. Zisuh Khrih cu Topa a hihnak thu hei hihen, kohten Zisuh ca nohtei sila a hihnak thu hei in hihen hilh ung.
\v 6 Khua thimnak pen a al-vaknak pia tuk in thupiak nak a nei tu Pathian cu Zisuh Khrih mitmai ah a vak mi Pathian huham theihnak, cihnak a vak pia tuk in ohtei thinlung sungah vaknak a al cu vak tik hi.
\s Leibel sung a koih mi thil man pha
\p
\v 7 Mah naven, huham minthan nak cu ohte tuah seng ma hi. Pathian tuah a seng mi thu mahmi thilman pha leibel sungah koih mi cu ohtei sungah um hi.
\v 8 Ohten haksat cimnak namkim a thuak uh hei in siatnak ah heng ma hi. Ngaihsut zawh ngawl tian a um ta vang thinkham nak um ma hi.
\v 9 Bawl siatnak thuak hei in thihnak tawk ma hi. Lumcih in sawhvawk thuak naven, thihnak tawk ma hi.
\v 10 Topa Zisuh Khrih nunnak a neih mi cu kohtei pumpi ah lang tuk in, Zisuh thih thuaknak thu cu kohtei pumpi ah keng ung hi.
\v 11 Itahum titale, Zisuh hi nunnak thu cu a thi thei mi ohtei pumpi ah lang tuk in, nunnak a nei mi ohte cu Zisuh hang thihnak khut sungah a cat ngawl in ap nak co hung hi.
\v 12 Mah a hih hang, thihnak thu cu ohtei lakah na dek in a um hang, nunnak cu nohtei sungah na dek hi.
\v 13 Mah tihbang mi upnak thinlung a um hang, “Kei cu upnak tuah ka tih mi hi” tin, Laithiangtho a heng mi bang, kohten upnak thinlung neih hang phuang ung hi.
\v 14 Topa Zisuh a tho leh tik tu cu Zisuh hang kohte vang tho leh tik in, nohte tuah a ma nelah a sam tuk mi thu kohten thei ung hi.
\v 15 Na hempoh te nang muhtei ta hi. Hi thu cu mi tampi tei lakah a hehpih nak khang, Pathian minthan nak tuk in lungdam thangphat nak dim tuk hi.
\p
\v 16 Mah hang, kohten thinkham thanau nak um ma hi. Kohten a pawlam mihing pumpi cu siatnak ah a heng ta vang, sunglam mihing cu nikhat nung nikhat thak in bawlphat nak co hi.
\v 17 Itahum titale, ohten hun com no sung haksat a thuak cimnak sang, a sunglawi a thupi saw mi kumkhua minthan nak cu ohtei ca in cang tik hi.
\v 18 Mah hang, ohten muh theih mi nate cu zo ngawl in, muh theih ngawl mi nate a zohcik mite hung hi. Itahum titale, muh theih mi nate huncan comno sung bek kho in, muh theih ngawl mi nate cu kumkhua kho hi.
\s Ohtei thih nungten
\c 5
\p
\v 1 A kho ngawl mi ohtei leihum inn cu a sia tale vanhum ah mihing khut tuah sak ngawl, Pathian bawl mi kumkhua inn a neih uh mi cu ohten thei hung hi.
\v 2 Ohten leihum inn ah a um uh laih in vanhum inn sungah lut tum tuk in deihnak a nei mi thinlung, hi leihum innpen thasia phun in um li hung hi.
\v 3 Mah tin tumnak a nei uh tale, umnak inn nei ngawl in um tuk ma hung hi.
\v 4 Hi leihum a kho ngawl mi ohtei inn cu haksat nak vanngit te pua in thasiat kahnak nei hung. Mah tihbang in kahnak thu cu mahmi inn siatsuah nuam hi ngawl in, a thi thei mi nate cu nunnak a sia tik thei tukin, a kho mi umnak sungah um nuamnak hang kap hi.
\v 5 A thupi nemcuam nak co tukin ohte a bawl tupa cu Pathian hi. Pathian in hawvang a hamnak cu ohte pia zo hi.
\v 6 Mah hang ohten upkho nak nei hung. Hi Pumpi taksa a hih laih sung hempoh cu Topa Pathian tuah khuala pi ah um hung hi tih mi cu ohten thei in;
\v 7 Itahum titale, ohte cu muhnak hang hi ngawl in, upnak tuah kalsuan nak nun a nei tu hung hi.
\v 8 Kohten upkho nak cu pumpi taksa tuah khen in, Pathian tuah um langkhat tuk in deih saw ung hi.
\v 9 Mah hang, kohten pumpi taksa tuah um hei in hihen, a khua la nak mun ah hei hihen, Topai deihnak hi tuk in zuamnak thinlung nei ung hi.
\v 10 Itahum titale, ohtei venghawng in pumpi taksa ngamtat nunnak, phat ngawlnak bawl mi bang sual thaman tek thuak tuk in Khrih thukhen nak tohkham mai pen lang leh tuk hung hi.
\p
\v 11 Mah a hih hang, Pathian launak tuah a seng mi thu cu ohten a thei uh tale mi tampi te sosuah nak a hih hang, Pathian mai pen lang khawng zo hi. Nohtei thinlung ah vang lang tuk hi tin ngaisung ing.
\v 12 Kohten nohtei mai ah mah le mah pahcoih nak nei ma ung. Thinlung hihnak zo ngawl in, thi le sa zo in ultun nak a nei thei mitei awnkam cu nohten na don leh theih nak tuk, Kohtei hang ultun nak thu bek pia haw hi.
\v 13 Kohten misil hitale Pathian ca hi. Thinlung pha mi hitale nohtei ca tuk in hi.
\v 14 Itahum titale, mihing pakhat in mi hempoh tei ca thihnak a thuak nga ngai a hitale;
\v 15 Mi hempoh thi in a um haw hei in nunnak a nei mite cu a deihnak ah zui in nunnak nei ma hi. A muhtei ca a thih cengten thawh leh nak a nei mi a muhtei deihnak zui in a nunnak tuk, mi hempoh tei ca thihnak a thuak hei hihen, Khrih itnak cu ohten a ma deihnak ah nung in zui tuk hung hi.
\s Lemdun nak i na dehnak
\v 16 Mah hang, a tu penpan ohten thi le sa hihnak tuah theihnak nei ma zo. Ohten Khrih cu thi le sa ngaihsut nak thinlung tuah a thei uh ta hei in a tuin mah tihbang theihnak um ma zo hi.
\v 17 Mah hang a kua a bang Khrih sungah um tale semsuah thak mi hi. A lun te cu tham in na hempoh a thak in cang zo.
\v 18 Hi na hempoh te Pathian nelpen a heng mite hi. Pathian in Zisuh Khrih hang ohtei ngal cu lemdun tik in, Topa tuah pawlkom nak heng tik hi. Mahmi pawlkom thu phuannak cu ohtei lakah pia zo hi.
\v 19 Mahmi thu Pathian cu Khrih sungah um in, leihum mitei sualnak te sialsiah ngawl in, lemdun nak cang tik in, Topa tuah pawlkom tik hi. Mahmi pawlkom nak thu vang ohtei lakah pia zo hi.
\p
\v 20 Mah hang ohte cu Khrih ai-awh in a hah mi na dek tute hung hi. Nohtei ngal lemdun nak hang, Pathian tuah pawlkom ta un hitin Pathian in ohtei ca a sosuah mi bang, ohten Khrih ai-awh a hih uh hang nohtei lakah hehpih kun ung.
\v 21 Itahum titale, Pathian in sual a nei ngawl mipa cu ohtei ca sual nei in cang tik hi. Itahum titale, ohte cu a ma hang Pathian mai pen dikcang nak cang tuk in hi.
\c 6
\p
\v 1 Ohte cu Pathian na dehnak a nei tute a hih uh bang in, nohten Pathian hehpih nak cu a thawnthong co ngah mi hi tuk ngawl in nohtei lakah sosuah ing.
\v 2 0Itahum titale Topan, “Kei mah na co ngah huncan in na awnkam thungai zo ing. Nunpat nak ni huncan in nang cu bawm zo ing hi” tin, thupia hi. Zo in. A tu huncan cu nunpat nak ni hi.
\s Paul na dehnak a lamdang thasiah huai
\v 3 Na deh sonsiat nak um tuk ngawl lup le bahnak thu pakhat no hei bawl ma hi.
\v 4 Bawlsiat thuaknak, haksat cimnak, suahcak theih ngawl mi haksat tawhnak, thinsau nak;
\v 5 Vah thuaknak, thongtak nak, mi dang tei buai pih in bawlnak, na deh zuamnak, hihbuh kham ngawlnak, an eih tuk um ngawlnak;
\v 6 Thinlung thianlim nak, cihnak, thinsau nak, hehpih nak, hawvang thiangtho hei hihen, a dik a man mi itnak;
\v 7 Thudik thu hilhnak, Pathian huham laknak, dikcang nak tih mi ngal hiamnam te vei le tak ah cawi in;
\v 8 Upat maizah taak le taak ngawl mi hei hihen, pahcoih nak le zotsak thuak nak hei hihen, mizol nak a nei mite bang hi ta vang a dik a man mite uh ci.
\v 9 A kua mah in theihpih ngawl nak bang hei hita hen, minthan nak, a thisa mi bang hei in hi ta hen, nunnak nei mi thu hilhnak nei mite bang hi ta vang, thihnak pen a luat tupa;
\v 10 Thanau nak a nei tupa bang hi ta vang a cat ngawl lungdamnak a nei tu, haksat cimnak thuak mite bang hi ta vang, mi tampi te hauhsak nak tuah dim tik uh ci. Imah a nei ngawl mite bang a hi ta vang na hempoh a nei tute hi uh ci. Pathian piak mi hilhtu saza a dik a man mi thu cu i hempoh ah langzet in lak haw hi.
\p
\v 11 Korin khua mite aw, kohtei kam in nohtei lakah ciangzet son in kohtei thinlung vang zalzet in phuang zo ung hi.
\v 12 Kohten nohtei lakah thinlung neu no hei kham ma ung. Nang muhte sawn in a muhtei hehpih nak thinlung kham saw uh ci.
\v 13 Kohtei lungdam thu san leh tuk in thinlung zalzet nei ta un. Mah tin tihten, ka canu le capa te bang hilh ing.
\s Pathian mai ah lamdang zet umnak
\v 14 Um ngawl tute tuah a bang ve ngawl mi van pua pah sun. Itahum titale, dikcang nak thu le dikcang nak a nei ngawl mitei lak lawh ah itihbang in peh tuah dunnak um hum? Vaknak cu khuathim tuah itihbang in peh tuah thei hum?
\v 15 Khrih cu Be-li’al tuah itihbang in lemdun thei tuk hum? Umtu le um ngawl tu itihbang in phatnak co kawm thei tuk hum?
\v 16 Pathian biakinn cu zuk milim tuah itihbang in peh tuah nak um hum? Pathian in, “Kei cu a muhtei sungah um in, a muhte vehvai in a muhtei Pathian ing hi. A muhte vang ka miphun hi haw tuk hi” tin a tihbang in nohte cu a nung mi Pathian biakinn hi uh ci.
\p
\v 17 “Mah hang Pathian thu piak mi cu nohten a muhtei lakpen suak tul in a tuam tum in um ta un hi” tin thupia hi. A thiangtho ngawl mi nate cu khut tuah hei in lenkha pah sun. Mah tihbang in na bawl uh tale, nang muhte co tung.
\q
\v 18 Nohtei pa hi tung. Nohte vang ka canu capa te hi tuk uh ci” tin, huham thawm ngengnak tuah a dim Pathian in thupia hi.
\c 7
\p
\v 1 Mah hang ka ih mite aw, mahmi thukam tuah ohte peh tuahdun a hih hang, pumpi taksa a bal mi thinlung hawvang a bal mi hempoh te le mah le mah thiangtho, Pathian lau in a thiangtho mi nunnak a dim tuah um tuk hung hi.
\s Lungdam nak tuah sualsik
\p
\v 2 Kohte sang poh un. Kohten a kua mah sual bawl ma ung. A kua mah siatsuah ma ung. A kua mah neihnak te dupdelh in lonsak ma ung.
\v 3 Nohte mawhsiat in ka thinop nak hima hi. Nang muhte tuah nunnak nei tuk in hihen, thi tuk hei in hihen, deihnak a neih mi tian in kohten nang muhte it ung hi tin son awng zo ing.
\v 4 Nang muhtei hang ngalhang ing. Nohtei hang ultun nak tampi nei ing. Thazang a dim co in kohtei haksat cimnak thuak mi hempoh lungdam nak tuah dim hi.
\p
\v 5 Kohten Mesidonia ngam hen ten, kohtei pumpi taksa dai no colhnak thu hihim um ma hi. I hempoh ah bawlsiat nak thuak ung. A pawlam pen do in a sunglam pen lau nak um hi.
\v 6 Mah naven, thanau nak a nei mite thazang a pia tu Pathian in Titu a hennak hang, kohte cu lungnop tik hi.
\v 7 Titu a hennak hang bek lungnop nak co hima hi. Titu in nohtei lakpen a co mi lungnop nak hang hei in lungnop tuk hi. Itahum titale, nohtei ngainat nak, nohtei phunnak, ka nemcuam nak tuk in nasezet phalnak na neih uh mite cu a man kohtei lakah hilh hi. Mah hang kei cu lungdam nak tampi nei ing.
\v 8 Lai ka kuatnak hang nohte thasia tik in, kei cu tu masuan in sihnak ka nei ta vang a tu huncan in um ma zo hi. Itahum titale, mahmi lai cu nohte hun comno sung thasia tik hi tih cu mu ing.
\v 9 Nohte thasia tik a hih hang, lungdam nak um ma hi. Thasia tik in sualsik nak a neih hang, lungdam nak um hi. Kohtei hang, nohtei nemcuam nak te susia him tuk ngawl in Pathian deihnak bang thasia tik haw hi.
\v 10 Itahum titale, Pathian deihnak tuah thasiat nak cu nunpat nak tuah a seng sualsih nak tihmi a thek thei ngawl sualsih nak thinlung heng tik thei hi. Leihum thasiat nak cu thihnak ah heng thei hi.
\v 11 Pathian deih mi nohtei thasiat nak cu nohtei sung pen itihbang in zuamnak, sual ngaihdam nak, thuak zo ngawl thinuuk nak, launak, a deihnak thinso tawtok in le thuman tuah thukhen nak te heng tik zo hi tih cu zo ta un. Nohten hi thu ah sualnak a um ngawl mi na hempoh hang lang khawng zo hi.
\v 12 Mah bang bok in kei cu nohtei lakah laikuat ka ngat ten, a sual mi pai ca hang ngat mi hima hi. Nohtei nemcuam nak cu kohten, Pathian mai ah komsuan nuamnak thinlung neih mi thu cu nohtei lakah lang tik tukin ngat mi hi.
\v 13 Mah hang, nohtei lungnop nak thu hang Kohte vang lungnop nak ka ngah uh bek sialngawl, Titu lungdam nak thu hang, lungdamnak tampi nei ung. Nohtei venghawng in a ma lungdam daihnak thinlung co tik zo na hih uh hang;
\v 14 Kei man nang muhtei thu ultun nak awnkam cu Titu lakah ka son cengten, zahcak neih mi um ma hi. Kohten na hempoh nang muhtei lakah a man son mi bang, Titu mai pen ultun nak awnkam ka neih mite vang a man mi awnkam thu lang zo hi.
\v 15 Nohten lauthawm can tawtok in a muhte sang thu ngaih nak a neih haw mi cu a man phawhnak a neih hang, nohte itnak le hehpih lainat nak thinlung a dim in um hi.
\v 16 Kei cu na hempoh ah nang muhte muankhom upnak neih hang lungdam ing.
\s A lu khon cangkim tuk in a sosuah nak
\c 8
\p
\v 1 U le nau te aw, Mesidonia ngamah a um mi kohhran tei lakah Pathian piak mi a hehpih nak thu cu nohtei lakah kohten hilh nuam ung.
\v 2 Mahmi kohhran te bawlsiat haksat nak tampi a thuak haw ta vang, a mun nasezet in lungdamnak le a neihnak bo in haksat nak thu hi. A muhtei phalnak tuah a piak mi cu hauhsak nak a dim in cang tik hi.
\v 3 Itahum titale, a mun tih theih tawk bek sial ngawl, a piak nuam phalnak thinlung a neih haw hang, keiman theihpih nak tetti nei ing.
\v 4 A muhtei phalnak a piak haw mi cu kohten la a mun bawm in, mi thiangtho te cawmnak bawl tuk a mun sosuah nak awnkam tuah kei muhte hehpih kun in um haw hi.
\v 5 A mun ka ngaihsut nak sang bawlpha in, Pathian deihnak bang a masa in Topa Pathian nelah hei hihen, kohtei lakah hei hihen, a mun phalnak tuah pia haw hi.
\v 6 Mah hang Titu in nohtei lakah a masa bawlnak na neih uh bang in, mahmi phalnak a piak mi cu tawp tuk in kohten a mah cu hehpih kun ung.
\v 7 Mah bang bok nohten upnak, thuhilh nak, theihnak, thazang ngilnak neih mi hempoh tuah in hihen, na hempoh ah hauhsak nak tuah dim tuk in, a hehpih bawlnak ah vang hauhsak nak a dim tuah um ta un.
\v 8 Mah tin son ten, dan thukham tuah ka tihnop mi hima hi. Mi dang tei thinlung zuuamnak ngaisung in nohtei itnak a dik le dikngawl cek in a tihnop mi hi.
\v 9 Itahum titale, ohtei Topa Zisuh cu hausa naven, haksat cimnak hang nohten hausa tuk in nohtei ca haksat cimnak a thuak mi a hehpih nak cu nohten thei zo uh ci.
\v 10 A hehpih nak thu tuah seng in ngaihsut nak pakhat pia tung hi. Nung kum pen pan na bawl zo uh bek sial ngawl bawl tuk in na ngaihsut uh mi cu nohtei ca nemcuam nak um hi.
\v 11 Mah a hih hang, phalnak na neih zo uh bang a tu hei in nohten tih theih tawk bawl in, hi nate cu a ceng suak tuk in bawl ta un.
\v 12 Itahum titale, phalnak thinlung na nei zo tale na tih thei ngawl mi nate cu zo ngawl in na tih theih mi nate cu zo in a deih awh co taak mi hi tuk hi.
\v 13 Hi thu hang mi dang ten lungngam nak co in, nohte haksat cimnak ah heng tuk ngaisung mang hi.
\v 14 “Tampi a ngah tute cu a val um ma hi. Dawmno ngah tu in kul ma poh tih mi Laithiangtho bang in;
\v 15 A bang ten a co nak thu zo in, nohtei hauhsak na cu a muhtei haksat bopnak hang in hihen, a bang ten co ngah tuk in keiman ngaisung ing.
\s A lukhon nak hum ah ngaihsut uknak
\p
\v 16 Mah tihbang in nohtei komsuan nuam mi phalnak thinlung cu Pathian in Titu nelah a piak mi a hehpih nak cu ngeng zet hi.
\v 17 A mah cu ka sosuah nak thu a ngaih bek sial ngawl, zuamnak thinlung ngengpi tuah nohtei lakah hawh cawm hi.
\v 18 Thuthangpha phuang in kohhran hempoh ah pahcoih nak a co tu ka nau Titu tuah kohte cu hah haw hi.
\v 19 Mahmi ka nau cu Pathian minthan nak hei hihen, a zuamnak thinlung hei hihen, kohte cu lang tikin, kohhran tei hehpih phalnak a piak mi cu kohte tuah hawh langkhat tuk in, kohhran ten teng in apnak a piak mi hi.
\v 20 Kohte bopnak a neih mi phalnak a piak mi tuah seng in a kua mah sonsiat thei tuk ngawl in kohten ngailing ung hi.
\v 21 Topa Pathian mai bek sial ngawl mihing tei mai ah zoh mawi mi nuncan ziaza ngamtat nak cu ngaisung ung.
\v 22 A muhte tuah langkhat in mi dang te vang hah bok haw hi. Mahmi a nau cu kohten ihempoh ah culnak tampi nei in, theihnak a neih mi bang thazang suah zuamnak nei mipa hi. A tuin nohte cu upkho nak a neih hang zuamnak tampi nei hi.
\v 23 Titu tuah seng in son tale a mah cu ka ngualcam phialpih a hih hang, nohtei ca kei mah tuah na deh langkhat nak a nei tupa hi. Kohtei ngualcam a dang te tuah seng in son tale a muhte cu Khrih minthan nak tihmi kohhran tei ai-awh tute haw hi.
\v 24 Mah hang, nohtei hehpih nak hei hihen, kohten nohtei hang ultun lungdam nak thu hei hihen, kohhran tei mai pen a muhtei lakah langzet in lak ta un.
\s Pia tuk in sosuah nak
\c 9
\p
\v 1 Mi thiangtho cawmnak na deh mite cu nohtei lakah laikuat ngan in thei tik ta vang nemcuam nak um ma hi.
\v 2 Itahum titale, nohtei phalnak thinlung thei ing. Nohtei lakah a um mi phalnak thinlung cu ultung in, Akhaiah ngam mi hempoh ten nungkum ah hei in a mansa in um haw zo hitin, Macidonia mitei lakah son thei ing. Mah tihbang in nohtei phalnak thinlung ngengpi na neih uh mi cu mi tampi te sosuah zo hi.
\v 3 Mah naven, kohten nang muhte ultun nak awnkam cu hi thu ah a thawnthong cang tik ngawl in, mahmi awnkam bang nohten a mansa um tukin U le nau hekkhat te hah ing.
\v 4 Mah ahima tale, Macidonia mite kei mah tuah langkhat hung in, nohten zoh mawi ngawl nak a um tale nohten zahcak nak um tuk ma poh hitin ti ngawl in, kohten ngamzet ultun nak ka nei zo uh mi cu zahcak mualpho nak thuak haw tuk hi.
\v 5 Mah hang, nohtei piak mite piak kul cam bang hi tuk ngawl in phalnak tuah piak mi hi tuk in, U le nau ten nohtei lakah hawh ham tik in, mahmi phalnak piak mi lungdam nak cu a masa kim ham tuk in, sosuah mi cu kulcam hitin ngaisung ing.
\p
\v 6 Dawm laih no anci a vawh tuten ancang dawmno bek at tuk hi. Tampi a vawh tuten tampi at bok tuk hi tih mi cu thei ta un.
\v 7 Mi hempoh in a thinlung deih nak bang pia hen. Pamhei nak thinlung tuah hei in pia ma hen. Pia ngawl cang ma tih mi thinlung tuah pia pah sin. Itahum titale, phalnak thinlung bek Pathian deih mi hi.
\v 8 Laithiangtho a heng mi bang a mah cu pia zo hi. Haksat cimnak a thuak mitei lakah pia zo hi.
\v 9 A dikcang nak cu a cat ngawl kho hitin a heng mi bang in nohten na hempoh ah deh man tham tuk mi neihnak phun kim tuah a cat ngawl a um hang, a pha mi ngamtat nak namkim tuah a cuang in hauhsak nak dim tuk in, a hehpih nak thupha mui cu namkim le a cuang hauhsak nak kim tik tukin Pathian in bawl thei hi.
\p
\v 10 Anci vawh tupai lakah anci hei hihen, an eih tuk hei hihen, a pia tupa cu nohtei lakah anci pia in pungzai tik hi. Nohtei dikcang nak vang tampi tuk hi.
\v 11 Mah tihbang in nohten phalnak thinlung tuah a namkim pia tuk in na hempoh ah hauhsak nak na neih uh ten, kohtei hang Pathian hehpih nak cu thangphat nak thu nei tuk uh ci.
\v 12 Itahum titale, hi an cawmnak nate cu mi thiangtho tei haksat cimnak a bop bek sial ngawl, Pathian hehpih nak cu thangphat nak tampi a dim um hi.
\v 13 Nohten Khrih thuthangpha deihnak ah langzet na zuinak hei hihen, mi thiangtho tei patnak a neih mi mi hempoh tei lakah a thiangtho mi phalnak thinlung tuah piaknak hei hihen, a muhte ngaihsut sial ten, hi an cawmnak a lamdang theihpih nak te zo in Pathian hehpih nak thangphat thei haw hi.
\v 14 Nohtei lakpen a sunglawi mi Pathian hehpih nak cu a mun a zo haw tale nohtei ca thungen in itnak thinlung tampi nei haw hi.
\v 15 Kam in sonzawh ngawl mi Pathian hehpih nak laksawng, lungdam nak ngaisung in thangphat nak um ta hen.
\s Paul nungzui tei thuneih nak
\c 10
\p
\v 1 Nohtei mai pen niamkhiat nak, a limbu pen nohtei sual thukhen in ngalhan nak a nei tu kei mah Paul cu Khrih i niamkhiat nak a neih mi thu tuah nohtei lakah hehpih kun ing.
\v 2 Ohten thi le sa deihnak zui in ngamta mite hung hitin a ngaisung mitei lakah ka ngaihsut ngalhan nak bang nohtei lakah ka hen ten, mah tihbang ngai ngalhang tuk ngawl in hehpih kun ing.
\v 3 Itahum titale, ohte cu mihing thi le sa tuah a ngamta uh ta vang, thi le sa deihnak zui in ngaldo nak a nei mite hima hung hi.
\v 4 Ohten ngaldo nak hiamnam cu thi le sa hihnak hima hi. Pathian huham tuah khuapi khantian nak te a susia thei mi ngal hiamnam hi.
\v 5 Mahmi ngal hiamnam tuah mihing tei ngaihsut nak hei hihen, Pathian theih mi cihnak cu khamnak a nei tu pualthau ngalnak hempoh susia liplet in, ngaihsut nak hempoh hetcip in Khrih awnkam thu cu ngai tik hi.
\v 6 Nohten thu ngaihnak kim na neih ceng uh ten, thungaih nak a nei ngawl mi hempoh dantat nak pia tukin kohten a mansa in um zo ung hi.
\v 7 Mitmai bek zo in um uh cim maw? Mi pakhat in kei cu Khrih mihing ing hitin a mah le mah ngaisung in um hi. A mah cu Khrih mihing a hih bang, kohte vang Khrih mihing a hihnak thu cu ngaihsut theihnak nei leh hen.
\v 8 Nohte susia tuk hi ngawlin khang to tuk in Topa Pathian in kohtei lakah apnak a piak mi huham cu ultun nak tampi ka nei ta vang, zahcak nak tuk thu um ma hi.
\v 9 Laikuat ka ngat mi bek cu nohten lau tuk in ngaisung tik nuam mang hi.
\v 10 Itahum titale, “A lai cu a thupi hu le thawm tuah a dim mi hi. A ma pumpak tawh ten, a mah cu thanau nak a nei mi a thupi ngawl awnkam son thei tupa hi,” tin a son thei um hi.
\v 11 Kohten pumpak in neihnak a um ngawl hang lai sungah a tel mi awnkam a hih bang bok in, a pumpak loli a hen ten na dehnak hang cang tuk hitin a man ngaisung hen.
\v 12 Mah le mah a pahcawi mite tuah sialcih nak hei hihen, demdun nak te hei hihen, kohten bawl ngam ma ung. A mun pakhat le pakhat tehkip nak, dem dunnak bawl in cihnak nei ngawl in cang haw hi.
\v 13 Mah bek sial ngawl a mah le mah na dehnak te palcat bawl mi nate cu kohten tuangkhawng ngam ma ung. Pathian piak mi na dehnak ngam khen tian bawl mite bek ultung ngam ung. Mah a tehnak a sau lam cu nang muhtei lak tian ah heng hi.
\v 14 Nohtei lakah a heng ma tale kohten sual palcat bawl hima hi. Itahum titale, Khrih thuthangpha phuang in nohtei umnak tian heng zo hi.
\v 15 Kohten mah le mah na dehnak te palcat mi dang tei na dehnak sung luhtum nak hang, ultung tuangkhawng ma ung. Mah naven, nohtei upnak a khang bang bok in kohtei umnak cu nohtei lakah umnak a zal saw zo hang;
\v 16 Nohtei umnak ngamah tawn vawk thuthangpha phuang thei tuk in nohtei upnak ngilcang nungten, kohtei na dehnak cu zal sesem tuk hitin, muang ing.
\q
\v 17 Mah a hih hang ultun tuangkhawn nak a nei tu cu Topa Pathian nel bek ah tuangkhawng hen.
\v 18 Itahum titale, mah le mah pahcoih nak a nei mite cu lungkim nak um ma hi. Pathian thangphat nak a co tu mite bek lungkim nak a nei mite hi.
\s Paul le nungzui a tiam hem tute
\c 11
\p
\v 1 Ka silnak sungah sual cu nohten dawm laihno sung thuak thei tuk in deih ing.
\v 2 Itahum titale, kei cu Pathian micin nak thinlung a neih mi bang nohte cu cingin thincom ing. Kei cu a him mi khanglai tawntil hihnak tuah Khrih pehzom thei tuk in, nohte cu pasal pakhat tuah huaidun nak a celhten, Pathian deihnak bang launak thinlung tuah nohte cingkem ing hi.
\v 3 Ngul cu a mi dupdelh nuamnak tuah Evua a zol bang bok nohten thinlung sia khawng zo, Khrih itnak thinlung hempoh pai tuk hitin, launak um hi.
\v 4 Nohtei umnak mun ah a heng mipa cu kohtei hilhnak neih laih ngawl mi a dang Zisuh thu phuan nak hei hihen, nohten na co laih uh ngawl mi hawvang dang hei hihen, na theih uh laih ngawl mi thuthangpha a dang thu ngaihnak hei hihen, a mah cu nohten phazet suup in um uh ci.
\v 5 A thungai in kei cu a ngengbel mi nungzui tute sang dawmlaih no hei phat ngawlnak um ma hi tih cu ngaisung ing.
\v 6 Awnkam tuah thiamnak a um ngawl ta hei in, cih thiamnak lam cu mah tihbang mi hi mang hi. Nohten na hempoh thu ah kohten a cat ngawl mah le mah langzet in lak zo ung.
\v 7 Nang muhte khaisang tuk in hihen, mah le mah niamkhiat, thaman ngen ngawl in nohtei lakah Pathian thuthangpha phuannak thu ah sual ka neih mi um maw.
\v 8 Kei cu nohtei na dek tuk in kohhran dang tei piak mi an man ka co hang, a muhte long zo hima maw.
\v 9 Nang muhte tuah umngel langkhat in na pakhat sapnak a um ten a kua mah noksak nak um ma hi. Itahum titale, Macidonia ngam pen a heng mi U le nau ten ka kin le sap nak hempoh pia haw hi. Nohte noksak bawl ngawl in, ngalling zet um zo ing. Tu nungten vang ngalling zet um tuk laih ing.
\v 10 Khrih i thudik thu ka sungah a um hang, Akhaiah ngam mitei lakah hitin tuangkhawn nak te a kua mah in kham thei tuk ma hi.
\v 11 Itahum titale, nang muhte keiman it ma ing maw. Itnak ka neih mi thu cu Pathian in thei poh hi.
\v 12 Huncan a co nuam miten huncan ngah tuk ngawl in hihen, ultun nak thu ah a mun kei mah bang langzet in a um nuamnak hei hihen, bawlnak ka neih zo bang a cat ngawl in bawl tuk laih ing.
\v 13 Itahum titale, a muhte cu nungzui sual te haw hi. Khrih nungzui tiamhem in mizol thei na dek tute haw hi.
\v 14 Hi thu te cu a lamdang mi thu hima hi. Satan pa hei vaknak a nei tu vancung mi hihnak in tiamhem thei hi.
\v 15 Mah a hih hang, a saza ten dikcang nak thuphuan mi saza hihnak cu a tiamhem tale a lamdang nak um ma hi. A muhtei dawltawp nak cu a muhtei bawl mi bang thuak haw tuk hi.
\s Khrih ca Paul thuak mi haksat cimnak
\p
\v 16 Kei cu a kua mah in misil hitin ngaisung pah su hen. Mah naven, ultun nak dawmno ka neih theihnak tuk in, kei mah cu misil bang hei in na ngaisung ngawn ta un.
\v 17 Hi tihbang in ka tih mi awnkam cu Topa Pathian bang ka tihnak hima hi. Misil bang ngalhang zet in ka tihnak hi.
\v 18 Mi tampi ten hi leihum thu ah ultun nak hang kei man ultung tuangkhawng ing.
\v 19 Nohte cu micip mi na hih uh hang, misil te cu hehpih nak thinlung tuah thuak un.
\v 20 Mi dang ten nohte cu sila tuk zuak in eih nak, thil van te lonsak nak, hauhphuan bawlnak, biangpen bet nak a bawl tale nohten thuak thei uh ci.
\v 21 Kohten thazang ngilnak nei ma ung hitin sonsiat nak cu ngaisung in son ing. Mi pakhat in na pakhat ultung ngam a hitale kei mah vang ultung ngam bok ing hitin, misil bang in ti ing.
\v 22 A muhte cu Hebru mite hi haw ma maw. Kei mah vang Hebru bok ing. A muhte cu Isarel mi phun te haw ma maw. Kei mah vang Isarel mi hi bok ing. A muhte cu Abraham mi phun te haw ma maw. Kei mah vang Abraham mi phun bok ing.
\v 23 A muhte cu Khrih na deh nak a nei tu saza te haw ma maw. Kei cu a cuang in dek ing hitin misil bang in ti ing. Cawl cuang in na dehnak a nei tupa vah thuaknak, thawnginn sungah khumnak cu a cuang in a thuak tupa, haksat thihnak pen vei tampi a tawk tupa ing.
\v 24 Veinga kim tian Judah tei khut tuah vei sawmthum le vei kua vah nak thuak zo ing.
\v 25 Veithum kim tian tingngolh tuah vah thuaknak hei hihen, veikhat cu suang seh co nak hei hihen thuak zo ing. Veithum kim tian tembaw sia in thuak zo ing. Nikhat le zankhat sung pikpek tuipi sungah um zo ing.
\v 26 A tu le tu khualzin tul in lui tuipi pen haksat cim thuak nak, misuam damiah taih thuaknak, miphun dang tei bawl mi haksat nak, khua sungah hen ten haksat tawhnak, ngamlak pen tawh mi haksat nak, U le nau tiamhem bawl mi haksat nak, hi haksat nak te tawk zo ing.
\v 27 Cim le kham cawlzet na dehnak, a tu le tu hihbuh kham ngawl nak, ningkial dang dumnak, a tu le tu an eih tuk um ngawlnak, khuasik thuaknak le silh tuk puan van a um ngawl nak, hi haksat thuak nak te cu nei zo ing.
\v 28 Hi a pawlam pen haksat thuak nak te bek sial ngawl, kohhran hempoh te launak thinlung tuah kawmsuan zo in ni sial a cat ngawl noksak nak cu thuak ing.
\v 29 Kei mah thanem ngawl in a kon thanem tuk hum? Kei cu lau nak um ngawl in a kon thukam pelh hum?
\v 30 Kei cu ultun tuangkhawn nak ka nei tale ka thanau nak thu bek cu ultun tuangkhon pih tuk um hi.
\v 31 Kei cu zolthu ka son ngawl nak cu thupha mui cu nei tu Pathian in ohtei Topa Zisuh Khrih a pa Pathian in thei hi.
\p
\v 32 Damaskas khua ah Are ‘tas kumpi uknak piak mi khuapi uktu in kei mah man tuk Damsaka khuapi cu khahkhum in pang haw hi.
\v 33 Nungzui tuten kei mah kho sungah a koih cengten, tukvelh pen suah tul in khuapi khantian nak humpen hahsuk in mah khuapi uk tupai lakpen luatnak co ing.
\s A cangkim mi a hehpih nak
\c 12
\p
\v 1 Kei cu ultun bawl tuk a kul ma tale, Pathian lak mi a lamdang Topai thuphuan nak te hilhnak thu nei bet tuk laih ing.
\v 2 A bosa kum heili laih in Khrih i nungzui tu mihing pakhat in vanhum thuahthum nak ah a laktoh nak thu thei ing. Mah ten a mah cu pumpi taksa um le um ngawl cu thei mang. Pathian in thei hi.
\v 3 A mah cu Paradise ah la to in, mihing lakah son tuk ngawl mi awnkam a zak mi thu cu thei ing.
\v 4 Mah ten pumpi taksa um le um ngawl cu thei mang hi. Pathian in thei hi.
\v 5 A mah cu ultun nak nei hih tung hi. Thanau nak sial ngawl ultun tuk mi a dang um ma hi.
\v 6 Ultun nak tuk deihnak thu a um ta vang a dik mi thu bek son hang misil hima hi. Itahum titale, kei cu a dik a man son thei ing hi. Mi pakhat in kei mah a muh tuk le ka thuthang zak tuk sang kei mah ngaisung leita tuk ngawl in kei man son ngawl in um ing.
\v 7 Ka co mi thuphuan a sunglawi hang pualthau ngal tuk ngawl in, kei mah dantat nak pia tu Satan nungzui tih mi ka pumpi ah a sun tu ling pia hi.
\v 8 Mahmi haksat nak pen luat tuk in veithum kim tian Topa Pathian nelah thunget nak tuah hehpih kun ing.
\v 9 “Ka hehpih nak cu na ca in tawk zo. Ka huham cu thanau nak sungah dim tuk hi” tin, thupia hi. Mah hang Khrih huham cu ka hum ah um tuk in, ka pumpi taksa ah thanem nak cu lungdam nak thinlung tuah ultun nak nei tuk in deihnak tampi nei ing.
\v 10 Mah a hih hang, Khrih hang thuak mi thanem nak, sonsiat nak, bawlsiat nak, haksat cimnak, lungkham nak te kei man deih ing. Itahum titale, thanem in ka um ten huham a dim tuah um ing.
\s Nungzui tu pakhat hihnak
\p
\v 11 Kei mah cu ultun nak a nei thei tu misil pa ing maw? Mah tihbang a hitale, nohten kei mah cu neh siah zo uh ci. Itahum titale, nohtei thangphat nak co taak ing. Kei cu imah sontham ngawl ka hi ta vang, nungzui tu a ngengbel te sang neu saw awndiak mang hi.
\v 12 A thungai in nungzui ka hihnak i tepteh nak te na hempoh thuak nak hang, nohtei lakah bawl mi na lamdang te, thasiah huai te le a lamdang huham te nohtei lakah lang zet in lak zo ing.
\v 13 Kei cu nohte noksak nak pakhat no hei koih tuk ngawl bek sial ngawl, nohtei lakah a dang kohhran te sang, itihbang niamta saw in pakhat neih tik mi um maw? Mah tihbang in sual ka bawl mi sualnak cu ngaidam ta un.
\p
\v 14 A veithum nak nohtei lakah hawh tuk in kei cu a mansa in um ing. Nang muhte noksak tuk in ngaihsut mi nei mang hi. Nohtei neihnak cu zei mang hi. Nang muhte saw bek zei ing. Canu le capa ten nu le pa tei ca neih nak zeih sak ma hi. Nu le pa ten canu capa tei ca tuk zei saw hi.
\v 15 Kei cu nang muhte itnak thinlung pungzai tuk in, nohten kei mah itnak thinlung a kiam ta vang, nohtei thinlung hawvang nemcuam tuk in kei cu ka neih nak hei hihen, mah le mah hei hihen, ka neih nak a bo tik tukin phalnak nasezet um hi.
\v 16 Kei cu nohtei ca noksak nak vanngit pia ngawl ta vang, cihthiam dupdelh nak tuah nohtei lakpen co le ngah hitin na ti uh tale,
\v 17 Nohtei lakah mi hing pakhat hawh tik in, nohtei neihnak cu dupdelh zolnak tuah ka lak mi maw?
\v 18 Titu cu nohtei lakah hawh tuk thu hehpih kun in a mah tuah a dang a nau pakhat hah ing hi. Titu in nohtei neihnak cu dupdelh zolnak tuah nohtei thil lak sak maw? Kohten lungkim nak tuah nunnak neih mi hima maw? Lamzin pakhat bek a zui mite hima ung maw?
\p
\v 19 Veikhat cu kohten nohtei lakah ngaihdam ngen tuk tin ngaihsut nak nei uh cim maw? Khrih cu zo in Pathian mai ah kohten hilh ung. Ka ih mi ngualcam te aw, kohtei bawl mi hempoh nohtei phatnak tukin bawl ung hi.
\v 20 Nohtei lakah ka hen ten ka deih mipa hi ngawl in, kei man nohtei deih ngawlnak in ka um khak tuk ngawl tih hei in hihen, nohtei lakah hauhdun nak, iksik nak, thinuuk nak, eldun nak, mi zawt dem nak, mi sonsiat nak, pualthau ngalnak le buainak te um kha tuk vang lau zet ing.
\v 21 Ka hen leh ten Pathian in nohtei mai ah a bosa hun laih sualnak hang a nawngkai zet ngamtat nak, a dik ngawl mi nu le pa sualnak, huknak, a tu tian sualsik ngawl mitei hang thasia khuangaih nak tuah nohtei mai pen Pathian in kei mah thasia thinkham tuk vang lau ing.
\s Dawltabel sosuah ngallin piak nak
\c 13
\p
\v 1 A veithum nak nohtei lakah hawh tuk ka hih hang, theihpih tu tetti panih pathum tei son tul mi awnkam hempoh kho tuk hi.
\v 2 Veikhat ka hen leh ten nohte hehpih tuk mang hi tin sual a bawl tute le a tang laih mi hempoh tei lakah a hum pen hilhnak ka neih mi bek sial ngawl, a tu hei in nang muhte tuah um langkhat ma toh naven, veikhat ka neih leh awng mi bang hilh ham ing.
\v 3 Nohtei lakah thanem nak um ma hi, thazang ngilnak a nei tu Khrih cu ka nelah thuphuan nak a lak mi theihpih nak tetti cu nohten na zeih uh hang ka hen ten hehpih tuk mang hi.
\v 4 Itahum titale, Khrih cu thanem nak tuah thinglamteh humah thahnak a thuak hei in, Pathian huham thawmngeng nak tuah nung hi. Kohten Khrih bang bok in thanem ta vang, nohtei lakah laknak neih mi Pathian huham thawmngeng nak tuah Khrih hang nung hi.
\v 5 Nohten upnak sungah na um le um ngawl cu nangmah le nangmah cekcop in. Nangmuh le nangmuh culcop un. Nohtei sungah Zisuh Khrih umnak thu nohten nangmuh le nangmuh in thei ma uh cim maw? Nohten cul in ceknak sungah U pat taak mi nuncan ziaza nei ma zo cim maw?
\v 6 Kohten cek nak a thuak thei mite hihnak cu nohten thei tuk uh ci tin muansan nak um hi.
\v 7 Kohten a cek nak thuak theih mi cu ciangzet lang tuk in deih mang hi. A cek nak thuak thei ngawl mi bang ngaisung hei in, nohten phazet no nuncak nak nei tukin, a pha ngawl mi nuncan ziaza pakhat no hei bawl tuk ngawl in Pathian nelah thungen ing.
\v 8 Kohten thudik thu kham tukin tih theih nak i mah nei ma ung hi.
\v 9 Thudik thu lam ah a um tu bek in ti thei hi. Kohten thanem nak hang, nohten thazang ngilnak na neih uh ten kohten lungdam ung. Nohtei cangkim nak neih tuk mi thu bek deih ung.
\v 10 Mah hang siatsuah nuamnak hi ngawl in, bawl phat tuk in Topa Pathian in ka nelah apnak a piak mi huham a um mi bang ka hen ten nasazet dantat nuam ngawl hang, a tu hei in nohte tuah kang zet um laih in hi thu te ngan ing.
\p
\v 11 A tang laih mi thu cu U le nau te aw, nohtei lakah thupha mui cu um ta hen. Cangkim nak le lungdam nak um ta hen. Thinlung khat no um in pakhat le pakhat lemdun nak tuah na um ta un. Mah a hih hang itnak hei hihen, lemnak le daihnak hei hihen, a pia tu Pathian cu nohte umpih le leng ta hen.
\v 12 Pakhat le pakhat a thiangtho mi thutnak tuah otpih dun ta un.
\p
\v 13 Mi thiangtho hempoh ten nang muhte otpih haw tuk hi.
\v 14 Topa Zisuh hehpih nak hihen, Pathian itnak le Hawvang thiangtho pawlkom nak cu nohtei veng hawng hum ah um ta hen. Amen.