cnw_reg/39-MAL.usfm

\id MAL
\ide UTF-8
\rem The text in this file was extracted from C:/DCS/Chin, Ngawn/WORD/39. MALACHI. docx.
\mt Malakhi
\h Malakhi
\mt Malakhi
\toc1 Malakhi
\toc2 Malakhi
\toc3 mal
\c 1
\p
\v 1 Pathian in Malakhi khut sung Isarel miphun nelah a piak mi thuphuan awnkam tih mi cu,
\s Jakop cu deih in Esau a huatnak
\v 2 Pathian thupiak mi awnkam cu nang muhte keiman it ing. Kei muhte a kua it hum hitin nohten na dong uh tale Esau cu Jakop U hima maw? Mah naven Jakop cu it ing.
\v 3 Esau cu keiman hua ing hitin a ma umnak mual te munlawn in cang tik zo ing. A lo co nak mun lei ngam cu cingne tei lakah ap zo hitin, Pathian in thupia hi.
\v 4 Edom miphun ten ohte sia ta vang a sia mi umnak mun cu sa leh tuk hitin a tih ten, vancung ngalkap Topa Pathian thupiak mi cu a mun sa naven keiman subal tung. A muhte cu a sual mi ngam miphun, a cat ngawlin a thinuuk a suak mi miphun tin sam haw tuk hi.
\v 5 Mahmi thu cu nangmun na muh ten, Pathian in Isarel ngam a pawlam pen minthan nak um hitin, son haw tuk hi.
\s Sonbang a um mi biakpiak nak te
\p
\v 6 Capa in a pa cu Upat thei hi. Sila in a Topa lau thei hi. Kei cu pa ngai hitin a ti tale keimah a kon U pat hum tin vancung ngalkap Topa Pathian min imah sumsial ngawl a um tu thiampi te dong hi. Kohten a min itihbang sum sial ngawl in um hum tin nohten na dot uh ten,
\v 7 A thiangtho ngawl mi an cu ka biakpiak nak taitan hum ah keng haw hima maw? Kohten nangmah itin zawt demnak nei hum tin a dot ten, Pathian cabuai cu pha ma hitin a son hang keimah cu zawt dem haw zo.
\v 8 A mitcaw mi nganhing te biakpiak nak ah a pia tale sual um hima maw? Ke bai mi nganhing le a dam ngawl mi nganhing pia tale sual um hima ma maw? Khuapi uktu bawi cu pia in. Kumpi thinlung tawk a ni maw? Na mitmai zo tuk hima maw tin, vancung ngalkap Topa Pathian in thupia hi.
\v 9 A tun Pathian in kei muhte pan tuk in hihen, Pathian mai pen thungen haw hen. Nang muhtei co hang, hih tihbang bawl thei haw hi. Nang muhtei mitmai zo tuk maw tin vancung ngalkap Topa Pathian in thupia hi.
\v 10 Noh tei sung pen a kon ka kongka pi te khak sak tuk hum? Nohten ka biakpiak nak hum pen a thawnthong in meilam pah sun. Nang muhte keiman deih mang hi, nohtei bawl mi biakpiak nak cu keiman sang mang hitin, vancung ngalkap Topa Pathian in thupia hi.
\v 11 Nisuah nak mun pen nitum nak tian ngam dang miphun sung pen ka min cu a thawmngeng in um tuk hi. Mun hempoh ah ngimnam tui cu ka min tuah meihal in a thiangtho mi biakpiak nak pia haw tuk hi. Ka min cu ngam dang miphun sung pen a thawmngeng tuk hitin, vancung ngalkap Topa Pathian in thupia hi.
\v 12 Nohten, Pathian cabuai cu bal hi. A koih mi an eihtuk biakpiak nak pha ma hitin, a tih hang an eihnak cabuai cu zawt dem zo hi.
\v 13 Mah cengten nohten na deh cawl em hitin son in mawhsiat nak aw bawl thei haw tin, vancung ngalkap Topa Pathian in thupia hi. Cuh dun in lonsak mi nganhing, a ke bai mi nganhing, a dam ngawl mi nganhing keng haw zo. Mah tihbang mi biakpiak nak keng haw zo hi. Nang muhtei khut sung pen keiman co tung hitin, Pathian in dong hi.
\v 14 Thukam nak a koih cengten a tuu hon sung pen a cang um leng napi zol in, Pathian cu a son bang mi nganhing biakpiak nak a nei tupa cu thupha um ma hi. Kei cu a thawmngeng kumpi ing. Ka min cu miphun hempoh sung pen a lauhuai in cang tuk hitin, van cung ngalkap Topa Pathian in thupia hi.
\s Thiampi tei lakah thuhilh nak
\c 2
\p
\v 1 Thiampi te aw, vancung ngalkap Topa Pathian in nohtei lakah thukham a piak mi awnkam cu,
\v 2 Ka min thangphat nuam tuk in nohten ngai ma, thinlung sungah khum ngawl in um tale, tamsiat haksat nak cu nang muhtei humah keiman hah tung. Nohtei thupha cu thusia in cang tik tung. Mah bek sial ngawl thinlung sungah khum ngawl in a um hang, a tu in thupha ngawl in cang zo.
\v 3 Nang muhtei anci cu keiman siatsuah tung. Ngamsa ek tih mi nang muhtei a thiangtho mi ngamsa ek cu nang muhtei mit mai hum ah keiman vawh tung. Midang ten nang muhte ngamsa ek tuah keng haw tuk.
\v 4 Ka thukhaam cu Levi miphun sungah kho tik tukin, hi thukham awnkam cu nang muhtei lakah ka piak mi thu nohten thei tuk uh ci tin, vancung ngalkap Topa Pathian in thupia hi.
\v 5 Ka bawl mi nunnak dan thukhaam, daihnak thukhaam cu mahmi miphun sungah um hi. Keimah lau in ka min mai pen a launak hang keiman bawl in pia ing.
\v 6 Mahmi miphun cu muantaak awnkam thudik son thei haw hi. A kam pen sual cu zei in mu ma hi. Daihnak thu, dikcang nak thu bang keimah tuah hawh ngel in mihing tampi a muhte sual bawl nak pen pial tik thei hi.
\v 7 Thiampi muk kam cu cihnak tuah cingkem tuk hi. A muk kam pen mihing tampi ten thudik zei haw hi. Itahum titale, a mah cu vancung ngalkap Topa Pathian hah mi thuthang puak tu kam tai pa hi.
\v 8 Nohten lamzin pial zo uh ci. Mihing tampi khengkha lum bah tik tuk in bawl zo uh ci. Levi miphun tei bawl mi thukhaam cu siatsuah zo hitin, vancung ngalkap Topa Pathian in thupia hi.
\v 9 Mah hang nohten ka lamzin ah zui ngawl in thudik sung pen mihing mitmai zo in, mi hempoh ten nang muhte imah sumsial ngawl in zawt dem tukin keiman thukhen tung.
\s Muantak nak a nei ngawl mi Judah miphun
\p
\v 10 Na hempoh eimuhtei sungah pakhat pa bek um hima maw? Pathian pakhat bek in eimuhte bawl hima maw? Pu le pa te tuah a bawl mi dan thukhaam zawt dem in, kohten ita pakhat nung pakhat in thukam pelh nak nei hum?
\v 11 Judah miphun in thukam siatsuah hi. Isarel ngam miphun, Jerusalem khua miten a nawngkai mi sual bawl haw hi. Judah miphun in Pathian deih a thiangtho mi thu zawt dem in, ngam dang miphun Pathian tei canu tuah huai dun zo.
\v 12 Mah tihbang in a bawl tu saza le a nungzui tute hei hihen, vancung ngalkap Topa Pathian nelah biakpiak nak a keng tupa hei hihen, Jakop deubuk pen siatsuah tuk hi.
\v 13 Mah cengten nang muhtei bawl mi thu cu Pathian biakpiak taitan mit hitui cak nak, kahnak tuah dim zo. Mah hang biakpiak mite sialsiah nak um ma hi. Nang muhtei khut sung pen a deihnak thinlung nei ma hi.
\v 14 Itahum tin nohten na dong uh tale na khan no laih huai in mah cengten thukam cingkem ngawl, sual bawl mi nupi a langlam le a langlam pen Pathian cu theihpih tu hi. Mahmi nupi in a pasal, pawlkom bawl mi thukhaam tuah a seng mi nupi hi.
\v 15 Pakhat bek bawl zo hima maw? Mah naven, Topai sungah hawvang a tang mi um hi. Ita pakhat bek bawl hum tih mi cu Pathian tuah a co tak mi miphun cu zei in mah tihcun bawl zo hi. Mah hang na thinlung kelen ta un. Khan no laih in huai mi nupi cu thukam siatsuah in sual bawl pah sun.
\v 16 Nupi zamsan nak thu, a pasal nelah bawl sual mi a khuh nak thu cu keiman hua ing hitin, Isarel miphun Pathian vancung ngalkap Topa Pathian in thupia hi. Mah hang na thinlung kem un. Thukam siatsuah pah sun.
\s Thukhen nak ni
\p
\v 17 Nohten Pathian beng ciat tuk tian in kam tam uh ci. A beng ciat tuk tian itihbang bawl kha uh cim tin a dot ten, sual a bawl tu hempoh Pathian mai pen pha hi. Mah tihbang mite cu deih hi tih hei in hihen, thukhen tu Pathian cu i lai ah um hum tih hei in hihen, son thei haw hi.
\c 3
\p
\v 1 Zo in. Ka hawh nak lamzin bawl mi ka thupuak tu kamtai hah tung. A muhtei zeih mi Topa, nang muhtei deih mi thukhaam thupuak tu kamtai a biakinn ah hung cih haw tuk hi. Zo in. Mahmi Topa cu hung tuk hitin, vancung ngalkap Topa Pathian in thupia hi.
\p
\v 2 A hun mi ni cu a kon pial in um tuk hum? A hen ten a kon thuak tuk hum? Mahmi Topa cu ngun cek nak mei, saphio bang cang tuk hi.
\v 3 Ngun sal ek nawt in a thiangtho mipa bang khung in sui le ngun sal ek nawt bang in hihen, Levi miphun te nawt in a thiangtho hang, a mun Pathian ca a hih hang dikcang nak pia haw tuk hi.
\v 4 Judah miphun Jerusalem khua mitei biakpiak nak cu a bosa huncan laih in kum, ha, ni sungah a cang mi bang Pathian deihnak in cang tuk hi.
\v 5 Nang muhte thukhen tuk in nek tung. Dawi thiamnak a nei mipa, nu le pa sual a bawl tupa, a man ngawl mi tamsiat nak a bawl tupa, tha cial man pia ngawl in bawl siat tu, nu le pa nei ngawl naupang te le meivong a bawl siat tu, mikhual cu phat ngawlnak tuah thukhen tu, keimah launak a nei ngawl tutei a langlam pen kei cu a man lang theihpih nak cang tung hitin, vancung ngalkap Topa Pathian in thupia hi.
\s Pathian neih a lak saknak
\v 6 Kei cu Pathian ing. Theknak nei mang hi. Mah hang, Jakop miphun te aw, nohten siatnak ah heng tuk ma uh ci.
\p
\v 7 Pu le pa tei khut sung pen pan nohten ka bawl mi dan thukham te cingkem ngawl pial khawng zo uh ci. Ka nelah pin leh un. Keimah vang nang muhtei lakah hung tung hitin, vancung ngalkap Topa Pathian in thupia hi. Kohten itihbang pin tuk hum tin nohten dong zo uh ci.
\v 8 Mihing in Pathian neihnak cu long zo hima maw. Mah naven nohten ka neihnak laksak zo uh ci. Kohten itihbang laksak hum tin nohten na dong tale sehsawm ah sehkhat hei hihen, biakpiak nak te hei hihen, laksak zo uh ci.
\v 9 Nohte tamsiat nak thusia co zo uh ci. Itahum titale, ngam sung miphun hempoh ten ka neihnak laksak haw zo.
\v 10 Sehsawm ah sehkhat hempoh van koihnak innpi sungah koih in, ka inn sung pen an eih tuk um tik tuk bawl un. Keiman vanhum tukvelh kongka te hong in, muicu thupha hempoh buak tuk le buak tuk ngawl cu mah tihbang in cul ta un hitin, vancung ngalkap Topa Pathian in thupia hi.
\v 11 A pet thei mi ngamsa cu nohtei ca keiman thu hilh in, nang muhtei lei ngam pen a suak mi ankung a ngah siatsuah tuk ma hi. Nang muhtei cabit huan a ngah ngah ngawl in um tuk ma hitin, vancung ngalkap Topa Pathian in thupia hi.
\v 12 Miphun hempoh ten nang muhte thupha co mipa hitin, sam haw tuk hi. Nang muhtei ngam vang a deih awh mi ngam in cang tuk hitin, vancung ngalkap Topa Pathian in thupia hi.
\p
\v 13 Nohten ka langlam pen ngalhan nak tuah phuang zo hitin, Pathian in thupia hi. Mah naven, kei cu na langlam pen itihbang bawl kha hum tin nohten dong zo uh ci.
\v 14 Pathian na dek ta vang nemcuam nak um ma hi. A bawl mi dan thukham cingkem in vancung ngalkap Topa Pathian mai pen thasia zet a nunnak hang i nemcuam nak um hum?
\v 15 Pualthau mi ngal ten thupha co pa hitin, kohten sam ung. A thungai in sual a bawl tu hempoh te pitung thei haw hi. A thungai in Pathian cul haw naven nunpat nak ah heng hitin, a mun son haw.
\p
\v 16 Mah ten Pathian a lau tu miten pakhat nung pakhat otpih in son haw hi. Pathian in thei in ngai hi. Pathian lau in a min a phawk tu hempoh ca a mai pen cazin sungah sialsiah nak um hi.
\v 17 A muhte ka bawl mi ni ten ka co taak mi neihnak in cang haw tuk hi. A pai na dek tu capa cu a pan a sahelh bang a muhte cu keiman sahelh ing hitin, vancung ngalkap Topa Pathian in thupia hi.
\v 18 Mah cengten nohte cu thin thek in midik cang pa, midik cang ngawl pa, Pathian na dek tupa, na dek ngawl tute cu khen in thei tuk uh ci.
\s Pathian ni
\c 4
\p
\v 1 Meikam sung pen meikang bang a kang mi ni huncan heng tuk hi. Pualthau mi ngal pa le sual a bawl tu hempoh buak ko in cang tuk hi. A muhte a bul a lek tang tik tuk ngawl in mahmi ni cu kang tuk hitin, vancung ngalkap Topa Pathian in thupia hi.
\v 2 Ka min a lau tu nohtei sung pen a dik mi Ni in dam tik tu mual te tuah heng tuk hi. Nohte cu hawh tulin khui an kuang sung pen khui no bang dawk tuk uh ci.
\v 3 Mipha ngawl te vang cil pek tuk uh ci. Mah tihcun ka thukhen mi ni ten, a mun a muhtei ke phalh nuai ah leivul bang cang haw tuk hitin, vancung ngalkap Topa Pathian in thupia hi.
\p
\v 4 Isarel miphun hempoh ca Horeb umnak mun pen, ka thucah mi ka sila Mosi dan thu tih mi dan thukham te phawk un.
\v 5 Zo in. Pathian a lauhuai mi ni pi a hen laih ngawl in kamsang Elijah cu nang muhtei umnak mun ah keiman hah tung.
\v 6 Keimah hung in nohtei ngam tamsiat haksat nak tuah dan tat tuk in mahmi kamsang capa te le a pa te hei hihen, a pa te le a cate hei hihen lem in um tuk hitin, thupia hi.