cnw_reg/32-JON.usfm

\id JON
\ide UTF-8
\rem The text in this file was extracted from C:/DCS/Chin, Ngawn/WORD/32. JONAH. docx.
\mt Jonah
\h Jonah
\mt Jonah
\toc1 Jonah
\toc2 Jonah
\toc3 jon
\s Pathian nel pen Jonah a tainak
\c 1
\p
\v 1 Amit-tai capa Jonah nelah a heng mi Pathian awnkam thu,
\v 2 Nang cu tho Ninaveh khuapi ah hawh in thupnak awnkam tuah au in. Mah khuapi tei bawl mi sual cu ka mai ah heng hitin, thupia hi.
\v 3 Mah naven, Jonah in Pathian nel pen Tashish khuapi ah tai tuk ngaihsut nak tuah tho in, Joppa khuapi ah hawh in a hen ten, Tashish khuapi ah a hawh mi tembaw tawk in tembaw man a piak cengten, Pathian nel pen tembaw na dek tute tuah Tashish khuapi ah zui tuk in tembaw khung hi.
\p
\v 4 Pathian in nasezet huihpi cu tuipi hum ah a hah ten, sia tuk in um hi.
\v 5 Mah ten tembaw na dek tuten lau in a muhtei Pathian tek au haw hi. Tembaw van zang tuk van te tuipi sungah vawk haw. Jonah cu tembaw a nuai lam ah tolh suk in hihbu hi.
\p
\v 6 Tembaw saza pa heng in hihbu li pa aw, a kua kam? Tho in. Na Pathian nelah thungen in. Ohtei nunnak luat thei tuk in mahmi Pathian cu eimuhte phawk hei phawk kha tuk hitin, ti hi.
\p
\v 7 Mah cengten a mun, hung un. A koi sualnak hang hi thu heng hum tih mi ohten thei tuk in, kungkhai nak bawl tuk hung hitin thusiam khawm in kungkhai nak a bawl ten, Jonah hum ah cak hi.
\p
\v 8 Mah cengten a mun, i sualnak hang hi thu heng hum? I na dek cim? A lai pen heng cim? A lai ngam, a lai miphun kam tin a dot haw ten,
\v 9 Kei cu Hebru miphun ing. Lei le van a bawl tu vanhum Topa Pathian a bia tupa ing hitin a tih ten,
\v 10 A mun lauzet in nangman ita hitin bawl thei cim tin, dong haw hi. Jonah cu Pathian nelpen a tainak thu a hilh ten a mun thei haw hi.
\p
\v 11 Mah ten tuipi pen huihpi theu cu nase dedeuh a um ten, a mun ohtei sung pen huihpi theu tuipi lumlet dai tuk in nangmah cu itin bawl tuk hum tin a dot haw ten,
\v 12 Keimah cu thiak in tuipi sungah vawk un. Mah tihcun bawl tale tuipi lumlet in huih theu cu nohtei sungpen dai tuk hi. Hi a nasezet mi huihpi theu cu keima hang, nang muhtei hum ah heng hi ti cu keiman thei ing hitin a don leh ten,
\v 13 Tembaw nadek tuten tuipi mawk lam ah heng tuk in cim zet cok haw hi. Mah naven a muhtei a langlam pen tuipi lumlet cu nase dedeuh a tho in a mun a tih theih ngawl ten,
\v 14 Pathian aw, kohten hehpih kun ung. Hi mipai nunnak hang kei muhte phat ngawl nak cang tik pah sin. Sual nak a nei ngawl pa thah mi sual cu kei muhtei hum ah koih pah sin. Pathian aw, na deihnak bang bawl in hitin, Pathian nelah au in hehpih a kut cengten,
\v 15 Jonah cu thiak in tuipi sungah vawk haw. Mah ten tuipi lumlet cu dai hi.
\v 16 Tembaw na dek tuten Pathian a lau zet hang, biakpiak nak tuah thukam bawl haw hi.
\p
\v 17 Jonah cu thon tik tuk in ngapi cu Pathian in a piak zo bang, Jonah cu ngasa pum sungah nithum sung um hi.
\s Jonah thunget nak
\c 2
\p
\v 1 Ngasa pumpi sungah a um laih tak Jonah in a Topa Pathian a thunget mi awnkam thu cu,
\v 2 Kei cu haksat cimnak ka thuak hang Pathian sam in ka awnkam thu za hi. Thihnak ngam pumpi sung pen sam nak aw ngai hi.
\q
\v 3 Topan keimah cu a thuk mi umnak mun tuipi thuanthum a laizang ah vawk in, tuipi in kiim in tuipi lumlet hempoh ten khuh hi.
\q
\v 4 Mah tihcun a mai pen hawlvawk thuak naven a thiangtho mi biakinn cu a cat ngawl bawl tung hitin, phawk in um ing.
\q
\v 5 Tui pi ten keimah thi tik tuk a kip hang, kei cu tuipi a laizang ah kol tang ing. Tuipi hampa kung ten ka lu cu tuam in um hi.
\q
\v 6 Mual bul ngun tuipi ah keimah hawh in lei pi kongka kalhnak a sung pen a cat ngawl in khah sak naven, ka Topa Pathian nangman ka nunnak cu siatnak pen pan tuk ci.
\q
\v 7 Ka thinkham ten Pathian phawk in, ka thunget cu a thiangtho mi biakinn sung pen na nelah lut tum hi.
\q
\v 8 Zol thu imah thupi nak a um ngawl mite a muhtei hehpih nak a co mi thu cu vawk haw.
\q
\v 9 Kei cu lungdam thangphat nak awnkam tuah nangmah biakpiak nak pia tung. Na thukam bang bawl tung. Pathian hehpih nak hang nunpat nak co ing hitin, thungen hi.
\p
\v 10 Mah ten ngapi cu Pathian thupiak nak ngai in Jonah cu mual hum ah lua hi.
\s Ninaveh khuapi ah Jonah a hawhnak
\c 3
\p
\v 1 Mah cengten Pathian awnkam Jonah nelah a heng mi,
\v 2 Nang cu tho in, Ninaveh khuapi ah hawh in. Ka cah mi thu bang au in hitin, thupia hi.
\v 3 Mah ten Pathian thupiak mi bang Jonah cu tho in Ninaveh khuapi ah hawh hi. Ninaveh khuapi cu a ngeng zet mi khuapi, nithum sung khualzin in a zal mi khuapi hi.
\v 4 Jonah cu khuapi sungah lut tum nikhat khualzin hawh in ni sawmli a bo ten, Ninaveh khuapi cu siatnak ah heng tuk hitin, au hi.
\v 5 Ninaveh khua miten Pathian thupiak mi cu sang in Upa, naupang hempoh ten ancan nak huncan thuthan in thangkhau puan silh haw.
\v 6 Ninaveh kumpi in mah thuthang a zaak ten, kumpi inn pen tolh in kumpi vanthuam te a duk cengten, thangkhau puan silh in vut sungah khung hi.
\v 7 Mihing, nunnak a nei mi nganhing, tuu le khui te ham tik hi him pah sin. An ei ngawl in tui in tik pah sin.
\v 8 Mihing nunnak a nei mi nganhing te thangkhau puan silh tik un. Zuamnak tuah Pathian nelah thungen un. Nang muhtei zui mi sualnak lamzin tek pen na bawl uh mi sualnak pial un.
\v 9 Kohten siatnak pen luat tuk Pathian in a lung thek in a sihnak hang, a thinuuk nak dai tik tuk le dai tik tuk ngawl cu a kon son thei hum hitin kumpi thuneih nak, bawi Upa thuneih nak tuah Ninaveh khuapi hempoh sungah thuthang hilh in, thuthan tik hi.
\p
\v 10 Khua sung miten na zui uh mi sualnak tek pial in, nuncan ziaza te Pathian in a mu tale a masa a thup mi haksat dan tatnak cu pia ngawl in um tuk hi.
\s Pathian hehpih nak cu Jonah a thinuuk nak
\c 4
\p
\v 1 Jonah cu a thinkham zet a thinuuk hang Pathian aw, keiman hehpih kun ing. Kei man ngam sungah ka um laih hi tihbang in hilh zo hima maw? Mah hang, na nel pen Tarshish khuapi ah zuamnak tuah tai ing.
\v 2 Nang cu lainat nei tu Pathian na hih hang thinsau nak lungmu, ningnat nak lungmu, sual dan tat tuk mi thu cu sihnak lungmu nei thei mi hih nak thu keiman thei ing.
\v 3 Mah hang Pathian aw, ka nunnak la in. Ka nun sang thihnak cu pha saw hitin, ngen hi.
\v 4 Pathian in na thinuuk cu a pha mi maw tin dong hi.
\v 5 Jonah in khuapi sung pen itihbang cang tuk hum tih cu thei tuk in khuapi a pawlam ah tul in khuapi nisuah nak lam pen deu buk a bawl cengten, a hum khuh a lim ah khung in um hi.
\p
\v 6 Topa Pathian in uum kung a bawl cengten, Jonah thinlung dai tik tuk in a luhum ah khuh in uap tik hi. Mahmi thingkung hang, Jonah cu a lungdam zet hi.
\v 7 A zing khuavak ten Pathian piak mi lung in uum kung cu pet in thim tik hi.
\v 8 Ni a suak ten Pathian in a sa zet mi nisuah nak huih cu a bawl hang, Jonah lu cu ni sa leita a thacawl in thihnuam nak lung mu nei in ka thihnak tuk cu nunnak sang pha saw hitin, kap hi.
\v 9 Pathian in, nang cu uum kung hang thinuuk suak tuk cu a pha mi maw tin a dot ten, Jonah in keiman thi tuk tian thinuuk nak cu pha hitin, ti ing.
\v 10 Pathian in nangman cim zet na dek ma, khang to tuk in tuamlawm ma, zan khat sung po in zan khat sung a thi mi uumkung cu sahelh hima cim maw?
\v 11 Keiman a tampi mi nganhing te son mang, ka taklam khut le veilam khut hei khen in theihnak a nei ngawl mi tingkhat le hawngkul (120,000) bek sial ngawl, mihing a tampi mi Ninaveh khuapi cu keiman sahelh tuk a kul mi hima maw tin, thupia hi.