cnw_reg/30-AMO.usfm

\id AMO
\ide UTF-8
\rem The text in this file was extracted from C:/DCS/Chin, Ngawn/WORD/30. AMOS. docx.
\mt Amos
\h Amos
\mt Amos
\toc1 Amos
\toc2 Amos
\toc3 amo
\c 1
\p
\v 1 Judah kumpi Uzziah, Isarel kumpi Joash capa Jeroboam kumpi khut sung leipi hinhing laih ngawl in kumnih val tuukhal tu hihnak sungah a tum tu Tekoa khua mi Amos in, Isarel ngam ca a muhnak thu awnkam tuah seng mi cu, Isarel miphun tei inn nel te thukhen nak
\v 2 Pathian in Zion mual pen au in Jerusalem khuapi pen aw a kuat hang, tuukhal tutei umnak cu vuai in Calrmel mual lek thim tuk hi.
\p
\v 3 Pathian thupiak mi Damascus khuapi Gilead ngam cu canglial nak cet tuah a lial mi sualnak pathum sial ngawl, sualnak pali hang keiman dantat ngawl in um mang hi.
\q
\v 4 Ha’za-el kumpi miphun tei hum ah mei hah in Benhadad kumpi biakinn te kang tik tung.
\q
\v 5 Damascus kongka kalh nak te ektuah tung. A’ven munlawn mite hei hihen, Betheden khuapi sung pen kumpi a bawl tute hei hihen that tung. Syria miphun ten Kir khuapi ah mat nak co haw tuk hitin, Pathian thupia hi.
\p
\v 6 Pathian thupiak leh mi cu Gaza khuapi kol ah a tang mi hempoh Edom kumpi nelah ap tukin mat a co mi sualnak pathum bek sial ngawl, sualnak pali hang keiman sual dan tat ngawl in um mang.
\q
\v 7 Gaza khuapi khantian hum ah mei hah in biakinn te kang tik tung.
\q
\v 8 Ashdod khua mite hei hihen, Askelon khuapi pen kumpi a bawl tute hei hihen that tung. Ekron khuapi do in a tang mi Philistine miphun te sia tuk hitin, Topa Pathian thupia hi.
\p
\v 9 Pathian thupiak leh mi Tyre khua U le nau pih tei bawl mi pawlkom nak cu cingkem ngawl in, kol tang mi hempoh te Edom kumpi nelah ap mi sualnak pathum sialngawl, sualnak pali hang keiman dan tat ngawl in um mang.
\q
\v 10 Tyre khuapi khantian nak hum ah mei hah in biakinn cu kang tik tung.
\p
\v 11 Pathian thupiak leh mi Edom ngam lainat nak thinlung sup in U le nau cu nam tuah hil in sualnak, thinuuk nak tuah a cat ngawl palcat in a huat le leng mi sualnak pathum sial ngawl, sualnak pali hang keiman dan tat ngawl in um mang.
\q
\v 12 Teman khuapi hum ah mei hah in Bozrah khuapi tei biakinn te kang tik tung.
\p
\v 13 Pathian thupiak leh mi Ammon ngam miphun te a muhtei umnak zal tik tuk in, naupai mi Gilead miphun numei tei von at in a sualnak pathum sial ngawl, sualnak pali hang keiman dan tat ngawl in um mang.
\q
\v 14 Rabbah khuapi khantian mei hal in biakinn te kang tik tung. Ngaldo ni ten aunak, huihpi theu a hen ni ten tai vawk tuk hi.
\q
\v 15 A muhtei kumpi penpan bawi U pa hempoh mat co haw tuk hitin, Pathian in thupia hi.
\c 2
\p
\v 1 Pathian thupiak leh mi Moab ngam cu Edom kumpi tei nguh te thun cang tik tuk in mei tuah hal mi sualnak pathum bek sial ngawl, sualnak pali hang keiman dan tat ngawl in um mang.
\q
\v 2 Moab ngam hum ah mei hah in Kerioth khuapi tei biakinn te kang tik tung. Nasezet awnthawm nging bawl nak, aunak, lemle tum nak tuah Moab ngam sung tuk hi.
\q
\v 3 Moab ngam a laizang pen thukhen tu cu keiman that in, a mah le bawi Upa hempoh that tung hitin, Pathian in thupia hi.
\p
\v 4 Pathian thupiak leh mi cu Judah miphun in Pathian thukhen nak te cingkem ngawl in, dan thukham te vawk in pu le pa tei zui awng mi sualnak hang, a sual mi sualnak pathum sial ngawl sualnak pali cu keiman dan tat ngawl in um mang.
\q
\v 5 Judah ngam hum ah mei hah in Jerusalem khuapi tei biakinn te kang tik tung.
\s Isarel thukhen nak
\p
\v 6 Pathian thupiak leh mi Isarel miphun in midik cang pa cu ngun tuah hei hihen, haksa mizawng pa cu kedam pakhat tuah in hihen, a zuak mi sualnak,
\v 7 Mizawng haksa mitei lu cu leivul dim tik tuk in, nasezet deihnak a neih hang niamkhiat nak a nei mipa cu phat ngawlnak thu tuah thukhen mi sualnak, ka min zawt dem tuk a pa le capa in a neih calam numei a phial mi sualnak,
\v 8 A ham mi puan biakpiak nak hempoh taitan bulah phah in zau mi sualnak, cawhkuan nak sum tuah lei mi cabit tui cu a muhtei pathian inn pen in mi sualnak pathum sial ngawl, sualnak pali hang keiman dan tat ngawl in um mang.
\q
\v 9 Cedar thingkung can a sang mi oak thingkung bang a khoh mi Amon miphun cu nang muhtei mai pen keiman vawk sak in a hum pen a ngah hei hihen, a nuai pen a zung hei hihen keiman siatsuah zo ing.
\q
\v 10 Nang muhte Izip ngam pen pui in, Amon miphun ngam ah lut tum tik tuk in kum sawmli sung ngam lak pen pui zo hi.
\q
\v 11 Nohtei capa a hek khat te kamsang hihnak, tangval te Nazir miphun hihnak ah keiman pia zo ing. Isarel miphun te aw, hi awnkam thu a man hima maw tin, Pathian in dong hi.
\q
\v 12 Nohte cu Nazir miphun in tuk cabit tui pia haw zo. Kamsang ten kamsang cu bawl in phuang haw ma hen hitin, kham haw zo.
\q
\v 13 Mah hang, leng cu sualnak a pua thei mi cangtel nepnak a thuak bang, nang muhtei umnak mun cu keiman nempek tung.
\q
\v 14 Taicak mipan a tainak thu co ngah tuk ma hi. Thazang ngilnak a nei tupan a thazang suahman tuk ma hi. A thawmngeng ngalhang pan a mah le mah pan cop thei ma hi.
\q
\v 15 Thal a keng tupan ding tuk ma hi. A man lang mi ke ngalhang pa vang a mah le mah pan thei ma hi. Cipuh khung ngalhang pa vang a mah le mah pan thei ma hi.
\q
\v 16 Ngalhang mipa cu mahmi ni in thacang in tai tuk hitin, Pathian in thupia hi.
\s Isarel miphun tei lakah theihpih a ngetnak
\c 3
\p
\v 1 Isarel miphun te aw, Izip ngam pen ka pui mi miphun hempoh nang muhte camcawh in keimah Pathian thupiak mi awnkam ngai un.
\q
\v 2 Leihum ah a um mi miphun hempoh sung pen nangmuh miphun pakhat bek cu ka co mi a hih hang, nohtei sualnak hempoh keiman thukhen tung.
\q
\v 3 Mihing panih cu lungmu cun ma tale langkhat in khualzin thei maw?
\q
\v 4 Pawpi cu man tuk a um ma tale ngam sung pen hawk tuk maw? Pawpi la cu imah a man ngah ma tale khuk sung pen awsuah nak bawl tuk maw?
\q
\v 5 Leihum ah thang tuah a siah ma tale vano cu awk tuk maw? Siah sa mi thang cu imah a ngah laih ngawl a siah nak mun pen laksak tuk maw?
\q
\v 6 Khuapi sung pen lemle tum tale khuapi miten lau ngawl in um haw tuk maw? Pathian thukhen ngawl in haksat nak pakhat khuapi sungah heng tuk maw?
\q
\v 7 A thungai in Topa Pathian in a sila kamsang te hilh ngawl in thukhen ma hi.
\q
\v 8 Pawpi a hawk ten a kuamah in lau ngawl in um tuk hi. Topa Pathian thupiak ten a kon kamsang bawl ngawl in um tuk hum?
\q
\v 9 Ashdod khuapi biakinnn te le Izip ngam biakinn sung pen thuthang hilh tuk mi thu cu Samaria mualah hulawm in Samaria khuapi pen buainak thu hei hihen, khuapi sung pen bawlsiat nak a thuak tu hempoh zo un.
\q
\v 10 Khuapi miten a dik mi thu bawl thei ma, nehsiah cuh dun in lon mi neihnak cu biakinn sungah khawl thei haw hitin, Pathian in thupia hi.
\p
\v 11 Mah hang Topa Pathian thupiak mi cu ngal ten Samaria ngam a kilh cengten, na thazang ngilnak cu nempek in biakinn te subal in siatsuah haw tuk hi.
\p
\v 12 Pathian thupiak mi cu tuukhal pan pawpi kam sung pen ke panih, mah a hima tale beng a langkhen a laksak bang, Samaria khuapi sung pen ihkhun zaunak ningli, Damascus muihza hum ah a khun mi Isarel miphun te laksak tuk hi.
\p
\v 13 Vancung ngalkap uktu Topa Pathian thupiak mi awnkam cu nohten ngai in Jakop miphun nelah na hilh tuk mi cu,
\v 14 A thungai in Isarel miphun tei sualnak hempoh thukhen mi ni in, Bethel biakpiak nak taitan te keiman cek in, biakpiak nak ki te cu siatsuah in leihum ah cak tuk hi.
\q
\v 15 Phalbi huncan ten um mi kumpi inn le khal huncan ten um mi kumpi inn te ka khenkhak hang, saiho tuah bawl mi inn te siatsuah tuk hi. Biakinn te vang sung haw tuk hitin, Pathian in thupia hi.
\s Pathian nelah Isarel miphun te pin leh haw ma
\c 4
\p
\v 1 Mizawng haksa ningkial mite bawlsiat in a muhtei Topa cu kei muhtei in tuk keng un hitin son thei hi. Samaria mual ah a um mi Bashan khui te aw, hi awnkam thu ngai un.
\q
\v 2 Topa Pathian a thiangtho cu sal in thukam nak a bawl mi bang, nang muhte ngasa siah nak kawizang tuah in hihen, a muhtei tu le canawn te suuk tuah in hihen, a mat nak hun heng tuk hi.
\q
\v 3 Nang muh tek muh mi a awng pen tul in, innpi sungah koih tuk hitin, Pathian in thupia hi.
\q
\v 4 Bethel khuapi ah hawh in sual bawl ta un. Gilgal khuapi ah hawh in tampi sual bawl ta un. Zing sial biakpiak nak bawl mi hei hihen, kum thum veikhat neihnak seh sawm suah seh khat hei hihen, keng un.
\q
\v 5 Cuh dun in lon mi neih nak sung pen lungdam thu hilh biakpiak nak cu meihal un. A ma thu bawl mi biakpiak nak te vang hilh in thuthan un. Isarel miphun te aw, mah tihcun bawl ten nohten lungnop thei uh ci tin, Topa Pathian in thupia hi.
\q
\v 6 Keiman nang mutei khua umnak hempoh ah hawh in thianlim nak hei hihen, nang muhtei umnak hempoh sungah ningkial pamnak a pia ta vang, nohten ka nelah pin leh ma uh ci tin, Pathian in thupia hi.
\q
\v 7 Cangah nak huncan a hen laih ngawl ha thum val nguahzu ngawl in nguah cu keiman kham zo ing. Khuapi pakhat hum ah nguah zu tik tuk in hihen, khuapi pakhat hum ah nguah zu tik tuk ngawl in hihen bawl in lei ngam lo pakhat cu nguahtui dong in, lei ngam lo pakhat cu dong ngah ngawl in ko hi.
\q
\v 8 Mah tihcun a hek khat khuapi pen khuapi mite tui in tuk, khuapi pakhat ah hawh in kham haw ma hi. Mah naven, nohten ka nelah pin leh ma uh ci tin, Pathian in thupia hi.
\q
\v 9 Huih a theu hang thingkung a thihnak, a tui zung in a thihnak, haksat nak tuah keiman dan tat zo ing. Nang muhtei sungah a tamzet mi lo, cabit huan, theipi kung, olive kung te khau ten pet in ei khawng haw hi. Mah naven ka nelah pin leh haw ma hitin, Pathian in thupia hi.
\q
\v 10 Izip ngam thuak mi pulhnat haksat cu nang muhtei umnak mun ah kei man hah zo ing. Tangval te nam tuah in that tik zo. Cipuh te man tik zo. Nang muhtei ngalkap bu sung pen a uih namsia cu nohtei nal sungah tampi tik zo. Mah naven, ka nelah pin leh haw ma hitin, Pathian in thupia hi.
\q
\v 11 Pathian in Sadom khuapi le Kommorah khuapi te a liplet bang a hek khat nang muhte cu keiman liplet in, nang muhte mei sung pen dawh mi thingthu bang cang zo uh ci. Mah naven, ka nelah pin leh haw ma hitin, Pathian in thupia hi.
\q
\v 12 Mah a hih hang Isarel miphun aw, a hum pen bawl mi bang nang muhtei sungah keiman bawl tung. Mah tihcun bawl tuk hang Isarel miphun aw, na Pathian tawk tuk in nangmah le nangmah bawl in.
\q
\v 13 Mual te bawl in huih a bawl tu, mihing thinlung ngaihsut nak cu mihing nelah a lak mi zing khuavak cu khuathim in a cang tik tu a sang mi lei ngam umnak te a pal tupa cu vancung ngalkap Topa Pathian tihmi minphat nak um hi.
\s Isarel miphun ca kahnak
\c 5
\p
\v 1 Isarel miphun aw, a tu in nohtei sungah ka hilh mi kahnak thu ngai ta un.
\q
\v 2 Isarel khanglai him cu bah zo. Mah cengten tho leh thei ma hi. Leihum ah thacang in um hi. A phong tu um ma.
\p
\v 3 Topa Pathian thupiak mi cu Isarel miphun na dek tik tuk in, mihing thawngkhat a pia thei mi khuapi cu mihing zakhat, zakhat a pia thei mi khuapi cu sawmkhat bek pia thei tuk hi.
\s Pathian cu zei in nung in
\p
\v 4 Pathian in Isarel miphun nelah thu a piak mi cu keimah zei un. Na zei uh tale nung tuk uh ci.
\q2
\v 5 Bethel khuapi cu zei pah sun. Gilgal khuapi vang tum pah sun. Beersheba khuapi ah hawh pah sun. Itahum titale, Gilgal khuapi cu mat co bet tuk laih hi.
\q
\v 6 Pathian zei un. Na zei uh tale nunnak co tuk uh ci. Mah a hima tale, Josep miphun in mei bang kai in a kuamah in mit thei ngawl in Isarel miphun cu kang tuk hi.
\q
\v 7 Thukhen nak cu a kha cang tik in dikcang nak thu lei ah a khiak mite aw,
\v 8 Aksi te le aksi salih te a bawl tu thihnak cu zing khuavak cang tik tuk in hihen, ni vak nak cu zan khuathim cangtik tukin a bawl tu, tuipi cu sam in leihum ah a buak tu Pathian tihmi minphat nak a nei tu,
\v 9 Thazang ngilnak a nei mite hei hihen, siatsuah thei tu Pathian cu zei un. Innpi hei hihen, siatsuah thei tu Pathian cu zei un.
\q
\v 10 Kongka pi bul pen thu hilh thei tupa cu hua in dikcang nak tuah a son thei mipa hua haw zo.
\q
\v 11 Nohten mizawng haksa te bawlsiat in sangvut cang na nget theih uh hang, a suih mi suang tuah inn sa ta vang mahmi inn sak nak sungah um tuk ma uh ci. Deihawh mi cabit huan phut ta vang cabit tui in tuk ma uh ci.
\q
\v 12 Nohten sual bawl thuah bet mi palcat nak sual, a nasezet mi sual te cu keiman thei ing. Midik pa cu nosak thei haw hi. Nawhthuh ei thei haw hi. Mizawng haksa mipa cu kongka bul pen phat ngawlnak tuah thukhen thei haw.
\q
\v 13 Mah tihbang mi huncan cu phat ngawlnak huncan a hih hang, cihnak a nei tupa cu daiden no um tuk hi.
\q
\v 14 Nunnak co tuk in sualnak a pialh hang phatnak zei un. Mah tihcun na bawl tale nohtei son theih mi bang, vancung ngalkap Topa Pathian cu nang muhte tuah um tuk hi.
\q
\v 15 Sual cu hua in phatnak deih ta un. Khuapi kongka pen thudik kho tik ta un. Vancung ngalkap Topa Pathian in a tang mi Josep miphun cu hehpih hei in hehpih tuk hi.
\p
\v 16 Vancung ngalkap Topa Pathian thupiak mi cu lamzin hempoh pen kahnak a um hang a hawh tuten, hitin e, hitin e tin son haw tuk hi. Lo bawl tupa cu phuciak tik tuk in hihen, kap thiam pa cu kap tik tuk in hihen sam haw tuk hi.
\q
\v 17 Cabit huan sung hempoh ah vang kahnak um tuk hi. Itahum titale, kei cu nohtei laizang ah hawh tung hitin, Pathian in thupia hi.
\s Pathian ni
\q
\v 18 Pathian ni a deih tute cu thupha um ma hi. I nemcuam nak hang nohten deih uh cim? Pathian ni cu nohtei sungah vak ngawlin, thim tuk hi.
\q
\v 19 Mihing in pawpi umnak mun ah tai in vom a tawh bang in hihen, inn sungah lut tum pang ngaingam laih tak ngulcih nak bang cang tuk hi.
\q
\v 20 Pathian ni cu vak ngawl in thim tuk hi. Vaknak him um tuk ma hi, khuathim bek in cang tuk hi.
\q
\v 21 Nohtei cingkep mi puai ni te keiman hua ing. A nawngkai mi hi. A muhtei puai bawlnak sungah ka deihnak um ma hi.
\q
\v 22 Meihal biakpiak nak le an eih biakpiak nak te ap ta vang keiman sang tuk mang. A thau mi nganhing te pawlkom biakpiak nak a bawl ta vang, keiman imah sumsial mang hi.
\q
\v 23 Nohtei lasak nak aw cu vawk ta un. Tazaw tumnak aw ciat zet zo ing.
\q
\v 24 A dik mi thukhen nak cu tui bang in hihen, dikcang nak cu a cat ngawl in a luang mi ngun tuipi bang luang hen.
\q
\v 25 Isarel miphun aw, nohtei biakpiak nak hempoh te ngam sung pen, kum sawmli sung ka nelah biakpiak nak bawl uh cim maw?
\q
\v 26 Nohtei pathian Moloch deu buk le nohtei pathian Chi-un aksi tihmi a ma ca tuk bawl mi zuk te bawl haw zo hima maw?
\q
\v 27 Mah hang, nang muhte cu Damascus khuapi ngalkhat lam ah matnak co tik tuk in keiman thukhen tung hitin, vancung ngalkap Topa Pathian minphat nak a nei tu Pathian in thupia hi.
\s Daiden no a um tu mite thupha um ma hi
\c 6
\p
\v 1 Zion khuapi pen dai den no a um tu Samaria mual hum lau nak pen luat in a um mipa, miphun hempoh sung pen a sunglawi a sang bel tin sam mipa, Isarel miphun a zei tute cu thupha co haw ma hi.
\q
\v 2 Calneh khuapi ah hawh in zo un. Mahmi khuapi pen Hamath khuapi ah hei hihen, Philistine miphun tei umnak mun Gath khuapi ah hei in hawh haw tuk hi. Mahmi ngam cu hi ngam te sang pha saw a maw? A muhtei ngam ngi khennak te nang muhtei ngam khennak sang zal saw a maw?
\q
\v 3 A sia suak mi ni cu thawn in phat ngawlnak tuah thukhen nak mun tohkham bul ah kho tik tuk in,
\v 4 Saiho ihkhun zaunak hum ah a zapnak, tuu hon sung pen tuu no te hei hihen, khui an kuang sung pen khui no te hei hihen keng in a eih nak,
\v 5 Tazaw tumnak aw cu zuamnak tuah la saknak, tum nging phun kim a thak te David kumpi in zei in a bawl mi bang a bawlnak,
\v 6 Cabit tui cu khuathai tuah a in hang, man a nei mi ngimnam tui sathau tuah noihnak te bawl in Josep miphun haksat a thuak mi, ningnat nak thinlung a nei ngawl mi,
\v 7 A muhte a masa bel a matnak a thuak tute tuah tel haw tuk hi. Zap in a um mitei puai cu tham tuk hi.
\s Isarel ngalnak cu Pathian huatnak
\q
\v 8 Vancung ngalkap Topa Pathian thupiak mi cu Topa Pathian a mah loli sal in a thukam mi bang, Jakop ngalnak cu keiman hua in a biakinn te huat hang, khuapi le khuapi sungah a um mi hempoh te keiman zam san tung.
\p
\v 9 Inn pakhat ah mihing sawmkhat a tang vang thi haw tuk hi.
\v 10 A ngualcam ten mei tuah a hal mipa cu inn sung pen a luang suah tul in a hawh ten inn sungah a um tute vang, sam in na nelah pakhat a tang laih mi um maw tin dong naven tang ma zo hitin, don leh tuk hi. Pua in a hawh tupa vang daiden no in um hen. Pathian min cu thangphat nak um ma hitin, son tuk hi.
\q
\v 11 Itahum titale, Pathian thupiak a um hang, inn ngengpi subal in inn neu cu keh tik tuk hi.
\q
\v 12 Cipuh cu suang hum ah tai thei maw? Mihing cu suang hum ah khui tuah in lo let thei maw? Nohten a dik ama mi thukhen nak cu a kha zet mi thingceh cang tik tuk in hi hen, dikcang nak cu thing kha ceh cang tik tuk in bawl zo uh ma cim maw?
\q
\v 13 Imah a thupi ngawl mi thu sungah ultung lungdam in, kohten thazang ngilnak tuah thuneih nak lonsak zo hima maw tin, son thei haw hi.
\q
\v 14 A thungai in Isarel miphun aw, nang muhtei a lang lam pen miphun khat cu keiman tho tikin, mahmi miphun cu Hamath lamzin bul penpan ngam sungah a um mi ngun tuipi tian nang muhte bawlsiat tuk hitin, vancung ngalkap Topa Pathian in thupia hi.
\s Khau, mei le taicin khau
\c 7
\p
\v 1 Topa Pathian in ka nelah muh nak a lak leh mi cu kumpi tuah a seng mi hampa kung ah cengten, hampa a tawt pan leh huncan ten khau te bawl hi.
\v 2 Mahmi khau te cu ngam sung hempoh ah a um mi hampa kung a eih khawng cengten, keiman, Topa Pathian aw, sual nak pen luat in hi. Jakop cu a naupang hang, itihbang in tho tuk hum tin a tih ten,
\v 3 Pathian cu a sih kik hang hi tihbang cun cang tuk ma hitin, thupia hi.
\p
\v 4 Mah cengten, Topa Pathian ka nelah a lak leh mi muhnak cu mei tuah dan tat tuk in mei cu a sam hang, tupi thuanthum cu meikang hi.
\v 5 Keiman Topa Pathian aw, ngak hih in. Jakop cu a naupang hang, itihbang in tho tuk hum tin ka tih ten,
\v 6 Topa Pathian cu a sih kik hang, hi tihbang cun cang tuk ma hitin, thupia hi.
\p
\v 7 Muhnak a lak leh mi cu taicin thik khau khia suk in a bawl mi suang hum ah Pathian cu ding in, a khut ah taicin thik khau keng in,
\v 8 Amos, nangman i mu nge cim tin a dot ten, taicin thik khau mu ing hitin a tih ten Pathian in ka miphun Isarel sungah taicin thik khau cu keiman khia tung hi. Tunung ten a muhte sup leh tuk mang.
\q
\v 9 Isak hi a sang nak mun te cu mi thawmveng in Isarel tei a thiangtho mun umnak te sia tuk hi. Jeroboam kumpi miphun vang nam tuah keiman do tung hitin, thupia hi.
\s Amos le thiampi Amaziah
\p
\v 10 Mah ten Bethel thiampi Amaziah cu Isarel kumpi Jeroboam nelah hah in, Amos cu Isarel miphun sungah Topai a langlam pen a pha ngawl mi ngaihsut nak ngai sung zo hi. A ma awnkam hempoh ngam sung miphun ten thuak thei ma hi.
\v 11 Jeroboam cu nam tuah thi tuk hi. Isarel miphun ten a um nak mun ngam kel ah hawh bet haw tuk laih tin Amos in son thei hitin, ti hi.
\p
\v 12 Amos sam in kamsang pa aw, Judah ngam ah tai in. Mahmi ngam ah kamsang bawl in pum cawm in.
\v 13 Mah cengten Bethel khuapi ngalkhat lam ah kamsang bawl pah sin. Kumpi a thiangtho um nak mun hi. Kumpi umnak khuapi hitin a tih cengten,
\v 14 Amos in kei cu kamsang hi kha mang hi, kamsang capa hei hi ngawl in khui khal tupa theipi ngah thawi tupa ka hih laih in,
\v 15 Pathian in khui khalhnak mun pen keimah thiak in nang cu hawh ten. Ka mihing Isarel miphun sungah kamsang bawl in hitin, thupia hi.
\v 16 Mah hang Pathian thupiak mi cu ngai in. Isarel miphun a lang lam ah kamsang bawl pah sin. Isak miphun sungah hilh pah sin hitin na tih ten,
\v 17 Pathian thupiak mi na nupi cu suzuak nu in cang tuk hi. Na canu le capa te cu nam tuah in thi haw tuk hi. Midang ten na lo ngam khau dok in sem haw tuk hi. Nang cu a thiangtho ngawl mi ngam pen thi tuk ci. Isarel miphun cu a ma umnak mun ngam pen hawh bet in thuak tuk laih hitin, Amaziah cu hilh hi.
\s Thing ngah a min bawmkhat
\c 8
\p
\v 1 Mah cengten, Topa Pathian in ka nelah a lak leh mi muhnak cu khal huncan ten thing ngah a um mi bawm cu lak hi.
\v 2 Amos nangman i mu kam tin a dong tale khal huncan ten thing ngah a um mi bawm cu mu ing hitin ka tih ten Pathian in, dawl bel huncan ten ka mihing Isarel miphun sungah heng zo. A muhte cu kal vawk thong men tuk mang hi.
\q
\v 3 Mahmi huncan ten kumpi uknak pen ke te kap haw tuk hi. Mun hempoh pen mithi luang tampi a um hang, mihing tampi te veng diudeu in vawk haw tuk hitin, Topa Pathian in thupia hi.
\q
\v 4-6 Kohten cang zuak tuk hathak ni bo hen. Sangvut zuak tukin colhni cu bo hen hitin epha tehnak neu tik tuk in hihen, cuai tehnak a ngit cu ngeng tik tuk bawl in a pha ngawl mi cuai mang in mizawng haksa pa cu sum tuah in hihen, ningkial pa cu kedam tuah hei lei in a pha ngawl mi sangvut cang zuak in, ningkial mite bawlsiat in mizawng haksa ngam mite that tuk deihnak nasezet a nei te aw, hi awnkam thu ngai un.
\p
\v 7 Pathian in Jakop minthan nak sal in a thukap mi cu a thungai in a muhtei nuncan ziaza huai hek dan hempoh keiman a cat ngawl in phawk ngil thei mang.
\q
\v 8 Mahmi sual hang lei pi hing tuk hima maw. Lei mihing hempoh ten kap tuk hima maw. Ngun tuipi bang ngam sungah a tho cengten, Izip ngun tuipi a nim leh bang tai vawk in nim tuk hima maw?
\q
\v 9 Topa Pathian thupiak mi huncan sun laih tak keiman ni tum tik tung. A thiangtho mi ni in leihum pi cu thim tik tuk hi.
\q
\v 10 Nang muhtei puai bawlnak cu kahnak in cang tik tuk hi. Mi hempoh ten thangkhau puan cu a elah het tuk in hihen, sam met tuk in hihen keiman thukhen tung. Capa pakhat bek a thih hang kahnak bang in hihen, a tawp nak ten a kha zet mi ni bang in hihen keiman cang tik tung.
\q
\v 11 Topa Pathian thupiak mi ningkial haksat pamnak cu ngam sung hempoh ah ka hen tik mi huncan heng tuk hi. An pamnak hang ningkial haksat nak hima, dangdum haksat nak hi ngawl in Pathian thupiak zak ngawl mi ningkial haksat nak cang tuk hi.
\q
\v 12 Mihing tampi ten Pathian thupiak mi zei in, tuipi pakhat pen tuipi a lang lam tian vak kaw kawi in sak le hang ah a tai haw ta vang mu haw tuk ma hi.
\q
\v 13 Mah huncan ten a mawi zet mi khanglai him te le tangval te dangdum in tha cawl haw tuk hi.
\q
\v 14 Samaria sual cu sal in thukam mipa Dan aw, na Pathian nun sung hempoh Be-ersheba nun dan bang, a nung tu hempoh tho leh thei ngawl in um haw tuk hitin, thupia hi.
\s Isarel miphun te siatsuah nak thuak tuk
\c 9
\p
\v 1 Mah cengten ka zo le Pathian in biakpiak nak taitan hum ah ding in, thupiak a um mi hempoh tei lu hum ah kongka khuam a hin hang cim tik tuk in kongka cu vat in hi. A muhtei tu le cate cu nam tuah that tuk ci. A tai tupa cu luat tuk ma hi. A luat tupa vang nun nak mu tuk ma hi.
\q
\v 2 Thihnak ngam tian khuk a co ta vang keiman lak sak tung. Vanhum ah a kai ta vang keiman khiasuk tung.
\q
\v 3 Carmel mual lek ah a ngelh ta vang, keiman zei in suah tung. Ka nel pen luat tuk in thupi thuanthum nuai ah ngelh ta vang, keiman ngulpi thu cah in cik tik tung.
\q
\v 4 Ngal ten a man ta vang, a dang umnak mun pen keiman nam cu thu cah in that tik tung. Phatnak bawl ngawl in sual nak bek bawl tuk in keiman zo tung.
\q
\v 5 Vancung ngalkap Topa Pathian in leipi a tokkha ta le leipi cu zung in, leihum mihing hempoh te kap haw tuk hi. Ngun tuipi bang in ngam sung hempoh a lun ten Izip ngun tuipi sungah a nim bang in nim leh tuk hi.
\q
\v 6 A hum ta a khan te vanhum ah sa in a nuai ta inn cu leihum ah sa hi. Tuipi thuanthum te a sam hang, leipi a pawlam ah buak tuk hi. Vancung ngalkap Topa Pathian tihmi minphat nak nei hi.
\q
\v 7 Isarel miphun te aw, nohten ka nelah Ethopia miphun bang hima uh cim maw. Isarel miphun cu Izip ngam pen ka pui bang, Philistine miphun te Caphtor ngam pen hei hihen, Syria miphun te Kir ngam pen hei hihen, keiman pui zo hima maw tin Pathian in thupia hi.
\q
\v 8 Topa Pathian in sualnak a nei mi uknak ngam zo in, mahmi uknak ngam cu leipi a pawlam pen siatsuah tung. Mah naven Jakop miphun cu siatsuah tuk mang hitin, thupia hi.
\q
\v 9 Mah cengten ka thupiak lehnak a um hang, cang cu cangzap nak tuah a zap bang Isarel miphun cu miphun hempoh sung pen cang zapnak tuah keiman zap tung. Cang pim khat no hei lei ah cak tuk ma hi.
\q
\v 10 Haksat nak in kei muh pha ma hi. Kham thei ma hitin tiin, sualnak a tam mi ka miphun hempoh te nam tuah thi haw tuk hi.
\s Isarel miphun tei a tun din lehnak
\q
\v 11-12 A tang mi Edom miphun penpan ka min tuah sam mi ngam dang miphun hempoh te man tik tuk in, bah in a um mi David deu buk cu mah huncan ten keiman sa leh tung. A khinak te cu peh tuah tung. A cim nak te vang lepleh cengten, mahmi deu buk cu tang laih a um mi bang ding leh tuk hitin, hi thu a bawl tu Pathian thuphuan mi um hi.
\q
\v 13 Pathian thupiak mi cu lo let tupan cang at tupa hei hihen, cabit ngawi tupan anci vawh tupa hei pha in, mual lak pen a hum mi cabit tui zung in mual hempoh ah tui in a cang mi huncan heng tuk hi.
\q
\v 14 Mat a co mi ka mihing Isarel miphun te ka pui leh hang, a mun a sia mi khuapi te lemleh in um haw tuk hi. Cabit huan te vang phut in cabit tui in haw tuk hi. Lo te bung in a ngah te ei haw tuk hi.
\q
\v 15 A muhte cu a muhtei umnak mun kelah keiman phut tung. Ka piak mi ngam pen a kuamah bot leh tuk mang hitin, na Topa Pathian in thupia hi.