cnw_reg/25-LAM.usfm

\id LAM
\ide UTF-8
\rem The text in this file was extracted from C:/DCS/Chin, Ngawn/WORD/25. LAMENTATIONS. docx.
\mt Kah La
\h Kah La
\mt Kah La
\toc1 Kah La
\toc2 Kah La
\toc3 lam
\s Zion lungkham nak
\c 1
\p
\v 1 Mihing tampi a um khuapi cu mi thawmveng in khung zo hima maw. Mi phun hempoh sung pen thawmngeng a nei awng mi khanglai him cu meivong bang cang hi. Ngam hempoh tei kumpi nu cu siah pia hi.
\q
\v 2 Zan huncan ten nasezet kap in a biang cu a mit hitui nom leng hi. A lawm hempoh sung pen a nem thiam tu pakhat hei um ma. A ngualcam hempoh ten thukam pelh in, ngal in cang zo.
\q
\v 3 Judah canu a bawlsiat nak, cim zet in na deh nak hang thawn zo. Ngam dang miphun sungah a um hang, colh dam nak um ma hi. A hil tu hempoh a neunak mun pen pha haw zo.
\q
\v 4 A kuamah puainak mun ah a hen ngawl hang, Zion lamzin cu kap haw tuk hi. A khuapi kongka hempoh mi thawmveng umnak mun in um zo. A thiampi te vang kap haw zo. A khanglai him te vang thinnat nak a um hang, a mah cu thanau in um hi.
\q
\v 5 A sualnak a tam hang, Pathian in dan tat in a mah a do tu hempoh ukin a ngal ten phat nak co haw zo. A canu le capa hempoh te vang ngal ten man zo.
\q
\v 6 Zion canu minthan nak cu tham khawng zo. Kumpi cate vang an eihnak tuk mun zei in a tawk ngawl tu sazuk bang a hih hang, a zui tutei maipen tha bo in tai haw zo.
\q
\v 7 Jerusalem khuapi haksat cimnak a thuak laih tak a masa a co awng mi hauhsak nak phawk hi. A miphun te ngal khut sungah heng in bawm tu um ngawl a do tuten a thu mu in a caknak thu mawhsiat haw hi.
\q
\v 8 Jerusalem khuapi sual a tam leita hang a nawngkai mi hi. A mah U pat awng tu hempoh ten a mah kennak a muh hang, sumsial ngawlin um haw. A mah cu kap in a nunglam ah kik leh ta hi.
\q
\v 9 A ma sungah a thiangtho ngawl mi sialsiah nak lang naven, a thuak tuk mi sual phawk ma hi. Mah hang, mitmai pha pia tu um ngawl in a lamdang mi thu tuah caknak ah heng tuk hi. Pathian aw, ka haksat cimnak zo in. Ngal ten a mah le mah khaisang haw zo.
\q
\v 10 Ngal ten a neih nak laksa zo. Mipi tei sungah lut tuk ma tin, likhap mi ngam dang miphun te a thiangtho umnak mun ah a luh nak thu mu hi.
\q
\v 11 A miphun hempoh ten kap in moh zei in um haw hi. Thihnak haksat pen luat tukin a muhtei hauhsak nak cu an eih tuk in vawk hi. Pathian aw, zawt dem nak a thuak hang zo in ngaisung in.
\q
\v 12 Khualzin mi hempoh te aw, zo in ngaisung ta un. Pathian nasezet a thinuuk mi ni in, keimah bawlsiat in a cang thei mi haksat nak tuah a bang ve mi haksat nak um maw?
\q
\v 13 A hum pen mei cu ka nguh sungah hah in keh tik zo hi. Ka ke awk tik tuk thaangsiah in keimah pin tik zo hi. Sun nilui kahnak, thinkham nak thu ka sungah cang tik hi.
\q
\v 14 Ka sualnak kolhak cu a khut tuah ka ngawng hum ah a kencih cengten, Pathian in keimah thakiam tik in ka kham theih ngawl mi a muhtei khut sungah heng tik zo.
\q
\v 15 Pathian in ka ngalkap hempoh keima a laizang pen pal hi. Ka tangval te bawlsiat tukin, mihing tampi sam zo hi. Pathian in Judah khanglai him cu cabit ngawinak khuk sung pen ngawi zo.
\q
\v 16 Mahmi thu hang kei cu kap ing. Mit hitui luang in um ing. Ka nunnak bawm in keimah a nem tupa cu keimah tuah kang zo hi. Ngal ten a neh hang, ka canu te tham khawng haw zo.
\q
\v 17 Zion canu in a khut phalh te phalh naven a nem tu um ma hi. Pathian cu Jakop el ah ngal te pia zo. Jerusalem khuapi cu a muhtei sung pen a nawngkai in cang tik hi.
\q
\v 18 Pathian cu diknak tuah thukhen hi. Kei cu dan thukham palcat zo ing. Mihing hempoh te aw, ngai in ka haksat cimnak cu ngaisung ta un. Ka tangval le khanglai hempoh man haw zo.
\q
\v 19 Ka lawm te sam in a mun thukam nei haw ma hi. Ka thiampi te le kum U ham ten a nunnak ca an eih tuk a zeih laih in khuapi sung pen thi haw zo.
\q
\v 20 Pathian aw, zo in. Ka thinkham zet zo ing. Ka thinlung cu ka sungah um hi. Keiman nasezet do zo ing. Ngal nam tuah thihnak cu inn sung pen a thi bang um ing.
\q
\v 21 Ka kah nak aw a mun za in, a nem tu pakhat no hei um ma hi. Ka nelah a heng mi thu cu ka ngal hempoh ten za haw zo. Na bawl mi thu cu lungdam haw zo. Na ni tep huncan a hen ten a muhte vang keimah bang cang haw ta hen.
\q
\v 22 A muhtei sualnak hempoh cek in. Sual ka bawlnak hempoh hang ka sungah bawl mi bang, a muhtei sungah bawl in. Kei cu kahnak a tam hang thinkham in um ing.
\s Isarel miphun tei hum ah Pathian thinuuk nak
\c 2
\p
\v 1 Pathian Zion canu te a thinuuk nak cu meingo tuah khuh zo. Isarel miphun tei minthan nak cu vanhum pen leihum tian koih zo. A thinuuk huncan ten a ke ngak nak hei phawk ngawlin um zo.
\q
\v 2 Pathian lainat nak um ngawl in Jakop miphun tei umnak hempoh thon zo. A thinuuk hang, Judah canu tei ngalbuk nak innpi te lei tian subal in uknak ngam le kumpi cate zawt dem hi.
\q
\v 3 Nasezet a thinuuk in Isarel miphun ki hempoh talh sak zo. Mun hempoh ah a kang mi mei bang Jakop miphun kang zo hi.
\q
\v 4 Ngal pa bang thalcang cu kau in ngal do tupan a khut taklam dang in a mawi mi minthan nak a nei tu hempoh that zo. Zion canu tei umnak deubuk pen a thinuuk cu mei bang in buak zo.
\q
\v 5 Pathian do in Isarel miphun hei hihen, biakinn hempoh thon zo. Innpi hempoh te subal khawng zo. Judah canu kah nak thu tam tik zo.
\q
\v 6 A man huan bang ngaisung in hang zet phat ngawlnak tuah lonsak zo. A umnak mun te vang siatsuah zo. Pathian in a thiangtho mi puai le colhni cu Zion khuapi pen phawk ngil zo. A thinuuk nak a nasezet hang, kumpi le thiampi cu imah sumsial ngawlin bawl zo.
\q
\v 7 Pathian a biakpiak nak cu vawk zo. A thiangtho umnak mun cu nawngkai tik zo. Biakinn cu ngal tei khut sungah a ap zo hang, puai bawl miten aw a bawl bang ngal ten Pathian inn sung pen aw bawl haw zo.
\q
\v 8 Pathian Zion canu tei khuapi khantian subal tuk a ngaihsut bang khau cu dok in a cat ngawl a siatsuah hang, a sunglam khantian le a pawlam khantian te a bang ve a kahnak tuk thu bawl zo.
\q
\v 9 Khuapi kongkhah te lei sungah dip cih in um zo hi. Kongkalh nak te vang siatsuah zo. Kumpi le kumpi cate cu ngam dang miphun tei lakah um haw zo. Dan thukham um ma. Kamsang ten Pathian muhnak co haw ma.
\q
\v 10 Zion canu tei kum U pa ten leivul cu a muhtei luhum ah koih in thangkhau puan silh ken leihum ah khung in, daiden no um haw. Jerusalem khuapi khanglai him ten a lu kai in um haw.
\q
\v 11 Ka miphun canu tei siatnak hang, kei cu mit hitui luang in ka mit sia zo. Ka sunglam thaunak a um hang, ka nikkha tui cu leihum ah buak ing. Itahum titale, naupang te le nawitui in te lamzin pen tha bo in um haw zo.
\q
\v 12 I lai ah cang le cabit tui um tuk hum tin, a muhte cu ngal tei bawlsiat a thuak bang lamzin pen tha bo in a nui angsung pen a nunnak leih in a nu cu dong thei hima maw?
\q
\v 13 Jerusalem canu te aw, na thu sungah i theihpih nak keiman lak tuk hum? Zion canu khanglai him te aw, nangmah nem tik tukin nangmah tuah a kua cu keiman tehkip tuk hum? Na siatnak cu tuipi thuanthum bang a zal hang a kon bawl thei tuk hum?
\q
\v 14 Na kamsang ten a thupi ngawl mi thu a pha ngawl mi thu te nangma ca mu haw zo. Mat a co mite dai tik tuk in na sualnak lang tik ngawl a sual muhnak, lamzin a pial thei mi thu cu nangma ca mu haw zo.
\q
\v 15 Lamzin ah a hawh tu hempoh ten minthan nak, leihum hempoh minthan nak a um mi khuapi cu hi khuapi maw tin, Jerusalem canu cu bai beng mawhsiat nak aw bawl lusat thu dong thei haw.
\q
\v 16 Na ngal hempoh ten na langlam pen a kam kau haw. Kohten a mah cu thon zo. A thungai in mahmi ni cu kohtei muansan mi ni hi. Kohten mu zo ung hitin mawhsiat nak aw tuah hacang ngawi in son haw.
\q
\v 17 Pathian ngaihsut mi thu cu bawl haw zo. Tang laih penpan a thupiak mi awnkam kim tik zo. Sahelh ngawl in subal zo. Ngal pan na hum ah lungdam nak thu pia in ngalpai ki cu khaisang zo.
\q
\v 18 A mun a thinlung sung pen Pathian cu au haw hi. Zion khuapi canu khantian na mit hitui cu nguntui bang luang in sun le zan luang tik in. Nangmah le nangmah in dai tik pah sin. Na mit vang cawl tik pah sin.
\q
\v 19 Zan huncan ten tho in au in. Pathian mai pen na thinlung tui bang buak in. Ningkial in lamzin hempoh ah tha bo in a um na naupang te daihnak pia tukin a nelah na khut zak in.
\q
\v 20 Pathian aw, nang cu a koi nelah hi tihbang thukhen zo hi tih cu zo in ngaisung in. Numei angcawi laih nauno a pompaih mi nau no sa cu ei tuk maw? Thiampi le kamsang ten Pathian a thiangtho umnak mun sungah thah nak thuak tuk maw?
\q
\v 21 Mi U pa, naupang ten lamzin pen leihum ah thacang in um haw hi. Ka tangval le khanglai ten nam tuah thi haw zo. Na thinuuk ni ten a muhte hehpih ngawl in that zo ci.
\q
\v 22 Puai ni ten mihing tampi a sam bang, ka elkim pen a lauhuai mite sam haw zo. Pathian thinuuk a suak ten a kuamah luat ngawl in tang tuk ma hi. Na pompaih in cawm mi a muhte cu ka ngal pan siatsuah zo.
\s Isarel miphun tei haksat cimnak cu Jerimiah in a thuaknak
\c 3
\p
\v 1 Kei cu Pathian thinuuk tingngolh nuai pen haksat cimnak a thuak tupa ing.
\q
\v 2 Keimah pui in vaknak ah kuat ngawlin khuathim sungah pui zo.
\q
\v 3 A thungai in keimah cu sun nilui in vei tampi dan tat zo hi.
\q
\v 4 Ka vun le taksa zih in ka nguh te ek zo.
\q
\v 5 Ka langlam pen ngalkap bu koih in a kha mi cimnak thu ten kilcih hi.
\q
\v 6 Mithi sa te a bawl theih bang keimah cu a thimnak mun ah koih hi.
\q
\v 7 Keimah suak tul thei tuk ngawl seen umm in a ngit zet mi thikkhau tuah ken hi.
\q
\v 8 Mah bek sial ngawl kei man au in thungen ta vang el hi.
\q
\v 9 Ka hawhnak lamzin cu suangpang tuah phit in, a kawi mi lamzin tuah hawh tik hi.
\q
\v 10 Keimah a zo kuh tu vom bang in hihen, a lang ngawlnak mun ah a um mi pawpi bang in hihen cang tik thei hi.
\q
\v 11 Keimah lamzin pial tik in a tum a tang talhtawng in siatsuah hi.
\q
\v 12 Thalcang koih kap tukin keimah cu koih zo.
\q
\v 13 Thalcang te hei in ka kal cu paihlet tik zo hi.
\q
\v 14 Keiman ka mihing tei sung pen mawhsiat nak thu le sun nilui lasak nak thu hima maw?
\q
\v 15 A kha mi si tuah keimah pia in a kha mi pak tuah ngui in kham tik hi.
\q
\v 16 Suangpum ei in ka ha te ek tik zo. Meikam vut tuah khuh hi.
\q
\v 17 Ka hawvang cu daihnak tuah kangzet ah a thawn tik hang, keiman thupha phawk ngil ing.
\q
\v 18 Mah hang, kei cu Pathian mai pen thazang ngil nak le muansan nak thu bo zo hitin, son ing.
\s Pathian hehpih muansan nak
\q
\v 19 Ka thuak mi haksat nak hei hihen, a kha mi pak le nikkha tui hei hihen, phawk in.
\q
\v 20 A thungai in phawk tuk ci.
\q
\v 21 Mah tihcun ka thinlung ngaisung in phawh ten muansan nak thu um hi.
\q
\v 22 Pathian ningnat nak hang, a hehpih nak bo ngawl in kohten siatnak ah heng ngawl in um ung.
\q
\v 23 Zing sial a hehpih nak a thak co ung. Muantak nak cu ngeng zet hi.
\q
\v 24 Ka hawvang lungmu, Pathian cu kei ma ca hi. Mah hang, nang cu ka muansan mi hi ci.
\q
\v 25 Nangmah a muang tupa le nangmah a zei tupai thinlung hawvang cu pha hi.
\q
\v 26 Nunpan tuk hitin muansan daihnak tuah ngah cu pha hi.
\q
\v 27 Mihing cu khanno laih kolhaak puak cu pha hi.
\q
\v 28 Kolhak a koih hang, pakhat bek khung in daiden no um hen.
\q
\v 29 Muansan nak pha um hei um thei hitin ngaisung in, na kam cu leivul ben in.
\q
\v 30 A vat tupan a biang dawh mawhsiat nak tuah dim hen.
\q
\v 31 Itahum titale, Pathian in a cat ngawl in zam san thei ma hi.
\q
\v 32 Thasia tik naven, a hehpih nak a tam bang lainat nak um tuk hi.
\q
\v 33 Haksat cim nuamnak thinlung tuah mihing tampi te bawlsiat in thasia tik hima hi.
\q
\v 34 Thong tang mi miphun hempoh ke tuah a cilpek nak thu,
\v 35 Mihing co tak mi dan thu cu a sang bel mi Pathian mai pen siatsuah nak thu,
\v 36 Midang te phat ngawlnak thu tuah siatsuah cu Pathian in deih ma hi.
\q
\v 37 Pathian in thupiak nak um ngawl a kon hilh in thil pakhat cang tik thei maw?
\q
\v 38 A sang bel mi Pathian awnkam a suak bang thupha le thupha ngawl cang thei hima maw?
\q
\v 39 A nung mi mihing cu ita kap hum? A sual nak hang kap tuk maw?
\q
\v 40 Kohten a hawhnak lamzin te dongkan in Pathian nelah pin tuk ung.
\q
\v 41 Vanhum ah a um mi Pathian nelah thinlung le khut te dang tuk ung.
\q
\v 42 Kohten sualnak tuah do zo. Nang cu sual ngaihdam nak um ma hi.
\q
\v 43 A thinuuk suak in mitmai pial hi. Mah cengten kei muhte zui in hehpih nak um ngawl in that hi.
\q
\v 44 Kohtei thunget nak awnkam cu a ma nelah heng thei tuk ngawl in meingo tuah nangman kham sak ci.
\q
\v 45 Kei muhte miphun tampi sung pen buakphiah mi buakphiah ek bang in hihen, a nawngkai mi bang cang tik hi.
\q
\v 46 Ngal hempoh ten kohtei a langlam pen a kam kau haw zo.
\q
\v 47 Kohten a lauhuai mi thu sungah hei hihen, kua sungah hei hihen, siatsuah nak sungah hei hihen heng zo ung.
\q
\v 48 Ka miphun canu siatnak hang, ka mit cu ngun tui cang in luang hi.
\q
\v 49-50 Pathian in vanhum pen zo suk a sialsiah laih ngawl in ka mit hitui a cat ngawl luang hi.
\q
\v 51 Ka khuapi canu hempoh ca ka mit cu ka thinkham tik thei hi.
\q
\v 52 A thu um ngawl in keimah a do tu hempoh vano vai zeih mi bang keimah zei haw zo.
\q
\v 53 Leikua sung pen ka nunnak that in ka hum ah suang koih haw.
\q
\v 54 Ka lu cu tuipi in a khuh zo hang kei cu thi zo ing hitin, ti ing.
\q
\v 55 Pathian aw, a thuk mi leikua sung pen keiman na min sam ing.
\q
\v 56 Ka samnak aw a zak hang, ka kahnak te ngai ngawl um pah sin.
\q
\v 57 Keiman nangmah ka sam ten nangman nekin lau pah sin hitin, thupia zo ci.
\q
\v 58 Pathian aw, nang cu ka nunnak tuah a seng mi thu cingkem in tan zo ci.
\q
\v 59 Pathian aw, nang cu ka thuak mi bawlsiat nak mu zo ci. Kei ma ca thukhen in.
\q
\v 60 A mun keimah a do nak hempoh te le a pha ngawl mi ngaihsut nak hempoh nangman mu zo ci.
\q
\v 61 Pathian aw, a muhtei mawhsiat nak thu le a pha ngawl mi ngaihsut nak hei hihen,
\v 62 Ka langlam pen a tho tutei mawhsiat nak, ka langlam pen sun nilui in a ngaihsut nak hei hihen, nangman thei zo ci.
\q
\v 63 A muhtei khunnak, dinnak zo in. Kei cu a muhtei lasak nak thu ing.
\q
\v 64 Pathian aw, a muhtei nuncan ziaza bang sual thaman pia in.
\q
\v 65 A muhtei thinlung khoh tikin tamsiat in.
\q
\v 66 A thinuuk suak in a muhte a bawlsiat hang, Pathian vanhang nuai pen that tuk hi.
\s Kilh a conak hang a thinkham nak
\c 4
\p
\v 1 Sui cu bal zet zo. A pha bel mi sui thek zo hima maw, a thiangtho mi suang te lamzin bul a ping a pengah um haw zo.
\q
\v 2 A sunglawi bel mi sui bang man a nei zet Zion khua mite cu bel bawl tupai bel bang ngaisung thei hi.
\q
\v 3 Cingne nu te hei in a cano te nawi tulh thei hi. Ka miphun canu ten ngam lak sungah a um kalauk vano bang a pha ngawl mi lungmu nei haw.
\q
\v 4 Nawi in nauno cu a dang dum hang, a lei cu a dang ah kop hi. Naupang ten moh ngen in a kuamah in pia ma hi.
\q
\v 5 Phazet no a ei thei mite cu lamzin hum pen mi thawmveng in um hi. Mepian zawng ihkhun zaunak hum pen nopnak a bawl awng miten, buak seh cu kawi haw.
\q
\v 6 A kuamah in thazang suah ngawl in siatnak ah a heng cop mi Sadom khuapi tei thuak mi dan tatnak sang nase saw hi.
\q
\v 7 A bawi U pa te cu vukpak bang ngo in, nawi tui sang ngo saw hi. A muhtei taksa cu suangsan sang in san saw hi. Thangui te vang sapphire suang tuah bang ve hi.
\q
\v 8 A tu in a muhtei zawng cu khuathim sangin a thim saw hang, lamzin hei lang ma hi. A muhtei vun cu a nguh tuah kopcih in thing bang ko tuk hi.
\q
\v 9 Nam tuah a thi mipa cu ningkial in a thi mipa sang thupha um saw hi. Ningkial a thi tupa cu ankung ngah a bo hang, vitlet in ngawm hi.
\q
\v 10 Lainat nak thinlung a nei mi numei ten a cate hei huan haw hi. Ka miphun canu ten siatsuah nak huncan sungah a cate hei ei haw.
\q
\v 11 Pathian thinuuk cu cangkim zo. A nasezet mi thinuuk nak hah zo. Zion khuapi cu meihal in khuapi khantian a zung tian kang tik zo.
\q
\v 12 Ngal a bawl tupa le ngaldo tupa cu Jerusalem kongka pi sungah lut tum hitin, leihum kumpi le leihum mihing pakhat no hei in sang haw ma hi.
\q
\v 13 Jerusalem khuapi a lai pen midik cang mite a that thei tu khuapi kamsang tei sualnak te le thiampi tei sualnak hang hi thu heng zo.
\q
\v 14 A muhte cu misil bang lamzin ah vak kawkawi in mihing thisan tuah a noih hang, a muhtei puan cu a kuamah in zen ngam ma hi.
\q
\v 15 Hawh un. A thiangtho ngawl mite aw, hawh un, hawh un. Zen pah sun hitin mun hempoh ah a vah kawkawi ten ngam dang miphun ten, a muhte cu cam thei haw tuk ma hitin, son thei haw.
\q
\v 16 Pathian cu a thinuuk suak in a muhte khen kek tik zo. A muhtei thu cu zohsak ma hi. Midang ten thiampi te vang U pat ma, kum U pa te maisong ngawl in um haw.
\q
\v 17 Kohtei um laih in bawm tu tuk muang in mu haw ma hi. Nunpan thei ngawl mi miphun cu ngalvil nak hum ah a phat nak um ngawl in cing haw zo.
\q
\v 18 Kohten lamzin ah hawh tuk ngawl thu, kohtei ke ngiah te zei haw zo. Kohtei siatnak nai zo hi. Nunnak huncan kim zo. Siatnak huncan heng zo.
\q
\v 19 Keimuh a zei tute cu vanhum mu vanlai sang manlang saw haw. Mual hum ah zei haw. Ngam lak sungah vang zo kuh haw zo.
\q
\v 20 Ohtei nunnak tih mi Pathian in a piak hang, sathau a thih mipa cu leikua sung pen man haw zo. A minthan nak bel in, kohten ngam dang miphun sung pen nunnak co tuk hitin, a hum pen son thei haw.
\q
\v 21 Uz ngam sungah a um mi Edom canu te aw, lungdam thatui un. Khuathai cu na umnak mun ah hawh tuk hi. Nang cu kham in puan thacang in um tuk ci.
\q
\v 22 Zion canu aw, na co tuk mi sual dan tat nak bo zo. Nang cu man leh tuk ma toh hi. Edom canu aw, na bawl mi sualnak dongkan in na sualnak cu lak tuk hi.
\s A hehpih nak ca thunget nak
\c 5
\p
\v 1 Pathian aw, kohtei sungah a heng mi thu phawk in. Kohtei thuak mi mawhsiat nak zo in ngaisung in.
\q
\v 2 Kohtei lo co mi lei ngam cu ngam dang miphun tei khut sungah hei hihen, umnak inn sungah hei tuipi kulh ngam sung mitei khut sungah heng zo.
\q
\v 3 Kohte cu nu le pa a nei ngawl naupang te ung. Pa cu thi zo. Nu cu meivong in um hi.
\q
\v 4 Sum piak bek ten tui in. Thing vang lei hi.
\q
\v 5 Kolhak a cat ngawl in pua hi. Cawl ngawlin na dek hi.
\q
\v 6 An eih ngah tukin Izip ngam miphun, Assyria ngam miphun tei lakah sila thuak hi.
\q
\v 7 Pu le pa tei sual hang thih cengten, kohten a muhtei sualnak thuak ung.
\q
\v 8 A sila ten kei muhte uk haw. A muhtei khut sung pen a kuamah in pan thei ma hi.
\q
\v 9 Ngam lak pen nam haksat nak tawk in thih thuak in an eih tuk zei haw.
\q
\v 10 Ningkial nak hang, kohtei vun cu meihol bang hang hi.
\q
\v 11 Zion khuapi sung pen numei te hei hihen, Judah khuapi sung pen numei khanglai te hei hihen sual bawl haw zo.
\q
\v 12 Bawi Upa te cu a khut pen len thei haw. Kum Upa te vang Upat haw ma hi.
\q
\v 13 Tangval ten ancang ngawi nak pua thei haw. Naupang te thing nuai ah lum haw hi.
\q
\v 14 Kum Upa ten khuapi kongka pi bul ah hei hihen, tangval ten puai bawlnak sungah hei hihen, tham haw tuk hi.
\q
\v 15 Kohten lungdam nak bo in laamnak sang kahnak nei ung.
\q
\v 16 Kohtei khuk mi sui lukhu cu cak zo. Kohtei sual hang, thupha co mi um ma.
\q
\v 17 Mah hang, kohten thinkham zo ung. Mahmi sual hang ka mit uh te mal zo hi.
\q
\v 18 Mi thawmveng in a um mi Zion mual pen, cingne te hawh in um haw hi.
\q
\v 19 Pathian aw, nang cu kumkhua kho ci. Tohkham khunnak vang a kumkhua hi.
\q
\v 20 Nangman kohte cu ita a cat ngawl in phawk ngil cim? Ita huncan ngeipi zamsan nge cim?
\q
\v 21 Pathian aw, kei muhte na nelah hek tik in. Mah tihcun na bawl tale kohten pin kik leh tuk ung. Tang laih hun bang kohtei huncan a thak bawl leh in.
\q
\v 22 Nangman kei muhte that ngangai tuk cim maw? Nasezet thinuuk tuk cim maw?