cnw_reg/22-SNG.usfm

\id SNG
\ide UTF-8
\rem The text in this file was extracted from C:/DCS/Chin, Ngawn/WORD/22. SONG OF SOLOMON. docx.
\mt Solomon La
\h Solomon La
\mt Solomon La
\toc1 Solomon La
\toc2 Solomon La
\toc3 sng
\s Ihmi nu
\c 1
\p
\v 1 La hempoh sung pen Solomon la cu,
\v 2 Na muk tuah keimah thut in nam in. Na ihnak cu cabit tui sang pha saw hi.
\q
\v 3 Na sung pen ngimnam tui sathau bang, na min tuah buak mi ngimnam tui sathau hi. Mah hang khanglai him ten nangmah it haw hi.
\q
\v 4 Keimah pui in. Kohten na nungpen tai in hil tuk ung. Kumpi pai inn khan sungah keimah pui zo.
\s Ngualcam te Kohten nangma hang, lungdam thatui ung. Kohten cabit tui sang na itnak phawk saw tuk ung.
\s Ihmi nu Khanglai him ten diknak tuah it ung.
\q
\v 5 Jerusalem canu te aw, kei cu Kedar deubuk bang a hang mi thuam um ta vang, Solomon kalaka bang mawi laih ing.
\q
\v 6 Keiman nisa thuak in hang ta vang, keimah zo pah sun. Ka nui canu le capa ten keimah iksik nak thinlung a neih hang, cabit huan cing tik haw hi. Ka huan hei cing thei mang hi.
\q
\v 7 Ka deih mi le ka ih mipa, na tuu te ilai munah khal hum tih hei hihen, sun huncan ten ilai munah a limbel tuk in hihen lak in. Kei cu tuukhal tu dang tei nungah ita lamzin pial in um tuk hum?
\s Ngaihno
\q
\v 8 Numei hempoh pen a mawi bel mi nu aw, nangman na thei ma tale tuu tei ke ngiah zui in, tuukhal tu tei buk pen na tuuno te cawm in.
\q
\v 9 Ka ihmi nu aw, nangmah cu Pharoah kumpi cipuh leng pen, lam mi cipuh tuah ka zuk lak tung hi.
\q
\v 10 Na biangah thilman pha tuat mi a dim tuah na longah sui longawh a dim in um hi.
\q
\v 11 Ngun tuah a coih bawl mi sui a tuan te vang bawl in pia tung.
\s Ihmi nu
\q
\v 12 Kumpi cu an eihnak cabuai bul ah a khun laih tak ka zelh mi ngimnam tui cu tingunguih in suak tul hi.
\q
\v 13 Ka ih mipa cu ka nelpen myrrh ngimnam tui bang a hih hang, ka ang laklawh no ah zankhua zau tuk hi.
\q
\v 14 Ka ih mipa cu Engedi cabit huan ah a um mi namtui kung ceh tel ken bang hi.
\s Ngaihno
\q
\v 15 Ka ihmi nu aw, nang cu mawi mah tak ci. Mawi zet ci. Khulo mit tuah in dim ci.
\q
\v 16 Ka ih mipa cu a thuangmawi in, ih huai tepteh nak tuah dim hi. Kohtei zauphah cu a hing mi mawinak nei hi.
\s Ngaihno
\q
\v 17 Ohtei biakinn khuam cu cedar thing, a humkhuh vang cak thing tuah bawl hi.
\s Ihmi nu
\c 2
\p
\v 1 Kei cu Sharon pak, ngam sungah a po mi lily pak bang thong poh ing.
\s Ngaihno
\q
\v 2 Lingcam sung pen lily pak bang, ka canu tei sungah ka ngaihno um hi.
\s Ihmi nu
\q
\v 3 Ngam sung thingkung hempoh sung pen apple bang, capa tampi sung pen keimah cu it ci. Ka deihnak tampi tuah a lim nuai ah khung in a ngah cu keima ca hum zet hi.
\q
\v 4 Puai bawlnak inn ah keimah pui in itnak a lan tuah ka hum ah khuh zo.
\q
\v 5 Keiman itnak le ningnat nak ka cabit ngah tuah thazang dim tik un. Keimah cu apple ngah tuah nem in.
\q
\v 6 Na veilam khut cu ka lu dom in na taklam khut tuah keimah kawi in.
\q
\v 7 Jerusalem canu te aw, ka ihmi canu te cu a muhtei phot laklawh tian hingkha phong tuk ngawl in, ngamlak sungah a ta mi sakhi le sazuk te sal in nang muhte keiman thucah ing.
\q
\v 8 Ka ih mipai awnkam zo in. Mualpi le mualneu te kal in hung hi.
\q
\v 9 Ka ngaihno cu sakhi le sazuk no te bang hi. Zo in. Khantian nak pang bul ah ding hi. Tukvelh kongka pen zo in tukvelh kongkhah lak lawh pen a mah le mah lak in um hi.
\q
\v 10 Ka ngaihno sam in a hilh mi cu ka ihmi nu aw, ka mawi no, tho in hung in.
\q
\v 11 Phalbi ceng zo. Nguah vang zuu leh ma zo.
\q
\v 12 Leihum ah pak tampi pak haw zo. Vano khuang vang heng zo. Kohtei lei ngam ah khulo khuang aw vang za ing.
\q
\v 13 Theipi kung in theikuh min tik hi. Cabit kung te pak in ngimnam beng bung hi. Ka ihmi nu aw, ka mawi no, tho in hung in.
\s Ngaihno
\q
\v 14 Mual hum buknak mun suang lak lawh ah a um mi ka khulo no, na mitmai mu tik in. Na awnkam za tik in. Na awnkam aw hum hi. Na mitmai vang mawi hi.
\q
\v 15 Cabit te a siatsuah thei mi cingne le cingne no te, kohtei ca in man un. Koh cabit kungten a pak cu pak in um hi.
\s Ihmi nu
\q
\v 16 Ka ngaihno cu keima ta hi. Keimah vang ngaihno ta hi. Lily cam sung pen cawm hi.
\q
\v 17 Zingkhua vak laih ngawl khuathim in lim a tai laih ngawl in ka ngaihno, Bether mual hum pen sakhi le sazuk bang bawl hi.
\c 3
\p
\v 1 Ka hawvang a it tupan zan huncan ten, ihkhun zaunak humah keimah zei hi. Zei naven mu ma hi.
\q
\v 2 Kei cu tho tung. Kei cu khuapi lamzin ah vak tung. Ka hawvang a it tupa cu lamzin pi ah zei tuk hitin tiin, zei naven mu ma hi.
\q
\v 3 Khuapi cu vak kawkawi in a cing tuten keimah mu haw naven, ka hawvang it tupa cu mu uh cim maw tin, keimah dong hi.
\q
\v 4 A muhtei lakpen dawm laihno kal in ka hawvang it tupa cu mu ing. Keiman a mah cu hah mang. Len lo in keimah a hing tu ka nui inn pen, ihkhun zaunak khan sungah pui hi.
\q
\v 5 Jerusalem canu te aw, ka ihmi canu no cu a muhtei thawhcawm laih ngawl phong tuk ngawl in, ngamlak sungah a ta mi sakhi le sazuk te sal in nang muhte keiman thucah ing.
\q
\v 6 Myrrh le frankincense tih mi sum bawl tei zuak theih mi ngimnam tui a vam cu meihal in, meikhu khuam bang um in ngamlak pen a hung mipa cu a kua tuk hum?
\q
\v 7 Solomon ihkhun zaunak zo un. Isarel miphun ngalkap ngalhang mihing sawmluk um hi.
\q
\v 8 A venghawng nam keng, ngaldo nak thu a thiam in a cung tute hi. Mihing hempoh ten Lebanon thing ta hang a kawng hum ah a ma awnkam um hi.
\q
\v 9 Solomon in Lebanon thing tuah leng cu a mah loli bawl hi.
\q
\v 10 A man ngun khuam te, a nuai a tawphah sui, mepian tuah a sinkhuh, Jerusalem canu tei ca itnak tuah a phah mi a lai ah bawl hi.
\q
\v 11 Zion canu le capa te aw, hawh tul un. A nui sui lukhu khuk mi niten hei in hihen, a thinlung nop ni ten in hihen, sui lukhu khu in Solomon kumpi cu zo un.
\s Ngaihno
\c 4
\p
\v 1 Na thuang mawi zet hi. Ka ihmi nu no aw, mawi zet ci. Na tawhmeh nak sungah khulo mit um maw? Na sam cu Gilead mual hum pen kel no bang hi.
\q
\v 2 Na ha te a mul met in tibual nak pen a kai to mi tuuhon tuah bang ve hi. Nauphil hing tu hempoh tei lakah hei hihen, a kuamah cing haw tuk ma hi.
\q
\v 3 Muk kam vang khausan nim tuah bang ve hi. Awnkam aw vang zak nop hi. Na biakinn te a tawhmeh nak sung pen taleti a langlam tuah bang ve hi.
\q
\v 4 Na long cu ngal hiamnam koih nak inn ca tuk sak mi David ngalbuk nak inn tuah bang ve hi. A man ngalkham tu mihing lumphaw thawngkhat keng hi.
\q
\v 5 Na awm a langnih in lily pak lak lawh pen a um mi sazuk philno tuah bang ve hi.
\q
\v 6 Zingkhaw vak laih ngawl, khuathim a bo laih ngawl in keiman myrrh mual le frankincense mual ah hawh tung.
\q
\v 7 Ka ihmi nu no aw, nang cu sonsiat tuk pakhat no hei um ma ci. Na pumpi a venghawng mawi hi.
\q
\v 8 Keimah tuah langkhat ngel in Lebanon mual hum ah hung in. Ngaihno. Keimah tuah langkhat ngel in Lebanon mual hum ah hung in. Amana mual hum, Shenir mual hum a lek, pawpi kua te, tavang akbawm can tei umnak mual hum pen zo in.
\q
\v 9 Ka ihmi nau nu aw, ka nupi, ka thinlung laksak zo ci. Na mit veikhat na zohnak, na ngawng veikhat na hel nak tuah ka thinlung laksak zo.
\q
\v 10 Ka ihmi nu no, ka nupi aw, na itnak cu hum ngangai hi. Cabit tui sang na itnak cu izahtak in pha hum? Ngimnam tui hempoh sang namtui saw hi.
\q
\v 11 Ka nupi aw, na muk kam cu khuaizuu bang zung thei hi. Lei nuai pen khuinawi tui le khuaitui um hi. Puan te vang Lebanon ngimnam tui bang mui bingbeng hi.
\q
\v 12 Ka ihmi nu no aw, ka nupi cu tuikhuk pakhat, tuikhuk pakhat a hubin mi um hi.
\q
\v 13 Na thingkung no te, a ngah hum no a ngah thei mi taleti, ngimnam tui kung huan,
\v 14 Nam tui thingkung le aile zawng, frankincense le calamus kung, nauban le a sunglawi mi ngimnam tui thingkung hempoh tel hi.
\q
\v 15 Huan te tui buak tuk tuikuang, tuikhuk, Lebanon mualpen a luang mi nguntui vang um hi.
\s Ihmi nu no
\q
\v 16 Saklam huih aw, tho in hi. Hanglam huih aw hung in. Ka huan ah hung un. A namtui mi ngim cu theu hen. Ka ngaihno cu huan sungah lut tum in a hum mi thing ngah te ei hen.
\s Ngaihno
\c 5
\p
\v 1 Ka ihmi nu no, ka nupi aw, ka huan sungah kei cu lut tum zo ing. Ka myrrh le ngimnam tui co zo ing. Ka khuaitui le khuaizuu ei zo ing. Khuinawi tui le cabit tui in zo ing.
\s Ngualcam te
\v 1 Ka ngualcam te aw, ei un. Ka ngualcam te aw, in un. Khampek in un.
\s Ihmi nu no
\q
\v 2 Ka hihbuh laih tak thinlung khang in um ing. Ka ngaihno awnkam aw hi. Ka ihmi nu no ka ih bel mi, ka ki, ka cangkim mipa keimah hon in. Ka lu cu dai tui tuah hei in hihen, ka sam cu zan ten a cak thei mi dai tui cak tuah hei in hihen nom zo hitin tiin, hep in um hi.
\q
\v 3 Kei cu angki duk zo ing. Ita silh leh tuk hum? Ke vang som ceng zo ing. Bal leh tik tuk ita bawl tuk hum?
\q
\v 4 Ka ngaihno khut cu kongka awng sungah a sawh tum hang, a mah ningnat nak thinlung ngengpi tuah,
\v 5 Ka ngaihno cu kongka hon tuk ka thawhten, ka khut pen myrrh thau, ka khutkak pen myrrh thau a ngek cu kongka kalhnak khuam hum pen cak ke keuh hi.
\q
\v 6 Ka ngaihno cu ka honsak ten, ka ngaihno cu suak tul ham zo. Awnkam aw phatak zet ngai in, ngaihno zei ta vang mu mang. Sam ta vang don ma hi.
\q
\v 7 Khuapi sung pen vak kawkawi a cing tuten keimah tawk naven, nasezet vat haw. Khuapi khantian a cing tuten ka mai hup lon sak hi.
\q
\v 8 Jerusalem canu te aw, nohten ka ngaihno mu tale a mah ihnak hang dam ngawlnak thu cu son ta un hitin, keiman thucah in ngen ing.
\s Ngualcam te
\q
\v 9 Numei hempoh lakpen a mawi bel mi nu no aw, na ngaihno cu midang te a ihnak sang a lamdang nak i um hum? Kei muhte mah tihbang mi thucah a ngetnak thu, na ngaihno cu midang ten a ihnak sang itihbang lamdang cuang hum?
\s Ihmi nu no
\q
\v 10 Ka ngaihno cu a ngo le a san zet mi thawngkhat sung pen a ngeng bel mi hi.
\q
\v 11 A lu cu sui a ngek tuah bang ve hi. A sam cu sah zet in va-ak bang hang hi.
\q
\v 12 A mitcang te vang ngun tuipi bul pen khulo mit tuah bang ve hi. Nawi tui tuah som mi a bal te so taw tawh hi.
\q
\v 13 A biang cu ngimnam tui cam, a nam tui mi pak huancam bang in hihen, a kam te myrrh sathau a ngek a zung mi vukpak hei in cang haw tuk hi.
\q
\v 14 A khut cu suangman pha belh mi sui khut zungbut bang hi. A pum pi cu sapphire suang tuah a coih mi saiho a ngo tuah bang ve hi.
\q
\v 15 A ke te cu sui a ngek ke dam hum ah a um mi suangngo khuam tuah bang ve hi. A mai cu Lebanon mual bang a hih hang, cedar kung bang sunglawi cuang hi.
\q
\v 16 A kam cu hum ngangai hi. A pumpi venghawng deih awh huai mi minthan nak tuah dim hi. Jerusalem canu te aw, hi mipa cu ka ngaihno, ka ngualcam hi.
\s Ngualcam te
\c 6
\p
\v 1 Nu mei hempoh sang a mawi bel mi nu no aw, na ngaihno cu i lai munah hawh hum? Kohten nangmah tuah zei tuk na ngaihno cu i lai munah pial in hawh hum tih cu hilh in.
\q
\v 2 Ka ngaihno cu huan pen thing ngah ei in lily pak no thawi tuk hitin, huan ngimnam cam sungah hawh hi.
\q
\v 3 Ka ngaihno cu keima ta hi. Keimah vang ka ngaihno ta ing. Lily pak cam pen cawm hi.
\s Ngaihno
\q
\v 4 Ka ihmi nu no aw, nang cu Tirzah khuapi bang mawi ci. Jerusalem khuapi bang mawi ci. Ngal mai bang lauhuai ci.
\q
\v 5 Na mitcang cu ka nelpen pial in. A mun keimah neh zo hi. Na sam cu Gilead mual hum pen a tolhsuk in a hung li mi kel hon hi.
\q
\v 6 Na ha te vang tibual nak pen a kai to mi tuu hon te bang hi. Pakhat no hei kiam ngawl, a phil in hing thei haw hi.
\q
\v 7 Taleti a hem bang na tawhmeh nak cu na biakinn hi.
\q
\v 8 Kumpi nu sawmluk, zino sawmliat, sialzawh ngawl khanglai him um hi.
\q
\v 9 Ka khulo, ka cangkim nak pa cu pakhat bek um hi. A hin mi a nu in a ih belmi a canu hi. Miphun canu tampi ten a mah cu mu in thupha pia hi. A thungai in kumpi nu tampi le zino tampi ten a mah cu thangphat haw.
\q
\v 10 Hade bang in le ni bang mawi, ngal mai bang lauhuai in zinglam bang zoh mi canu no cu a kua hum?
\q
\v 11 Hawkluam umnak thingngah te zo in cabit kung pha le pha ngawl hei hihen, tale kung pak le pak ngawl hei hihen, thei tuk in ka puah mi huan ah kei cu hawh ing.
\q
\v 12 Ngallin nak um laih ngawl ka hawvang cu Amminadib leng khung bang ing.
\s Ngualcam te
\q
\v 13 Sulamite aw, pin leh in hi, pin leh in. Kohten nangmah mu tuk in, pin leh in hi, pin leh in hi, Sulamite in i thu te mu tuk nen tim? Ngalkap bunih bang mu haw tuk hi.
\s Ngaihno
\c 7
\p
\v 1 Kumpi nui canu no aw, na kedam le kephalh cu izahtak mawi hum? Na kawng nguh mang te thiamzet in a bawl thei mi suangman pha khut but cau tuah bang ve hi.
\q
\v 2 Na el cu a tui tuah a dim mi khuathai hi. Pumpi cu lily pak tuah a coih mi cang tampi seh bang hi.
\q
\v 3 Na nawi panih cu sazuk no a phil tuah bang ve hi.
\q
\v 4 Long cu saiho innpi bang in hihen, na mit te Heshbon khuapi, Bathrabbim khuapi kongka luh tum nak bulah a um mi tuipi ting bang in hihen, na nal cu Damacus khuapi a hek mi Lebanon ngalbuk nak innpi bang hi.
\q
\v 5 Na lu cu Carmel mual bang, na sam vang a sandup mi tuah bawl hi. Kumpi inn laknak innkhan sungah koih cih zo.
\q
\v 6 Ka ihmi nu no aw, izah tak mawi in deihawh hum? Itnak sungah deihnak cangkim hi.
\q
\v 7 Na dingsang dan cu sunpalun kung bang, na nawi te sunpalun a ngah bawk bang hi.
\q
\v 8 Sunpalun kung cu kai tung. A kangkak te len tung hitin ka tih ten, na nawi cu cabit ngah bawk bang in hihen, haihawh in na huup mi ngimnam tui cu apple ngah ngimnam tui bang in hihen,
\v 9 Na kam vang a pha bel mi cabit tui bang hi. Mahmi cabit tui cu ka ngaihno ca camzet luang thei hi. Hihbu mitei muk kam ah phawhkhak ngawl heng thei hi.
\s Ihmi nu no
\q
\v 10 Ka ngaihno cu keima ta hi. Ka deihnak ah zui thei hi.
\q
\v 11 Hung in. Ka ngaihno aw hung in. Ngam lakah hawh in khua sung pen zan cu bo tik tuk hung hi.
\q
\v 12 Zing khawma no tho, cabit huan ah hawh tuk hung. Cabit kung a pha le pha ngawl hei hihen, a pak tam le tam ngawl hei hihen, tale kung pak le pak ngawl hei hihen, zo tuk hung. Mah lai mun ah ka ihnak cu nangma nelah ap tung.
\q
\v 13 Hihbuh suak si kung te namtui beng bung haw hi. Ohtei kongka bul pen a hum mi thing ngah bang, a thak le a lun cu nangma ca tuk keiman khawl zo ing. Ka ngaihno aw.
\c 8
\p
\v 1 Ka nui nawi tui a in tu ka naupa bang, a pawlam pen nangmah ka tawk tale thut in nam tung. Mah e keiman poi sa tuk mang hi.
\q
\v 2 Na khut len in ka nui zaunak khan sungah pui tung. A man keimah thu a hilh hang, keiman si tuah hel mi cabit tui le tale tui cu nangmah in tik tung.
\q
\v 3 Na veilam khut in ka lu dom in, taklam khut in keimah kawi in.
\q
\v 4 Jerusalem canu te aw, ka ihmi canu te a thawhcawm laih ngawl tian phong ngawlin ngam sungah a um mi sakhi le sazuk te sal in a muhte keiman thucah ing.
\s Ngualcam te
\q
\v 5 Ka ngaihno cu hoi kawkawi ngam sung pen a hung mipa cu a kua in cang tuk hum? Keiman apple kung nuai pen nangmah sosuah ing. Mahmi umnak mun pen na nu in keimah huai tik zo. Mahmi umnak munpen nangmah a hing tupan nangmah huai tik zo.
\s Ihmi nu no
\q
\v 6 Keiman na thinlung hum ah tacik khen zo ing. Khut zung hum ah tacik khen zo ing. Itahum titale, itnak cu thihnak bang huham ngeng hi. Nupi te up ngawlnak lungmu cu thihnak ngam bang hak sa hi. A tha neihnak cu meitha neihnak, eletric tha neihnak bang hi.
\q
\v 7 Mah naven tui tampi ten itnak cu that thei ma hi. Ngun tui ten khuhcih thei ma. Mihing in a inn sungah a neih mi van te itnak ca tuk pia ta vang, imah sumsial ngawlnak tampi thuak tuk hi.
\s Ngualcam te
\q
\v 8 Kohtei lakah numei pakhat um hi. A mah cu a nawi bok ma laih hi. Mahmi numei nu a nget ten a ma ca i tihbang bawl tuk hum?
\q
\v 9 A mah cu khuapi khantian a hitacun a ma hum ah ngunbel pi sa tuk hi. Kongka pi a hitacun cedar thing tuah kho tik tuk hi.
\s Ihmi nu no
\q
\v 10 Kei cu khuapi khantian ing. Ka nawi te cu ngalbuk nak innpi bang haw tuk. Mah hang, a mai pen mitmai pha a co tu cu lungdam nak um hi.
\q
\v 11 Baalhamon ngam ah Solomon cabit huan pakhat um hi. Huan cing tu a zawn hang, a mun a ngah a eih tuk ca sum thawngkhat ten pia hi.
\q
\v 12 Ka neih mi cabit huan cu ka mai ah um hi. Solomon aw, sum thawngkhat cu nangma nelah pia in a ngah a cing tuten zanih cu la haw hi.
\s Ngaihno
\q
\v 13 Huandum sungah a um tupa, na awnkam aw cu na ngualcam phialpih ten ngai thei haw. Keimah vang za tik bok in.
\s Ihmi nu no
\q
\v 14 A manlang hung in. Ka ngaihno aw, namtui mual hum pen sakhi le sazuk no te bang bawl in.