cnw_reg/21-ECC.usfm

\id ECC
\ide UTF-8
\rem The text in this file was extracted from C:/DCS/Chin, Ngawn/WORD/21. ECCLESIASTERS. docx.
\mt Thuhilhtu
\h Thuhilhtu
\mt Thuhilhtu
\toc1 Thuhilhtu
\toc2 Thuhilhtu
\toc3 ecc
\s Na hempoh a thupi nak imah um ma hi
\c 1
\p
\v 1 Jerusalem khuapi sungah kumpi David capa thuhilh tu saza pai awnkam cu,
\v 2 A thupi nak imah um ngawl, a thupi nak imah um ngawl, na hempoh a thupi nak imah um ma hi.
\q1
\v 3 Mihing in nisuah nak nuai pen zuamnak hempoh i nemcuam nak um hum?
\q1
\v 4 Mihing khangkhat bo zo. Khangkhat heng leh hi. Leipi cu a cat ngawl kho hi.
\q1
\v 5 Ni vang suak in tum hi. A suahnak munpen suak leh lamzin hang lam zui in, saklam zin ah hel leh hi.
\q1
\v 6 Huih vang a cat ngawl a hel thah hawh in, a hel sa mi umnak mun ah hel kik leh thei hi.
\q1
\v 7 Nguntui hempoh tuipi sungah heng hi. Mah naven, tuipi cu dim thei ma hi. Ngun tuipi cu a luannak sa kel ah luang kik leh thei hi.
\q1
\v 8 Na hempoh zuamnak tuah dim hi. Mihing awnkam tuah son zawh ma hi. Mit tuah mu hei in bo thei ma hi, beng tuah zak nak vang cangkim ma hi.
\q1
\v 9 A cang zo mi thu cu a cang tuk laih mi tuah bang ve hi. A tuin bawl mi thu cu a bawl lih uh mi thu tuah bang ve hi. Nisuah nak nuai pen thu thak um ma hi.
\q1
\v 10 Zo in. A thak in cang hitin son mi pakhat um maw? Mahmi thu cu ohtei ma suan, tanglaih huncan in a cang zo mi hi.
\q1
\v 11 Tanglaih in a cang zo mi thu hempoh phawhnak um ma hi. A cang tuk laih mi thu hempoh te vang, mahmi thu heng in a cang tuk mi hempoh phawhnak um ma hi.
\s Cihnak vang thupi ma hi
\p
\v 12 Keimah thuhilh tu saza in Jerusalem khuapi sungah Isarel kumpi a hih laih in,
\v 13 Vanhum nuai pen a bawl mi hempoh cihthiam nak tuah dongkan zei tuk ka thinlung pia ing. Hi haksat cimnak cu mihing hempoh tei lakah zui tuk Pathian piak mi hi.
\v 14 Ni nuai pen bawl mi thu hempoh keiman mu zo ing.
\q1
\v 15 A kawi mi thu cu tuang zet in hawh thei ma hi. Deihnak thu cu sial zawh ma hi.
\p
\v 16 Ka thinlung sung pen son mi cu a masa in Jerusalem khuapi pen a cang awng mite sang, thawmngeng saw in cihnak nei ing. A thungai in ka thinlung cihthiam nak te a cuang in cung ing.
\v 17 Cihnak thu hei hihen, thinlung kim ngawl silnak thu hei hihen, khenkhuai theihnak nei tuk in ka thinlung pia ing. Mahmi thu vang thinlung noksak tik tu in cang hi tih cu keiman thei ing.
\q1
\v 18 Itahum titale cihnak tam tale sonsiat nak tam hi. Theihnak a khang mipan thasiat nak tam thei hi.
\s Nopnak cu imah thupi ma
\c 2
\p
\v 1 Ka thinlung sung pen son mi thu cu hung in hi. Lungdam nak tuah nangmah cu keiman cul tung. Mah hang lungnop in hi. Mahmi vang a thupi nak imah um ma.
\v 2 Nuihnak cu na sil thu hei in hihen, lungnop nak cu ita hih tihbang bawl nge cim tih hei in keiman ti ing.
\v 3 Mihing tampi in vanhang nuai pen nun ni sung bawl tuk mi a pha thei tuk in hihen, cihnak thu cung napi in, cabit tui deihnak ah zui in misil tei nuncan ziaza sungah nung tuk in keiman ngaisung ing.
\p
\v 4 Keiman nasezet na dehnak nei zo ing. Ka inn cu keiman sa zo ing. Ka cabit huandum te phut zo ing.
\v 5 Huandum phunkim bawl in thingngah phunnam kim a ngah thei mi thingkung vang phut ing.
\v 6 Thingkung phunnam kim tuah a dim mi ngam cu tui buak tukin tuikuang te vang bawl ing.
\v 7 Sila pano, numei te nei in sila naupang te vang um haw. Keiman a masa Jerusalem khuapi sungah a cang awngmi hempoh sang keiman ngamsa a ngeng a neu tam pi nei ing.
\v 8 Sui le ngun hei hihen, kumpi tuah a seng mi neihnak van khua no ah a khen in siah hei hihen, keiman zei ing. La sathiam pano numei te hei hihen, mihing tei lungnop tik thei mi zipi le zi no hei hihen, a nging thei tumnging hei hihen, an eih tuk phunkim keimah pia hi.
\v 9 Mah hang, Jerusalem khuapi sung ka mai ah a um mi hempoh sang, kei cu thawmngeng nak tuah khang to ing. Keiman cihnak vang nei ing.
\q1
\v 10 Ka mit deihnak pakhat no hei el ngawl ka thinnop tuk in pakhat no hei vawk mang. Ka zuamnak hempoh sungah lungdam nak um in, zuamnak laksawng hi.
\q1
\v 11 Mah ten ka bawl mi hempoh, ka zuamnak hempoh te zo in na hempoh imah a thupi ngawl mi thu, huih hil li bang thong hi. Vanhang nuai ah a pha mi pakhat no hei um ma hi.
\s Theihcih nak le silnak cu a thupi nak um ma hi
\q1
\v 12 Mah cengten keiman cihnak thu hei hihen, silnak le thinlung kim ngawl mi thu hei hihen ngaisung ing. Kumpi nung pen a cang mipa cu i tihbang bawl thei hum? Bawl sa mi bang bawl thei ing.
\q1
\v 13 Mah hang, vak nak cu khuathim sang a pha saw bang in cihnak cu silnak sang lamdang cuang hi tih cu keiman mu ing.
\q1
\v 14 Cihnak a nei mitei mit cu a lu ah um hi. Misil pa cu a thim mi umnak mun ah nung thei hi. Mah naven a venghawng in thu pakhat sung bek ah a tawh theih nak thu keiman thei ing.
\p
\v 15 Mah hang, misil tei tawh mi bang keiman ka tawk tale ita a mah sang cihnak nei saw hum tih hei in hihen, hi thu te vang a thupi nak imah um ma hi tih hei in hihen, keiman son thei ing.
\q1
\v 16 A tuin a cang mi thu hempoh tunung ten phawk leh tuk ngawl toh a hih hang, misil pan a cat ngawl a phawh bang cihnak a nei mipa vang a cat ngawl phawk ngil thei ma hi. Cihnak a nei mipan misil pai thih bang thi thei hi.
\s Na deh zuamnak le pitung nak cu a thupi nak imah um ma hi
\p
\v 17 Mah hang, nunnak cu keiman ciat ing. Vanhang nuai pen na deh nak cu haksa em hi. Na hempoh a thupi nak imah um ma, huih hil bang thong hi.
\v 18 Mah bek sial ngawl vanhang nuai pen tha suah in ka zuam mi hempoh ciatzet in ka um mi thu cu ka nungpen a heng tuk mipai ca keiman zam tung.
\v 19 A mah cu cihnak nei tuk maw, misil hitin a kon son thei hum? Mahmi pan thasuah a zuamnak hempoh, vanhang nuai pen ka minthan cihnak hempoh ten uk tuk hi. Mahmi thu vang a thupi nak imah um ma.
\v 20 Mah hang, vanhang nuai pen thasuah in zuamnak ka neih mi hempoh sungah muansan tuk thu um ma hi. Thinkham tukin keiman ngaisung leh thei hi.
\v 21 Itahum titale cihnak nei theihnak tuah dim, na nehnak pitung in thasuah zuamnak nei tupa hi naven zuamnak nei ngawl, thasuah zuamnak a nei ngawl mi sungah tum tuk in mahmi thu zam san in hi. Mahmi thu cu a thupi nak imah um ma, a siasuak bel mi thu hi.
\v 22 Mihing cu vanhang nuai pen thasuah in zuamnak thinlung ah a cam lo mi thu, na hempoh sungah a nemcuam nak i um hum?
\v 23 A ni le ha hempoh te thasiat nak, a na dehnak vang sonsiat nak hi. Zan huncan ten hei in a thinlung dai tuk ma hi. Mahmi thu te vang a thupi nak imah um ma hi.
\p
\v 24 An ei tuk in hihen, thasuah zuamnak pen thinnop tuk in hihen, mihing sungah phatnak um ma hi. Pathian hehpih nak hang bek mah tihbang thu ngah thei hitin, keiman mu ing.
\v 25 Pathian phalnak thu um ngawl a kon an ei thei hum? A kon thuak thei hum?
\v 26 Na mai pen mipha pa cu cihthiam nak, theihnak le lungdam nak thu pia ci. Sual a nei mipa cu cimzet na dehnak thu hei hihen, Pathian mai pen a pha mipa cu pia tuk zei in a khawl mi thu hei hihen, pia hi. Mahmi thu cu a thupi nak imah um ngawl huih hil bang mi thu hi.
\s Na hempoh ah huncan tek in koih hi
\c 3
\p
\v 1 I hempoh a muhtei huncan um hi. Vanhang nuai pen ngaihsut nak hempoh a bawl mi huncan um hi.
\q2
\v 2 Hinnak huncan le thihnak huncan um hi. Ancin nak huncan le a cop leh nak huncan um hi.
\q2
\v 3 Mi thahnak huncan le tidam nak huncan um hi. Siatsuah sukbal nak huncan le inn sak huncan um hi.
\q2
\v 4 Kahnak huncan le nuihnak huncan um hi. Khawngaih huncan le lamnak huncan um hi.
\q2
\v 5 Suangvawk huncan le a khop leh huncan um hi. Pomdun nak huncan le khennak huncan um hi.
\q2
\v 6 Zeihnak huncan le neihnak a bo mi huncan um hi. Khawl mi huncan le vawknak huncan um hi.
\q2
\v 7 Puan bawhkek huncan le khuinak huncan um hi. Daiden no um huncan le otnak huncan um hi.
\q2
\v 8 Itnak huncan le huatnak huncan um hi. Ngaldo nak huncan le ngal lemnak huncan um hi.
\p
\v 9 Na dek tupan thasuah a zuamnak pen i nemcuam nak um hum?
\v 10 Mihing tei nuncak nak tuk Pathian piak mi cim le kham nak cu keiman mu zo ing.
\v 11 Na hempoh a huncan a kim ten lemcang mawi zet in bawl zo. Mihing thinlung vang kumkhua kho tik zo. Mah hang, Pathian thukhen mi thu a pat penpan a tawp tian mihing cu kan hei in bo thei ma.
\v 12 Lungdam nak thu tuah a nun laih hehpih nak thu sial ngawl a dang thu sungah lungdam nak a um ngawl mi thu cu keiman thei ing.
\v 13 Mi hempoh in an ei tuk in hihen, a zuamnak hempoh thu sungah lungnop tuk in hihen, Pathian hehpih phalnak thu bek hang um hi.
\v 14 Pathian bawl mi thu hempoh kumkhua a hihnak thu keiman thei ing. Bawl bet theih ma. Lak leh theih ma. Mi hempoh in a mai pen launak nei tukin Pathian in bawl hi.
\q1
\v 15 A cang awng zo mi thu cu a tuin a cang mi thu tuah bang ve hi. A cang tuk laih mi thu vang a cang sa mi thu tuah bang ve hi. A bosa huncan te vang Pathian in ngen leh hi.
\p
\v 16 Mah bek sial ngawl vanhang nuai thukhen nak mun pen sualnak thu a um mi hei hihen, dikcang nak thu pen sual a umnak thu hei hihen, keiman mu zo ing.
\p
\v 17 Pathian in midik cang mitei thu le mipha ngawl tei thu cu keiman thukhen tung hitin, keiman phawk ing. Itahum titale, ngaihsut nak le na dehnak hempoh thukhen nak huncan um hi.
\p
\v 18 Mihing tei umnak mun sihsan in ka ngaihsut mi cu mi hempoh ten Pathian cul tuk in le a muhte ngamsa bang a hihnak thu, a mun thei tuk in umnak pia hi.
\v 19 Mihing tei tawh mi thu cu nganhing te vang in tawk thei hi. Mahmi a muhtei panih in thu pakhat bek tawk in, pakhat a thih bang pakhat cu thi thei hi. Na hempoh ten nunnak pakhat bek nei hi. Mah hang mihing cu nganhing te sang, a thupi cuang nak um ma. Na hempoh a thupi nak imah um ma hi.
\v 20 Na hempoh umnak mun pakhat bekah heng thei hi. Na hempoh te leivul pen a hih bang, leivul ah kik leh thei hi.
\v 21 Mah hang a humlam ah a kai to thei mihing hawvang hei hihen, nuai lam lei sungah a tolhsuk thei mi nganhing hawvang hei hihen, a kon khen in thei thei hum?
\v 22 Mihing in a bawl mi thu sungah lungnop nak thu sang a pha saw a um ngawl mi cu keiman mu ing. Mahmi thu cu a ma ca tuk hi. A man a nungpen i thu cang tuk tih thei tuk in a kon pui tuk hum?
\s Neh tu hihnak, neihnak vang a thupi nak imah um ma hi
\c 4
\p
\v 1 Mah cengten, vanhang nuai pen bawlsiat nak te keiman ngaisung leh ing. Bawlsiat nak a co tute cu a kap haw ta vang, daihnak a pia thei tu um ma hi. Bawlsiat thei mite cu huham a neih hang, daihnak a pia thei tu um ma.
\q1
\v 2 Mah hang, a thisa mi in a nung laih mipa sang thupha um saw hitin, keiman ti ing.
\q1
\v 3 Mah hang, veikhat no hei a cang ngawl laih mipa, vanhang nuai pen bawl mi sual a mu ngawl laih mipa, mahmi panih pa sangin thupha um hi.
\p
\v 4 Mah cengten thasuah zuamnak tuah pha tak zet celhmi thu hempoh hei hihen, mah tihbang mi thu hang midang sonsiat nak thu hei hihen, keiman ngaisung ing. Mahmi thu cu a thupi nak imah a um ngawl huih hil mi thu hi.
\q1
\v 5 Cihnak a nei ngawl mipan khut zakawi in a capa taksa cu ei thei hi.
\q1
\v 6 Daihnak thu tuah seng in khutpham khat bek neihnak cu cimzet na deh nak, a khut a lang le langah a dim mi neihnak sang pha saw hi.
\p
\v 7 Mah cengten vanhang nuai pen a thupi nak imah a um ngawl ka ngaihsut leh bet mi thu cu,
\v 8 Mihing in ngualcam, canu le capa, U le nau nei ngawl pakhat bek vang thasuah zuamnak cu bo thei ma hi. A hauhsak nak cu mu in lungkim thei ma hi. Keiman mah le mah bawlsiat in a koi ca thasuah in, zuamnak nei hum tin dong awng mang. Hi thu vang imah thupi ma, cim le kham tik tu hi.
\q1
\v 9 Mihing cu pakhat bek sang panih cu pha saw hi. Thasuah in zuamnak nei tale a pha mi co ngah thei hi.
\q1
\v 10 Pakhat a bah tale pakhat in bawm thei hi. Pakhat pa a mah bek a bah tale a bawm tu um ma hi.
\q1
\v 11 Mihing panih langkhat zau tale lum thei hi. Mihing pakhat bek itin lum thei tuk hum?
\q1
\v 12 Mihing pakhat in pakhat cu a neh tale mahmi pa cu mihing panih in kham thei tuk hi. Khau zangthum hual mi vang baih no in cat thei ma hi.
\s Khantoh nak le minthan nak za kai vang a thupi nak imah um ma hi
\p
\v 13 Thu hilhnak co ngawl in kum U ham cihnak a nei ngawl mipa sang, cihnak a nei mizawng naupang pa cu pha saw hi.
\v 14 Mah tihbang mi naupang cu thonginn sung pen suak in kumpi umnak inn sungah heng thei hi. Mah tihbang mi kumpi pa cu a pai hihnak le kumpi khunnak ah a khung vang, haksat nak ah heng thei hi.
\v 15 Vanhang nuai ah a nung mi ngamsa hempoh ten, kumpi hihnak a co tu a panih nak pai nelah um thei haw hi tih cu keiman ngaisung ing.
\v 16 Mahmi kumpi uktu hempoh sial ten bo thei ma hi. A nungpen a heng mi thu vang, mahmi uktu pa cu lungkim ngawl in um haw tuk hi. A thungai in mahmi thu vang a thupi nak imah um ma, huih hil mi thu hi.
\s Pathian launak tuah U pat in
\c 5
\p
\v 1 Pathian inn ah na hawh ten na ke te cingkem in. Cihnak a nei ngawl mitei bawl mi biakpiak nak sang a thu ngaihnak bek zuam in. Misil ten a sualnak ngaisung thei haw ma.
\q1
\v 2 Na muk kam hahzau pah sin. Pathian mai pen awn tuk in na thinlung man lang tik pah sin. Pathian cu vanhum ah um hi. Nang cu leihum ah um ci. Mah hang, na kam tam pah sin.
\q1
\v 3 Na deh a tam hang mangmat theih bang, misil pai aw bang za hi.
\p
\v 4 Pathian nel pen muantaak nak thukam a bawl tale thukam na dek ngawl in um ma hen. Misil ten lungkim nak deih ma hi. Thukam na bawl mi bang pia in.
\v 5 Thukam piak mi bang nei ngawl sang thukam nak bawl ngawl mi cu pha saw hi.
\v 6 Na kam in na pum sungah sual heng tik pah sin. Kei cu sual zo ing hitin thuthang kamtai tu pai mai ah hilh mi thu um tik pah sin. Pathian in na awnkam aw cu a thinuuk suak hang, na bawl mi thu cu ita siatsuah tuk hum?
\v 7 Mang thu sungah hei hihen, kam tamnak thu sungah hei hihen, a thupi ngawl mi thu tel thei hi. Nang cu Pathian lau in.
\s Hausa milian le na dek tute vang a thupi nak imah um ma hi
\p
\v 8 Khua sung pen mizawng ca ngah te bawlsiat nak, dan thu lamzin pial in thudik ngawl nehsiah thukhen nak thu na muhten, mah tihbang ngaihsut nak a um mi cu thasiah in um pah sin. Mi U pa bawi pakhat nung pakhat a zoh bang, a ngeng bel a sang bel mipa cu zoh ciknak um hi.
\v 9 Leihum pen a cang mi khantoh nak hempoh ca hi. Kumpi a mah loli vang lo pen a suak mi phatnak co tuk hi.
\q1
\v 10 Sum deihnak a nei tupan sum a deihnak cu thinkim tik thei ma hi. Hausa milian deihnak a nei tupan hauhsak nak a khang to ta vang lungkim nak nei ma hi. Mahmi thu vang a thupi nak imah um ma.
\q
\v 11 Hauhsa in a khantoh ten a ei tute vang tam sesem hi. Hausa pan a mit tuah zo in a lungdam nak sial ngawl i lungdam nak nei hum?
\q1
\v 12 Na a dek tupan an tampi ei hei in hihen, dawm no a ei hei in hihen, hihbuh ci thei hi. Milian hausa pa cu a hihbuh kham tik thei ma hi.
\p
\v 13 Hausa milian pan a phatnak sia tik tuk tian a hauhsak khawl nak cu vanhang nuai pen a siasuak bel mi thu keiman mu zo ing.
\q2
\v 14 Mahmi hauhsak nak cu phat ngawlnak in tham mang thei hi. Hausa milian pai muh mi cate vang khut thacang in um hi.
\q1
\v 15 Mah ahima tale hausa milian pa cu a nui pum sung pen imah nei ngawl a suah tul bang bok pin kik leh tuk hi. Thazang suah zuamnak tuah ngah mi pakhat no hei a khut tuah la in keng thei ma hi.
\p
\v 16 A mah a hun bang a lamdang nak um ngawl a hawhnak a pha ngawl bel mi thu hi. Huih man ngah tuk thasuah zuamnak a nei tupan i phatnak co ngah hum?
\q1
\v 17 A ma ni hun le can cu khuathim sungah bo tik thei hi. Tampi noksak nak, thanau nak, thinuuk nak cu thuak hi.
\p
\v 18 Ka theih mi thu cu an eihnak thu, vanhang nuai pen Pathian piak mi nun sung hempoh, thasuah zuam in ngah mi phatnak sungah lungnop nak thu bawl pha hi. A mawi mi hi. Mahmi thu cu mihing ca tuk hi.
\v 19 Pathian piak mi hauhsak neihnak a co tu hempoh a ma ca eih tuk in hihen, thasuah zuamnak sung pen lungnop nak tuk in hihen, Pathian piak mi laksawng hi.
\v 20 A bosa mi ni le huncan tampi ngaisung pah sin. Thinnop nak cu Pathian piak mi hi.
\c 6
\p
\v 1 Mihing tampi sung pen tawh tam bel vanhang nuai ka muh mi thu cu,
\v 2 Deihnak hempoh thinkim tuk ngawl tian hauhsak neihnak le minthan nak cu Pathian in a pia ta vang, co le ngah tuk a piak ngawl hang a mah loli co ngah ma hi. A seng kha ngawl midang te lut tum in a co ngah mi thu cu imah a thupi ngawl a siasuak mi thu hi.
\p
\v 3 Mihing ten kum tampi nung in capa zakhat a nei ta vang a deihnak cangkim ngawl, phumnak co ngawl in a thi tale mah mipa sang a thisa in a hing tupa cu pha saw hi.
\v 4 Itahum titale, a thisa pa cu imah thupi nak um ngawl heng hi. Khuathim sung pen suak tul hi. A min cu khuathim tuah khuhcih in um tuk hi.
\v 5 Ni vang mu ma hi. Imah thu thei ma hi. Mah naven, a masa in son mipa sang daihnak co saw hi.
\v 6 A masa in son mipa cu kum thawngnih a nung ta vang, nemcuam nak um ma hi. Na hempoh te umnak munkhat bek ah hawh haw hima maw?
\q1
\v 7 Mihing ten thasuah zuamnak hempoh sungah lungdam tuk zuam ta vang, a eih nuam mi cu a thinkim thei ma hi.
\q1
\v 8 Cihnak a nei mipa cu misil pa sang i nemcuam nak um hum? Nunnak a nei mitei mai pen nungca khuasa thei mizawng pai phatnak cu i tihbang hum?
\q1
\v 9 A mah loli muh mi phatnak cu hampum duhham khang to sang in pha saw hi. Mahmi thu cu imah a thupi ngawl huih hil mi thu hi.
\q1
\v 10 A um mi thu hempoh sialsiah zo ing. Mihing a hihnak thu bek thei hi. Mihing cu a mah sang huham a nei mipa dem thei ma hi.
\q1
\v 11 Imah a thupi ngawl khantoh nak tuk a tam hang, mihing cu i nemcuam nak um hum?
\p
\v 12 Limbang in a tham thei mi imah a thupi ngawl nunnak huncan hempoh mihing nelah phatnak bawl theih mi cu a kon thei thei hum? Vanhang nuai mihing nungah a heng tuk mi thu hempoh a kon son thei hum?
\s Cihthiam theihnak le misil thu khenkhuai nak
\c 7
\p
\v 1 A sunglawi mi minthan nak cu ngimnam tui sathau sang pha saw hi. Thihni vang hinni sang pha saw hi.
\q1
\v 2 Mithi inn ah hawh cu puai bawlnak inn hawh sang phasaw hi. Itahum titale, mihing hempoh mithi inn pen lamzin tawp hi. Nunnak a nei mite vang a thinlung sungah koih in nung thei hi.
\q1
\v 3 Nuihnak sang thasiat nak pha saw hi. Itahum titale, thasiat nak mitmai in thinlung pha tik thei hi.
\q1
\v 4 Cihnak a nei mitei thinlung cu mithi inn ah um hi. Misil tei thinlung cu lungnop bawlnak inn ah um hi.
\q1
\v 5 Misil pai lasak mi ngaih sang cihnak nei mi thu hilhnak awnkam ngaih cu pha saw hi.
\q1
\v 6 Itahum titale, misil tei nuihnak cu bel nuai pen lingkung a kang mi aw tuah bang ve hi. Mahmi thu vang a thupi nak imah um ma hi.
\q1
\v 7 A thungai in bawlsiat nak cu cihnak a nei mipa sil tik thei hi. Nawhthuh vang thinlung sia tik thei hi.
\q1
\v 8 A tawpnak thu cu a patnak sang pha saw hi. Supnak a nei tupai lungmu cu pualthau mi ngal pa sang pha saw hi.
\q1
\v 9 Thinuuk suak tuk tian in na thincom pah sin. Thinuuk nak cu misil tei thinlung sungah um thei hi.
\q1
\v 10 Tanglaih huncan cu a tu huncan sang ita pha saw hum tin dong pah sin. Mah tihcun na don tale cihnak thu bang thudot mi hima hi.
\q1
\v 11 Cihnak cu neihnak lo bang pha in, ni a mu tuten lungdam nak son thei hi.
\q1
\v 12 Itahum titale, cihnak in khamsak thei hi. Sum vang khamsak thei hi. Cihthiam theihnak cu izah takin a sunglawi hum tih mi cu cihthiam nak a co tupan nunnak vang co thei hi.
\p
\v 13 Pathian na dehnak thu cu ngaisung in. A kawi tik thei mite cu itihbang cam tik thei tuk hum?
\q1
\v 14 Hauhsak laih huncan in lungdam in. Haksat cimnak thuak mi huncan ten ngaisung in. Mihing in a nungpen a heng tuk laih mi thu thei tuk in, Pathian in hauhsak nak le haksat nak cu a thekdun in pia thei hi.
\p
\v 15 A thupi ngawl ka um mi huncan hempoh mu zo ing. Midik cang in a dikcang nak sungah sun nak thu hei hihen, misual in a sualnak thu sungah nunsau nak thu hei hihen keiman mu ing.
\q1
\v 16 A palcat hei in dikcang pah sin. A palcat hei in cihnak nei pah sin. Ita na phatnak siatsuah nuam nge cim?
\q1
\v 17 A palcat hei in siasuak pah sin. Huatsuak pah sin. Huncan a kim laih ngawl ita thi nuam nge cim?
\q1
\v 18 Hi awnkam letkhim tuk cu pha hi. Hah thong pah sin. Pathian a lau tupa cu thu hempoh sung pen suak ca tuk hi.
\q1
\v 19 Khuapi sungah a um mi ngalkap sawm sang, cihnak a nei mipa cu cihnak hang huham nei saw hi.
\q1
\v 20 Sualnak nei ngawlin a pha mi nuncan ziaza tuah a nung tu mipha pakhat no hei hi leihum ah um ma.
\q1
\v 21 Midang tei son mi awnkam hempoh sialsiah pah sin. Na sila tei tamsiat nak aw za tuk ci.
\q1
\v 22 Nangmah loli in mi dang te vei tampi tamsiat nak thu cu na thinlung sung pen thei ci.
\p
\v 23 Hi thu hempoh te keiman cihnak thu tuah dongkan zo ing. Cihnak a dim nei ing hitin ka ti ta vang, cihnak cu keimah tuah kang zet hi.
\q1
\v 24 A khuala mi thu, a thuk zet mi thu cu a kon zei in mu thei hum?
\q1
\v 25 Cihnak thu dong kan zei suak thei tuk in hihen, siasuak zet in nuncan ziaza sual le sil hang sualnak te thei tuk in hihen, keimah le ka thinlung in a bang ve zuam ing.
\q1
\v 26 Thang le suuk te ngaisung bawl in khau tuah a ken kawm thei mi numei cu thihnak sang kha saw hi tih cu keiman tawk zo ing. Pathian thinlung a tawk tupa bek in mahmi numei khut sung pen luat tuk hi. Sualnak a bawl thei mipa cu man ngah tuk hi.
\p
\v 27 Thuthang phuang tu tihmi cu keiman zei in ka muh laih ngawl mi mu tuk in pakhat nung pakhat cek sial ten,
\v 28 Pano thawngkhat (1,000) sung pen pakhat cu keiman mu zo ing. Numei thawngkhat (1,000) sung pen pakhat no hei mu mang.
\q1
\v 29 Ka muh mi thu pakhat bek tihmi cu Pathian in mihing cu dikcang tuk in bawl naven, mihing ten ngaihsut nak tampi zei in um haw zo.
\c 8
\p
\v 1 A kon cihnak a nei mi bang um hum? A thuk mi a sullam a tihnop nak a kon thei hum? Cihnak in cihnak a nei mitei mitmai cu vak tik thei hi. A mitmai a lamdang cuang ngalhan nak thuam nei thei hi.
\p
\v 2 Pathian mai pen a bawl mi thukam zo in kumpi thusuah cu ngak in.
\v 3 Thudik cu zam san in a nel pen suak tul pah sin. Phat ngawlnak thu cu lenlo pah sin. A deihnak bang thukhen tuk hi.
\v 4 Kumpi thusuah nak sungah huham um hi. Topa nangman i tin bawl cim hitin a kon son hum?
\q1
\v 5 A thusuah a cingkem tupan thihnak pen luat tuk hi. Cihnak a nei mitei thinlung cu huncan hei hihen, thukhen nak thu hei hihen thei thei hi.
\q1
\v 6 Mihing ngaihsut nak hempoh ca hun le can tuah thukhen nak thu um hi. Mah naven, a ma hum ah haksat cimnak nasezet thuak hi.
\q1
\v 7 A heng tuk laih mi thu cu thei ma hi. Itihbang heng tuk hum tih cu pakhat no hei son thei ma hi.
\q1
\v 8 Hawvang cu uk in a kelen thei tu mihing pakhat no hei um ma hi. Thihnak huncan a hen ten huham um ma hi. Mahmi ngaldo nak thu sung pen suahcak nak a thu um ma hi. Sual a bawl ta vang sual in mahmi thu sung pen pan thei ma hi.
\p
\v 9 Hi thu hempoh te keiman mu zo ing. Vanhang nuai pen bawl mi hempoh ngaisung zo ing. Na phatnak siatsuah tuk in pakhat le pakhat uknak huncan um hi.
\v 10 Mah bek sial ngawl a thiangtho umnak mun ah a hawh tu misual ten phumnak a co tuk thu hei hihen, sual a bawl awng mi khuapi sung pen a muhte a kuamah in a phawh ngawlnak thu keiman mu zo ing. Mahmi thu te vang a thupi nak imah um ma hi.
\p
\v 11 Sualnak thu cu a manlang cek in dan a tatnak a piak ngawl hang, mihing tampi ten sual bawl tuk in a kho zet mi lungmu nei haw.
\v 12 Sualnak a bawl tupan vei zakhat tian sualnak bawlin a nunnak a sau ta vang, Pathian launak a nei tuten a mai pen launak hang phatnak co haw tuk hitin a thungai in keiman thei ing.
\v 13 Sualnak a bawl tu mihing cu Pathian mai pen launak a neih ngawl hang phatnak co ma hi. Lim tuah a bang ve mi a nunnak cu sau tuk ma hi.
\p
\v 14 Leihum pen a cang thei mi a thupi nak imah a um ngawl mi pakhat cu a sual bawl nak hang a co tak mi bang, midik cang hek khat ten a sualnak thuak haw hi. Mah bang bok midik cang pai bawl mi thu hang, a co tak mi thaman cu misual hek khat ten thuak haw hi. Mahmi thu te vang a thupi nak imah um ma hitin, keiman ti ing.
\v 15 Mah ten lungnop nak thu vang keiman thangphat ing. Itahum titale, mihing cu vanhang nuai pen an eihnak, nopnak thu sang a pha saw mi thu um ma hi. Vanhang nuai pen Pathian piak mi nunnak huncan sung pen, thasuah zuam in co ngah mi nemcuam nak sungah mahmi phatnak bek cu kho tuk hi.
\p
\v 16 Mihing hek khat ten sun le zan hihbu ngawl a um theih hang cihnak thu thei tuk in hihen, leihum pen a bawl mi thu te zo tuk in hihen, keiman ka thinlung cu sosuah ing.
\v 17 Pathian bawl mi thu hempoh ka zohten, vanhang nuai pen bawl mi hempoh te mihing in kan in cek ta vang bo thei ma. Zuamnak tuah cek ta vang a venghawng thei thei ma hi. Mah bek sial ngawl cihnak a nei tupan keiman thei mang hitin ngaisung naven, a ngaihsut nak pitung ma hi.
\s Mihing hempoh tei a tawpnak, Pathian khut sungah um hi
\c 9
\p
\v 1 A humpen sonsa mi thu hempoh dongkan tuk ka ngaihsut mi cu midik cang pa le cihnak a nei miten, a muhtei bawl mi thu cu Pathian khut sungah um hi. A ihmi sialsiah minthan nak hempoh thu hang, a kuamah in thei thei ma hi.
\v 2 Na hempoh cu na hempoh thu tuah peh zom hi. Midik pa le midik ngawl pa, mipha pa le mipha ngawl pa, mithiangtho pa le mithiangtho ngawl pa, biakpiak nak bawl tupa le a bawl ngawl tupa, sualnak a nei ngawl mipa le sualnak a nei mipa, thukam nak a nei tupa le thukam nak a lau tu miten thu pakhat bek cu tawk thei haw hi.
\p
\v 3 Vanhang nuai pen bawl mi thu hempoh sungah a tel mi thasiat nak thu cu mi hempoh ten thu pakhat bek tuah tawk thei hi. A thungai in mihing tei thinlung cu sualnak lungmu tuah dim hi. A nun sung, a mun silnak lungmu lenlo in mah cengten thi thei haw hi.
\v 4 Nunnak a nei mipa in mihing te tuah peh zom nak a nei laih mipa cu muansan nak um hi. A nung mi uico cu a thi mi pawpi sang pha saw hi.
\q1
\v 5 Nunnak a nei mi pan a thihnak tuk cu thei hi. A thi tupan imah thu thei ma hi. A sualnak thaman hei co ma hi. A mah vang phawkngil thei haw ma hi.
\q1
\v 6 A itnak, huatnak, sonsiat nak cu tham hi. Vanhang nuai pen bawl mi hempoh thu sungah midang te tuah tokhel in sengkha pah sin.
\p
\v 7 Hawh ten. Lungdam nak thinlung tuah an ei in hi. Thatui nak thinlung tuah cabit tui in in hi. Na bawl mi thu hempoh Pathian in sang hi.
\v 8 A cat ngawl puan ngo silh in. Na lu vang ngimnam tui sathau ko tik pah sin.
\v 9 Vanhang nuai ah a thupi nak imah a um ngawl a piak mi nunnak hempoh sungah na ihmi na zi tuah thatui zet nunnak huncan bo tik in. Hi thu cu nunnak tuah vanhang nuai pen thasuah zuamnak thu sung pen na co mi nemcuam nak thu hi.
\v 10 Na deh bawl tuk hempoh thasuah zuamnak tuah dek in. Itahum titale, nang cu a tu hawh in na hennak tuk mun tihmi thihnak ngam sung pen na dehnak um ma hi. Ngaihsut nak um ma hi. Theihnak um ma hi. Cihnak um ma hi.
\p
\v 11 Mah cengten vanhang nuai ah a um mi thu hempoh ka zoh kik leh ten, a manlang thei mipan zuamnak tuah tai naven neh thei ma hi. Thazang ngilnak a nei tupan, ngaldo in neh thei hi. Ngaihsut nak pha nei tupan hauhsak nak co ngah thei ma hi. Thiamnak a nei tupan midang tei mai pen mitmai pha ngah thei ma hi. Na hempoh thu sungah huncan a kimnak, a mansa in a um bang a cangthei mi cu keiman mu ing.
\p
\v 12 Mihing in a huncan thei thiam ma hi. Haksat nak bawl suuk awk mi ngasa bang in hihen, thang sungah a awk mi vano bang in hihen, mihing hempoh ten haksat bawl mi huncan sungah phawkkhak ngawl heng in awk thei haw hi.
\s Cihnak cu ngal hiamnam sangin hiam saw hi
\p
\v 13 Vanhang nuai pen keiman mu in thangphat tak mi cihnak cu,
\v 14 Khuapi sungah mihing dawmno khuapi neu pakhat um hi. Huham a nei mi kumpi pakhat hung in mahmi khuapi a pawlam pen nasezet ngalkap bu te koih in kiim hi.
\v 15 Mahmi khuapi sungah a um mizawng cihnak a nei mi pakhat in, a cihnak tuah mahmi khuapi cu pan hi. Mah naven, mizawng pa cu a kuamah in phawk ma hi.
\v 16 Mah ten ka son mi thu cihnak cu thazang ngilnak sang pha saw hi. Mah naven, mizawng pai cihnak cu sumsial thei haw ma hi. A ma awnkam ngai thei haw ma hi.
\q1
\v 17 Uktu pan misil tei aunak aw ngaih tuk sang daiden no cihnak nei in a son mi thu cu ngai thei saw hi.
\q1
\v 18 Cihnak cu ngal hiamnam sang pha saw hi. Sual a bawl tupa cu a pha mi thu te siatsuah thei hi.
\c 10
\p
\v 1 Misil pai bawl mi ngimnam tui sathau in a thi mi tho a nam tik bang, dawm laih no silnak in cihnak le minthan nak a lang tik tupa cu a mah bang cang tik thei hi.
\q1
\v 2 Cihnak a nei mitei thinlung cu a taklam khut ah um hi. Misil pai thinlung cu a veilam khut ah um hi.
\q1
\v 3 Misil pan lamzin ah a hawh laih hei in kei cu misil ing hitin mi hempoh tei lakah son thei hi.
\q1
\v 4 Uktu in nangmah thinuuk tik tale na umnak tuk mun pen thawn pah sin. Supnak in a nasezet sualnak dai tik thei hi.
\q1
\v 5 Uktu sualnak hang a cang thei mi vanhang nuai pen ka muh mi siatnak thu cu,
\v 6 Misil miten a sangnak mun, milian hausa ten a niamnak ah khun mi thu,
\v 7 Sila ten cipuh khung in bawi U pa ten sila bang, leihum ah ke tuah a hawhnak thu keiman mu zo ing.
\q1
\v 8 Khuk a co tupan mahmi khuk sungah cak tuk hi. Huan a siatsuah tu cu ngul cih nak thuak tuk hi.
\q1
\v 9 Suang te a thawn tupan thinkham nak thuak tuk hi. Thingphuk tupa vang liam tuk hi.
\q1
\v 10 Heipi a mawl ten tat ngawl um tale thazang tampi suah kul hi. Cihnak in a thu neihnak a piak hang, lungdam nak tam hi.
\q1
\v 11 Ngul in zial in thonnak a co ngawl tu, a cik tale thu ip a son tupa cu lungdam nak um ma hi.
\q1
\v 12 Cihnak a nei mipai awnkam cu mawi hi. Misil pai awnkam cu a mah le mah thon thei hi.
\q1
\v 13 A ma awnkam a pat nak cu silnak, a tawpnak cu sual a bawl thei mi silnak hi.
\q2
\v 14 Misil pa cu a kamtam thei hi. Mah naven a cang tuk laih mi thu cu mihing in son thei ma hi. Mihing nungpen itihbang cang thei hum tih cu a kon son thei hum?
\q1
\v 15 Khuapi hawhnak lamzin a nei ngawl tupa bang misil pan thasuah zuam naven, midang te cim le kham tik thei hi.
\q1
\v 16 Sila pan ukin bawi U pa te a huncan nei ngawl in, zing khawma no an a ei thei mi ngam cu thupha um ma hi.
\q1
\v 17 Kumpi miphun uknak bawi U pa ten a valthau an eihnak nei ngawl in, huncan a kim ten tha dim tuk bek an a ei thei mi ngam cu thupha um hi.
\q1
\v 18 Thazawng leita hang, inn cu muat thei hi. Khut tuah lem ngawl um tale inn tui cak thei hi.
\q1
\v 19 Lungnop tuk in puai bawl thei haw hi. Cabit tui vang lungnop tik thei hi. Sum cu thu hempoh neh thei hi.
\q1
\v 20 Kumpi cu thinlung hei in tamsiat pah sin. Mi U pa cu zaunak sung hei pen tamsiat pah sin. Vanhum ah a um mi vano in mahmi aw cu keng tuk hi. A leng thei miten mahmi thu lak tuk hi.
\s Tui hum ah an vawk in
\c 11
\p
\v 1 Na an cu tui humah vawk in. Huncan a ngeipi ten mu leh tuk ci.
\q1
\v 2 Mihing salih bek sial ngawl mihing liat tei lakah sem in. Leihum ah ithu heng tuk tih cu thei ma ci.
\q1
\v 3 Meingo cu nguahtui tuah a dim ten, leihum ah zuu thei hi. Thingkung cu hanglam ah a tuu hei in hihen, saklam ah a tuu hei in hihen, a tuknak mun ah um hi.
\q1
\v 4 Huih a sialsiah thei tupan anci vawh thei ma hi. Meingo a muang thei tupa vang cang at awng ma hi.
\q1
\v 5 Hawvang hawhnak lamzin hei hihen, naupai numei pum sung pen a nguh te itihbang khang hum tih hei hihen, a theih ngawl bang na hempoh a bawl tu Pathian na dehnak te thei thei ma hi.
\q1
\v 6 Zinglam huncan ten anci vawh un. Zan huncan ten hei in vawh ngawl in um pah sun. Itahum titale, i thu nemcuam nak um tuk tih hei hihen, a panih in a bang ve nemcuam nak hei hihen thei ma hi.
\s Na khanno laih in a nung mi Pathian phawk in
\q1
\v 7 A thungai in khuavak cu hum hi. Khuavak a al cu mu in nopnak thu um hi.
\q1
\v 8 Mah hang, mihing cu nunsau in a cat ngawl thatui naven, khuathim huncan cu phawk hen. Mahmi huncan cu ngei tuk hi. A cang tuk mi hempoh a thupi nak ima mah um ma.
\q1
\v 9 Khang no te aw, na khangno laih nopta in um in. Na khanno sung na thinlung nopnak ah um in. Na deihnak lamzin le na theihmi lamzin zui in. Mah naven, mahmi thu hempoh Pathian in cekin nangmah sual thaman pia tuk hitih cu phawk in.
\q1
\v 10 Mah hang, thasiat nak thu le haksat cimnak thu vawk in. Kum dawm thu le khangno thu cu a thupi nak imah um ma hi.
\c 12
\p
\v 1 Ka um nop thei ma hitin na son mi kum huncan siatnak huncan a hen laih ngawl, na khanno laih hei in nangmah bawl tupa phawk in.
\q1
\v 2 Ni tuah vaknak, hade le aksi te thim in nguah a zuk cengten, sal tawtok a zuu thei mi huncan a hen laih ngawl phawk in.
\q1
\v 3 Mahmi huncan ten inn cing tute hing tawtok a kho miten thakiam haw tuk hi. Cang lial tute a dawm hang cawl haw tuk hi. Tuvelh kongka pen a zo tute khuathim in lim haw tuk.
\q1
\v 4 Canglial nak aw a dem ten lamzin bul pen kongkhah te khak in um tuk. Vano aw a zak ten khawma no tho tuk hi. Lasa thiam numei hempoh ten a aw neu haw tuk.
\q1
\v 5 Mahmi huncan ten a sang mi thu ten lau haw tuk. Lamzin haksat nak tawk tuk hung hitin ngaisung thei haw. Almond meitei thingkung pak tuk hi. Khau in a mah le mah ngit tuk hi. A deihnak kiam tuk hi. Itahum titale mihing cu kumkhua nunnak ah hawh tuk a um hang, kahnak tuah lamzin pen vak kawkawi hi.
\q1
\v 6 Sumkhau zuukin, sui khuathai kehnak, tuikhuk a sin a kehnak, tuikuang bul pen lengke siatnak, hi thu hempoh te cang haw tuk hi.
\q1
\v 7 Mahmi huncan ten leivul cu a ma umnak lei ah hei hihen, hawvang cu a masa a pia tu Pathian nelah hei in hihen, pin leh tuk hi.
\q1
\v 8 A thupi nak imah a um ngawl mi hempoh imah a thupi ngawl cang haw tuk hitin, thuphuang tu saza pan hilh hi.
\s Pathian lau in dan thu cingkem in
\p
\v 9 Thuphuang tu saza pan cihnak a neih mi bang, mipi tei lakah cihthiam nak thu hilh mi um hi. Zuamnak tuah bawl in thupaucap nak tampi zei in thukhen hi.
\v 10 Thuphuang tu saza pan thungaih tuk zei in a ngat mi awnkam cu a dik mi awnkam, thudik awnkam hi.
\p
\v 11 Cihnak a nei mipai awnkam cu ngolhzum tuah hei in hihen, tuukhal ngeng bel pai lakah ap in mipi tei vah mi thik hiam tuah bang ve hi.
\v 12 Mah cengten, ka capa mah tihbang mi thu hilhnak ngai in. Laibuu tampi bawl in bo thei ma hi. Lai zo in zuamnak thu cu mah le mah noksak tik tu hi.
\q1
\v 13 A dawltawp nak awnkam thu cu Pathian launak tuah dan thukham te cingkem in. Hi thu cu mihing tuah a seng mi thu hempoh te dawl tawpnak thu hi.
\q1
\v 14 Itahum titale, Pathian in a thup no in a sel mi hempoh pen pan in thu hempoh a pha le a sia te cek in thukhen tuk hi.