cnw_reg/17-EST.usfm

\id EST
\ide UTF-8
\rem The text in this file was extracted from C:/DCS/Chin, Ngawn/WORD/17. Esther. docx.
\mt Esther
\h Esther
\mt Esther
\toc1 Esther
\toc2 Esther
\toc3 est
\s Kumpi nu Vashiti a hawlvawk nak
\c 1
\p
\v 1 India ngam penpan Ethopia ngam tian ngam za le kulluansalih (127) uktu kumpi Ahasuerus cu,
\v 2 Shushan kumpi tohkham khunnak hum ah khung in a uknak kum thum ten,
\v 3 Persia ngal bawi, Media ngawl bawi, ngam sung bawi U pa te, uktu te cu sam in bawi U pa te, a sila hempoh ca puai bawl hi.
\v 4 Mah ten ngam sung hauhsak nak, minthan nak ni za le sawmliat (180) sung lak hi.
\v 5 Mahmi huncan a bo cengten kumpi cu Shushan kumpi innpen hulawmkhawm tu U pa le naupang hempoh ca, kumpi inn bul huan sung pen ni salih sung puai bawl sak hi.
\v 6 Ngun tuah a kawn bulh mi suangngo khuam sungah mepian puannem khau tuah dok in puannem kalaka a ngo, a hing, a pawl tuah hei hihen, a phah mi suang a pek san, a pawl, a ngo, a hang hum ah sui le ngun phah mite hei hihen, huan a dim hi.
\v 7 Kumpi hauhsak nak bang a lamdang cuang mi sui khuathai le cabit tui tampi in haw hi.
\v 8 Cabit tui tampi a in nak thu cu dan thu bang in hi. A kuamah in ngawl um thei ma hi. Mihing hempoh ten a ma deih nak thu bang bawl tukin kumpi inn sung U pa hempoh te kumpi in thupia hi.
\p
\v 9 Kumpi nu Vashiti vang, Ahasuerus kumpi inn sung numei hempoh tei ca puai bawl hi.
\v 10 Kumpi nu Vashiti cu a mawi zet hang,
\v 11 Ni salih nak ni a kim ten kumpi cu cabit tui a in hang, lungdam nak thinlung a neih ten kumpi nui mawi nak le minthan nak cu kumpi le mipi hempoh te lak tukin, kumpi nu Vashiti cu kumpi lukhu khu tikin a nelah a pui tuk thu Mehuman, Biztha, Harbona, Bigtha, Abagtha, Zethar le Carkas tih mi na dek tu numei uktu salih te cu thupia hi.
\v 12 Mah ten numei uktu tih mi thupiak cu kumpi nu in a el hang, hung ngawlin um hi. Mah hang, kumpi a thinuuk suak cu mei bang in alh hi.
\p
\v 13 Mah ten Carshena, Shethar, Admatha, Tarshish, Meres, Marsena, Memucan tih mi,
\v 14 Kumpi mitmai a cat ngawl mu in a sunglawi bel mi ngam Persia, Media kumpi ca salih ten a bulah khung in dan thukham lamzin a zui tu hempoh te le kumpi thuvaisiam mi dan bang, a thu cungcang a thei cihnak a nei tute sam in,
\v 15 Numei uktu a hilh ten kumpi Ahasuerus thupiak mi cu kumpi nu Vashiti in a thu a ngaih ngawl hang, dan thukham bang a mah cu itihbang bawl tuk hum tin a dot ten,
\v 16 Memucan in kumpi nu Vashiti cu kumpi bek sual bawl mi hima hi. Kumpi Ahasurus uknak ngam sung hempoh ah a um na dek tute le mizawng hempoh sual bawl zo hi.
\v 17 Kumpi Ahasurus in kumpi nu Vashiti sam in, kumpi nu cu hung ma hitin mun hempoh ah a son hang, kumpi nu bawl mi hi thu cu numei hempoh ten za in a pasal hempoh imah sumsial ngawlin um haw tuk hi.
\v 18 Kumpi nu bawl mi hi thu cu Persia, Media kumpi nu in a zak ten bawi U pa hempoh tei lakah mah bang bok a hilh leh hang, maisot thei ngawl mi thinlung, a thinuuk nak thu pungzai tik tuk thu um tuk hi.
\v 19 Vashiti cu kumpi Ahasurus nelah lut tum leh tuk ngawl in a deihnak a um tale lut tum tik pah sin hitin, thupia hi. A thek thei ngawl mi thupiak nak nei tukin Persia, Media mipi tei lakah khum in ngan tik in hi. Vashiti sang a pha saw numei te vang kumpi nu hihnak ah khaisang in hi.
\v 20 Mah tin bawl tale kumpi piak mi thupiak cu a uknak ngam hempoh ah thuthan in, numei hempoh ten a pasal a sia le a pha cu U pat haw tuk hitin kumpi le bawi tei mai pen ngen hi.
\v 21 Mahmi awnkam cu kumpi le bawi ten deih in Memucan hilh mi bang kumpi in bawl hi.
\v 22 Mi hempoh in a inn uk tuk thu, a miphun awnkam man tuk thu, ngam sung hempoh pen awnkam namkim tuah a sullam let in ngam hempoh ah a thupiak nak lai pia hi.
\s Esther cu kumpi nu hihnak ah khaisang
\c 2
\p
\v 1 Mah cengten kumpi Ahasurus a thin dai ten Vashiti hei hihen a bawl mi thu le a ma a lang lam ah thukhen nak thu hei hihen phawk in hi.
\v 2 A ma nelah na dek tu sila te vang a mawi mi khanglai him cu kumpi ca a zeih tuk thu phalnak pia hi.
\v 3 A mawi zet mi khanglai him hempoh cu Shushan kumpi inn pen khanglai tei umnak ah hulawmkhawm tikin kumpi numei uktu, khanglai uktu, Hegai cu ap tukin ngam sung hempoh ah kumpi hihnak cu pia hi. Thiangtho tik tukin si namkim cu pia in hi.
\v 4 A deih mi khanglai him cu kumpi Vashiti hihnak ah pia in hitin a hilh mi awnkam cu kumpi in a deihnak mah tihcun bawl hi.
\p
\v 5 Mahmi huncan ah Shushan khuapi pen Benjamin miphun Kish, Shimei, Jair tei sung pen a suak mi Mordicai tihmi Judah miphun pakhat um hi.
\v 6 A mah cu Babilon kumpi Nebuchadnezzar mat mi Judah kumpi Jeconiah pen pan mat a co miphun sungah a tel mi hi.
\v 7 A mah cu a pasel nau ta bel canu Hadassah tihmi Esther cu cawm hi. Mahmi mo nu cu nu le pa nei ma hi. A mah cu a thuang mawi zet mi hi. A nu le pa a thih ten Mordicai in la in a canu bang ngai sung hi.
\p
\v 8 Kumpi thupiak nak thu suah ten khanglai tampi te cu Shushan kumpi inn ah hulawmkhawm tikin numei uktu Hegai nelah ap in, Esther vang kumpi inn ah sam in Hegai nelah ap haw hi.
\v 9 Esther cu Hegai thinlung a tawk hang, mitmai ngah in Hegai cu a thiangtho mi si nam kim tuah a piak mi van te a man lang pia hi. Kumpi inn pen ten mi sila salih te vang pia in Esther le a sila numei te cu khanglai kumpi inn sungah a sunglawi bel mi umnak mun ah khaisang hi.
\v 10 Esther in a miphun le a ngualcam hempoh lang tik tuk ngawlin, Mordicai in ngallin nak a piak mi bang lang tik ngawlin um hi.
\v 11 Esther in itihbang um hum tih hei hihen, a nelah itihbang in bawl haw tuk hum tih hei hihen, Mordicai cu thei tik tukin khanglai umnak kumpi inn mai ah nisial in hawh hi.
\p
\v 12 Mahmi khanglai tei dan bangin kum khat a kim ten pakhat nung pakhat a thek dun a kul nak bang kumpi Ahasurus nelah lut tum hi. Ha luk sung myrrh sathau, ha luk sung ngimnam tui namkim a thiangtho tik thei mi si nam kim mang in a thiangtho thei tuk thu a celhten mah tin huncan bo tik hi.
\v 13 Mah cengten khanglai nu cu kumpi nelah luhtum nak huncan a hen ten a deihnak hempoh ngen in khanglai kumpi inn pen kumpi inn ah la hi.
\v 14 Zan huncan heng in zinglam huncan ten kumpi numei uktu, zino uktu, kumpi tilngeh Shaashgaz cing tu a panih numei inn ah pin leh hi. Kumpi in deih in a min tuah a sam ma tale a ma nelah luh tum leh nak ngah ma hi.
\v 15 A canu bang Mordicai cawm mi a pasel nau tabel, Abihail canu Esther cu huncan heng in kumpi nelah a luh tum ten kumpi numei uktu, khanglai uktu Hegai bawl mi thu sial ngawl imah ngen ngawlin, Esther a mu tu hempoh ten deih thei haw hi.
\p
\v 16 Mah tihcun kumpi Ahasurus in kumpi uknak kum salih, Tebeth tihmi ha sawm ha ten Esther cu kumpi inn sungah a lak cengten,
\v 17 A dang numei khanglai him te sang Esther thinlung a nem tik hang, kumpi in a dang numei hempoh te a deih sang Esther a deih saw nak, a lu hum ah sui lukhu koih in kumpi Vashiti hihnak ah khaisang hi.
\v 18 Mah ten kumpi in Esther puai tin a nasezet mi puai cu kohtei ca a bawl hang, uknak ngam hempoh cu bawi U pa hah in hauhsak nak tuah a mawi mi laksawng pia hi.
\s That tukin a ngaihsut nak cu Mordicai in a pholhsuah nak
\p
\v 19 Khanglai him ten a veinih nak a hulopkhawm ten, Mordicai cu kumpi inn ah kongka cing tu bawi hi.
\v 20 Esther cu Mordicai nelah a cawm laih tak a ma awnkam a ngaih bang a thu a ngaih laih hang, Mordicai ngallin nak a piak mi bang a miphun a ngualcam hempoh te lang ngawl in um hi.
\v 21 Mahmi huncan in Mordicai cu kumpi inn kongka cing bawi a hih laih tak Bigthan le Teresh tihmi kumpi numei uktu kongka cing tu panih te a thinuuk hang, kumpi Ahasurus cu that tuk hitin zuamnak nei haw hi.
\v 22 Mahmi thu cu Mordicai in a theih ten kumpi nu Esther nelah hilh hi. Mah tihcun Mordicai in a hilh mi thu cu Esther in kumpi nelah hilh hi.
\v 23 Mahmi thu cu dongkan in a man hi tih a theih ten, mahmi a mu panih cu thingkung ah ngui awk tik cengten kumpi mai, kumpi sialsiah nak laibu sungah ngan hi.
\s Judah miphun te siatsuah tukin Haman in a sia suak mi ngaihsut nak
\c 3
\p
\v 1 Mah cengten kumpi Ahasurus in Agag miphun, Hammedatha capa Haman cu khaisang tukin a ma nelah a um bawi hempoh te sang a sunglawi saw mi umnak mun pia hi.
\v 2 Kumpi kongka ah a heng mi kumpi sila hempoh ten a thupiak mi bang Haman cu a lukun in bia haw hi. Mordicai cu lukun bia ngawl in um hi.
\v 3 Kumpi kongka ah a heng mi kumpi sila ten nangman kumpi thupiak cu ita el cim hitin nisial in Mordicai cu dongin ngallin nak a pia ta vang,
\v 4 Mordicai in kei cu Judah miphun ing hitin don leh in a muhtei awnkam thu a ngaih ngawl hang, a mun Mordicai awnkam a kho le kho ngawl thei nuam in Haman cu hilh haw hi.
\v 5 Mah tihcun Mordicai in lukun bia ngawl in a umnak thu cu Haman in a theih ten a thinuuk suakin,
\v 6 A mun Mordicai miphun a hilh hang, Mordicai pakhat bek that tale a thindai tuk ma hitin Haman in ngai sungin Mordicai miphun pih Ahasurus uk nak ngam sung hempoh ah a um Judah miphun hempoh that tuk in ngaisung hi.
\p
\v 7 Mah hang Ahasurus uknak kum heinih, Nisan tih mi hakhat ten nisial in, ha sialnak bang zui in Adar tih min a nei ha heinih ha tian Haman mai pen kungkhai nak bawl haw hi.
\v 8 Mah cengten Haman cu kumpi Ahasurus nelah lut tum in a dang miphun hempoh te tuah nuncan ziaza dan cun ngawl, kumpi thupiak ngai ngawlin uknak ngam sungah ngam sung miphun hempoh sung pen mun hempoh ah khen kek in a um miphun pakhat um hi. Mahmi miphun phalnak thu a piak ten nemcuam nak um ma hi.
\v 9 Topa in lungkim nak a nei tale mahmi miphun siatsuah hen tin a thupiak mi um hi. Mahmi thu a bawl tute cu van koihnak innpi sungah ngun cuai tingkhat (100,000) pia tukin keiman pia tung hitin, ti hi.
\v 10 Kumpi in mahmi ngun cu nangmah keiman pia ing hi.
\v 11 Mahmi miphun vang na bawl nuam poh in bawl mi phalnak um tik tukin, na nelah keiman pia ing hitin a khut zungbut dukin Judah miphun tei ngal a himi Agag miphun Hammendatha capa Haman cu pia hi.
\p
\v 12 Mah ten hakhat ha ni heithum ni in lai ngan tute sam in aiawh tu kumpi, ngam hempoh uktu khuapi bawi, mun hempoh ah a bawl tu U pa ten Haman thucah mi bang, miphun hempoh tei son mi awnkam phunkim tuah kumpi Ahasurus thupiak mi lai cu ngan in kumpi khut zung tuah tacik khen hi.
\v 13 Adar tihmi ha heinih ha ni heithum ni khat sung in Judah miphun Upa naupang, numei naupang hempoh that a muhtei neihnak lonsak tukin, thupiak nak lai cu lai tai tu tangval te tuah ngam sung hempoh ah pia hi.
\v 14 Mahmi thu cu miphun hempoh ten, mahmi ni cu a masa um tukin ngam sung hempoh ah thuthan nak thupiak mi lai hi.
\v 15 Shushan kumpi inn sung pen mahmi thupiak nak lai thu a than cengten, kumpi thupiak nak bang lai tai tu tangval ten a man lang a tai in hawh haw hi. Kumpi le Haman cu cabit tui in nak puai ah khungin a um laih tak Shushan khuapi cu haksat nak ah heng hi.
\s Esther bawm tukin Mordicai sosuah nak
\c 4
\p
\v 1 Mah a thu um mi hempoh te Mordicai in a theih ten, angki cu botkek vutbual, thangkhau puan silh in khuapi laizang ah hawh in aw nging zet tuah kap hi.
\v 2 Thangkhau puan silh in kumpi kongka ah a kuamah lut tum ngawl hang, kumpi kongka bul ah ding hi.
\v 3 Kumpi thupiak nak lai a heng mi ngam hempoh ah Judah miphun ten nasezet phuk nak, ancan nak, kah nak nei in mihing tampi ten vut le thangkhau puan silh in zau haw hi.
\p
\v 4 Mordicai thu cu Esther in kei muhte le numei uktu te a hilh ten, kumpi nu cu thasia zet in Mordicai silh mi thangkhau vawkin a dang puan silh tik tukin pia naven, Mordicai in lungkim ngawlin um hi.
\v 5 Mah cengten Esther in kumpi thupiak nak le na dek tu numei uktu Hathach cu sam in ai thu um hum? Ita hi tihbang in bawl hum tin Mordicai dong tik tukin a hah ten,
\v 6 Hathach cu Modicai umnak kumpi kongka mai, khuapi lamzin ah hawh in,
\v 7 Mordicai cu a ma nelah a heng mi thu hempoh hei hihen, Haman in Judah miphun te that tukin sum aizong van koih nak sungah koih tuk hum tin thukam nak thu hei hihen a hilh ten,
\v 8 Judah miphun te that tukin, Shushan kumpi inn sung pen suah mi thupiak nak lai a co mi cu Esther nelah lak tukin pia hi. Esther in a miphun tei lakah ngen tukin kumpi nelah luh tum nak thucah hi.
\p
\v 9 Hathach vang hung in Mordicai awnkam cu Esther in don leh hi.
\v 10 Mah cengten Esther cu Hathach hang, Mordicai thu cah mi cu,
\v 11 Pano hei hihen, numei hei hihen, kumpi in sam ngawlin a sunglam thukhen nak, kumpi nelah a lut tum tupa cu daihnak a co tuk thu, sui thiangkhut pia tuk ngawlin a thungai a thihnak tuk thu a thupiak a um mi cu kumpi miphun te le ngam sung miphun hempoh ten thei haw hi. Kei cu ni sawmthum kumpi nelah sam ma hitin,
\v 12 Esther awnkam cu Mordicai nelah a hilh leh ten, Mordicai in a dang Judah miphun te nunnak pen a luat ma tale,
\v 13 Kumpi inn sungah um naven na nunnak luat tuk hitin, ngaisung pah sin.
\v 14 A tu huncan ah nang cu daiden na um tale nangmah le na miphun siatsuah in Judah miphun nunnak, nunpat nak thu pakhat heng tuk hi. A tuin hi thu keng tukin nang cu kumpi nu hihnak ah a co mi hima cim maw tin Esther nelah hilh leh tik tukin thucah hi.
\v 15-17 Esther in Shushan khuapi sungah a um mi Judah miphun hempoh te hulawmkhawm tik tukin hawh in, sun le zan nithum sung an ei ngawl um in, keima ca ancan nak nei ta un. Keimah vang kei muhte tuah ancan nak bawl tuk hi. Mah cengten thuneih nak el ta vang, kumpi nelah lut tum tuk. Thi ta vang thi tuk poh ing hitin Mordicai cu hilh leh tik tukin a cah mi thu bang, Mordicai cu hawh in bawl hi.
\s Kumpi nelah Esther a nunnak pia in a luh tumnak
\c 5
\p
\v 1 Nithum a lawi ten, Esther in kumpi nu van thuam silh in kumpi innpi a lang le lang pen, kumpi inn thukhen nak sungah ding hi. Kumpi cu kumpi kongka a langlam pen kumpi inn sung tohkham khunnak humah khung hi.
\v 2 Kumpi nu Esther thukhen nak sungah a din mi cu kumpi in a muh ten, lungnem nak thinlung nei in a khut sungah sui thiangkhut cu Esther a piak hang, Esther cu nek in kumpi thiangkhut a lek cu tok hi.
\v 3 Kumpi in, kumpi nu Esther nang cu ai deihnak nei cim? Laksawng ai ngen nuam cim? Na nget mi hempoh ngam uknak a khen lang tian hei keiman pia tung hitin thu a piak ten,
\v 4 Esther in kumpi deihnak a um tale kumpi ca tuk ka bawl ngawl mi puai ah Haman tuah tuni in hung in hitin a nget ten,
\v 5 Kumpi in, Esther nget mi bang bawl tukin Haman cu a man lang hung hen hitin thu a piak ten, Esther bawl mi puai ah Haman tuah kumpi hung in hi.
\v 6 Cabit tui in puai a bawl lai tak kumpi in nang cu ai deihnak nei cim? Na deihnak bangin keiman pia tung hi. Ai laksawng ngen nuam cim? Na nget mi hempoh cu ngam uknak a khen lang tian hei keiman pia tung hitin Esther nelah thu a piak ten,
\v 7 Esther in, keiman deihnak um in ka nget nuam ngawl mi laksawng,
\v 8 Keimah cu kumpi thinlung tuah a tawk hei in hihen, ka deihnak um in ka nget nuam mi laksawng cu pia tukin kumpi deihnak a um hei in hihen, ka bawl ngawl mi puai ah kumpi cu Haman tuah hung leh un. Thupiak nak a um bang zingten keiman bawl tung hitin, ngen leh hi.
\p
\v 9 Mahmi ni in Haman cu lungdam tha tui zet suak tul naven, kumpi kongka pen Mordicai cu U pat nak tuah ding ngawl imah phia ngawlin a um mi cu a muh ten, Mordicai cu a thinuuk suak zet hi.
\v 10 Mah ten a thinsup in a hawh hang, a ma inn ah a hen ten a nupi Zeresh le a ngualcam te a sam cengten,
\v 11 A ma hauhsak nak a ngeng dan thu, a canu le capa thu, kumpi in nasezet khaisan nak hang bawi U pa keimah cu a sunglawi saw mi thu a piak nak thu te lakin,
\v 12 Kumpi nu Esther bawl mi puai ah keimah sial ngawl a kuamah kumpi tuah lut tum tik ma hi. Zingten vang kumpi tuah keimah cu sam leh hi.
\v 13 Mah hang, Judah miphun Mordicai in kumpi kongka bulah khung in a um mi cu keiman ka muh sung hempoh a tuin a hilh mi hempoh ka nelah lungdam nak um ma hitin, ti hi.
\v 14 Mah ten a nupi Zaresh le a ngualcam hempoh ten, tongsawmnga a sang mi ngawngawk nak tuk khuam phut hen. Mahmi khuam ah Mordicai cu a ngawng pen awk tik tukin zingten hilh in hi. Mah cengten lungdam nak thinlung tha tui zet in kumpi tuah puai sungah lut tum hen tin a son mi awnkam cu Haman deihnak tuah a ngawngawk nak tuk khuam cu bawl tik hi.
\s Mordicai khaisan nak
\c 6
\p
\v 1 Mahmi zan in kumpi cu a hihbuh theih ngawl hang, kumpi sialsiah nak laibu la in hitin thupia in a mai pen sial haw hi.
\v 2 Kumpi Ahasurus cu that tukin ngaihsut mi hitin a ngai sung tu kumpi numei uktu, kongka cing panih, Bigthana le Teresh ngaihsut nak cu Mordicai in a hilh nak a muh ten,
\v 3 Kumpi in mahmi ngaisut nak a hilh hang, Mordicai cu ai laksawng pia zo hum tin a dot ten, A ma nel pen na dek tu sila ten, ai mah laksawng piak nak um ma laih hitin, don leh haw hi.
\v 4 Kumpi in thukhen nak sungah a kua um hum tin a dot ten, Haman in a ma bawl mi ngawngawk nak tuk khuam pen Mordicai cu a ngawngawk tuk thu, kumpi a pawlam thukhen nak sungah a luh tum khak hang,
\v 5 Kumpi sila ten Haman cu thukhen nak sungah um hitin a hilh haw ten a sungah lut tum hen tin, thupia hi.
\v 6 Haman cu a luh tum ten kumpi in, kumpi khaisan nuam mipa cu itin bawl nuam kam tin a dong tale, Haman in, keimah sial ngawl kumpi sang khaisan nuam nak a nei tu pakhat um maw tin a thinlung pen phawkin,
\v 7-8 Kumpi khaisan tukin a deihnak a nei tupai ca kumpi puan silh mi kumpi puan, kumpi khun mi cipuh, kumpi khuk mi lukhu cu la in,
\v 9 Mahmi van thuam le cipuh cu minthan nak a nei mi bawi pakhat nelah a ap cengten, kumpi khaisang tukin a deihnak a um mipa cu mahmi van thuam tuah silh tik in cipuh a khun tik cengten, khuapi lamzin pi ah pui in kumpi khaisang tukin deihnak a neih mipai nelah hi tihbang in bawl hitin a mai pen au hen tin, kumpi nelah hilh leh hi.
\p
\v 10 Mah ten kumpi in na son mi bang a man lang hawh in a puan van thuam le cipuh a lak cengten, Judah miphun kumpi kongka cing bawi Mordicai nelah bawl in hi, na hilh mi hempoh pakhat no hei um tik pah sin hitin, Haman cu thupia hi.
\v 11 Mah ten Haman in a puan vanthuam le cipuh la in Mordicai cu a silh tik cengten, cipuh khung tikin khuapi lamzin pi ah hawh pih in kumpi khaisang tuk deihnak a neih mipa cu hi tihbang in bawl hitin, a mai pen au haw hi.
\v 12 Mah cengten Mordicai cu kumpi kongka ah kik leh hi. Haman cu a phuthah a lukhup in, a ma inn ah a man lang a hawh cengten,
\v 13 A ma nelah a cang mi thu hempoh a nupi Zeresh le a ngualcam hempoh tei lakah hilh hi. A nupi Zeresh le Haman ngualcam cihnak a nei mite vang, a mah sung tukin a pat mi Mordicai cu Judah miphun a man tale a man a mah cu neh ma hi. A mai pen a thungai in sung tuk hitin, don leh haw hi.
\v 14 Mah tihcun a son lih laih tak kumpi numei uktu te hung in Esther bawl mi puai ah Haman cu a man lang in sam haw hi.
\s Haman a ngawng khai nguiawk a thahnak
\c 7
\p
\v 1 Mah cengten kumpi le Haman cu kumpi nu Esther tuah cabit tui in tukin hawh haw.
\v 2 Ninih nak ten cabit tui a in laih tak kumpi nupi Esther nang cu ai deihnak nei cim? Na deihnak bang keiman pia tung hi. Ai laksawng ngen nuam cim? Na nget mi hempoh ngam uknak a khenlang tian keiman pia tung hitin thu a piak ten,
\v 3 Kumpi nu Esther in kumpi aw, keima thinlung a tawk hei in hihen, deihnak a um hei in hihen, ka deih nak bangin ka nunnak le ka nget mi bang ka miphun pih tei nunnak pia in hi.
\v 4 Keimah le ka mipun pih te that tukin zuak zo hi. A thungai in sila pano, numei cang tik tukin a zuak tale ngal ten kumpi siatnak tukin man a piak hang, kei cu daiden no in um mang hitin, hilh hi.
\v 5 Kumpi Ahasurus in mah tihcun a ngaisung ngam tu cu a kua hum? Ai lai ah um hum tin kumpi nu Esther a dot ten,
\v 6 Esther in do ngal tuk a bawl tupa cu a siasuak mi Haman hitin a hilh ten, Haman cu kumpi le kumpi nu mai pen lau nak ah heng hi.
\v 7 Mah ten kumpi cu a thinuuk in, cabit tui in nak pen tho in huan lam ah hawh hi. Sual cawhkuan tuk hi tih Haman in a theih hang, nunnak co tukin kumpi nu Esther mai pen hehpih ngen tukin ding hi.
\v 8 Kumpi cu huan sung pen cabit tui puai nak mun ah a luh tum leh ten, Esther khunnak bul pen Haman bopkhup in a um mi cu a muh ten, hi pa cu kumpi inn sung ka mai pen kumpi nu sual pih tuk maw tin a thupiak laih tak a ngualcam a phialpih ten Haman mitmai cu khuh haw hi.
\v 9 Numei uktu Harbona in, kumpi phat nak cu cingin a nget mi Mordicai ca Haman bawlin tongsawmnga a sang mi ngawngawk nak khuam Haman inn ah phut in um zo hitin a hilh ten, mahmi khuam pen a ngawngawk hen tin kumpi in thu pia hi.
\v 10 Mah tihcun Mordicai ca in bawl mi ngawngawk nak tuk khuam cu Haman taak in khaih haw hi. Kumpi vang a thin dai hi.
\s Judah miphun tei ca kumpi thu suahnak lai
\c 8
\p
\v 1 Mahmi ni in kumpi Ahasurus cu Judah miphun tei ngal Haman inn cu kumpi Esther pia hi. Esther cu Mordicai tuah itihbang in seng hum tih cu Esther in a hilh ten, Mordicai cu kumpi nelah lut tum hi.
\v 2 Kumpi in Haman khut pen a duh mi khutbut cau cu duh sak leh in Mordicai pia hi. Esther in Haman inn cu Mordicai nelah ap hi.
\p
\v 3 Mah cengten Esther cu kumpi ke bulah bop in, Agag miphun Hamnan bawl mi sual Judah miphun tei lam ah a ngaihsut nak te vawk tukin, mit hitui cak in hehpih ngen hi.
\v 4 Kumpi sui thiangkhut a piak hang, Esther cu tho in kumpi mai ah dingin,
\v 5 Kumpi deihnak a um hang, keima thinlung deihnak tuah tawk hei in hihen, keima thu cu na mai pen a dik hei in topan keimah deihnak hei in hihen, uknak ngam sung hempoh ah a um Judah miphun te siatsuah tuk ngawlin, Agag miphun, Hammedatha miphun Haman bawl mi lai vawk tukin lai ngan bet tik in hi.
\v 6 Ka miphun tei hum ah haksat nak a heng mi hei hihen, ka miphun pih siatsuah tik mi thu hei hihen, keiman zo tukin a kon bawl thei hum tin, ti hi.
\v 7 Kumpi Ahasurus vang Haman in Judah miphun a do hang, a ma inn cu kumpi Esther keiman pia zo ing hi. A mah vang a ngawngpen khuam ah khaih in that tik hi.
\v 8 Mah hang kumpi khutbut cau tuah tacik khet mi kumpi thusuah nak lai cu a kuamah in a lawl theih ngawl hang, a thinlung a um mi bangin Judah miphun ca a thusuah mi lai ngan leh in khutbut cau tuah tacik khen tuk hitin, kumpi nu Esther le Judah miphun Mordicai miphun te cu thupia hi.
\p
\v 9 Mah ten Sivan tih mi hathum ha ni kulluanthum ni in lai ngan tute cu sam in, India ngam penpan Ethopia ngam tian ngam za le kulluan salih (127) ngam ah a um Judah miphun, ai awh tu kumpi, ngam hempoh khuapi uktu, khuapi U pa te cu Mordicai thucah hempoh bangin Judah awnkam penpan miphun hempoh tei ot mi awnkam tuah,
\v 10 Kumpi Ahasurus thusuah mi lai cu ngan in kumpi khut zungbut cau tuah tacik khet cengten cipuh, laa, kalauk, laak khung tu lai puak tu tangval te pia hi.
\v 11-12 A thusuah mi lai cu Adar tihmi ha heinih ha ni heithum ni in uknak ngam khuapi sungah a um Judah miphun ten hulawmkhawm in, a muhtei nunnak cingkep tuk thu numei le naupang tei lakah a do tu ngam miphun, ngalkap hempoh that khawngin a muhtei neihnak te a lak sak theih nak thu kumpi in thupia hi.
\v 13 Hi thu cu Judah miphun ten mahmi ni in a ngal te do leh tukin, ngam sung hempoh ah a um mi miphun hempoh te thuthan nak lai a suah mi thu hi.
\v 14 Mahmi a thusuah lai cu Shushan kumpi inn pen thu a suah cengten, kumpi in nasezet a bawl bangin lai puak tu tangval te a man lang tai in hawh tik haw hi.
\p
\v 15 Mordicai in kumpi vanthuam tih mi puanngo le a pawl silh a ngeng zet mi sui lukhu cu khu in, puannem le mepian zawng tuah bawl mi puan silh in kumpi nel pen a suah tul hang,
\v 16 Ahasurus khuapi cu lungdam nak ah heng hi. Judah miphun te vang thatui lungdam nak, minthan vaknak ah heng haw hi.
\v 17 Kumpi thusuah nak lai a heng mi ngam khuapi sunga Judah miphun ten thatui lungdam nak, puai bawlnak, thupha cingkep nak ni cu bawl in ngam sung miphun hempoh ten Judah miphun te cu a lau hang, Judah miphun ah lut tum haw hi.
\s Judah miphun tei nehnak
\c 9
\p
\v 1 Kumpi thusuah bang a bawl mi huncan a nai hang, Judah miphun tei ngal ten kohten neh tuk ung hitin muansan mi ni, a thu thekin Judah miphun te donak a nei tute nehnak ni tih mi Adar tin sam mi ha heinih ha ni heithum ni in,
\v 2 Kumpi Ahasurrus hi uknak ngam sung khuapi hempoh ah a um Judah miphun ten, bawl siat a nuam mite kham tukin hulawkhawm haw hi. Ngam sung miphun hempoh ten a lau hang, a kuamah in do leh ngam ngawlin um haw hi.
\v 3 Ngam uktu kumpi, ai awh tu kumpi, khuapi uktu kumpi, na deh cing tu U pa hempoh ten Mordicai a lau hang, Judah miphun te bawm haw hi.
\v 4 Itahum titale, Mordicai cu kumpi inn pen minthan nak tuah ngam hempoh ah a thuthang zet in nikhat nung nikhat a minthan nak huham khang se sem hi.
\v 5 Mahmi ni in Judah miphun ten ngalte cu nam tuah that in ngal te a mu deih poh in bawl haw hi.
\v 6 Shushan khuapi sungah mihing zanga (500) that haw.
\v 7-10 Judah miphun tei ngal Hamedatha capa a himi Haman hi capa sawm cu Parshandatha, Dalphon, Aspatha, Poratha, Adalia, Aridatha, Parmashta, Arisai, Aridai, Vaizatha te that haw hi. Mah hang a muhtei neihnak te la ngawlin um haw hi.
\p
\v 11 Mahmi ni in Shushan khuapi pen a thi mi cazin cu kumpi mai ah lak haw hi.
\v 12 Kumpi in kumpi nu Esther cu sam in, Judah miphun ten Shushan khuapi sungah Haman capa sawm te tuah mihing zanga (500) that haw zo hi. Uknak ngam a dang ngam pen itihbang in bawl haw zo hum? Nangman itihbang in deihnak nei laih cim? Na deihnak bang keiman bawl tung hi. Ai laksawng ngen nuam laih cim? Na nget nuam mi hempoh keiman pia tung hitin thu a piak ten,
\v 13 Esther in kumpi deihnak a um tale Shushan khuapi sungah a um Judah miphun te tuni in a thusuah mi bang zing ten hei in bawl tuk thu, Haman miphun sawm te vang a ngawngawk khuam ah khaih tuk thu thusuah in hitin a tih bang,
\v 14 Kumpi in thu suah in Shushan kumpi inn pen thu a suah cengten, Haman miphun sawm cu khaih in taak haw hi.
\v 15 Shushan khuapi sungah a um Judah miphun te vang, Adar ha ni heili ni ah hulawm in Shushan khua mi zathum (300) that haw hi. Mah hang, a muhtei neihnak la ngawlin um haw hi.
\v 16 Uknak ngam hempoh sungah a um Judah miphun ten, Adar ha ni heithum ni in a muhtei nunnak cingkem in ngal khut sungah heng ngawl nung tukin, hulawmkhawm in ngal thawngsawmsalih le thawngnga (75,000) cu that haw hi. Mah hang, a muhtei neihnak te la ngawlin um haw hi.
\p
\v 17 Mahmi ha ni heili ni in daiden no um in puai bawl mi ni, lungdam nak ni cang tukin cingkem haw hi.
\s Purim ni a bawl nak
\v 18 Shushan khuapi ah a um Judah miphun te, ni hethum ni le ni heili ni in hulawmkhawm haw hi. Ni heinga ni a kim ten daiden no um in puai bawl mi ni, lungdam nak ni cang tukin cingkem haw hi.
\v 19 Khuapi khan tian nak mun a um ngawl mi Judah miphun te vang, Adar ha ni heili ni cu lungdam nak tuah puai bawl mi ni, thupha ni, pakhat le pakhat laksawng piak mi ni in cang tik haw hi.
\p
\v 20 Mah cengten Mordicai in hi thu hempoh te ngan hi.
\v 21-22 Judah miphun ten ngal tei khut pen luat in daihnak ni, a muhtei thasiat nak le kahnak te pai in lungdamnak tuah a heng mi ha Adar ha ni heili ni le ni heinga ni cu kum sial cingkem in puai bawl mi ni, lungdamnak ni, pakhat le pakhat laksawng pia in mizawng cangah te a lu piak mi ni in a cang mi dan bawl tukin, kumpi Ahasurus uknak ngam hempoh sung a nai nak ah a um Judah miphun umnak ah thucah nak lai pia hi.
\v 23 Judah miphun te vang bawl patnak a um hang, Mordicai thucah mi bangin bawl le leng tuk ung hitin, lungkim haw hi.
\v 24 Judah miphun hempoh tei ngal a himi Agag miphun Hammedatha capa Haman cu Judah miphun te that tukin ngaihsut nak a um hang, siatsuah tukin Purim kungkhai hang in hihen,
\v 25 Esther in kumpi nelah lut tum in, Judah miphun tei a lang lam ah Haman ngaihsut a thiangtho ngawl mi cu a ma lu hum ah a hen leh thu, a mah le a caten ngawngawk khuam hum ah khaih tik tuk thu, thusuah nak lai cu a piak hang in hihen,
\v 26 Purim tihmi awnkam cu a cam lo hang mahmi ni cu Purim tin sam haw hi. Mahmi a thusuah nak lai tuah a ma muh mi thu cu zo in,
\v 27 Judah miphun ten a mah loli penpan a tu le ca, sakhua biak nak sungah a lut tu hempoh te tuah Mordicai thucah mi lai sungah a bawl mi bangin mahmi ni cu kumsial a cingkep tuk thu,
\v 28 Mahmi Purim ni cu Judah miphun sung pen pai ngawl tu le canawn tian phawk ngil tuk ngawl in, ngam sung khuapi hempoh ah a um miphun hinnam ten phawk in cingkep tuk thu lungkim haw hi.
\p
\v 29 Mah ten Abihail canu kumpi nu Esther le Judah miphun Mordicai ten Purim ni cu kho zet tik tukin nasezet thuneih tuah koih in thucah nak lai ngan leh haw hi.
\v 30-31 Judah miphun Mordicai le kumpi nu Esther in thucah in Judah miphun ten mai ca tuk in le tu le canawn tei ca tuk a bawl mi bang a tep mi huncan ten ancan nak, thunget nak tuah Purim ni cu a cat ngawl cing kem tukin, Ahasurus uknak ngam za le kul luansalih (127) a um Judah miphun hempoh tei umnak ah daihnak tih mi muantak awnkam tuah mahmi thucah nak lai cu Mordicai pia hi.
\v 32 Esther bawl mi thu hang, Purim ni cingkep mi dan cu a cat ngawl kho in hi lai sungah ngat in um hi.
\s Mordicai minthan nak huham
\c 10
\p
\v 1 Kumpi Ahasurus cu leihum ah hei hihen, tuipi sungah a um mi tuipi kulh hum ah hei hihen, ngunkhuai thu a pat tih mi,
\v 2 Thuneih nak huham le a bawl mi thu hempoh te tuah khaisan nak a co tu Mordicai huham, minthan nak thu cu Media, Persia kumpi thuanthu sungah ngan hi.
\v 3 Judah miphun Mordicai cu kumpi Ahasurus nuai pen a sunglawi bel mi thu co ngah in Judah miphun tei sungah a minthang hi. A miphun tei khantoh nak cingkem in, a miphun pih hempoh te thupha awnkam bek hilh in, a miphun pih hempoh tei sung pen mitmai pha co tupa hi.