cnw_reg/15-EZR.usfm

\id EZR
\ide UTF-8
\rem The text in this file was extracted from C:/DCS/Chin, Ngawn/WORD/15. Ezra. docx.
\mt Ezra
\h Ezra
\mt Ezra
\toc1 Ezra
\toc2 Ezra
\toc3 ezr
\s Ngam sung pen hawlvawk mite pin leh tukin Cyrus kumpi bopnak
\c 1
\p
\v 1 Jeremiah hilh mi Pathian thupiak cangkim tik tukin Persia kumpi Cyrus uknak kum khat ten Pathian sosuah nak hang, kumpi in thupiak nak lai a suah cengten Persia ngam sung hempoh ah thuthan tikin,
\v 2 Persia kumpi Cyrus thupiak mi cu vancung Topa Pathian in leihum ngam hempoh ah a um mite cu keimah a piak hang Judah ngam, Jerusalem khua sung pen inn ka sak tuk thu cu koih zo hi.
\v 3 Nohtei sung pen a kon Pathian mihing hum? A mah tuah Pathian um kawm ta hen. Judah ngam Jerusalem khuapi ah hawh in Isarel miphun tei Topa Pathian inn cu din hen. Jerusalem khuapi sungah a um mi Pathian cu Pathian hi.
\v 4 Pathian mihing camnak sungah a um mite cu Jerusalem khuapi sungah a um mi Pathian inn ca phalnak tuah a lu piak mi sial ngawl sui, ngun, neihnak, nganhing tuah bawm hen tin, thupia hi.
\p
\v 5 Mah ten Judah hinnam le Benjamin hinnam U pa te, thiampi, Levi miphun te tuah Pathian sosuah mi hempoh ten Jerusalem khuapi ah a um mi inn sa tuk in tho haw hi.
\v 6 Inn nel pih a um mi hempoh ten ngun van le sui van tih mi neihnak te, nganhing te, man a nei mi te bawm haw hi.
\v 7 Mah bek sial ngawl Jerusalem khuapi pen Nebuchadnezzar a lon hang, a pathian tei biakinn sungah koih mi biakinn van te cu,
\v 8 Persia kumpi Cyrus in sui innpi uktu Mithredath khut tuah suah in, Judah kumpi Shebazzar nelah sial in ap hi.
\v 9 Biakinn van cazin cu sui khuathai sawmthum (30), ngun khuathai thawngkhat (1,000), nam kul luankuah (29),
\v 10 Sui bel sawmthum (30), a danglam mi ngun bel zali le sawm (410), a danglam mi van thawngkhat (1,000),
\v 11 Sui van, ngun van sial in kom ten thawngnga le zali (5,400) hi. Mahmi van te Shebazzar in la in, kol a tang mi mihon pi sung pe Babilon khua pen Jerusalem khuapi ah a sam mite tuah pua hi.
\s Ngam sung pen hawlvawk a pin leh cazin
\c 2
\p
\v 1-2 Babilon kumpi Nebuchadnezzar cu Babilon khuapi ah a mat mi mipi sung pen suak tulin Zerubbabel, Jeshua, Nehemiah, Seraiah, Reelaiah, Mordicai, Bilshan, Mispar, Bigvai, Rehum le Baanah te zui in Jerusalem khuapi Judah ngam pen khua hempoh ah a heng mi ngam sung miphun, Isarel miphun cazin cu,
\v 3 Parosh miphun thawngnih le za le sawm salih le panih (2,172),
\v 4 Shephatiah miphun zathum le sawmsalih le panih (372),
\v 5 Arah miphun za salih le sawmsalih le panga (775),
\v 6 Pahath-moab miphun Jeshua le Joab miphun thawngnih le zaliat le heinih (2,812),
\v 7 Elam miphun thawngkhat le zanih le sawmnga pali (1,254) hi.
\v 8 Zattu miphun zakuah le sawmli le panga (945) hi.
\v 9 Zaccai miphun za salih le sawmluk (760) hi.
\v 10 Bani miphun zaluk le sawmli le panih (642) hi.
\v 11 Bebai miphun zaluk le kul luanthum (623) hi.
\v 12 Azgad miphun thawngkhat le zanih le kulluannih (1,222) hi.
\v 13 Adonikam miphun zaluk le sawmluk le paluk (666) hi.
\v 14 Bigvai miphun thawngnih le sawmnga le paluk (2,056) hi.
\v 15 Adin miphun zali le sawmnga le pali (454) hi.
\v 16 Hezakiah miphun le Ater miphun sawmkuah le liat (98) hi.
\v 17 Bezai miphun zathum le kulluanthum (323) hi.
\v 18 Jorah miphun za le heinih (112) hi.
\v 19 Hashum miphun zanih le kulluanthum (223) hi.
\v 20 Gibber miphun sawmkuah le panga (95) hi.
\v 21 Bethhlehem miphun za le kulluanthum (123) hi.
\v 22 Netophah khua mi sawmnga le paluk (56) hi.
\v 23 Anathoth khua mi za le kulluanliat (128) hi.
\v 24 Azmaveth miphun sawmli le panih (42) hi.
\v 25 Kiriath-arim miphun, Chephirah khua mi, Beroth khua mi za salih le sawmli le pathum (743) hi.
\v 26 Ramah le Geba khua mi zaluk le kulluankhat (621) hi.
\v 27 Michmas khua mi za le kulluannih (122) hi.
\v 28 Bethel le Ai khua mi zanih le kulluanthum (223) hi.
\v 29 Nebo khua mi sawmnga le panih (52) hi.
\v 30 Magbish khua mi za le sawmnga le paluk (156) hi.
\v 31 A dang Elam khua mi thawngkhat zanih le sawmnga pali (1,254) hi.
\v 32 Harim khua mi zathum le kul (320) hi.
\v 33 Lod khuapi, Hadid khuapi, Ono khuapi miphun za salih le kulluannga (725) hi.
\v 34 Jerikho khua mi zathum le sawmli le panga (345) hi.
\v 35 Senaah khua mi thawngthum zaluk le sawmthum (3,630) hi.
\p
\v 36 Thiampi cazin cu Jeshua miphun sung pen Jedaiah miphun zakuah le sawmsalih le pathum (973) hi.
\v 37 Immer miphun thawngkhat le sawmnga le panih (1,052) hi.
\v 38 Pashur miphun thawngkhat le zanih le sawmli le salih (1.247) hi.
\v 39 Harim miphun thawngkhat le hei salih (1,017) hi.
\p
\v 40 Levi miphun cazin cu Hodaviah miphun sung pen Jeshua le Kadmiel miphun sawmsalih le pali (74) hi.
\p
\v 41 Lalem sa tu Asaph miphun za le kulluanliat (128) hi.
\p
\v 42 Kongka cing tu miphun cu Shallum miphun, Ater miphun, Talmon miphun, Akkub miphun, Hatita miphun, Shobai miphun kom ten za le sawmthum le kuah (139) hi.
\p
\v 43 Biakinn na dek tu Ziha miphun, Hasupha miphun, Tabboath miphun,
\v 44 Keros miphun, Siaha miphun, Padon miphun,
\v 45 Lebanah miphun, Hagabah miphun, Akkub miphun,
\v 46 Hagab miphun, Shamlai miphun, Hanan miphun,
\v 47 Giddle miphun, Gahar miphun, Reaiah miphun,
\v 48 Rezin miphun, Nekoda miphun, Gazzam miphun,
\v 49 Uzza miphun, Paseah miphun, Besai miphun,
\v 50 Asnah miphun, Meunim miphun, Nephisim miphun,
\v 51 Bakbuk miphun, Hakupha miphun, Hahur miphun,
\v 52 Bazluth miphun, Mehida miphun, Harsha miphun,
\v 53 Barkos miphun, Sisera miphun, Temah miphun,
\v 54 Neziah miphun, Hatipha miphun,
\v 55 Solomon sila na dek tu miphun te cu Sotai miphun, Hassophereth miphun, Peruda miphun,
\v 56 Jaalah miphun, Darkon miphun, Giddel miphun,
\v 57 Shephatiah miphun, Hattil miphun, Pochereth-hazzebaim miphun, Ami miphun,
\v 58 Biakinn sila na dek tu hempoh te le Solomom sila na dek tu hempoh kom cu zathum le sawmkuah le panih (392) hi.
\p
\v 59 Mah bek sial ngawl Isarel miphun a man le man ngawl hei hihen, a muhtei miphun hei hihen, a hilh theih ngawl mi Tel-melah, Tel-harsha, Cherub, Addan, Immer khuapi pen a suak tul mite cu,
\v 60 Delaiah miphun, Tobiah miphun, Nekoda miphun zaluk le sawmnga le panih (652) hi.
\p
\v 61 Thiampi miphun sung pen Habaiah miphun, Hakkoz miphun, Gilead ngam mi Barzillai canu tuah huai dun in a sung nui min a nei tu Barzillai miphun ten,
\v 62 Cazin lut mi miphun sung pen a muhtei cazin cu zei in a muh ngawl hang, miphun a ngek hi ngawl in thiampi hihnak co haw ma hi.
\v 63 Urim le Thummim a tel mi thiampi a heng laih ngawl in a mun a thiangtho zet mite cu ei pah sun hitin, ngam uk tu kumpi in thupia hi.
\p
\v 64 Mipi a venghawng thawngsawmli le thawngnih le zathum le sawmluk (42,360) hi.
\v 65 Mah bek sial ngawl sila pano, numei kom thawngsalih le zathum le sawmthum le salih (7,337) hi.
\v 66 Cipuh a venghawng kom ten za salih le sawmthum le paluk (736) hi. Laa a venghawng kom ten zanih le sawmli le panga (245) hi.
\v 67 Kalauk a venghawng kom zali le sawmthum le panga (435) hi. Laak a venghawng kom ten thawngluk le zasalih le kul (6,720) hi.
\p
\v 68 Miphun thukhen tu a hek khat ten Jerusalem khuapi biakinn ah a hen ten, biakinn cu a mu umnak ah sa tukin,
\v 69 A tih theih tawk phal nak tuah a lu pia in sui dinga thawngsawmluk le thawngkhat (61,000), ngun cuai thawgnga (5,000), thiampi puan silh zakhat (100) cu innpi sungah koih haw hi.
\p
\v 70 Mah tihcun thiampi, Levi miphun, mi zalan hek khat, lalem satu, kongka cing tu, biakinn sila na dek tu ten a muhtei khua umnak hempoh ah hei hihen, Isarel ngam miphun hempoh ten a muhtei umnak khua sungah hei hihen um haw hi.
\s Biakpiak nak taitan a lep lehnak
\c 3
\p
\v 1 Ha salih ha a hen ten khuapi le khua no sungah a um Isarel miphun hempoh ten, Jerusalem khuapi ah munkhat hung in hulawmkhawm haw hi.
\v 2 Mah ten Jozadak capa Jeshua le a U le nau thiampi te, Shealtiel capa Zerubbabel le a U le nau te tho in, Pathian mihing Mosi ngat mi dan thukham Laithiangtho sung a um mi bang, meihal biakpiak nak te a lu pia tukin Isarel miphun Pathian biakpiak nak taitan bawl haw hi.
\v 3 Mahmi ngam sung hempoh ah a um miten lau naven, biakpiak nak taitan cu a ke bul hum ah a koih hang zinglam, taklam a cat ngawlin meihal biakpiak nak cu Pathian nelah a lu pia haw hi.
\v 4 Laithiangtho a heng mi bang, kaltan puai cu dan thukham bang bawl tuk a kul mi nate bawlin, ni sial meihal biakpiak nak cu sial in a lu pia haw hi.
\v 5 Mah cengten a cat ngawl in a lu piak mi biakpiak nak, ha thak ni ten hei hihen, Pathian ca in a thiangtho mi puai ni in hihen, a lu piak mi biakpiak nak, Pathian cu phalnak tuah a lu ken tu hempoh ca in a lu piak mi biakpiak nak te pia in um haw hi.
\v 6 Biakinn khuam te phut ma laih naven, ha salih nikhat ni pen pan in meihal biakpiak nak te Pathian nelah a lu pia haw hi.
\s Biakinn a sak leh nak
\v 7 Inn sa thiam, lettama khut lam a thiam mite vang sum pia haw hi. Persia kumpi Cyrus thupiak mi bangin cedar thing cu Lebanon mual pen Joppa tembaw colhnak ah pua tik tukin, Sidon khua mi le Tyre khua miten ancang in tuk le sathau te pia haw hi.
\p
\v 8 Jerusalem khuapi biakinn ah a heng mi kumnih nak, hanih ha ten Shealtiel capa Zerubbabel Jozadek capa Jeshua, a tang mi U le nau, thiampi, Levi miphun te, kol tang miphun sung pen suak in biakinn sak tuk thu sosuah tukin Levi miphun te pia haw hi.
\v 9 Mah ten Judah miphun, Jeshua le a capa hi nau te, Kadmiel le a cate, Levi miphun Henadad cate, a muhtei ca le a nau ten biakinn sa na dek tute cu sosuah tukin tho haw hi.
\v 10 Na dek tuten Pathian biakinn khuam a phut ten Isarel kumpi David thupiak mi bang, thangphat nak nei tukin lemle keng tu thiampi te, dakkop a keng tu Levi miphun, Asaph cate cu pia haw hi.
\v 11 Pathian cu pha hi. Isarel miphun sungah a lak mi a hehpih nak cu a cat ngawl in kho hitin, thangphat nak tuah lungdam nak thu hilh in lasa tute cu a thek dun in sa haw hi. Biakinn khuam a phut hang, mi hempoh ten Pathian cu thangphat in aw nging zet tuah au haw hi.
\v 12 Mah naven kum U ham in a masa biakinn a mu awng tu thiampi, Levi miphun, miphun hinnam U pa ten a masa biakinn khuam phut a muh haw ten, aw nging zet tuah in kap haw hi. Mihing tampi ten lungdam nak thinlungi tuah kap haw hi.
\v 13 Mah tihcun bawl mi aunak aw le kah nak aw a za tu ten khenkhuai in thei thiam haw ma hi. Mihing tampi ten aw nging zet tuah a kah hang, ngam khuala pi pen za hi.
\s A sak leh mi thu a donak
\c 4
\p
\v 1 Mat a co mi miphun ten Isarel miphun Topa Pathian ca biakinn sa haw hitin Judah miphun le Benjamin miphun tei ngal ten a zak ten,
\v 2 Zerubbabel le miphun hinnam thukhen tu tei lakah hung in, kei muhte nang muhtei lakah cam tikin hi. Nohtei Topa Pathian na zeih uh bangin kohten zei bok ung hi. Kei muhte hi ngam ah a pui tu Assyria kumpi Esarhaddon khut sung pen pan mahmi Pathian cu biakpiak nak nei zo ung hitin a hilh haw ten,
\v 3 Zerubbabel le Jeshua tih mi Isarel miphun hinnam thukhen tuten, ohten Pathian ca tuk biakinn sak nak thu nohte kohten bawm thei tuk ma ung hi. Persia kumpi Cyrus thupiak mi bang, Isarel miphun tei Topa Pathian ca kohten keimuh pumpak loli in sa tuk ung hitin, don leh haw hi.
\v 4 Mah ten ngam sung miphun ten Judah miphun te thazang kiam tik in innsak nak thu cu noksak haw hi.
\v 5 Judah miphun tei ngaihsut nak siatsuah tukin, Persia kumpi Cyrus khut sung pen Persia kumpi Darius khut sung tian thukhen tu mai ah a ding tute cu zawng in koih haw hi.
\s Artaxerxes kumpi khut sung a dawl lam ten a donak
\v 6 Ahasuerus kumpi khunnak ah a khun pat ten Judah miphun, Jerusalem khua mitei lakah sonsiat nak lai pia haw hi.
\p
\v 7 Ahasuerus khut sung pen Bishlam, Mithredath, Tabeel le a dang a ngualcam ten Syria awnkam tuah ngat mi lai cu Persia kumpi Ahasuerus nelah pia haw hi.
\v 8 Laikuat nak innpi uktu Rehum le khuapi lai ngan tu Shimshai ten Jerusalem khuapi do in Ahasuerus kumpi nelah lai a piak hang,
\v 9 Laikuat nak innpi uktu Rehum, khuapi lai ngan tu Shimshai le a dang a ngualcam, Dina miphun, Apharsath miphun, Arche miphun, Susan miphun, Deha miphun le Elam miphun,
\v 10 A sunglawi a thupi kumpi Osnappar a pui hang, Samaria khua pi khua no sungah a koih mite le ngun tuipi nitum nak lam ah a um midang te cu hi ni huncan ten,
\v 11 Artaxerxes kumpi nelah a piak mi lai cu ngun tuipi nitum nak lam ah a um na sila ten, hi ni huncan in hilh hi.
\p
\v 12 A ma nelpen kei muhtei lakah a heng mi Judah miphun te a siasuak in a do tu Jerusalem khuapi cu din in, khuapi khantian nak a tawphah ceng awn zo hi tih thei un.
\v 13 Mahmi khuapi cu din leh tukin khuapi khan a tian celhten, sum pia ngawl in siah khon miten pia ngawl in ngam sung phatnak kiam tuk cu thei hi.
\v 14 Kohten a hehpih nak hang a nung mi bang, na nel pen minthan nak kiam tuk zo in umtuk a kul ngawl hang, pu le pa tei sialsiah nak lai cek tukin hi nget nak cu pia hi.
\v 15 Jerusalem khuapi a do thei mi khuapi, kumpi nemcuam nak le uknak ngam khang to tuk a siatsuah thei mi khuapi a hih awng hang, nidang huncan in khuapi sung a do thei mi ngaihsut nak a cat ngawl a neih hang, a do nak thu te mahmi lai sungah a muh hang in thei tuk hi.
\v 16 Mahmi khuapi cu ding leh in khuapi khan a tian celhten, nang cu ngun tuipi nitum pen na uk ngawl nak thu cu kohten ngen ung hitin, lai sungah um hi.
\p
\v 17 Kumpi in laikuat nak innpi uktu Rehum le khuapi lai ngan tu Shimshai pen pan Samaria khuapi sungah a um a muhtei ngualcam te, ngun tuipi nitum nak lam ah a um midang tei umnak munah a piak leh mi lai cu,
\v 18 Hi ni huncan ten keiman ngan in nohten daihnak co ta un. Ka nelah nohtei piak mi lai cu ka mai pen a sullam let in sial zo ing.
\v 19 Ka cah mi thu bang a cek haw ten mahmi khuapi cu nidang laih in kumpi a donak thu, phat ngawlnak a ngai sung thei mi khuapi, mi do thei mi khuapi a hihnak thu,
\v 20 Sum cu khen in, siahkhon in ngun tuipi nitum nak hempoh uk in huham a nei kumpi ten, Jerusalem khuapi sungah a um awng nak thu cu thei hi.
\v 21 Mah a hih hang, keiman phal nak thu ka piak lak lawh tian a mun khuapi cu din ngawlin um tukin thupiak mi cu hilh ten hi.
\v 22 Uknak ngam sia tik tuk ngawlin ngallin nak tuah hi thu cu pha tak zet zo ta un hitin, thupia hi.
\p
\v 23 Artaxerxes kumpi lai cu Rehum le khuapi lai ngan tu Shimshai tih mi a ngualcam tei mai pen a sial cengten, a muhte cu Jerusalem khuapi Judah miphun tei umnak munah a man lang hawh in Judah tei na deh mi cu neh siah nak tuah kham haw hi.
\p
\v 24 Mah tihcun Jerusalem khuapi biakinn sak nak thu cawl in Persia kumpi Darius uknak kumnih tian ceng ngawl in um hi.
\s Darius kumpi nelah khuapi uktu Tattenai ngat mi lai
\c 5
\p
\v 1 Mah ten kamsang Haggai le Iddo capa Zekhariah miphun ten Judah ngam Jerusalem khua miphun, Judah miphun te Pathian phalnak thu tuah in hilh haw hi.
\v 2 Mah tihcun Pathian kamsang ten a bop hang, Sheatiel capa Zerubbabel le Jozadak capa Jeshua cu tho in, Jerusalem khuapi biakinn cu sa pan leh haw hi.
\v 3 Mah ten ngun tuipi nitum nak lam khuapi uktu Tattenai le Shethar-bozenai pen pan a ngualcam hempoh hung in, hi inn cu sa tuk hi. Hi khuapi khan a tian nak te a lep tuk thu a kua in thucah hum tih hei in hihen,
\v 4 Hi inn a sa tutei min cu a kua hum tih hei in hihen, kan in dong haw naven,
\v 5 Darius kumpi thupiak a hen laih ngawl na deh nak cawl tuk ngawl in, Pathian in Judah miphun kum U ham te zo hi. Mah hang a nelah nget nak lai cu pia haw hi.
\p
\v 6-7 Ngun tuipi nitum nak lam khuapi uktu Tattenai le Shethar-bozenai penpan a muhtei ngualcam, ngun tuipi nitum nak ah a um Apharsach miphun ten Darius kumpi nelah a piak mi lai cu Daius kumpi a cat ngawlin daihnak um ta hen.
\p
\v 8 Kohten Judah ngam a sunglawi mi Pathian inn ah heng in, mahmi umnak miphun ten inn cu suangpi tuah sa in suang pang hum ah thing te koih in a man lang dek in ngaihsut a pitung nak thu theihsak in hi.
\v 9 Hi inn cu sa tuk hi. Hi khuapi khantian a lep leh tuk thu a kon thucah hum tih hei hihen,
\v 10 Uktu tei min cazin la a ma nelah pia tukin uktu tei min te hei hihen, kum U ham tei lakah thu a dot kan ten,
\v 11 A mun kohte cu vanhum le leihum nei tu Pathian sila te ung hi. Ni dang laih in a sunglawi Isarel kumpi sak mi inn cu a tuin lem leh ung hi.
\v 12 Kohtei pu le pa ten vanhum ah a um Pathian cu a thinuuk tik hang, a muhte cu Chaldean kumpi, Babilon kumpi Nebuchadnezzar nelah a ap hang, mahmi kumpi in hi inn cu siatsuah in ngam sung miphun te Babilon khuapi ah man hi.
\v 13 Babilon kumpi Cyrus in a uknak kumkhat ten, hi biakinn a lep lehnak tuk thupia hi.
\v 14 Nebuchadnezzar cu Jerusalem khuapi biakinn sung pen suah in, Pathian inn tuah seng naven Babilon khuapi tei biakinn ah a puak mi sui van, ngun van te Cyrus kumpi in Babilon tei biakinn sung pen suah in Shesh-bazzar min tuah khuapi uktu hihnak a piak mi pai khut sungah ap in,
\v 15 Hi van te la in Jerusalem khuapi biakinn sungah pua in. Pathian inn cu a ma umnak ah um leh tik ta un hitin a thupiak mi bang,
\v 16 Mahmi Sheshbazzar cu hung in Jerusalem Pathian inn tawphah khuam a phut hang, mahmi huncan pen pan a tu tian kohten sa in ceng thei ma laih ung hitin, don leh haw hi.
\p
\v 17 Mah hang Jerusalem khuapi sungah Pathian biakinn a sak tuk thu, Cyrus kumpi thupiak um le um ngawl thei nuam hang, Babilon khuapi van koih nak innpi sungah zei tukin deihnak a um tale zei tik in hi. Mah cengten hi thu sungah a deihnak bang, kei muhtei lakah thupiak nak lai pia hen tin ngetnak lai sungah um hi.
\s Biakinn cangkim tiknak le apnak
\c 6
\p
\v 1 Mah ten Darius kumpi thupiak nak le Babilon khuapi van koih nak innpi sungah zei haw.
\v 2 Medes ngam Achme-tha khuapi kumpi inn sungah lai zial mu in lai zial sungah a um mi thu cu,
\v 3 Biakpiak nak inn cu kho hen. A tawphah khuam cu kho zet phut hen. A sang lam tong sawmluk (60), a vang tong sawmluk (60) um in,
\v 4 A ngeng zet mi suangtian dawl thum, a thak mi thing tuan dawlkhat tuah a thuah cu kho tik in. Ancang te vang kumpi innpi van sung pen suah in pia hen.
\v 5 Jerusalem khuapi biakinn sung pen Nebuchadnezzar in suah in, Pathian inn tuah seng naven Babilon khuapi ah a puak mi sui van, ngun van te pia leh hen. Jerusalem khuapi biakinn ah kuat in na hempoh Pathian inn sungah a muhtei umnak mun ah koih hen tin Cyrus kumpi uknak kumkhat ten, Jerusalem khuapi Pathian inn thu a thupiak nak um hi.
\p
\v 6 Mah hang ngun tuipi nitum nak khuapi uktu Tattenai, Shethar-boz-nai le nang mutei ngualcam tih mi ngun tuipi nitum nak lam ah a um A-phar miphun te tul haw hi.
\v 7 Mahmi Pathian inn a sak nak thu kham pah sun. Judah khuapi uktu le Judah miphun kum U ham ten, mahmi inn cu a ma umnak mun ah sa hen.
\v 8 Mah bek sial ngawl nohten mahmi Pathian sak nak thu cu Judah miphun kum U ham te tuah bawm dun tuk thu, a mun a khamnak um tuk ngawl in ngun tuipi nitum nak lam pen siahkhon mi van neihnak sung pen, inn saknak tu a man te suah cop tukin ka thupiak mi um hi.
\v 9-10 Mah bek sial ngawl a mun a ngimnam tui biakpiak nak te vanhum Pathian nelah a piak hang, kumpi nunnak, miphun hinnam tei nunnak ca thungen tik tukin a muhtei deih mi hempoh Jerusalem khuapi thiampi tei thukhen nak bang, vanhum Pathian nelah meihal biakpiak nak a lu pia tuk khui, tuu cang, tuu no, cang, ci, cabit tui, sathau te ni sial a cat ngawl in pia hen hi.
\v 11 Mah bang bok mihing pakhat in hi thupiak mi a el tale a ma inn pen thing khuam cu bong in a phut cengten a longah khaih hen. A inn vang buakseh nak in cang ta hen tin, ka thupiak mi um hi.
\v 12 Jerusalem khuapi Pathian inn cu sia tik tuk in a bawl tu kumpi le mizawng hempoh te mah lai mun ah a min kho tik tu Pathian in siatsuah ta hen. Keimah Darius in thupia ing. Thupiak mi bang a man lang bawl hen tin, thupia hi.
\v 13 Mah ten Darius kumpi thupiak mi bang ngun tuipi nitum nak khuapi uktu Tattenai, Shethar-bonai le a ngualcam ten a man lang in bawl haw hi.
\v 14 Judah kum U ham ten sa in kamsang Haggai le Iddo capa Zekhariah hilhnak hang, ngaihsut nak pitung haw hi. Isarel miphun Pathian thupiak mi le Persia kumpi Cyrus, Darius kumpi thupiak mi bang sa in ceng haw hi.
\v 15 Darius kumpi uknak kum luk, Adar ha nithum ni in inn sak cu ceng khawng hi.
\p
\v 16 Isarel miphun, thiampi, Levi miphun mat a co awng miphun pih hempoh ten Pathian inn cu lungdam nak thinglung tuah apnak puai bawl haw.
\v 17 Mahmi inn apnak puai cu khui zakhat (100), tuu cang zanih (200), tuu no zali (400), Isarel miphun heinih zui in hinnam hempoh tei sual hah biakpiak nak tihmi kel cang heinih (12), biakpiak nak a lu pia haw hi.
\v 18 Mosi Laithiangtho sungah a um mi bangin Jerusalem khuapi sung pen Pathian bia tuk in thiampi hempoh te hei hihen, pawlkom nak a nei mi Levi miphun te hei hihen, pia haw hi.
\s Kaltan puai
\p
\v 19 Mat a co mi miphun ten hakhat ha ni heili ni in kaltan puai cu bawl haw hi.
\v 20 Thiampi le Levi miphun ten a bang ve in mah le mah thiangtho tikin na hempoh te a thiangtho hang, a muhte pen pan a ngualcam pih thiampi hempoh ca mat a co mi miphun hempoh ca kaltan puai tuu no that haw hi.
\v 21 Mat a co mi miphun sung pen a tul mi Isarel miphun te, Isarel miphun Topa Pathian zei tukin ngam dang miphun umnak mun a bal a vawk tu hempoh ten kaltan puai cu ei in,
\v 22 Ni salih sung lungdam nak thinlung tuah naman sawh ngawl moh puai vang bawl haw. Itahum titale Pathian in lungdam nak thupia hi. Isarel miphun Pathian biakinn sak nak thu Assyria kumpi bawm tukin a thinlung cu a muhtei lamah thek tik hi.
\s Jerusalem khuapi ah Ezra a pin lehnak
\c 7
\p
\v 1-5 Mah cengten, Persia kumpi Artaxerxes khut sung thiampi ngeng Aaron, Eleazer, Phinehas, Abishua, Bukki, Uzzi, Zerahiah, Meraioth, Azaraih, Amariah, Ahitub, Zadok, Shallum, Hilkiah, Azariah, Ezra tei sung pen a suak mi,
\v 6 Isarel miphun Topa Pathian piak mi Mosi Laithiangtho a thiam hilh tu saza Ezra cu Babilon khuapi pen tul hi. A nget mi hempoh a Topa Pathian huham hang kumpi in pia hi.
\v 7 Artaxerxes kumpi uknak kum salih ten a hek khat Isarel miphun thiampi, Levi miphun, lasa thiam te, kongka cing tu, Pathian na dek tu sila ten Jerusalem khuapi ah zui haw.
\v 8 Kumpi uknak kum salih, hakhat ha ten Ezra cu Jerusalem khuapi ah heng hi.
\v 9 Hakhat ha nikhat ni Babilon khuapi pen tulin hakhat ha nikhat ni ten Pathian huham hehpih nak hang, Jerusalem khuapi ah heng hi.
\v 10 Itahum titale, Ezra in Pathian thu kan cingkem tuk in hihen, dan thu a piak mi cu Isarel miphun sungah hilh tuk in hihen lungkim nak a nei tupa hi.
\s Ezra nelah Artaxerxes kumpi ngat mi lai
\p
\v 11 Pathian thukham awnkam le Isarel miphun sungah dan thukham a kan tu saza thiampi Ezra, Artaxerxes kumpi thupiak mi lai cu,
\v 12 Kumpi tei kumpi Artaxerxes cu vanhum Pathian thu Laithiangtho thiam saza, thiampi Ezra nelpen ihempoh thupha a cang tik tu tih hei in, hi huncan sung in a cah mi thu hi.
\p
\v 13 Ka ngam uknak sungah a um mi Isarel miphun thiampi, Levi miphun sung pen Jerusalem khuapi ah a ma thu in a hawh nuam tu hempoh ten a mah tuah zui tuk thu ka piak mi um hi.
\v 14 Itahum titale, na Pathian thu kan bangin Judah ngam Jerusalem khuapi ah a dik mi thu kan tuk in hihen,
\v 15 Jerusalem khuapi ah a um mi Isarel miphun Pathian cu kumpi le a sunglam uktu ten a thiangtho mi thinlung tuah a lu a piak mi sui le ngun tuah,
\v 16 Isarel miphun, thiampi ten Jerusalem khuapi Pathian inn ca phalnak tuah a lu pia in Babilon ngam sung pen na ngah theih mi hempoh sui le ngun cu pua tuk in hihen, kumpi le thuvaisiam pih mihing salih te cu hah hi.
\v 17 Mahmi sum a lak cengten khui, tuu cang, tuu no te tuah, an tuah biakpiak nak, in tuk biakpiak nak a lu te a man lang lei in Jerusalem khuapi sungah a um mi nang muhtei Pathian inn biakpiak nak taitan hum ah a lu pia tuk.
\v 18 A tang mi sui le ngun cu nangmah le na U le nau ten a bawl nuam bangin nohtei Pathian deihnak bang bawl un.
\v 19 Na Pathian inn bawl tuk na nelah a ap mi van te vang Jerusalem khuapi Pathian mai ah koih in.
\v 20 Na Pathian inn tuk a kul a sam lei a kul mi hempoh van sung pen suah in lei in.
\v 21 Vanhum Pathian thu a kan tu saza, thiampi Ezra nget mi hempoh bang,
\v 22 Ngun cuai thawngkhat (1,000), sangvut cang Korah zakhat (100), cabit tui bat zakhat (100), sathau bat zakhat (100) le ci tampi, ngun tuipi nitum nak lam ah a um siahkhon uktu hempoh ten a man lang a piak tuk thu keimah kumpi Artaxerxes thupiak mi um hi.
\v 23 Vanhum Pathian thucah mi hempoh bang Pathian inn ca zuamnak tuah dek hen hi. Kumpi le a miphun hinnam hum ah ita a thinuuk nak heng tuk hum?
\v 24 Mah bek sial ngawl thiampi, Levi miphun, lasa thiam te, kongka cing tu, Pathian na dek tu sila, Pathian na cing tu mihing pakhat no hei in sum khen tik pah sin. Siah hei khon tik pah sin hitin keiman thucah ing hi.
\v 25 Ezra nangmah vang na Pathian thu theih mi ngun tuipi nitum nak lam ah a um mi hempoh tei lakah a dik mi thu khen tuk in hihen, a thei ngawl mite hilh tuk in hihen, kumpi te, thukhen tute cu na Pathian theihnak tuah a dim mi bangin pia in hi.
\v 26 Na Pathian thu le kumpi thupiak a eltu cu thahnak, hawlvawl nak, a neih lonsak nak, thawnginn sungah khumnak tih mi mithah nak pakhat cu a man lang thuak hen tin a thupiak nak lai sungah um hi.
\p
\v 27 Jerusalem khuapi biakinn mawi tik tukin ngaihsut cu kumpi thinlung sungah a khum tu, kumpi mai, a sunglam uktu te, ngalbawi mai pen ka nelah phalnak thu a pia tu pu le pa tei Topa Pathian cu thupha um ta hen.
\v 28 Mah tihcun ka Topa Pathian huham hang, kei cu thazang nei in keimah tuah a zui tu Isarel miphun kum U pa te hulawmkhawm tik hi.
\s Ezra zui in a pin tu innsung sang hotu cazin
\c 8
\p
\v 1 Artexerxes uk sung keimah tuah Babilon khuapi pen a tul mi, miphun hinnam U pa tei tu le canawn cazin cu,
\v 2 Phinehas miphun, Gershum miphun, Ithamar miphun Daniel, David miphun Hattush,
\v 3 Shechaniah miphun Pharosh hinnam sung pen Zakhariah tuah cazin sung a lut mi pano a venghawng za le sawmnga (150) hi.
\p
\v 4 Pahath –moab miphun, Zerahiah capa Eliehoenai tuah pano a venghawng ten zanih (200) hi.
\p
\v 5 Shekhaniah miphun Jahaziel capa tuah pano a venghawng zathum (300) hi.
\p
\v 6 Adin miphun Jonathan capa Ebed le pano a venghawng sawmnga (50) hi.
\p
\v 7 Elam miphun Athaliah capa Jeshaiah tuah pano a venghawng sawmsalih (70) hi.
\p
\v 8 Shephatiah miphun Michael capa Zebadiah tuah pano a venghawng sawmliat (80) hi.
\p
\v 9 Joab miphun Jehiel capa Obadiah tuah pano a venghawng zanih le heiliat (218) hi.
\p
\v 10 Shelomith miphun Josiphiah capa tuah pano a venghawng za le sawmluk (160) hi.
\p
\v 11 Bebai miphun Bebai capa Zekhariah tuah pano a venghawng kulluanliat (28) hi.
\p
\v 12 Azgad miphun Hakkkatan capa Johanan tuah pano a venghawng za le sawm (110) hi.
\p
\v 13 Adonikam miphun sung pen a dawl bel pa Eliphelet, Jeiel, Shemaiah tuah pano a venghawng sawmluk (60) hi.
\p
\v 14 Bigvai miphun Uthai, Zabbud tuah pano a venghawng sawmsalih (70) hi.
\s Jerusalem khuapi ah a pin leh nak
\p
\v 15 Mahmi miphun te cu Ahava khuapi ah a luang mi ngun tuipi mawk ah hulawmkhawm tikin nithum sung deubuk sungah um haw hi. Mihing tampi te le thiampi te keiman cekin Levi miphun pakhat no hei a muh ngawl ten,
\v 16 Upa Eilezer, Ariel, Shemaiah, Nathan, Zekhariah, Meshullam, theihnak a nei mi Elnathan te sam in,
\v 17 Casiphia khua U pa Iddo nelah lai tuah hah in Iddo le Casiphia khua ah a um a U cu Pathian na dek tu sila ten, koten Pathian inn na cing tute pia tik tukin a muhtei lakah itihbang in son tuk hum tih mi cu keiman cah ing hi.
\v 18 A muhte cu ka Pathian huham hehpih nak hang Isarel miphun, Levi miphun Mahli miphun theihnak a nei mi pakhat, Sherebiah le a ngualcam heiliat (18),
\v 19 Hashabiah le Merari miphun Jeshaiah le a ngualcam kul (20),
\v 20 Levi miphun tei thu cu David le bawi U pa a piak mi Pathian na dek tu sila te, cazin a lut mi bang zanih le kul (220) cu sam haw hi.
\p
\v 21 Mah ten neihnak te penpan naupang te tuah kohtei hawh tuk a man mi lamzin Pathian mai ah zei in a mai pen niamkhiat nak tuah zui tukin, Ahava ngun tuipi mawk pen ancan nak huncan cu keiman thuthan ing hi.
\v 22 Itahum titale, kohtei Pathian a zei tu hempoh ten huham a hehpih nak co haw tuk hi. Topa a zamsan tu hempoh ten a huham kham in a thinuuk nak heng tuk hitin kohten Pathian nelah a hilh hang, ngal khut lamzin pen luat tuk zui in a kuat mi ngalkap ngalhang, cipuh khung ngalhang bu khat cu kumpi nelpen ngen ngam ngawlin zakza haw hi.
\v 23 Mahmi thu hang kohten ancang in kohtei Pathian nelah thungen in um ung. Pathian vangin ngai hi.
\p
\v 24 Mah ten thiampi ngeng kulluannih, Sherbiah, Hashabiah le a U le nau sawm te cu keiman ka koih cengten,
\v 25 Kumpi penpan sunglam U pa, bawi U pa hulawmkhawm mi Isarel miphun hempoh ten kohtei biakinn ca tuk a lu piak mi sui, ngun, van tih mi,
\v 26 Ngun cuai thawngluk le zanga (6,500), ngun van cuai thawngkhat (1,000), sui cuai thawngkhat (1,000),
\v 27 Sui dingka cuai thawngkhat (1,000) a um sui maihum kul (20), sui tuah bang ve in a sunglawi mi sui dal ngek khuaihai panih (2) cu keiman a teh ap in,
\v 28 Nohten Pathian ca thiangtho ta un. Hi van te vang a thiangtho mi van te hi. Hi ngun le sui te vang pu le pa tei Topa Pathian nelah a thiangtho mi thinlung tuah a lu piak mi sui le ngun hi.
\v 29 Jerusalem khuapi, Pathian innkhan sung pen thiampi ngeng, Levi miphun hinnam U pa tei mai pen cuai a teh lak lawh tian zo in cingkem ta un hitin, thucah hi.
\v 30 Mah tihcun a teh mi sui, ngun van hempoh Jerusalem khuapi, kohtei Topa Pathian inn ah pua tukin thiampi le Levi miphun ten co haw hi.
\p
\v 31 Hakhat ha, ni heinih ni in kohten Ahava ngun tuipi pen tulin Jerusalem khuapi ah khualzin ung. Lamzin bul pen a zoh kuh tu ngal tei khut sung pen kohtei Pathian huham hang luat in,
\v 32 Jerusalem khuapi ah heng in nithum um ung.
\v 33 Nili ni in kohtei Pathian inn sung pen Phinehas capa Eleazar le Levi miphun Jeshua capa Jozabad Binnui capa No-adiah ten bawm dun zo in,
\v 34 Uriah capa thiampi Meremoth in mahmi sui le ngun van hempoh te sial in a teh hang, nikhat sung a tehmi cuai kom cu sialsiah hi.
\p
\v 35 Mat a co mi miphun sung pen a tul mi a muhte vang Isarel miphun tei ca in khui heinih (12), tuu cang sawmkuah le paluk (96), tuu no sawmsalih le salih (77), sual hah biakpiak nak ca tuk kel heinih cu Isarel miphun Topa Pathian meihal biakpiak nak a lu pia haw hi.
\v 36 Kumpi thupiak a thucah mite cu ai awh tu kumpi, ngun tuipi nitum nak khuapi uktu tei lakah ap in a mun Isarel miphun le Pathian inn cu cingkem haw hi.
\s Van puak a bang ve ngawl mite tuah huaidun mitei ca Ezra thunget nak
\c 9
\p
\v 1 Mahmi thu a celhten U pa ten kohtei lakah hungin thiampi, Levi miphun tih mi Isarel miphun ten hi ngam sung a bulpi te tuah phial in a um hang, Kanaan miphun, Hitt miphun, Periz miphun, Jebus miphun, Ammon miphun, Moab miphun, Amor miphun tei a nawngkai mi nun tuah nung haw hi.
\v 2 Itahum titale, a muhtei canu le capa te cu a ma ca tuk in hihen, a ma ca tuk hei hihen a lonsak hang, a thiangtho mi miphun cu hi ngam a nei tu ngai miphun te tuah tokhel in a um hang, U pa te le kumpi U pa ten sual a bawl thu cu a ma sa bel in bawl haw zo hima maw tin hilh haw hi.
\v 3 Mahmi awnkam cu keiman ka zak ten a sunglam angki, a puata angki cu botkek in sam le khamul te bot in ambek thungai sungin khung ing.
\v 4 Mah ten Isarel miphun Topa Pathian thupiak a lau tu hempoh mat co mi a muhtei sualnak hang, ka nelah hulawmkhawm in, taklam biakpiak nak huncan tian kei cu ambek in um ing.
\p
\v 5 Taklam biakpiak huncan ten a thinkham nak tho in a sungta angki, a pualam angki a botkek cengten, khukdin ka Topa Pathian nelah khutphalh zakin,
\v 6 Ka Pathian aw, Topa cu zo ngam mang, zakza in mitmai san ing. Ka Pathian, kohtei bawl mi sual te cu kohtei lu humah a dim a khuh hang nasezet in sual cu van ah khong hi.
\v 7 Pu le pa tei khut sung pen pan tuni tian sual leita zo. Kohtei sual nak hang kumpi le thiampi penpan kohten tuni tian thuak bang, ngam dang miphun kumpi khut sungah apnak, thahnak, mat co nak, cuhdun nak, mitmai siat nak te thuak hi.
\v 8 A tu dawm laih sung no in kohtei Topa Pathian in haksat nak pen luat tik hang tang in a thiangtho mi umnak mun pen a khaih tungtul a piak mi a hehpih nak ngeng zet hi. Kohtei Pathian in kei muhtei mit cu vak tikin kohten sila thuak nak mun pen haihawh leh theih nak pia zo hi.
\v 9 Kohten sila thuak in um ung. Mah tihcun sila thuak um naven, kohtei Pathian in zamsan ma hi. Kohtei nunnak luat tik tuk in hihen, kohten Pathian inn cu din in a cimnak te lem leh tuk in hihen, Judah ngam, Jerusalem khuapi sungah belhnak mun keimah pia tuk in hihen, Persia kumpi ten kohtei sungah a hehpih bawl nuam nak thinlung pia zo hi.
\v 10 A tu ah vang kohtei Pathian aw, hi tihbang in bawl cengten,
\v 11 Itihbang in ngen tuk hum?
\v 12 Topan nohte cu hawh ta un na, lonsak tuk laih mi ngam sung miphun tei a nin a bal hang, a thiangtho ngawl mi ngam hi. Ngam sung hempoh ah a nawngkai mi thu tuah dim tik haw zo. Mah hang, nohtei canu cu a muhtei miphun te huai tik pah sun. A muhtei hauhsak nak le neihnak te zei pah sun. Nohte cu thazang ngil nak tuah lei pen a ngah mi ancang ngui eihnak thu, mahmi lei ngam cu na tu le canawn tei sung pen kumkhua lo cang tikin ap nak thu um tuk, mah tihcun nung in um ta un hitin Topai sila, kamsang tei hang thucah mi dan thukham awnkam cu kohten a thu ngai ma ung.
\v 13 Kohtei Topa Pathian tihmi Topa cu kohtei co tak mi dan tat nak hempoh a pia ta vang, kohten pumpak bawl mi sual thu, nasezet sual palcat nak hang hizah tian thuak cengten hei in hihen, Topa cu hizah tak daihnak a piak cengten hei in hihen,
\v 14 Kohten dan thukham zui nak thu te cu palcat leh leu in, hi a nawngkai mi sual thu a thei mi miphun te tuah phial tale pakhat no hei luat ngawl a tang um tuk ngawlin a thinuuk suak in kohte cu siatsuah tuk hima maw.
\v 15 Isarel miphun Topa Pathian aw, nang cu midik hi ci. Kohten tuni in nunnak co in a tang mi hi. Ka sualnak te na mai pen hehpih kun ing. Mahmi sual nak hang na maipen umnak mun co thei ma hitin, ngen hi.
\s Mipi tei sual phuannak
\c 10
\p
\v 1 Mah tihcun Ezra in Pathian inn mai ah bopkhup, mit hitui cakin thu a nget ten mihing tampi, Isarel pano, numei, naupang ten Ezra nelah hulawmkhawm nasezet kap haw hi.
\v 2 Elam miphun Jehiel capa Shechaniah in kohten Topa Pathian cu sual bawl hang, hi ngam sungah a um mi ngam dang miphun te huai zo ung. Mah hang hi thu cu Isarel miphun in muansan nak um laih hi.
\v 3 Mah hang Pathian tihmi ohten Pathian dan thukham a lau tute ngallin nak a piak mi bang, hi numei te le a muhtei canu le capa hempoh zamsan tuk hitin, ohtei Topa Pathian mai pen thukam nak bawl tung hi. Hi thu cu dan thu a um mi bang bawl tuk hung hi.
\v 4 Tho in hi. Hi thu cu Topa tuah a seng mi hi. Kohten bawm tuk ung hi. Ngalhan nak thinlung nei in bawl in hitin Ezra cu a hilh leh haw ten,
\v 5 Ezra cu tho in thiampi ngeng Levi miphun, Isarel miphun hempoh te mahmi awnkam bang a bawl tuk thu a muhte tamsiat tikin a muhte cu tam haw hi.
\v 6 Mah ten Ezra in Pathian inn mai pen tho in, Elia-shib capa Johanan khan sungah hawh hi. A hen ten moh cu ei ngawl, tui in ngawl in um hi. Itahum titale, mat co mitei sual a bawl awng hang in kap hi.
\v 7 Mat co mi miphun hempoh te Jerusalem khuapi ah hulawmkhawm tik tukin,
\v 8 Kumpi te le kum U ham te a bawl tik mi bang, nithum sungin a heng ngawl mite mat conak, miphun mipi sung pen hawlvawk thuak in, a neihnak hempoh tamsiat nak ah ap mi neihnak cang tik tukin Jerusalem khuapi pen pan Judah ngam sung hempoh ah thuthan haw hi.
\p
\v 9 Judah miphun le Benjamin miphun pano hempoh ten nithum sung Jerusalem khuapi ah hulawmkhawm in, hakuah ha nikul in mi hempoh ten mahmi thu hang in hihen, can tawtok in Pathian inn mai ah khung haw hi.
\v 10 Mah ten thiampi Ezra tho in, nohten sual bawl zo uh ci. Isarel miphun sungah sual vanngit tik tukin, ngam dang miphun numei te tuah huaidun zo uh ci.
\v 11 Mah hang pu le pa tei Topa Pathian nelah sualphuan nak ngen un. A deihnak bang bawlin, hi ngam miphun hempoh te tuah hei hihen, ngam dang miphun numei te tuah hei hihen khen ta un hitin, a muhtei lakah hilh hi.
\v 12 Mipi hempoh ten Topai thupiak mi bang kohten bawl tuk ung.
\v 13 Mah hang mihing tampi um hi. Nasezet nguah a zu mi huncan hi. Kohten inn a pawlam ah dingin um thei ma hi. Hi thu cu nikhat ninih sung a ceng thei mi thu hima hi. Sual a bawl tu tampi um hi.
\v 14 Oh mipi hempoh uktu U pa ten bawl in kohtei umnak khuapi le khuano pen ngam dang miphun numei hempoh tuah a huai tu hempoh in huncan a tek mi sungah khuapi hempoh pen kum U pa te, thukhen tute tuah hung in, hi thu hang nasezet in a suak mi ohtei Topai thinuuk nak cu dai tik tuk hung hitin, naszet aw tuah don leh haw hi.
\v 15 Asahel capa Johanan le Tikvah capa Jahaziah te bek in mahmi thu bawl haw hi. Levi miphun Meshullam le Shabethai ten bawm haw hi.
\p
\v 16 Mat a co mi miphun ten lungkim nak a neih haw bang thiampi Ezra cu teng in miphun hinnam zui in, a min a sialsiah mite miphun hinnam U pa te cu ha sawm ha nikhat ni in, mahmi thu dong kan tukin khung haw hi.
\v 17 Ngam dang miphun numei te tuah a huai dun tu hempoh cu hakhat ha nikhat ni tian, a venghawng thukhen nak nei haw hi.
\s Vanpuak bang ve ngawl in huaidun mitei cazin
\p
\v 18 Ngam dang miphun numei a huai tu thiampi miphun cu Jeshua miphun Jozadak capa le a nau Maaseiah, Eliezer, Jarib le Gedaliah hi.
\v 19 A nupi te tuah khen tuk ung hitin thukam nak pia haw hi. A bawl sual hang tuu biakpiak nak a lu pia haw hi.
\p
\v 20 Mah bek sial ngawl Immer miphun Hanani le Zebadiah hi.
\p
\v 21 Harim miphun Maasheiah, Elijah, Shemaiah, Jehiel le Uzziah hi.
\p
\v 22 Pashur miphun Elioenai, Maaseiah, Ishmael, Nethaneel, Jozabad le Elasah hi.
\p
\v 23 Levi miphun Jozabad, Shimei, Kelaiah tih mi Kelita, Pethahiah, Judah le Eliezer hi.
\p
\v 24 Lasa thiam mi Eliashib, kongka cing tu Shallum, Telam le Uri hi.
\p
\v 25 Mah bek sial ngawl Isarel miphun sung pen Parosh miphun Ramiah, Jeziah, Malchiah, Miamin, Eleazer, Malchijah le Benaiah hi.
\p
\v 26 Elam miphun Mattaniah, Zekhariah, Jehiel, Abdi, Jeremoth le Eliah hi.
\p
\v 27 Zattu miphun Elioenai, Eliashib, Mattaniah, Jeremoth, Zabad le Aziza hi.
\p
\v 28 Bebai miphun Jehonanan, Hananiah, Zabbai le Athlai hi.
\p
\v 29 Bani miphun Meshullam, Malluch, Adaiah, Jashub, Sheal le Ramoth hi.
\p
\v 30 Pahath-moab miphun Adna, Chelal, Benaiah, Maaseiah, Mattanaiah, Bezaleel, Binnui le Manasseh hi.
\p
\v 31 Harim miphun Eliezer, Ishijah, Malchiah, Shemaiah, Shimeon,
\v 32 Benjamin, Malluch le Shemariah hi.
\v 33 Hashum miphun Mattenai, Mattathah, Zabad, Eliphelet, Jeremai, Manasseh le Shimei hi.
\p
\v 34 Bani miphun Maadai, Amram, Uel,
\v 35 Benaiah, Bedeiah, Chelluh,
\v 36 Vanniah, Mermoth, Eliashib,
\v 37 Mattaniah, Mattenai, Jaasau,
\v 38 Bani, Binnui, Shimei,
\v 39 Shelemiah, Nathan, Adaiah,
\v 40 Machnadebai, Shashai, Sharai,
\v 41 Azareel, Shelemiah, Shemariah,
\v 42 Shallum, Amariah, Josep,
\v 43 Nebo miphun Jeiel, Mattithiah, Zabad, Zebina, Jadau, Joel le Benaiah.
\p
\v 44 A venghawng in ngam dang miphun numei te tuah huai dun in a canu le capa a cawi mite hi.