cnw_reg/07-JDG.usfm

\id JDG
\ide UTF-8
\rem The text in this file was extracted from C:/DCS/Chin, Ngawn/WORD/7. Judges. docx.
\mt Thukhentu
\h Thukhentu
\mt Thukhentu
\toc1 Thukhentu
\toc2 Thukhentu
\toc3 jdg
\s Kanaan miphun a tang mitei lakah Isarel miphun tei donak
\c 1
\p
\v 1 Joshua a thih cengten Isarel miphun ten ohtei sungah a kon Kanaan miphun tei umnak mun ah a masabel ngam thok hawh tuk hum tin Pathian nelah a dot haw ten,
\v 2 Pathian in Judah cu ngam thok hawh tuk hi. Mahmi ngam cu a ma khut sungah kei man ap tung hitin, thupia hi.
\v 3 Judah U Simeon in Kanaan miphun te do tuk in ka lo co mi lei ngam sungah kei mah zui in hi. Na lo co mi ngam ah nangmah tuah kei mah zui tung hitin a son mi bang Simeon in zui hi.
\v 4 Judah cu ngam thok hawh in Pathian in Kanaan miphun, Periz miphun te a ap hang Bezek khuapi pen mihing thawngkhat that hi.
\v 5 Adoni-bezek kumpi cu Bezek khuapi pen tawk in Kanaan miphun, Periz miphun te a thah ten,
\v 6 Adoni-bezek cu tai hi. Judah miphun ten hil in a mat ngah ten a khut pi, a kepi te talh sak haw hi.
\v 7 Adoni-zebek in khutpi le kepi a talh mi kumpi sawm salih ten a hum pen ka an eihnak nuai ah an thial te khul in ei haw hi. Ka bawl awng mi bang Pathian in ka nelah sualnak pia zo hitin, ti hi. Mahmi kumpi cu Jerusalem khuapi ah kuat in a mah cu khuapi pen thi hi.
\p
\v 8 Judah miphun ten Jerusalem khuapi do in nam tuah a thah cengten mei hal haw hi.
\v 9 Mah cengten mual hum ah hei hihen, hanglam ah hei hihen, huakluam sungah hei hihen, a um mi Kanaan miphun te do in ngam thok haw hi.
\v 10 Mah cengten Judah miphun in Kirjarth-arba min lun a nei awng mi Hebron khuapi sungah a um Kanaan miphun tei umnak mun ah ngam thok hawh in, Sheshai, Ahiman, Talmai te that haw hi.
\p
\v 11 Mah cengten Kirjarth-sepher min lun a nei awng mi Debir khua tei umnak mun ah ngam thok leh in,
\v 12 Caleb in Kirjarth-sepher khuapi do in a thah mipa cu ka canu Achsah huai tik tung hitin tih ten,
\v 13 Caleb naupa Kenaz capa Othniel in mahmi khuapi do in Caleb in a canu Achsah a mah cu huai tik hi.
\v 14 Mahmi numei nu cu khualzin a hawh laih in lo pakhat cu a pai nelah ngen in, a pasal tuah a siam cengten laak hum pen tolh hi. A pa Caleb in ai deih kam tin a dot ten,
\v 15 A canu in thupha pia tik nuam ing. Topa’n hanglam ah a um mi cu pia zo hi. Ciktui khuk te vang pia in hitin a nget mi bang a pan a hum ciktui khuk, a nuai ta ciktui khuk pia hi.
\p
\v 16 Mosi sungpai tupa a himi Ken miphun ten Judah miphun tuah Tumkung khuapi pen Arad khuapi hanglam, Judah ngam sungah hil in um haw hi.
\v 17 Mah cengten Judah in a U Simeon tuah hawh in, Zephath khuapi ah a um Kanaan miphun te that in khuapi a siatsuah cengten, mahmi khuapi cu Hamor min tuah in sam haw hi.
\v 18 Judah in Gaza khuapi le khuapi peng huap, Askelon khuapi le khuapi peng huap, Ekron khuapi le khuapi peng huap te do hi.
\v 19 Pathian cu Judah tuah a um hang, a man mual hum ah a um mi a muhte hawlvawk hi. Huakluam ah a um mite cu hawlvawk thei ma hi. Itahum titale, a mun thik cipuh leng tampi nei haw hi.
\v 20 Mosi thupiak mi bang Hebron khuapi cu Caleb a piak hang, a mah cu Anak capa pathum ten mahmi khuapi pen hawlvawk hi.
\v 21 Bejamin miphun ten Jerusalem khuapi sungah a um mi Jebus miphun te hawlvawk ngawl in a mun tuni tian Benjamin miphun te tuah Jerusalem khuapi sungah um haw hi.
\p
\v 22 Josep miphun ten Bethel khuapi ah ngam thok hawh in Pathian cu a muhte tuah um hi.
\v 23 Luz min nei awng mi khuapi zo tukin a hah mi thuvil tuten,
\v 24 Khuapi sung pen a tul mi mihing pakhat cu mu in mahmi khuapi sung lamzin lak un. Mah tihcun bawl tale nangmah cu nunnak pia tuk hitin a tih ten,
\v 25 A man khua sungah a tum mi lamzin a lak hang, a mun khuapi sung mite cu nam tuah that in mahmi mihing le innsung sang te luat haw hi.
\v 26 Mahmi pa cu Hit ngam sungah a hawh cengten, khuapi din in Luz min tuah in sam hi. Tuni tian mah tihcun sam haw hi.
\p
\v 27 Manasseh miphun in Basha khuapi le khuano te, Taanach khuapi le khuano te, Dor khuapi le khuano te, Ibleam khuapi le khuano te, Megiddo khuapi le khuano sungah a um mite cu hawl vawk ngawl in, Kanaan miphun neh in um haw hi.
\v 28 Mah cengten Isarel miphun te thazang a neih ten, Kanaan miphun te hawlvawk ngawl in a siah pia tik haw hi.
\p
\v 29 Mah bang bok Epharaim miphun Gaza khuapi sungah a um mi Kanaan miphun te hawlvawk ngawl in Gezer khuapi sungah tokhel in um haw hi.
\p
\v 30 Mah bang bok Zebulun miphun in Kitron khuapi te, Nahalol khua mite hawlvawk ngawl in Kanaan miphun te tuah tokhel um in a siah pia tik haw hi.
\p
\v 31 Mah bang bok Asher miphun in Accho khuapi mite, Sidon khua mite, Ahlab khua mite, Achzib khua mite, Helbah khua mite, Aphik khua mite, Rehob khua mite cu hawlvawk ngawl in,
\v 32 Asher miphun ten ngam sung Kanaan miphun te tuah tokhel um haw hi.
\p
\v 33 Mah bang bok Naphtali in Beth-shemesh khuapi, Beth-anath khuapi mite hawlvawk ngawl in, ngam sung mi Kanaan miphun te tuah tokhel in um haw hi. Mah hang Beth-shemesh khuapi miten siah pia in um haw hi.
\p
\v 34 Amor miphun te vang Dan miphun ten mual hum ah a hawlvawk hang, huakluam sungah um tuk cu phal haw ma hi.
\v 35 Amor miphun ten Heres mual hum khuapi, Aijalon khuapi, Shaalbim khuapi sungah neh in um haw hi. Mah hang Josep miphun cu thazang a tam hang Amor miphun ten siah pia haw hi.
\v 36 Amor miphun tei umnak mun cu Akrabbim mual bul, Sela khuapi pen pan in a humlam ah um hi.
\s Bochim khuapi sungah Pathian vancung mi
\c 2
\p
\v 1 Pathian vancung mite cu Gilgal khuapi pen Bochim khuapi sungah heng in nohtei pu le pa tei lakah ka thukam mi ngam, Izip ngam pen nang muhte kei man pui zo ing. Nang muhte tuah ka bawl mi thukhaam cu kei man siatsuah ngawl in a cat ngawl cing kem tung.
\v 2 Nohten hi ngam miphun te tuah pawlkom nak bawl pah sun. A muhtei biakpiak nak taitan te phuk tuk uh citin kei man hilh naven, nohten ka thu awnkam ngai ma uh ci. Ita hi tihbang in bawl uh cim?
\v 3 Mah cengten ka hilh leh mi thu cu hi ngam miphun te nohtei mai pen kei man hawlvawk mang hi. A mun nohtei langlam ah muksu sa ngah thiam mundin bawl in, a muhtei pathian vang nohtei sungah thang in cang haw tuk hitin, ti hi.
\v 4 Pathian vancung mi in Isarel miphun tei lakah hi tihbang in thu a piak ten, mihing tampi ten aw suah au in kap haw hi.
\v 5 Mahmi umnak mun cu Bochim tin a min sam in Pathian nelah biakpiak nak bawl haw hi.
\s Thungaih ngawl hang caaknak
\p
\v 6 A humpen Joshua in mihing tampi te a hah ten, Isarel miphun ten a muhtei co mi lei ngam cu la tukin hawh haw hi.
\v 7 Joshua uk sung hempoh Isarel miphun ten Pathian bia haw. Pathian in Isarel miphun ca tuk bawl mi na thupi a ngeng hempoh thei in, Joshua a thih nungten a nungdam laih in U pa tei khut sung pen Pathian cu bia haw hi.
\v 8 Pathian sila Nun capa Joshua cu a kum za le kum sawm a kim ten thi hi.
\v 9 Epharaim mual hum, Gaash mual hum ah a um mi a ma lo co Timnath-heres khuapi peng huap ngam sungah phum haw.
\v 10 Joshua khut sung miphun hempoh ten pu le pa tei hulopkhawm nak ah heng haw hi. Pathian hei hihen, Isarel miphun ca tuk bawl mi thu hei hihen, a thei ngawl mi tunung ten miphun te heng tuk laih hi.
\p
\v 11 Mahmi huncan ten Isarel miphun ten Pathian mai ah sual bawl in Baal pathian bia haw tuk hi.
\v 12 Izip ngam pen a muhte a pui tu pu le pa tei Pathian zam san in, elkim ah a um mi miphun dang pathian nungah lukun zui in a biaknak hang, Pathian cu a thinuuk tik haw.
\v 13 Pathian cu zamsan in Baal pathian, Astaroth pathian a biak haw hang,
\v 14 Pathian in Isarel miphun sungah nasezet a thinuuk nak suak in a lon mi a muhtei khut sungah a ap ten, elkim ngal tei khut sungah zuak in ngal tei mai ah a mun ding ngam leh haw ma hi.
\v 15 A muhtei hawh nak hempoh sungah Pathian thukam bang, a khut tuah khamnak tawk in haksat cimnak naszet heng haw hi.
\p
\v 16 Mah hang a lon mi a muhtei khut sung pen pan tu thukhen tute Pathian in heng tik hi.
\v 17 Mahmi thukhen tutei awnkam cu a mun ngai ngawl in, a dang pathian tuah sual in lukun haw zo hi. Pu le pa tei thukham zui mi lamzin pen a mun a man lang in lamzin a pialh hang, pu le pa tei zui mi bang zui haw ma hi.
\v 18 Pathian in thukhen tute a hen tik ten a mah tuah a um hang a uknak sung hempoh ah Isarel miphun te ngal tei khut sung pen pan hi. Itahum titale a mun haksat bawlsiat nak thuakin a kah haw ten Pathian in sik hi.
\v 19 Thukhen tu tei thih nungten a muhte cu pu le pa te sang a sual saw hang, ngamdang pathian nungah zui in le bia in a lukun haw hi. A muhtei zui mi dan le a haksa mi lamzin cu zam san haw ma hi.
\v 20 Pathian in Isarel miphun sungah nasezet a thinuuk in hi miphun ten ka thu ngai ngawl in um hi. A muhtei pu le pa te tuah ka bawl mi thukhaam a siat suah hang,
\v 21 Joshua a thih cengten a tang mi miphun pakhat cu a muhtei mai pen kei man hawlvawk leh tuk ma toh ing.
\v 22 A pu le pa tei lamzin ah zui tuk in a cingkep mi bang a muhte cu cingkem tuk maw. Cingkem tuk ma maw tin a tang laih mi miphun hang, Isarel miphun cu kei man cul tung hitin a thupiak mi bang in,
\v 23 Mahmi miphun cu Joshua khut sungah ap ma, a man lang hawlvawk ngawl in um hi.
\c 3
\p
\v 1-2 Kanaan ngam sungah a do tu ngalkap hempoh a thei ngawl mi Isarel miphun te cul tuk in hi hen, ngal thu a thei ngawl mi Isarel miphun tu le canawn ten ngaldo thiam nak cung tuk in hihen, Pathian zam mi miphun te cu,
\v 3 Philistine kumpi panga a um mi Kanaan miphun hempoh Sidon miphun, Baal-hermon mual hum ah a um mi Hit miphun te tang haw hi.
\v 4 Pathian in Mosi hang pu le pa te thu a cah mi thukham te bang zui tuk le zui tuk ngawl lang tik tuk in, Isarel miphun te cul tuk in hi.
\v 5 Isarel miphun ten Kanaan miphun, Hit miphun, Amor miphun, Periz miphun, Jebus miphun tei sungah um in,
\v 6 A muhtei canu le capa te tuah huai dun in a canu te huai tik tuk in, a muhtei pathian cu bia haw.
\s Othniel
\p
\v 7 Isarel miphun ten Pathian mai ah sual bawl in a muhtei Topa Pathian a phawkngilh hang Baal pathian, Sheroth thing kung te a biak hang,
\v 8 Pathian in Isarel miphun sungah nasezet a thinuuk in, Mesopotamia kumpi Cushan-rishatthaim nelah zuak in Isarel miphun ten kum liat sung mahmi kumpi nelah sila um haw.
\v 9 Mah cengten Pathian a au haw ten pan tu Topa, Kenaz nau, Kenaz capa Othniel cu a muhtei ca in heng tik hi.
\v 10 Pathian hawvang cu a ma hum ah a hen hang, a man Isarel miphun te ukin ngaldo tuk ngam thok hi. Mesopotmia kumpi Cushan-rishatthaim cu a ma khut sungah Pathian a ap hang, a man mahmi kumpi cu neh hi.
\v 11 Kum heili sung ngam sung hempoh dai in Kenaz capa Othiel cu thi hi.
\s Ehud
\p
\v 12 Mah cengten Isarel miphun cu Pathian mai pen sual a bawl hang, Moab kumpi Eglon cu Isarel miphun a langkhat lam ah thazang tuah dim tik hi.
\v 13 Mahmi kumpi in Amor miphun, Amalek miphun te hulawm tik in ngaldo tuk ngam a thok hang Isarel miphun te a thah cengten, Sunpalun khuapi long in,
\v 14 Isarel miphun ten kum heiliat sung Moab kumpi Eglon nelah sila in um haw.
\p
\v 15 Mah cengten Pathian nelah a au ten pan tu Topa, taklam khut a mang thiam ngawl mi Benjamin miphun, Gera capa Ehud cu heng tik hi. A ma uknak sungah Isarel miphun ten laksawng cu Moab kumpi Eglon nelah pia haw.
\v 16 Ehud in a sau lam tongkhat namhiam bawl in a tak lam kawng puan sungah a ken cih cengten,
\v 17 Moab kumpi Eglon nelah laksawng pia hi. Eglon cu mi thau zet pa hi.
\v 18 Ehud in laksawng cu a piak cengten laksawng pua tute hah in,
\v 19 Gilgal khuapi bulah a um mi suangphut nak pen a mah loli kikleh in Pathian aw, kei cu daiden no in hawh nak tuk thu um hitin a tih ten, kumpi in daiden no um un hitin thu a piak mi bang a nelpen na dek tu hempoh te tul haw hi.
\v 20 Mah ten kumpi a mah pakhat bek um theih mi a dap nak khan sungah a khun laih tak Ehud cu nek in Topa tuah a seng mi Pathian thupiak mi um hitin a tih ten kumpi cu ding hi.
\v 21 Ehud in a veilam khut dang in namhiam zet a taklam khut pen suah in kumpi von cu a dawh hang,
\v 22 A namkung tuah a nam cu lut tum in von sung pen dok kik thei ngawlin a thau cu nam in a khuh hang a ngilkha tul hi.
\v 23 Mah ten Ehud cu a pawlam khan ah tulin kumpi kongka te khak in tawhkalh hi.
\p
\v 24 A suah tul cengten, sila a hek khat te heng in kumpi kongka tawh kalh a muh ten a thungai in kumpi cu a dap nak khan sungah thi hitin a tih ten,
\v 25 Mualpho nak tuk tian in um hitin ngak in a mun a Topa cu kongka a hon ngawl hang, a mun tawh cu la in a hon haw ten leihum ah lum a thi in a um mi a Topa cu mu haw.
\p
\v 26 Mah tihcun a mun a ngah laih tak in Ehud a luat hang, suangphut nak cu kal in Seirath khua ah a hen cengten,
\v 27 Epharaim mual hum pen lemle tum Isarel miphun ten a nungah zui in mual hum pen tolh suk haw.
\v 28 A man, ka nungah zui un. Pathian in nohtei ngal Moab miphun te nohtei khut sungah ap tuk hitin a tih mi bang, a nungpen tolh suk in Jodan ngun tan nak, Moab ngam hawh nak lamzin cu kham in mihing pakhat no hei tan thei ma hi.
\v 29 Mah ten thazang nei mi Moab ngalkap te pakhat no hei hah ngawl in mihing thawngsawm (10,000) a thah hang,
\v 30 Moab miphun te cu Isarel miphun tei khut sung pen ngal a sun hang, kum sawmliat sung a ngam sung hempoh ngal dai hi.
\s Anath capa Shamgar
\p
\v 31 Ehud nung ten Anath capa Shamgar heng in ngolhzum tuah Philistine mihing zaluk a thah hang, Isarel miphun te pan hi.
\s Deborah
\c 4
\p
\v 1 Ehud a thih cengten Isarel miphun ten Pathian mai ah sualnak a bawl leh haw hang,
\v 2 Pathian in Hazor khuapi sungah kumpi dek tu Kanaan kumpi Jabin nelah zuak hi. Ngal bawi ngeng a piak mi pa cu Hagoyim ngam Harosheth khuapi ah a um mi Sisera hi.
\v 3 Mahmi kumpi in thik cipuh leng zakuah (900) nei hi. Isarel miphun te kum kul sung a bawl siat nak hang, a mun Pathian cu au haw hi.
\p
\v 4 Mah ten Lapidoth khua mi kamsang nu Deborah in Isarel miphun cu uk hi.
\v 5 A mah cu Epharaim mual hum, Ramah khuapi le Bethel lak lawh Deborah Sunpalun thing nuai ah um in Isarel miphun ten, mahmi kamsang nui thukhen nak co tuk in heng thei haw hi.
\v 6 Deborah in mihing hah in Naphtali ngam Kadesh khua ah a um Abinoam capa Balak cu sam in nang cu Naphtali miphun, Zebulun miphun sung pen mihing thawngsawm pui in Tabor mual hum ah hawh in hi.
\v 7 Kei cu Jabin ngal bawi Sisera le cipuh leng ngalkap te na umnak mun ah Kishon ngun tuipi ah pui in, na khut sungah ap tung tin Isarel miphun thucah mi hitin, hilh hi.
\v 8 Barak nang cu keimah tuah a hawh tale hawh tung hi. Na hawh ma tale hawh tuk mang tin a tih ten,
\v 9 Deborah in kei mah tuah a thungai in hawh tuk hi. Mah naven na hawh nak lamzin ah minthan nak co tuk ma. Pathian in Sisera cu numei sungah zuak tung tin a tih cengten, tho in Barak tuah Kadesh khuapi ah hawh hi.
\v 10 Barak in Naphtali miphun, Zebulun miphun te Kadesh khuapi ah sam in a zui tu mihing thawngsawm (10,000) le Deborah tuah kai hi.
\p
\v 11 Mosi sungpa Hobab tu le canawn sungah a um mi Ken miphun Heber cu Ken miphun te tuah khen in, Kadesh khuapi bul Zaanaim thingpi bul ah buk sa in um ham hi.
\p
\v 12 Abinoam capa Barak cu Tabor mual hum ah a kai nak thu Sisera nelah a theih tik ten,
\v 13 Sisera in a ma nelah a um mi hempoh thik cipuh leng zakuah (900) le Hagoyim ngam Harosheth khuapi pen pan Kishon ngun tuipi tian a mihing hempoh hulawm tik hi.
\v 14 Deborah in tho in. Tuni cu Pathian in Sisera cu na khut sungah a ap mi ni hi. Pathian cu na mai ah heng zo hima maw tin a tih ten, Barak in mihing thawngsawm (10,000) te tuah Tabor mual hum pen tolh suk hi.
\v 15 Pathian in Sisera pen pan in a cipuh leng te le a ngalkap hempoh te Barak mai ah nam tuah a sun tik hang, Sisera cu a cipuh leng pen tolh in a ke tuah tai hi.
\v 16 Barak in cipuh leng te, ngalkap te Hagoyim ngam Haroseth khuapi tian hil in, Sisera ngalkap hempoh ten pakhat no hei tang ngawl in nam tuah thi khawng haw.
\p
\v 17 Sisera in Ken miphun Habor nupi Jael buk sungah ke tuah tai hi. Mahmi huncan in Hazor kumpi Jabin cu Heber miphun pih Ken miphun te tuah pawlkom in um hi.
\v 18 Jael in Sisera cu khualmuak tuk in a tul ten Topa aw tum in. Keima nelah tum in hi. Lau pah sin tin a tih bang a man Jael umnak buk sungah tum in, Jael in a mah cu puan tuah silh hi.
\v 19 A man ka dangdum hi tui dawmlaih no pia un tin a nget ten, numei nu in khuinawi thawl cu hong in a in tik cengten puan silh leh tik hi.
\v 20 A mah cu buk kongka bul ah um hi. Mihing pakhat in pano um maw tin hung in a dong tale um ma hitin, thucah hi.
\v 21 Mah ten Heber nupi Jael in Sisera cu cawl in a hihbuh laih tak, buk tawngkhen pakhat le sobul cawi in a ma nel ah hawh kuh den in tawngkhen cu lei sungah kho tik tuk a khet ten Sisera cu thi hi.
\v 22 Barak in Sisera a zeih ten Jael cu tul in ka nelah tum in. A zei tupa lak tung tin a muah ten, Barak in buk sungah tum in Sisera thi in a bek ah tawngkhen hiam a mung leng a um mi cu mu hi.
\p
\v 23 Mahmi ni in Pathian in Isarel miphun mai pen Kanaan kumpi Jabin cu a neh nak tuah,
\v 24 A mun mahmi kumpi a siatsuah laih ngawl sung hempoh neh nak tuah um haw hi.
\s Deborah la phuah mi
\c 5
\p
\v 1 Mahmi ni in Deborah le Abinoam capa Barak sak mi la cu,
\v 2 Isarel miphun sungah kumpi ten a lamhoih nak hang in hihen, haksa mizawng ten zuamnak thinlung tuah mah le mah a piak nak hang in hihen, Pathian hehpih nak cu thangphat haw.
\q
\v 3 Kumpi te aw, za ta un. Kum pi cata aw, ngai ta un. Kei man la sa tung. Pathian nelah la sa tung. Isarel miphun Topa Pathian minthan nak cu thang phat tung.
\q
\v 4 Pathian aw, Topa cu Seir mual hum pen tolh suk in Edom ngam lak pen ngaldo tuk ngam thok a hawh ten, leipi cu hing in nguah a zuk hang meingo pen nguah tuite zu hi.
\q
\v 5 Mual tuan hempoh Pathian mai ah hei hihen, Sinai mual hum vang Isarel miphun Topa Pathian mai ah hei hihen, hing hi.
\q
\v 6 Anath capa Shamgar kumpi khut sungah hei hihen, Jael kumpi khut sungah hei hihen, lamzin pen daidio deu um in khualzin a vak miten lamzin lak lawh pen zui haw.
\q
\v 7 Isarel miphun sungah kumpi lo luah tu nei ngawl in um hi. Kei mah Deborah hen laih ngawl kei cu Isarel miphun sungah nu a neih laklawh sung cu kumpi lo luah tu um ma hi.
\q
\v 8 Isarel miphun ten pathian thak cu teng haw zo. Mah ten a muhtei khuapi cu ngal ten do haw. Isarel miphun thawngsawmli (40,000) sung pen lumphaw pakhat, cei pakhat no hei um ma hi.
\q
\v 9 Phalnak thin lung a neih hang haksa mizawng tei sungah a mah le mah a lu a piak mi Isarel miphun kumpi tei lakah ka thinlung um hi. Pathian hehpih nak cu thangphat un.
\q
\v 10 Cipuh ngo a khung tupa, thu buai tawk in thukhen tupa lamzin ah a vak miten,
\v 11 Tui cawi nak bulah neihnak a sem mitei aw cu a zak ten la sa un. Pathian a dik mi thu, Isarel miphun khuapi khuano sungah thangphat haw tuk hi. Mah ten Pathian miphun ten a muhtei umnak khuapi ah pin kik leh haw tuk hi.
\q
\v 12 Tho in, tho in, Deborah. Tho in, tho in, la sa in, Barak aw, tho in, tho in, Abinoam capa, man in kolh na bulh mi a muhte lak in hi.
\q
\v 13 Mah ten a tang laih mite cu uktu ngalhang U pa tei lakah ah hawh haw hi. Pathian miphun ten huham thawmngeng a nei mi a muhtei lakah kei ma ca in hawh haw hi.
\q
\v 14 Amalek tei umnak bulah a um miten Epharaim ngam sung pen hawh tul haw hi. A muhtei nungah nohtei ngalkap ten Benjamin miphun te hil haw hi. Machir miphun sung pen kumpi te, Zebulun miphun sung pen thukhen a thiam mite tul haw hi.
\q
\v 15 Isschar kumpi te vang Deborah sungah tel in Isschar miphun cu Barek khut thawm lian hi. Barek nungpen huakluam sungah tai haw. Reuben miphun umnak lui tui ah thinlung a nei tu tampi haw hi.
\q
\v 16 Mah cengten nang cu tuu ham aw ngai tuk in mual lak lawh ah ita khung thei cim? Reuben umnak lui tui ah thinlung vak vai zei tuk in um haw hi.
\q
\v 17 Gilead miphun ten Jodan ngun ngalkhat lam ah dai den no um haw hi. Dan miphun in tembaw colh nak bul ah ita tang in um hum? Asher miphun cu tuipi bul tembaw colhnak mun a kuih nak sungah phia ngawl daiden no um hi.
\q
\v 18 Zebulun miphun in a nunnak bo tuk tian ngalhang in, Naphtali miphun in a sang nak ngam sungah mah bang bok in bawl hi.
\q
\v 19 Kumpi te hung in ngaldo haw. Kanaan kumpi ten Megiddo tuipi ting, Taanach khuapi bulah a do ta vang sum cu lonsak in co ngah haw ma hi.
\q
\v 20 Vanhum pen ngaldo bawm haw. Aksi te vang a hel ten Sisera do haw hi.
\q
\v 21 Kishon ngun, ngaldo nak thu hang minthang mi ngun, Kishon ngun cu ngal ten vawk haw. Ka hawvang aw, nang cu thazang a nei mipa neh zo ci.
\q
\v 22 Mah ten cipuh leng khung ngalkap ten cipuh vat thah vat thah in a khun hang, cipuh ten lei cu a ketin tuah kheng kha in tai haw hi.
\q
\v 23 Meroz khua miten Pathian lam, ngalkap te tuah kil in Pathian lamah a hawh ngawl hang Meroz khuapi cu tamsiat haw. Khuapi te nasezet tam haw tin Pathian vancung mi in thucah hi.
\q
\v 24 Ken miphun Heber nupi Jael cu numei hempoh sang, a sunglawi saw mi thupha um hi. Buk sungah a um mi numei hempoh sang a sunglawi saw mi thupha um hi.
\q
\v 25 A man tui cu ngen in, Jael in nawi tui pia hi. Kumpi man mi khuathai tuah nawitui cu pia hi.
\q
\v 26 Buk tawngkhen la in a taklam khut tuah cawi in Sisera cu vat hi. A ma lu pen vat in a bekah paihlen vawk hi.
\q
\v 27 A mah cu Jael ke bulah lum in um hi. A ke bul a lupnak mun ah thi hi.
\q
\v 28 Sisera nu in tukvelh pen zo in kalaka sung lamah um in a cipuh leng cu ita heng hak hum? Cipuh lengke te ita heng hak hum tin kap hi.
\q
\v 29 Cihnak a nei mi kumpi canu ten a don kik leh bek sial ngawl a muh tei son leh mi thu cu,
\v 30 A muhte cu tawkin a co ngah haw mi neihnak sem in um haw hima maw. Ngalkap tei lakah khanglai him pakhat panih, Sisera ca tuk puan pakcoih, nehnak co tutei longah ok tuk pak tuah a coih bawl mi a zawng lamdang zet puan te long ngah sem haw hima maw tin Sisera nupi in ti hi.
\q
\v 31 Pathian aw, Topai ngal hempoh ten mah tihcun siatnak ah heng haw ta hen. Pathian a it tuten huham a thawmngeng nak tuah a suak tul mi ni bang, cang ta hen hitin la sa haw. Mah cengten kum sawmli tian cu ngam sungah ngal dai hi.
\s Gideon
\c 6
\p
\v 1 Isarel miphun ten Pathian mai ah sual a bawl leh leu in, a muhte cu Midian miphun khut sungah kum salih sung a ap hang,
\v 2 Midian miphun in Isarel miphun neh in a bawl siat nak hang, Isarel miphun ten mual tuan ah a kho mi leikua sungah bawl haw hi.
\v 3 Isarel miphun cu lo a bawl cengten, Midian ngam miphun le Amalek ngam tihmi nisuah nak ngam miphun ten ngaldo tuk ngam thok in,
\v 4 Ngiahbuk a sah haw hang, Gaza khuapi tian ankung a ngah te siatsuah in an eih tuk zam ma hi. Tuu, khui, laak vang zam haw ma hi.
\v 5 Itahum titale a mun nganhing te, buk te tel in khau te a tampi bang a muhte le kalauk te sialzawh ngawlin a tam hang, Isarel ngam cu siatsuah tuk in heng haw hi.
\v 6 Isarel miphun te Midian miphun hang, haksa zet in Pathian nelah au haw.
\p
\v 7 Mah tihcun Midian miphun hang Pathian nelah a au haw ten,
\v 8 Pathian in kamsang pakhat cu Isarel miphun tei lakah a hah ten, Isarel miphun Topa Pathian thupiak mi cu sila umnak Izip ngam pen nohte kei man pui zo ing.
\v 9 Izip miphun tei khut sung pen hei hihen, nang muhte pan in a muhte cu nohtei mai pen hawlvawk in a muhtei ngam pia zo hi.
\v 10 Kei cu nohtei Topa Pathian ing. Nohtei umnak Moab ngam miphun tei biak mi pathian cu lau pah sun tin kei man thukham pia naven nohten ka awnkam thungai ma uh citin, thupia hi.
\p
\v 11 Mah cengten Pathian vancung mi cu heng in Ophrah khua pen Abi-ezer miphun, Joash co mi (oak) thing kung nuai ah khung hi. Joash capa Gideon in a cang cu Midian miphun te mu tik tuk ngawl in cabit ngawinak van bul ah cang ngawi in um hi.
\v 12 Pathian vancung mi cu a pumpi lang in thazang a nei mi a miphun pih ngalhang, Pathian cu nangmah tuah um hitin a tih ten,
\v 13 Gideon in Topa aw, Pathian cu kei muhte tuah a um ngai a hitale ita hi thu heng thei hum? Pathian in ohte Izip ngam pen pui zo hima maw tin, kohtei pai hilh mi bang a bawl tu thasiah huai hempoh ai lai ah um hum? A tuin Pathian in kei muhte zam san in Midian tei khut sungah ap zo hitin a tih ten,
\v 14 Pathian a mah cu a zoh hang, a tuin na co mi huham cu muang in hawh in. Nangman Isarel miphun cu Midian tei khut sung pen pan tuk ci. Nangmah cu kei man tik ing hima maw tin, ti hi.
\v 15 Gideon in Topa aw, kei man Isarel miphun cu itihbang in pan thei tuk hing ngim? Ka miphun cu Manasseh miphun sung pen haksa bel hi. Kei mah vang a sia suak bel mi ing hitin a tih ten,
\v 16 Pathian in a thungai in kei cu nangmah tuah um hang, nangman mihing pakhat thah mi bang Midian miphun te that tuk ci tin, thupia hi.
\v 17 Gideon in na mai pen mitmai ka ngah tale kei mah tuah a tuin otpih nak thu a lang mi thasiah huai lak in hi.
\v 18 Kei cu heng kik leh in an tuah biakpiak nak ken hang Topa mai ah koih laih ngawl tian, hi lai umnak mun ah hung hih pah sin tin a nget ten na hen leh lak lawh tian kei mah um tung hitin, thupia hi.
\p
\v 19 Gideon cu hawh in kel no pakhat hei hihen, moh ngawivam ephah pakhat tuah bawl mi naman sawh ngawl moh pheng te hei hihen bawl hi. Kel sa cu kho sungah koih in kel cik huan tui cu bel sungah a sun cengten, vancung mitei umnak (Oak) thingkung nuai ah keng in pia hi.
\v 20 Pathian vancung mi in sa le naman sawh ngawl moh pheng cu la in suanghum ah koih in. Sa huan nak a tui cu lei in hitin a tih ten a tihnak bang Gideon in bawl hi.
\v 21 Mah ten Pathian vancung mi in a cawi mi thiangkhut dang in, sa le naman sawh ngawl moh pheng cu a tawh ten suang sung pen mei suak in sa le naman sawh ngawl moh pheng a kang cengten, Pathian vancung mi cu tham ta hi.
\v 22 Pathian vancung mi a hihnak cu Gideon in a theih ten Topa Pathian aw, kei cu Pathian vancung mi mitmai cang tawk in mu zo ing hitin a tih ten,
\v 23 Pathian in daihnak um ta hen. Lau pah sin. Nang cu thihnak pen luat tuk ci tin, thupia hi.
\v 24 Mahmi umnak ah Gideon in Pathian ca biakpiak nak bawl in Jehovah-shalom tin a min sa hi. Abiez capa umnak cu Ophrah khua ah tuni tian um hi.
\p
\v 25 Mahmi ni zan in Pathian in na pai khui cang le kum salih a um mi a panih nak khui cang la in, na pai bawl mi Baal pathian biakpiak nak subal in, biakpiak nak bul ah a um mi Accasia thingkung cu phuk in.
\v 26 Ka thupiak mi bang hi suang hum ah Pathian ca biakpiak nak na bawl cengten, na phuhnak thing ta tuah a panih nak khui cu mei hal biakpiak nak bawl in hitin, thupia hi.
\v 27 Gideon in a sila sawm cu sam in Pathian thupiak mi bang bawl hi. A pai inn sungsang te hei hihen, khua sung mite hei hihen lau in sun huncan ten a bawl ngam ngawl in zan huncan ten bawl hi.
\p
\v 28 Zinglam khawma no, khuapi sung te a thawh haw ten Baal pathian biakpiak nak taitan cu cim in, a bul ah a um mi Accasia thingkung phuk in, a dawl ta bawl mi biakpiak nak taitan hum ah a panih nak khuicang cu biakpiak nak pia in a um mi a muh haw ten,
\v 29 Hi thu cu ita bawl cim tin pakhat le pakhat dongkan in a um ten, hi thi cu Joash capa Gideon in bawl zo hitin, mihing hek khat te son haw.
\v 30 Mah ten khua sung miten Joash cu na capa in Baal pathian biakpiak nak subal in a bul ah a um mi Accasia thingkung a phuh hang, a mah cu that tuk in suah tul un tin ti naven,
\v 31 Joash langlam ah a um mi hempoh ten nohten Baal pathian lamah na dek tuk maw. A mah cu pan tuk cim. A ma lam ah na dek in a cing tupa cu zingvak laih ngawl in thi hen. Baal cu pathian ngai a hitale a biakpiak nak cu mi pakhat in a sukbal hang, a ma thu cu a man cing kem ta hen hitin, don leh hi.
\v 32 Mah tihcun Baal pathian biakpiak nak cu mihing pakhat in a siatsuah hang, a langkhat lam ah a ma thu cu a man cingkem ta hen hitin tiin, a capa cu mahmi ni in Jerubbaal tin, sam hi.
\p
\v 33 Mah ten Midian miphun, Amalek miphun, nisuah nak miphun hempoh a hulawmkhawm nak hang, Jazreel huakluam ah hawh in ngiahbuk sat haw hi.
\v 34 Pathian hawvang cu Gideon hum ah a hen ten, a man lemle tum in Abiez capa ten zui haw hi.
\v 35 Thuthang puak tute cu Manasseh miphun ngam hempoh ah hah in Manasseh miphun ten zui haw hi. Mah cengten Asher ngam khuapi, Zebulun ngam, Naphtali ngam ah thuthang puak tute hah in, mahmi ngam mipi te vang hulopkhawm nak mun ah hung haw hi.
\p
\v 36 Gideon in Pathian cu Topa thupiak mi bang Isarel miphun te kei ma hang pan tuk ngai a hitale,
\v 37 Kei man tuu pakhat mul cu cangcil nak koih tung. Tuu mul cu dai tui kawt in leilung hempoh a ko tale a thupiak mi bang, Isarel miphun cu kei ma hang pan tuk hi tih cu kei man thei ing hitin, a nget mi bang in cang hi.
\v 38 Zinglam khawma no tho tuu mul cu met in dai tui cu kuangkum a dim in um hi.
\v 39 Mah cengten Gideon in thinuuk pah sin. Veikhat no ngen hih tung hi. Tuu pakhat mul tuah a tun veikhat no bek culnak thupia in. Leilung hempoh dai tui kawt in, tuu mul cu ko hen hitin Pathian nelah thu a nget bang,
\v 40 Mahmi zan in Pathian in a bawl hang, leilung hempoh cu dai kawt in tuu mul cu ko in um hi.
\s Midian miphun tei lakah Gideon nehnak
\c 7
\p
\v 1 Jerubbaal min tuah sam mi Gideon cu zing khawma no tho in a um mi hempoh te tuah Harod tuikhuk bulah ngiahbuk a sah hang, Midian ngalkap te sak lam Moreh mual bul luam sungah um hi.
\p
\v 2 Pathian in nangmah tuah a tel mihing a tam leita hang, a muhtei khut ah Midian miphun te kei man ap tuk mang hi. Ap ta le Isarel miphun in ka khut thawmlian cu kei man pan ing hitin, keima langlam pen ngal tuk hi.
\v 3 Mah hang launak a nei mite cu Gilead mual hum pen zing khawma no pin tik hitin, mipi tei lakah au hen hitin Gideon cu thu a piak hang, mihing thawngkul (20,000) pin leh in thawngsawm (10,000) tang laih hi.
\p
\v 4 Mah cengten Pathian in mihing tam leita tang laih hi. Tui umnak mun ah sam in. A muhte tui um nak pen nangma ca tuk kei man cul tung. Mah ten hi pa cu nangmah tuah hawh tuk hitin kei man ka tih ten a mah cu hawh tuk hi. Hi mipa cu hawh tuk ma hitin ka ti tale a mah cu hawh tuk ma hitin a thu piak mi bang,
\v 5 Gideon in a muhte tui umnak mun ah sam in Pathian in uico in tui cu a liak a in bang a lei tuah a in mi sehkhat, khukdin a bop in a in mi sehkhat, mahmi mihing sehnih cu khen in hitin, Gideon nelah thupia hi.
\v 6 Mah ten a khut tuah tui cu la in a liak mi mihing zathum (300) um hi. A tang mi hempoh te tui in tuk khundin a bop in a in mite hi.
\v 7 Pathian in a liak mi mihing zathum tuah nangmah cu keiman pan in, Midian miphun te na khut sungah keiman ap tung. A tang laih mite cu a mu umnak ah pin leh tik in hitin, Gideon nelah thupia hi.
\v 8 A muhte cu ancang tuah lemle te keng in, a tang mi Isarel miphun hempoh a muhtei umnak mun ah Gideon in a hah hang mahmi mihing zathum (300) bek cu a mah tuah tang hi. Midian miphun te a ma nuai huakluam ah ngiahbuk sat haw hi.
\p
\v 9 Mahmi zan in Pathian in tho in hi. Ngal tei ngiahbuk sah nak mun ah ngam thok hawh in. Na khut sungah kei man ap tung.
\v 10 Na do ngam ma tale na sila Phurah tuah hawh in.
\v 11 Itihbang in a mun awn hum tih cu nangman za tuk ci. Mah cengten ngiahbuk sah nak mun ah hawh tuk in, na khut thawmngeng tuk hitin a thupiak mi bang, Gideon in a sila Phurah cu sam in ngal tei ngiahbuak sah nak ah hawh hi.
\v 12 Midian ngam miphun, Amalek ngam miphun, nisuah nak lam mipi hempoh ten huakluam ah cam in, khau bang in tam haw hi. Kalauk te vang philnel zah sial hang ngawl in tam hi.
\v 13 Gideon a hen ten, mihing pakhat in a mang a ngualcam tei lakah a son mi barly moh phangkhat cu Midian ngalkap sungah lumlet cang buk pakhat sepkha lumlet in um hitin a tih ten,
\v 14 A ngualcam ten, mahmi moh phang cu a dang hima hi, Isarel miphun Joash capa Gideon nam hi. Mahmi pai khut sungah Pathian in Midian miphun, Midian ngalkap hempoh ap tuk hitin, don leh hi.
\p
\v 15 Mahmi mang le mang a tihnop nak cu Gideon in a zak ten, bia in Isarel ngalkap umnak ah a hawh leh cengten tho un, Pathian in Midian ngalkap hempoh nohtei khut sungah ap zo hitin, ti hi.
\v 16 Mah ten mihing zathum (300) te mang in, Lemle pakhat le meikhuat a tel mi bel pakhat cu mi hempoh khut sungah cawi tik hi.
\v 17 Kei mah zo in ka bawl mi bang bawl un. Ngiahbuk a pualam hen ten ka bawl bang bawl un.
\v 18 Kei mah le ka nelah a um mi hempoh in Lemle a tum ten a kimsuak khat mun hempoh ah a muhten, lemle tum in Pathian le Gideon nam tin au un hitin, thucah hi.
\p
\v 19 Mah tihcun Gideon le a sungah a tel mi mihing zakhat (100) ten zanngil ten ngiahbuk a pawlam ah a hen ten lemle cu tum haw hi. A cawi mi bel te vat keh haw hi.
\v 20 Mihing sethum ten lemle tum in bel cu a vah keh haw hang a veilam khut ah meikhuat hei hihen, a taklam khut ah tum tuk lemle hei hihen cawi in, Pathian le Gideon nam tin au haw hi.
\v 21 A mun ngiahbuk elkim mi hempoh a mu um nak munah ding in ngalkap hempoh tai thah in au haw.
\v 22 Mihing zathum (300) ten lemle cu a tum ten Pathian huham hang, ngalkap hempoh pakhat le pakhat do un in Zererath umnak mun Beth-shittah khuapi ah hei hihen, Tabbath khuapi bul ah Abel-me-holah khua peng khen huap lam ah hei hihen tai haw hi.
\v 23 Isarel miphun te cu Naphtali ngam, Asher ngam, Manasseh ngam mun hempoh pen hulawmkhawm in Midian miphun te hil haw hi.
\p
\v 24 Gideon in thuthang puak tute cu Epharaim mual hum hempoh ah hah in, nohten Midian miphun te kham tukin Jodan ngun bul ah Beth-barah khua tian a muhte a masa in ngak un hitin thu a cah bang, Epharaim miphun hempoh ten hulawmkhawm in Jodan ngun bul Beth-barah khua tian ngak in um haw.
\v 25 Midian ngalkap bawi panih, Oreb le Ze-eb te man in Oreb cu Oreb suang hum ah hei hihen, Ze-eb cu Ze-eb cabit ngawi nak van sungah hei hihen a thah cengten Midian miphun hempoh ten a hil hang, Oreb lu le Ze-eb lu cu Jodan ngun ngalkhat lam Gideon nelah pia haw hi.
\s Midian kumpi Zebah le Zalmunna
\c 8
\p
\v 1 Epharaim miphun ten nang cu Midian miphun na do ten, kei muhte sam ngawl in kohtei sungah itin bawl hum tin nasezet mawhsiat haw hi.
\v 2 Gideon in nohtei bawl sang ka bawl mi thu cu itihbang in tehkip theih hum? Abiezer cabit ngah lawh sang in Epharaim khul mi cu pha saw hima maw.
\v 3 Pathian in Midian ngalkap bawi Ored le Ze-eb cu nohtei khut sungah ap zo. Nohtei bawl mi bang kei man itihbang in bawl thei tuk hum tin a don leh mi awnkam cu a mun a zak ten a thin dai haw.
\p
\v 4 Gideon cu Jodan ngun ah a hen ten a nelah a um mihing zathum te cawl zet thah in hil haw.
\v 5 Succoch khua sung miten ka nung pen a zui tu hempoh moh pia un. A muhte cu cawl zet haw zo. Kei cu Midian kumpi Zebah le Zalmunna cu a tuin zei ing hitin a nget ten,
\v 6 Succoth kumpi in kohten na ngam pen na dek tu tei lakah moh piak tuk thu, Zebah le Zalmunna cu na khut sungah um maw tin don leh haw.
\v 7 Gideon in mah hang Pathian in Zebah le Zalmunna cu ka khut sungah a ap ten, nohtei zanglam keh tuk in ngamlak ling a phun namkim tuah kei man vat tung hitin a tih cengten,
\v 8 Mahmi umnak munpen Penuel khuapi ah hawh in, a muhtei lakah mah tihbang leng in ngen naven, Succoth khuapi tei don mi bang, Penuel khuapi ten don leh haw hi.
\v 9 Gideon in kei cu ka pin kik leh ten hi inn pi subal in siatsuah tuk ung hitin, a muhtei lakah ti hi.
\p
\v 10 Mah ten nam cawi tu mihing tingkhat le thawngkul (120,000) a thih hang, nisuah nak lam mipi tei sung pen a tang mihing tingkhat le thawngsawmnga (150,000) tel in, Zebah le Zalmunna te cu Karkor khuapi sungah um haw.
\v 11 Gideon in Nobah khuapi, Jogbehah khuapi nisuah nak buk sungah a um mitei lamzin pen hawh in, lauthawm nei ngawl mi Midian ngalkap te a thah hang,
\v 12 Midian kumpi Zebah le Zalmunna cu a tai ten Gideon in hil in ngalkap siatsuah hi.
\p
\v 13 Joash capa Gideon cu nisuak laih ngawl ngaldo nak pen pin kik leh in,
\v 14 Succoth khua mi tangval pakhat cu man ngah in thu a dot ten, a mah cu Succoth khuapi U pa thunei tu kum U pa sawmsalih tei min hempoh hilh hi.
\v 15 Gideon in Succoth miphun tei umnak ah hung in nohten, cawl zet in nangma na dek tu tei lakah kohten moh piak tuk thu Zebah le Zalmunna te cu zo ta un hitin a tih ten,
\v 16 Mahmi khuapi sungah kum U pa te sam in ngam lak lingkung phun namkim te tuah Succoth khuapi miphun te thu hilh hi.
\v 17 Penuel khua innpi te vang subal siatsuah in khuapi sung mite that haw hi.
\p
\v 18 Mah ten Zebah le Zalmunna tei lakah Tabor khuapi pen nohtei thah mi hempoh te itihbang hum tin a dot ten, a mun nangmah bang a mu venghawng a cang in kumpi capa hih nak tuah dim haw hitin a don leh ten,
\v 19 Gideon in a muhte cu ka nui capa ka naupa hitin, Pathian a nung mi bang nohten kei mah cu that ngawl in um tuk hitin,
\v 20 A capa U pa bel Jether in hi a muhte tho in that in hitin a tih ten capa cu a kum naupang laih hang, nam cu dok suah ngawl in um hi.
\v 21 Zebah le Zalmunna ten Topa a mah cu tho in kei muhte that in hi. Mihing a hih bang a thazang cahnak hitin a tih ten Gideon tho in Zebah le Zalmunna cu a thah hang, a muhtei kalauk ngawng ah a coih bawl mite cu duk hi.
\s Gideon Awmbelh
\p
\v 22 Mah ten Isarel miphun ten nangman kohte cu Midian miphun tei khut sung pen a pat hang, a tu le canawn te tuah kei muhte uk in hitin, Gideon cu ngen haw.
\v 23 Gideon in kei cu nang muhte uk tuk mang hi. Ka capa hei in uk tuk ma hi. Pathian in nohte uk tuk hi tih hei in hihen,
\v 24 Mah hang nohtei venghawng in na lon uh mi sui beng bet a khaih te pia tuk in, kei man ngen nuam ing hi tih hei in ti hi. Ngal ten Ishmael miphun a hih hang, sui beng bet a khaih cu bet haw hi.
\v 25 A mun pia tuk ung tin puan phah in mi hempoh ten, a mun long in a ngah mi sui beng bet a khaih te koih haw.
\v 26 Gideon nget mi sui beng bet a khaih a cuai cu thawngkhat le zasalih (1,700) um hi. Mah bek sial ngawl Midian kumpi silh mi puan, longawh, mepian zawng angki, kalauk long khau te ngah laih hi.
\v 27 Mahmi van te tuah Gideon in awmbelh a dat bawl in a ma umnak mun Ophrah khuapi ah a koih hang, Isarel miphun hempoh ten mahmi awmbelh hang sual thei haw hi. Mahmi thu cu Gideon le a miphun tei sual thu hi.
\s Gideon thihnak
\v 28 Mah tihcun Midian mphun in Isarel miphun mai pen sung in uk leh ngawl in um haw. Gideon uknak sung kum sawmli tian ngam sung hempoh ah ngal dai hi.
\p
\v 29 Joash capa Jerubbaal cu a ma inn ah hawh in um hi.
\v 30 Gideon cu nupi tampi nei in a ma sung pen a suak mi capa sawm salih um hi.
\v 31 Shechem khuapi sungah a um a zi no in capa a cawi hang, mahmi capa cu Abimalek tin a min sa hi.
\v 32 Joash capa Gideon cu a kum ham ten thi in, Abiezr capa umnak Ophrah khuapi ah a pa Joash khan sungah phum haw.
\p
\v 33 Gideon a thih ten Isarel miphun te cu thukam pelh in Baal pathian te tuah a sual hang, Baal-berith cu pathian hihnak ah khaisang haw.
\v 34 Ngal hempoh tei khut sung pen nunpan tu ohtei Topa Pathian cu Isarel miphun ten phawk ngil ngawl in,
\v 35 Gideon tih mi Jerubbaal in Isarel miphun sungah a bawl hempoh mi a hehpih nak cu a miphun sungah lungdam nak a son leh mi um ma hi.
\s Abimalek
\c 9
\p
\v 1 Jerubbaal capa Abimalek cu Shechem khuapi ah hawh in a nui U nau a pu te, a nui miphun te tuah otpih in,
\v 2 Jerubbaal capa sawm salih ten nang muhte uk tuk in pha maw. Capa pakhat bek in uk tuk pha maw. Kei cu a muhtei nguh le a taksa a man thu cu phawkngil pah sun hitin, Shechem miphun hempoh tei lakah hilh tuk mi thu siam hi.
\v 3 Mahmi awnkam cu a pu ten Shechem miphun tei lakah a venghawng hilh khawng in, a mun Abimalek cu kohtei U le nau hitin tiin a nungah zui nuamnak thinlung a neih hang,
\v 4 Sum sawm salih cu Baal-berith inn pen suah in a piak ten, Abimalek in a thupi ngawl mite cu mahmi sum tuah zawng in na dek tik hi.
\v 5 Ophrah khuapi sungah a um a pai innsung ah hawh in, a U Jerubbaal capa sawm salih te suang tum pi pakhat hum pen that hi. Mah hang Jerubbaal capa nau tabel Jotham cu ngelh in a um hang tang hi.
\v 6 Shechem miphun hempoh te le Millo miphun hempoh ten Shechem khuapi sungah a um mi sialsiah nak (Oak) thingkung bul ah hulawmkhawm in, Abimalek cu kumpi hihnak ah pia haw hi.
\p
\v 7 Mahmi thu cu Jotham in a zak ten, Gerizim mual hum ah hawh in mual hum ah ding aw suah in a au mi cu Shechem miphun te aw, nohtei awnkam cu Pathian in ngai tuk in ka awnkam thu ngai hih un.
\v 8 Thingkung ten a muhte uktu kumpi pia in, sathau thihnak ah hawh in kohte uk in hitin Olive kung cu a au haw ten,
\v 9 Olive kung in Pathian minthan nak, mihing minthan nak bawl tukin ka thaunak hempoh te zam san in, thingkung hempoh tei hum ah uk tung maw tin, ti hi.
\v 10 Mah cengten theipi kung cu nangmah hung in kei muhte uk in hitin thingkung te a tih ten,
\v 11 Theipi kung in kei man a hum mi a uuk tuah a pha mi ngah cu kei man vawk in thingkung te uk tuk maw tin, ti hi.
\v 12 Mah cengten cabit kung in nangmah cu hung in, kohtei lakah uk in hitin thingkung ten a tih haw ten,
\v 13 Cabit kung in Pathian thinlung le mihing thinlung a nop tik tu cabit tui cu kei man vawk in thingkung tei hum ah uk tuk mi maw tin, ti hi.
\v 14 Mah cengten lingkung in Topa cu hung in, kohte uk in hitin thingkung hempoh ten a tih haw ten,
\v 15 Lingkung in nohten kei mah cu nohtei kumpi cang tik tuk a piak hang, a thungai sathau thih nuam tale hung un hi, ka lim cu bel un. Mah ahima tale lingkung bang mei suak in Lebanon thingkung te kang tuk hitin thingkung tei lakah don leh hi.
\v 16 A tuin nohten Abimalek cu kumpi hihnak ah na piak uh hang, thukham thu cingkem in Jerubbaal lungdam nak tuah co taak mi a hih hang, a mah cu lungdam thu hilh toh a uh cim maw.
\v 17 Ka pan nohtei ca ngal do a nunnak pia in nohte cu Midian miphun tei khut sung pen pan zo hi.
\v 18 Nohten kapai miphun langlam ah tuni tho in, a capa mihing sawmsalih te suangtum pakhat hum pen a thah cengten a sila nui cawi mi capa Abimalek cu nohtei U le nau a hih hang, a mah cu Shechem khuapi miphun tei kumpi tuk pia haw zo hi.
\v 19 A tuin nohten Jerubbaal le a miphun hinnam te thukam thu bang tuni in a bawl cengten, Abimalek cu suang in lungdam un. Abimalek in nohte cu suang in lungdam ta hen.
\v 20 Mah ahima tale Abimalek khut sung pen mei suak in Millo miphun hinnam te cu kang ta hen. Shechem khua mite le Millo miphun hinnam sung pen mei suak in, Abimalek cu kang hen hitin a au cengten,
\v 21 A man lang tai in a U Abimalek cu a lau hang, Beer khuapi ah hawh in um hi.
\p
\v 22 Abimalek in Isarel miphun cu uk in kum thum a kim ten,
\v 23 Pathian in Abimalek le Shechem miphun lak lawh ah a sia suak mi hawvang a hah hang, Shechem miphun ten Abimalek thukam cu siatsuah haw.
\v 24 Itahum titale Jerubbaal capa sawmsalih ten nasezet a bawl hang, a thah khak mi sual cu a muhte that tu a U le nau te Abimalek hum ah hei hihen, a U le nau te a thah mi thu sungah a lungkim tu Shechem miphun hum ah hei hihen a hen nak thu hi.
\v 25 Shechem khua sung miten Abimalek cu zo kuh tuk mipi te mual hum ah koih in, a mun khualzin mi hempoh tei neihnak lon sak haw hi. Mahmi thuthang cu Abimalek in za hi.
\p
\v 26 Ebed capa Ga-al cu a U le nau te tuah Shechem khua sungah lut tum in, Shechem khua sung miten a mah cu muang zet haw.
\v 27 Huan sung ah leng cabit lo in lungdam nak a bawl hang, a muhtei pathian biakinn sungah hawh in Abimalek cu tamsiat haw hi.
\v 28 Ebed capa Ga-al in ohte Abimalek thu cingkem tuk in Abimalek cu a kua hum? Jerubbaal in a ma nadek tu hima maw? Shechem a pa Hamor miphun ten a na dek haw hen. Abimalek na cu ita dek haw hum?
\v 29 Hi miphun te ka khut sungah heng hen. Mah tin a hitale Abimalek cu kei man vawk tuk tih hei in hihen, Abimalek cu na ngalkap ten a man sa in hung hen tih hei in ti hi.
\p
\v 30 Ebed capa Ga-al awnkam cu khuapi uk tu Zebul in a zak ten a thinuuk in,
\v 31 Zol thu tuah Abimalek nelah hah in Ebed capa Ga-al cu a U le nau te tuah Shechem khua ah hung in, Topai langlam pen khuapi cu puah haw hi.
\v 32 Mah hang zan huncan ten Topan a tel mi a muhte tuah tho in ngam sung pen zokuh in um hi.
\v 33 Zinglam khawma no nisuak bek ten tho in khuapi cu do hi. Ga-al in a ma nel ah a um mihing te tuah a muah ten, a mansa in a um mi bang bawl un hitin, thu hilh hi.
\p
\v 34 Abimalek in a ma sungah a um mihing te tuah zan huncan ten tho in ngalkap bu li suah khen in, Shechem khuapi cu zokuh in um haw.
\v 35 Ebed capa Ga-al cu tul in khuapi kongka bulah a din ten, Abimalek in a nelah a um mite tuah a zoh kuh nak mun pen tho haw.
\v 36 Ga-al in mahmi miphun te a muhten mual hum pen mihing tampi tolhsuk haw hitin Zebul in mual a lim cu mihing bang ngai sung ing hitin, don leh hi.
\v 37 Mah cengten Ga-al in zo in. Mihing hek khat ten mual hum pen tolhsuk haw hi. A hek khat te cu Meonenim munlawn lamzin pen hung haw tin a tih ten,
\v 38 Zebul in kohten Abimalek na dek tuk in Abimalek cu a kua hum tin na tih mi kam cu a tuin a lai ah um hum? Mahmi miphun ten nangmah imah sumsial ngawl in a bawl tu hima maw. Tul in a muhte do in hitin a tih ten,
\v 39 Ga-al in Shechem khuapi mai ah suak in Abimalek cu do hi.
\v 40 Abimalek cu hil in Ga-al tai nak mun, mihing tampi ten khuapi kongka pi tian khengkha in thi haw.
\p
\v 41 Abimalek cu Arumah khuapi ah um in Zebul in Ga-al le a U le nau te Shechem khuapi ah um tik tuk ngawl in hawl vawk hi.
\v 42 A zingten mihing tampi ten khuapi a pawlam ah a tul tuk thu Abimalek in a zak ten,
\v 43 A miphun te sehthum ah khen in ngamlak sung pen zokuh in a um hang, khuapi sung miten a suah tul haw ten tho in that hi.
\v 44 Abimalek in a miphun khenkhat tuah khuapi sung kongka pi ah tai in ngak hi. A dang mihing khen nih te ngamlak sungah a um mihing tei umnak ah tai in that haw.
\v 45 Abimalek in sun nilui khuapi cu do in khuapi sungah a muh mite a thah cengten, khuapi khantian subal in khuapi cu ci tuah theh haw.
\p
\v 46 Mahmi thuthang cu Shemchem ngalkap hempoh ten a zak ten, Berith pathian biakinn sungah a kho mi khan sungah hulawmkhawm haw.
\v 47 Shechem ngalkap hempoh hulawmkhawm mi cu Abimalek in a zak ten,
\v 48 A mah pen pan a ma nelah a tel mi hempoh ten Zalmon mual hum ah a hawh cengten, Abimalek cu heipi tuah thingkang phuk a ko hum ah pua in, ka bawl mi cu nohten na muh bang a man lang in bawl un hitin a hil tute a tih ten,
\v 49 A mihing hempoh ten a mah bang thingkang hempoh phuk Abimalek nungah zui in a kho zet mi a khan cu mei hal haw. Mah tihcun Shechem ngalkap hempoh mihing thawngkhat numei le pano hempoh thi khawng haw.
\p
\v 50 Mah cengten Abimalek cu Thebez khuapi ah hawh in ngiahbuk a sah cengten ngal do hi.
\v 51 Mah hang khuapi sungah a kho mi innpi pakhat um in, khua sung mi pano le numei hempoh ten mahmi innpi sungah tai tum haw. Kongka pi khak in innpi hum ah kai haw.
\v 52 Abimalek in innpi umnak munah hung in a do hang, innpi cu mei hal tuk a nek ten,
\v 53 Numei pakhat in an ngawi nak suang them keh no cu Abimalek luhum ah khia suk in a lu keh hi.
\v 54 A man ngalhiam nam a cawi mi tangval pakhat cu a manlang sam in, numei nu in Abimalek cu that hitin son tuk thu um tuk ngawl in na nam suah in kei mah that in hitin a tihbang tangval pa’n dawt in Abimalek cu thi hi.
\v 55 Abimalek a thih nak thu Isarel miphun ten a theih ten, mi hempoh in a muhtei umnak tek ah pin haw.
\v 56 Mah tihcun Abimalek in a U le nau sawm salih te that in a sual bawl khak cu Pathian in lul hi.
\v 57 Shechem miphun tei bawl mi sual nak vang, a muhtei luhum ah Pathian in a hen tik hang Jerubbaal capa Jotham tamsiat mi awnkam bang in a mun thuak haw.
\s Tola
\c 10
\p
\v 1 Abimalek uknak cengten, Isarel miphun pan tu Isschar miphun Dodo capa Puah capa Tola heng in Epharaim mual hum Shamir khua ah um hi.
\v 2 A man Isarel miphun cu kum kul luan thum sung a uk cengten thi hi. Shamir khua ah phum hi.
\s Jair
\p
\v 3 A ma uk cengten Gilead ngam mi Jair heng in Isarel miphun cu kum kulluannih sung uk hi.
\v 4 Mahmi kumpi in capa sawmthum nei in a mun cipuh no sawmthum khung in Gilead ngam sung Havvoth-jair tih mi min tuah tuni tian a sam haw mi khuapi sawmthum bawl haw hi.
\v 5 Jair cu thi in Kamon khuapi ah phum hi.
\s Jepthah
\p
\v 6 Mah cengten Isarel miphun ten Pathian mai pen sual a bawl hang Baal pathian, Ashtaroth pathian, Syria pathian, Sidon pathian, Moab pathian, Amon pathian, Philistine pathian te bia in Pathian bia ngawl in zam san haw.
\v 7 Pathian in Isarel miphun cu a thinuuk in Philistine miphun sungah hei hihen, Amon miphun tei sungah hei hihen a zuak hang,
\v 8 Jodan ngun ngalkhat lam Amor miphun tei umnak Gilead ngam sungah a um Isarel miphun hempoh mahmi kum pen pan kum heiliat sung bawlsiat haw.
\v 9 Amon miphun ten Jodan ngun tuipi tan in Judah miphun, Benjamin miphun, Epharaim miphun te a do hang Isarel miphun ten haksat cimnak ah heng haw.
\p
\v 10 Mah ten Isarel miphun ten kohten Topa cu sual zo ung. Kohtei Pathian zam san in Baal pathian bia kha sual zo ung hitin, Pathian nelah au haw.
\v 11 Pathian in kei man nohte cu Izip miphun, Amon miphun, Amor miphun, Philistine miphun tei khut sung pen pan tu hima maw.
\v 12 Sidon miphun, Amalek miphun, Moan miphun tei bawlsiat ten hei in nohten ka nelah au in a muhtei khut sung pen kei man pan ing.
\v 13 Mah naven nohten kei mah zam san in ngamdang pathian na biak uh hang, tu nungten pan leh thei tuk ma toh ing.
\v 14 Nohtei ten mi pathian lakah hawh in au ta un. Buai nak thu a heng mi a tu huncan in a mun pan haw ta hen hitin, Isarel miphun tei nelah ti hi.
\v 15 Isarel miphun ten kohte cu sual zo ung. Thinlung a um mi bang kohtei sungah bawl in hi. A tu veikhat bek pan tuk in kohten hehpih ngen ung hitin Pathian nelah a nget ten,
\v 16
\v 17 Ngamdang miphun tei biak mi pathian vawk in Pathian bia un. Mah ten Pathian in Isarel miphun tei thuak mi haksat cimnak hang, hehpih nak thinlung nei hi.
\v 18 Gilead ngam mi kumpi ten, mihing pakhat in Amon miphun te a masa bel in do hi. A mah cu Gilead miphun hempoh tei lamhuai tu a sangbel hitin, siamkhawm in thukhen haw.
\c 11
\p
\v 1 Gilead miphun Jepthah cu thazang ngilnak a nei ngalhang pa hi. A pa cu Gilead, a nu cu suzuak nu hi.
\v 2 Gilead nupi hinmi cate cu a ngen ten nang cu miphun dang numei hin mi na hih hang, kohtei miphun hinnam tuah bang ten lo co thei ma tin, Jepthah cu tiin hawl vawk haw.
\v 3 Mah ten Jepthah cu a U nau tei lakpen tulin Tob ngam sungah a um hang, vaktham miten a ma nelah thusiam in a ma nungah zui haw.
\p
\v 4 Mah cengten Amon miphun ten Isarel miphun te do haw hi.
\v 5 Mah tihcun Amon miphun ten Isarel miphun te a do ten Gilead ngam mi kum U pa hempoh ten Jepthah cu Tob ngam pen sam tuk hawh in,
\v 6 Kohten Amon miphun te ngaldo tuk thu hung in kohtei ngalkap bawi dek in hitin thu a cah ten,
\v 7 Jepthah in noten kei mah hua in ka pai inn pen hawl vawk zo hima uh cim maw. A tuin haksat cimnak thuak ten ita ka nel ah hung uh cim tin, Gilead ngam mi kum U pa tei lakah hilh hi.
\v 8 Gilead ngam kum U pa ten, mah hang kohten a tuin na nelah heng leh ung hi. Kei muhte tuah langkhat hawh in Amon miphun te do tale Gilead ngam mi hempoh tei lamhuai tuin na dek tuk ci tin, Jepthah cu a hehpih a kut leh ten,
\v 9 Jepthah in Amon miphun te cu ngal do tuk nohten kei mah hah in Pathian in a muhte cu ka mai ah a ap tale kei cu nohte lamhuai tu sang bel hihnak thu pia tuk maw tin, Gilead kum U pa te a dot leh ten,
\v 10 Gilead ngam mi kum U pa ten, na son mi awnkam bang in kohten bawl ma tale Pathian in nangmah le kohtei lak lawh ah theihpih nak thu cang ta hen hitin, Jepthah nelah don leh haw.
\v 11 Mah ten Jepthah in Gilead ngam mi kum U pa te tuah hawh in, a mah cu mihing hempoh tei lamhuai tu a sang bel ngalkap bawi hihnak ah pia haw. Jepthah in mahmi awnkam hempoh cu Mizpah khuapi Pathian mai ah hilh leh haw.
\p
\v 12 Mah cengten Jepthah in Amon kumpi nelah thuthang puak tu hah in, nang cu kei mah tuah itihbang in seng hum? Ka ngam sungah ngal do tuk in ita kei mah do tuk um cim tin dot ten,
\v 13 Amon kumpi in Isarel miphun cu Izip ngam pen a hen ten, ka lei ngam cu Arnon ngun pen pan Jabbok lui Jodan ngun tian a lon hang kei man bawl ing. Mahmi lei ngam cu a tuin a mawi tawk khawthu pia in hitin, Jepthah in thuthang puak tupa cu don leh hi.
\v 14 Mah cengten Jepthah in thuthang puak tu cu Amon kumpi nelah hah in,
\v 15 Jethah thucah mi cu Isarel miphun in Moab ngam, Amon ngam cu lon mi hima hi.
\v 16 Isarel miphun cu Izip ngam ah heng in Edom tuipi bul ngam sungah a vah kawkawi hang Kadesh khuapi ah a hen ten,
\v 17 Edom kumpi nelah thuthang puak tu hah in, kumpi ngam cu hawh hen hitin phal nak ngen naven, Edom kumpi in ngai ma hi. Mah tihcun Moab kumpi nelah hah in a mah vang phalnak a piak ngawl hang, Isarel miphun cu Kadesh khua sungah um haw.
\v 18 Mah cengten ngam lakah hawh in Edom ngam le Moab ngam kil in Moab ngam nisuah nak lam ah a hen ten, Moab ngam sungah lut tum haw ma hi. Arnon ngun cu Moab ngam ngi a khen nak hi.
\v 19 Mah cengten Isarel miphun in Amor miphun Heshbon kumpi Sihon nelah thuthang puak tu hah in, kohtei umnak ah heng tuk in kumpi ngam cu hawh in hitin phalnak ngen ta vang,
\v 20 Sihon in Isarel miphun um ngawl in a ngam cu hawh tik tuk a phal ngawl bek sial ngawl a mihing hempoh hulawmkawm tik in, Jahaz khuapi sungah ngiahbuk sat in Isarel miphun te do hi.
\v 21 Isarel miphun Topa Pathian in Sihon kumpi tuah a mihing hempoh Isarel miphun tei khut sungah a ap hang, a muhte that in mahmi ngam sungah a um Amor miphun hempoh tei lei ngam long haw.
\v 22 Amor ngam lei lung hempoh cu Arnon ngun pen pan Jabbok lui tian hei hihen, ngam sung pen pan Jodan ngun tian hei hihen long haw.
\v 23 Mah tihcun Isarel miphun Topa Pathian in Amor miphun te Isarel tei mai ah a ngam cu a lon hang, nangman long tuk cim maw.
\v 24 Na pathian chemosh piak mi lei ngam cu nangman long zo hima maw. Mah bang bok kohtei Topa Pathian hawlvawk mi a muhtei ngam cu kohten long zo ung hi.
\v 25 Nangman Moab kumpi Zippor kumpi capa Balak khut sung bek ah sunglawi mi maw. A mah cu Isarel miphun le Isarel miphun tuah haudun awng maw? Ngaldo awng maw?
\v 26 Isarel miphun in Heshbon khuapi le khuano sungah hei hihen, Areor khuapi le khuano sungah hei hihen, Arnon ngun bul ah a um mi khuapi khuano hempoh sungah hei hihen, kum zathum um sung ita nohten ngah ngawl in um leh uh cim?
\v 27 Nangmah cu kei man sual bawl mang hi. Nang cu ngaldo in kei mah bawl siat ci. Pathian cu thukhen tu bawl in Isarel miphun, Amon miphun tei lak lawh ah tu ni in thukhen cat ta hen hitin, thucah hi.
\p
\v 28 Mah naven, Jepthah thucah mi awnkam cu Amon kumpi in a thungai ngawl in um hi.
\p
\v 29 Mah ten Pathian hawvang cu Jepthah hum ah heng in a mah cu Gilead ngam, Manasseh ngam ah hawh in Gilead ngam Mizpah khuapi cu let vawk in Amon miphun tei umnak ah hawh hi.
\v 30 Jepthah in Pathian nelah thukam bawl in a thungai Topan Amon miphun te ka khut sungah ap tale,
\v 31 Kei cu Amon miphun tei umnak mun pen dai den no pin leh ten, keimah vaimuak tu tuk ka inn kongka bulpen a tul mi cu Pathian nelah pia in, mei hal biakpiak nak bawl tung hitin thukam a bawl cengten,
\v 32 Amon miphun te do tuk ngam a thok ten Pathian in a muhte cu Jepthah khut sungah a ap hang,
\v 33 Areor khuapi pen pan Minnith khuapi tian hei hihen, Abel-keramim khuapi tian hei hihen, khuapi kul cu nasezet a thah hang a muhte do in that hi. Mah tihcun Amon miphun te Isarel miphun mai pen sung haw.
\p
\v 34 Jepthah in Mizpah khua a inn ah a hen ten a canu in khuang tum lam in vaimuah nak bawl tuk in tul hi. A canu pakhat bek hang canu le capa a dang nei ma hi.
\v 35 Jepthah in a muhte a muhten a silh mi angki botkek in ka canu aw, nang cu kei mah nasezet niam tik ta cim maw. Kei mah noksak tu pakhat hima cim maw? Pathian nelah kei man ngen zo ing. Lak leh phal nak um ma hitin a tihten,
\v 36 A canu in Topa Pathian nelah na ngen zo tale nget mi bang in kei man bawl tung. Itahum titale, Topa Pathian ngal cu Amon miphun sungah a pai thinlung dai tik tuk in sual nak pia zo hi.
\v 37 Mah hang ka ngualcam te tuah mual hum ah vak kawkawi in, khanglai him ka hihnak kap tuk in hanih sung phalnak thu pia in hitin, a pai nelah phal nak thu a nget bang,
\v 38 A pa’n hawh ten hitin a tih ten hanih sung tiam in a hah ten, a ngualcam te tuah hawh in mual hum ah a khanglai him a hihnak cu kap hi.
\v 39 Hanih a kim ten a pai nelah pin leh in a pan thukam a neih mi bang bawl hi. Mahmi numei nu cu pano te tuah pawldun ngawl mi nu hi.
\v 40 Mah cengten Isarel miphun canu ten Gilead miphun Jepthah canu hang, kum sial in nili sung kah nak nei tukin kumsial hawh in Isarel dan in cang hi.
\s Jepthah le Epharaim miphun te
\c 12
\p
\v 1 Epharaim miphun ten hulopkhawm nak nei in saklam ah ngal ngam thok tuk a hawh tale Jepthah nelah nang cu kohten sam ngawl in Amon miphun te ita do tuk in hawh uh cim? Na inn cu na hum ah mei kang tuk hitin a tih haw ten,
\v 2 Jepthah in kei mah le ka miphun ten Amon miphun tuah nasezet tawk dun do ten, nohte cu sam ta vang nohten Amon miphun tei khut sung pen kei mah pan ngawl in um uh ci.
\v 3 A pat ngawl nak thu cu ka muhten ka nunnak pia Amon miphun te do tuk hawh in, Pathian in a muhte ka khut sungah ap zo hi. Nohten kei mah do tuk ita tu ni in hung uh cim tin a son cengten,
\v 4 Gilead ngam miphun hempoh te hulawmkhawm tik in Epharaim miphun te do haw hi. Epharaim miphun ten, nohten Epharaim miphun, Manasseh miphun sung pen tai in miphun a ngek ngai ngawl mipa tin, Gilead ngam miphun te a zotsak awng hang, Epharaim miphun te that haw.
\v 5 Gilead miphun te cu Epharaim miphun tei mai Jodan ngun tuipi hawh nak mun pen kham in, tai in a luat mi Epharaim miphun ten hawh tik poh in hitin phalnak a nget ten Gilead miphun ten, nang cu Epharaim miphun hima cim maw tin thu a dot ten a man hima hitin a tih ten,
\v 6 A mun Shibboleth tih mi awnkam cu hilh in hitin a tih ten, Epharaim mihing in mahmi awnkam cu cel zet a ot thiam ngawl hang Shibboleth tin ti hi. Mah tihbang awn tupa cu man in Jodan ngun tan nak mun pen that haw. Mah ten Epharaim miphun thawngsawmli le thawngnih (42,000) thi haw.
\p
\v 7 Gilead miphun Jepthah in Isarel miphun cu kum luk sung a uk cengten thi in Gilead khuapi pakhat ah phum haw.
\s Ibzan, Elon, Abdon
\p
\v 8 Jepthah nungten Bethlem khua mi Ibzan in Isarel miphun uk hi.
\v 9 Mahmi kumpi in capa sawmthum, canu sawmthum nei hi. Canu te cu mun dang ngam ah hah in mo sawmthum huai hi.
\v 10 Ibzan in Isarel miphun kum salih a uk cengten thi in Bethlem khua ah phum hi.
\v 11 Ibzan nungten Zebulun miphun Elon in Isarel miphun cu kum sawm sung uk hi.
\v 12 Mahmi kumpi cu thi in Zebulun ngam, Aijalon khuapi ah phum hi.
\p
\v 13 Elon nungten Pirathon khuapi sung um mi Hiliel capa Abdon in Isarel miphun cu uk hi.
\v 14 Mahmi kumpi in capa sawmli, tuu sawmthum nei in a tuu ten laak no sawmsalih cu khung haw hi.
\v 15 Pirathon khua ah a um mi Heliel capa Abdon in Isarel miphun cu kumliat sung a uk cengten thi in Epharaim ngam, Pirathon khuapi Amalek mual ah phum hi.
\s Samson hinnak
\c 13
\p
\v 1 Isarel miphun ten Pathian mai ah sual a bawl hang, Pathian in a muhte cu Philistine miphun khut ah kum sawmli sung ap hi.
\p
\v 2 Dan miphun, Zorah khua mi Manoah min a nei mi pakhat um hi. A nupi cu nau nei thei ngawl mi cing hi.
\v 3 Pathian vancung mi in mahmi numei nui nelah a pumpi lang in, nang cu nau nei thei ngawl cing in um naven a tuin naupai in capa hing tuk ci.
\v 4 Mah hang ngalling in. Cabit tui in pah sin. A thi thei mi zu vang in pah sin. A thiangtho ngawl mi an ei pah sin.
\p
\v 5 Itahum titale naupai in a hin tuk mi nau pano cu sam met tuk ngawl in, a nui pum sung pen pan Pathian Nazir mihing hi tuk hi. A mah vang Isarel miphun cu Philistine miphun tei khut sung pen pan tuk hitin, thupia hi.
\v 6 Mahmi numei cu a pasal nelah hawh in Pathian vancung mi bang lauhuai mitmai a nei mi Pathian mihing pakhat cu ka nelah hung hi. Ai lai pen heng kam tin kei man dong mang hi. A man a min hei hilh ma hi.
\v 7 A man nang cu naupai in capa hing tuk ci. Cabit tui in pah sin. A thi thei mi zu vang in pah sin. A thiangtho ngawl mi an vang ei pahh sin. Itahum titale mahmi nauno cu a nui pum sung pen pan a thih tian Pathian Nazir mihing hi tuk hitin, ka nelah thupiak nak cu hilh hi.
\p
\v 8 Mah ten Manoah in Pathian aw, kohten a hing tuk laih mi nau cu itihbang in bawl tuk hum tih cu, Pathian vancung mi pakhat heng leh in thu hilh tik in hitin, Pathian nelah a nget ten,
\v 9 Pathian in Manoah awnkam thu ngai in, Pathian vancung mi in lo na deh nak mun ah khung in a um mahmi numei nui nelah heng leh hi. Mah ten a pasal Manoah um ma hi.
\v 10 Numei in a pasal nelah a man lang tai in, ni dang in a heng mipa tuni in hung leh zo hitin a hilh ten,
\v 11 Manoah cu tho in a nupi tuah a ma nelah a hawh ten, nang cu hi numei nui nelah hilh tu a man cim maw tin a dot ten a man ing hitin, ti hi.
\v 12 Manoah in Topai awnkam kim ta hen. Nau no cu itihbang in cang tuk hum? A man itihbang in bawl tuk hum tin a dot ten,
\v 13 Pathian vancung mi in ka hilh mi hempoh numei nu in pial tuk.
\v 14 Cabit kung pen a piang mi hempoh ei tuk ma. Cabit tui pen pan a thi thei mi zu vang in tuk ma. A thiangtho ngawl mi an ei tuk ma. Ka thucah hempoh bang cingkem tuk hitin, Manoah cu hilh hi.
\p
\v 15 Manoah in Topai ca tuk kel no pakhat a bawl laih ngawl Topa cu kham in hitin Pathian vancung nelah a tih ten,
\v 16 Pathian vancung mi in kei mah cu kham naven na an eih tuk cu kei man ei tuk mang. Mei hal biakpiak bawl nuam tale Pathian nelah pia tuk hitin, Manoah nelah hilh leh hi. A mah cu Pathian vancung mi a hihnak Manoah in thei ma laih hi.
\v 17 Manoah in Topa awnkam a kim ten kohten Topa thangphat tuk thu Topai min cu a kua hum tin Pathian vancung mi nelah a dot ten,
\v 18 Pathian vancung mi in thasiah huai mi ka min cu ita dong kam tin, ti hi.
\v 19 Manoah in kel no le an eih tuk biakpiak nak la in suang hum ah Pathian cu a lu pia hi. Mah ten Manoah tei nupa ten zo in, a muh haw mi thasiah huai cu,
\v 20 Mei alh cu biakpiak nak taitan hum pen vanhum ah a kai to laih tak in, Pathian vancung mi cu biakpiak nak taitan mei alh sung pen kai to hi. Manoah tei nupa ten zo in a muh ten, leihum ah bopkhup in um haw hi.
\p
\v 21 Pathian vancung mi in Manaoh nupa tei lakah heng leh ma zo hi. Mah ten Manoah in Pathian vancung mi a hih nak thu cu thei hi.
\v 22 Manoah in kohten Pathian muh hang thi tuk ung hitin a nupi nelah a tih ten,
\v 23 A nupi in Pathian in kohte that tukin a deihnak a um tale mei hal biakpiak nak le an eih tuk biakpiak nak cu kohtei khut sung pen sang tuk ma hi. Hi thu a cang dan hempoh lak ma hi. A tuin hi tihbang mi awnkam vang thupiak nak hei um ma hitin, don leh hi.
\v 24 Mahmi numei nu in capa cu hing in Samson tin a min sa hi. Nau no cu khangto in Pathian in thupha pia hi.
\v 25 Pathian hawvang cu Zorah khuapi le Eshtaol khuapi lak lawh Dan miphun sungah veikhat veinih cu sosuah pan in bawl hi.
\s Samson zi huai nak le thupolh
\c 14
\p
\v 1 Samson cu Timnah khuapi ah hawh in, mahmi khuapi sungah Philistine miphun a himi numei pakhat a muh ten,
\v 2 A nu le pa tei lakah pin leh in Timnah khua sungah Philistine miphun a himi numei pakhat mu zo ing. Ka ngualcam tukin dong in hitin a tih ten,
\v 3 A nu le pa ten nang cu vun lek talh ngawl mi Philistine miphun sungah nupi cu hawh in huai tuk mi thu, na U le nau tei canu ohtei miphun pih canu sung pen numei pakhat no hei um ma maw tin a tih ten Samson in, mahmi numei cu dong in pia in hi. Deih leita ing hitin a pai nelah hilh hi.
\v 4 Pathian thukhen nak hang, Samson cu Philistine tei miphun sungah sual a zeihnak thu cu a nu le pa ten thei haw ma hi. Mahmi huncan sungah Philistine miphun ten Isarel miphun cu uk hi.
\p
\v 5 Mah ten Samson in a nu le pa tuah Timnah khuapi ah hawh in, Timnah cabit huan ah a hen ten pawpi pakhat cu a man tawk in hawk hi.
\v 6 Mah ten Samson khut sungah pakhat no hei um ma naven, Pathian hawvang cu a ma hum ah heng in a man kelno te a botkek bang mahmi pawpi cu botkek hi. Mah a bawl mi thu cu a nu le pa tei lakah hilh ngawl in um hi.
\v 7 Khuapi sungah heng in numei nu tuah a otpih hang Samson cu lungnop tik hi.
\v 8 Huncan kim in mahmi numei huai tukin a hawh laih tak pawpi a thi mi cu zo tukin lamzin pen pial in pawpi a thi mi sung pen khuaibawm le khuai tui a muh ten,
\v 9 La in ei in khualzin hawh hi. A nu le pa tei lakah a hen ten pia in a mun ei haw hi. Mah hang mahmi khuai tui cu pawpi a thisa sung pen a laak mi thu cu son ngawl in um hi.
\p
\v 10 A pa vang numei nui umnak mun ah hawh in Samson cu tangval dan hihnak bang puai cu bawl hi.
\v 11 Mah a khua sung miten Samson cu a muhten a mah tuah puai bawl tuk in a ngualcam mihing sawmthum cu sam hi.
\v 12 Samson in nohtei lakah thupolh nak awnkam kei man son tung. Puai bawl tuk nisalih sung in hilh thei ta le puan silh tuk sawmthum, angki zun sawmthum kei man pia tung.
\v 13 Hilh thei ma tale nohten puan silh tuk sawmthum, angki zun sawmthum kei mah pia tuk uh ci tin a tih ten, a mun na thupolh tuk mi cu kohtei lakah hilh in hitin, lungkim haw hi.
\v 14 Samson in a ei thei mi sung pen an, thazang ngilnak a nei tu sung pen a hum suak hitin, ti hi. Mahmi thupolh awnkam a tihnop nak cu nithum sung zei in mu haw ma hi.
\p
\v 15 Nili ni a hen ten a mun, na pasal in thupolh nak awnkam a tihnop nak lak tik tuk in a mah cu na zol kul hi. Mah a hima tale nangmah le na miphun hinnam cu mei hal tuk. Kohtei neihnak long tuk in kei muhte sam hima maw tin Samson nupi cu a tih hang,
\v 16 A man a pasal mai ah kap in nang cu kei mah it ma, hua ci. Ka miphun pih tei lakah thupolh nak hilh naven, a tihnop nak ka nelah hilh ma ci tin, ti hi. Samson in, keiman ka nu le pa hei hilh ngawl in nangma nelah hilh tuk maw tin a tih ten,
\v 17 Puai bawl tukin ni salih a kim tian a pasal mai pen kap in ni salih ni ten a theih nuam leita hang, a tihnop nak hilh hi. Numei nu in a miphun pih te hilh leh hi.
\v 18 Khua sung miten ni salih ni nitum laih ngawl heng in khuaitui sang hum saw ai hum laih hum? Pawpi sang thazang ngil nak a nei saw ai um hum tin hilh haw hi. Samson vang, nohten khui la tuah lo let ma tale ka thupolh mi a tihnop nak cu zei in mu tuk ma hitin, ti hi.
\p
\v 19 Pathian hawvang cu Samson hum ah a hen hang, a man Ashkelon khuapi ah hawh in khua sung mi mihing sawmthum a thah cengten, a muhtei neihnak laksak in thupolh a tihnop nak a hilh tu tei lakah van hempoh a piak cengten, a thinuuk in a nu le pa tei inn ah pin hi.
\v 20 A nupi cu Samson phial mi a ngualcam pia hi.
\s Philistine miphun tei lakah Samson lulh lehnak
\c 15
\p
\v 1 Mah cengten sangvut cang ah tuk huncan sungah Samson in kel no keng a nupi zo tuk hawh in, a khan sung pen a mah tuah zau kawm tuk tin ngai sung naven a sung nu in kham in,
\v 2 Nang cu ka canu hua zet ci tin ka ngaih sut nak a um hang, na ngualcam te kei man pia zo ing. A nau numei nu cu a mah sang mawi saw hima maw. A U nu ai in a nau nu cu la in hitin, ti hi.
\v 3 Mahmi thu cu zo in Samson in kei cu Philistine miphun sungah sual bawl naven a mun kei mah mawhsiat nak tuk um ma hitin a tih mi bang,
\v 4 Hawh in cingne zathum (300) cu a mat cengten, cingne mei pakhat le pakhat peh in a mei panih lak lawh pen meilah a tuan pi ken cih in,
\v 5 Meilah a tuanpi cu mei a noih hang, Philistine miphun tei cang lo sungah hah in cangkung hei hihen, cangtel hei hihen, cabit huan hei hihen, Olive huan hei hihen kang hi.
\v 6 Philistine miphun ten hi thu cu itihbang in bawl hum tin a dot ten, Timnah khua mitei maakpa Samson in bawl hi. A nupi cu a ngualcam te pia zo hitin a don leh ten, Philistine miphun te hung in mahmi numei nu le a nu le pa te mei hal haw hi.
\v 7 Samson in mah tihbang in a bawl hang, kei man a thin dai tukin bawl tung. A thindai cengten daiden no um tuk hitin tiin,
\v 8 A muhte cu nasezet thah nak hang, veikhat thu a thah cengten Etam suang lek ah hawh in um hi.
\p
\v 9 Mah cengten Philistine miphun ten Judah ngam sungah ngaldo tuk ngam thok hawh in ngiahbuk a sah hang, Le’hi umnak ah ngalkap tampi um haw hi.
\v 10 Judah miphun ten ita ngaldo tuk in ngam thok haw hum tin a dot ten, kohtei sungah Samson bawl mi bang a mah cu ken in bawl tuk ngam thok ung hitin, don leh haw hi.
\v 11 Mah ten Judah mihing thawngthum ten Etam suang lek ah hawh in, Philistine miphun ten ohtei Topa hihnak thu nangman thei ma cim maw. Nang cu kohtei sungah itihbang thu bawl cim tin a dot ten, kei man a muhtei bawl mi bang a muhtei sungah kei man bawl zo ing hitin, don leh hi.
\v 12 A mun, nangmah cu ken in Philistine miphun tei khut sungah ap tuk in, a tuin kohten heng zo ung hitin a tih ten, Samson in nohten nangmuh loli in kei mah bawl pah sun tin thukam na bawl un hitin a tih ten,
\v 13 A mun kohten that tuk ma ung. Nasezet khau ken in a mu khut sungah ap tuk. A thungai mah loli in nangmah that tuk ma ung hitin, khau thak hual mi panih tuah ken in suanghum pen pui haw hi.
\p
\v 14 Le’hi um nak mun ah a hen ten Philistine miphun ten au haw. Pathian hawvang cu a ma hum ah a hen hang, a khut sungah ken mi khau te cu mei tawngkha mi sum bang cang in a ken nak khau zuk hi.
\v 15 A man laak khanguh thak tawkin a khut tuah a lak cengten, mihing thawngkhat cu that hi.
\v 16 A thah cengten laak khanguh tuah a vun seh, laak kha nguh tuah mihing thawngkhat kei man that zo ing hitin a tih cengten,
\v 17 Laak kha nguh vawk in mahmi umnak mun cu Ramah Le’hi tin a min sa hi.
\v 18 Dang ko leita hang Pathian nelah thungen in Topan a nasezet mi nunpat nak cu Topa sila khut sungah a ap cengten, a tuin kei cu dangko hang thi in vun lek talh ngawl miphun khut sungah heng tuk maw tin a tih ten,
\v 19 Le’hi umnak mun huakluam cu Pathian in a honsak hang tui tul hi. A man tui cu a in hang a haihawh leh in thadim leh hi. Mah hang mahmi huakluam cu En-hak’ko-re tin a min sa in tuni tian Le’hi umnak munah um hi.
\v 20 Samson in Philistine khut sung Isarel miphun cu kum kul sung uk hi.
\s Samson le Delilah
\c 16
\p
\v 1 Mah cengten Samson cu Gaza khuapi ah hawh in suzuak nu a tawh cengten a ma nelah lut tum in um hi.
\v 2 Samson a hen nak thu Gaza khua sung ten a zak ten kil cih in, khuapi kongka bul pen zan khua zo kuh zing khua vak ten, a mah that tuk tin tiin zankhua dai den no in um haw hi.
\v 3 Samson in zanngil tian bek hihbu in zanngil ten tho in, khuapi kongkhah te kongka pi khuam, kongkalh nak hempoh te la in a ko hum ah pua in Hebron khuapi mai mual hum ah vawk hi.
\p
\v 4 Mah cengten Sorek huakluam sungah a um mi Delilah min a nei mi numei pakhat cu deih leh leu hi.
\v 5 Philistine miphun ten mahmi numei nui lakah hawh in Samson thazang ngil nak cu ithu hang kho hum? A mah ken in bawl siat tuk itihbang in neh thei tuk hum tin, a mah cu leem in kan in hi. Kohten kilcih in sum cuai sawm pia tuk ung hitin, ti haw hi.
\v 6 Delilah in na sungah thazang ngilnak cu ithu hang um hum tih hei in hihen, nangmah bawlsiat tuk in itihbang in ken tuk hum tih hei in hihen, hilh in hitin Samson nelah a nget ten,
\v 7 Samson in veikhat no hei a ko ngawl mi thangkhau a pawl salih tuah kei mah ken tale ka thazang ngilnak cu kiam in midang te bang kei cu cang tuk hitin, ti hi.
\v 8 Mah ten Philistine kumpi ten veikhat no hei a ko awng ngawl mi thangkhau khaupawl salih cu la in, mahmi numei in Samson cu ken hi.
\v 9 Pano hek khat ten mahmi numei nui zau nak khan zo kuh in a um hang numei nu in Samson, Philistine miphun ten nangmah do haw tuk hitin a tih ten, a man mei tawngkha mi sumken nak bang mahmi khau cu cat hi. Mah hang a thazang ngilnak cu thei zo haw ma hi.
\p
\v 10 Delilah in nang cu kei mah cekpan tuah zol thu son zo ci. Nangmah itihbang ken tuk hum tih cu a tuin hilh in hitin Samson nelah a nget ten,
\v 11 A man, man awng ngawl mi khauthak tuah hetpek ken tale ka thazang ngilnak kiam in midang te bang kei mah um tung hitin a tih mi bang,
\v 12 Delilah in khau thak cu la in a ken cengten, mahmi khan sungah a zoh kuh tu mi hek khat te um in, Samson Philstine miphun ten nangmah do tuk heng haw hitin a tih ten, Samson khut ah a ken mi khau te nimkhau bang cat hi.
\p
\v 13 Delilah in a tu tian nangman kei mah cekpan tuah zol thu bek son ci. Itihbang in ken tuk hum tih cu hilh in hitin Samson nelah a nget ten, a man ka sam zang salih cu phek in thiamtah nak sungah tak cih in, pang ah tawngkhen cu khen tale kei cu thazang ngil nak kiam in, midang te bang cang tung hitin a hilh mi bang,
\v 14 Delilah in a sam zang salih cu phek in thiamtah nak sungah tak cih in, pang ah tawngkhen a khet cengten Samson, Philistine miphun ten nangmah do tuk heng haw zo hitin a tih ten, Samson cu tho in thiam bu, tawngkhen, thiamtah nak hempoh tuah hawh pih hi.
\p
\v 15 Delilah in nang cu keimah it nak thinlung ngai tel ngawlin ita son thei cim? Nangma sung pen thazang ngilnak cu ai thu hang um hum tih son ngawl in, veithum tian kei mah cekpan tuah bawl zo ci tin, ti hi.
\v 16 Mah tihcun Delilah in nisial nopmawh in a nunnak thi tuk tian a noksak hang,
\v 17 Samson in a thilung sungah a um mi hempoh son in, ka sam cu veikhat no hei met awng ma laih hi. Ka nuipum sung pen pan Pathian Nazir mihing ing hi. Ka sam met tale ka thazang ngilnak kiam in midang te bang kei cu cang tung hitin, ti hi.
\p
\v 18 Mah tihcun a thinlung a um mi hempoh bang a son nak thu Delilah in a theih ten Philistine miphun tangval te sam leh in a tuin veikhat hung leh un. A man a thinlung sung a um mi hempoh bang son zo hitin thu a cah hang, a mun sum keng in hung haw hi.
\v 19 Delilah in a lu cu a khuk hum ah koih in a hihbuh tik hang, mihing pakhat sam in a sam phek salih a meh tik cengten, a mah cu noksak pan tik tukin a tha ngilnak kiam hi.
\v 20 Numei nu in Samson, Philistine miphun ten nangmah do haw tuk hitin a tih ten, Samson cu tho in Pathian a zam san nak thu a theih ngawl hang, a masa bang kei man tul in thasuah tukin ngaisung naven,
\v 21 Philistine miphun ten man in a mit a pholhlet cengten, Gaza khuapi ah hawh in dal khau tuah ken in thonginn sung ancang ngawi nak tuah ngawi tik haw hi.
\v 22 Samson cu sam a meh cengten po leh in,
\s Samson thihnak
\v 23 Philistine tangval ten ohtei pathian in ohtei ngal cu ohtei khut sungah ap zo hitin tiin, a muhtei pathian Dagon cu biakpiak lungdam nak bawl tuk in hulawmkhawm haw.
\v 24 Mipi ten Samson cu a muh ten ohtei pathian ohtei ngam siat suah in ngam sung miphun te a that tu, ohtei ngalpa cu ohtei khut sungah ap zo hitin, a muhtei pathian cu thangphat haw.
\p
\v 25 A lungdam ten Samson cu sam un. Ohtei ca um mai hen hitin a tih hang, Samson cu thong inn sung pen a sam hang a man um mai hi. A mah vang innkhuam lak lawh ah koih haw hi.
\v 26 Samson in innkhuam pi cu kei man ngaingam tuk in khut tawngkha tik in hitin, khut len tu naupang cu phalnak ngen ing.
\v 27 Mahmi innpi sungah pano le numei a dim in um haw hi. Philistine tangval hempoh vang um haw hi. Innpi a hum ah vang mihing thawngthum hawng numei le pano ten Samson um maih zo tukin um haw.
\p
\v 28 Samson in Topa Pathian aw, kei mah phawk in. Ka mit a langnih in a pholh tu Philistine miphun sungah thakhat thu in sual dan tat tuk in, a tuin veikhat no thazang ngilnak pia in hi Pathian tin, Pathian nelah thu a nget cengten,
\v 29 Innpi khuam panih cu a taklam khut, a veilam khut a langnih tuah ngai ngam um in,
\v 30 Kei cu Phlistine miphun te tuah thi ngawn tung hitin thasuah, a mah le mah a sawn cim hang innpi bawi te, mihing hempoh hum ah cim in delh pek hi. Mah tihcun a nun laih in a thah mi sang tam saw mihing that hi.
\v 31 A U le nau a miphun hinam hempoh heng in a luang a puak cengten, Zorah khuapi le Estaol khuapi lak lawh a pai khanmual ah phum haw. A man Isarel miphun cu kumkul sung uk hi.
\s Micah zuk milim
\c 17
\p
\v 1 Micah tih min a nei mi Epharaim mual hum ah mi pakhat um hi.
\v 2 A mah cu a nui nelah nu aw a pai mi sum cuai sawm cu kei man la ing. Ka nelah um hi. A nui tamsiat nak awnkam cu kei man za ing hitin a tih ten a nu in ka capa, Pathian in thupha pia ta hen tin, ti hi.
\v 3 Mahmi sum cuai sawm cu a nui nelah a piak leh ten a nu in ka capa, hi sum hempoh zuk milim bawl tukin Pathian nelah kei man a lu pia ham zo ing.
\v 4 Mah hang ka capa cu a tuin kei man pia leh tung hitin tiin, a capa in mahmi sum cu a nui nelah pia hi. A nu in cuainih la in sui bawl thiam tei lakah ap in a man sukeh siluan in a bawl hang, zuk milim cang in Micah inn sungah um hi.
\v 5 Mahmi mihing Micah cu biakinn a neih hang, awmbelh le Terah zuk milim a bawl cengten a capa pakhat cu a thiampi hihnak ah pia hi.
\v 6 Mahmi huncan sungah Isarel kumpi um ma hi. Mihing hempoh mai thinlung deihnak bangin bawl hi.
\p
\v 7 Judah miphun tuah a seng mi Judah ngam Bethlehem khua Levi miphun tangval pakhat cu Bethlehem khuapi sungah cam in,
\v 8 Mah cengten tul in cam nak tuk mun zei thah in khual a zin hang, Epharaim mual Micah inn ah heng hi.
\v 9 Micah in nang ai laipen hung nge cim tin a dot ten, tangval pan kei cu Judah ngam Bethlehem khua mi Levi miphun ing. Cam nak tuk mun zei ing hitin a don ten,
\v 10 Micah in kei mah tuah langkhat um in. Kapa aw, kei ma thiampi dek in. Kei man kumkhat ten sum sawmkhat, silh le cen a kim an eih tuk pia tung hitin tiin a sam ten Levi mihing cu lut tum in,
\v 11 Mahmi pa tuah langkhat um tukin a deih nak hang capa bang in um hi.
\v 12 Micah in mahmi Levi tangval cu a thiampi hihnak ah a piak bang in, tangval pa cu thiampi na dek in um hi.
\v 13 Micah in a tuin Levi mihing cu keima thiampi a hih hang, Pathian in kei ma sungah hehpih tuk hi tih cu kei man thei ing hitin, ti hi.
\s Dan miphun ten Laish khuapi sungah a umnak
\c 18
\p
\v 1 Mahmi hun can in Isarel kumpi a um laih ngawl hang, Dan miphun ten a lo co nak lei ngam zei haw hi. Mahmi hun can tian a dang Isarel miphun sungah lo co taak mi bang in co ma laih hi.
\v 2 Mah hang, Dan miphun ten ngam zo tuk in a muhtei miphun thazang ngilnak a nei mi ngalhang mihing panga cu a muhtei umnak mun Zorah khuapi, Eshtaol khuapi pen hah in, ngam zo tuk hawh ta un hitin thucah mi bang, a mun Epharaim mual Micah inn ah a hen ten cam haw hi.
\v 3 Micah inn sungah a umten Levi tangval pai awnkam cu phawk in, a ma umnak sungah a luh tum ten nang ita hi umnak mun ah heng thei cim? Hi mipa tuah itihbang in seng kha thei cim? Ai bawl kam tin a dot ten,
\v 4 A man, Micah in kei mah na deh pia in kei mah a zawn hang kei cu a ma thiampi na dek ing hitin, don leh hi.
\v 5 A mun, kohtei khual zin cu tuang tuk le tuang tuk ngawl thei tukin Pathian nelah thu dong in hitin a nget mi bang,
\v 6 Thiampi in dai den no in hawh ta un. Nohtei hawhnak lamzin cu Pathian in zo hitin, don leh hi.
\p
\v 7 Mahmi mihing panga te hawh tul in Laish ah a hen ten, khua sung miten Sidon miphun in ngallin nak a um ngawl bang in ngallin nak um ma, lau nak um ngawl dai den no um tuk thu hei in hihen, thuhilh nak a nei tu kumpi a um ngawl nak thu hei hihen, Sidon khuapi te tuah khuala in a kua mah thu tuah a seng ngawl mi thu hei hihen a zoh cengten,
\v 8 Miphun pih tei umnak Zorah khuapi, Eshtaol khuapi ah pin kik leh in a miphun pih ten, nohten itihbang in son uh cim tin a dot ten,
\v 9 A mun, tho in do tuk hung hi. Mahmi ngam cu ngampha a hihnak thu kohten mu zo ung. Daiden no um haw laih maw. Mahmi ngam cu do tuk in hei leng pah sun.
\v 10 Hawh tale ngallin nak a nei ngawl miphun te le a zal mi ngam cu tawk tuk uh ci. Pathian in nohtei khut sungah ap tuk hi. Mahmi ngam sungah leipi hauhsak neihnak a kim um hitin, son haw hi.
\p
\v 11 Mah ten Zorah khuapi, Eshtaol khuapi pen Dan miphun zaluk ten ngaldo nak hiamnam keng ngaldo tuk in ngam thok haw hi.
\v 12 A hawh nak mun cu Judah ngam Kirjath-jearim khuapi ah ngiah sat haw. Mahmi umnak mun cu tuni tian Dan miphun ngalkap tin sam hi. Kirjath-jearim khuapi nung ah um hi.
\v 13 Mah lai munpen hawh in Epharaim mual hum Micah inn ah heng haw.
\p
\v 14 Mah ten Laish khuapi zo tukin a hawh tu mihing panga ten hi inn sungah awmbelh, Terah zuk milim, a suk mi zuk milim, si luan in bawl mi zuk milim thu thei a cim. Itihbang in bawl hum tihmi cu ngaisung un hitin a miphun pih tei lakah tih ten,
\v 15 A mun mahmi umnak mun ah a kik leh hang, Levi tangval umnak Micah inn ah heng in a mah cu otpih haw.
\v 16 Ngaldo nak hiamnam a keng tu Dan miphun zaluk te cu kongka bulah ding haw.
\v 17 Laish khuapi zo tukin mihing panga ten Micah inn ah lut tum in,
\v 18 A suk mi zuk milim, awmbelh, Terah zuk milim, si luan mi zuk milim te thiampi mai ah keng haw. Thiampi in, itihbag in bawl uh cim tin a dot ten,
\v 19 A mun, daiden no um un. Topai kam cu khut tuah hup in kei mah tuah hung in hi. Kohtei pa’n dek in hi. Thiampi bawl in. Innsang pakhat in thiampi na deh pha sa cim maw. Isarel miphun hinnam pakhat sungah thiampi bawl tuk pha ma maw tin a tih haw ten,
\v 20 Thiampi cu lungdam in awmbelh, Terah zuk milim, a suk mi zuk milim te keng in, mahmi mihon sungah tum ta hi.
\p
\v 21 Mahmi a muhten naupang te, nganhing te, a van te a masa hawh tik hang a mah zui in kik leh haw.
\v 22 Micah inn tuah khuala ngawl Micah innnel ten hulawkhawm in, Dan miphun te a pha tuk in hil haw.
\v 23 A au haw ten, Dan miphun in hek kik leh a zoh ten nang cu ai thu um in mihing tampi te tuah hil leh cim tin a dot ten,
\v 24 Micah in nohten ka bawl mi pathian te le thiampi la zo uh ci. Mahmi thu sial ngawl ka nelah ai thu um laih hum? Mah naven a mun ai thu um hum tin, kei mah thu dong haw hitin a tih ten,
\v 25 Dan miphun ten kohtei sungah na awnkam thei tik pah sin. Mah ahima tale thinuuk tuten nangmah do in, na nunnak le na inn sung tei nunnak a pha bel hitin, khualzin hawh haw hi.
\v 26 Micah in a muhte a neh ngawl nak thu a theih hang a ma inn ah pin leh hi.
\p
\v 27 Dan miphun ten Micah bawl mi hempoh te le a ma nelah a um mi thiampi cu la in, ngallin nak um ma hi. Dai den no a um mi Laish khua sung mitei lakah a hen hang, nam tuah that in khuapi cu mei hal sak hi.
\v 28 Sidon tuah khuala hang in hihen, a kua mah thu tuah a seng ngawl hang in hihen, pan tu um ma hi. Mahmi khuapi cu Beth-rehob khuapi bulah a um mi huakluam sungah um hi. Mahmi umnak ah khuapi thak din in um haw hi.
\v 29 Mahmi khuapi cu a muhtei miphun pa Isarel capa Dan min cu suang in Dan khuapi tin sam haw. Mahmi khuapi lun min cu Laish khuapi hi.
\v 30 Dan miphun ten Micah suk mi zuk milim din in Mosi tu, Gershom capa Jonathan le a caten thingkuang a lonsak mi ni tian Dan miphun sungah thiampi na dek haw.
\v 31 Pathian inn cu Shiloh khuapi sungah a um sung hempoh Micah si luan mi zuk milim vang din haw.
\s Levi mi pakhat le a nupi
\c 19
\p
\v 1 Isarel miphun kumpi a um laih ngawl hun can in, Epharaim mual hum ah a cam mi Levi miphun pakhat cu Judah ngam, Bethlehem khua numei pakhat huai hi.
\v 2 Mahmi numei nu in a pasal cu sual kha in, Bethlehem khuapi a pai inn ah a hawh hang hali sung um hi.
\v 3 A pasal in a mah cu leem in pui tuk sila pakhat tuah laak panih khung hawh in a hen ten, a nupi cu a pai innsung ah sam tum in a pan a mak pa a muh ten, lungdam nak thinlung tuah muak hi.
\v 4 Mah hang a mak pa cu an ei in, hihbu cam in nithum sung a sung tei inn ah um hi.
\v 5 Ni li ni, zinglam khawma no tho tul tuk in a um ten, a sungpa in moh dawm laih no cu ei in tha lak cengten hawh un hitin, a mak pa cu a tih bang,
\v 6 A panih cu khung in an ei in um haw. A sungpa in lungkim poh un. Tuni tak cam hih in thinlung a nop no um hih in hitin a mak pa cu a tih ten,
\v 7 A makpa cu hawh tuk in tho naven, a sungpa in a hen hang a mak pa cu mahmi umnak ah cam leh leu hi.
\v 8 A ni nga ni in zinglam khawma no tul tuk in a thawh ten, a sungpa in tha la hih poh un hitin, tiin sunkai tian a panih an ei in um haw hi.
\v 9 Mahmi pa in a nupi le sila sam in hawh tuk in a um ten, a sungpa numei nui pan zo un hi khuathim awn zo hi. Tuni tak vang cu cam hih poh un. Sun hun can bo zo hi. Hi umnak mun ah cam in thinnop no in um un. Zingten khawma no tho in na umnak mun ah hawh un hitin a tih ten,
\v 10 A mak pa in mahmi zan cu cam ngawl hawh in khunnak bawl mi laak panih le a nupi cu pui in Jerusalem khuapi tih mi Jeboth khuapi bul ah heng haw.
\v 11 Mahmi khuapi bulah a hen ten khuathim hang sila in ngai hih un. Jebus miphun tei umnak hi khuapi sungah tum in cam tuk hung hitin a topa cu a tihten,
\v 12 Topa in Isarel miphun hi ngawl, ngamdang miphun umnak khuapi ah tum ngawl in Gibeah khuapi ah hawh tuk hung hi.
\v 13 Gibeah khuapi, Ramah khuapi tih mi umnak pakhat ah zan cam tukin hawh tuk hung hitin sila nelah a tih ten,
\v 14 Khualzin cu peh leh haw in Benjamin ngam, Gibeah khuapi bul a hen ten ni tum hi.
\v 15 Gibeah khuapi ah zan cam tuk ngaihsut nak tuah khuapi sung lut tum in, a kua mah in khualcam phal ngawl hang lamzin ah khung haw.
\p
\v 16 Gibeah miphun te cu Benjamin miphun te hi. Mah hang a cam tu Epharaim mual hum mi putek pakhat a um hang, a mah cu zan lam ten lo lam na deh nak mun pen a hun laih tak in,
\v 17 Zo in, khuapi lamzin ah mikhual pakhat a um mi cu a muh ten nang ai lai ah hawh tuk kam? Ai lai pen hung kam tin a dot ten,
\v 18 Kohten Judah ngam Bethlehem khuapi pen Epharaim mual ah hawh ung. Kei cu Epharaim mual hum mi ing hi. Bethlehem khuapi ah dawm laih no hawh in a tuin Pathian inn ah hawh ing hi. A kua mah in khual cam nak tuk pia ma laih hi.
\v 19 Mah hang laak ca in hampa ko le a dang cawm tuk um hi. Kei ma ca, na nupi ca tuk, nangmah zui tu sila ca moh le cabit tui um hi. Pakhat no hei kul ma poh hitin, ti hi.
\v 20 Pu tek pa’n nangma nelah daihnak um ta hen. Na kul mi hempoh ka nelah um tik in. Lam zin ah zan cam tik pah sin hitin tiin,
\v 21 A inn ah sam in a laak te cawm hi. Amun a ke te som in an ei haw hi.
\p
\v 22 Mah tihcun lungnop zet a um haw ten, mah khua sung mi sual hek khat ten, a inn kil in kongka cu vat haw hi. Inntek pu tek pa vang sam in na inn sungah a lut tum mi pano tuah kohten pawldun nuam ung hi suah tul in hitin, ti haw hi.
\v 23 Inntek pa cu tulin U le nau te aw, a pha ngawl mi na dek pah sun. Hi mipa cu ka inn sungah a cam mi a hih hang sual bawl pah sun.
\v 24 Kei man canu khanglai him nei ing. A nupi vang um hi. A muhte suah in pia tuk ung hi. A muhte cu zawnsak dem un. Na deih bang bawl ta un. Hi pano cu hizah loli tian a sia suak sual cu bawl pah sun hitin hehpih a nget ten,
\v 25 A mun a thu ngai ngawl in Levi miphun pa’n a nupi suah in a ap hang, a mun zan khua pek sualpih zingkhua vak tian bawl siat dem in khua vak ni suak tuk ten hah haw laih hi.
\v 26 Ni a suak ten numei cu heng in a topai inn kongka pi mai ah zingkhua vak tian zau leng hi.
\p
\v 27 Zinglam hun can a hen ten a topa cu tho in, inn kongka a hong khualzin tuk a tul ten a nupi cu inn kongka pi mai ah zau leng in, kongka khung ah a khut koih in a um mi cu a muh ten,
\v 28 Tho in. Hawh tuk hung hitin a tih ten a man don leh ngawl in um hi. Mah ten a pano in laak hum ah koih in a ma um nak mun ah hawh hi.
\v 29 A inn ah a hen ten nam la in a nupi luang cu a nguh tuah khen heinih suah in, Isarel ngam sungah hempoh ah pia hi.
\v 30 A mu tu hempoh ten Isarel miphun te Izip ngam pen a suah tul ni pen pan tuni tian, hi tihbang mi sualnak a kua mah in bawl ma, veikhat no hei cang awng ma hi. Ngai sung in thusiam khawm thukhen ta un hitin, ti haw hi.
\s Benjamin miphun tei lakah Isarel miphun ten a donak
\c 20
\p
\v 1 Mah ten Isarel miphun hempoh ten Gilead ngam miphun te tuah tho in, Dan khuapi pen pan Beersheba khuapi tian mipi hempoh ten mihing pakhat bang Mizpah khuapi, Pathian nelah hulawmkhawm haw.
\v 2 Isarel miphun hinnam hempoh, ngam sung miphun Upa uktu hempoh hulpokhawm nak a neih ten, Pathian mihing, ngal nam keng tu ke ngalkap tingli (400,000) tuah nek haw hi.
\v 3 Isarel miphun ten Mizpah khuapi ah a hawh nak thu cu Banjamin miphun ten thei haw hi. Isarel miphun ten, mahmi sual thu cu itihbang hum tin a dot ten,
\v 4 Thihnak a thuak tu numei nui pasal Levi miphun in, kei cu nupi tuah hung in Benjamin ngam, Gibeah khuapi ah cam tik hi.
\v 5 Zan hun can ten Gibeah miphun ten tho in ka cam nak inn cu kil in, kei mah that tukin thasuah haw. Ka nupi a thi tuk tian in zotsak nak bawl haw hi.
\v 6 Kei man ka nupi luang cu la in a khen a khen in ka talh cengten, Isarel miphun lo co mi ngam hempoh ah pia ing hi. Itahum titale, a mun Isarel miphun sungah a sia suak mi sual, a thiang tho ngawl mi sual cu bawl haw zo hi.
\v 7 Nohtei venghawng cu Isarel miphun hi uh ci. Hi umnak mun sungah thusiam khawm in thukhen ta un hitin, ti hi.
\p
\v 8 Mi hempoh ten mihing pakhat bang tho in kohten pakhat no hei a buk ah hawh ngawl in, inn ah pin kik leh tuk ma ung hi.
\v 9 Gibeah khuapi sungah itihbang in bawl hum tih kungkhai nak bawlin ngaldo nak ah hawh tuk.
\v 10 Benjamin ngam Gibeah miphun ten Isarel miphun tei sungah a bawl mi hempoh a thiangtho ngawl mi sualnak bang, miphun hempoh ten mahmi khuapi ah heng in sual dantat tuk thu, a muhtei ancang kuat tuk in Isarel miphun hinam hempoh sungah mihing zakhat ten sawmkhat, thawngkhat ten zakhat, thawngsawm ten thawngkhat cu teng un hitin tiin,
\v 11 Isarel miphun hempoh ten Gibeah khuapi langlam pen, hulawkhawm in mihing pakhat bang pawlkom nak bawl haw hi.
\p
\v 12 Isarel miphun ten Benjamin ngam sung hempoh ah hah in nohtei sungah bawl mi a thiangtho ngawl mi sual nak ai tihbang hum?
\v 13 A tuin Gibeah khuapi sungah a um mahmi a thiangtho ngawl miphun te cu kohten la in thah nak hang, Isarel miphun sung pen sual bawl nak vawk tuk in, mahmi miphun te ap un hitin, thucah haw hi. Mah hang Benjamin miphun U le nau Isarel miphun tei awnkam thu ngai ngawl in,
\v 14 Mahmi miphun te ngaldo tuk khuapi le khuano pen tul in, Gibeah khuapi sungah hulawmkhawm haw hi.
\v 15 Mah ten Gibeah miphun pano pha zasih (700) sial ngawl, khuapi khuano pen a heng mi Benjamin miphun mipum sial cu ngalhiam nam a cawi thei thawngkul luan luk (26,000) um hi.
\v 16 Mahmi mihing hempoh sung pen veilam khut a man thiam hang, samzang khat no hei khial ngawl in a kap thei pano pha zasalih (700) um hi.
\p
\v 17 Benjamin miphun sial ngawl ngalhiam nam cawi in ngalkap Isarel mipum sial cu tingli (400,000) um hi.
\v 18 Isarel miphun ten Pathian inn sungah tho in a hawh ten, kohtei sungah a kon Benjamin miphun a masa bel do tuk hum tin Pathian nelah a dot haw ten Pathian in, Judah miphun in a masabel in do tuk hitin, ti hi.
\p
\v 19 Zinglam khawma no in Isarel miphun ten tho in Gibeah khuapi bulah ngiahbuk a sah cengten,
\v 20 Benjamin miphun te do tuk in, Gibeah khuapi mai ah ngaldo tuk in um haw hi.
\v 21 Benjamin miphun ten Gibeah khuapi pen a suah tul cengten, mahmi ni in Isarel mihing thawng heinih (12,000) cu leihum ah lum in that haw hi.
\v 22 Mah hang Isarel miphun ten ngalhan nak thinlung la in, nikhat ni in ngaldo nak mun ah ngaldo nak bawl leh haw hi.
\v 23 Pathian nelah hawh in zan lam tian kap in, kohtei U nau Benjamin miphun te ngaldo leh ni maw tin Pathian nelah a dot haw ten, Pathian in ngaldo tukin ngam thok ta un hitin, ti hi.
\p
\v 24 Ninih ni in Isarel miphun ten Benjamin miphun tei bulah a nek haw ten,
\v 25 Benjamin miphun ten Gibeah khuapi pen a tul cengten, ngalhiam nam a cawi thei Isarel mihing thawmgheiliat (18,000) cu leihum ah lum in that haw hi.
\v 26 Mah ten Isarel miphun hempoh ten Pathian inn ah a hawh kap in, Pathian nelah bopkhup in nikhat le zanlam tian ancang in Pathian nelah mei hal biakpiak nak, pawlkom biakpiak nak a lu pia haw.
\v 27 Mahmi hun can sungah Pathian thukhaam thingkuang keng in, Aaron capa a himi Eleazer capa Phinehas cu thingkuang mai ah na dek cing tu a hih hang,
\v 28 Isarel miphun ten kohtei U nau Benjamin miphun te hawh leh in do tuk laih maw, hawh ngawl in um tuk toh maw tin Pathian nelah a dot ten, Pathian in hawh ta un. Zingten a muhte cu nohtei khut sungah kei man ap tung hitin, ti hi.
\p
\v 29 Isarel miphun ten Gibeah khua elkim ah ngalcing tu mihing te a koih cengten,
\v 30 Nithum ni in Benjamin miphun tei umnak ah ngaldo tuk, ngam thok hawh in a zan tak bang in Gibeah khuapi bulah ngaldo in um haw.
\v 31 Benjamin miphun ten ngaldo tuk tulin khuapi tuah kang in um haw hi. Bethel khuapi ah a hawh mi lamzin ah a zan tak bang, Isarel miphun ngalkap te a thah bang in mihing sawmthum (30) pawl thi haw.
\v 32 Benjamin miphun ten a muhte cu a zan tak bang in kohtei mai pen sung haw zo hitin a tih ten, Isarel miphun ten tai tuk hung hi, a muhte cu khuapi tuah a khuala mi lamzin ah pui tuk hung hitin tiin,
\v 33 Isarel miphun hempoh te a muhtei umnak mun pen tho in, Baaltarmar khuapi sungah ngal do haw. Ngal cing in a um mi Isarel miphun te a muhtei umnak mun Geba munlawn pen a tho haw hang,
\v 34 Isarel miphun pano pha thawngsawm (100,000) te luat awn haw zo hi tih a theih haw ten, nasezet kham in do haw hi.
\v 35 Mah ten Pathian in Benjamin miphun te Isarel miphun tei mai ah a sun tik hang, mahmi ni in Isarel miphun te cu thawngkul luan nga le zakhat (25,100) that haw.
\p
\v 36 Benjamin miphun ten a muhtei ngal sun nak thu cu thei haw. Isarel miphun ten Gibeah khuapi bul ah a koih mi ngalcing tu ngalkap te a muan hang, a pat pen pan Benjamin tei mai pen nung kik haw hi.
\v 37 Ngalcing tu ngalkap ten Gibeah khuapi ah thum tawtok tai in, mun hempoh ah a do hang khuapi hempoh nam tuah in that haw.
\v 38 Khuapi sungah nasezet meikhu a kai nak thu Isarel miphun ten, ngalcing tu tei lakah ngaihsut nak a piak ham zo hang,
\v 39 Isarel miphun ten ngaldo in a nunglam ah kik in Benjamin miphun ten, a mun zan tak ngal a sun bang in kohtei mai pen sung haw zo hitin tiin, ngalkap te that in mihing sawmthum(30) pawl thi haw hi.
\v 40 Mah cengten meikang in meikhu sah pi cu khuapi sungah a kai pat ten, Benjamin miphun ten a zoh kik leh ten khuapi a kang mi mei alh vanhum ah a kai cu a muh hang,
\v 41 Isarel miphun ten kik leh a pin haw ten, Benjamin miphun haksat nak thu a theih hang,
\v 42 Am zet in Isarel miphun tei mai pen ngamlak lamzin ah a tai ta vang, ngaldo in a hil tu ten a phat hang a tai tu hempoh te hei hihen, khuapi khuano sung pen a tul mi hempoh te hei hihen, thakhat thu in siat suah haw.
\v 43 Benjamin miphun te cu kil in a hil ten, Nohah khuapen pan in nisuah nak lam, Gibeah khuapi bul tian that haw hi.
\v 44 Mah ten Benjamin ngalkap thawngliat (8,000) cu lum in thi haw.
\v 45 A tang mite cu kik leh in ngam sung umnak mun Rimmon suangah a tai haw laih tak a hil tu ten mihing thawngnga (5,000) cu lamzin pen man ngah haw hi. Gidom khuapi tian nasezet hil in mihing thawngnih (2,000) that haw hi.
\v 46 Mahmi ni in a thi mi Benjamin miphun nam cawi thei ngalkap mipum sial cu thawngkul luan nga (25,000) hi.
\v 47 Mihing zaluk (600) cu kik leh in ngam lak umnak Rimmon suangah a tai hang, mahmi suangpi nuai ah hali um haw hi.
\v 48 Isarel miphun ten Benjamin miphun te do kik leh in khuapi khua no sungah a um mihing, nganhing a muh mi hempoh te nam tuah that in a muh mi khua hempoh mei hal haw hi.
\s Benjamin miphun tei ca tukin nupi
\c 21
\p
\v 1 Isarel miphun ten a kua mah in a canu cu Benjamin miphun sungah huai tik tuk ngawl in, Mizpah khuapi pen thukam nak bawl haw zo.
\v 2 Mihing tampi ten Pathian inn ah hawh in Pathian mai ah zanlam tian um aw suah kap in,
\v 3 Isarel miphun Topa Pathian, tuni bang in a kul sam mi sualnak cu itahum tin, ti haw hi.
\v 4 Zinglam khawma no mihing tampi te tho, biakpiak nak taitan bawl in mei hal bakpiak nak, pawlkom biakpiak nak te bawl haw hi.
\v 5 Isarel miphun ten, Isarel miphun hinnam hempoh sungah a kon mipi te tuah Pathian nelah hung ngawl in um hum tin dong haw hi. Itahum titale Mizpah khua Pathian nel ah a hung ngawl mipa cu a thungai in thah co tuk hitin nasezet thukam nak bawl haw zo.
\v 6 Isarel miphun ten a nau Benjamin ca sualsik in Isarel miphun sungah tuni in miphun pakhat cu that zo hi.
\v 7 Ohtei canu cu a muhtei lakah pia tuk ngawlin Pathian cu sal in tamsiat nak hang, a tang mitei ca numei te itihbang in co thei tuk hum tih hei in hihen,
\v 8 Isarel miphun sungah a kon Mizpah khuapi Pathian nelah hung ngawl in um haw hum tin a dot ten, Gilead ngam Jabesh khua mi pakhat no hei a hun haw ngawl nak thu thei haw hi.
\v 9 Mihing tampi te a sial ten Gilead ngam Jabesh khua mi pakhat no hei tel ma hi.
\v 10 Mah ten hulawmkhawm mi a muhten ngalkap thawngheinih (12,000) hah in, nohten hawh in Gilead ngam Jabesh khua mi pano numei naupang hempoh nam tuah that ta un.
\v 11 Mah tih ten, pano hempoh hei hihen, pano tuah a pawldun mi numei hempoh hei hihen, that khawng ta un hitin thucah mi bang in,
\v 12 Ngalkap ten Gilead ngam, Jabesh khua tei lakah pano tuah a pawldun laih ngawl mi khanglai him numei zali (400) mu in, Kanaan ngam sungah ngiahbuk sat in Shiloh khuapi ah pui haw.
\p
\v 13 Mah cengten hulopkhawm nak a nei tuten Rimmon suang ah a um Benjamin miphun te otpih in lemnak thu son tukin a muhtei lakah hah haw.
\v 14 Mah ten Benjamin miphun te heng in Isarel miphun ten that ngawl a nung in a zam mi Gilead ngam, Jabesh khua mi numei te tuah huai dun tik haw. Mah naven numei cu tham haw ma hi.
\v 15 Mah tihcun Pathian in Isarel miphun hinnam sungah siatnak a bawl hang, Isarel miphun ten Benjamin ca sual sik haw hi.
\p
\v 16 Mipi hulopkhawm nak mun kum U pa ten, Benjamin miphun sung pen numei te a thah hang a tang mi a muhtei ca numei te itihbang in ngah thei tuk hum tih hei in hihen,
\v 17 Isarel miphun sungah miphun pakhat pai tuk ngawl in, thihnak pen a luat tu Benjamin miphun tei lo co tuk lei ngam co tuk.
\v 18 Mah naven mihing pakhat in Benjamin miphun sungah canu huai tuk in pia h. Mahmi pa cu tamsiat mipa in cang hen tin Isarel miphun ten tamsiat nak a bawl hang, ohten a canu pia tuk ma hung hi tih hei in hiihen,
\v 19 Bethel khuapi saklam, Bethel khuapi pen Shechem khuapi hawh nak lamzin nisuah nak lam, Lebonah khuapi hanglam, Shiloh khuapi ah Pathian ca tuk kum sial puai bawl theih mi hei hihen, thusiam khawm nak a neih bang in,
\v 20 Benjamin miphun te sam in, nohten hawh ta un. Cabit huan sung pen zo kuh in um haw hi. Shiloh khuapi canu ten puai bawl tuk lam in a hun haw ten,
\v 21 Cabit huan sung pen tul in, mahmi khuapi canu te cu a nupi cangtik tuk man in, Benjamin ngam ah pui ta un.
\v 22 A muhtei pa le a nau ningpa ten kohtei lakah hung in sual a bawl ten, kohten kei muhtei mitmai zo in a muhte hehpih un. Ngaldo ten a muhte tuah a seng mi nupi te a muhtei ca kohten zam ma ung. Nohtei sungah sualnak heng tik tuk in a tuin piak mi hima hitin a muhtei lakah hilh leh un hitin a thu cah mi bang in,
\v 23 Benjamin miphun ten puai bawl in a lam mi numei te cu a sial mi bang, nupi tuk a mat hang huai haw ta hi. A lo co nak lei ngam ah a pin cengten khuapi te a thak puah leh in um haw hi.
\v 24 Mah ten Isarel miphun hempoh ten mai miphun, a ngualcam tei umnak mun a lo co nak lei ngam ah pin haw.
\p
\v 25 Mahmi hun can sungah Isarel kumpi um ma hi. Mi hempoh mai thinlung deihnak bang in bawl hi.