bbm_reg/61-1PE.usfm

\id 1PE
\ide UTF-8
\h 1 Petele
\toc1 1 Petele
\toc2 1 Petele
\toc3 1pe
\mt 1 Petele
\c 1
\cl ESUKI 1
\p
\v 1 Petele motutiani mo Yesu kilisito, atie wato wango wayabati la engele ekuwe, wango wayaandji la Poti, la Galatia, Kapadosi, Azia pe la Bitinia;
\v 2 pe atie wato wango waonani la obileyi oyewi enge Wawa Mwengei adjei la eho eyewake sambo liwoso, wango wasatisami la elimo, laate wadje wato wa etemia pe wango wawamiseyi makila ma Yesu Kilisito: Magba masungu pe logoo ngbii edjeni la ino.
\p
\v 3 Mwengei pe Wawa o Likumu lasu Yesu Kilisito apambwame, la loyi e motema magba mande masungu atowotali alidji la mwano e mokalo, la mboka e obasi e Yesu Kilisito tee ongo la wagwi.
\v 4 La loyi e lisango linge liengiti oholi, enge eti la onalili, enge ebitanakiyo. Eyisani la loyi enu ongo likolo.
\v 5 Ino wango okulu o Mwengei ekoobanyakani la mboka e ogemei la loyi e mokalo enge etikali ma keeke ate eenane la engele e gboo.
\v 6 La loyi loho odjeini la mwemu ngbii, te sikala, ewongi la ino ooki magba la omekami ndenge la ndenge e ma engele ekeke.
\v 7 Laate ogemei wonu enge emekami, enge edjei la motio mosungu oyeti wolo, enge ekobitanaka inga ate emekama la misa, ekokelaka ate ototeni longonya, otwa la mogano engele ekoenene Yesu Kilisito.
\v 8 Inga te ate otimoenalini, okomobalakani. Inga te ate otimoenekeni sikala, okomogemeyakani pe odjeini la mwemu ngbii eti la oasi pe e sungu.
\v 9 Laate okototakani pukapuka e ogemei wonu, mokalo mo milimo manu.
\p
\v 10 Laate, la mokalo moho, watiesakoli wango watiesakolali la loyi e logoo wusungu enge ewunanate la loyi enu wahuela huelali la mohandja pe waluka lukali.
\v 11 Wakolukaka oyewi nda ema inga engele e nda ndenge sambo djinge elimo enge edjakali ndondo ewu eyinyesali la loyi e Kilisito ate ekoenga. Edjakali ototoli wodjidji wo Kilisito pe otwa enge eengakali odji mbuse.
\v 12 Wawaenesali ate etidjali la loyi ewu, kasi la loyi e ino nde wadjakali otiesakoli dji sambo ikokelamaka sikala atie ino la mboka e wango waotiesakolalini ino mboli ndamu la mboka e elimo satu enge etomamali tee ongo likolo. Sambo djaho nde waahumbwa walukakali olumbi ehoi.
\p
\v 13 Eho lenge wongeleni mamungwene manu la otomu. Susolani mamungwene manu. Batani mwano monu la magba masungu enge ekotota ino ango ekowongwa Yesu Kilisito.
\v 14 Nda wana wa etemia, dheeni obilei wa posa dja gala djinge idjakini ino la eho, engele etidjaake ino la oyewi.
\v 15 Kasi la ookani la Mosatu ongo oowelalini ino, ino pe owumeni wasatu la esombeli e ino kpaa.
\v 16 Laate edhingama ate: Eongi la ino odjeeni wasatu, la ebili ate, mbai idjei Mosatu.
\p
\v 17 Alidji, inga okombelelakani Wawa ongo otionaka mbanda ango ekosambesaka inde la obilei wotomu e moto la moto, yasombesani la mbangi engele eyabatiniyo ino la mbume.
\v 18 Oyewini ate etidjakali la wiho winge wikoholoko, nda palata, la wolo, nde osombamalini ino la esombeli enu enge etiwotaka pukapuka enge etotalini ino la ekaleli enge elongwate la watata wanu,
\v 19 kasi edjakalinde la makila ma Kilisito, ongo okawanali nda mana o pate ongo odjangi obe pe odjangi litono.
\v 20 Ayewanate gala liwoso la lipotele e moki, kasi aeneneli la wiengele wa gboo la loyi enu.
\v 21 La inde, omogemeini Mwengei, ongo omobasisali pe amohali otwa, la ebili ate ogemei wonu la mwano monu edjee atie Mwengei.
\p
\v 22 Okpolini milimo manu la ndenge ekotemeyaka ino omeemene pe eho ewoti libalano e wouma enge eti la ekosako, balanakani la oteteli la motema mwesi.
\v 23 Owotamini alidji, etidje la mboka e mogono mungo mokoholoko, kasi la mboka e mogono mungo motiholoko, la mboka e liloba la Mwengei o mokalo pe o libela.
\v 24 Laate wato kpaa wadjei nda wisoki, pe otwa woho kpaa nda pulele e wisoki, wisoki ekondjomaka, pe pulele wikokwaka,
\v 25 kasi liloba e Likumu ekoumwaka libela la libela. Liloba laho nde mboli ndamu enge waotiesakolini ino.
\c 2
\cl ESUKI 2
\p
\v 1 Eho lenge yakatolani la paima kpaa, la ekosako kpaa, la moleho, la mohela pe la otongi e ndenge kpaa.
\v 2 Nda wana wango waotani sika, okodjakani la posa etetelake e mawele enge edjei la liloba e Mwengei, enge wawanesiti la ema teeti, laate obekeni tee la mokalo la mboka e eho,
\v 3 inga oeneni ate Likumu adjei logoo.
\p
\v 4 Djakani atie inde nda atie libukeli e mokalo, enge elumbi wato, kasi eonami pe edjei la motio, la maiso ma Mwengei.
\v 5 Ino amene pe nda mabukeli ma mokalo, okomaanakani monguta mo elimo la loyi e wonganga-Mwengei weesi wosatu, la ohekeli mbeka e elimo enge Mwengei agemei la mboka e Yesu Kilisito.
\v 6 La ebili ate eyasani la madhingo ate: Dhenda, ikobataka libukeli liesi la Siona, enge eononi, pe edjei la motio. Ongo okomogemeya, atioka soni.
\p
\v 7 Eho lenge, edjei la motio la maiso manu, laate odjeini wagemei; kaiko atie wango wati la ogemei, ndji enge libukeli linge wamai-monguta walumbali, eumia libukeli lisungu e motio mo monguta,
\v 8 pe libukeli lisakelake pe libukeli linge likokweseke. Wakosakelaka la ebili ate watigemeyaka liloba.
\p
\v 9 Kasi ino odjeini olie enge eononi, wonganga-Mwengei e wokumu, moki mwesi mosatu, wato wango waengi odjei ema e Mwengei amene, laate otiesakoleni wikaleli wilamu e moto ongo aowelalini ino ate olongweni la molili, olingeleni la hoho ende e mwemu.
\v 10 Laate liwoso otidjakalini wato wa Mwengei, kasi sikalandjo odjeini wato wande, odjakalini wato wango watiwaokelali magba, kasi sikala odjeini wato wango wawaokeli magba.
\p
\v 11 Wamanima wa libalano, nda ndenge edjei ino wadjidji pe wato wango wayabati la engele ekue, ikohekelekeni ino mohandja ate otoneni waposa wa wenge, edjei posa eho nde ekosanisaka wenge.
\v 12 Djaakani la esombeli ndamu ndondo wato wa masumu, la loyi wungo wakoaselakani obe nda wakoasaka la wakeli sambo mbe, wamohekele Mwengei otwa la lisio linge likodja inde, la ebili ate waeni la maiso mau sambo djanu ndamu.
\p
\v 13 La loyi e Likumu temeyakani mawongeseli kpaa mango makelani la mawo ma wato: Inga ate okumu, la ebili ate adjei likolo la wato kpaa
\v 14 inga ate makumu ma gbata laate watomani la inde la ohekeli etumbu la wakeli wa sambo mbe, kasi ogani wato wango wakokelaka sambo ndamu.
\v 15 Laate edjei mwano mo Mwengei, ango ekokelakani ino olamu okodjikisakani la petee odjangi oyewi e wato wango wadjangi sambo ndamu.
\v 16 Djaani nda wato wa lipanda, kaikonde otidhendeleni lipanda lanu la odhihi sambo mbe, kasi nda mituke ma Mwengeie.
\v 17 Watemiani wato kpaa, wabalani wamaangbasu, mowangani Mwengei, motemiani likumu.
\p
\v 18 Watuke, djaani la etemia atie makumu manu la mbangi kpaa enge ewongi, te ndji wango walamu pe wa logoo, kasi pe la wango wakodjaka la minga.
\v 19 La ebili ate inga moto mwesi, la oyewi wonde liwoso la Mwengei, akonangaka motema la sambo dja minga pe akoeneke odjidji inga te ate atikele obe, edjei olamu.
\v 20 Laate nda kole edjei inga ango ekokelakani ino lisumu pe waobamboliani, okodjakani la mohandja? Kasi inga, ango ekokelakani ino olamu pe okoenekeni odjidji, okodjakani la mohandja, edjei olamu la maiso ma Mwengei.
\v 21 Meemene, edjei la mboka eho nde owelanalini, laate Kilisito pe aenali odjidji la loyi enu, atikeli ino ekpangele laate omobileini olamu.
\v 22 Atikelali lisumu, pe moleho etieneneli la monoko monde.
\q1
\v 23 Ango etangamali inde, atidjakali owongosi iliko. Ango edjakali inde oeni odjidji, atimwanali moto, kasi adjaki engele kpaa oyadhei la mawo e moto ongo okosambisaka la omeemene.
\q1
\v 24 Inde amene akpalali masumu masu la wenge wande la ekulusu, laate todhe masumu pe todjei la mokalo molamu. Pe la pota djande ino okaliani.
\v 25 Laate odjakalini nda wapate, wango wawungi mboka; kasi sikala omowongoliani mobanei mo pate pe mobanei mo milimo manu.
\c 3
\cl ESUKI 3
\p
\v 1 Ndenge kikima pe, ino wali, yatitimisani liwoso la walome wanu amene, la ebili ate, inga wadji watitemeyaka liloba, watihelane la liloba kasi la esombeli e wali wau,
\v 2 la oeni la maiso mawu amene esombeli enu elangake, la etemeya enu etetelake.
\v 3 La mondjedhe monu motidje mungo mo saa e onangi suwe mpe la okpali wiho wa wolo inga okpali wisindje wilamu.
\v 4 Kasi edje nde omoto wungo woisani, enge e motema, la ekpaleli enge etiholoko e elimo e logoo pe e magba, enge edjei la motio mosungu la maiso ma Mwengei.
\v 5 Laate ndenge eho nde, la engele e gala wali wasatu wango wabatali dombwa atie Mwengei wadjakali owongeli wenge, wadjakali oyatitimesi atie pele djau.
\v 6 Ndenge Sala adjakali omotemei Abalayama mpe omoweli likumu mpe ino owumiani wana wande, inga okokelakani olamu mpe otiwangaka ema eeti e ehalili.
\p
\v 7 Ndenge esi mpe ino pele, yabatani la iwo la oyewi, waganakani laate wadjei teni enge eyeti petee, enge e omoli, la ebili ate odjeini pe watoti wa lisango e magba masungu e mokalo mongindji la iwo, laate oyakongi wonu etihelane mboka.
\p
\v 8 La osukisi, ino kpaa djakani la omungo oikima, yabatakani la eholo e wadji, mpe balanakani la wamagbanu, wato wango wakookelaka wadji magba, wato wango wakoyatitimesaka.
\v 9 Otiwongosakeni obe la obe, inga eliko la eliko, kaiko ino pambuakani, laate waowelalini ino obilei mboka eho, laate ototeni lisango e opamboyi.
\v 10 La ebili ate, moto ongo obali mokalo pe la oeni masio malamu, atekese olemu wonde oasi sambo mbe, pe wiwulu wande oasi sambo dja moleho.
\q
\v 11 Kaiko akotilaka enge edjei obe, akokelaka enge edjei olamu, akolukaka logoo pe akotutiaka eho.
\q
\v 12 La ebili ate maiso ma Likumu makodhendaka wato walamu, pe matoyi mande ekookaka maongi mawu. Kasi mbanda e Likumu ekomalelaka wango wakokelaka sambo mbembe.
\p
\v 13 Ndai ongo akookelani ino obe inga owahekeleni la otomo olamu?
\v 14 Kasi inga te ate okoenekeni odjidji la loyi e sambo ndamu, odjeini wato wa mwemu. Kaikonde ema enge iwo wakowangaka, ino otiwangaka eho, pe otidjakeni motema likolo.
\v 15 Kasi mosatisani Likumu Kilisito ndondo e mitema manu. Yawongeleni wiengele kpaa la oasi liwoso e moto kpaa ongo akohuela ino gbondo e dombwa enge edjei ino la eho, kasi kelakani eho la logoo pe la etemeya etetelake.
\v 16 Djakani la oyewi wolamu, la loyi wungo wakoaselakani ino obe, wango wakodendjiaka esombeli enu elamu e odjei watutiani wa Kilisito waoke soni.
\v 17 Kaiko eyeti olamu oeni odjidji la ebili ate okokelakani olamu, inga mwano mo Mwengei ebala ndjongo, la ebete ate oeneni odjidji la ebili ate okokelakani obe.
\v 18 Kilisito agwali mbala kikima la libela la loyi e masumu, moto molamu mwesi la loyi e wato wango wadjangi sambo ndamu, laate akpale wato atie Mwengei. Aolanali la wenge, kasi awongosanali la mokalo la elimo.
\v 19 Ndenge eho nde akeeli otiesakoli milimo minge midjei la woyogo.
\v 20 Enge gala watitemeyali ango motema molai mo Mwengei edjakali olambeli la masio ma Noa, ango edjakali omayemi andondoli, enge ndondo eho wato wakeke, e poti oasi wato mwambi, wakalali la malia.
\v 21 Ema enge eengani la eho edjei pe sikala ookalesi ino, epoti oasi, patisa, eti nde olongosani e onalili e wenge, kasi nde oongi Mwengei oyewi olamu la mboka e obasi e Yesu Kilisito.
\v 22 Adjei la ewo e lilome e Mwengei, laate akeeli likolo; pe waahumbwa la makumu ma okulu kpaa wayabatali sese e inde.
\c 4
\cl ESUKI 4
\p
\v 1 Ndji ndjongo, nda eeneli kilisito wodjidji la wenge, ino mpe wongeleni, mamungwene manu la ndenge eho. La ebili ate moto ongo oeni edjidji la wenge inga te ate adhei masumu,
\v 2 laate alekese engele enge etikali la mokalo monde e womoto, laate posa dja wato etienge alidji, kase nde mwano mo Mwengei.
\v 3 La ebili ate engele enge eyetiga eengi ndjongo enge ino okelalini mwano e miki ango esombalini ino la tomo e esombeli e soni, la posa etetelake, la oetesi molelo, la bino, la maigo ma litema, la okengi la oeteli, pe la losambo mbe e wikeko.
\v 4 Nda etialingesaka kine ino la iwo mongindi la liwela eho e mateke e ekaleli ebe, wakoyawedjaka pe wakootangakolakani ino.
\v 5 Wakowongosa monoko atie moto ongo aengi owasambesi wato wango wadjei la mokalo, la wango wagwake.
\v 6 Edjei la kole eho nde mboli ndamu etiesamali pe atie wato wagwake, laate la maiso ma wato, wasambesame la sambo mango makoeneneke la hoho, kasi wadje la mokalo e elimo la maiso ma Mwengei.
\v 7 Gboo e wiho kpaa eumia ahue. Eho lenge djaakani wato wa mamungwene malamu pe djaakani la lokenge, yakongakani.
\v 8 Liwoso la sambo kpaa, balanani ino la ino la ebili ate libalano likodihaka sambo mbembe.
\v 9 Yambanakani ino la ino, te la ondungwani.
\v 10 La odhengeli ndenge enge moto la moto atoti likao, wakelele eho iwo la iwo nda kapita molamu e magba masungu ma Mwengei enge eenisani la ndenge ngbii.
\v 11 Inga moto akoasaka, aase nde nda edjei maloba masatu ma Mwengei, inga moto akoakelelaka wiino wande, awakelele nda moto ongo akodhendelaka ndji mamungwene mango makohekeleke Mwengei; la ebili ate la sambo kpaa Mwengei atote otwa la mboka e Yesu Kilisito. Otwa pe okulu wodjei wonde libela la libela. Amen.
\v 12 Wamanima walibalano, otiasumbweni la loyi e misa minge midjei ndondo enu, enge ekololaka laate eomekeni ino, nda loyi e eyahueli ekookwelekeni ino.
\v 13 Kaiko, djaakani ndji la mwemu laate okoenekeni wodjidji wungo Kilisito aeneli, laate oyemeleni pe otumeni la mwemu ango otwa wonde wokoenene.
\v 14 Mwemu la ino inga wakootangakolakani ino, la loyi e nkombo e Kilisito, la ebili ate elimo e otwa, elimo e Mwengei ekoyabataka likolo lanu.
\v 15 Kasi moto tweti ndondo e ino aeneli wodjidji la ebili ate adjei mooli mo wato, inga moto oiwa, inga mokeli o sambo mbe, inga moto ongo okoyalingesaka la sambo dja wato.
\v 16 Inga moto akoeneke wodjidji la ebili ate adjei moKilisito, atioke soni, kasi amohe Mwengei otwa la ndenge adjei la kombo eho.
\v 17 Ehele nde engele enge ebatana laate osambesi epote la monguta mo Mwengei. Kaikonde inga epota liwoso atie iso, ndjongo wango watitemeyaka mboli ndamu e Mwengei, wakosuka nda ndenge?
\v 18 Inga moto molamu akokalaka la odjidji, moto ongo okomodendjiaka Mwengei pe la moto o masumu akoenene eni?
\p
\v 19 Eho lenge, dhee wango wakoeneke odjidji la ookani la mwano mo Mwengei wadjaake ndji odhei milimo mawu la mawo ma mokelesi mwesi o meemene ango ekokelaka iwo enge edjei olamu.
\c 5
\cl ESUKI 5
\p
\v 1 Eho lenge, ikohekeleke wiloko wango wadjei ndondo enu mu mohandja, la ebili ate mbai pe idjei eloko mongindji la iwo alidji mototoli e wodjedji wo Kilisito ongo okotota otwa enge ekoenene:
\v 2 Banyani etonga e Mwengei linge lihi iwo la mawo manu, otikeleni eho la oyagogi, kasi kelani la motema mwesi, etidje la loyi e obali liputi linge litotani la ndenge mbe, kasi la motama mo mwemu.
\v 3 Otiaumeseni makumu e wango wadjei lisango e Mwengei, kasi wumani waekpangele e etonga.
\v 4 Ango mobanyei o wapate likumu akoenene la hoho, okototani motole mo otwa enge etibitanaka.
\p
\v 5 Ndenge kikima pe la ino, palanga, yatitimisani liwoso e wiloko wato. Kaikonde, ino kpaa kpalani edjeli e oyatitimesi ndondo e ino, la ebili ate Mwengei akomalelaka wato wa elolo, kasi akoeneseleke wato wakoyatitimisaka magba masungu.
\p
\v 6 Eho lenge, yatitimisakani sese e ewo e okulu e Mwengei, laate aodjambeni ino la engele enge eengi.
\v 7 Djilikisani mikpali manu kpaa atie inde, laate inde aoluaneseni.
\p
\v 8 Banyani mamungo manu, huakani. Motono monu, etota, akosombaka ebete kpaa nda simba enge ekombelelaka, pe olukani o molaki moto.
\v 9 Kasi, moamalelani, djaani la otetelake la ogemei, yewani ate wikoni dja enge ndenge ikowaumelaka pe wamangbanu kpaa la moki.
\v 10 Mbuse e oeni odjidji, la ma engele keke, Mwengei ongo o magba masungu, ongo owelalini ino la otwa wonde e libela mongindji la Kilisito, inde amene akosisa owongelini ino, akoomalesani ino ngbi, akootetelisani.
\v 11 Inde adje la okulu libela la libela. Amen.
\p
\v 12 Iyodhingelini ino la ma maloba makeke, la mboka e Silivano, mangbasu o meemene, ndenge ekomototaka mbai, laate ihekele mohandja pe itotole la egalela ate magba masungu enge Mwengei aoeneselini ino edjei loyi lo meemene; amalani ngbi ndondo eho.
\p
\v 13 Inde ongo odjei la Babilone, moli ongo owonani nda ino, aotomelini mobale, ndenge kikima la Malako mana o mbai.
\v 14 Hekeleneni mibale la ombombwani enge etumu la libalano. Logoo edje la ino kpaa wango wadjei la okikima la Kilisito.