See in Reader
145 lines
14 KiB
Plaintext
145 lines
14 KiB
Plaintext
\id 1JN
|
|
\ide UTF-8
|
|
\h 1 Yoani
|
|
\toc1 1 Yoani
|
|
\toc2 1 Yoani
|
|
\toc3 1jn
|
|
\mt 1 Yoani
|
|
\c 1
|
|
\cl ESUKI 1
|
|
\p
|
|
\v 1 Enge edjakali la lipoteli, engo ewokali iso la enge toenali la maiso masu, la enge iso todhengi la owangatali pe mawo masu mapotoli, la enge edhengi liloba e mokalo.
|
|
\v 2 Mokalo, eenani ngbai, toeni pe todjei wademo alidji tokootiesakolakani ino mokalo mo libela enge edjei mongidji la wawa pe eenisani la iso.
|
|
\v 3 Enge iso toenali la tookali, tokootiesakalakani ino eho laate ino pe oboliane la iso. Alidji, limbutukele aho enge etobondji iso edjei mongidji la wawa pe mongindji la mana onde Yesu Kilisito.
|
|
\v 4 La eho, tokoeneke dji sambo laate mwemu musu motume botoo.
|
|
\p
|
|
\v 5 Mboli enge tookali atie inde pe tokootiesakolakani eho lele: Ate Mwngei adjei ngbai pe likolo liti la inde mongindji.
|
|
\v 6 Inga toasi ate toboliani lainde, kaikonde tokosombaka la likolo, tokobukaka moleho pe totibiliaka meemene.
|
|
\v 7 Kasi inga tosomba la hoho nda edjei inde amene ndondo e hoho, toboliani limbutukele, pe makila ma Yesu mana onde ekotolangisaka la obe kpaa.
|
|
\v 8 Inga toasa ate toti la masumu, tookoakosaka iso amene pe meemene eti la iso.
|
|
\v 9 Inga tolimbola masumu masu, inde adjei meemene pe moto molamu la otolimbesi iso la masumu masu pe akotolangisa la sambo kpaa enge edjangi o meemene.
|
|
\v 10 Inga toasa ate, tokeliti masumu, tokomowumisaka moto o moleho pe liloba la inde eti ndondo esu.
|
|
\c 2
|
|
\cl ESUKI 2
|
|
\p
|
|
\v 1 Wana wa mbai, ikoodhingelakani dji sambo, laate otikeleni lisumu. Kaikonde, inga moto akela lisumu, todjei la mwaseli mwesi atie wawa, Yesu Kilisito moto molamu.
|
|
\v 2 Adjei inde amene mbau e mbondji la odhihi mawunga masu, eti saa enge esu amene, kasi pe e moki kpaa.
|
|
\p
|
|
\v 3 La lu loyi nde tokoyewaka ate tomoyewi, ebali aasi ate, inga tokobaniaka pui djande.
|
|
\v 4 Ongo akoasa: imoyewi, kasi atikelelaka pui djande, adjei moto o moleho, pe meemene eti ndondo e inde.
|
|
\v 5 Kasi ongo okobaniaka loyi londe, libalano la Mwengei liengemeni ndondo e inde. La likambo eho toyewi ate todjei ebete e kikkima mongindji la inde.
|
|
\v 6 Ongo okwasaka ate ayabati lainde akoki osombi mpe ndji nda inde amene.
|
|
\p
|
|
\v 7 Wamana ima wa libalano, eti pui e holi enge liodhingelini mbai ino, kasi pui e gala enge etotate ino tee la lipotele. Pui eho e gala, edjei loi lungo liokalini ino.
|
|
\v 8 Mbala kpaa edjei pui esi e holi nde ikoodhingelakani, ehele edjei loyi lo meemne la ino pe la inde, laate likolo e koyetaka pe hoho e meemene etaniga.
|
|
\v 9 Moto ongo oasi ate adjei la ngbai, ndjongo akomotonaka manango, adjei ndi ndondo e likolo.
|
|
\v 10 Moto ongo omobali manango adjei ndondo e ngbai la eho ati la ndenge teeti esakelake ekikimi.
|
|
\v 11 Kasi moto ongo okomotonaka manango adjei ndondo e molili, akosombaka la molili mpe akoleiti eni ekokeke inde, late molili limolihi maiso.
|
|
\p
|
|
\v 12 Ikoodhingelakani, wana, laate masumu manu malibisami la gbondo e kombo e inde.
|
|
\v 13 Ikoodhingelaka, wawawa, laate omoyewini moto ongo odjei tee la lipotele. Iyodhingeli, ndjenga; laate omolongini moto mobe. Iyodhingeliani, wana wa keke, laate omoyewini wawa.
|
|
\v 14 Iyodhingeliani wawawa, laate omoyewalini inde ongo odjei tee la lipotele. Iyodhingeliani ino, ndjenga odjeini la oteteli, pe liloba e Mwengei liabati ndondo e ino, pe olongiani moto mobe.
|
|
\p
|
|
\v 15 Wotibalakeni mu moki, te wiho winge windjei lainde. Inga moto mwesi abala moki, libalano e wawa eti ndondo e inde.
|
|
\v 16 Laate wiho djinge edjei la moki, posa dja wenge, posa e maiso, la elolo e wiho e okaleli, lidjiti atie wawa, kasi lidji la moki.
|
|
\v 17 Kasi moki mokoeta, la sambo djaho meemene, kasi ongo okokelaka enge ebali Mwengei akokala libela la libela.
|
|
\p
|
|
\v 18 Wana wakeke, engele e gboo mumu, la linge liokate ino ate moamaleli o Kilisito ageleli, opoti sikalandjo ngbii la iwo wango wakoamalelaka Kilisito wadji. La eho nde toewi ate edjei engele e gboo.
|
|
\v 19 Wapumbiaka ndondo esu, kasi watidjakali wato wasu, laate inga wadjakali wango wasu nda watikalali mongindji la iso. Kaiko wapumbali la oenesi la hoho ate te iwo kpaa nde wadjei wato wasu.
|
|
\v 20 Aseko ino wango wamunolami maita masatu, odjeini ino kpaa la akili.
|
|
\v 21 Odhingi iyodhingelini ino, eti ate otiyeweni meemene, kasi laate oyewini eho, pe laate moleho te mokeke etilongwaka la meemene.
|
|
\v 22 Ndai odjei moto o moleho, inga te ongo okotonaka ondimi ate Yesu adjei kilisito? Inde ongo mwamaleli e kilisito, moto ongo okowunganaka wawa la monga monde.
|
|
\v 23 Moto ongo okowungana monga awungani wawa. Moto ongo omogemei monga adjei pe la wawa.
|
|
\v 24 Nde ino, enge eokalini ino tee la lipotele eyabate ndondo e ino. Inga linge liokali ino tee la lipotele eyabati ndondo e ino, ino pe okotikalani la limbutekele mongindji ndondo e mana pe ndondo e wawa.
|
|
\v 25 Aseko ema eunanate enge inde amene atowunelate edjei mokalo mungo moti la gbo.
|
|
\p
|
|
\v 26 Iyoodingelini ino dji sambo la loyi e wato wango wakolukaka ookosakoli.
|
|
\v 27 Nde ino, maita mango inde aobatalini ino eyabati ndondo enu, pe otini la posa ate mwesi aotiesakoleni. Kasi nda maita mango inde abatali ekootiesakolakani la sambo kpaa, pe edjei meemene pe eti ekosako, pe ndenge saa eotiesakolini, tikalani limbutukele mongindji la inde.
|
|
\p
|
|
\v 28 La eho sikandjo, wana wa keke, tikalani limbutukele ndondo e inde, laate, ango ekwenene inde, toase la hoho pe la meemene, pe otitile la soni lihele lande ango ekodja inde.
|
|
\v 29 Inga oyewini ate edjei meemene, okoyewakani ate moto kpaa ongo okokelaka sambo ndamu awotani la inde.
|
|
\c 3
|
|
\cl ESUKI 3
|
|
\p
|
|
\v 1 Denga nda ndenge e libalano linge litohekeli wawa, laate iso towelane wana wa Mwengei; mpe iso todjéi ndjongo. Eho enge moki etitoyewaka, laate etimoyewe pe inde.
|
|
\v 2 Wamaangbasu wa libalano, sikasikandjo, todjéi wana wa Mwengei, kasi ndenge enge ekodjaa iso enenekiyo la hoho. Ndjongo iso toyewi ate ango ekoenene inde iso tokodja ndenge kikima lainde; late tokomoene ndenge edjei inde.
|
|
\v 3 Moto kpaa odjei awungo lomungo ayawongele ndenge kikima nda moto oho alangi.
|
|
\v 4 Moto kpaa ongo okokelaka obe akobukaka pe pui, laate obe edjei obuki pui.
|
|
\v 5 Wewini ate Kilisito aeneneli laate alongose obe wosu, inde ati la obe ndondo ende.
|
|
\v 6 Moto kpàa ongo oboliani la inde ebete ekikima atikelaka obe; moto tweti ongo okokelaka obe amoenate, te omoyewi.
|
|
\v 7 Ino wana wakeke, moto atiokoseni, moto ongo okelaka sambo ndamu adjéi moto molamu, ndenge kikima inde pe adjei moto molamu.
|
|
\v 8 Moto ongo okokelaka obe adjéi mana mondjili, laate mondjili akokelaka obe te la lipoteli. Edjei la gbondo eho nde eho mana o Mwengei eneneli la hoho; laate abukakole tomo dja mondjili.
|
|
\v 9 Moto kpaa ongo owotami la Mwengei atikelaka obe, laate momboto monde moyabati ndondo e moto oho, mpe atikelaka obe, laate inde awotami la Mwengéi.
|
|
\v 10 La ndjongo wana wa Mwengéi la wana wa mondjili wakoyewanaka la lu loyi: Moto kpaa ongo otikelaka sambo ndamu alongoyiti atie Mwengei, ndenge kikima la moto ongo omobaliti maanango.
|
|
\p
|
|
\v 11 Laate ehele edjei mboli e okali ino tee la lipotele: Ewongi ate iso amene tobalane.
|
|
\v 12 Eti nda Kaina, ongo olongwali atie moto mobe mpe amolali manango. Nda loyi e molali inde? Laate sambo djande amene edjakali mbe, kasi enge e maanango edjakali sambo ndamu.
|
|
\v 13 Otikamweni, wamana ima, inga moki e kootonakani.
|
|
\v 14 Toyewi ate tolongoyi la logo to wumia la mokalo, laate tobali wino wasu. Moto ongo otibalaka adjei la logo.
|
|
\v 15 Moto ongo omotoni maanango adjei mooli, alidji oyewini ate mooli toeti mokalo mo libela modjei la inde.
|
|
\v 16 La lu loyi nde toyewi libalano, ndenge Kilisito ahekeli mokalo monde la iso; iso mpe, tokoki ohi mokalo mosu la wino wasu.
|
|
\v 17 Inga moto kpaa ongo odjei la wiho wa mu moki, aenia mino onde la otundake, ahelia motema, nda ndenge libalano e Mwengei edjei la inde?
|
|
\v 18 Wana wakeke, totibale la oasi pe la olemu, kasi la tomo pe la o meemene.
|
|
\p
|
|
\v 19 La eho nde tokoyewa ate tolongoyi la o meemene, tokogemeika mitema masu liwoso lande.
|
|
\v 20 Laate inga motema mosu motolumba Mwengei adjei mosungu oeti motema mosu, ayewi sambo kpaa.
|
|
\v 21 Wamanima e libalano, inga motema mosu motitolumbe, todjei la elikiya atie Mwengei.
|
|
\v 22 Inga tokoongo, inde akotohekela, laate totemeika pui djande, alidji tokokelaka ndenge ebali inde.
|
|
\v 23 Ehele nde edjei mobeko monde: tondime kombo e mana onde Yesu Kilisito, tobalane iso la iso, ndji ndenge atohekeleli iso mobeko.
|
|
\v 24 Ongo oisi mobeko monde akotikalaka la limbutukele mongindji la Mwengei, la loyi luho tokoyewaka ate inde atikali la limbutukele mongindji la iso ndondo e elimo atohekeli.
|
|
\c 4
|
|
\cl ESUKI 4
|
|
\p
|
|
\v 1 Wamanaima wa libalano, otindjimakeni elimo kpaa, kasi mekakani elimo eho la oyewi inga wadjei wa Mwengei, kasi mekekeni maloba maho la oenesi inga elongoyi pendja atie inde, laate ngbii e watiesakoli wa moleho wapumbiga la moki.
|
|
\v 2 Yewani liloba e elimo elongoyi atie Mwengei la lu loyi: Elimo kpaa enge ekondjimisaka Yesu Kilisito ate adjali la wenge e mwini elongoyi atie Mwengei.
|
|
\v 3 Kasi elimo kpaa enge etiganaka Yesu, etilongwe atie Mwengei. Eho edjei elimo e moyamaleli mo Kilisito enge eokalini ino ate ageleli, pe sikalandjo edjiga la moki.
|
|
\p
|
|
\v 4 Ino wana wakeke, olongoyini atie Mwengei, pe olongini wango wato, laate moto ongo odjei la oboliani mongindji la ino aeti moto ongo odjei la oboliani mongindji la moki.
|
|
\v 5 Iwo walongoyi la moki; eho enge wakoasaka sambo djinge elongoyi la moki pe moki mokwaokaka.
|
|
\v 6 Iso tolongoyi atie Mwengei. Moto ongo ototi oyewi e Mwengei akotookaka; moto ongo alongoyiti atie Mwengei atitookaka. Edjei la ndenge eho nde tokoyewaka elimo e meemene la e limo e liwunga.
|
|
\p
|
|
\v 7 Wamanima wa libalano, tobalane iso la iso, laate libalano elongoyi atie Mwengei, pe moto kpaa ongo akobalaka, awotami la Mwengei pe ayewi Mwengei.
|
|
\v 8 Moto ongo otibalaka amoyewiti Mwengei laate Mwngei adjei libalano.
|
|
\v 9 La lu loyi nde libalano la Mwengei eenisani la hoho la iso, laate Mwengei atomali la moki mana onde saa mwesi ongo owotamali laate iso tokoke ototi mokalo la mboka ende.
|
|
\v 10 Libalano laho, eti ate iso nde tomobalali Mwengei, kaiko nde ate inde moto otobalali iso pe amotomali mana onde adje likawo la odhihi masumu masu.
|
|
\v 11 Wamanaima wa libalano, inga edja ndenge eho nde Mwengei atobalali iso, iso amene pe tokoki obalani.
|
|
\p
|
|
\v 12 Moto tweti atimoeneli Mwengei. Inga tobalana iso la iso, Mwengei ayabati la iso pe libalano la inde lilamu eengi la iso.
|
|
\v 13 Tokoyewaka ate toyabati la inde pe inde ayabati pe la iso laate atohekeli elimo e inde.
|
|
\v 14 Iso amene toeni pe togemei ate wawa amotomi mana nda mokalesi e moki.
|
|
\v 15 Moto kpaa ongo okoasa la hoho ate Yesu adjei mana o Mwengei, Mwengei ayabati la inde, pe inde la Mwengei.
|
|
\v 16 Pe iso amene toyewi pe togemei libalano linge Mwengei adjei la eho atie iso. Mwengei adjei libalano, pe moto ongo ayabati la libalano, ayabati la Mwengei, pe Mwengei la inde.
|
|
\v 17 Libalano ewumi eengake atie iso la ndenge ehele, ate iso toase la hoho pe la omeemene lisio la osambisi laate ndenge ohongo moto adjei, iso pe todjei ndjongo la mu moki.
|
|
\v 18 Ndondo e libalano owangi etidjaka, kaikonde libalano liengake ekoumbaka la owangi, laate owangi ekobataka ohiani. Moto ongo odjei ndondo e owangi, libalano lande liengakiyo.
|
|
\v 19 Nde iso, tokomobalaka laate inde koto atobalali liwoso.
|
|
\v 20 Inga moto aasa ate: Ikomobalaka Mwengei, kaikonde atimobalaka miino onde, adjei moto o moleho. Laate moto ongo otimobalaka maanango, ongo omoeni inde, aengiti omobali Mwengei, ongo otimoeneke inde.
|
|
\v 21 Pe tototi pui ehele atie inde, ate moto ongo okomobalaka Mwengei akomobala pe miino onde.
|
|
\c 5
|
|
\cl ESUKI 5
|
|
\p
|
|
\v 1 Moto kpaa ongo okondima ate Yesu adjei Kilisito awotomi la Mwengei, pe la moto kpaa ongo okomobalaka wawa, akomobala pe mana.
|
|
\v 2 Toyewi ate tobali wana wa Mwnggei: ango ekomobalaka iso Mwengei la okeleli pui djande.
|
|
\v 3 Laate libalano e Mwengei einei ndjo: ate totemeyake pui djande. Kaiko pui djande wolititi.
|
|
\v 4 Laate ema kpaa ewotami la Mwengei, ekolongaka moki. Pe libalano linge lilongi moki eho lele, ogemei wosu.
|
|
\v 5 Ndai ongo olongi moki? Inga etidje moto ongo okogemeyaka ate Yesu adjei mana o Mwengei.
|
|
\p
|
|
\v 6 Edjei inde, Yesu kilisito, ongo odjali la ligamesi e malia pa la makila, etidje saa la malia pamba, kasi la malia pe la makila. Pe edjei elimo nde ekohaka litatoli, laate elimo adjei meemene.
|
|
\v 7 Laate wiho wisato nde wikohaka litatoli.
|
|
\v 8 Elimo la malia pe makila, pe eho kpaa isato edjei la ookani.
|
|
\v 9 Inga tokoyambaka litatoli linge wato wakohaka, litatoli likinge Mwengei akohaka eyeti, laate edjei litatoli la Mwengei linge liasi inde la loyi e mana onde.
|
|
\v 10 Moto ongo okogemeyaka mano o Mwengei atoti litatoli la inde amene. Moto ongo otigemeyaka Mwengei amowumesi moto o moleho, laate atigemeye litatoli linge lihami, enge Mwengei ongo odjei motatoli, ahi la mana onde.
|
|
\v 11 Denga litatoli laho: Mwengei atohekeli iso mokalo mo libela, pe mokalo moho modjei ndondo e mana onde.
|
|
\v 12 Moto ongo odjei la mana adjei la mokalo moho. Moto ongo oti la mana o Mwengei ati la mokalo moho.
|
|
\p
|
|
\v 13 Iyodhingelini sambo djaho laate oyeweni ate odjeini la mokalo mo libela, ino wango wakogemeyaka kombo e mana o Mwengei.
|
|
\v 14 Tokomobatelaka motema la lu loyi ndjo: inga toongo ema la ndenge ebali iso, akotooka.
|
|
\v 15 Inga toyewa ate akotooka la ema kpaa enge tokoongoko, toyewi ate tokotota wiho waho enge eongani laate tomoongi eho.
|
|
\p
|
|
\v 16 Inga moto aenia manango akokelaka lisumu linge litikpalaka la logo, akoongo, pe Mwengei akomoha manango mokalo. Ikoasaka ahala la wango wakokelaka lisumu linge litikpalaka la logo. Edejei la lisumu linge likokpalaka la logo, eti enge lisumu nde ikoasaka ate oyakongeni.
|
|
\v 17 Sambo kpaa edjangi omeemene edjei lisumu, kasi edjei la lisumu linge litikpalaka la logo.
|
|
\v 18 Toyewi kpaa ate moto ongo owotami la Mwengei atikelaka lisumu, kasi ongo owotami la Mwengei akoyabanyaka inde amene pe obe etimopoto.
|
|
\v 19 Toyewi ate tolongoyi atie Mwengei, kaiko moki kpaa modjei sese e okulu e mbe.
|
|
\v 20 Toyewi alidji at mana o Mwengei adji, atohia iso akili laate toyewe moto o meemene. Pe todjei la limbutukele mongindji la moto oho o meemene, la mboka e mana onde Yesu Kilisito. Inde ongo Mwengei o meemene pe mokalo mo libela.
|
|
\p
|
|
\v 21 Wana, wakani la wilima.
|