bbm_reg/59-HEB.usfm

\id HEB
\ide UTF-8
\h Waebele
\toc1 Waebele
\toc2 Waebele
\toc3 heb
\mt Waebele
\c 1
\cl ESUKI 1
\p
\v 1 Mwengei, ongo la engele e gala, adjali oasi la watata wasu la mboka e watiesaakoli mbala la mbala pe la ndenge ngbii.
\v 2 Kasi la gboo e ma masio, atoaselia la mboka e Mana, ongo omobati inde moto o lisango e wiho kpaa, pe la mboka e inde akelali wiho kpaa winge widjei la molongo kpaa.
\v 3 Mana oho akoeneseke dombwa e Mwengei pe adjei elima e inde, pe akohelaka wiho kpaa la liloba e otetelake wonde. Mbuse e okpoli masumu masu ayabatia la ewo e lilome e okumu la wibete wiyeti likolo.
\p
\v 4 Awaetia waahumbwa, laate atoti lisango e kombo eesi elamu oyeti enge ewu.
\v 5 Nda ekpangele, ndondo e waahumlbwa asala la ndai ate: Owe odjei Mana o mbai, kekehele mbai iwumia sangwa? Pe alidji: Mbai ikowuma sango pe inde akowuma Mana o mbai?
\p
\v 6 Kasi ango emotomia inde alidji mana o inde o liwoso la mbume enge wato wayabati, akoasaka ate: Waahumwa kpaa wa Mwengei wamomayele mauli.
\p
\v 7 Alidji, akoaselaka la waahumbwa ate: Akokelaka waahumbwa milimo, pe watuke wande la olamu e wato kpaa olemi o misa.
\p
\v 8 Kasi aasali la Mana ate: Mwengei adjei ngbelengo e owe e okumu libela la libela. Ekongo e okumu e owe edjei ekongo e omeemene.
\q
\v 9 Obalali odjei moto molamu, otonali sambo e bukake pui. Eho lenge Mwengei, Mwengei e owe, aokpulia maita ma mwemu owaeti wiino wa owe.
\p
\v 10 Ase alidjii, owe, likumu la lipotele, okelali mbume la likolo widjei tomu dja mawo ma owe.
\q
\v 11 Eho mene ekobitaka, kasi owe okotikala libela, kasi eho ekosulika nda esindje.
\q
\v 12 Pe okobalaka eho nda kasaka, ase eho ekwahengese nda esindje. Kasi owe odjei ndji nda ekodjaka owe ase wilanga wowe witisila.
\p
\v 13 Kasi la ndondo e waahumbwa aasali la ndai ate: Abata la ewo e mbai e lilome tee ndji ekowabata mbai watonani wa owe nda esiko la makolo ma owe?
\p
\v 14 Iwo kpaa watidje wilimo winge wikokelaka wotomu, la loyi e wolamu wo wato kpaa, wawatomi la loyi e owakeleli wato wango wakotota lisango e libela?
\c 2
\cl ESUKI 2
\p
\v 1 Eho lenge, tokoki obateli dji sambo tookali motema, laate totikpalame lihele la mboka.
\v 2 Laate inga lu loyi eyasamali la mboka e waahumbwa eyamalali gboo, pe loyi kpaa ebukake pui pe loyi kpaa e odjangi otemei etotali etumbu e omeemene,
\v 3 Tokotila nda ndenge inga totona mokalo mosungu? Mungo mokalo ndjongo likumu lasu aasali liwoso, pe enge wato wango wamookali watoeneseli ate edjei meemene.
\v 4 Mwengei agemesali demu ewu la wienesi e sambo ndjinge sungusungu la sambo dja oyahueli ase la likao la Elimo-Santu lihami la ndenge e obali wonde.
\p
\v 5 Ase ndjongo, eti la okumu e waahumbwa nde Mwengei abati moki mungo mogeleli nde moho mokoaselaka iso.
\v 6 Kasi mwaseli mwesi ainyaali la ebete esi: Moto adjei ndai laate omomungole? Te mana o moto laate amobanye?
\q
\v 7 Omokelali mokeke la sese e waahumbwa, omokpalesali wokumu wo dombwa pe e etemia, ase omobatali Likumu e tomu dja mawo ma owe.
\q
\v 8 Obatali wiho kpaa sese e makolo mande. Kaiko nde, sikalandjo, totienekeyo wiho kpaa sese e okumu wonde.
\v 9 Kasi tokomoeneke yesu, ongo obatami maa keke sese e waahumbwa, akpali elembo e dombwa pe e mogano, laate aeneli wodjidji pe aguali, la loyi ate, la mboka e magba masungu e Mwengei aguele moto kpaa.
\p
\v 10 Ewongoki ate oholo moto wiho kpaa widjei la dombwa e inde ase la mboka e inde wiho kpaa widjei, ango okeli inde ate wana ngbii wadjee la dombwa, amomesali kapita ongo wakokalaka la mboka e inde moto oengi la mboka e wikoni.
\v 11 Laate moto ongo okosatisaka, la wango wasatisami, iwo kpaa walongoi atie moto moikima, nde eho lenge atiokaka ndundu la owaweli ate wamanango.
\v 12 Ango okwasaka inde ate: Ikotiesakola wamanima nkombo e owe, ikogana owe la lembo la ndondo e liboliani.
\p
\v 13 Ase alidji ate: Ikomobatela motema. Ase alidji ate: Denda, mbai la wana wakeke wango wapekeleli Mwengei mbai.
\p
\v 14 Ndendjongo, nda wana wakeke wadjei la makila, la moini mo ndenge e womoto, inde koto adjali ndji ndjongo la loyi ate, la mboka e logo wonde, abitese kpaa moto ongo oengi ohekeli logo, einei ate mondjili.
\v 15 Pe ahekele wohola la wato kpaa wango, la loyi e wangake logo wabatamali la otuke la wokali wou oesi kpaa.
\v 16 La memene, atiwagamisaka waahumbwa, kasi akogamesaka liwota la Abalayama.
\v 17 Nde ndjongo, aengaki oumi nda wamanango la sambo kpaa, la loyi ate aume nganga-Mwengei mosungu o motema magba, ongo omemene e sambo dja Mwengei, la loyi ate, ahekele likao lodhihake masumu ma wato.
\v 18 Ndji ndjongo, nda eeneli indemene wodjidji, ango odjakali inde omekami, aengi owagamesi wango wakomekamaka.
\c 3
\cl ESUKI 3
\p
\v 1 Eho lenge, wamanima wasatu, ino wango wawelami la oki likolo, momungwani wolamu motomani la nganga-Mwenei e ogemei ongo okomogemeyaka iso la hoho, Yesu.
\v 2 Adjakali moto molamu atie Moto ongo omobatali inde ndjongo, nda ndenge koto Moize adjali moto molamu la monguta monde kpaa atie Moto oho.
\v 3 Laate inde atangamate ate awongi la dombwa ngbii omoleki Moize, la loyi ate moto ongo okomaaka monguta akodjaka la etemia ngbii oleki monguta.
\v 4 Monguta kpaa moto nde okomaka, kasi ongo omaali wiho kpaa edjei Mwengei.
\v 5 Moize adjakali moto o wotomu molamu la monguta mwesi kpaa mo ohongo Moto ndjongo.
\v 6 Kasi Kilisito adjakali Mana molamu la monguta mo Moto oho. Iso todjei monguta mo Moto oho, inga tee la gboo todjei engele kpaa oasi la hoho, pe la memene pe la oyaheleli la sambo djinge ikototomaka iso toyagane la molambia mungo wodjei iso la woho.
\p
\v 7 Eho lenge, ndji ndenge ekoasaka Elimo-santu: La wuse wokeke inga ookani moli monde
\v 8 Otitetesakeni motema monu, nda e ngele ememelake e otetelake, nda lisio wungo womekami wopumbate la lisobe.
\v 9 Ebete enge emekali watata wanu mbai, te nda eeneli iwo tomu dja mbai la woumoi wo wilanga tuku inei.
\p
\v 10 Eho lenge, ilembali li liwota, ase ndjongo iyasali ate wawu ngake wiengele kpaa mboka dja mitema mawu, pe watiewe mboka e mbai.
\p
\v 11 Ase ndjongo ilapali ndai la limemu la mbai ate: Watilingela la ohomi wo mbai.
\p
\v 12 Wamanaima angatalakani laate mwesi onu aume la motema mobe, mungo modjangi ogemei, laate amodhee Mwengei o mokalo.
\v 13 Kasi djaakani ohani egalela lisio la lisio la engele enge owelami ate keke, moesi onu, oume motema motetelake, la loyi e okulu e ekosako e lisumu.
\v 14 Laate, tokoumaka wato wango wakowanesanaka la sambo dja kilisito, ndji inga toahelela la oteteli la sambo djaho ibatelali iso motema la lipotele ase tee la gboo.
\v 15 La engele ekwasaka iwo ate: La wuse wokeke, inga wookani moli monde, otidjeni la limemu la mitema mamu nda engele e ookake limemu enge etetelake.
\p
\v 16 Laate, wandai, waokali pe te ndjongo watumolali limemu wo Mwengei? Edjali wato kpaa wango wapumbali la Ezipito la esombeseli e Moize?
\v 17 Alidji wandai wango Mwengei awalembali la owumoi wo wilanga tuku inei? Edjali wato wango wakelali lisumu, wango milonda mau milangalali la lisobe, te ndjongo?
\v 18 Kasi wandai wawalapelali inde ndai ate: Watolingela la ohomi wonde, eti wango wadjangali etemia?
\v 19 Eho lenge, tokweneke ate, watilingelali, laate wadjangali ogemei.
\c 4
\cl ESUKI 4
\p
\v 1 Kasi toyawangese, la loyi ate liwuna lilingelake la ohomi wonde wodjeiyo, tohuake ate moesi onu toeti atitikale mbuse.
\v 2 Laate watotiesakolali iso mboli ndamu, ndenge wawatiesakolali iwo, kasi sambo djinge iwaselali iwo etiwakelali ema teeti, la liloba enge eokali iwo, laate watidjali la ogemei la wango wagemeyali.
\v 3 Laate, iso wato wango wagemei, tokolingela la wohomi woho, ndenge eyasali inde ate: Ilapali ndai la limemu la mbai ate: watilingela la ohomi wo mbai, te ndenge tomo djande esukali tee la lipotele e moki.
\v 4 Laate, aaselali lisio la sambo la ebete eesi ate: Pe Mwengei ahomali la lisio la sambo la tomo djande kpaa djinge ekelali inde,
\v 5 pe la ebete eho, asia alidji ate: watilingela la ohomi wo mbai.
\p
\v 6 Eho lenge, nda etikali ate wango wadji wakolingela la ohomi woho, pe wango wadji waokali mboli ndamu liwoso watilingelali, laate wadjangali etemia,
\v 7 Mwengei abatia alidji wuse weesi ndjo, ango iyasia inde, mbuse e engele elai, la lembo e Davidi ate: Kekehele, ndji nda ndenge eyasamali liwoso ate: Kekehele inga ookani dumbei dja nde, otiumeseni mitema manu mitetelake.
\p
\v 8 Laate inga Yosua awalingesali la ebete esi ehomake, nda mbuse, Mwengei atiyaselali eeti wuse.
\v 9 Eho lenge, etikali ohomi weesi wo sabata, la loyi e wato wa Mwengei.
\v 10 Laate moto ongo olingeli la ohomi wo Mwengei, ahomi koto la tomu djande, ndji ndenge ehomali Mwengei la tomu djande.
\p
\v 11 Tokele kpaa djinge iyengi, laate tolingele la ohomi woho, galaa moto mwesi akue ase atutie ekpangele eho e odjangi etemia.
\v 12 Laate liloba e Mwengei wodjei la mokalo, pe wodjei la woteteli, pe wowoti oleki ewumi kpaa enge edjei la maino maale, ase ekolingelaka tee la okawanesi molimo la elimo, pe matonga la maita maho, pe eengi oyewi mamungene la miano ma mitema.
\v 13 Eti la ekelamo teeti enge edjangi woeneni la hoho la maiso mande, kasi wiho kpaa widjei lingbengbele, pe wikweneneke la hoho la maiso ma moto ongo okowongosa monoko atie inde.
\p
\v 14 Nda odjei iso la nganga-Mwengei mosungu ongo olingeli likolo, Yesu, mana o Mwengei, tonangane la oenesi la hoho ate tomogemei.
\v 15 Laate nganga-Mwengei mosungu ongo odjei iso la inde, eti moto ongo oengiti otookeli iso magba la olembi wosu, kasi edjei nde moto ongo okpalemali la sambo kpaa nda iso, kasi ati la lisumu.
\v 16 Toandongbe la eyaseli e hoho, pe la omemene, la hue e ngbelengo e okumu o magba masungu, laate Mwengei atookele iso magba pe atoenesele magba masungu engele edjei iso la ehoha e ligamesi.
\c 5
\cl ESUKI 5
\p
\v 1 Laate nganga-Mwengei mosuungu ongo omokondji iwo la ndondo e wato, wakomobataka la loyi e wolamu wo wato la sambo dja Mwengei, laate ahe makao la mbeka, la loyi e masumu.
\v 2 Aengi oenesi magba atie wato wango wadjangi oyewi, la wango wawusi, laate inde koto adjei la olembi wonde.
\v 3 Nde la ndjongo, aengi ohie makao, la loyi e masumu mande amene pe la mango ma wato.
\v 4 Moto atitotaka ehele etemia la ndenge ende amene, kasi ndji la engele enge emoweli Mwengei, nda emowelali inde Alona.
\v 5 Ndenge kikima nda kilisito atiahali dombwa inde mene laate aume nganga-Mwengei mosungu, kasi akondjali dombwa atie moto ongo omwaselali ate: Owe odjei mana o mbai, keke mbai iumia sangwa.
\p
\v 6 Ndi nda ndenge easi inde la ebete edjii ate: Odjei nganga-Mwengei libela la libela nda Melekisedeki.
\p
\v 7 La masio mango edjakali inde la wenge wa moeni, Kilisito ayatatali pe alidji aongali ongo odjakali la makoki e omokalesi la logo, la opami pe la po, ase amookali ase amogemeyali la edjeli e inde ewangake Mwengei.
\v 8 Te ndenge edjakali inde mana, ayekolali etemeya la sambo djinge egbotonoli inde la djaho.
\v 9 Ase, mbuse ewoumi moto ongo weengi la sambo kpaa, akondjali mokpali moyinyake wato la mokalo mo libela, wato kpaa wango wakomotemiaka.
\v 10 Laate Mwengei amowelali nganga-Mwengei mosungo nda Melekisedeki.
\p
\v 11 Todjei la sambo ngbii dja oasi la loyi la inde, pe olumboli djaho edjei monga laate odjeini ma toi gboo.
\v 12 Laate meemene la odhendeli engele enge elekesali ino, edjakali ate odjeeni watiesaakoli, kasi odjeni alidji la posa ate moto mwesi aotiesakoleni, olongoi la lipotele, la matio ma lipotele, dja maloba mosato e Mwengei, pe odjeini nda moto ongo odjei la ehoha e mawele, kasi te wilaka witetelake.
\v 13 Kaikonde, moto kpaa ongo okonungaka mawele, ayewiti loi lungo wolamu laate adjei mana mokeke.
\v 14 Kasi wilaka witetelake widjei wa wiloko wato, wango makoki mawu mayewake, nda ndenge wakokelelaka eho, emeseni okawoli obe la olamu.
\c 6
\cl ESUKI 6
\p
\v 1 Eho lenge, nda sikandjo edhei iso matio ma lipotele ma Kilisito, tokele kpaa todje wiloko wato, totibatekine alidji moboko, eyasi nda ate oyekoli alidi matio ma ohengesi motema la odhei tomo djinge iwotitiakapukapuka, pe omogemei Mwengei,
\v 2 matio mango madhengi patisa pe la omobateli moto mawo, obasi e wato waguake, la osambesi wo libela.
\v 3 Pe ehonde, eengi la iso inga pendja Mwengei abala.
\v 4 Laate wango wadjei ngbai mbala kikima libela, pe wango waoki oleli e likao e pamba e likolo, pe la wango wakondji Elimo Santu,
\v 5 pe wango waoki oleli e liloba lilamu e Mwengei pe etetelake e sambo ndjinge igeleli.
\v 6 Kasi wadheiya eho, waengiti kine owongosami laate wahengese motema laate wadjei iwo amene omobaki alidji Mana o Mwengei la ekulusu pe omookesi soni la maiso ma wato.
\v 7 Inga mbume djinge ikokengaka malia ma ewongo enge ekoluelaka eho mbala la mbala, pe la mbuse eho ekotooko ndunda djinge ikolakamaka la wato wango waonelali eho, ekototaka koto opamboyi wo Mwengei.
\v 8 Kasi inga eho iwota keke la ma mbuku wakondjilumba la hue e mbumakolo, gboo eho wakolongosa eho.
\p
\v 9 Kaiko nde la loyi lanu, ino wamanima wa libalano, te ndenge ekoasaka iso djongo togemei memene ate odjeini olamu owaeti iwo pe okotutiakani sambo djinge ikookpalani la mokalo.
\v 10 Laate Mwengei adjangiti olamu laate awosane wotomu wonu la libalano lieneseleli ino nkombo e inde, la ndenge ewakelelani ino wasantu pe odjeini ndji okowakelakani.
\v 11 Tobali ate mwesi la mwesi la ino aenese egalala e ndenge eho laate adje la elikia etetelake tee gboo,
\v 12 laate otiwumeni wisekeleke, kasi watutei e wango wakokondja lisango e liwuna la mboka e ogemei pe la motema molai.
\p
\v 13 Laate ango Mwengei amohali Abalayama liwuna lande nda etiengali inde olapi ndai la nkombo e odji moto ongo omoeti inde, alapali ndai la nkombo e inde amene.
\v 14 Aasia: meemene ikoopambwa ngbii mpendja pe ikoowumesa ngbii pendja.
\v 15 Eho lenge, Abalayama mbuse e oenesi motema molai akondjali liwuna laho.
\v 16 Kaikonde, wato wango wakolapaka ndai la nkombo e moto ongo owaleki iwo, ase la ndai ndjawu ekoseselaka kokia kpaa, laate edjei nanga ewu enge egemei pui.
\v 17 Ndenge kikima pe Mwengei, ango eanali nde oenesi la hoho wakondji wa lisango e liwuna ate mwano monde motikukuanaka, akelali eho la ndai.
\v 18 Laate la sambo iwale djinge itokukuanaka djinge la loyi eho Mwengei aengiti te maa keke obuki moleho, iso wango watili ase tokia okayaisi atie Mwengei toaselane la otetelake laate tohele elikia enge ebatani liwoso lasu.
\v 19 Elikia wungo wodjei iso la eho wodjei nda longo la molimo, ase eteteli gboo, ase elikia eho ekotolingesaka iso mbuse e lido,
\v 20 atie moto ongo oleki liwoso alingelali la loyi esu, Yesu, ongo oumi nganga-Mwengei mosungu nda Melekisedeki libela la libela.
\c 7
\cl ESUKI 7
\p
\v 1 Laate Melekisedeki oho, likumu mo Saleme, nganga-Mwengei o Mwengei ongo oeti likolo, ongo ogbotonoli la Abalayama ango elongwali inde ooli makumu ase amopambwali.
\v 2 Ase ongo Abalayama amohali esi la esuki e liomu e wiho kpaa, adjei liwoso liwoso, inga wakukola Likumu e wato walamu, alidji adjei koto nda likumu la Saleme, easi nda ate Likumu e logoo.
\v 3 Nda eti inde la sango, ati la nango, ati la mokalakala mo watata, masio ma nde mati la lipotele, pe okali wonde woti la gboo kasi adjei nda Mana o Mwengei, adjei nganga-Mwengei libela la libela.
\p
\v 4 Dendani adjakali moto mosungu mene! Moto oho Abalayama likumu la liwota ahekeleli esi la esuki e liomu e wiho winge wipundjali inde la wita.
\v 5 Wana wa Lebi wango wakototaka wotomu wowu wo onganga-Mwengi, watoti tomani e okeli moloko atie wato, esi la esuki e liomu la otutei pui, einei atie wamangbau, te ango olongoyi iwo la liwota la Abalayama.
\v 6 Kaiko Moto ongo mokalakala mo watata wande molongoiti atie ewu akondjali esi e esuki e liomu atie Abalayama ase amopambwali moto ongo okondjali mawuna.
\v 7 Kaiko nde kokia iti, moto ongo odjei mokeke apambwamia la moto ongo omoeti.
\v 8 Ase wato wango wakondjali liwoso esi e esuki e liomu edjei wato wango wakoguaka, kasi ongo omoaseli iwo mbuse, edjei moto ongo omotondoli iwo ate adjei la mokalo.
\v 9 Alidji, dhee ikelele li liaseli, la mboka e Abalayama te Lebi ongo okokondjaka esi e esuki e liomu akoputaka esi e esuki e liomu,
\v 10 Laate adjakali la solo e tata e inde engele Melesesedeki agbotonoli la Abalayama.
\p
\v 11 Inga edjei eengake ekodjaka meemene la ligamesi e wonganga-Mwengei ewalebi (laate wonganga-Mwengei wuho wodjali la mboka kikima la Pui djinge wawahali wato ase edjali loi lo gbondo,) nda gbondo, edjakali alidji ate nganga-Mwengei odji aume nda Melekisedeki ase waase ate adjei nda Alona?
\v 12 Laate, nda wonganga-Mwengei ekokukwanaka, pui koto iengi okukwani.
\v 13 Laate moto ongo waaseli dji sambo adjei moto o liwota ladji, ongo moto tweti akelala wotomu ongo la etumbeli.
\v 14 Laate eyewani lahoho ate Likumu lasu alongwali la Yudea, liwota linge Moize atiaselali ema teeti enge edendji wonganga-Mwengei.
\v 15 Ase eyewani alidji la hoho e oleki ate, nda Melekisedeki nganga-Mwengei odji akopumba.
\v 16 Ongo oumi ndjongo, te la otutei sambo djinge idhingami ndondo e pui enge edhendi sambo djinge idjei ahala la mbume kasi nde otutei wokulu wo mokalo weesi wungo wokokiti obitani.
\v 17 Laate edhingami ndjo: Odjei nganga-Mwengei libela la libela nda Melekisedeki.
\p
\v 18 Eho lenge, walongosali pui dja liwoso laate itidjakali la okulu, alidji itidjakali la kole.
\v 19 Laate pui itiumesali ema teeti ema eengake, kasi odji e oani wesi wungo woleki olamu ekelali eho, enge la mboka eho tokoyandongbaka la hue e Mwengei.
\p
\v 20 Alidji ndenge eho ekelamali la olapi ndai.
\v 21 Kasi edjei la wato wango watiume wanganga-Mwengei la ndai, kasi edjei la moto mwesi ongo oumi nganga-Mwengei la ndai e moto ongo omoaselali ate: Mwengei alapi ndai ase atioka magba ate odjei nganga-Mwengei libela la libela.
\p
\v 22 Edjei ndjongo nde Yesu aumi moto ongo ohami nanga e ogemei enge eyeti olamu.
\p
\v 23 Alidji, ngbii waongoli ate waume wanganga-Mwengei mbuse e wango wadji laate logo etidjiakali owahi mboka e okeli ndjongo.
\v 24 Kasi inde nda edjei inde la mokalo libela la libela ati la moto ongo oengi ototi eholo e inde e wonganga-Mwengei.
\v 25 Nde ndjongo aengi koto owakalesi wato wango wakwandongbaka atie Mwengei la mboka ende, laate adjei engele kpaa la mokalo e oasi la loyi ewu.
\p
\v 26 Laate nganga-Mwengei mosungu e ndenge enge, edjei meemene ongo owongi la iso, moto omeemene, ongo oti la obe, ati la osoto, akatolani la wato wabe, adjambani oleki likolo.
\v 27 Ati la ehoha e ohekeli mbeka masio la masio nda ekokelaka wango wanganga-Mwengei wasungu, liwoso la loyi e masumu mande amene ase la mbuse mango ma wato. Laate akelali ndjongo mbala kikima la libela ango eyakawali inde.
\v 28 Laate pui idjali owabati wato wango walembi wanganga-Mwengei wasungu, kasi loi e ndai linge lidjali mbuse e pui likobataka nde Mana moikima ongo oumesami moto ongo oengi la djiesi kpaa libela la libela.
\c 8
\cl ESUKI 8
\p
\v 1 Sambo djinge ikwaselaka iso, limungwene la gbondo laho leli: Todjei la nganga-Mwengei mosungu e ndenge eho, ase ayabati la ewo e lilome e ngbelengo e wokumu la wokumu wosungu ongo likolo.
\v 2 Moto owotomu la loyi e wato kpaa la ebete e santu, ase la hema ememene enge emali likumu kasi moto te.
\p
\v 3 Laate nganga-Mwengei mosungu kpaa abatami la ohekeli makao la mbeka; eho lenge ewongoki inde koto adje la likao la ohekeli.
\v 4 Kaiko nde inga adjaki ahala la mbume, nda ati nganga-Mwengei laate edjei la wato wango wakohaka makao la otutei pui.
\v 5 Kaikonde wakokelaka wotomu mosantu wungo wodjei ekpangele pe elima e sambo djinge idjéi ongo likolo, nda Moize ango elukali inde omai hema akondjali wotomu atie Mwengei aasia ate: huaka ate okele sambo kpaa la otutei ndenge enge wowenesi ongo la mokoli.
\v 6 Kasi sikahala Kilisito okondji otomu weesi wolamu oleki la loyi e wolamu wo wato kpaa, eho lenge adjei koto mookanisi mo ogemani wesi wolamu oleki, enge ebatanii la otutei pui, pe ehelami la mawuna wilamu oleki.
\p
\v 7 Inga ogemani wungo wo liwoso wotidjake la wobe nda wungo wo wale woti la kole.
\v 8 Laate Mwengei akowapamelaka wato ango okwasaka inde ate: Likumu asiate, Dhenda masio mageleli ase ikokela wogemani woholi la monguta mo Isalaele la mongula mo Yuda.
\q
\v 9 Etidja la otutei ogeimani wungo wokelali mbai la watata wau la wuse wungo wohelali mbai ewo ewu, la owapumbesi iwo la mokili mo Ezipito, laate watiabatali ndondo e ogemani wo mbai, eho lenge edheli mbai owabanei, Likumu aasi ndjongo.
\q
\v 10 Kasi denda wogemani wungo wokokela mbai la monguta mo Isalaele, mbuse e masio maho nda easi Likumu: Ikobata pui dja mbai la mamungwene mawu pe ikodjidhinga la mitema mawu; pe alidji ikodja Mwengei owu, pe iwo wakodjaa wato wa mbai.
\q
\v 11 Wato tueti watitiesako mana o moki, te maanango ate: Moyewa Likumu, alikambo ate iwo kpaa wakondjewa mbai, olongoi ongo odjei mokeke la ongo odjei mosungu la ndondo ewu.
\q
\v 12 Alikambo ate ikowaokela magba la tomu djawu idjangi wolamu, la itomungwa kine alidji masumu mawu.
\p
\v 13 Ango eyasia inde: Ogemani woholi aseseli mokombe enge egala, kaiko nde ema nge esili mokombe pe ewoloyia ewumia ahue e osalamati.
\c 9
\cl ESUKI 9
\p
\v 1 Sikaalandjo wogemani wo gala wodjakali la pui la wotomu monsatu, pe la ebete esantu eho la moki.
\v 2 Laate wamalisali esuki eliwoso e hema ase ndondo, edjakali la emaleseli e matambe, la mesa la makoke maenesake, ase wawelia eho ebete esantu.
\v 3 Mbuse e lido e wale, edjakali la esuki e hema enge eweli iwo ate ebete enge eeti wosantu.
\v 4 Edjali la ema etumbake mpaka la malasi enge ekelami la wolo la sanduku e wogemei enge edihami eesi kpaa la wolo enge edjakali la etotu e wolo, enge edjakali la mana, la motongo mo Alona linge litooli fulele la wipe e ogemani.
\v 5 Likolo laho edjakali la wakeluba wa dombwa enge elima ewu edjakali odhihi edhiheli e odhihake masumu. Ase ehele eti engele eyaselake loyi liesi liesi e djinge wiho.
\p
\v 6 Mbuse e omai wiho waho ndjongo, wanganga-Mwengei wadjakali olingeli la esuki e liwoso e hema eho iengele kpaa la okeli tomu esatu.
\v 7 Ase enge esuki e wale ndji nganga-Mwengei mosungu inde amene nde odjakali olingeli mbala esi la elanga esi, atilingelakali te inga ati la makila, enge edjakali inde ohi la loyi lande amene ase la loyi la masumu ma wato, mango ma djakali iwo okeli la odjangi oyewi.
\v 8 Elimo santu edjakali woenesi la hoho ate mboka e olingeli la ebete monsatu etienenekeeliyo engele enge hema e liwoso edjakali ango.
\v 9 Eho edjei ekpangele la engele enge ebatama, enge eengi sikala, pe tee sikandjo, makao ma mbeka makohanaka, kaikonde maho makokiti omohi moto ongo okokelaka wotomu wosantu woyewi wolamu wungo wowongi.
\v 10 La enge edhengi wilaka, Maana la patisa ndenge la ndenge. Eho edjakali iongolo dja pui enge edhendji wenge, pe eongani tee la engele enge ebatama laate enanole sambo.
\p
\v 11 Ase ango odjali Kilisito Nganga-Mwengei mosungu o sambo ndamu ndjinge ikelami, aetali la hema sungu enge ekoki oleki, enge ekelamiti la mawo easi nda ate eti ndondo e wiho winge wikelami la moki.
\v 12 Ase alingelali la mbala kikima libela, la ebete esantu, te la makila ma meme, te la makila ma wana wa ngombe, kasi la makila mande amene, ase atokondjelali wosikolami wo libela.
\v 13 Inga makila e wameme pe e wangombe wapele, pe la miisu ma ngombe e moli minge mikomisaka iwo likolo la wato wango wadjei la wonalili, makosatisaka tee okpoli wenge,
\v 14 ndjongo makila ma kilisito, mango la mboka e elimo esi e libela, ayakawali atie Mwengei, te la litono, ekokpolo woyewi wolamu wosu, te la oyeti tomu ndjinge itiwotaka pukapuka laate tomokele Mwengei o mokalo wotomu wosantu?
\p
\v 15 Eho lenge adjei mookanesi e ogemiani oholi, la ebili ate, wango wawelani wakondje liwuna e lisango wolibela; laate logo londe lodjali la owasikoli la mboka e lisango e sambo e bukake pui djinge ikelamali la ogemiani wo gala.
\v 16 La ebili ate ebete enge edjei ogemiani, moto ongo okeli ogemiani woho, ewongi ate ague.
\v 17 La ebili ate ogemiani ekogemianaka la wa mbeka enge e olami laate etigemianaka la engele enge moto ongo okeli adjei la mokalo.
\v 18 Eho lenge ogemiani wo gala etipotali odjangi makila.
\v 19 La ebili ate ango Moize awayewisali wato kpaa mitomani kpaa etutiake pui, atotali makila ma wana wangombe wapele la mango ma meme la malia la lene tanake ngbaa la mote mo izope ase amiselali ahala, inde amene la wato kpaa waasali ate.
\v 20 Ehele ndjo edjei makila mango Mwengei aohekelini ino tomani ate oengeseni.
\v 21 Amisali makila pe la hema ase la teni kpaa dja wotomu la wolamu wo wato kpaa.
\v 22 Wiho wiesi kpaa wikokpolonoko la makila la otutei pui ase inga makila matisuakane wookeli magba woti.
\p
\v 23 Ewongoki ate ekpaangele e dji sambo djinge idjei ongo likolo ilangake la ndenge ndjongo, ase sambo mene dja likolo ilangi la wambeka mango maleki djinge mbeka.
\v 24 Laate Kilisito alingelali la ebete esantu enge ekelamiti la mawo, enge edjei elima e sambo dja meemene, kasi nde ongo likolo mene laate aenene sikahala liwoso la Mwengei mene la loyi e esu.
\v 25 Eti pe ate ayakawali mbala la mbala, ndenge nganga-Mwengei mosungu akolingelaka elanga la elanga la makila mande amene.
\v 26 Inga edja ndjongo, nda akweneke wodjidji mbala la mbala tee ndiango epota mokili. Kasi sikahala aeneni mbala kikima la libela la osukesi sambo dja ehele engele la olongosi lisumu la mbeka lande amene.
\v 27 Nda ekolambelaka wato logo mbala kikima la libela, kasi mbuse eho osambesami,
\v 28 Kilisito akawamali mbala kikima la libela laate akpale masumu ma wato ngbii, ase mbala ewale enge ekouma inde etodja kine la olongosi masumu ase wato wango wakomolukaka la ehoha etetelake la loyi e wokali wou wokomwene.
\c 10
\cl ESUKI 10
\p
\v 1 Laate nda edjei pui elima e sambo ndamu djinge igeleli, ase eti omenemene wosambo, la makao mango makohaka iwo wiengele kpaa elanga la elanga, wato waengiti, te wokeke owumesi wango wakoandongbaka ahue, wato wango wakoki.
\v 2 Inga ndjongo, wambeka matiengake ohani? Laate wango wakokelaka wotomu mosantu, la wango walangi mbala kikima la libela watiengake kine alidji woewi masumu.
\v 3 Kasi wambeka mango madjei nde ohundoli masumu elanga la elanga.
\v 4 La ebili ate makila ma wangombe dja pele la mango ma meme maengiti olongosi masumu.
\p
\v 5 Eho lenge, ango edji Kilisito la moki, akoasaka ate: otibalali mbeka la makao, kasi owongeseleli mbai wenge.
\q
\v 6 Otindimali makao matumbake pe likao la loyi emasumu.
\q
\v 7 Ndjongo iyasali ate: Denda! Idji nda ndenge edhikami la loyi la mbai, la elingani e ahala, okeli mwano mo owe Mwengei.
\p
\v 8 Mbuse e oasi liwoso ate: Otibalali pe otigemeyali wambeka e makao, alidji la makao matumbake, la likao e loyi e lisumu; wambeka djinge ikohanaka la otutei pui.
\v 9 Mbuse eho asia ate: Denda! Idji okeli mwano mo owe. Alongosi ema e poo laate abate ema enge e wale.
\v 10 La mwano moho, iso tosatisami la likao la wenge e Yesu-Kilisito mbala kikima la libela.
\p
\v 11 Alidji nganga-Mwengei kpaa akoamalaka wuse la wuse la okeli wotomu mosantu, la loyi e wolamu wo wato kpaa pe la ohekeli wambeka waho mbala la mbala la ebili ate maho maengiti olongosi masumu.
\v 12 Ase Kilisito, mbuse e ohekeli mbeka kikima la loyi e masumu libela pe ayabatali la ewo e lilome e Mwengei.
\v 13 Opoti ndjiango akolambelaka tee mitone mande wakohotono nda esuleli e makolo mande.
\v 14 La loyi e mbeka sa kikima awaumesi wato wango wadjakali osatisami wato wango waengi libela la libela.
\v 15 Alidji Elimo santu ekototoloko la loyi esu, laate la mbuse easali ate,
\v 16 Likumu aasi ate: Denda wogemeyani wungo wokokela mbai la iwo, mbuse e masio maho. Ikobata pui dja mbai la mitema mawu ikodjidinga djaho la mamungwene mawu.
\p
\v 17 Easi alidji ate: Itomungwa alidji masumu mawu pe la tomu djawu dja obuki pui.
\p
\v 18 Kaiko nde ongo olimbesi iwo masumu maho, likao e loyi e lisumu liti kine.
\p
\v 19 Eho lenge, wamanima, nda edjei iso la egalala la okeleli mboka e lingelake la ebete esantu eho, la ligamesi e makila ma Yesu.
\v 20 Enge etodhuhuelelali inde iso nda mboka poli pe e mokalo enge eleki la lido, nda oasi ate wenge wande.
\v 21 Ase nda edjei iso la nganga-Mwengei mosungu moikima ongo okobaniaka monguta mo Mwengei,
\v 22 dhee ate, la mitema ma omeemene, toyandongbe ongo la ogemei wotetelake, nda okpolomi mitema masu la sambo mbe pe wenge wasu wikpolomi la malia mango malangi.
\v 23 Toaselake mwano mosu la hoho pe totiabingabinge la ebili ate moto ongo ohali liwuna adjei wolamu.
\v 24 Toluanake laate tohanake egalela la ebili ate todje la libalano pe tokele tomo ndamu.
\v 25 Totidhee ogbotononi wosu, nda ehahani wato wadji okeli, kasi tohane egalela pe tokelake ndjongo la oeteli ango ekweneke iso wuse woho woumia ahue.
\p
\v 26 La ebili ate inga tohahana okeli lisumu la wogeno mbuse e okondji woewi wungo wolamu wo memene, mbeka edji eti la la olimbesi masumu.
\v 27 Kasi tokolambelaka ndji lisambesi liesi liwangesake, pe la olemo wo misa minge mikolongosa wayamaleli wa Mwengei.
\v 28 Moto kpaa ongo odhendei pui dja Moize akogwaka la monoko e watotoli wale, te wasato, pe watimookelaka magba.
\v 29 Ndjongo la limungwene lanu moto ongo omohoti mana o Mwengei pe la ongo oeni makila ma ogemeyani pamba enge emosatisali iwo la maho, la ongo otangi elimo e magba masungu pe adendeiya eho aengiti okondji etumbu e sungu oyeti?
\v 30 La ebili ate tomoyewi moto ongo oasali ate: owongosi wobe edjei loi wombai, mbai nde okowongosaka; pe alidji ate: Likumu akowasambesa wato wande.
\v 31 Edjei loi weesi e wangesake okwi la mawo ma Mwengei o mokalo.
\p
\v 32 Kaiko nde mungwani engele kpaa masio ma poo mango mbuse e oenisami ngbai, odjalini la egalela e wita wiesi wisungu la ndondo e wodjidji.
\v 33 La wiengele wadji, waotangakolalini ino pe waowenesalini ino odjidji liwoso la wato nda ebete e wioka, ase la wiengele wadji waowenesalini wodjidji mongindi la wango wadjakali ogbotoni la sambo djaho.
\v 34 La ebili ate ookelalini wango wadjakali la woyogo magba pe ogemeyalini la mwemu wato wango waopuesalini wiho wanu laate oyewalini ate odjeini la ema esi elamu oleki pe enge ekoumwaka.
\v 35 Otidhekeni oaasi la hoho pe la omeemene, laate liwongoseli laho lidjei lisungu.
\v 36 Laate oengini odjeni la edjeli e odjei la mohandia, laate mbuse e okeli mwano mo Mwengei, okondjeni ema enge e owunelalini inde.
\v 37 La ebili ate etikali ma engele keke, ase moto ongo ogeleli akodja pe atoumwa.
\q
\v 38 Kasi moto molamu o mbai akokala la ogemei, ase inga awongwa mbuse, molimo mo mbai motiemele la inde.
\p
\v 39 Iso toti wato wango wakowongwaka mbuse la obitani, kasi todjei nde wato wango wadjei la ogemei laate tobanye molimo mo mokalo.
\c 11
\cl ESUKI 11
\p
\v 1 Ogemei wodjei edjeli e olambeli la motema moesi kpaa wiho winge wikomungwaka owe okondji, edjei elembeteli enge ekweneseke womemene wosambo inga te etieneneke.
\v 2 Laate la mboka eho nde litotoli ehamali la loi e wato wa engele e gala.
\v 3 La ogemei tokoewaka ate la liloba Mwengei, wiho winge widjei la milongo ewongisami, eho lenge enge ekoeneneke elongoyi la wiho winge witieneneke.
\p
\v 4 La ogemei nde Abele amohali Mwengei mbeka e motio mosungu, oyeti enge e Kaina, la mboka e ogemei woho litotoli lihanali ate adjei moto molamu, Mwengei ahali litotoli la loi e likao lande; pe la ogemei wonde, inga te agwi, adjeiyo ndji akokpomaka.
\p
\v 5 La ogemei Enoka akpalamate ebete edji laate atiene logo, ase atieneneli ebete teeti la ebili ate Mwengei amokpalali ebete edji; laate liwoso akpalame ebete edji akondjali litotoli ate amoemeleseli Mwengei.
\v 6 Inga moto atidje la ogemei akokiti omoemelesi inde te wokeke laate moto ongo okoyandongbaka ahue e Mwengei ewongi agemeye ate inde adjei, pe aumake moto ongo okohaka liwongoseli la wato wango wakomolukaka inde la ehoha etetelake.
\p
\v 7 La ogemei Noa, mbuse e okondji huaka e Mwengei, la sambo djinge itienenekeli yo, amowangali Mwengei pe amaali masuwa la owakalesi wato wa monguta monde; ase la ogemei uho akpeseli moki la loi, ase aumali mototi e lisango e olamu linge lilongoi la ogemei.
\p
\v 8 La ogemei Abalayama ango ewelamali inde, atemiali la ndenge ekeeli inde la ebete enge ewongokoli la inde okondji lisango; ase akeeli, te ndenge etiyewali inde atie eni edjakali inde okii.
\v 9 La ogmei ayabatali modjidji la moki mo liwuna, nda ase moki mo wadjidji, ase ayabatali la wahema ebete eikima la Isaka la Yakobi, wakondji wa lisango e liwuna liesi eho mongindji la inde.
\v 10 Laate adjakali olambeli gbata enge edjei la miboko ma meemene, gbata enge Mwengei inde amene moto omai pe akeli.
\v 11 La ogemei pe Sala inde amene atotali okulu e okpali lemi e litoto, inga ate aetesali wilanga wa owoti, la ebili ate adhendelali moto ongo ohali liwuna ate adjei meemene.
\v 12 Eho lenge pe la moto sa moikima ongo oengi iso oasi ate odjaki moto mogwake, wana wawotamali ngbii, nda minoto ma likolo pe koto nda ngene dja kelekele e ewale, watiengakali otangemi.
\p
\v 13 Iwo kpaa wagwali la ndondo e ogemeit, inga te etitotali iwo wiho winge wiwawunelali iwo, kasi waeneli la lihele, pe waemelali la waho ase waasali la hoho ate wadjei wadjidji pe wato wango wayabati la moki moho la engele ekuwe.
\v 14 Wango wakwasaka djinge sambo wakoeneseke la hoho ate wakolukaka amene ebete ewu amene.
\v 15 Kaiko nde inga wadjakali saa omungoi ebete enge elongwali iwo, nda waengali owongwi.
\v 16 Kasi sikahala wadjei la ehoha e ebete enge eleki wolamu, easi nda ate e likolo. Eho lenge Mwengei atiwaokelaka ndundu, ate awelame Mwengei owu, laate awawongeleli gbata.
\p
\v 17 La ogemei Abalayama, ango emekamali inde, toengi oasi ate amokawali mana onde Isaka mbeka, pe moto ongo ototali liwuna la mwemu, aengali okawi mbeka mana onde saa moikima ongo omowotali inde,
\v 18 inga ate easanali atiende ate: Enge ekowelana momboto mo owe, ekodja la mboka e Isaka.
\v 19 Abalayama amodhendelali Mwengei aengali omosusoli tee ongo la wagwi, pe tee la logo, amototali alidji la ndenge e elima.
\p
\v 20 La ogemei Isaka amopambwali Yakobi la Esau la sambo djinge wiengali ogeleli.
\p
\v 21 La ogemei Yakobi ango eumali inde ahue e logo amopambwali mana mwesi mwesi la wana wa Yodjepu, ase ayakongoli ango oyaimbali inde la gboo e motongo monde.
\v 22 La ogemei Yodjepu, ango eumali gboo e wokali wonde, aaselelali wopumbi wo wana wa Isalaele; pe ahali tomani la loyi e mikwa mande.
\p
\v 23 La ogemei Moize la owotami wonde wawoti wande wamoisali ndebo isato mbuse e owotami wonde, la ebili ate wamoeneli mana ayetali owongi, ase watiwangali tomani e Likumu.
\v 24 La ogemei Moize, ango ebekali inde, atonali watimowele ate mana o mana moli o Falao.
\v 25 Agemeyali oeni wodjidji la wato wa Mwengei mongindji, ebete ate adje la mwemu engele ekue enge elongoi la lisumu.
\v 26 Laate adhendelali nsoni e Kilisito nda ogumake wo sungu oyeti wiho wa motio wa Ezipito, la ebili ate adjakali odhendji la wangatali atie ekodja oputami.
\v 27 La ogemei Moize alongwali la Ezipito. Atiwangali limemu la likumu te, atetelali gboo, nda edjakali inde weni Moto ongo otoeneneke.
\v 28 La ogemei akelali Pasika pe akpulali makila la ebili ate mooli atiwabande wana wango wawotami liwoso la Isalaele.
\p
\v 29 La ogemei waakpandali ewale e tanake nda mbume ndjomake, kasi wato wa Ezipito walindali ango emekali iwo okpandji eho.
\p
\v 30 La ogemei witutu wa Yeliko wikwali mbuse e olingami masio sambo.
\p
\v 31 La ogemei Lahaba moli o ndumba atigwali te mongindji la wango watidjali la etemia, la ebili ate awayanbali wadjake la logoo.
\p
\v 32 Ikwasa kine nde alidji? Engele ekodjanga mbai inga iyasela alidji Zedeo, Balake, Samisona, Yepeta, Davidi la Samuele la waaseli wadji.
\v 33 Wango la mboka e ogemei walongali makumu ma wita, wakelali wolamu womeemene, wakondjali mawuna, wahelali minoko ma wasimba.
\v 34 Wasesali okulu wo misa, watilali maino ma ewuni, wadjakali olembi kasi waumali la wotetelake, waumali mabande ma wita, wawatilesali mawoke ma wasoda ma wadjidji.
\v 35 Wali wagbotonoli la wato wau wagbake la obasi; ase wadji wato waeneli wodjidji wotetelake la ebili ate watigemeyali okpolami la mboka e lisango e ndenge esi ndjo, laate watote libasia linge lileki olamu.
\v 36 Wadji wakondjali omekami wou la ndenge ewasekeli iwo pe wawabingali pimbo, oyeti te enge, wawanangali mindjota ase la woyogo.
\v 37 Wawabingali mabukeli, wamekamali. Wagwali logo e wiwini. Wadjakali oki wiati la wiati, wakpalali wikombaka dja kondolo la e wameme, wadjakali odjangi, waeneli wodjidji, wawabeteleli.
\v 38 Ase moki motiwongoli la iwo te, wadjakali oki wiati la wiati la wisobe, la mikoli, la buu dja mabukeli, la mawela ma mbume.
\p
\v 39 Kaikonde iwo kpaa, inga te ate litotoli ehamaali la loyi ewu la ogemei owu, watikondjali ema enge e wawunelali iwo.
\v 40 La ebili ate Mwengei adjakali otoeneli iso lihiele ema esi e olamu oyeti, la ebili ate iwo watiwume wato wango waengi inga te iso.
\c 12
\cl ESUKI 12
\p
\v 1 Iso koto, nda edjei iso la lipata lisungu ndjo e watotoli linge litolingi iso, tolongose woliti kpaa e lisumu linge likotohelaka petee. Pe todje la egalela ango ekotilaka iso obangu la migbondo minge midjei liwoso la su.
\v 2 Ango okomodhendelaka iso kapita pe moengesi e ogemei wosu, yesu. La mwemu mungo mobatamaali liwoso lande adjali la mogalela e omobaki la ekulusu, atiokali soni, ase ayabati la ewo e limo e ngbelengo e wokumu wo Mwengei.
\p
\v 3 Momungwani moto ongo odjei la egalala la sambo dja oyamaleli e ndenge enge e wasumuki, laate otiadheleni la okuwi e elambake.
\v 4 La wita winge wikosanaka ino la lisumu laho, osanakiyoni te tee la makila.
\v 5 Kasi owosanini mohandja enge ekoaselaka ino nda wana ate: Mana o mbai otidheeke etemia e Likumu pe otilembeke wenge ango eonanoli inde.
\q
\v 6 Ndindjongo Likumu akonanolaka moto kpaa ongo omobali inde; akobingaka pimbo moto ongo inde akomotoloko nda mana.
\p
\v 7 Odjeini la mohandja la loyi e witumbu. Mwengei akookelakani sambo nda ebili e wana. Laate nda mana ongo sango atimohaka etumbu?
\v 8 Kasi inga odjangiani etumbu enge ekondjaka wato kpaa ondjeini mene wana wa mese, kasi te wana wa monguta.
\v 9 Alidi wasangbasu wadjei wato nda iso wango wakotohekeleke iso witumbu. Ase todjakali owatemei, ndjongo Wawa o mokalo mosu e elimo, tokokiti owadjikisi liwoso lande oleki laate todjee la mokalo?
\v 10 Wasangbasu watohali iso witumbu la masio makeeke ndenge nda eenekeli iwo olamu; kasi Mwengei akotohaka ndjongo la wolamu wosu la ebili ate iso todje wasantu nda inde.
\v 11 Etumbu teeti etodjaka loi lo mwemu engele enge ekohanaka eho, kasi ekodjaka nde magba, kaikonde mbuse eho, ekowotelaka wango watiesakolami la eho pukapuka e logoo, easi nda ate wolamu wo meemene.
\p
\v 12 Hani egalela la mawo mango malembi pe la mauli mango ma teteliti.
\v 13 Ase nanolani mboka dja makolo manu la ebili ate esuki enge elembi etilongwe la litonga, kasi ekale nde okala.
\v 14 Tutiani odjei logoo la wato kpaa, pe tutiani wu wosatisami, inga wotidje moto tweti atomoene Likumu.
\v 15 Huakani mene la ebili ate moto tweti atidjange magba ma Mwengei laate mondjili te mweeti mokombeni mowotame alidji molingese ewedje pe etiwumese wato ngbii la wonalali.
\v 16 Moto o pite atidje, te moto ongo otitemiaka sambo mosantu nda Esau, ongo okawali wotomu wonde wo mana o poo la loyi e maa ema elakake.
\v 17 La ebili ate oyewini ate mbuse alidji, ango obalakali inde ototi lisango e opamboi, wamotonali inde laate te ango olukakali inde la wilelo mene okukoli mamungwene ma sango, atiengali kine.
\p
\v 18 Laate ino otiandongbeni ahue e ema enge eengini ino opoti mungo moalengi la misa, te linge lidjei la lipata e molili la e likolo te e ehoho.
\v 19 Te enge ekolelaka nda lihili, te enge eengani la etale, ango ookali wato mungo moli, wayakongoli ate watiwakpobele kine loi lodji.
\v 20 La ebili ate wu wotomu wodjakali minga atie iwo: inga nama esi etima mu mokoli, ewongi wabinge nama eho mabukeli.
\v 21 Eeneneli eho edjakali la bo, eho lenge Moize aasali ate: Ikowangaka pe ikodjadjaka!
\v 22 Kasi ino oyaandongbini ahue e mokoli mo Siona pe la gbata e Mwengei o mokalo, Yelusalema e likolo, pe la wambuka e waahumbwa wande.
\v 23 La wogbotononi wosungu pe la oboleani wo wana wa poo wango wadhingama nkombo ongo likolo, ase la Mwengei mosambesi o wato kpaa, ase la mokalo mo elimo mo wato walamu wango waumi wato wango waengi.
\v 24 La Yesu mookanesi e ogemeyani e eholi, ase la makila ma omisi, enge ekoasaka wolamu oleki makila mango ma Abele.
\p
\v 25 Huakani ate otitoneni moto ongo okwasaka. La ebili ate inga watikalali, laate watonali omooki moto ongo odjakali ohekeli ohuake e Mwengei ahala la mbume, iso koto totikala te wokeke, inga tokuka maleke la moto ongo okwasaka olongoi ongo likolo.
\v 26 La engele eho moli monde modudumisali mbume la oeteli, kasi sikahala ahekeli liwuna aasi ate: Etikali mbala kikima alidji enge itidudumisa sa mbume, kasi pe la likolo.
\v 27 La wungo woasi ate: Etikali mbala kikima alidji eenesi ate olongosami wo wiho winge wikodudumaka la oeteli, nda wiho winge wikelana, laate wiho winge witidudumaka witikale.
\v 28 Eho lenge, nda ewongi la iso okondji wokumu weesi wungo woengiti odudumi, todjaake ndji tokokondja logoo wosungu, wungo la mboka eho toengi omokeleli Mwengei wotomu mosantu la ndenge egemeyani, la owangi Mwengei o bo.
\v 29 Laate Mwengei osu adjei pe misa minge mikolongosaka.
\c 13
\cl ESUKI 13
\p
\v 1 Djani la libalano, nda ekobalanaka wana wa akali.
\v 2 Otiwosanakeni ekaleli eyambake wadjidji, laate la mboka eho nde wadji wayambali waahumbwa, ase watiyewali.
\v 3 Wamungwakani wango wahelami la woyogo nda ohelamini la iwo mongindji; pe la wango wakoeneke odjidji, la ebili ate ino koto odjeiniyo ndondo e wenge.
\p
\v 4 Liwala lidje la etemia ndondo e wato kpaa, pe epe e liwala etidje la wonalali laate Mwengei akowasambesa wato wapite la wato wa iteba.
\v 5 Wokali wonu wotidje la libalano e wadjenge, emeleni la wiho winge widjei ino la waho sikahala. Laaate asi ate; itiodhe owe te wokebe pe itookila te wokeke.
\p
\v 6 Laate todje la egalala mene ase toase ate: Likumu adjei mogamesi mo mbai; itowanga. Moto aengi okeli mbai nde?
\p
\v 7 Wa mungwakani wango wakokambakani ino, wango wakoaselakani ino engbundu e Mwengei, pe ango o kodhendaka ino pukapuka elamu e esombeli ewu, tutiani esombeli ewu.
\v 8 Yesu Kilisito adjei ndenge kikima kolokolo, keke libela pe libela la libela.
\v 9 Otihahaneni la matiesakoli ma weeti wato. Laate edjei olamu motema motume la wouma wosungu kasi te la wiho wilakake, winge wango ayahekeli la djaho, watotiti kole.
\p
\v 10 Todjei la etumbeli eesi enge wango wakokelaka wotomu mosantu la hema waengiti olaki wilaka waho.
\v 11 Laate milonda e wanama Winge wikokpalaka nganga-Mwengei mosungu makila maho, la ebete esantu, la loyi e masumu, makotumbamaka kelekele e Moki.
\v 12 Eho lenge Yesu koto, laate asantise wato la makila mande aeneli wodjidji kelekele e moluhe.
\p
\v 13 Eho lenge topumbali atie inde kelekele e moki, tokpale nsoni enge ekpalali inde.
\v 14 Laate toti la moki temweti ahala mungo mokoumwaka seko, kasi tokolukaka nde la ehoha etetelake moki mungo mogeleli.
\p
\v 15 La mboka ende, tohekele Mwengei mbeka e mogano wiengele kpaa, easi nda ate pukapuka dja wiwulu wasu wingo wikotoloko nkombo ende la hoho.
\p
\v 16 Ase otiwosanakeni okeli wolamu pe la owakaweli wato wadji wiho, la ebili ate Mwengei akoemeleke la makao eenge ndenge.
\p
\v 17 Watemiakani wango wakopundesakani ino pe oyatitimesakeni liwoso la wu, laate wakobaniaka milimo manu nda wato wango wakowongosa monoko, laate wakelake eho la mwemu, kasi te la walelaleli, laate ekodja liboma atie inu.
\p
\v 18 Akongokoni la loyi la su laate togemei meemene ate todjei la woewi wo meemene laate tobali todje memene la sambo kpaa.
\v 19 Ikoohekelekeni ino mohandja, kelakani ndjongo, laate iyowongweleni alidji.
\p
\v 20 Sikala Mwengei o logoo, ongo owumesali tee ongo la wato wagwake mobanyei mosungu mo wapate, la makila ma ogemeyani e libela, Likumu la su Yesu,
\v 21 Aohekeleni ema kpaa enge elamu, la okeli mwano monde, akele ndondo esu, la mboka e Yesu Kilisito sambo ndamu la maiso mande, adje la mogano libela la libela! Amen!
\p
\v 22 Iyowongini, wamanima, nangani motema la loi wungo wo mohandja, laate, meemene, itiodhingeleni ekpata e sambo ngbii.
\p
\v 23 Yewakani ate maangbasu Timoteo apumbi ga la woyogo, inga adja gala, ikodja la inde mongindi odjaodengi ino.
\p
\v 24 Wahani mobale wango wakokambakani ino, pe la wasantu kpaa. Wango wadjei la Italia waotomelini ino mobale.
\p
\v 25 Logoo wosungu edje la ino kpaa! Amen.