bbm_reg/48-2CO.usfm

\id 2CO
\ide UTF-8
\h 2 Wakolito
\toc1 2 Wakolito
\toc2 2 Wakolito
\toc3 2co
\mt 2 Wakolito
\c 1
\cl ESUKI 1
\p
\v 1 Polo ntoma e Yesu Kilisito la mwano mo Mwengei, la mangbasu Timoteo, la lingomba la Mwengei linge lidjei ongo la Kolito, la wasatu kpaa wango wadjei la Akaya djiesi kpaa.
\v 2 Wouma wosungu la logoo e Mwengei sangbasu, koto la Likumu Yesu Kilisito edjeeni la ino.
\p
\v 3 Mwengei koto Wawa o Likumu lasu Yesu Kilisito apambwame ngbii. Wawa o motema magba koto Mwengei o obondisami kpaa.
\v 4 Ongo okotobondisaka iso ndondo e wodjidji wosu kpaa, laate iso koto towabondese wango wadjei ndondo e wodjidji, la obondesami wungo wobondisami iso atie Mwengei.
\v 5 Laate ndenge e wodjidji la loyi e Kilisito wotumi atie esu ndji la ndenge eho wobondisami wungo wokokondjaka iso wotumi la mboka e Kilisito.
\v 6 Kaiko nde edja te ate todjei ndondo e wodjidji, edjei la obondisami wonu, koto la mokalo monu. Edja te ate tobondisami, edjei la obondisami wonu enge ekokelaka la ohekeli ino mohandja, la wodjidji e ndenge kikima la enge iso koto tokoeneke.
\v 7 Ase mamungwene masu atie ino matiabandaka, nda eyewi iso ate, ndenge ino okoenekeni odjidji mongindji la iso, ndji ndjongo okobondisamani la iso mongindji.
\p
\v 8 Wamangbasu ndondo e Kilisito, tobali ate oeweni sambo djinge idhendji wodjidji wungo wotoumelali iso la moki mo Azia. Laate todjakali ndondo e wodjidji wosungu wungo woetali wokulu wosu. Ndjongo todjakali owangi te la loyi e mokalo mosu.
\v 9 Tomungwali ndondo e motema mosu ate tototiga etumbu e logo; edjali ndjongo laate iso tobate motema, te atie iso amene, ase atie Mwengei ongo okosusulaka wato waguake.
\v 10 Ongo otokalesi iso la logo, akotokalesa koto, mwano mosu modjei atie inde ate akotokalesa iso alidji.
\v 11 Ino koto oengini otogamese iso la ndenge oyakongi wonu la loyi wosu. Laate wato wahekele pambo la kole esu, la loyi e enge ema etohekeli iwo la wouma la wapanda wa wato ngbii wango wakoyakongoko.
\p
\v 12 Tokoyaganaka la loyi eho, enge koto oyewi wosu ekohekeleke litotoli lasu, eho lele: Toyasombesali la moki, la oeteli atie ino, la osatu pe la omeemene enge elongoyi atie Mwengei, te la lokenge e moto o moeni, ase la wouma wosungu e Mwengei.
\v 13 Totiodhingelalini ino djeeti sambo, longosa ndji ndjinge iyewini ino wolamu la ndjinge ikogemeiyakani ino, la djinge iyeni mbai ate okogemeiyani eho tee la gboo.
\v 14 Ndji ndenge koto ogemeiyalini ino ate iso todjei mogano monu, ndji ndjongo ekodja eho wuse e Likumu lasu Yesu.
\p
\v 15 La ndjongo nda ebati mbai motema la enge ndenge, iyanali odji liwoso atie enu, laate okondjeni nano e wale la odjei la mwemu.
\v 16 Ibalaki ate iyete liwoso atie enu, liwoso ate eleke la Masedonia, ase ango ekolongwa mbai la Masedonia, okeni otiki mbai la mboka la oki wo mbai la Yudea.
\v 17 La ndjongo, ango eanali mbai ndjongo, ititotali sambo la ndenge e iyoka. Inga sambo djinge ikoanaka mbai, ikoanaka eho la ndenge e moeni, laate ekodjaa atie mbai mbala kikima, ndjongo la te ndjongo.
\v 18 Edjei meemene ate Mwengei moto ewongi omobateli motema la sambo djinge toaselalini ino etidjaali ndjongo la te ndjongo.
\v 19 Laate Mana o Mwengei, Yesu Kilisito, ongo otiesamakolali atie enu la mboka esu, epoti oasi ate, la mboka e mbai la Silibano, la Timoteo. Etidjali “ndjongo pe te ndjongo.” Ase atie inde edjakali ndji “ndjongo.”
\v 20 Laate djinge idhengi mauna ma Mwengei kpaa, madjei ndji “ndjongo”, alidji edjei koto atie inde nde tokoasaka “Amen” atie Mwengei, la loyi e otwa wonde!
\v 21 Moto ongo otowanesi iso la ino ate todjei wato wa Kilisito, la moto ongo otokpuli iso maita edjei Mwengei.
\v 22 Abatia koto elembo ende likolo lasu, ase atohekelia iso liwuna ema enge egeleli, easi ate elimo la mitema masu.
\p
\v 23 Sikala ikomombelelaka Mwengei adje mototoli la loyi e molimo mo mbai amene ate edjei la loyi e obanyei ino nde idjitiyo la Kolito.
\v 24 Eti ate todjei makumu e ogemei wonu, ase todjei wiino wa otomo la loyi e mwemu monu, la loyi e ogemei wonu nde oyamalini.
\c 2
\cl ESUKI 2
\p
\v 1 Imungoi mbai amene ate itiwongwe kine atie enu alidji la magba.
\v 2 Laate inga iwookesani ino magba ndai kine odji okopekele mbai mwemu, ingate moto ongo omookesi mbai magba?
\v 3 Idhingali loyi luho, laate ango egeleli mbai itiwume la magba la loyi e wango iyengali odjei la mwemu! Laate iyobatelini ino kpaa motema ate mwemu mungo modjei mbai la eho edjei enge e ino kpaa.
\v 4 Edjei la odjidji, la magba la motema, la poo ngbii nde iyodhingelini ino, eti ate iokeseni ino magba, ase laate oeweni libalano linge likoobalakani mbai ino.
\p
\v 5 Inga moto mwesi aokesia magba, eti mbai nde amookesi magba, ase ino kpaa la omeki wesi ndjo, iyasi ndjongo laate engbundu e mbai itidjee la otetelake oyeti molelo.
\v 6 Pamela enge wato ngbii wahekeli eengi ndjongo atie ongo moto.
\v 7 Ndjongo, sikahala, oengini omookeli magba, la wouma, la omobembelesi, edjee te la nda ndenge, moto oho alinde la magba mande mango mayeti molelo.
\p
\v 8 Ikoohekelekeni mogalia ate woeneseleni alidji libalano linge likomobalakani ino.
\v 9 Laate edjei koto la loyi luho nde ikoodhingelakani ino, la oewi olamu womeemene e loyi wungu e odhendjini ino, inga okomotemeiyakani Mwengei la sambo kpaa.
\v 10 Loyi kpaa wungo ekomolimbesani ino moto la magba, mbai koto ikomolimbesa. Inga ilimbesi ema esi atie moto mwesi, ikeli ndjongo la loyi enu, liwoso la Kilisito.
\v 11 Laate Mondjili atitolonge iso, la ebili ate tomoewi olamu la lokenge wonde.
\p
\v 12 Kaiko nde ango eumali mbai la Toloasi, la otiesakoli mboli ndamu, la kole e Kilisito, modhuhe moesi moduhuanali liwoso la mbai, la wotomu wo Likumu.
\v 13 Itihomali la molimo mo mbai la ndenge etimogbotoli manima Tito, ase iwahali mobale ase ikia la Masedonia.
\v 14 Mwengei atote pambo, inde moto adjei otosombesi iso engele kpaa, la mokalakala mo walongi ebete eikima la Kilisito, adjei ookesi lumba e woewi wonde wiati kpaa la mboka esu.
\v 15 Laate atie Mwengei todjei la lumba wolamu wo Kilisito, ndondo e wango wakokalesamaka, la ndondo e wango wakogwaka.
\v 16 Atie wadji, lumba e logo, enge okohekeleke logo, atie wadji lumba e mokalo, enge ekohekeleke mokalo. Ase ndai owongi la djinge sambo?
\v 17 Edjei iso, laate toti wango wakotambaka engbundu e Mwengei, nda ekokelaka wadji wato, ase iso tokoasaka la womeemene, nda wato watomani la Mwengei, la maiso ma Mwengei, la Kilisito mongindji.
\c 3
\cl ESUKI 3
\p
\v 1 Topotia nde alidji oyaaseli iso amene? Mbala edji todjei la ehoha e wikpata, nda wato wadji laate etoasele iso atie ino inga enge edji ongo odjei ino?
\v 2 Ino nde ekpata esu, enge edhingani la mamungwene masu, enge eewani pe enge ekotangamaka la wato kpaa.
\v 3 Eenesi la hoho ate ino odjeini ekpata e Kilisito enge edhingani la iso nda wikeleli, edhinganiti la malia ma ekpata, ase la elimo e Mwengei o mokalo, te likolo e mabukeli, ase likolo la witando e moeni, likolo la mitema.
\p
\v 4 Edjei la loyi e Kilisito nde ekomobatelaka iso Mwengei motema la ndenge eho.
\v 5 Easiti ate iso towongi la ndenge esu amene la oeni ate ema ehele elongoyi la iso amene, ase owongi esu elongoyi atie Mwengei.
\v 6 Atowongeli iso mpendja, la odjei wakeleli wa ogemei eholi, te la pui djinge idhingani, ase la elimo. Laate pui djinge idhingani ikohaka wodjidji wo logo, ase elimo ekohaka mokalo.
\p
\v 7 Inga pui djinge idhingani ekohaka logo, la djinge itenali iwo madingo la mabukeli edjaali la otwa, ndjongo wana wa Yisalaele watiengali odhengi mbanda e Moize, la loyi e otwa e mbanda ende, otwa wungo woengali olongosani.
\v 8 Nda ndege wotomo wohake elimo wotidjee la otwa ngbii oyeti?
\v 9 Inga pui djinge idjakali ohekeli etombu edjei la otwa, wotomu woumesake wato la wolamu wungo woleki, edjei la otwa wosungu oleki!
\v 10 Ema enge eumesali iwo la engele egala ema e otwa, elongosani otwa la loyi luho, la loyi e otwa wungo woleki eho.
\v 11 Laate inga ema enge edjaki ate walongose, walingesali eho la otwa, ema enge edjei eumwake, ewongi odjei la otwa ngbii oleki.
\p
\v 12 Nda odjei iso la mwano e ehele ndenge, tokoasaka la hoho pendja la omeemne.
\v 13 Tokeliti nda engele ebatali Moize litambala la mbanda ende, laate wana wa Yisalaele watidhenge la woangatali gboo e ema enge ewongokoli olongosani.
\v 14 Ase mamungwene mawu malembali. Laate tee lisio la keke, litambala linge lidukwanaki yo engele ekotangaka iwo ogemei wo gala, laate elongosani nde la mboka e Kilisito.
\v 15 Tee lisio la keke, engele kpaa enge wakomotoloko Moize, litambala lidjei la mitema mawu.
\v 16 Ase inga moto ayakukolia atie Likumu, litambala likolongwaka.
\v 17 Kaikonde Likumu adei elimo, laate ebete edjei elimo e Likumu, lipanda wodjei koto ango.
\v 18 Ase iso kpaa, la mbanda djinge idhuhuani, nda talatala, tokongengisaka otwa wo Likumu, tokoyakukolaka la owumi la ndenge enge e elima esi ndjongo, olongoyi la otwa tee la otwa, ndenge pendja Likumu, ongo odjei Elimo, akokelaka.
\c 4
\cl ESUKI 4
\p
\v 1 La eho, la ebili ate la motema mowouma wo Mwengei tokondji dji tomo, toengiti owungesi mwano.
\v 2 Tolumbi sambo djinge ikoisanaka, djinge ikookisaka soni, tobaliti aleeti esombeli e be, totibitesa kine engbundu e Mwengei. Ase la ndenge ekoeneseke iso womeemene la hoho, la maiso ma Mwengei tokoumaka ekpangele ndamu la loyi e oyewi wo meemene atie wato kpaa.
\v 3 Inga mboli ndamu enge ekotiesakolaka iso edhihana, edhihani nde atie wato wango waguake.
\v 4 Wato wango ndondo ewu Mwengei o ehele engele adhihi mamungwene ma wato wango wadjangi ogemei, la ebili ate ongali wo mboli ndamu e otwa enge emodhendji Kilisito, ehele edjei elima e Mwengei.
\v 5 Laate enge ekotiesakolaka iso, eti iso amene, tokotiesakolaka nde Yesu kilisito ate adjei Likumu pe iso amene ate todjei tuke djanu la loyi e Yesu.
\v 6 Laate Mwengei nde moto aasali ate: wuse wongale tee ongo la molili.” Pe angali ndondo e mitema masu, la ongali woho la oyewi e otwa wo Mwengei la mboka e mbanda e Kilisito.
\p
\v 7 Todjei la ema e motio ndondo e teni e mbume, laate okumu wungo woyeti otetelake edjee e Mwengei, ase te enge elongoyi atie iso.
\v 8 Topotoni la ndenge kpaa ase totiatane, tosilali lokenge ase totidjangali mboka e pumbake.
\v 9 Tokoeneke wodjidji, ase todheeniti, tokolumbamaka la mbume, ase togbakaniti.
\v 10 Engele kpaa, tokokpalaka wiholo kpaa la wenge wasu wodjidji wo logo mungo wamueneseli Yesu, laate mokalo mo Yesu moenane koto la hoho la wenge wasu wungo ekoguaka.
\v 11 Laate iso wango todjei la mokalo, todjei wiengele kpaa oeni logo la maiso la loyi e Yesu, laate mokalo mo Yesu moenane la hoho la wenge wasu enge ekoguake.
\v 12 Logo esukami la iso, ase mokalo koto mosukami la ino.
\p
\v 13 Nda edjei iso la elimo egemeiyake eikima, enge edhinganali la loyi luho ate: “Mbai igemei, eho lenge iyasali, “iso koto todjei la ogemei, eho lenge tokoasaka.
\v 14 Toewi ate moto ongo omosusolali Likumu Yesu, okotosusola koto mongindji la Yesu, akotoyinya koto mongindji la ino.
\v 15 Laate sambo djinge kpaa edjei la loyi lanu, laate magba masungu enge etaleyanali ngbii etume la loyi e pambo enge wato ngbii wakohaka, la loyi e otwa wo Mwengei.
\p
\v 16 Totiungese mwano, ase inga ndenge e moto enge todjei saa ekobitanaka, meemene, ndenge e moto enge todjei ndondo ekowumaka oholi masio la masio.
\v 17 Inga te ate wodjidji wodjei e engele ekue, ehohi koto, ekotootelaka otwa elitake la oyeteli pe enge edjei e libela.
\v 18 Tokodhengaka te enge ekoeneneke, ase enge etieneke. Laate wihoo winge wikoeneneke widjei engele ekue, ase wihoo winge witieneneke widjei e libela.
\c 5
\cl ESUKI 5
\p
\v 1 Toewi ate inga wenge wasu wa mbume, ehele hema, ebitania, tokotota pendja wenge winge wilongoyi atie Mwengei, wenge winge wikelaniti la mawo, enge edjei libela ongo likolo.
\v 2 Laate ndondo e wenge enge eyabatake, tokotilelaka, todjei la ehoho etetelake la okpalake enge e iso amene e likolo
\v 3 laate mbuse e okpali eho, totitotane kine lingbengbele.
\p
\v 4 Iso wango todjei ndondo e hema enge ekotilelaka iso, toeni odjidji. Laate ema enge ebali iso eti ate tolongose eho, ase edjei nde okpali enge edji, laate mokalo molindese ema enge ekoguake.
\v 5 Ongo otokelali iso edjei Mwengei, ongo otohekeli iso nanga e Elimo.
\p
\v 6 Todjei engele kpaa la mogalia toewi koto, engele kpaa todjei ndondo e wenge, todjei lihele la Likumu.
\v 7 Laate tokosombaka la ogemei, ase te la oeni.
\v 8 Todjei la mwano, tokoemeleke koto odjei lihele e wenge la oyabati mongindji la Likumu.
\v 9 Oho wungo tokokelaka la oteteli ate edje te ate toyabati ebete eikima la inde, te todjei lihele la inde, togemeiyane la inde.
\v 10 Ewongi la iso toenesane la hoho liwoso la ngbelengo e osambesi e Kilisito. Laate moto la moto akondje enge eongi la inde la loyi e sambo djinge ikelamali la wenge. L a odhendeli sambo djinge edjakali inde okeli, edje djinge ndamu, te djinge mbe.
\p
\v 11 Nda eyewi iso gbondo ewangake Likumu, todjei ndji tokowagemeiyesaka wato, ase toenani la hoho la maiso ma Mwengei. Kaikonde, idjei la mwano ate toeneni koto la hoho la lokenge wonu.
\v 12 Totiyaasela kine atie ino, ase tokohekelekeni ino nano eyaganake la loyi e iso, laate odjeeni la engbundu ewongolake atie wango wakoyaganaka la sambo djinge ikoeneneke saa, ase te la djinge ikolongwaka la motema.
\v 13 Inga tokonoli boli, edjaali la mogano e Mwengei. Ase inga todjei wato wa mamungwene ndamu, edjei la loyi enu.
\v 14 Laate libalano linge lidjei Kilisito la eho etokpalesi mokpali. Laate enge eeni iso eho lele: Kilisito aguelali wato kpaa, ndjongo, la ndenge eho, wato kpaa waguali.
\v 15 Kilisito aguelali wato kpaa, laate wango wadjei la mokalo, watidjee kine la mokalo la loyi ewu amene, ase la loyi e moto ongo oguali pe asusuali la loyi ewu.
\p
\v 16 Eho lenge, opoti sikandjo, tomoyewiti moto te moikima la ndenge e wenge. Inga te ate tomoyewali Kilisito la ndenge e wenge, sikandjo, tomoyewiti kine alidji ndjongo.
\v 17 Inga moto mwesi aboliana mongindji la Kilisito, awumiga ekelamu eholi. Sambo djande dja gala iyeti, ndenga sambo djande kpaa okowuma sambo poli.
\v 18 Wihoo kpaa widji atie Mwengei. Inde moto otoongosi la ookani mongindji la inde amene la mboka e Kilisito. Atohi koto otomo ate towongosane ookani.
\v 19 Epoti oasi, Mwengei ndondo e Kilisito akoongosaka moki la ookani la inde amene, atidhengali maunga mawu, atohali koto engbundu ewongosake ookani.
\v 20 Iso todjei watoma la ebete e Kilisito. Nda nde Mwengei akoyakongaka la iso. La ebete e Kilisito, tokoyakongoko ate: Wongwani la ookani mongindji la Mwengei.
\v 21 Kilisito moto ongo otiewali lisumu, Mwengei amowumesali lisumu la kole esu, laate towume wato walamu wa Mwengei la mboka e inde.
\c 6
\cl ESUKI 6
\p
\v 1 Nda ekokelaka iso otomo mongindji la Mwengei, iso koto toyakongi la ino ate otigemeiyeni magba ma Mwengei, mbuse oosaneni kole eho.
\v 2 Laate Mwengei asi ate: La engele enge egemeiyani, iookalini, koto la lisio liesi e mokalo, iyogamesalini. Dhenga, sikalandjo nde engele enge egemeiyani, Dhenga sikalandjo nde lisio e mokalo.
\p
\v 3 Totibingesaka wato ekikimi te la loyi loikima, laate watitote loyi liyasake la otomo wosu.
\v 4 La sambo kpaa, tokohekeleke ekpangele ndamu ate todjei tuke dja Mwengei, la ekaleli eyikake mogalia la sambo ngbii, la odjidji, la iyongolo, la magba.
\v 5 La obingani, ndondo e woyogo, ndondo e minga, ndondo e sambo tetelake, ndondo e odjangi ilo la likolo, ndondo e wiengele edjangake wilaka wilakake.
\v 6 Tokoyinyaka koto ndondo e olangi, ndondo e oyewi, ndondo e motema molayi, ndondo e magba, ndondo e elimo satu, ndondo e libalano linge lidjangi ekosako.
\v 7 La engbundu e omeemene, la okulu wo Mwengei, la mboka e wisaneli e sambo ndamu e ewo e lilome la ewo koto e liali.
\v 8 Ndondo e otwa koto ndondo e osambo, ndondo e kombo mbe la mogano koto molamu; nda wato wamoleho kaikonde wato wango wakoasaka womeemene.
\v 9 Nda wato wango watiewane kaikonde wato wango wayewani, nda wato wango wakoguaka kaikoase, wato wango watoni, nda wato wango wahelani, kaikoase watihelane la logo.
\v 10 Todjei nda wato wa magba, ase tokoemeleke engele kpaa, todjei nda wato waotundake, ase tokowaumesaka wato ngbii wato waogumake, nda wato wango wati la ema kaikoase todjei la wihoo kpaa.
\p
\v 11 Todhukoli minoko masu laate toaseleni ino la hoho, Wakolito, mitema masu midhukoania.
\v 12 Otihianeni ndondo esu, ase ohianini ndondo e libalano e motema monu amene.
\v 13 Eho lenge, nda liputi la loyi laho-ikoasaka nda nde atie wana wakeke-ino koto yadhukolani.
\p
\v 14 Otihelaneni la ekaleli e mbe ebete eikima la wato wango wati wagemei. La ebili ate nda wobola wodjei ndondo e sambo ndamu pe obuki pui? Inga koto ngbai la likolo ekowanesana la nde?
\v 15 Alidji, nda wookani wodjei ndondo e Kilisito la Biliali? Inga nda ema moto o sambo ndamu adjei la eho mongindji la moto ongo oti mogemei?
\v 16 Nda ookani wodjei ndondo e tepelo e Mwengei la wilima? La ebili ate iso todjei tepelo e Mwengei o mokalo, ndji ndenge Mwengei aasali ate: “Ikoyabata ndondo ewu, ikosomba koto ndondo ewu, ikodja koto Mwengei owu, iwo koto wakodja wato wa mbai.”
\p
\v 17 Eho lenge, pumbani ndondo ewu, yakatolani la iwo, Likumu aasi ndjongo, otipoteni koto ema enge edjei gbomoko, mbai koto ikooyambani ino.
\v 18 Mbai ikodja sangbanu, ino okodjani wana wa mbai wa pele la wa wali, Likumu moto okondji okulu kpaa nde oasi ndjongo.
\c 7
\cl ESUKI 7
\p
\v 1 La eho, nda edjei iso la mawuna maho, wamanima wa libalano, toyalangese la gbomoko kpaa e wenge koto e molimo. Toenesake ate tokomowangaka Mwengei laate wosatu wosu wodjee wungo woengi.
\p
\v 2 Tohekeleni iso ibete la mitema manu. Tomokeleliti moto obe, tomobitesiti moto, tomolakeliti moto.
\v 3 Itiasaka ndjongo laate iokweseni ino. Laate ilongoyi oasi eho liwoso ate odjeini ndondo e mitema masu la logo, la odjei koto la mokalo mongindji la iso.
\v 4 Ikoasaka la ino la hoho koto la omeemene. Ikoyaganaka la loyi enu. Itumi la obondisani, itumi la mwemu ngbii la odjidji kpaa wungo wokoeneke iso.
\p
\v 5 Ango ewumali iso la Masedonia, wenge wasu witihomali, todjali oeni odjidji e ndenge kpaa, kindo edjali saa, owangi ndondo e motema.
\v 6 Kaikonde Mwengei, ongo okobondjisaka wango wagenakoli wenge, atobondjisali la owumi wo Tito.
\v 7 Eti djaali sa la owumi wonde, ase la libondjisi linge inde abondjisamali la eho la loyi enu, la ndenge atokpalelali iso alidji mboli e ehoha etetelake e ino, magba manu, egalela koto e ino la loyi e mbai. Ndjongo iyemelali alidji oyeti.
\p
\v 8 Eho lenge inga te ate iokesalini ino magba la ekpata e mbai, itiasumbwaka la loyi laho. Inga te ate la lipoteli iyasumbwali la loyi laho, ieni ate ekpata eho eokesali ino magba, inga te ate la engele ekeke.
\v 9 Mbai idjei sikandjo la mwemu, iti sa laate ookalini magba, ase laate ookalini magba tee la okukoli motema. Laate ookalini magba mango maengani la mwano ma Mwengei, laate otiwungeseni ema te eikima atie iso.
\v 10 Laate magba mango maokani la mwano ma Mwengei ekokpalaka la okukoli motema la mokalo mungo moto atiene eho obe mbuse. Ase magba ma moki ekowotaka logo.
\v 11 Laate dhenga lu loyi pendja: magba mango maokalini ino eokani la mwano e Mwengei, ewotelali ino, nda olimbesi, nda oyalangesi, nda limemu, nda mbangi, nda ehoha etetelake, nda egalela, nda owongisani e obe! La sambo kpaa, ino oyaenesalini ate olangini la sambo kpaa.
\v 12 Inga iodhingelalini ino, itikelali eho la loyi e moto ongo okelali obe, te la moto ongo wamokelelali obe, ase nde olimbesi enu atie iso eenane la hoho ndondo enu la maiso ma Mwengei.
\v 13 Eho lenge iso tobondjisani. Kaikoase, longosa obondjisani wosu, toemelali alidji ngbii la oyeteli la loyi e mwemu mo Tito, la ebili ate molimo monde mowumi la mohandja la kole e ino kpaa.
\v 14 Laate inga iyagana ma keke atie inde la loyi e ino, itiaokese soni. Nda esisiga iso oaseli ino sambo kpaa la omeemene, ndenge kikima oyagani wosu liwoso la Tito eenani ate edjei enge e meemene!
\v 15 Alidji, libalano lande e motema enge akoobalakani ino etumi alidji, ango akobunduaka etemeya wonu kpaa, ndenge omoyambalini la owangi koto la odjadji.
\v 16 Idjei la mwemu laate la sambo kpaa, iengi odjei la egalela la loyi wonu.
\c 8
\cl ESUKI 8
\p
\v 1 Wamanima, tobali weeweni nda ndenge magba ma Mwengei maeneni ndondo e mangomba ma Masedonia.
\v 2 La engele e omekani weesi wosunu ndondo e odjidji, mwemu mowu esungu koto wotundake wowu etetelake ekelali ate likao lawu lieenene alidji ngbii.
\v 3 Laate ekelanali la odhendeli maengi mawu, ikototoloko eho, oyeti te maengi mawu,
\v 4 ango iwo amene wadjakali oyakongi la iso ate wakondje mano ndamu ehekeleke wilaka wa magba la ohi koto mawo la otomo wungo woengali okelani la kole e wasatu.
\v 5 Wakelali loyi wungo weyetali mwano mosu, liwoso liwoso wayahali atie Likumu koto atie iso la mwano mo Mwengei.
\v 6 Eho etotomali iso la omohekeli Tito egalela ate, nda inde moto apotesali eho ndondo e ino, ndji inde koto asukese atie ino wotomo wuho e ohekeli wihoo wa libalano.
\v 7 Kaikonde, ndji ndenge etumuni ino la wihoo kpaa, la ogemei, koto la engbundu koto la oyewi, koto la etingia kpaa, la libalano wungo iso tokoobalakani ino, yahekeleni la enge otomo ehekeleke wihoo wa magba.
\p
\v 8 Iyohitini mopele, ase la loyi e etingia e wadji wato koto la loyi eyewake womeemene e libalano lanu, nde ikoasaka ndjongo.
\v 9 Laate oyewini magba masungu e Likumu lasu Yesu Kilisito, ate inga te ate adjaali moto e ogumake, aumali moto o otundake la loyi e ino, laate owumeni wato wa ogumake la mboka e otundake wonde.
\v 10 Ndjongo ikoohakani mamungo ma mbai ndondo e wu loyi: laate lu loyi edjei la gbondo atie ino, laate eyetiga elanga esi otidjaakalini okeli, ase odjaakalini koto obali okeli.
\v 11 Sikalandjo, dheeni koto okeli eho, laate ndji ndenge ekelalini ino obangu la loyi wungo wodhendji obali okeli, ndenge kikima dheeni okeli loyi luho, la odhendeli enge edjei ino la eho.
\v 12 Inga liwoso liwoso ehoha etetelake edjei, ekogemeiyana ngbii pendja la odhendeli enge moto adjei la eho, ase te la odhendeli enge moto ati la eho.
\v 13 Laate ibaliti ate etidjee petee atie wadji. Ase odjidji atie ino.
\v 14 Ase ate, la mboka e owokani, wihoo winge wiyeti ngbii atie ino edhihe sikala otundake wowu, laate wihoo winge wiyeti ngbii atie iwo edjee koto odhihi otundake wonu, ndjongo weengani wodje.
\v 15 Ndji ndenge edhingana ate: “Moto ongo odjakali la ngbii atidjakali la ngbii oyeti, koto ongo odjakali la maa keke atidjakali la maa keke oyeti.”
\p
\v 16 Tomowongosele Mwengei pambo la ndenge abati la motema mo Tito etingia ndenge kikima atie ino.
\v 17 Inde agemei loyi eongi iso atie inde, ase, nda edjei inde la etingia etetelake, akodjaaka atie ino la mwano monde amene.
\v 18 Tokomotomaka ebete eikima la mangbasu ongo mogano monde la loyi e mboli ndamu eyandjani la mangomba kpaa.
\v 19 Aleeti, mangomba wamooni laate adje miino osu e okendo la loyi e likao laho e magba enge eongi la iso okawoli la loyi e otwa e Likumu koto la oenesi ehoha etetelake esu ekelake.
\p
\v 20 Tokokelaka ndjongo laate totoni ate moto atote loyi etoaselake iso obe la loyi e enge likao lisungu linge eongi la iso okawoli.
\v 21 Iso tokowongeleke sambo la omeemene, te ndji la maiso ma Likumu, ase la maiso ma wato kpaa.
\v 22 Alidji, tokowatomaka mongindji la mangbasu ongo toeneli mbala la mbala la sambo ngbii ate adjei la etingia, ase ongo sikala adjei la etingia ngbii oyeti laate akoobatelakani ino motema.
\v 23 Kaikoase inga popo edjei la loyi e Tito, inde adjei miino o mbai koto moto ongo ikokelaka la inde la kole enu; inga koto la loyi e wamangbasu, iwo wadjei watoma wamangomba koto otwa e Kilisito.
\v 24 Wadhendesani elembeteli e libalano linge lidjei ino la laho koto la sambo djinge iyagali iso la loyi enu, liwoso la mangomba.
\c 9
\cl ESUKI 9
\p
\v 1 Kaikoase la loyi wungo wodhendji otomo wuho la wasatu, eti te la kole ate iyodhingeli ino.
\v 2 Laate iyewi ehoha enu enge ekoyaganaka mbai la eho atie wato wa Masedonia la loyi enu ate Akaya eyawongeli ekeliga sikala elanga esi. Koto mogalia monu mosusoli ngbii ewu.
\v 3 Ase ikowatomaka wamangbasu, laate oyagani wungo ekoyaganaka iso la loyi enu etidjee ohola la loyi laho, ase nde oyawongeleni, ndji ndenge eyasali mbai eho ate okoyawongelani.
\v 4 Inga te ndjongo, edje la nda ndenge, inga wato wa Masedonia wadja mongindji la mbai koto waogbotia ino oyawongelitini, iso-itoni oasi ino-tooke soni la ndenge ebatali iso motema ndjongo.
\v 5 La eho, iyeneli olamu ohekeli mogalia la wamangbasu wadjee atie ino liwoso, wawongele koto libela la libela likao lanu e motema molamu, enge esilali owunani liwoso, laate la ndenge eho, elambelane nda likao enge ehekelani la motema molamu, ase te nda ema enge epuesani.
\p
\v 6 Ase la likao laho, moto ongo otionaka ngbii, atibuka koto ngbii; moto koto ongo okoonaka ngbii akobuka koto ngbii.
\v 7 Moto la moto akele ndenge emungoyi inde la motema monde, te la ondungwani koto te la ohilani, laate Mwengei akobalaka moto ongo okohekeleke la mwemu.
\v 8 Mwengei aengi okeli ate magba masungu mande kpaa etume atie ino, ate, ango edjei ino engele kpaa la enge eengi la ino la sambo kpaa, odjeeni la eho ngbii pendja la tomo kpaa ndamu.
\v 9 Ndji ndenge edhingana ate: “akawi wihoo ngbii, ahekeli wato wa otundake, olamu wonde wokowumua libela la libela.”
\p
\v 10 Mwengei ongo okohaka mooni mogono ngbii la okoke koto elakake akoha koto akotalia mogono laate ooneni, akotalia koto pukapuka ngbii e sambo ndamu enu.
\v 11 La sambo kpaa okotumakani la ogumake la ndenge e likao linge likopumbaka la mboka esu pambo atie Mwengei.
\p
\v 12 Laate otomo wungo okokelanaka la wolamu e wato kpaa, etidjee sa la oengesi olamu wihoha e wasatu, ase edjei laate pambo ngbii ehekelane atie Mwengei.
\v 13 Laate la elembeteli enge otomo wuho ekohekeleke, wakomohaka Mwengei otwa laate ino okotemeiyakani mboli ndamu enge emodhendji Kilisito, ndenge ekoaselakani ino eho la hoho ate okotemeiyakani, koto laate odjeini la okawi la makao manu atie iwo koto atie wato kpaa.
\v 14 Mongindji e oyakongi wungo wokokelaka iwo la loyi enu wakookaka koto ino ehoha etetelake la loyi e magba masungu e Mwengei enge eyeti atie ino.
\v 15 Pambo la Mwengei la loyi e likao lande esunu, enge eengiti olimbolani.
\c 10
\cl ESUKI 10
\p
\v 1 Sikandjo, mbai, Polo, iyakongi la ino la motema mo dee koto la magba ma Kilisito, inga te ate ikoeneneke moto mokeke ndondo enu, kaikoase engele enge eti mbai ongo ikoaselakani ino sambo la mogalia!
\v 2 Iyakongi la ino, otitomeni mbai ate iinye mogalia, ango ekodja mbai ongo, ndenge eyani mbai ototi witeneli witetelake atie wango wakotoeneke nda nde tokosombaka sa ndenge edjei iso la wenge.
\v 3 Laate inga te ate tokokalaka la ndenge e wenge, totisanaka kindo la odhendeli ndenge edjei iso la wenge.
\v 4 Laate wisaneli wa kindo djasu widjei la okulu wungo wodji atie Mwengei la okwesi wihoo winge wimaani la oteteli.
\v 5 Laate tokokweseke mamungwene koto ema kpaa edjambani enge ekoyamalelaka oyewi wo Mwengei, todjei koto owumesi lomungo kpaa mohelani laate emotemeiye Kilisito.
\v 6 Toyawongeli koto la ohekeli etumbu la sambo kpaa edjangake etemeiya, ndji engele enge etemeiya enu ekoenga.
\p
\v 7 Okodhendakani ema kpaa nda ekweneneke eho saa. Inga moto mwesi akoyaenaka ate amogemei Kilisito, ayewe koto inde amene lu loyi: Ate nda emogemei inde Kilisito, iso koto tomogemei.
\v 8 Laate inga te ate eengi mbai oyagani ma ngbii la loyi e wokumu wungo Likumu atohekeli iso la omaani wonu ase te la obukiani wonu, itiokisana soni.
\v 9 Ibaliti odjei la ehoha e oluki owangesi ino la madhingo ma mbai.
\v 10 La ebili wakoasaka ate: “Wadhingo mande maliti ndowu la otetelake, ase odjei wonde amene moto edjei la mageni eyaseli ende edjei pamba.”
\v 11 Ewongi moto ongo okoasaka ndjongo ayewe olamu ate, ndji ndenge iso todjei la wingbundu wasu la wikpata engele eti iso ongo, ndji ndenge tokodja la tomo engele ekodja iso ongo la ino.
\p
\v 12 Totimekaka oyabati la mongindji e wadji inga oyaenganesi la wadji wango wakoyaaselaka iwo amene. Meemene, ndenge wakoyamekaka la iwo amene la oyaenganesi la iwo amene wati la lokenge.
\v 13 Atie iso, totiayagana la saa e milelo e ebete enge watohali, ase la odhendeli molelo e moki mokeke mungo Mwengei atohali iso, ndenge awumesali eho tee atie ino.
\v 14 Meemene, tokiti lihele oyeti molelo nda nde totiwumali tee atie ino, ango todjaaki otiesakoli mboli ndamu enge edhendji Kilisito.
\p
\v 15 Totiyaganaka la saa e molelo e ebete enge watohali iso, la tomo mitetelake e odji moto, ase todjei nde la mwano ate, nda ogemei wonu ekobekaka, towume wato wasungu ndondo enu la odhendeli moki mokeke mosu. Ndjongo tokowuma wato wasungu oyeti.
\v 16 Laate tokotiesakola mboli ndamu la miki minge midjei lihele oyeti ino, laate totiyagane la ebete enge ewongeliga moto odji.
\v 17 Ase nda eyasi madhingo ma Mwengei: “Moto ongo okoyaganaka, ayagane la Likumu.”
\p
\v 18 Ndjongo, eti ate moto ongo okoyaaselaka inde amene nde agemeiyani, ase nde moto ongo Likumu amogemei.”
\c 11
\cl ESUKI 11
\p
\v 1 Ibali oheleni motema la ma boli e mbai. Kaikoase, meemene okonangakani motema la sambo dja mbai.
\v 2 Laate ikookelakani ino zua, zua enge eokani la mwano mo Mwengei, laate mbai pendja iwunali oikesi ino la molome sa mwesi, laate iyopumbeseni ino nda moseka mwese olangi atie Kilisito.
\v 3 Ase ikowangaka ate edje la nda ndenge, nda ndjo emogulali Eba la mamungwene mbe djande, mamungene manu ebitesane koto elongwe la omeemene koto la olangi la wikaleli winge wiyongi la Kilisito.
\v 4 Laate meemene, inga moto adja otiesakoli Yesu ongo osomboni la ongo iso tomotiesakolali, inga koto ototani elimo enge esomboni la enge etotalini ino, inga koto mboli ndamu enge esomboni la enge eokalini ino, nangakani motema la sambo e moto oho, la odjangi otenani.
\v 5 Laate ieni ate edjeiti te la loyi liesi linge mbai idjei sese la watoma wasungu.
\v 6 Ase inga ehaneliti mbai la oasi, meemene iti ndjongo la oyewi. Kaikoase la ndenge kpaa toenesali ino eho la hoho la sambo kpaa.
\p
\v 7 Inga koto ikelali nde obe nda eyadjilikisali mbai laate ino odjambane? La ndenge iyotiesakolalini ino mboli ndamu e Mwengei la libalano, odjangi oongi liputi?
\v 8 Mangomba madji, iwapuesali enge edjaakali iwo la eho la ndenge egemeiyali mbai okondji wihoo wau laate oyogameseni.
\v 9 Kaikonde ango edjakali mbai mongindji la ino koto idjangali, itimokpalesali moto te moikima mokpali, la ebili ate wamangbasu wango walongwali la Masedonia wahekelali mbai wihoo ngbii winge widjangali mbai. Itonali la ndenge kpaa oliti ndowu atie ino ikodja koto ndji ndjongo.
\v 10 Engele kpaa enge womeemene wo Kilisito ekodja ndondo e mbai, oyagani kpaa enge ekoyaganaka mbai la loyi e gbata e Akaya etisila.
\v 11 Lande easi mbai ndjo? Laate itiobaleni ino? Mwengei ayewi ate iyobalini nee.
\p
\v 12 Ikodjaa ndji okeli enge ekookelelakani mbai, laate isukese ekosako e wango wadjei la ehoha e moleho la oenesi ate waengani la iso ndondo e otomo wungo wokoyaganaka iwo.
\v 13 Wato waho wadjei watoma wa moleho, wakeli wa tomo e ohengeli, wango wokoyapumbesaka nda watoma wa Kilisito.
\v 14 Loyi ehuelake eti. Laate Etota inde amene akoyainyaka nda ahumbwa e liwusawuse.
\v 15 Ndjongo, eti loyi losungu inga tuke djande koto wakoyainyaka nda wato walamu. Ase gboo ewu ekodja la obiliani la tomo djau.
\p
\v 16 Iyaasi aleeti, eengiti ate moto mwesi adhenge mbai nda moto okoni boli. Kaikoase inga omungwani ate idjei ndjo, gemeiyani mba te ndenge eho nda boli, laate mbai koto ienge oyagani ma keke.
\v 17 Enge ekoasaka mbai, itiasaka eho la ndenge etutiake Likumu, ase nda woboli, la oyabateli motema oyeti molelo mungo mokoeneneke atie moto ongo okoyaganaka.
\v 18 Nda wato ngbii wakoyaganaka la wenge, mbai koto okoyagana.
\v 19 Laate ino okohelakani motema la mwemu pendja, e sambo e wato wa boli, la ebili ate odjeini wato wa lokenge.
\v 20 Okonangakani motema la sambo e moto ongo okoowumesakani ino tuke, moto kpaa ongo okolakaka wilaka winge widjei ino la eho, moto kpaa ongo okoyadjambaka likolo la ino, moto kpaa ongo okoobingakani la mbanda.
\v 21 Idjei la soni e oasi, toyinyali mageni la loyi luho. Ase inga moto odji akoeneseke mogalia la loyi esi ndjo-ikoasaka la woboli-mbai koto ikoeneseke mogalia la eho.
\v 22 Wadjei Waebele? Mbai koto idjei. Wadjei wa Isalayele mbai koto. Wadjei la litoto e Abalayama? Mbai koto.
\v 23 Wadjei tuke dja Kilisito? Ikowongosaka nda moto okoni boli, mbai iyeti pendja: La sambo tetelake ngbii oyeti, la wawoyogo ngbii oyeti, la kutuki oyeti molelo, la owumi ahue e logo mbala la mbala.
\v 24 Mbala itano, Wayuda wabingali mbai pimbo tuku inei longosa esi.
\v 25 Mbala isato ibinganali mabolo, ibinganali mabukeli mbala kikima, mbala isato ilindali la andondoli, iyetesali likolo liikima la wuse woikima ndondo e malia malindake.
\v 26 La okendo mbala la mbala, la mabhoma e wiwale, la mabhoma e wato wayiwa wango wakoyiwaka la mboka, la mabhoma mango malongoyi atie wato wa mbai amene, la mabhoma mango malongoyi atie wadjidji, la mabhoma ndondo e gbata, la mabhoma ndondo e esobe, la mabhoma ndondo e libandji, la mabhoma ndondo e wato wamoleho.
\v 27 La otomo etelake, la oameli koto, la walikolo ondjangi ilo mbala la mbala, la ndjala koto la ehoha e malia, la odjangi olaki wilaka mbala ngbii, la piyo la lingbengbele.
\v 28 Longose ndjinge sambo dja saa, edjei la ema esi ekoeneseke mbai odjidji masio kpaa, oyasumboyi la loyi e mangomba kpaa.
\v 29 Ndai ogenakoli, ase mbai igenakoliti? Ndai osakeli, ase ihutiti la limemu?
\p
\v 30 Inga ewongi la oyagani, ikoyagana la sambo djinge idhendji mageni ma mbai.
\v 31 Mwengei koto Wawa e Likumu Yesu, ongo oengi la mogano libela la libela ayewi ate itihengaka.
\p
\v 32 Ongo la Damasi, likumu e gbata e likumu Aletasi adjaali obaneyi moki mo wato wa Damasi la oheli mbai.
\v 33 Ase wadjimbali mbai ndondo e modjangi mwesi mo mbohi, la lininisa linge lidjaali la etutu, ase itilali la mawo mande.
\c 12
\cl ESUKI 12
\p
\v 1 Iyengi oyagani, eti la kole, ase ikoyeta nde la wieneneli wikamwake koto la wieneseli wa Likumu.
\v 2 Imoyewi moto mwesi ongo, la liboliani mongindji la Yesu Kilisito, ekeliga wilanga liomu la inei, inga la wenge, iyewiti, inga koto saa e wenge, iyewiti, Mwengei moto oyewi- adjambanali la esuki esato e likolo. Inga akeli la wenge e inde inga koto te la wenge e inde, mbai iyewiti, ase Mwengei oyewi.
\v 3 Imoyewi moto oho-inga la wenge inga koto saa e wenge, iyewiti, Mwengei ayewi-
\v 4 ate akpalanali ongo la paladiso aokali koto wingbundu winge wiengiti oasani, enge ehaniti mboka la moto akpome eho.
\v 5 Ikoyagana la loyi e moto oho, ase itiyagana la loyi e mbai amene, longosa ndji mageni ma mbai.
\v 6 Inga ibala oyagani mbai amene, itidja ekete, laate ikoasa nde meemene. Ase itoni, laate moto mwesi atitaliele mbai djeeti sambo oyeti enge ekoeneke inde atie mbai te enge ekookaka inde atie mbai.
\v 7 Ndji ndenge wieneseli wiyeti ngbii. Eho lenge, laate itiyadjambe oyeti molelo, wahali mbai keke la wenge, ahumbwa mwesi e Etota, laate adjake ndji obamboli mbai, la ebili ate itienge oyadjambi oyeti molelo.
\v 8 Mbala isato iyatombali la Likumu ate amolongose lihele la mbai.
\v 9 Ase inde aasali la mbai: “Magba masungu ma mbai atie owe eengi ndjongo. Laate okulu wo mbai ekowumaka la oengi ndondo e mageni. La eho, la mwemu oyeti, ikoyagana nde la loyi e mageni ma mbai, laate okulu wo Kilisito wodje nda hema likolo la mbai.
\v 10 La ehele ndenge ikoemeleke la magani, la wiliko, la iongolo, la odjidji, la magba, la loyi e Kilisito. Laate engele edjei mbai la mageni, engele eho pendja nde edjei mbai la oteteli.
\p
\v 11 Idjakali boli ango edjakali mbai oyagani, ase ino otonesalini mbai. Laate ino nde oengalini oaseli. Laate itiyaenesali inga te la loyi loikima ate idjei sese e watoma wasungu wanu, te ndenge eti mbai ema.
\v 12 Wilembo e watoma eenesanali ndondo enu la odjei la mohandja e ndenge kpaa, la wilembo koto la sambo kamwake enge ekoeneseke sambo djinge ikodja koto la tomo e okulu.
\v 13 La nda loyi linge liumalini ino sese e mangombna madji mango matikali! Inga etidje sa la loyi lungo ate mbai itilitali ndowu atie ino. Limbesani mbai la ungo wodjangi womeemene!
\p
\v 14 Denga! Ehele edjei mbala esato ekoyawongelaka laate idje atie ino, kaikoase itidja mokpali monu. Laate itilukaka wihoo winge widjei ino la eho, ase ino amene. Laate eti wana nde waengi oyisi wilaka la loyi e wawoti wau, ase wawoti la loyi e wana wau.
\v 15 La ndenge e mbai, la mwemu eyetelake, ikohekele wihoo wa mbai kpaa koto ikohekele kpaa la loyi e milimo manu. Inga ikoobalakani ino ngbii ndjo, iengi nde obalani ma keke?
\p
\v 16 Inga te ndjongo, itiokpalesalini mokpali, kaikoase, okoasakani ate idjei la lokenge e be koto iototalini la lokenge e ekosako.
\v 17 La wato wango iwatomi atie ino, itiolakelalini la mboka e moto moikima, te ndjongo?
\v 18 Iyakongali la Tito koto imotomali mangbasu adje mongindji la inde. Tito atiolakelalini te ma keke, te ndjongo? Tosombali la elimo eho esi, te ndjongo? La obilei lipopo eikima, te ndjongo?
\p
\v 19 OKomungwakani ate ehele gala tokolukaka oyalongesi atie ino? Edjei liwoso la Mwengei nde tokoasaka la loyi e Kilisito. Ase, wamanima wa libalano, sambo kpaa idjei laate omaaneni.
\v 20 Idjei la mbangi, ate, la owumi wo mbai atie ino itiogboteni ndenge ebali mbai koto itienene atie ino ndenge ebali ino, ase idjei la mbangi ate igbote nde mosio, djua, mihela, ogulani, otongoni, ondungwani, okundji la elolo, ewedje.
\v 21 Idjei la mbangi laate ango ekowuma mbai alidji, etimbala Mwengei o mbai aengi ookesi mbai soni ndondo enu, koto iengi oleli la loyi e wato ngbii wango gala wakelali masumu ase watikukolali mitema la onalili wou koto pite koto esombeli e soni enge eyahekeleli iwo la eho.
\c 13
\cl ESUKI 13
\p
\v 1 Ehele edjei mbala esato enge ekodjaka mbai atie ino. La monoko mo watotoli wale te wasande nde loyi kpaa eengi ogemeiyani.
\v 2 Iyaaselali eho poo koto, nda nde idjei alidji ongo la mbala ewale kaikoase sikalandjo iti kine ongo, ikoasaka libela la wango wakelali masumu liwoso koto la wadji kpaa wango watikali, ate inga pendja idja alidji, itimodhee moto te moikima.
\v 3 La ebili ate ino okolukakani sambo djinge ikoenese ate Kilisito akoasaka ndondo e mbai. La ndenge eho. Inde ati moto o mageni atie ino, ase adjei moto o okulu ndondo e ino.
\v 4 Ndjongo, Kilisito abakemali la ekulusu la loyi e mageni, ase adjei la mokalo la loyi e okulu e Mwengei. Edjei koto meemene ate todjei wato wa mageni mongindji la inde, ase tokodja la mokalo mongindji la inde la loyoi e okulu e Mwengei atie ino.
\p
\v 5 Yamekani ino amene inga odjeini ndondo e ogemei. Yadhendani inga odjeini nda ndenge. Ino otiyayewakani ate Yesu Kilisito adjei ndondo la ino? Aasa nde inga odjeini nde wato wango walongosani.
\v 6 Imungoi olamu ate iso, toti wato wango walongosani.
\v 7 Sikandjo, toyakongi la Mwengei ate otikeleni loyi luesi e mbe, eti ate iso amene toenene nda wato wango wagemeiyani, ase nde laate ino okelakeni enge edjei olamu amene, inga te ate iso toeneni wato wango watitolane.
\v 8 Laate toengiti okeli ema teeti la oamaleli omeemene, ase ndji enge edjei la loyi e omeemene.
\v 9 Iso tokoemeleke masio kpaa makodjaka ino la okulu Inga te ate iso todja te la mageni. Linge likoongoko iso la lu loyi edjei onanolani wonu.
\v 10 Dhenda ndenge eho nde edhingi mbai ndjo te ndenge edjei mbai lihele: Laate, ango ekouma mbai, itienene nda moto o monga, la otutei okumu wungo wohekeli Likumu mbai e wongelake ase eti ate ebitesake.
\p
\v 11 Wamanima, la osukesi, abatani la mwemu, wongeleni sambo djanu, helanani mawo manu la ookani koto la logoo. Mwengei ongo obali wato kpaa koto ongo obali logoo akodja la ino.
\v 12 Hananani mobale la ombomboni esatu. Wasatu kpaa waohekelini mobale.
\v 13 Magba ma Likumu Yesu Kilisito, koto libalano la Mwengei koto oyabondji e elimo satu edje la ino kpaa.