See in Reader
580 lines
55 KiB
Plaintext
580 lines
55 KiB
Plaintext
\id 1CO
|
|
\ide UTF-8
|
|
\h 1 Wakolito
|
|
\toc1 1 Wakolito
|
|
\toc2 1 Wakolito
|
|
\toc3 1co
|
|
\mt 1 Wakolito
|
|
\c 1
|
|
\cl ESUKI 1
|
|
\p
|
|
\v 1 Polo, moto ongo owelani laate idje toma e Yesu Kilisito la mwano mo Mwengei, koto Sositene mangbasu,
|
|
\v 2 atie lingomba e Mwengei enge edjei la Koliti, atie ino wango wasatisani ndondo e yesu Kilisito, enge ewelani ino laate odjeni wasatu, mongindji la wango kpaa kakodhumbiaka wiyati kpaa kombo e Likumu lasu, Yesu Kilisito, Likumu lawu koto osu.
|
|
\p
|
|
\v 3 Ngolu osungu pe logoo e Mwengei Sangbasu koto la Likumu Yesu Kilisito edjeni la ino.
|
|
\p
|
|
\v 4 Ikomohaka Mwengei pambo engele kpaa la kole enu la ngolu wosungu e Mwengei enge eeneselali inde ino la mboka e Kilisito.
|
|
\v 5 Laate awowumesalini wato wa ogumake la loyi kpaa enge emodhendji inde, la liengi kpaa eyasake koto la oewi kpaa,
|
|
\v 6 La ndenge pe litotoli la loyi e Kilisito emaani ngbi atie ino.
|
|
\v 7 Inga totutia olamu, odjangitini te nano esi, ango ekolambelaka ino la motema mohelake lieneseli e Likumu lasu Yesu Kilisito.
|
|
\v 8 Akootetelisani tee la gboo, laate otihekeleni mboka la loyi te esi enge eengi iwo o opundjini ino la eho lisio la Likumu lasu Yesu Kilisito.
|
|
\v 9 Mwengei adjei meemene, inde moto owelali ino ate odjeeni mongindji la mana onde Yesu Kilisito Likumu lasu.
|
|
\p
|
|
\v 10 Iyatombi la ino, wa manima, la kombo e Likumu lasu Yesu Kilisito, ate oasakeni ino kpaa la ookani, pe ate okawani etidje ndondo e ino, ase djaakani nde liwoke liikima la esombeli eikima koto la mamungwene maikima.
|
|
\v 11 Laate wato wa monguta mo Kolowe wandjaseli mbai sambo djanu, wamanima, ate okawani wodjei ndondo e ino.
|
|
\v 12 Ibali oasi ndjo: mwesi mwesi onu akoasaka ate: Mbai idjei moto o Polo, ase mbai o apolosi, ase mbai moto o Kepa, ase mbai moto o Kilisito.
|
|
\v 13 Kilisito akawani? Polo abakemali la ekulusu la kole ino? Inga, opatalini la kombo e Polo?
|
|
\v 14 Ihi pambo atie Mwengei la ndenge itimopatisali moto te moikima ndondo enu, longosa ndji Kilipusu iwo la Gaiyusu.
|
|
\v 15 Laate moto toeti atiase ate opatalini la kombo e mbai.
|
|
\v 16 Ipatesali koto liwota la Setefanasi. Owalongosi iwo, iyewiti inga imopatisali moto odji.
|
|
\v 17 Laate Kilisito atitomali mbai la opatisi, ase otiesakoli mboli ndamu, te la lokenge eyaselake, laate ekulusu e Kilisito etisile okulu.
|
|
\p
|
|
\v 18 La ndenge eho, mwendi mo ekulusu modjei boli atie wato wango wabitani, ase iso wango wakali, modjei okulu wo Mwengei.
|
|
\v 19 Laate edhingani ate: ikobitisa lokenge e wato wa lokenge koto ikosisa akeli e wato wa akili.
|
|
\p
|
|
\v 20 Eni edjei moto o lokenge? Eni edjei eloko e pui? Eni edjei moto okokia la ehele mwengele? Mwengei atiumese lokenge e moki boli?
|
|
\v 21 Laate nda lokenge e Mwengei, moki la mboka e lokenge laho, eyewiti Mwengei, Mwengei aeneli olamu ate la mboka e boli e ema enge ekotiesakolamaka, akalese wango wakogemeiyaka.
|
|
\v 22 Wa Yuda wakoongoko wilembo, Wageleki wakolukaka lokenge.
|
|
\v 23 Ase iso, tokotiesakolaka Kilisito ongo obakemali la ekulusu, atie Wayuda lidjei loi lobe, atie wapagano edjei boli.
|
|
\v 24 Ase, atie wango wawelani, Wayuda la Wageleki, Kilisito adjei okulu wo Mwengei koko lokenge wo Mwengei.
|
|
\v 25 Laate ema e Mwengei enge edjei boli, edjei la lokenge oeti wato, koto ema e Mwengei enge elembi, edjei la okulu oeti wato.
|
|
\p
|
|
\v 26 Laate okoenekeni owelani wungo inde aoweleni ino, wamanima: ate te wato ngbii wa lokenge e ndenge e moini nde wawelani. Te wato ngbii wa okulu. Te wato ngbii wa mogano.
|
|
\v 27 Ase Mwengei aoni witondo wa ehele moki modjei boli, laate aenge ookesi wato wa lokenge soni, pe Mwengei aoni witondo wa mu moki mungo modjei la olembi, laate aenge ookesi miki mitetelake soni.
|
|
\v 28 Mwengei aoni witondo wa pamba wa moki koto witondo winge witi la kole, witondo winge witi, laate aumese pamba witondo winge widjei.
|
|
\v 29 Laate moto tueti o moeni atiyagane la maiso ma Mwengei.
|
|
\v 30 Edjei la nano e inde nde ewumi ino wato wa Yesu Kilisito, ongo oumi atie iso lokenge wungo wodji atie Mwengei, koto womeemene koto osatisani koto osombani.
|
|
\v 31 Laate edje pendja ndenge edhingani ate,” Moto ongo okoyaganaka, ayagane la Likumu.”
|
|
\c 2
|
|
\cl ESUKI 2
|
|
\p
|
|
\v 1 Ngambo e mbai, wamanima, ango edjaali mbai atie ino, itidjaali la ekpomeli e kamwesake, inga la lokenge ekamwesake laate iyotiesakoleni ino liiseli mosatu e Mwengei.
|
|
\v 2 Laate itotali eteneli eyewake ema teeti ndondo e ino, longosa ndji Yesu Kilisito, pe inde abakemali la ekolusu.
|
|
\v 3 Idjali atie ino la olembi pe la mbangi koto la odjadji.
|
|
\v 4 Pe eyaseli e mbai koto sambo djinge itiesakolali mbai etidjaakali la engbundu e ogemeisi e lokenge, ase la tomo djinge edjaakali oenesi elimo pe okulu,
|
|
\v 5 laate ogemei wonu wodje, te la lokenge wo wato, ase la okulu wo Mwengei.
|
|
\p
|
|
\v 6 Kaikoase, tokoaselaka lokenge atie wato wango waoloyi, ase te lokenge e ehele engele inga pe te enge e makumu ma maa masio, wango waengi oumi pamba.
|
|
\v 7 Ase tokoaselaka lokenge e Mwengei ndondo e liiseli mosatu, lokenge wungo woisani, enge Mwengei aanali la loyi e otwa wosu liwoso wato wabate maongeseli mawu.
|
|
\v 8 Lokenge wuho, moto te moesi e makumu e maa masio ayewala eho, laate inga wayewali eho, nda watimobakali Likumu ongo otumi la otwa la ekulusu.
|
|
\v 9 Ase ndji ndenge edhingani: “Liso litiene, pe litoyi litioke, pe etidjake pe la motema mo moto, sambo djinge Mwengei aongela la loyi e wango wakomobalaka.”
|
|
\p
|
|
\v 10 Laate iso nde Mwengei aenesi eho la mboka e elimo ende, laate elimo ekolukalukaka ndondo e sambo kpaa, edjee te sambo elindake e Mwengei.
|
|
\v 11 Laate ndai ndondo e wato ayewi mabundo ma moto inga etidje ndi molimo mo moto mungo modjei atie inde? Ndenge kikima pe moto tueti ayewi sambo dja Mwengei, longosa ndji elimo e Mwengei.
|
|
\v 12 Ase iso, tototiti elimo e moki, kasi elimo enge edji atie Mwngei, laate toyewe sambo ndamu etohekeli Mwengei la nano ende.
|
|
\v 13 Pe tokoaselaka sambo djaho, la engbundu enge etitiesane la lokenge e wato, ase la linge litiesani la elimo, ango tokowanesaka sambo dja elimo la engbundu e elimo.
|
|
\v 14 Ase moto o moyeni atitemeyaka sambo dja elimo e Mwengei, laate lidjei nda boli la maiso mande, pe aengiti oyewi eho, laate e eengi odhengani la ndenge e emolimo.
|
|
\v 15 Moto ongo osombesami la elimo, akodhendaka sambo kpaa pe inde amene atisambesama la moto te mokikima.
|
|
\v 16 La ndenge eho, ndai ongo oyewi lobundo e Likumu laate amwenye inde?
|
|
\c 3
|
|
\cl ESUKI 3
|
|
\p
|
|
\v 1 La mbai, wamanima, itiengali oasi la ino nda wato wa elimo, ase nda wato wa moyeni, nda wana wakeke la ndondo e Kilisito.
|
|
\v 2 Iyohekelelini ino mawele, ase te ema elakake, laate otidjakaliyoni pendja la okulu; te sikalandjo pe otiniyo la okulu.
|
|
\v 3 Laate odjeiniyo ndji wato wa moyeni. La ebili ate nda djuwa la mosio edjei ndondo enu, odjeiniyo wato wa moyeni, okosombakani nda ndenge ekosombaka wato, te ndjongo?
|
|
\v 4 Laate ango mwesi asia ate: Mbai, edjei moto o Polo! Pe weeti: Mbai, Apolosi! Otidjeeni ndji wato?
|
|
\p
|
|
\v 5 Ase Apolosi adjei ndai? Polo adjei ndai? Wakeleli wango la mboka ewu owumalini wagemei, nda Likumu ahekeleli moto la moto.
|
|
\v 6 Mbai iyonali, Apolosi aswali malia ase Mwengei adjaali obekesi.
|
|
\v 7 La ehoo moto ongo okoonaka ati ema, ndenge kikima la ongo okosuaka malia, ase ndji Mwengei moto ongo okobekisaka.
|
|
\v 8 Kaikwase moto ongo akoonaka la moto ongo akosuaka malia wadjei ndenge kikima, ase moto la moto akolia liputi lande la otutie otomo wungo okeli inde.
|
|
\v 9 Laate todjei wato wango wakokelaka ebete kikima la Mwengei. Ino odjeini elanga e Mwengei, enge edjei oonani, la monguta mo Mwengei.
|
|
\p
|
|
\v 10 La odhengeli magba masungu e Mwengei enge eenesi inde atie mbai, ibatali moboko nda mobanei dja tomo oholo adjei moto o lokenge, ase oeti moto akomaaka likolo laho. Ase moto la moto ahuake la ndenge enge akomaaka likolo laho.
|
|
\v 11 Laate moto tueti aengi obati maeti moboko longwese ndji enge ebatana, oholo edjei Yesu Kilisito.
|
|
\v 12 Kaikwase, inga likolo e moboko moho moto amayia la wolo, la palata, la mabukeli ma motio, la mabaya, la isoki, la ndele,
|
|
\v 13 tomo la moto la moto ekoenene la hoho, laate wuse ekoenese eho. La ebili ate ekoenene la mboka e misa. Pe misa nde ekoenese ndenge otomo e moto la moto odjei.
|
|
\v 14 Inga wu otomo moto amayi likolo e moboko muho motikalia, moto oho akotota liputi;
|
|
\v 15 ase inga otomo wo moto wolongolia, moto oho akotikala mawo ohola, ase inde amene akokala, kaikwase inga ndjongo ekodjaa nda aeti nde la misa.
|
|
\p
|
|
\v 16 Woewitini ate ino odjeini tepelo e Mwengei, pe ate elimo e Mwengei eyabati ndondo enu?
|
|
\v 17 Inga moto abitesa Tepelo e Mwengei, Mwengei akomobitesa. La ebili ate tepelo e Mwengei edjei mosantu, tepelo eho nde ino.
|
|
\p
|
|
\v 18 Moto atiyakose. Inga moto mwesi ndondo enu akobunduaka ate adjei moto o lokenge la ehele engele ndjoo, aume ekete, laate aume moto o lokenge.
|
|
\v 19 Laate lokenge e mu moki ndjo wodjei ekete la maiso ma Mwengei. La ebili ate edhingama ate “akohelaka wato wa lokenge ndondo e mamungo mbee djau amene.”
|
|
\v 20 Aleeti Mwengei ayewi ate mamungo ma wato; dja lokenge edjei pamba.
|
|
\p
|
|
\v 21 La ehoo moto atiyatelese la la loyi e wato. Laate wihoo kpaa widjei wanu.
|
|
\v 22 Edje te Polo, te Apolosi, te Kepa, te moki, te mokalo, te ogwi, te wihoo winge widjei sikalandjo, te winge wigeleli.
|
|
\v 23 Wihoo kpaa widjei djanu, ase ino wodjeini wato wa Kilisito, pe Kilisito adjei moto o Mwengei.
|
|
\c 4
|
|
\cl ESUKI 4
|
|
\p
|
|
\v 1 Moto, atodendele iso ate todjei tuke wasese e Kilisito, pe wabanei wiiseli esatu e Mwengei.
|
|
\v 2 Aleeti, la wu loyi, ema enge wakolukaka atye wbanei, edjei ate moto aenane olamu.
|
|
\v 3 Kaikwase atie mbai, edjei loyi liesi likeke ate isambesame la ino, inga te la okumu wesi djaa wato. Te mbai pe itiadhendele mbai amene.
|
|
\v 4 Laate etieneke ema teeti enge ekokwesaka mbai. Inga te ndjongo ieneniti moto molamu la loyi eho, ase moto ongo akodhendelaka mbai edjei Likumu.
|
|
\v 5 La ehoo otisambeseni ema teeti liwoso la engele ehoo, tee ekodjaa Likumu, inde ongo okoumesa la hohoo sambo djinge iyaisi la likolo, pe akoenese la hohoo sambo dja mitema. Pe la engele ehoo moto la moto akotota mogano monde enge edjii atie Mwengei.
|
|
\p
|
|
\v 6 Kaikwase, wamanima, iyenesi dinge sambo la ndenge eumesi ehoo ekpangele enge ekoaselaka mbai amene la Apolosi la olamu lanu pe la kole esu, ino oyekoleni ehele eyaseli, “otikeni lihele oyeti sambo djinge edhingani” laate mwesi mwesi la ino atikunde la elolo pe otiyeneni ate moto ndjoo ayeti moto ndjoo.
|
|
\v 7 Laate ndai osombonesi owe la odji? Ndema enge edjei owe la ehoo enge watihekeleli owe ohekele? Kaikwase inga wahekeli owe eho ohekele, nda ndenge ekoyaganaka owe nda watihali owe ohi?
|
|
\p
|
|
\v 8 Ino ogbetigani! Woumigani wato wa ogumake! Iso toti, ino amene opotigani oyamaleli pe ikoemele ate opoteni oyamaleli laate iso pe toyamalele ebete kikima la ino.
|
|
\v 9 Laate iyeni nda Mwengei alaleyi iso watoma la ebete egboo nda wato wango wabatani la loyi e logo. Laate toumia ema edhendake liwoso la moki, pe liwoso la wahumbwa pe liwoso la wato.
|
|
\v 10 Iso todjei wikete la loyi e Kilisito; ase ino odjeini wato wa lokenge ndondo e Kilisito. Iso togenakoli, ase ino odjeini la okulu. Ino odjeini la kombo ndamu, iso todjei la nsoni.
|
|
\v 11 Tee la ehele engele enge todjei ndji tokookaka ndjala, pe alidji la posa e malia; la odjangi wisindje, pe obingamibingami, la odjangi ebete eyabatake.
|
|
\v 12 Pe oeni odjidji la otomo enge tokokelaka la mawo masu amene. Ango wakotangakolaka iso, topambwake; ango wakotoeneseke odjidji tonangaka motema.
|
|
\v 13 Ango wakobitesaka lokumu lasu, toyakongake. Toumia nda onalili e mokii, ema enge etonani la witondo kpaa, tee sikalandjo.
|
|
\p
|
|
\v 14 Ikodhingaka dji sambo ndjo laate itiokeseni ino soni, ase la oyangatalanisi ino nda wana wa mbai wa libalano.
|
|
\v 15 Inga, te wodjeini la watiesakoli nkoto liomu ndondo e Kilisito, la omeemene otini la wasangbanu ngbii, laate ndondo e Yesu Kilisito mbai iwumia sangbanu la mboka e mboli ndamu.
|
|
\v 16 La eho, ikoyakongaka la ino ate owumeni wakongoli wa mbai.
|
|
\v 17 Eho lenge ikootomelakani ino Timoteo laate adjei mana o mbai o libalano pe la omeemene ndondo e Likumu pe akoobundolelani ino ndenge e mbai e okeli la otomo e Yesu Kilisito, ndji la ndenge ikotiesakolaka wibete kpaa pe la masambo esi la esi.
|
|
\p
|
|
\v 18 Wato weeti wakundji la elolo, nda ndenge itidja atie ino.
|
|
\v 19 Ase mbuse ema masio makeke ikodja atie ino, inga Likumu abala. Pe itiluka ate iyewe wingbundu e wango wakokundaka la elolo, ase ndji okulu wowu.
|
|
\v 20 Laate okumu wo Mwengei eti sambo dja oasi ase sambo e okulu.
|
|
\v 21 Obalini nde? Idjee atie ino la mote inga la libalano pe la elimo oyadjimbesi?
|
|
\c 5
|
|
\cl ESUKI 5
|
|
\p
|
|
\v 1 Mboli eokani ate Pite edjei ndondo e ino, pe pite ehele ndenge etidjaaka te atie witondondo, ate molome mwesi amototia moli o sango.
|
|
\v 2 Pe otumisanini la elolo! Oengalini nde odjei ndondo e magba, laate molome ongo akeli sambo djawo alongwe atie ino?
|
|
\v 3 La mbai, inga te la wenge iti, ase la elimo idjei. Imosambesiga moto ongo okeli ndjongo, nda nde idjei ango.
|
|
\v 4 La kombo e Likumu lasu Yesu, ango okogbotononi ino, la elimo e mbai mongindji la okulu e Likumu lasu Yesu.
|
|
\v 5 Mohekeleni Satana moto eho laate moyeni monde mobitesane, pe ate molimo mokalesane la lisio e Likumu.
|
|
\p
|
|
\v 6 La kole enge ekoyaganaka ino eti olamu. Oewitini ate te ma lebile keke ekokundjisaka mogbuku e moteke?
|
|
\v 7 Longweseni lebile e gala, laate odjeni mogbuku mo holi e moteke, nda mosisa ekundesake moti ndondo e ino. Laate Kilisito eyeteli esu ahekelani mbeka.
|
|
\v 8 Totikele lipati laho, la lebile gala, la lebile e sambo mbe pe la ekaleli e mbe, ase la okoke eti la lebile e omeemene pe e olamu.
|
|
\p
|
|
\v 9 Iyodhingelini ino ekpata ate dheeni oboliani la wato wa pite.
|
|
\v 10 Epoti oasi ate todhe oboliani la sambo kpaa e wato wa pite e mu moki inga wato wa litema la wango wakopwesaka, te la wayakongi e wilima. Inga ndjongo ewongi ate olongweni la moki.
|
|
\v 11 Sikalandjo idhingelini ino ate dheeni oboliani la moto kpaa ongo owelani manima, ongo odjei moto o pite, te moto o litema, la ongo okoyakongoko la wilima, la motangi la molangoyi o maana la ongo okopwesaka, otilakeni ebete kikima la ongo moto okokelaka djinge sambo.
|
|
\v 12 Laate osambesi wato wa saa, edhendi mbai la nde? Ino otisambesakeni wato wa ndondo?
|
|
\v 13 Ango Mwengei akosambesaka wango wa saa. Molongosani moto mobe ndondo enu.
|
|
\c 6
|
|
\cl ESUKI 6
|
|
\p
|
|
\v 1 Ndai ndondo enu, inga adja la nongo e manango nda ndenge eengi inde oongi omeemene atie wato wadjangi omeemene, ase te atie wasatu?
|
|
\v 2 Oyewitini ate wasatu nde wakotena sambo dja wato? Alidji inga edja ate ino wato wakosambesa moki, otiongeni nde osambesi sambo kekekeke?
|
|
\v 3 Oyewitini ate iso tokosambesa wahumbua? Ndjongo te nda ndenge etienga iso sambo dja mu mokalo?
|
|
\v 4 Inga oengini osambesi sambo e mu mokalo, edjei wato wango wadendjiani la lingomba nde okowabatakani wasambesi?
|
|
\v 5 Iyasi ndjongo la ookesi ino soni. Meemene, moto mwesi o lokenge ati ndondo enu ongo okoenga osambesi ndondo e wamanango?
|
|
\v 6 Ase manango akokeeke la manango la osambi, pe eho liwoso la wato wadjangi ogemei!
|
|
\p
|
|
\v 7 La eho, meemene okwigani amene okwi la ndenge ekopundanakani ino la ino la osambi. Nda ndenge etigemeiyakani ino ate waokeleleni obe? Nda ndenge etiyadhelekeni ino laate waobubeni?
|
|
\v 8 Ase ino nde okowakelelaka wato sambo mbe pe owabubakoli, kaikoase wadjei wamangbanu!
|
|
\p
|
|
\v 9 Oyewitini ate wato wadjangi sambo ndamu wakotota lisango e okumu e Mwengei? Otiakoseni: edje te wato wa pite, te wato wango wakoyakongoko la wilima, te wato wa eteba, te wango wayakukoli wenge ate waume wali inga pele, te pele wango wakolangalaka la wiino wau pele,
|
|
\v 10 te wato wayiwa, te wato walitema, te walangoyi wa maana, wato wailiko, pe wapwesi iwo kpaa watitota lisango e Mwengei.
|
|
\v 11 Kaikoase edjakali la wadji ndondo enu wadjakali la ndenge enge. Ase okpolonigani, ase osatisanigani, ase otolonigani wato wa sambo ndamu la kombo e Likumu lasu Yesu Kilisito pe la elimo e Mwengei osu.
|
|
\p
|
|
\v 12 “Sambo kpaa ehameli mbai,” ase sambo kpaa etihaka kole. “Sambo kpaa ehameli mbai”, ase itidhee ema teeti edje la okumu likolo la mbai.
|
|
\v 13 “Wilaka wilakake edjei olamu la loyi dja solo, pe solo koto edjei olamu la loyi e wilaka wilakake,” ase Mwengei akoebitesa kpaa. Wenge eti la loyi e pite, ase la loyi e Likumu, pe Likumu adjei la loyi e wenge.
|
|
\v 14 Ase Mwengei amosusolali Likumu pe akotosusola iso la logo la okulu wonde.
|
|
\p
|
|
\v 15 Oyewitini ate wenge djanu widjei wisuki dja wenge e Kilisito? La eho, ikolongosa nde wisuki wa wenge wa Kilisito pe iwumese eho wisuki wa wenge e moli o ndumba? Itikela ndjongo!
|
|
\v 16 Oyewitini ate moto ongo owanesi wenge la moli o ndumba awumiga wenge kikima la inde? Laate, aasi ate: Iwo wale wakouma moyeni moikima.
|
|
\v 17 Ase moto ongo oyabondji la Likumu adjei elimo eesi la inde.
|
|
\p
|
|
\v 18 Tilani pite! Madji masumu kpaa makokelaka moto madjei saa e wenge wande, ase ongo okeli pite, akokelelaka wenge wande amene lisumu.
|
|
\v 19 Otiyeweni ate wenge djanu widjei Tepelo e elimo satu enge edjei ndondo e ino, pe enge etotalini ino atie Mwengei? Otiyeweni ate otini wato la kole ino amene?
|
|
\v 20 Laate osombamalini la motio mosungu. La eho, mohekeleni Mwengei otwa la wenge wanu.
|
|
\c 7
|
|
\cl ESUKI 7
|
|
\p
|
|
\v 1 La loyi e sambo djinge idhingali ino: “Edjei olamu moto o pele atimoike moli.”
|
|
\v 2 Ase nda ndege pite iyandjani wiholo kpaa, molome mwesi adjee la moli onde moikima pe moli moikima adjee la molome onde moikima.
|
|
\v 3 Ewongi ate moto pele amohekele moli onde libalano liongi la inde pe moli akele ndji ndjongo atie molome onde.
|
|
\v 4 Moli ati la okumu likolo la wenge wande amene, ase molome onde moto odjei la okumu. Ndenge kikima, motopele ati la okumu e wenge wande, ase moli onde moto odjei la okumu.
|
|
\v 5 Otihumelaneni eho, longosa ndji inga ino wale ookanini la engele enge ebati ino. Laate oyaheleni la okili pe la oyakongi; mbuse wongwani ebete kikima. La mbangi ate Etota atiomekeni la odjangi oyatekesi wonu.
|
|
\p
|
|
\v 6 Iyasi ndjongo la oenesi ate eengi okelani, ase eti nda pui.
|
|
\v 7 Ibalali ate moto kpaa adje nda mbai. Ase moto la moto atoti likawo lande atie Mwengei, moto la moto la ndenge e inde.
|
|
\p
|
|
\v 8 La wango waikakiyo pe la wali wagweli pele, iyasi ate edjei olamu la iwo otikali nda mbai.
|
|
\v 9 Ase inga watienge onangi motema, waike, laate eyeti olamu oiki la ebete ate ogue la ehoha.
|
|
\p
|
|
\v 10 Atie ino wango waikiga, ikoasaka, te mbai amene, ase Likumu osu, ate: Moli atikawane la molome onde.
|
|
\v 11 Inga moli akawaniga la molome onde, atilingele kine leeti liwala, inga te ndjongo wawongele iwo la molome onde, pe molome atikawane la moli onde.
|
|
\p
|
|
\v 12 Ino wango waeti, ikoasaka ndjo, Mbai nde iyasi, ase te Likumu: inga mangbasu adja la moli ongo omogemeiti Mwengei, kaikoase moli oho agemei oyabati la inde, mangbasu oho atikawane la inde.
|
|
\v 13 Inga koto moli aikania la molome ongo omogemeiti Mwengei ase agemei oyabati la inde, atikawane la molome onde.
|
|
\v 14 La ndenge eho, molome ongo amogemeiti Mwengei akototaka mbano e osantu e moli onde, pe koto moli ongo amogemeiti Mwengei akototaka mbano e osatu e mangbasu o pele oho. Inga te ndjongo, wana wanu wakodja onalili, ase sikala ndjo wadjei wasatu.
|
|
\p
|
|
\v 15 Ase inga moto ongo omogemeiti Mwengei akolukaka okawani, akawane. Mangbasu o pele inga o moli ati la wotuke la loyi laho, ase Mwengei aowelini ino la logoo.
|
|
\v 16 Laate, moli, nda ndenge eyewi owe inga otikalesa molome o owe? Te, molome, nda ndenge oyewi inga otimokalesa moli o owe?
|
|
\p
|
|
\v 17 Loyi liesi saa, ndenge Likumu ahekeli moto la moto likawo, moto la moto asombe la ndenge enge Mwengei amoweli inde. Ndenge eho nde ikotiesakolaka la mangomba kpaa.
|
|
\v 18 Moto awelanali nde atenanali kombeni? Atiwume moto ongo otenani kombeni. Moto awelanali nde atitenanali kombeni? Atitenanali kombeni.
|
|
\v 19 Otenani kombeni eti la ema, pe odjangi otenani kombeni eti koto la ema, ase ema edjei la kole nde otemei pui dja Mwengei.
|
|
\v 20 Moto la moto atikale la ndenge edjei inde engele Mwengei amowelali inde.
|
|
\v 21 Odjakali motuke ango ewelanali owe? Otiyatungese la loyi laho, ase inga pe oengi owumi la lipanda, hela nano eho.
|
|
\v 22 Laate moto kpaa ndondo e Likumu ongo owelanali ango edjakali inde motuke, adjei mosombani e Likumu. Ndenge kikima pe moto ongo owelanali ango edjei inde la lipanda adjei motuke mo Kilisito.
|
|
\v 23 Osombanalini la motio mosungu: Otiwumeni tuke dja wato.
|
|
\v 24 Wamanima, moto la moto atikale atie Mwengei ndenge ewelanali inde, abanye ookani wonde mongindji la Mwengei.
|
|
\p
|
|
\v 25 La enge edhendji seka, iti la pui ehake enge edji atie Likumu, ase ihekeli ndenge eeni mbai, nda moto ongo Likumu akomookelaka magba laate adje meemene.
|
|
\v 26 La eho, ieni lu loyi eedjei olamu, la odhendeli minga minge midjei ahala atie iso, ate edjei olamu ate moto atikale ndenge edjei inde.
|
|
\v 27 Ohelani la moli mwesi? Otiluke okatoli libalano laho. Ohelaniti la moli mwesi? Otiluke ndenge eikake moli.
|
|
\v 28 Inga oika, okeliti lisumu, inga koto moseka aikia akeliti lisumu. Kaikoase, wango wakoikaka wakoene odjidji ndondo e moyeni mowu, ase mbai ibaliti ate wungo loyi eowumeleni ino.
|
|
\p
|
|
\v 29 Ase enge ebali mbai oasi, wamanima: Engele edjei ekwe. Eho lenge wango wadjei la wali wadje nda wato wango wati la wali.
|
|
\v 30 Alidji wango wakolelaka wadje nda wango waleliti, wango wadjei la mwemu nda wango wati la mwemu, wango wakosombaka nda wango wati la ema teeti.
|
|
\v 31 Pe wango wakoemelaka la moki nda wango watiemelaka la moki, laate sambo dja mu moki ekoyakukolaka.
|
|
\p
|
|
\v 32 Kaiko, ikobala ate otiyasumbweni. Molome ongo oikiti akoyasumbwaka la sambo dja Likumu, ndenge aengi ogemeiyani la Likumu.
|
|
\v 33 Ase molome ongo oiki moli akoyasumbwaka la sambo dja moki, ndenge aengi ogemeiyani la moli onde-
|
|
\v 34 akawani. Alidji, moli ongo oikakiyo, pe moseka, ayasumbwe la sambo dja Likumu, laate adje mosatu la wenge pe la elimo. Kaikoase moli ongo oikiga akoyasumbwe la sambo dja moki, ndenge aengi ogemeiyani la molome onde.
|
|
\v 35 Iyasi dji sambo la olamu wonu amene, laate itiobatani moliki la kingo. Laate iyokpaleni ino la enge ewongi pe la enge eenesi omokeleli Likumu otomo engele kpaa, odjangi obati mamungwene la djeeti sambo.
|
|
\p
|
|
\v 36 INga moto aene ate akokelelaka wose wonde obe, inga inde aetesa ema e lipoteli e wolenge, pe inga eengi okelani ndjongo, akele enge ebali inde. Akeliti lisumu. Waikane la iwo.
|
|
\v 37 Ase inga moto ongo oyaheli la motemma monde, wamotomiti la otetelake, ase la ndenge ende amene, pe inga atota mwano inde amene ate ayabate likombe akeli olamu.
|
|
\v 38 Ongo oikani la wose wonde, akeli olamu, ongo oikaniti la wose wonde akeli olamu oyeti.
|
|
\p
|
|
\v 39 Moli anangani la molome onde ango edjei yo inde la mokalo. Ase inga molome agua, akotikala ohola pe aengi oyikani la molome ongo okobala inde. Ase ndji ndondo e Likumu.
|
|
\v 40 La mamungwene ma mbai, akodja la mwemu ngbii oyeti inga atikala ndenge edjei inde. Imungoyi ate mbai pe idjei la elimo e Mwengei.
|
|
\c 8
|
|
\cl ESUKI 8
|
|
\p
|
|
\v 1 La sambo djinge idhengi nama ndjinge ihekeli iwo la oyakongi e wilima: Toewi ate iso kpaa todjei la oyewi. Oyewi ekokundesaka la elolo, ase libalano likomaanaka.
|
|
\v 2 Inga moto ayewa ema esi, ayewakiyo eho ndenge eengi inde oyewi ema eho.
|
|
\v 3 Ase inga moto akomobalaka Mwengei, moto oho ayewani la inde.
|
|
\p
|
|
\v 4 La loyi elalakake nama djinge wihaani la oyangongi e wilima: Toewi ate elima eti ema la moki, pe ate Mwengei adjei moikima.
|
|
\v 5 Laate edjei la wato wango wawelani wamwengei, edje likole te la mbume, ndenge wamwengei wadjei ngbii pe makumu wadjei ngbii,
|
|
\v 6 La iso, todjei la Mwengei muesi, inde Wawa, ongo wiho kpaa widji la inde, pe koto Likumu adjei muesi, Yesu Kilisito, ongo wiho kpaa widjei, pe iso tokokalaka.
|
|
\p
|
|
\v 7 Kaikoase, oewitini enge edjei la wato kpaa. Ase wadji, nda ehahani iwo la elima tee sikala, wakolakaka wilaka nda ema enge ehani mbeka la elima. Pe lokenge wowu nda eteteliti eho eumia onalili.
|
|
\v 8 Ase ema elakake etiohani ino mogano la maiso ma Mwengei. Inga totilake, totidjanga ema, pe inga tolaka, totitota pe kole teeti.
|
|
\v 9 Ase angatalani laate edje te nda ndenge otomo wonu etiwume ekikimi ekoesake wango wadjei la olembi.
|
|
\v 10 Laate inga moto aowene owe, owe moto ongo odjei la oyewi, oyabatia la olaki la tepelo eesi ndjo e wilaka, oyewi e moto oho ongo odjei la olembi etihana egalela tee olaki wilaka winge wihani la wilima?
|
|
\v 11 Meemene la oyewi e owe, moto ongo olembi, akobitanaka, mangua ongo Kilisito amoguelali.
|
|
\v 12 Ango ekowakelelakani ino wamangbanu lisumu e ndenge enge, pe olongoli oyewi wou enge eteteliti, okomokelelakani Kilisito lisumu,
|
|
\v 13 La eho, inga ema elakake ekobingesaka manima ekikimi, itilaka kine moyeni mo nama te makeke, laate itimobingese manima ekikimi.
|
|
\c 9
|
|
\cl ESUKI 9
|
|
\p
|
|
\v 1 Itidjee la lipanda? Iti toma? Itimwenali Yesu Likumu lasu? Ino otdjeeni otomo wo mbai ndondo e Likumu?
|
|
\v 2 Inga atie weeti wato itidjee toma, idjei pendja ndjongo atie e ino. Laate odjeini olombo e otutiani wo mbai ndondo e likumu.
|
|
\p
|
|
\v 3 Osambi wo mbai atie wango wakokambaka mbai eho lele:
|
|
\v 4 Etitohekelane olaki la okengi?
|
|
\v 5 Etitohekelane alidji okpali mongindji la iso mangbasu o moli muesi nda moli ongo omoyiki iso, ndenge wadji watoma pe wamanango wa Likumu pe Kepa wakokelaka eho?
|
|
\v 6 Tango eeti, edjei ndji mbai la Balanabasi nde totienge okeli otomo e woyeni?
|
|
\v 7 Ndai okokelaka otomo o soda pe akoyaputaka inde amene? Ndai ongo okoonaka elanga e bino pe atilakaka pukapuka djaho? Pe ndai ongo okobanyaka meme odjangi okengi mawele maho?
|
|
\p
|
|
\v 8 Dji sambo eyasi mbai, etidjaka la ekeleli e wato? Pe pui etiaselaka pe djinge sambo?
|
|
\v 9 Laate edhingani la pui e Moize, “eengiti la owe onangi meme monoko ango ekotaunaka inde pukapuka.” Mwengei akobatelaka mpe meme motema?
|
|
\v 10 Inga koto edjei nde la loyi wosu nde akoasaka eho? Meemene edjei la loyi wosu nde eho edhingani, laate moto ongo okotiaka elanga ewongi la inde oti elanga la mwano pe ongo okotangakolaka pukapuka ewongi la inde okeli ndjongo la mwano etotake ndambo ende.
|
|
\v 11 Inga toona atie ino wilaka wa elimo, edjei nde loyi losungu inga tobuka atie ino wiho wa wengé?
|
|
\v 12 Inga weeti wato waokalelaka eho atie ino, iso toengiti okaleli eho oyeti? Inga te ndjongo totikelelake otomo oho, ase tokohelaka nde motema la dji sambo kpaa laate totidhihe mboka la mboli ndami e kilisito.
|
|
\v 13 Otiyeweni ate wango wakokelaka sambo mosatu, wakolakaka wilaka e tepeto, la wango wakokelaka la etumbeli wadjei la ndambo ewu la etumbeli?
|
|
\v 14 Ndenge kikima pe, Likumu ahali wango wakotiesakolaka mboli ndamu mboka ate wakalele pe mboli ndamu.
|
|
\p
|
|
\v 15 Ase mbai itikelelali dji sambo. Meemene, inga idhingi dji sambo etidje ate edje djongo atie mbai. Ekoeta nde olamu ate igue la ebete ate-moto tueti aumese pamba kole enge ekoyaganaka mbai.
|
|
\v 16 Inga ikotiesakolaka mboli ndamu, eti la loyi e mbai kole eyaganake, laate edjei nde mokpali mungo wabati likolo la mbai. Pe magba la mbai inga ititiesakole mboli ndamu!
|
|
\v 17 Inga ikokelaka eho la motema molamu, idjei la liputi. Ase inga itikelaka eho la motema molamu, ndjongo enge mokpali moyamaleli mbai.
|
|
\v 18 Liputi la mbai edjei nde? Edjei ohi pamba mboli ndamu enge ekotiesakolaka mbai; laate itikelele la ndenge mbe wotomo wo mbai ndondo e mboli ndamu.
|
|
\p
|
|
\v 19 Laate, inga te ate idjei la lipanda atie wato kpaa, iyakeli mutuke mo wato kpaa, laate itote wato ngbii oyeti.
|
|
\v 20 Pe la ndenge eho atie Wayuda, idjali nda Moyuda laate itote Wayuda. Atie wango wadjei sese e pui, iwumali nda ongo odjei sese e pui, inga te ate mbai amene itidjali sese e pui. Laate iwatote wango wadjei sese e pui.
|
|
\v 21 Atie wango wadjangi pui, iwumali nda idjangi pui, te ndenge itidjange pui atie Mwengei, ase idjei la sese e pui atie Kilisito, laate ienge ototi wango wadjangi pui.
|
|
\v 22 Ilembeli, la wango walembi, laate itote wango walembi. Iwumali ndenge e wato kpaa, laate inga la nda ndenge ikalese wato kpaa.
|
|
\v 23 Ikokelaka ndjongo la loyi e mboli ndamu, laate itiesakole eho mongindji la wadji.
|
|
\p
|
|
\v 24 Otiyeweni wango wakotikalaka obangu la iyoka e otili obangu, wakotilaka obangu iwo kpaa ase mwesi nde akotota mbano? Tilani la ndenge etotake mbano.
|
|
\v 25 Alidji, moto kpaa ongo okoyaboliaka la momekano, akoyatekisaka la sambo kpaa. Alidji wakokelaka ndjongo laate watote sapo enge ekohola. Ase iso tokele ndjongo la ototi sapo enge etiholo.
|
|
\v 26 Mbai, ikotilaka obangu, eti nda iyoka, ikobingaka wibotu, eti nda ekobingaka ehoho.
|
|
\v 27 Ase ikobingakolaka wenge wa mbai, pe owumesi eho nda motuke, laate mbuse e otiesakoli wadji, mbai amene itiatonese.
|
|
\c 10
|
|
\cl ESUKI 10
|
|
\p
|
|
\v 1 Wamanima, etibale ino owosaneni ate wasangbasu wadjakali iwo kpaa sese e lipata, pe iwo kpaa wa ngbandali ewale esungu.
|
|
\v 2 Wapatali iwo kpaa ndondo e Moize la mboka e lipata laho aleeti la ewale esungu,
|
|
\v 3 iwo kpaa walakali ilaka e elimo.
|
|
\v 4 Aleeti iwo kpaa wakengali malia ma elimo. La ebili ate wakengali la libukeli e elimo enge edjakali owabilei, pe libukeli laho edjali Kilisito.
|
|
\v 5 Ase ngbii ndondo e iwo watidjali olamu la mayiso ma Mwengei, wagwali la esobe.
|
|
\p
|
|
\v 6 Djii sambo ewumia ekpangele esu, laate iso totidje wato wango wakodjaaka la ehoha e sambo mbe.
|
|
\v 7 Otiwumeni wayakongi e wilima, nda wadji la iwo, ndji ndenge edhingani ate: Wato wayabatali olaki la okengi, wayamalali la iyoka.
|
|
\v 8 Totiyahekeleni la pite, ndenge wadji la iwo wakelali pite, pe wakuali, koto tuku iwale la isato la lisio liesi.
|
|
\v 9 Totimomekeni Kilisito, nda e momekali wadji la iwo, pe wagwali la ndjo.
|
|
\v 10 Otidjeni pe wato wango wabali ondungwani, nda wadji la iwo wandungwanali, pe waolanali la mooli.
|
|
\p
|
|
\v 11 Djinge sambo ewawumelali laate etoinye nda ekpangele, aleeli edhinganali laate etotiesakole iso wango towumi gboo e ma masiyo.
|
|
\v 12 Ndjongo, ongo oyewi ate ayamali likolo angatale laate atikwe.
|
|
\v 13 Omekani teeti eowumelini ino enge etiwumelaka wato kpaa. Aleeti Mwengei, ongo otiakukolaka, aengiti ohekeli mboka laate omekani eyete wokulu wonu, ase la mboka e omekani akowongela koto mboka e opumbi, laate oengeni oheleli eho motema.
|
|
\p
|
|
\v 14 La ndjongo, wamanima wa libalano, tilani oyakongi e wilima.
|
|
\v 15 Ikoasaka nda wato wango walokenge, ino amene yadhendani la enge eyasi mbai.
|
|
\v 16 Kopo e lipamboli enge ekopambwaka iso, einyeiti oboleyani la makila ma Kilisito? Okoke enge ekobukaka iso, eyinyeiti oboleyani la wange wa Klisito?
|
|
\v 17 Laate ango okoke edjei sa eesi, iso nda edjei iso ngbii, tokeli wenge eesi, laate tokolakaka iso kpaa ndji enge okoke eesi.
|
|
\p
|
|
\v 18 Dhendani Isalayele e wenge. Wango walakali nama djinge ihekelanali la wambeka watiboleyanali la etumbeli?
|
|
\v 19 Iyase woni? Mweni mungo mohani mbeka e elima, edjei ema? Inga pe elima edjei ema?
|
|
\v 20 Ase iyasi nde ate wiho winge witondo wakohaka mbeka, wakohaka eho la mindjili, ase te atie Mwengei, pe mbai ibaliti ate ino oboleyaneni la mindjili.
|
|
\v 21 Oengitinini okengi kopo e Likumu, aleeti kopo e mindjili, oengitini olaki la meza e Likumu, aleeti la meza e mindjili.
|
|
\v 22 Tobalini oluki limemu e Likumu? Todjei la okulu omweniti?
|
|
\p
|
|
\v 23 Sambo kpaa ehani mboka, ase eti sambo kpaa nde edjei la okele. Sambo kpaa ehani mboka, ase te sambo kpaa nde ekokalesaka.
|
|
\v 24 Moto tweti atiluke liputi lande amene, ase moto la moto aluke enge e miino onde.
|
|
\v 25 Lakani enge kpaa wakotambaka la liho, te la oyahueli la oyewi wunu.
|
|
\v 26 Laate mbume edjei e Likumu, la enge kpaa edjei ndondo eho.
|
|
\v 27 Inga moto ongo otigemeiye aowela, inga obali oki, laka enge kpaa wakoha, te la oyahueli la oyewi.
|
|
\v 28 Ase inga moto mwesi aasa la ino ate, “ehele edjei ema ehani mbeka,” otilakeni eho, la loyi e moto ongo oenesi eho pe la loyi e oyewi.
|
|
\v 29 Iyasi oyewi, te enge e owe amene, ase enge e moto odji. Laate, nda kole lipanda la mbai esambesane la oyewi e moto odji?
|
|
\v 30 Inga ikolakaka la pambo, ndjoni waasele mbai obe la ema enge ihekeli pambo la loyi eho?
|
|
\p
|
|
\v 31 La eho, edje okolakakani inga okengi inga okeli nda ema edji, kelakani sambo kpaa la loyi e otwa wo Mwengei.
|
|
\v 32 Huakani ate otiwumeni wato wango wakobingesaka Wayuda la Wageleki koto lingomba e Mwengei ekikimi.
|
|
\v 33 Ndenge mbai pe ikoemeleseke wato kpaa la sambo kpaa, itilukaka kole e mbai amene ase enge e wato ngbii, laate iwo wakale.
|
|
\c 11
|
|
\cl ESUKI 11
|
|
\p
|
|
\v 1 Djaani wakongoli wa mbai, ndenge mbai koto edjei mokongoli mo Kilisito.
|
|
\p
|
|
\v 2 Itioganakani ino pamba, ase la sambo kpaa okobundwakani mbai pe okonanganakani la ekaleli ndji ndenge iyohalini eho.
|
|
\v 3 Ibali oyeweni ate likumu e molome edjei Kilisito, pe likumu e moli edjei molome, pe likumu e Kilisito edjei Mwengei.
|
|
\v 4 Molome kpaa ongo akoyakongaka inga otiesakoli adhihi moto atimoganaka likumu lande.
|
|
\v 5 Ase moli kpaa ongo akoyakongaka inga otiesakoli adhihiti moto, atimoganaka likumu lande. Eho edjei nda akokoli suwe djande.
|
|
\v 6 Laate, inga moli atiyadhihe moto, akokole koto suwe. Ase inga edjei soni la moli okokoli suwe inga oteni suwe, ayadhihe.
|
|
\v 7 Laate molome aengiti odhihi moto, laate adjei elima koto otwa e Mwengei. Ase moli adjei otwa e molome.
|
|
\v 8 Laate molome atilongwali atie moli, ase moli alongwali atie molome.
|
|
\v 9 Alidji molome atikelanali la kole e moli. Ase moli akelanali la kole e molome.
|
|
\v 10 Eho lenge moli aengi odjei la elembeteli e okumu la moto monde la loyi e waahumbwa.
|
|
\p
|
|
\v 11 La enge kpaa, ndondo e Likumu, moli aengiti odjei inga te la mboka e molome, ndenge kikima pe molome aengiti odjei inga te la mboka e moli.
|
|
\v 12 Laate, ndenge moli alongwali atie molome, ndenge kikima pe molome adjali la mboka e moli. Ase wiho kpaa wilongoyi atie Mwengei.
|
|
\v 13 Dhendani ino amene: edjei olamu moli ayakonge la Mwengei odjangi odhihi moto?
|
|
\v 14 Moki muho amene motiotiesakolakani ino ate inga molome adja la suwe ndai, edjei soni la inde?
|
|
\v 15 Ase inga moli adja la suwe ndai, edjei otwa la inde? La ebili ate wamohate suwe la odhihi moto.
|
|
\v 16 Inga moto mwesi abali otoni, toti la enge ekalali, te mangomba ma Mwengei mati la eho.
|
|
\p
|
|
\v 17 Ase ango ekoaselakani mbai ino dji sambo, itioganakani. Laate oyabati wungo ekoyabatakani ino eti la loyi ate owumeni olamu, ase la loyi ate owumeni obe.
|
|
\v 18 Laate liwoso, ango ekoyabatakani ino eholo kikima, ikookaka ate okawani edjei ndondo e ino, pe ikogemeiyaka ma keke ate edjei ndjongo.
|
|
\v 19 Laate ewongi pe ate okawani keke keke edjei ndondo e ino, laate wato wango wagemeiyani waenane koto la hoho ndondo e ino.
|
|
\v 20 Eho lenge, ango endongbaniani ino ebete ekikima, iti la olaki wilaka wa olangali wo use e Likumu,
|
|
\v 21 Laate, ango ekolakakani ino eho, moto la moto akolakakayo liwoso wilaka wande e olangali wo use, ase odji adjei la ndjala, ase odji alangwe maana.
|
|
\v 22 Otini la minguta la olaki pe okengi? Inga okodendjiakani lingomba e Mwengei, alidji okookesi wango wadjangi soni? Iyowaseleni woni? Iyoganeni? La wungo loyi iengiti o oganini ino.
|
|
\p
|
|
\v 23 Laate mbai itotali atie Likumu wungo loyi ihali pe la ino, ate Likumu Yesu, la ehele likolo ewongoli la inde okawani, atotali okoke.
|
|
\v 24 Pe mbuse e ohi Mwengei pambo, abukali eho pe aasali ate: Totani, lakani. Ehele edjei wenge wa mbai enge ebukani la loyi e ino. Kelakani ndjongo la osumboyi mbai.
|
|
\v 25 Ndenge kikima, mbuse e olaki, ototia etutu, alidji aasia: elale kopo edjei e wuma eholi e makila ma mbai. Kelani ndjo la osumboyi mbai masiyonkpaa ekokengani ino.
|
|
\v 26 Laate mbala kpaa enge ekolakakani ino ehele okoke la okengi ehele etutu, okotiesakolakani logo wo Likumu, tee ango ekowongwa inde.
|
|
\p
|
|
\v 27 La ndjongo, moto ongo okolaka okoke inga okengi ehele etutu e likumu la ndenge enge ewongiti, adjei la huko la loyi e wenge pe la makila ma Likumu.
|
|
\v 28 Moto la moto ayagemeiyese ate awongi mbuse e ayadhendji olamu inde amene, pe la ndenge eho, alake okoke alidji akenge etutu eho.
|
|
\v 29 Laate moto ongo akolakaka inga akokengaka la ndenge mbe, te ate ayewe olamu wenge wa Likumu, akolakaka inga akokengaka huko wonde amene.
|
|
\v 30 Eho lenge, ngbii ndondo e ino wadjei la wileme, la wikoni, alidji ngbii wagbakani.
|
|
\v 31 Inga toyaewigani ndenge edjei iso, totisambesana.
|
|
\v 32 Ase, ango esambesaniya iso, edjei Likumu nde akotonanola iso, laate totikpe mongindji la moki.
|
|
\p
|
|
\v 33 La ndjongo, wamanima wa mbai, ango eyaabatini ino la olaki eho, okanani weesi la weesi.
|
|
\v 34 Inga moto adjei la ndjala, alake ebete ende, laate otiyabondeni la loyi e osambesani. Alidji sambo djinge itikali ikowongele eho ango ekowuma mbai.
|
|
\c 12
|
|
\cl ESUKI 12
|
|
\p
|
|
\v 1 Wamanima la djinge idhengi likao e elimo, ibaliti ate odjangeni oyewi.
|
|
\v 2 Oewini ate, ango odjakalini ino wapagano, odjakalini ayadheli oki la ino la wilima winge witikpomaka, ndji ndenge edjakali ino okpalani.
|
|
\v 3 Ndjongo, ibali oyeweni ate, moto tueti inga akoasaka la mboka e elimo e Mwengei atiasa ate: Yesu abumakolani! Alidji moto tueti atiasa ate: Yesu adjei Likumu, inga te la mboka e elimo satu.
|
|
\p
|
|
\v 4 Kaikonde makao madjei ndenge la ndenge, ase Elimo edjei ekikima.
|
|
\v 5 Tomo egamesake wato idjei ndenge la ndenge, ase Likumu adjei moikima;
|
|
\v 6 Tomo idjei ndenge la ndenge, ase Mwengei moikima, ongo okokelaka djinge tomo kpaa ndondo e wato kpaa.
|
|
\p
|
|
\v 7 Kaikonde, Elimo ekweneneke atie moto la moto la loyi e kole esi ndjo.
|
|
\v 8 Laate eyaseli e lokenge ehekelani atie odji la mboka e elimo, eyaseli e oewi atie odji la obilei ndji Elimo eho.
|
|
\v 9 La odji, ogemei la mboka ndji e Elimo eho, atie odji makao makalesake la mboka ndji e Elimo eho.
|
|
\v 10 La odji koto okeli tomo tetelake, atie odji matiesakoli, atie odji oyewi kole e wingbundu winge widji la Elimo, atie odji minoko ndenge la ndenge, atie odji olimboli minoko.
|
|
\v 11 Ase tomo djiesi kpaa, Elimo ndji esi eho nde ekokelaka, ekokawelaka moto la moto ndenge nda ebali eho.
|
|
\p
|
|
\v 12 Ndji nda edjei wenge wikima, ase la wisuki ngbii, pe la wisuki kpaa e wenge waho, inga te ate ekodjaka ngbii, edjei wenge sa esi, Kilisito adjei ndji ndjongo.
|
|
\v 13 Laate, la omeemene, la mboka e Elimo sa esi iso kpaa topatali la wenge sa esi, Wayuda inga Wageleki, tuke la wango wa lipanda, watokengesali iso kpaa Elimo sa esi.
|
|
\p
|
|
\v 14 Laate wenge witi sa esuki eikima, ase wikelani la wisuki ngbii.
|
|
\v 15 Inga ekolo easa ate, “la loyi eti mbai ewo iti esuki e wenge, eti la ndenge eho nde ekodhee odjei esuki e wenge.”
|
|
\v 16 Inga litoi liasa ate,” la loyi eti mbai liso, iti pe esuki e ewenge,” eti la loyi laho nde ekodhee odjei esuki e wenge.
|
|
\v 17 Inga wenge kpaa edjakali liso, ooki eengali odjei eni? Inga wenge kpaa edjekali litoi, ooki lumba eengali odjei eni?
|
|
\v 18 Ase sikala Mwengei abati wisuki wa wenge waho, wesi la wesi eho, nda ebali inde.
|
|
\v 19 Inga waho kpaa widjakisa esuki eikima, nda wenge wilukaki ate widjee eni?
|
|
\v 20 Sika wisuki wa wenge widjei ngbii, ase wenge sa wikikima.
|
|
\v 21 Liso litiasa la ewo ate, “Iti la ehoha e owe.” Te moto mwase la makolo ate, “Iti la ehoha enu.”
|
|
\v 22 Ase wisuku wa wenge winge wikoeneneke ate wilembi, wiho nde widjei la kole esungu,
|
|
\v 23 ase, wisuki wa wenge winge wikweneke iso ate widjei la mogano mokeke tokowitemiaka waho ngbii eyeti, pe la ndenge eho, wisuki wasu wa soni, wikowongoko ngbii oyeti.
|
|
\v 24 Sikala wisuki wasu winge widjei wilamu witidjaaka la ehoha e ema teeti. Inga te ndjongo, Mwengei awanesali wisuki wa wenge, ahekelia mogano ngbii la esuki enge edjakali eho odjangi.
|
|
\v 25 Okawani oti ndondo e wenge laate wenge edjei ekikima la wisuki ngbii.
|
|
\v 26 Ase inga esuki esi ekookaka ekoni, wisuki kpaa wa wenge wikooka ekoni mongindji la eho; te inga esuki esi edja la mogano, wisuki kpaa koto wikoemele mongindji la eho.
|
|
\p
|
|
\v 27 Ino odjeini wenge wa Kilisito ase odjeini wisuki wande, ino kpaa, mwesi la mwesi odjeini wisuki.
|
|
\v 28 Ase Mwengei awabati wato ndondo e lingomba, liwoso watoma, e wale waaseli, esato watiesakoli, mbuse eho sambo kamwesake, mbuse eho makao makalesake, sambo gamesake sungu, oinyei, oasi minoko ndenge la ndenge.
|
|
\v 29 Iwo kpaa wadjei watoma? Iwo kpaa wadjei waaseli? Iwo kpaa wadjei watiesakoli? Iwo kpaa wakokelaka sambo kamwesake?
|
|
\v 30 Iwo kpaa wadjei la makao makalesake? Iwo kpaa wakokpomaka minoko ndenge la ndenge? Iwo kpaa wakokukolaka minoko?
|
|
\v 31 Lukani la egalela makao mango mayeti olamu. Kaikoase ibali oinyei ino mboka enge eyeti kpaa.
|
|
\c 13
|
|
\cl ESUKI 13
|
|
\p
|
|
\v 1 Inga ikokpomaka la minoko ma wato te e waahumbwa. Ase inga itidjee la libalano, idjei nda esuki e engbongolo enge edjangi ema ndondo te nda ngelengele enge ekobingaka iwo.
|
|
\v 2 Ase, inga idjei la likao e witiesakoli pe iyewi koto sambo eyaisake esatu kpaa, pe iyewi sambo kpaa, la inga idjei la ogemei wosungu wungo oengi olongosi te mikoli. Ase inga itidjee la libalano iti ema.
|
|
\v 3 Inga iwakawela wato wango wadjangi wilaka, inga ikawa wenge wambai ate, laaate iyagane, inga itidjee la libalano, ase ogemei wo mbai woti la ema.
|
|
\p
|
|
\v 4 Libalano lidjei la motema molai lidjéi la wouma. Libalano liti la zua, litiaganaka, litiahutoesaka la elolo
|
|
\v 5 litikelaka sambo dja soni, litilukaka ototi la oeteli, litihaka limemu, litiisaka limemu. Litiisaka sambo mbe la motema.
|
|
\v 6 Litiemeleke la sambo djinge idjangi womeemene, ase ibali sambo djinge idjei meemene.
|
|
\v 7 Likolimbesaka kpaa, likogemeiyaka sambo kpaa, edjei la mwano la sambo kpaa, ekodjaaka la mohandja e sambo kpaa.
|
|
\p
|
|
\v 8 Libalano litisilaka te keke. Inga edjaa sambo djinge iyaisi ikosila, edje minoko, ekosuka, edje oewi, wokosalamata.
|
|
\v 9 Laate todjei la woewi wokeke, ase tokwasaka sambo iyaisi la wokeke.
|
|
\v 10 Ango ekodja ema enge edjei kpaa, enge ekeke ekosalamata.
|
|
\v 11 Ango odjakali mbai mana mokeke, idjakali okpomi nda mana mokeke, idjakali omungoi nda mana mokeke, ango oumia mbai eloko moto iwosania djinge dja wolenge.
|
|
\v 12 La keke tokweneke ma pii, la talatala, ase tokoene maiso la maiso. La keke iyewi ma ndambo, ase ikoewa olamu, ndji ndenge eyewani mbai.
|
|
\v 13 Sikahala wi wiho wisato witikali: ogemei, mwano la libalano. Ase enge eyeti kpaa edjei libalano.
|
|
\c 14
|
|
\cl ESUKI 14
|
|
\p
|
|
\v 1 Lukani libalano, lukani la egalala makao ma elimo, ase la oyeteli enge etiesakolake.
|
|
\v 2 Laate moto ongo okwasaka la monoko mwesi ndjo, aasiti la wato, ase la Mwengei. Laate moto atioka, ase akwasaka wasekele esatu la mboka e elimo.
|
|
\v 3 Kaiko nde moto ongo okotiesakolaka, akomaaka koto la ohi mohandja koto la ohekeli egalela.
|
|
\v 4 Moto ongo okoasaka la monoko mwesi ndjo, akoyamaaka inde amene, ase ongo okotiesakolaka, akomaaka lingomba.
|
|
\p
|
|
\v 5 Ikoemele inga ino kpaa oasani la minoko madji, ase ibali pendja ate otiesakoleni. Moto ongo okotiesakolaka amweti ongo okwasaka la minoko madji, longosa ndji inga akukola eho laate Lingomba limaame.
|
|
\p
|
|
\v 6 Ase sikahala, wamanima inga iyasa la ino minoko madji, ikookelelani ino nde inga itiase la eeneseli inga te la wewi, inga te etiesakoli, inga te la litio liesi ndjo?
|
|
\v 7 Inga winge widjangi ohatiani, wikoumesaka moli, nda mweka, te esandjo inga etietesane nda ndenge ema enge ekobinganaka la mweka inga te esandjo ekwewana?
|
|
\v 8 Ase inga lihili litiwumese sambo la hoho, ndai okoawongele la wita?
|
|
\v 9 Ndindjongo pe inga ino, la mboka e wolemi, okoumesakani sambo djinge iti petee la ohelesi gbondo, nda ndenge ekwewana sambo djinge iyasani? Meemene okwasani nde la ehoho.
|
|
\v 10 Eengi odjei ate ndenge easake edjei ngbii la moki, ase ndenge teeti edjangi olumbolani.
|
|
\v 11 Ase inga itiewe gbondo e loi wungo oasani, ikodjaa modjidji la maiso ma moto ongo okwasaka, koto moto ongo okoasaka akodjaa modjidji la maiso ma mbai.
|
|
\v 12 Ndji nda ino, nda edjei ino la ehoha e makao ma elimo, lukani otumeni la eho, laate lingomba limaame.
|
|
\p
|
|
\v 13 La ndjongo, moto ongo okwasaka la monoko mwesi ndjo, akonge laate aenge okukoli eho.
|
|
\v 14 Laate inga ikoyakongoko la monoko mwesi ndjo, edjei likao la mbai e elimo nde ekoyakongoko, ase lomungo wo mbai woti ema teeti.
|
|
\v 15 Ekelane woni? Ikoyakongo la likao e elimo, ase ikoyakongo koto la mamungwene ma mbai. Ikolemba lembo dja oemeli la likao e elimo, ase ikolemba koto lembo e oemeli e mamungwene ma mbai.
|
|
\v 16 Inga edjei ndjongo, inga okohekeleke mwemu la likao liesi ndjo e elimo, nda ndenge moto ongo oyabati la ebete e moto mpamba akoasa “Amen” la mwemu ma owe, nda atiewe sambo djinge ikoasaka owe?
|
|
\v 17 Okowongosaka pambo la ndenge ndamu, ase odji amaaniti.
|
|
\v 18 Ikomowongoselaka Mwengei pambo nda ekwasaka mbai la minoko oleki ino kpaa.
|
|
\v 19 Ase, la ndondo e lingomba ikoemele nde oasi wingbundu itano la lokenge wo mbai, laate ienge koto oinyei wadji la monoko moholi e wingbundu koto liomu la monoko mwesi ndjo.
|
|
\p
|
|
\v 20 Wamanima, otidjakeni wana la ndenge e okpomi, ase djaani wana la obe. Kaikonde djaani wiloko wato la ndenge e okpomi.
|
|
\v 21 Edhingani la Pui ate, “Ikwasa la waa wato la minoko ma wadjidji, koto la wingbundu e wadjidji, ase te ndjongo watondjoka mbai, ndjongo eyasi Likumu.
|
|
\p
|
|
\v 22 La ndjongo, oasi la minoko madji edjei elembo, te atie wagemei. Ase atie wango wati la ogemei, kaiko nde otiesakoli wodjei atie wato wango wadjangiti ogemei, ase atie wato wango wadjei la ogemei.
|
|
\v 23 La ndjongo, inga lingomba liesi kpaa liabolia ebete eikima, ase iwo kpaa wakokpomaka la minoko madji, ase wato pamba te wato wango wadjangi ogemei walingelia ndondo, watoasa ate ino odjeini la ekoni e boli?
|
|
\v 24 Ase inga ino kpaa okotiesakolaka ase moto mwesi ongo oti la ogemei, te moto mpamba alingelia, apamelania la wato kpaa, adhendelania olamu la wato kpaa.
|
|
\v 25 Wasekele dja motema monde eenania la hoho, ndjongo akokua la panda ende, koto akoyakongo la Mwengei, akoasa: Mwengei adjei ndondo enu.
|
|
\p
|
|
\v 26 Tokele woni, wamanima? Ango obolianiani ebete eikima, mwesi adjei la lembo esi ndjo, odji adjei la litio liesi ndjo, odji adjei la eeneseli esi ndjo, odji adjei la monoko mwesi ndjo, odji adjei la olumboli esi ndjo. Sambo kpaa ikelana la omaani.
|
|
\v 27 Inga moto akwasaka la monoko mwesi ndjo, esuke la wango wale te wasato, pe moto la moto la mokombe monde, pe moto mwesi akukole.
|
|
\v 28 Ase inga moto ongo okukolake monoko ati, moto oho adake bi la lingomba, pe aase la inde amene koto la Mwengei.
|
|
\p
|
|
\v 29 Alidji, watiesakoli wale te wasato waase, ase wango wadji wadhenge wolamu wolamu.
|
|
\v 30 Ase inga eeneseli esi edja atie moto odji engele oyabati inde ango, ongo o liwoso adhike monoko.
|
|
\v 31 Laate ino kpaa oengini otiesakoli moto la moto la ngala ende, la ebili ate wato kpaa wapundesane koto wato kpaa wadje la mohandja.
|
|
\v 32 Laate makao ma elimo e watiesakoli ewongi otekisani ndji la watiesakoli.
|
|
\v 33 Laate Mwengei ati Mwengei o ewodje, ase o logoo. Nda la Mangomba ma wasatu kpaa.
|
|
\v 34 Wali wadake bi la mangomba, laate watiwahe mboka eyasake, ase wayatitimese nda eyasi pui.
|
|
\v 35 Inga wabali oewi loi wesi ndjo, wawahuele walome wau la monguta, laate edjei osambo moli aase la lingomba.
|
|
\v 36 Edjei nde atie enu engbundu e Mwengei epumbali? Inga ndji atie ino nde eho eumali?
|
|
\v 37 Inga moto mwesi agemeiya ate adjei motiesakoli, te akondji likao e elimo, agemeiye sambo djinge ikoodhingelakani ino, laate edjei pui e Likumu.
|
|
\v 38 Ase inga moto mwesi adjangia oyewi, atikale sa ndjongo.
|
|
\p
|
|
\v 39 La ndjongo, wamanima, lukani la egalala witiesakoli, ase woitekesakeni eyaseli e minoko madji.
|
|
\v 40 Ase sambo kpaa ikelane la ndenge e mogano koto la ekalakala.
|
|
\c 15
|
|
\cl ESUKI 15
|
|
\p
|
|
\v 1 Sika ndjo wamanima ikoaselakani ino mboli ndamu enge ewaselalini mbai, enge ekondjali ino, enge ndondo eho oyamaliani,
|
|
\v 2 enge ndondo eho koto okaligani, la wingbunu winge iyotiesakolalini ino mboli ndamu, inga okoyahelelakani la eho, inga te ndjongo ogemei wonu woti la kole.
|
|
\p
|
|
\v 3 Iyopundesalini ino liwoso la sambo kpaa mapundesi mango makondjali mbai amene, ate Kilisito agwali la loi e masumu masu la odhendeli Madhingo,
|
|
\v 4 alidji aombanali, ase inde asusuali mbuse e masio masato la odhendeli madhingo.
|
|
\v 5 Inde amopumbelali Kepa, la mbuse eho watutiani wande liomu la wale.
|
|
\v 6 Mbuse eho, awapumbelali wamaangbasu wadji oyeti kama itano mbala kikima. Wango ngbii djawu wadjei yo tee sikandjo, ase wadji waguali gaa.
|
|
\v 7 Mbuse eho amopumbelali Yakobo, koto mbuse watutiani kpaa.
|
|
\v 8 La gboo, mbuse ewu kpaa andjumelali mbai koto, nda atie mana ongo owotami mangombe.
|
|
\v 9 Laate mbai idjei mokeke owaleki watutiani kpaa. Iyengiti koto owelani motutiani, la ebili ate iyeneseli lingomba la Mwengei wodjidji.
|
|
\v 10 Ase la loyi e magba ma Mwengei, idjei ndji nda edjei mbai. Koto magba mango mabatali inde atie mbai etikeeli pamba, ase ikelali wotomu owaeti watutiani wadji kpaa. Kaikoase eti mbai, ase magba ma Mwengei mango madjei la mbai mongindji nde makokelaka.
|
|
\v 11 Nde ndjongo inga te loi wolongwa atie mbai, inga te wolongwa atie wu loi wungo wokoasaka iso wodjei wungo wogemeiyali ino.
|
|
\p
|
|
\v 12 Inga tokoasaka ate Kilisito asusoi gaa ndondo e wato wagwake, ndjongo nda ndenge wato wadji ndondo enu wakoasaka ate obasi e wato waguake eti?
|
|
\v 13 Ase inga meemene obasi e wato waguake eti, Kilisito koto atisusuali;
|
|
\v 14 Ase inga Kilisito atisusuali, te oasi wosu wodjei pamba.
|
|
\v 15 Alidji, toenani koto ate tokoasaka moleho la kombo e Mwengei, la ebili ate tomohengeli Mwengei sambo la ndenge toasi ate inde amosusolali Kilisito, kaikoase atimosusolali, inga meemene, wato waguake watisusuaka.
|
|
\v 16 Laate inga wato waguake watisusua, Kilisito koto atisusuali.
|
|
\v 17 Ase inga Kilisito atisusuali wogemei wonu wodjei mpamba, odjeiniyo ndondo e masumu manu.
|
|
\v 18 La wango walangali ndondo e logoo mongindji la Kilisito wawusigaa mboka.
|
|
\v 19 Inga ndji la ehele mokalo nde tomobatelali Kilisito mwano, todjei amene wato wa magba owaleki wato kpaa.
|
|
\p
|
|
\v 20 Ase sika ndjo, Kilisito asusoi tee atie wato waguake, inde pukapuka e liwoso e wango walangali ndondo e logo.
|
|
\v 21 Laate ndji nda edjali logo la mboka e moto moikima, ndji ndjongo, obasi e wato waguake edji koto la mboka e moto moikima.
|
|
\v 22 Ndji ndenge wato kpaa wakoguaka ndondo e Adama, wato kpaa koto wakowongosana la mokalo ndondo e Kilisito.
|
|
\v 23 Ase moto la moto adjei la mokalakala monde: Kilisito adjei moto osusoi liwoso la wu, mbuse eho wato wa Kilisito ango ekouma inde.
|
|
\v 24 Mbuse eho, gboo ekouma, ango ekowongola inde okumu atie Mwengei onde koto Wawa, ango ekoola inde oyamaleli kpaa, okumu kpaa, okulu kpaa.
|
|
\v 25 Laate eengi Kilisito aamalele tee engele Mwengei akobata mitone mande kpaa sese e makolo mande.
|
|
\v 26 Motone mo gboo mungo mokomola inde modjei logo.
|
|
\v 27 Laate Mwengei “abatali wihoo kpaa sese e makolo mande.” Ase ango easia inde ate wihoo kpaa wibatani sese, ekoeneseke la hoho ate atitange moto ongo abatali wihoo kpaa sese ende.
|
|
\v 28 Engele ekobata Mwengei wihoo kpaa sese ende, Mana inde amene koto akoyabata sese e Moto ongo abatali wihoo kpaa sese e wokumu wonde, laate Mwengei adje sambo kpaa atie moto kpaa.
|
|
\p
|
|
\v 29 Inga te ndjongo, wango wakopatisamaka laate wadje wato waguake wakokela woni? Inga wagbaakana watisusua, ndjoni iwo koto wakopatisamaka laate wadje ndenge eho?
|
|
\v 30 Ndjoni koto todjei ndondo e huko engele kpaa?
|
|
\v 31 Lisio la lisio ikodjaaka liwoso la logo! Wamanima ikogemeisaka eho la mboka e mwemu enge edjei mbai la eho la loyi enu ndondo e Yesu Kilisito Likumu lasu.
|
|
\v 32 Inga la ndenge e wato, isanali la wambau mbe la Epeso, eho edjei la nda kole atie mbai? Inga wato waguake watosusua, “tolake tokenge koto, la ebili ate lekundu tokogua.
|
|
\v 33 Otiakosakeni: “Wabola mbe wakobitesaka wikaleli wilamu.”
|
|
\v 34 Susuani! Wongwelelani mamungwene manu malamu la nenge enge eokani la sambo ndamu, otikelakeni koto lisumu, laate wadji watimoyewe Mwengei. Ikoasaka ndjongo laate iyokese ino soni.
|
|
\p
|
|
\v 35 Moto odji akoasa ate: Wato waguake wakosusua nda ndenge? Wakodja la wenge e nda ndenge?
|
|
\v 36 Odjei ekete! Ema enge ekoonaka owe itiwongwaka la mokalo inga etiguakeyo liwoso.
|
|
\v 37 Ema enge eoni owe la mbume, eti pukapuka enge ekotoo. Edjei pukapuka mpamba, eengi koto odjei pukapuka e mondongo te pukapuka e ema edji kpaa.
|
|
\v 38 Ase Mwengei akohekeleke eho wenge ndenge inde amene abali, koto la mogono mwesi la mwesi la wenge waho amene.
|
|
\v 39 Moeni kpaa etidjaaka moeni e ndenge kikima, ase moeni modji modjei mo wato, moeni modji modjei mo nama, moeni modji modjei mo mbulu, modji koto modjei mo su.
|
|
\v 40 Wenge wa likolo koto widjei, wenge wa moki widjei. Ase otwa e wenge wa likolo edjei la ndenge eho, enge e mbume koto edjei la ndenge eho edji.
|
|
\v 41 Otwa e wuse edjei la ndenge eho, otwa e ndebo koto edjei la ndenge eho, otwa e minoto edjei la ndenge eho. Wenge la wenge edjei la otwa eho.
|
|
\p
|
|
\v 42 Edjei koto ndjongo la loyi e obasi e wato waguake. Eho eonani ndondo e oholi, esusuani la odjangi oholi.
|
|
\v 43 Eonani ndondo e soni, esusuani ndondo e otwa. Eonani ndondo e olembi, esusuani ndondo e okulu.
|
|
\v 44 Eonani wenge e moeni, esusuani wenge e elimo. Inga wenge wa moeni modjei, enge e elimo koto edjei.
|
|
\p
|
|
\v 45 Edhingana koto ate, “Moto o poo Adama aumali elimo e mokalo.” Adama o mbuse aumali elimo enge akohaka mokalo.
|
|
\v 46 Ase eti enge e elimo nde ekodjaka poo, edjei enge e wenge, enge e mbuse nde enge e elimo.
|
|
\v 47 Moto o liwoso alongwali la mbume akelanali la miisu. Moto o wale alongoyi ongo likolo.
|
|
\v 48 Ndenge moto ongo okelanali la miisu adjei, wango koto wakelani la miisu wadjei ndji ndjongo, ndenge moto o likolo adjei, wango wadjei wato walikolo wadjei ndji ndenge eho.
|
|
\v 49 Ndji ndenge tokpalali elima e moto ongo okelanali la miisu, tokokpala koto elima e moto oho o likolo.
|
|
\p
|
|
\v 50 Wamanima, ehele edjei loi wungo wopotia mbai woasi, ate moeni la makila eengiti okondji lisango e wokumu wo Mwengei. Oholi koto eengiti ototi lisango e odjangi oholi.
|
|
\v 51 Dhenda! Ikoaselakani ino sekele esi mosatu: Iso kpaa totilangala ndondo e logo, ase tokouma ndenge eti iso kpaa.
|
|
\v 52 Mbala esi nda olimi maiso ango ekoboma mweka mo gboo. Laate mweka mokobomana, wato waguake wakosusua, wato wango watiholo, iso koto tokowuma ndenge eti.
|
|
\v 53 Laate wenge winge wiholoke wikokpala winge witoholoko, pe wenge winge wiguake wikokpala winge witiguaka.
|
|
\v 54 Ase ango enge eholoke ekokpala odjangi oholi, enge koto eguake eengi okpali odjangi ogui, engbundu eho ekoenga enge edhingana ate: “Logo elongosani libela.”
|
|
\q1
|
|
\v 55 Logo, wolongi wo owe wodjei eni? Logo esueli e owe wodjei eni?
|
|
\p
|
|
\v 56 Esueli enge ekohekeleke logo edjei lisumu, ase wokulu e lisumu elongoyi la pui.
|
|
\v 57 Ase kekedhinge la Mwengei ongo okotohaka iso lilonga la mboka e Likumu lasu Yesu Kilisito!
|
|
\p
|
|
\v 58 Ndjongo, wamanima wa mbai wa libalano, yamalani gboo. Otiabandeni, kelani wotomu wo Likumu la motema mohelake, laate oyewini ndondo e oboliani wonu mongindji la Yesu wotomu wungo wokokelakani ino woti pamba.
|
|
\c 16
|
|
\cl ESUKI 16
|
|
\p
|
|
\v 1 La enge edhengi okongoli makao mango ma wasatu, ndji ndenge iwahali mangomba ma Wagalatia matiesakoli, ino koto kelani ndjongo.
|
|
\v 2 Lisio kpaa e liwoso la poo e poso, mwesi la mwesi la ino ndondo e monguta monde ayise ma ema la odhendeli wihoo winge widjei inde la eho, ndjongo ango ekodjaa mbai makao matikongolane la engele eho.
|
|
\v 3 Ango ekodja mbai, wato kpaa wango ekowagemeiyani ino la mboka e ekpata, ikowatoma wakpale likao lanu e magba la Yelusalema.
|
|
\v 4 Inga ewongi la mbai okii koto ongo, ikotinga la iwo mongindji la mbai.
|
|
\p
|
|
\v 5 Ase ikodjaa atie enu ango ekosilisa mbai okpandji Masedonia, laate ikokpandaka Masedonia.
|
|
\v 6 Imungoi ate ikoyabata inga ikoetesa engele e pio mongindji la ino, laate okeni otiki mbai la mboka ongo ekoke mbai.
|
|
\v 7 Laate ibaliti oeni ino ndji ango ekoeta mbai. Ikoanaka oyabati maa keke mongindji la ino, inga Likumu aha mboka.
|
|
\v 8 Ase imungoi oyabati ahala la Epeso, tee wuse wo Patekote,
|
|
\v 9 laate modhuhe mosungu, enge ekohekeleke mboka la otomu, edhukuani liwoso la mbai, ase wayamaleli wadjei ngbii.
|
|
\p
|
|
\v 10 Inga Timoteo auma, kelani la ndenge enge ekoenese ate okomuemelekeni wolamu, laate inde akokelaka wotomu wo Likumu, nda mbai.
|
|
\v 11 Ewongiti ate moto tweti amoenele. Mogamesani la okendo ewongwake atie mbai la logoo. Laate awume atie mbai, ikomolambalaka mongindji la wamangbasu.
|
|
\p
|
|
\v 12 Laate, la loi wo mangbasu Apolosi, iyakongoli la inde ngbii ate adje atie enu mongindji la wamangbasu, ase mwano monde motidjali te okeke la odji sikala. Ase akodja ango ekotota inde nano ndamu.
|
|
\p
|
|
\v 13 Huakani, ahelelani la ogemei, djaani wato wa mohandja, wato watetelake.
|
|
\v 14 Kelani wotomu wonu kpaa la libalano.
|
|
\p
|
|
\v 15 Ikoohekelekeni ino egalela, wamanima, oyewini ate liwota e Setepano wadjei pukapuka e poo e Akaya, wayahi koto la owakeleli wasatu,
|
|
\v 16 Ino koto yadjimbesani liwoso e wato e ehenge ndenge liwoso koto o moto kpaa akohaka mawo pe okokelaka otomo etetelake.
|
|
\v 17 Idjei la mwemu la odji e Setepano la Polutunatusi la Akaikusi. Wadjei ahala, laate wakokelaka ebete enu la ebili ate otini ahala.
|
|
\v 18 Laate wahekele mohandja la molimo mo mbai koto enge enu. La eho gemeiyani wato e enge ndenge.
|
|
\p
|
|
\v 19 Mangomba ma Mwengei mango madjei la moki mo Azia waohekelini mobale. Akila la Pisika mongindji la lingomba linge lidjei la monguta mou waohekelini ino mobale la motema kpaa ndondo e Likumu.
|
|
\v 20 Wamangbasu kpaa wango wadjei ahala waohekelini ino mobale. Hanani mobale la ombomboni esatu.
|
|
\p
|
|
\v 21 Mbai Polo, iyohekelini mobale la mawo ma mbai amene.
|
|
\v 22 Inga moto atimobale Likumu eongi wamobumakole. Likumu lasu, djaka!
|
|
\v 23 Magba masungu e Likumu Yesu Kilisito edjee la ino.
|
|
\v 24 Libalano la mbai lidje la ino kpaa mongindji ndondo e Yesu Kilisito.
|