bbm_reg/46-ROM.usfm

\id ROM
\ide UTF-8
\h Waloma
\toc1 Waloma
\toc2 Waloma
\toc3 rom
\mt Waloma
\c 1
\cl ESUKI 1
\p
\v 1 Polo, motuke mo Yesu Kilisito pe moto ongo owelani laate adje toma, ongo aononi laate atiesakole mboli ndamu e Mwengei.
\v 2 Enge Mwengei aunaali la mboka e watotoli wande pe la madhingo masatu,
\v 3 la loyi e mana onde ongo owotamali moto la litoto e Dawidi.
\v 4 Ongo, ngambo e elimo satu, atangamali mana o Mwengei la okulu e libasi mbuse e logo: Yesu Kilisito Likumu lasu.
\v 5 Ongo la mboka ende tototi magba masungo e kelake otomo mosatu e toma la oinei la mboka e kombo ende wato wa miki kpaa etemeya e ogemei;
\v 6 miki atie ino pe owelanini laate odjeeni wato wa Yesu Kilisito.
\v 7 Atie wato kpaa wadjei la Loma, wato wango Mwengei awabali, wango awaweli laate wadje wasatu: Magba masungu pe logoo e Mwengei sangbasu pe e Likumu Yesu Kilisito edje la ino.
\p
\v 8 Liwosoyo kpaa, imowongoseli Mwengei o mbai dombwa la mboka e Yesu Kilisito, la loyi e ino kpaa, laate la miki kpaa wato wakoaselaka mboli e ogemei wonu.
\v 9 Laate Mwengei, ongo ikomokelelaka otomo mosatu la molimo mo mbai la loyi e mboli ndamu e mana onde, ayewi ndenge ikootolokoni wiengele kpaa la oyakongi wo mbai,
\v 10 ikoyakongoko ate sikalandjo, inga ekoenga, sambo dja mbai e gboo esombe olamu la mwano mo Mwengei laate idje atie ino.
\v 11 Laate idjei la ehoha etetelake e oeneni la ino, la ebili ate iohekeleni ma likao e elimo laate oumeni la otetelake.
\v 12 Inga, kaikoase, laate tohekelane mohandja, moto la moto adje la mohandja la ogemeyi e odji, enge enu eumese mbai la mohandja pe enge e mbai eumese ino pe la mohandja.
\v 13 Wamanima, ibali oyewi ate mbala ngbii ikoanaka odji atie ino, kasi tee sikalandjo itotiti mboka, laate itote pe ma pukapuka atie ino ndenge kikima pe la miki mingi mitikali.
\v 14 Idjei la nongo e Wageleki pe e Wabalabala, e wato wa lokenge pe e wikete.
\v 15 Ndjongo idjei la ehoha etetelake e otiesakoli ino wato wango wayabati la Loma mboli ndamu.
\p
\v 16 Laate itiokelaka mboli ndamu ndundu, aseko, eho nde okulu wungo Mwengei akokelelaka la ebili ate moto kpaa ongo odjei la ogemei akale, Moyuda liwoso, pe alidji Mogeleki.
\v 17 Laate olamu wo Mwengei wokoeneneke la ogemei wungo moto adjei la eho pe eho ekobekisaka ogemei wonde ndenge edhingani ate: Kasi moto molamu la ogemei akodja la mokalo.
\p
\v 18 Limemu e Mwengei ekolongwaka likolo pe odjimbeli ekaleli kpaa edhendeake Mwengei pe sambo kpaa edjangake womeemene e wato wango wakodhihaka womeemenene la sambo djinge idjangi womeemene.
\p
\v 19 La ebili ate loyi wo Mwengei wungo waengi iwo oyewi ekoeneneke la hoho ndondo ewu, laate Mwengei akoeneseleke iwo eho la hoho.
\v 20 Laate wikaleli wande winge witieneneke ekoeneneke la hoho tee la lipotele e moki, la ebili ate ekoeneneke la mboka e wiho winge ekeli inde, okulu wonde wo libela, pe Womwengei wonde, eho lenge wati te la ema teeti eyaselake.
\v 21 La ebili ate, inga te ate wamoewali Mwengei, watimoganali ndenge wakomoganaka Mwengei, pe watimohali dombwa, kasi mamungwene mau eumali e wikete pe motema mou mungo modjangi lokenge eumali molili.
\v 22 Inga te ate waasa ate wadjei wato wa lokenge, kasi waumia wato waboli.
\v 23 Pe wadheiya omogani Mwengei ongo otiholoko waumia ogani elima e moto ongo okoholoko pe e mbulu pe e nama ikosombaka la mangbanda manei, pe la wandjoo.
\p
\v 24 Eho lenge la obilei wihoha e miteme mawu, Mwengei awadheiya iwo wakele sambo dja onalili, laate wenge wau amene wioke ndundu.
\v 25 Wango waonoli ogemei moleho la ebete e ogemei meemene e Mwengei pe wayakongali pe wakelelali wiho winge wikelami la otomo wosatu la ebete e oyakongi pe okeleli Moto ongo okelali eho, ongo opambwani libela la libela. Ame.
\p
\v 26 Eho lenge Mwengei awadheiya watutie wihoha e wanesake wenge la ndenge e ndundu, la ebili ate wali wau wadheiya ndenge enge ewongi owanesi wenge, waumia owanesi wenge la ndenge enge ewongiti.
\v 27 Pele pe ndenge kikima wadheiya ndenge enge ewongi owanesi wenge la moli pe waumia olongoli pendja la ehoha etetelake iwo la iwo, pele la pele, wakokelaka sambo dja ndundu pe wakototaka liputi kpaa, enge ewongi la liwunga lau.
\p
\v 28 Nda etoni iwo ototi oyewi wo meemmene e Mwengei, Mwengei awadheiya watotie mamungwene mango atigemeyaka, laate wakele sambo djinge iwongiti.
\v 29 Watumi la sambo djinge idjangi omeemene, la obe, la wononi, la motema mobe, la mohela, la ekaleli e oolake wato, la mosio, la ekosako, la lokenge mbe, wadjei wato wa ndungwanake,
\v 30 waasani sambo mbembe ndondo ewu amene, mitone ma Mwengei, wato wa ogene, wato wa elolo, wato wango wakoyaganaka, wato wango wakolukaka ndenge poli ekelake sambo mbe, wato wango watitemeyaka wa sangbau la wa ngbau.
\v 31 Wadjangi lokenge, watiengesaka mauna mau, watibalanaka ndondo e lowela, wadjangi motema magba.
\v 32 Inga te ate wayewi olamu pui e ekaleli elamu e Mwengei, ate wato wango wakokelaka djinge sambo wawongi la logo, wadjei ndji wakokelaka eho, watisuke ango, kasi wakoemeleke pe la wato wango wakokelaka sambo djaho.
\c 2
\cl ESUKI 2
\p
\v 1 Odja te ndai, moto, owe moto okotenaka sambo, oti la loyi eyasake inga okosambesaka. Laate, ango ekotenaka owe sambo e wiino wa owe, okoyahelaka owe amene, la ebili ate owo ongo okosambesaka okokelaka pe ndji ndjongo nda iwo.
\v 2 Toyewi ate Mwengei akosambesaka wato wango wakokelaka djingi sambo, pe osambesi e Mwengei ekotutiaka omeemene.
\v 3 Kasi owe moto, omungoi ate okotila osambesi e Mwengei ango okotenaka sambo dja wato e ndenge enge, kaiko owe pe okokelaka ndjinge sambo?
\v 4 Inga nde okodhendjiaka wogumake e wolamu wonde pe ekaleli ende enangake motema, pe e motema molai monde? La ebili ate otiewe ate womoto wo Mwengei eengi ookpali owe okukole motema?
\v 5 Kasi nda edjei owe la motema motetelake, pe otonia okukoli motema, okoyawelelaka nde limemu lisio la gboo pe Mwengei akoenese limemu laho lisio linge akosambesa wato walamu.
\p
\v 6 Wuse wungo wokomoputa inde moto la moto la otutei tomo djande.
\v 7 Akohekele mokalo mo libela atie wango wakolukaka otwa, mogano la wenge winge witiholoko la ndenge wakodjaaka la mohandja la tomo ndamu.
\v 8 Akoenese oendji la limemu atie wato wango wabali misio pe wango watitemeyaka womeemene kasi wakotemeyaka sambo djinge idjangi womeemene.
\v 9 Wodjidji la wilelo wikodja atie wato wango wakokelaka sambo mbembe, liwoso yo atie Moyuda, ase mbuse atie Mogeleki.
\v 10 Otwa, mogano la logoo atie moto kpaa ongo okokelaka enge edjei olamu, Moyuda liwoso, ase mbuse Mogeleki.
\v 11 La ebili ate Mwengei ationoko mbanda.
\p
\v 12 Wato wango waewiti pui, ase wakokelaka masumu, wakogua inga te ate watidjakali la pui, kasi wato kpaa wango waewi pui ase wakokelaka masumu, wakosambesama la otutei pui djaho.
\v 13 La ebili ate, la maiso ma Mwengei, wato walamu wati wango wakookaka pui, kasi wango wakotemeyaka pui dja Mwengei nde wakotangama wato walamu.
\v 14 Engele wato wa miki minge wati la pui wakokelaka sambo dja pui ndji nda ndege edjei iwo wato, wato waho, inga te ate watidjaka la pui, wadjei la pui la mitema mau amene.
\v 15 Iwo nde wato wango wakoeneseke ate sambo dja pui isiakani la mitema mau, ango oewi wou ekototoloko mongindji la iwo pe, la mamungwene mau amene, ekoapundaka inga pe ekowalongisaka.
\v 16 Eho ekokelama la lisio linge Mwengei la mboka e Yesu Kilisito akosambesa sambo dja wato djinge iisana, la otutei mboli ndamu enge ekotiesakolaka mbai.
\p
\v 17 Kaikonde, inga wakoowelaka Moyuda pe okobataka motema la pui pe okoyaganaka la loyi e Mwengei,
\v 18 pe oewi mwano monde pe okogemeyaka sambo ndamu ngbii la ebili ate waotiesakolate pui la monoko;
\v 19 pe okogemeyaka ate odjei mosombesi e wato wagwi maiso, hoho e wato wango wadjei la molili,
\v 20 monanoli e wikete, motiesakoli e wana wakeke pe moto ongo onangi gbondo e sambo e lipoteli e oewi pe e omeemene enge edjei ndondo e pui.
\v 21 Ase owe moto ongo okotiesakolaka wato wadji, otiyatiesakolaka owe amene? Owe moto okotiesakolaka ate otiyiwe, otiyiwaka?
\v 22 Owe moto okwasaka ate, wato watikele eteba, ndjoni ekokelaka owe eteba? Owe moto ongo otoni pui, ndjoni ekoiwaka owe la ndondo e watepelo?
\v 23 Owe moto ongo okoyaganaka la loyi e pui, okomookesaka Mwengei ndundu okokelaka nsambo djinge itekesani la pui?
\v 24 Laate, kombo e Mwengei ekotanganaka la miki, la loyi e ino, ndji nda ndenge edhingani.
\p
\v 25 Meemene, otenani kombeni edjei la kole ndji inga okotemeyaka pui, kasi inga okobukaka pui, oteneni kombeni e owe eumia odjangi otenani kombeni.
\v 26 Eho lenge inga moto ongo otenaniti kombeni, akotemeyaka maongani ma omeemene ma pui, odjangi oteneni wonde ekotangema nda otenani kombeni, te ndjongo?
\v 27 Pe moto ongo wenge wande eteneniti kombeni, ango ekoengesaka inde pui, akoosambesa owe moto odjei la pui enge edhingani pe otenani kombeni kasi okobukaka pui.
\v 28 Laate Moyuda etidje moto ongo odjei ndjongo saa, ndji ndenge kikima pe otenani kombeni edjeiti ongo okoeneneke saa e wenge.
\v 29 Kasi Moyuda omemene edjei nde moto ongo odjei ndjongo la ndondo, pe otenani kombeni e inde edjei enge e motema la elimo, kasi te e pui djinge isiakani. Mogano e moto oho elongoiti atie wato, kasi atie Mwengei.
\c 3
\cl ESUKI 3
\p
\v 1 Moyuda aeti wadji wato la nde, inga otenani kombeni edjei la nda kole?
\v 2 Aeti la sambo kpaa. Liwoso liwosoyo, laate wawahali iwo maloba masatu ma Mwengei.
\v 3 Sikalandjo toase woni? Inga wadji Wayuda wadjangi ogemei, odjangi ogemei wou eengi okeli ate womeemene wo Mwengei etikele otomu?
\v 4 Te, te wokeke! Kasi dhee eenane ate Mwengei akoasaka meemene, inga te ate moto kpaa akoasaka moleho, ndji ndenge edhingani ate: Laate owe oenane moto molamu la maloba ma owe pe olonge engele ekosambaka owe.
\p
\v 5 Kaikoase, inga odjangi womeemene wosu epumbesia la hoho womeemene wo Mwengei, tokoasa nde? Mwengei adjangi nde womeemene ango ekopumbesaka inde limemu lande? (Ikoasaka ndenge ekoasaka moto).
\v 6 Te, te wokeke! Inga ndjongo, Mwengei akosambesa moki nda ndenge?
\v 7 Kaiko ase inga la loyi e moleho mo mbai womeemene e Mwengei eeneni la hoho alidji la loyi e otwa wonde, nda ndenge sikandjo wakwesi mbai la loyi ate idjei moto mobe?
\v 8 Pe nda ndenge totiase, ndenge wadji wato wakotohengelaka iso ate tokoasaka: Dhee tokele obe la ebili ate sambo ndamu edje? Wato waho wakokondja eguele esungu enge eengemani la omeemene.
\p
\v 9 Toase woni? Iso nde todjei ebete enge eeti wolamu? Te ndjongo! La ebili ate liwoso toenesali ate Wayuda la Wageleki iwo kpaa wadjei wato wamasumu.
\v 10 Ndji ndenge edhingani ate: Moto tueti adjei moto molamu, te te mokikima.
\v 11 Moto tueti ati la lokenge e ookake; moto tueti akomolukaka Mwengei.
\p
\v 12 Wato kpaa wadheiya mboka, iwo kpaa waumia pamba; moto tueti akokelaka olamu, te te mokikima.
\q
\v 13 Mooli mowu edjei mbila e ohola, wakokelelaka olemu wowu la ohengeli. Ngenge e ndjoo edjei la wihulu wau.
\q
\v 14 Pe monoko mowu etumi la liwuna mbe pe la maloba mbe.
\q
\v 15 Mangbanda mawu makokeke obangu oswi makila.
\q
\v 16 Obitisani la magba widjei wiati kpaa ekosombaka iwo.
\q
\v 17 Pe wayewiti mboka e logoo.
\q
\v 18 Omowangi Mwengei eti la iwo te wokeke.
\p
\v 19 Toewi ate nsambo kpaa djinge ekoaselaka pui easi djaho la wango wadjei sese e pui, laate monoko kpaa modhikane pe moki kpaa edje la huko liwoso la Mwengei.
\v 20 Eho lenge moto te moikima akotangama moto molamu liwoso lande la sambo dja pui, la ebili ate la mboka e pui nde lisumu eyewani olamu.
\p
\v 21 Kasi sikahala nda ndenge pui eti kine, wolamu wo Mwengei eenani la hoho, ndenge pui pe watiesakoli watotoli la loyi laho;
\v 22 Wolamu wo Mwengei la mboka e omogemei Yesu Kilisito, la loyi e wato kpaa wango wadjei la ogemei. La ebili ate woetisani woti.
\v 23 Laate wato kpaa wakeli lisumu watiwumaka la otwa wo Mwengei,
\v 24 ase edjei nda watoti likao e pamba la ndenge ekotangemaka iwo wato walamu la magba masungu mande, la okpolani enge ekpolani iwo la lisango enge Yesu Kilisito aputali.
\v 25 Mwengei amokawali adje likao lidhihake masumu la mboka e ogemei la makila mande. Akelali ndjongo la oenesi wolamu wonde amene, laate adjakali olimbesi masumu mango makelamali gala engele Mwengei adjakali onangi motema,
\v 26 la oenesi olamu wonde amene la ehele engele, laate adje moto molamu inga te ate ango akotangaka moto ongo okomogemeyaka Yesu ate adjei moto molamu.
\p
\v 27 Ndjongo, loyi eyaganake edjei eni? Eti kine. La nda pui? Enge e tomo? Te, kasi la pui enge e gemeyaka.
\v 28 La ebili ate toeni ate moto akotangamaka moto molamu la ogemei kasi te la sambo dja pui.
\v 29 Ndjongo Mwengei adjei saa Mwengei o Wayuda? Ati Mwengei o witondo wadji? Eiyee! Inde adjei pe Mwengei e witondo wadji koto.
\v 30 Inga meemene Mwengei adjei ndji moikima, ongo okotanga wato wango watenani kombeni wato walamu la loyi e ogemei, pe akotanga wato wango watitenane kombeni wato walamu la ogemei wou.
\v 31 Tokolongosaka nde pui la ogemei wosu? Te, te okeke! Tokogemeyesaka nde pui.
\c 4
\cl ESUKI 4
\p
\v 1 Tokoasa woni la loyi e Abalahama, tata osu, atotali nde la otetelake wonde amene?
\v 2 Inga Abalahama atangamate moto molamu la sambo djande, aengali oyagani, kasi te la maiso ma Mwengei.
\v 3 Ndjongo, lidhingo liasi woni? Abalahama amogemeyali Mwengei, ase aenenali moto molamu.
\v 4 Ase moto ongo okokelaka otomo akokondja liputi, liputi laho liti makao ma mpamba, edjei nda nongo ende.
\v 5 Kaiko, moto ongo okelitiaka wotomo, ase amogemei inde ongo okotangaka moto ongo okomodhendjiaka Mwengei ate adjei moto molamu, wogemei wonde etangemi womeemene.
\v 6 Ndji ndenge Dawidi pe aaselali mwemu la moto ongo Mwengei amoeni moto molamu, te loyi e tomo.
\q
\v 7 Mwemu e wato wango walimbesi tomo djau e bukake pui pe wango Mwengei adhihi masumu mawu.
\v 8 Mwemu la moto ongo Likumu atitoloko masumu mande.
\p
\v 9 Mwemu moho modjei saa e wato wango wateni kombeni inga pe alidji koto la wato wango watenaniti? Laate tokoasaka ate: Ogemei wo Abalahama ekelali ate wamotole moto molamu.
\v 10 Kasi nda engele wamotololi ndjongo? Mbuse e inde otenani kombeni inga ndji atenanakiyo? Eti engele etenanali inde kombeni kasi ndji atenanakiyo.
\v 11 Abalahama akondjali elembo, epoti oasi atenanali kombeni, eho edjei elembeteli e sambo ndamu djande pe la ogemei wungo adjaakali la eho engele enge atenanakiyo kombeni, laate awume wawa e wato kpaa wango wadjei la ogemei inga te ate watitenanali kombeni, laate wawatole wato walamu.
\v 12 Adjei pe wawa e wana wango watenani kombeni, te ndji e wato wango wakohelanaka la otenani kombeni, kasi pe la wato wango wakotutiaka mboka e ogemei enge sangbasu Abalahama adjakali la eho ndjiyo atenanakiyo kombeni.
\p
\v 13 Ase etidjiakali la loyi e pui nde Abalahama inga litoto lande atotali liwuna ate akodja mototi e lisango e moki mwesi ndjo, kasi edjakali nde la loyi e sambo ndamu enge elongoyi la ogemei.
\v 14 Inga wato wango wakonanganaka la pui wadja watoti wa lisango, ogemei eumia ema pamba alidji liwuna pe elongoyi.
\v 15 Meemene, pui ekweseke moto limemu e Mwengei, kasi ongo ebete eti pui, obuki pe pui eti.
\v 16 Eho lenge ekelamali la loyi e ogemei, la ebili ate eho elongoi la logoo wosungu, laate litoto lande kpaa motote liwuna, ndji enge etinanganaka la pui, kasi pe enge ekonanganaka la ogemei e Abalahama. Inde adjei Wawa osu kpaa,
\v 17 Ndji ndenge edhingama ate: Iyobati owe Wawa e witondo ngbii. Eho ekelamali la maiso ma Moto ongo inde amogemeyali, eengi oasi Mwengei, ongo okowongosaka wato waguake la mokalo pe akowelaka wiho winge witi nda widjei.
\v 18 Inga te ate atidjakali la ema emohake mwano, adjakali la mwano pe la ogemei, ate akouma wawa e witondo ngbii ndenge eyasanali ate: Litoto la owe likodjaa ndjongo.
\v 19 Ase ogemei wonde wotilembali, adhendelali wenge wande la engele eho nda eguala, laate adjakali la wilanga kama esi, pe alidji solo e Sala nda eguala.
\v 20 Ase la liwuna e Mwengei, Abalahama atidjangali ogemei pe atidjakali la kokia, kasi aumali nde la okulu la loyi e ogemei wonde, amoganali Mwengei.
\v 21 Agemeyali meemene ate aengi pe oengesi sambo djinge aunali.
\v 22 Eho lenge, wamotololi moto o meemene.
\p
\v 23 Ase, liloba linge ate: wamotololi, etidhinganali la loyi e inde amene.
\v 24 Kasi pe la loyi e iso wango wakotolama wato wa meemene, laate tomogemeye inde ongo amosusoli Yesu Likumu lasu tee ongo la wato waguake.
\v 25 Inde akawanali la loyi e masumu masu, ase inde asusuali tee ongo la wato waguake la otoli iso wato wameemene.
\c 5
\cl ESUKI 5
\p
\v 1 Eho lenge, nda etoloni iso wato wameemene la loyi e ogemei, dhee todje la logoo mongindji la Mwengei la mboka e Likumu lasu Yesu Kilisito.
\v 2 Enge la mboka ende, la ogemei pe, toengi oyandongbi ahue e Mwengei la ototi logoo wosungu eho, enge akotoeneseleke iso sikandjo; pe dhee toemele la mwano mungo modjei iso la eho e ototi otwa wo Mwengei.
\v 3 Etisuke sa ango, ase toemele pe ndondo e wodjidji, la ebili toyewi ate wodjidji ekowotaka edjeeli e odjeyi la mogalia.
\v 4 Edjeeli e mogalia ekokelaka ate Mwengei amogemeye moto, ogemei wuho ekowotaka mwano,
\v 5 mwano muho etiokisaka soni, laate libalano e Mwengei etumi la mitema masu la mboka e elimo satu, enge etohi inde iso.
\p
\v 6 La meemene, ango edjakali yo iso la olembi, la engele enge ebatana, Kilisito aguelali wato wa masumu.
\v 7 Edjei monga mosungu ate moto agemeye omogueli moto omemene; kasi engele edji moto aengi te omogueli moto molamu.
\v 8 Ase la oenesi ate Mwengei atobali iso, Kilisito atoguelali iso, engele edjakaliyo iso wato wa masumu.
\v 9 Eho lenge, nda etolania iso sikandjo wato wa meemene la mboka e makila mande, tokokala pendja la limemu e Mwengei.
\v 10 Laate inga, ango edjakali iso mitone, towongosali ookani la Mwengei la mboka e logo e mana onde, sikalandjo ango ewongosia iso ookani, tokokala la mokalo monde.
\v 11 Etisuke sa ango, kasi tokoemeleke la Mwengei la mboka e Likumu lasu Yesu Kilisito, ongo otowongosi iso sikala la ookani.
\p
\v 12 Eho lenge, ndji ndenge lisumu lilingelali la moki la loyi e moto moikima pe logo la loyi e lisumu, ndenge kikima pe logo eyandjani atie wato kpaa la ebili ate iwo kpaa wakelali lisumu.
\v 13 Laate liwoso pui edje, lisumu lidjaali la moki, kasi watimotangelaka moto lisumu inga pui etidje.
\v 14 Ase logo esombisali opoti Adama tee la Moize, esombisali te wango watikelali lisumu nda lisumu e Adama engele ebukali inde pui, inde ongo aengali la moto ongo aongooli odji.
\v 15 Ase pukapuka e likao esomboni la enge e liwunga. Laate inga la liwunga e moto sa mwesi wato ngbii waguali, logoo wosungu e Mwengei la likao e pamba, enge ehanali mongindji la logoo wosungu la mboka e moto sa mwesi Yesu Kilisito, ehi wato ngbii wolamu enge eenganiti la olamu teeti.
\v 16 Pukapuka e likao eho e pamba esomboni la sambo djinge ekelamali la loyi e lisumu e moto sa mwesi oho. Laate lisambi enge edjali mbuse e liwunga sa esi enge epumbesali etumbu, ase likao linge lidjali mbuse e mawunga ngbii ekelamali ate wato watolane wato wa meemene.
\v 17 Laate inga la liwunga e moto sa mwesi logo esombesali la mboka e moto oho, wango wadjakali ototi ngbii e logoo wosungu pe e likao e pamba e omeemene wakodja la mokalo pe wakosombesa la mboka e moto sa mwesi, Yesu Kilisito.
\p
\v 18 Eho lenge, nda la loyi e liwunga sa liesi, wato wa ndenge kpaa, wakwesamali, ndji ndenge kikima pe la loyi sa esi ewumesake wato meemene, wato wa ndenge kpaa watoloni wato walamu la loyi e mokalo.
\v 19 La ndenge odjangi etemeya e moto sa mwesi ewumesali ngbii e wato wato wabe, ndenge pe etemeya e moto sa mwesi ewumesali wato ngbii wato walamu.
\v 20 Kaikonde Pui edjali oyakpobi laate liwunga liwume ngbii. Ase ebete lisumu liwumali ngbii, logoo wosungu eenesanali ngbii alidji oyeti.
\v 21 Ndji ndnge kikima lisumu lisombesali ebete kikima la logo, logoo wosungu pe esombese la mboka e womeemene la loyi e mokalo mo libela la mboka e Yesu Kilisito Likumu lasu.
\c 6
\cl ESUKI 6
\p
\v 1 Ndjongo tokoasa woni? Ewongi tonangane la okeli masumu la ebili ate magba ma Mwengei matume ngbii?
\v 2 Te, te wokeke! Nda eguali iso la sambo dja masumu, nda ndenge kine eengi iso alidji oyabati ndondo e masumu?
\v 3 Wewini ate ino kpaa wango wapatisani ndondo e Yesu Kilisito, opatisanalini ndondo e logo londe?
\v 4 Eho lenge, toombanali mongindji la inde la patisa esu ndondo e logo e inde, ndji ndenge Kilisito abasali tee ongo la wato waguake la okulu e otwa e Wawa, iso pe todje la mokalo moholi.
\v 5 Inga toyabondji la inde la logo nda enge e inde, edjei meemene ate tokoyabonda pe la inde engele ekobasa iso la libasi nda inde.
\v 6 Toewi ate womoto wosu wo gala, wobakamali la kulusu la inde, laate wenge wasu e masumu etikele ema alidji, laate iso totidje kine mituke e lisumu.
\v 7 La ebili ate moto ongo oguiga aputi nongo e lisumu lande.
\v 8 Inga toguiya ebete ekikima la Kilisito togemei ate tokodja pe la mokalo mongindji la inde.
\v 9 Toyewi ate Kilisito abasali tee ongo la wato waguake, atigua kine alidji; logo eti kine la okumu likolo lande.
\v 10 La ebili ate logo wungo eguali inde aguali la olongosi lisumu mbala kikima la libela. Ase mokalo mungo modjei inde la eho, adjei la eho la loyi e Mwengei.
\v 11 Ndenge kikima pe ino, aeneni ate odjeini meemene wato waguake la sambo dja lisumu, ase wato wa mokalo la loyi e Mwengei la mboka e Yesu Kilisito.
\v 12 Eho lenge, otidheeni ate lisumu lisombese wenge wanu enge ekoguaka laate otemeyeni wihoha e waho.
\v 13 Otihekeleni kine alidji wisuki wa wenge wanu laate widje wisaneli e odjangi sambo ndamu, ase yahekeleni atie Mwengei laate odjeeni wato wango waguali pe sikandjo odjeini la mokalo, pe mohekeleni Mwengei wisuki wa wenge wanu laate widje wisaneli e sambo ndamu.
\v 14 La ebili ate, lisumu liengiti odjei la okumu likolo lanu, laate otini sese e pui, ase odjeini sese e logoo wosungu.
\p
\v 15 Ndjongo, nda ema? Tokokela nde lisumu laate toti sese e pui, ase sese e logoo wosungu? Te, te wokeke.
\v 16 Oewitini ate inga okoyahekelekeni la moto mwesi odjeini mituke la omotemei inde, odjeini watuke wande nda ekomotemeyakani ino? Mituke ma lisumu la ogui inga mituke ma etemeya la ototi womeemene.
\v 17 Ase kekedhinge la Mwengei laate odjaakalini mituke ma lisumu sikala owumigani otemei la motema mateya mango makondjalini ino.
\v 18 Nda ekpolonigani ino la lisumu, owumigani mituke ma womeemene.
\v 19 IKoasaka la eyaseli e womoto la olembi e wenge wanu. La ebili ate ndji ndenge ehekelelini ino wusuki wa wenge wanu widje tuke dja ndenge e bukake pui, laate wibuke pui, sikala pe hekeleni wisuki wa wenge wanu widje tuke ma omeemene laate wikele sambo e wosatu.
\v 20 Engele edjakali ino tuke dja lisumu, womeemene wotidjakali likumu lanu.
\v 21 Nda pukapuka etotalini ino engele eho? Sambo djinge ekookakani ino sikala soni. Laate gboo e sambo djaho edjei logo.
\v 22 Ase sikahala, nda ekaligani ino la loyi e lisumu, owumigani tuke dja Mwengei, pukapuka djanu edjei mokalo monu e wosatu, pe la gboo mokalo mo libela.
\v 23 Laate liputi linge lisumu likoputaka edjei logo, ase likao linge lihekeli Mwengei mpamba lidjei mokalo mo libela la mboka e Yesu Kilisito Likumu lasu.
\c 7
\cl ESUKI 7
\p
\v 1 Wamanima, eengi nde odjei ate oewitini, (laate ikoasaka la wango waewi pui,) ate pui edjei la okumu likolo e moto engele edjei inde la mokalo?
\v 2 La ekpangele, moli ongo oiki anangani la molome onde la pui engele edjeiyo molome oho la mokalo; ase inga molome onde agua, alongoiya la pui e molome onde.
\v 3 Eho lenge, engele edjeiyo molome onde la mokalo, inga auma moli o odji moto, wakomotolo inde moli o eteba. Ase inga molome onde agua, alongoiya la pui e inde, eho lenge inga auma moli o odji molome, ati moli o eteba.
\v 4 Ndjongo wamanima wa mbai, la odhendeli pui, ino pe ogualini la mboka e mbeka e wenge wa Kilisito, laate oumeni wato wa odji moto, e moto ongo asusuali tee ongo atie wato waguake, laate tomowotele Mwengei pukapuka.
\v 5 Laate ango edjakali iso obilei wihoha wa wenge, wihoha wa masumi minge misuswanali la pui, edjakali okeli otomo la wisuki wa wenge wasu laate towote pukapuka e logo.
\v 6 Ase sikahala, topumbiga sese e pui, laate toguiya la odhendeli ema enge etonangaki iso la woyogo. Laate todje tuke la ndenge poli e elimo, ase te la ndenge e gala la pui djinge idhingani.
\p
\v 7 Ndjongo tokoasa nde? Pui idjei nde lisumu? Te, te wokeke! Meemene nda itiewe lisumu inga pui itidjaake. Pe, la ekpangele, nda iyewiti ononi inga pui itiasake ate: oengiti ononi ema e moto.
\v 8 Ase pui ehekeleli lisumu mboka e owoti la motema mo mbai wihoha e ndenge kpaa, pe inga pui etidjaake nda lisumu liguala.
\v 9 Gala idjakali la mokalo liwoso ate pui idje, ase engele pui edjaali, lisumu ewongwali alidji la mokalo, ase mbai iguali
\v 10 pe ehele pui edjakali la loyi e mokalo, mbai ieneli eho ate edjei la loyi e logo.
\v 11 Laate pui ehekeleli lisumu mboka, ndjongo eho egulali mbai pe eolali mbai la mboka e pui eho.
\v 12 Eho lenge, pui djaho amene idjei mosatu, alidji pui eho edjei mosatu pe e omeemene pe wolamu.
\p
\v 13 Ndindjongo loi wungo wodjei wolamu nde eumelali mbai logo? Te, te wokeke! Ase lisumu, laate eenane ate edjei lisumu, ewotelali mbai logo la mboka e ema enge edjei olamu, laate la mboka e pui, lisumu eume ema e masumu oyeti.
\p
\v 14 Toewi ate pui idjei ema e elimo, ase mbai idjei la wenge e moeni, itambanali laate idje motuke mo lisumu.
\v 15 Laate enge ekokelaka mbai iyewiti eho. Laate enge ebali mbai, itikelaka eho, ase enge etoni mbai nde ikokelaka eho.
\v 16 Ndjongo, inga ikokelaka loi wungo wobaliti mbai, igemei ate pui iyeti wolamu.
\v 17 Ase sikahala ongo okokelaka eho etikine mbai, kasi nde lisumu linge liyabati ndondo e mbai.
\v 18 Laate iyewi ate ndondo e mbai olamu etiyabataka ndondo e mbai, easi nda ate ndondo e wenge wa mbai, ikobalaka okeli olamu, ase itiwumaka okeli eho.
\v 19 Laate olamu wungo wobali mbai itikelaka eho, ase obe wungo wobaliti mbai eho nde ekokelaka mbai.
\v 20 Kaiko ase, inga enge ebaliti mbai eho nde ekokelaka mbai, eho eti lisumu la mbai moto ikokelaka eho, kasi lisumu linge liabati ndondo e mbai.
\v 21 Eho lenge, ieni ehele pui atie mbai: Engele ebali mbai okeli enge edjei olamu, enge edjei obe nde edjei atie mbai.
\v 22 La motema mo mbai, ikoemeleke la pui e Mwengei.
\v 23 Ase ikoeneke la wisuki wa wenge wa mbai eeti pui enge ekosanaka kindo la pui e mamungwene ma mbai pe enge ekokpalaka mbai monangani atie pui e lisumu linge lidjei la wisuki wa wenge wa mbai.
\v 24 Idjei moto o magba! Ndai okokalisa mbai la wenge winge wikogulaka mbai wiengele kpaa la logo?
\v 25 Mwengei atote pambo la mboka e Yesu Kilisitu Likumu lasu! Eho lenge, la mamungwene ma mbai idjei motuke mo pui e Mwengei, kasi la wenge wa mbai idjei motuke e pui e lisumu.
\c 8
\cl ESUKI 8
\p
\v 1 Ase sikahala, huko eti kine atie wato wango wayabolei ebete eikima la Yesu Kiklisito.
\v 2 Laate pui dja elimo enge ekohaaka mokalo mongindji la Yesu Kilisito elongosi owe la pui e lisumu pe e logo.
\v 3 Ase, ema enge eengakiti okeli pui laate wenge edjakali olembesi, Mwengei akelali eho la ndenge amotomali Mana onde moikima la wenge enge edjei nda enge e masumu la olongosi lisumu, alidji atenelali lisumu etumbu la wenge.
\v 4 Eho, womeemene enge eongoni la ogemei eengali atie iso wango wakokalaka te la ndenge esu e wenge, kasi la ndenge e elimo.
\v 5 La ebili ate wato wango wakobiliaka wihoha wa wenge wakoyahekeleke la sambo djinge ibali wenge, ase wato wango wakobiliaka elimo la sambo dja elimo.
\v 6 La ebili ate onangani la wihoha wa wenge ekohaka logo ase onangani la sambo dja elimo ekohaka mokalo la logoo.
\v 7 Laate onangani la wihoha wa wenge einei motone mo Mwengei, laate eho etitemeyaka pui e Mwengei, kaiko eengiti pe otemei eho.
\v 8 Kaikoase wango wadjei la ekaleli e wenge watimoemelese mwengei.
\v 9 Kaikoase, ino otuteitiakani sambo dja wenge, ase okotutiakani sambo dja elimo, inga elimo e Mwengei edjei ndondo enu. Ase inga moto atidje la elimo e Kilisito, moto oho ati moto onde.
\v 10 Ase inga Kilisito adjei ndondo enu, meemene wenge wanu wigua la loyi e lisumu ase Molimo modjei la mokalo la loyi e sambo ndamu.
\v 11 Inga elimo e moto ongo omobasisali Yesu tee ongo la wato waguake eyabati ndondo e ino, moto ongo omobasasili Kilisito tee ongo la wato waguake akokela pe ate wenge wanu enge ekoguaka edje la mokalo la mboka e elimo e inde enge ekoyabataka ndondo e ino.
\p
\v 12 Eho lenge, wamanima, toongoniti otutei wenge la osombesi mokalo mosu la obilei wihoha wa wenge.
\v 13 Laate inga osombesani mokalo monu la otutei wihoha wa wenge okoguani meemene, ase inga oolani tomo dja wenge la ligamesi e elimo, okokalani.
\p
\v 14 Wato kpaa wango wakosombesamaka la elimo e Mwengei wadjei wana wa Mwengei.
\v 15 Laate otitotalini elimo e wotuke enge ekohekeleke alidji owangi, ase ototalini nde elimo enge ekeli ate Mwengei aototeni ino pe aowumeseni wana wande, enge la mboka eho tokodhumbiaka ate: Abba, Wawa!
\v 16 Elimo eho amene ekototoloko mongindji la elimo esu ate todjei wana wa Mwengei.
\v 17 Inga todja wana, todjei pe watoti wa lisango, watoti wa lisango e Mwengei, ase watoti wa lisango mongindji la Kilisito, inga tokoeneke odjidji mongindji la inde laate totote pe otwa mongindji la inde.
\p
\v 18 Ikomungwaka ate wodjidji e ehele engele eti ema liwoso la otwa enge ekoenene la mboka esu.
\v 19 Wiho kpaa winge wikelama wikolambela la ehoha etetelake oeneni e otwa e wana wa Mwengei.
\v 20 Laate wiho winge wikelama eumesamali ema pamba, te la ndenge eho amene ase la loyi e moto ongo oumesali eho ndjongo, la loyi e mwano
\v 21 ate wiho winge wikelama ekolongwa pe la wotuke eholake pe ekotota lipanda e wana wa Mwengei enge etumi la otwa.
\v 22 Laate toewi ate, wiho kpaa winge wikelama widjei ndji wikotilelaka mongindji pe wikoeneke odjidji mongindji tee sikala.
\v 23 Etisuke sa ango, ase iso amene pe wango todjei la pukapuka e liwoso, epoti oasi elimo, iso amene tokoyatilelaka la mitema masu, ango ekolambelaka iso la ehoha etetelake Mwengei atotote pe atowumese wana wande, tokpolame la wenge wasu la mboka e lisango.
\v 24 Laate toKaliga ango edjei iso la mwano moho. Ase mwano mungo mokoeneneke eti mwano, la ebili ate ango moto akoeneke ema, akabatelaka eho mwano?
\v 25 Ase inga tokobatelaka ema enge etieneke iso mwano, tokolambela eho la edjeeli eikake egalela.
\p
\v 26 Ndenge kikima elimo pe ekotogamesaka la olembi wosu. La eho totiewaka enge eengi la oongi ndondo e oyangongi wosu, ase elimo inde amene ekotoaselelaka iso ango ekotilelaka iso, inga te ate maloba matipumbaka.
\v 27 Kaikoase moto ongo okodhendaka mitema akoewaka enge elimo ekolukaka, laate eho ekoaselelaka wasatu la obilei mwano mo Mwengei.
\p
\v 28 Twewi ate Mwengei akokelaka ate tomo djande kpaa ehane mawo la loyi e wolamu e wango wakomobalaka Mwengei, wango wawelani la obilei mwano monde.
\v 29 Laate wango inde awagemeyali poo aanali pe liwoso ate waengane la ndenge enge mana onde adjei, laate adje mana o poo ndondo e wamaanango ngbii.
\v 30 Alidji wango inde awaonoli poo, awawelali pe iwo, pe wango inde awawelali, awatololi wato walamu. La gboo, wango inde awatololi wato walamu, awahekeli pe iwo otwa.
\p
\v 31 Tokoasa kine alidji nde? Inga Mwengei adjei ngambo esu, ndai okoki otokeli iso obe?
\v 32 Inde ongo otimoisali mana onde amene, ase amohali la loyi e iso kpaa, ndjoni atotiha pe iso mongindji la inde wiho wadji la logoo pendja?
\v 33 Ndai okopunda wato wango Mwengei awaoni? Mwengei inde moto okowatoloko wato walamu.
\v 34 Ndai okokwesa iwo la loyi? Moto te mokikima, laate Yesu Kilisito aguali inde moto adjei la ewo e lilome e Mwengei, pe moto akotoaselelaka iso.
\v 35 Ndai okokawola iso la libalano e Kilisito? Mbeti, inga ekoni, inga odjidji, inga ndjala, inga lingbengbele, inga huko, inga ewuni?
\v 36 Ndji ndenge edhinganaate: La loyi e owe wakotobataka la logo la olayi wo wuse, wakotoeneke iso nda meme e oolake.
\v 37 Ase ndondo edjinge sambo kpaa tokolongaka la ligamesi e moto ongo otobalali iso ngbii.
\v 38 Laate igemei ate edje logo, inga mokalo, inga waahumbwa, inga makumu, te sambo e ma masio, te djinge wikodja, te wokulu,
\v 39 te wolai, te wolindji, te wikelamu, wiengiti otokawoli iso la libalano e Mwengei enge edjei atie Yesu Kilisito Likumu lasu.
\c 9
\cl ESUKI 9
\p
\v 1 Ikoasaka meemene ndondo e Kilisito. Ibukitiaka moleho, laate oyewi wo mbai ekototoloko mongindji la mbai la elimo satu
\v 2 idjei la magba masungu pe la ekoni enge etisilaka la motema mo mbai.
\v 3 Laate ikobala nde ate mbai amene, moto ibumakolami, ikawane la Kilisito la loyi e wamanima wa mbai, wato wa moki mo mbai.
\v 4 Wato wa Isalayele, wango Mwengei awatotali pe awaumesali wana wande pe wango otwa, la ogemei, la likao e pui, la otomo wosatu, la mauna edjei ewu.
\v 5 Wadjei watata, pe atie ewu nde Kilisito awotamali mana owu; Mwengei ongo odjei likolo e wiho kpaa, apambwame libela la libeala. Amen.
\p
\v 6 Ase, easiti ate liloba e Mwengei etilongali. La ebili ate eti ate wato kpaa wango wakowotamaka la Yisalayele nde wadjei Wayisalayele.
\v 7 Eti pe ate la loyi ate iwo wadjei litoto e Abalahama nde iwo kpaa wadjei wana wande, ase: Enge ekowelana litoto la owe ekodja la mboka e Isaka.
\v 8 Easi nda ate, wana wa litoto e Abalahama wati pendja wana wa Mwengei, ase wana wa liuna nde wa watoli litoto laho.
\v 9 Laate liloba e liuna edjaakali ndjo: Igeleli la engele nda enge pe Sala akowota mana opele.
\v 10 Kaikoase liwuna litisukali sa ango, ase ehanali alidji engele Lebeka akpalali lemi e maasa la molome sa mwesi oho, Isaka tata osu
\v 11 laate engele etiwotamaliyo iwo pe watikelaliyo loyi te mwesi e olamu inga te e mbe, laate mwano e Mwengei ewonoke etidhendele tomo, ase nde moto ongo owelani,
\v 12 waasali la inde ate, eloko akodja motuke e elenge.
\v 13 Ndji ndenge edhingama ate: Imobalali Yakobo, ase imotonali Esau.
\p
\v 14 Ndjongo tokwasa nde? Mwengei ati la omeemene? Te, te wokeke.
\v 15 Laate aasali la Moize ate: ikomookela magba moto ongo obali mbai omookeli magba, pe ikodja la wouma la moto ongo obali mbai odjei la inde wouma.
\v 16 Eho lenge, etidhendelaka moto ongo omobali inde inga moto ongo okotilaka obangu, ase nde Mwengei, ongo odjei la motema magba.
\v 17 Lidhingo liasali la Palao ate: Idhei owe odje la mokalo la loyi e ehele gbondo: laate la mboka e owe ienese okulu wo mbai, pe laate kombo e mbai etiesakolame la mbume kpaa.
\v 18 Eho lenge, moto ongo inde abali omookeli magba akomookela magba, ase moto ongo inde abali omodhei ate aume moto motetelake, akomodhe aume moto motetelake.
\p
\v 19 Okoasa la mbai ate: Woni adjeiyo ndji aopamelaka wato? Woni ayamalelali mwano monde enge eenisani la hoho?
\v 20 Ase owe, moto, odjei ndai laate omodhuhuelele Mwengei monoko? Ema enge etuli iwo eengi oasi la moto ongo omotuli ate: Ndjoni otuli mbai ndjo?
\v 21 Motuli teni ati nde la okumu likolo e mbume e mondo la okeli la mbume sa eho kikima teni esi la loyi e otomo e mogano, edji la loyi e otomo edjangi mogano?
\v 22 Kaikoase inga Mwengei, inga te ate abala oenesi limemu lande pe okulu wonde anangali wateni e limemu enge ewongi la oolani?
\v 23 Toase woni inga abala oenesi wogumake e otwa wonde atie wateni e magba enge ebatali inde liwoso la loi e otwa?
\v 24 Inga atowelali iso te sa atie Wayuda, ase koto atie wadji witondo?
\v 25 Edjei ndenge aasali eho koto atie Hosea: Wango watidjali wato wa mbai ikowawola iwo wato wa mbai, koto moli ongo otidjakali moli o mbai o libalano ikomowela moli o mbai o libalano.
\p
\v 26 Koto la ebete enge waasali la iwo ate: Otini wato wa mbai, ongo nde wakoawela iwo wana wa Mwengei o mokalo.
\p
\v 27 Isaya koto akopamaka la loyi e wato wa Isalayele ate: Inga te ate motango mo wana wa Isalayele modja nda ngene e malia masungu, wato wango watikali nde wakokala.
\v 28 Laate Likumu akoongo mbume awongose monoko, akokela eho galagala.
\p
\v 29 Ndji ndenge Isaya aasali eho gala ate: Inga Likumu e wokulu kpaa atitodheleke iso litoto, nda towumali nda Sodomo, pe nda toengali la Gomola.
\p
\v 30 Ndjongo tokoasa nde? Ate wato e wadji witondo, inga te ate watidjakali otutei womeemene, watotali womeemene, womeemene elongoi la ogemei.
\v 31 Ase inga te ate Isalayele akobiliaka pui esi e womeemene, atiengesali pui eho.
\v 32 La loyi lande? Laate atutiali eho, te la ogemei, ase la tomo. Wasakelali ekikimi la libukeli esakelake ekikimi,
\v 33 ndenge edhinganali: Dhenda! Ikobataka la Siona libukeli esakelake pe libukeli linge likoesake, ase moto ongo ogemeli eho atioka soni.
\c 10
\cl ESUKI 10
\p
\v 1 Wamanima, ehoha e motema mo mbai pe oyakongi wo mbai atie Mwengei la loyi ewu edjei ate wakale.
\v 2 Laate ikowatotoloko iwo ate wadjei la mohandja la loyi e Mwengei, ase te la woewi womeemene.
\v 3 Nda eyewiti iwo womeemene wo Mwengei ase wakolukaka obati enge ewu amene, watitemeyali womeemene wo Mwengei.
\v 4 Laate Kilisito adjei gboo e pui, la ebili ate moto kpaa ongo odjei la ogemei adje moto o meemene.
\p
\v 5 Laate Moize adhingi la loyi e womeemene enge edji la pui ate: Moto ongo onanganali la omeemene e pui akodja la mokalo la mboka eho.
\v 6 Ase womeemene wungo wolongoi la ogemei ekoasaka ate: Otiase la motema mo owe ate: Ndai okotela likolo? (Eengi oasi, laate amodjimbe Kilisito sese;
\v 7 inga ndai okoyadjimba la liwela lilindake? (Eengi oasi, laate apumbese Kilisito tee ongo la wato wa guake).
\v 8 Ase eyasi woni? Liloba lidjei ahue e owe, la monoko mo owe koto la motema mo owe. Eengi oasi, liloba egemeyake, enge ekotiesakolaka iso.
\v 9 Inga okoyambolaka la hoho liloba laho la monoko mo owe ate Yesu adjei Likumu, mpe okogemeyaka la motema mo owe ate Mwengei abobasisali tee ongo la wato waguake, okokala.
\v 10 Laate la motema nde moto akogemeyaka la loyi e omeemene, ase la monoko nde moto akolumbolaka la hoho la loyi e mokalo.
\v 11 Lidhingo ekoasaka ate: Moto tueti ongo omogemei inde akooka soni.
\v 12 Laate osomboni woti atie Wayuda la Wageleki, laate wato kpaa wadjei wa Likumu sa mwesi ongo okopambuaka ngbii wato kpaa wango wakomodhumbiaka inde.
\v 13 Laate moto kpaa ongo okombelela kombo e Likumu akokala.
\p
\v 14 Nda ndenge ekombelela iwo moto ongo omogemeiti iwo? Woni ekoyamba iwo moto ongo eokiti iwo mboli ende? Nda ndenge ekooka iwo mboli inga moto o otiesakoli ati?
\v 15 Pe wakotiesakola nda ndenge inga watiwatome? Ndji ndenge edhingama ate: Mangbanda ma wango wakotiesakoalaka mboli ndamu e sambo ndamu edjei olamu pendja.
\v 16 Ase, iwo kpaa watibalali mboli ndamu. Laate Isaya akoasaka ate: Likumu, ndai ogemeleli lu loyi eoki iso?
\v 17 Ogemei ekolongwaka la loyi wungo wooki moto, pe loyi wungo wooki moto ekolongwaka la mboka e liloba e Kilisito.
\p
\v 18 Ase ikohuelaka: Otiokalini ndjongo? Eiye, meemene, modudu mowu eokani la mbume kpaa, pe maloba mawu tee la gboo e mbume ebete eyabati wato.
\p
\v 19 Kaikoase iyasi ate: Isalayele atiewali? Moize moto oasi liwoso ate: ikookesani ino zua la moki mungo moti moki, ikookesani ino limemu litetelake la moki mwesi modjangi lokenge.
\p
\v 20 La loyi e Isaya, aumia la mohandja pe aasia: Wango watidjakali oluki mbai waeneli mbai. Iyaeneseli atie wato wango watidjakali ohueli mbai.
\p
\v 21 La enge edhendji Isalayele aasi ate: Iyandji mawo ma mbai lisio kpaa atie wato wango wadjangi etemia pe wakoaselaka mbai obe.
\c 11
\cl ESUKI 11
\p
\v 1 Ikohuelaka ate: Mwengei awalumbi wato wande? Te, te wokeke. Laate mbai mpe edjei moto o Isalayele o litoto e Abalayama la Elombo e Bezamina.
\v 2 Mwengei awalumbiti wato wande, wango inde awagemeyali liwoso. Otieweni nde enge lidhingo liasi la loyi e Elia, engele apundali Isalayele atie Mwengei?
\v 3 Likumu, iwo wato waoli watiesakoli wa owe, wabukakolia ibete winge wa otumbelakali iwo makao, itikali ndji mbai moikima, waolukaka koto ate wandjole mbai.
\v 4 Ase liloba e Mwengei easi la inde woni? Idhei pele mbuka sambo la loyi la mbai amene enge liwuli litiayimbele Bala.
\v 5 Ndenge kikima la ehele engele edjei iso, edjei la ndambo e wato wango watikali alidji waononi koto la ngolu.
\v 6 Ase inga idja la ngolu, eti kine la loyi e tomo, inga ndjongo, ngolu etiti kine ngolu.
\p
\v 7 Woni? Ema enge edjakali oluki Isalayele atitotali eho, ase wato wango waononi watotali eho. Mitema ma wango watikalali mitetelali.
\v 8 Ndji ndenge edhingama ate: Tee lisio la keke, Mwengei awahekeli iwo elimo e ilo, maiso mango matieneke, la wiyokeli winge witiokaka.
\v 9 Davidi koto aasi ate: Mesa mau eume lisala, etanga koto ema enge ekobingisaka ekikimi alidji ndenge e liputi lawu.
\q
\v 10 Maiso mawu maume pii laate watiene alidji, waimba mokongo engele kpaa.
\p
\v 11 Ikohuelaka ate: Wasakelali nde ekikimi pe wakuali amene okwi? Te, te wokeke. Ase la ekikimi enge esakelali iwo, mokalo modjeelia wato wa witondo. Ndjongo loyi luho eokese iwo zua.
\v 12 Sika ndjo inga ekikimi enge esakelali iwo ehekelia pambo la wato wa witondo, ndjongo motio mowu kpaa etihekele pambo ngbii oyeti?
\p
\v 13 Ase sikala ikoasaka la ino wato wa witindo, nda edjei mbai toma e witondo ikoyagana la wotomo wo mbai.
\v 14 Mbuse ikookesa moki mo mbai zua la ebili ate ikalese wato wadji ndondo e iwo.
\v 15 Laate inga engele iwo walumbania ehekelia wato wa miki mboka waongose ookani la Likumu, ekodja nda ndenge engele ekoyambama iwo? Ekodja nda waguali waongoiya la mokalo?
\v 16 Inga ndambo enge edhendelani nda pukapuka e liwoso edjei wosatu, mogbuku kpaa e moteke pe modjei ndjongo. Inga mondjili modja wosatu, witee pe wikodja ndjongo.
\p
\v 17 Ase inga weeti witee witenanali ase owe, inga te ate odjei mote mo oliba e motulu, oyaekeyali la eho pe oumali ototi wolamu la mondjili e maita e mote mo oliba,
\v 18 otiagane liwoso la witee waho. Kaikoase inga okoyaganaka liwoso laho, otiosanake ate owe okpaliti mondjili, ase mondjili nde moogbali owe.
\v 19 Owe okoasa ate: winge witee witenali iwo, laate mbai iyakiane ango.
\v 20 Edjei meemene. Watenali eho laate etidjakali la ogemei, ase owe okoyamalaka la loyi e ogemei. Dhee odjeyi la mamungwene e oyadjambi, ase djaa nde la owangi.
\v 21 Laate inga Mwengei atidheeli witee e waho amene, atiodhee pe owe.
\p
\v 22 Dhenda logoo e Mwengei pe etumbu e inde. Etumbu la wango wakuali, ase logoo e Mwengei atie owe, inga otikaliya ndondo e logoo wonde. Inga te ndjongo, owe pe okotenana.
\v 23 Ndjongo pe, inga wadhee odjeyi wato wango wati la ogemei, wakoyakiana, laate Mwengei aengi owaakeyi alidji.
\v 24 Laate inga owe, waotenali la mote mo oliba e motulu amene pe waowakiali la mote mo oliba e elanga, inga te ate eengiti odjei ndjongo, ndjongo witee e mote moho amene ekoyakiana olamu oeti te la mote moho amene mo oliba?
\p
\v 25 Wamanima, mbai ibaliti ate ino odjangeni ehele sekele wosatu, laate otidjeeni wato wa lokenge la maiso manu amene: Ate motema mo wato wadji wa Isalayele eumia oteteli tee motio kpaa mo wato e witondo ekotuma.
\v 26 Pe la ndenge eho Isalayele kpaa ekokala, ndji ndenge edhingama ate: Mokalesi akolongwa la Siona pe akolongosa analili la elembo e Yakobo,
\v 27 Eho edjei ogemeyani wo mbai la iwo, ango ekolongosa mbai masumu mawu.
\p
\v 28 La enge edhengi mboli ndamu, iwo wadjei mitone la loyi e olamu e ino, ase la ooni enge Mwengei awaoni wadjei wato wango Mwengei abali la loyi e watata wau.
\v 29 Laate Mwengei atioka magba la sambo ndjinge iheheli inde koto oweli wungo eweli inde.
\v 30 Laate ndji ndenge etitemeiyakalini ino Mwengei la engele e gala ase sikala aokeli ino magba laate watitemeiyali.
\v 31 Ndenge kikima iwo pe sikala watitemeye, pe aokeli ino magba, laate aokele pe iwo amene magba sikala.
\v 32 Laate Mwengei awadhei iwo kpaa wahelane la woyogo e mokalo enge edjangake etemeiya, laate awaokele iwo kpaa magba.
\p
\v 33 Wogumake wo Mwengei pe wokenge wonde pe woewi wonde edjei ngbii pendja! Witeneli wande e lisambesi eengiti oewani pe mboka djande eengiti oeneni.
\v 34 Ndai oewi mamungwene ma Mwengei, mpe ndai mohekeli o simbesi e inde?
\v 35 Alidji ndai omokawelali Mwengei liwoso, laate Mwengei amowongosele?
\p
\v 36 Laate wiho kpaa wilongoyi atie inde pe la mboka e inde pe la loyi e inde. Adje la otwa libela la libela. Amen.
\c 12
\cl ESUKI 12
\p
\v 1 Ndjongo wamanima, iyakongi la ino la magba ma Mwengei ate kawani wenge wanu mbeka e mokalo, e wosatu, enge Mwengei aengi ogemei. Ekodja atie ino otomo e lokenge.
\v 2 Otiaengeseni la sambo e ma masio, ase yakalambani, wumesani mamungwene manu maholi, laate oyagemeiseni ino amene mwano mo Mwengei enge edjei olamu pe eengi ogemeiyani pe etumu la sambo ndamu.
\p
\v 3 La magba masungu mango waenelesi mbai ikoewesaka moto kpaa ndondo enu ate: Atibundue ate akoetaka ndenge edjei inde pendja, ase abundue nde la ndenge enge ekoenesaka ate adjei la mamungwene ndamu, moto la moto la obilei wosungu e ogemei enge Mwengei amohekeli.
\v 4 Nda odjei iso la wisuki ngbii la wenge sa ekikima, ase wisuki kpaa witidjee sa la otomo esi.
\v 5 Ndenge kikima nda iso, inga te ate todjei wato ngbii, todjei wenge sa esi ndondo e Kilisito, ase todjei wisuki, enge wesi kpaa edjei manango la odji.
\v 6 Todjei la makao ndenge la ndenge la obilei magba masungu mango maeneseleli iwo iso. Inga etiesakoli, totiesakole la obilei ogemei wungo watohekeli iso.
\v 7 Inga otomo, toyahekele la otomo wuho, inga moto ongo okotiesakolaka, ayahekele la otiesakoli wonde.
\v 8 Inga moto ongo okohekeleke mohandja, ayahekele la ohi mohandja monde, inga moto ongo okokawaka, akele eho la ewo petee, ongo odjei likumu akele otomo monde la mwemu, moto ongo okookelaka wato magba, akele eho la mwemu.
\p
\v 9 Libalano lanu etidje la ekosako; tonani enge edjei obe, nanganani la enge edjei olamu.
\v 10 La libalano e wouma, balanani la motema. La ohekelani mogano, djaakani wato wa poo.
\v 11 Otidjeeni wikete la tomo djanu. Lolani la elimo. Mokelelani Likumu nda tuke.
\v 12 Hemeleni la mwano. Djaani la mohandja engele e odjidji, yahekeleni la oyakongi.
\v 13 Wakawelani wasatu la obilei wihoha wau. Djaakani la edjeeli e yambake wadjidji.
\v 14 Pambuani wango wakoenesakani ino odjidji; wapambuakani pe otiwabumakoleni.
\v 15 Hemeleni la wango wakoemeleke; lelani mongindji la wato wango wakolelaka.
\v 16 Wasumbuani wadji nda ekoyasumbuakani ino amene; otidjaakeni la mamungwene e oyadjambi, ase djaakani la mamungwene e oyatitimesi, otiwumeni wato wa lokenge la maiso manu amene.
\v 17 Otiwongoseni obe la obe. Kelakani nde sambo djinge idjei olamu la maiso ma wato kpaa.
\v 18 Inga eenga, inga eodhendani ndji ino, djaani logoo la wato kpaa.
\p
\v 19 Wamanima wa libalano, moto ongo o okelini ino obe, otimowongoseleni obe ase dhelekeni nde limemu e Mwengei ebete. Laate edhingani ate: Owongosi obe edjei loyi la mbai; mbai ikoongosa obe, Likumu aasi ndjongo.
\v 20 Inga motone mo owe adja la ndjala, mohekele ilaka alake, inga adja la ehoha e malia, mohekele malia akenge, laate ango ekokelaka owe ndjongo okobataka magala ma misa la moto monde.
\v 21 Otidheele obe e olonge, ase kelaka olamu la olongi obe.
\c 13
\cl ESUKI 13
\p
\v 1 Ewongi ate moto kpaa awatemeye makumu mango wadjei liwoso, laate okumu kpaa edji atie Mwengei. Okumu wou edjei la molelo enge ebatani la Mwengei.
\v 2 Eho lenge, moto ongo okoyamalelaka wokumu amaleli pe ewongeseli e Mwengei; wango wamaleli eho wakosambesama.
\v 3 Laate wato wango wakowangaka makmu eti wato wango wakokelaka olamu, ase nde wango wakokelaka sambo mbe. Ndjongo, owe obaliti ate owangake wokumu? Djaaka okeli sambo ndamu, pe ekoogana owe.
\v 4 Laate okumu edjei motuke mo Mwengei atie owe la olamu e owe. Ase inga okokelaka enge edjei obe, wanga; laate etikpalaka ewuni sa pamba; laate eho edjei ekeleli e Mwengei, ekowongosaka obe la okweseli limemu la moto ongo okokelaka obe.
\v 5 Eho lenge, ewongi la ino owaokeli, te ndji sa la enge limemu ase alidji la loyi e lokenge wonu.
\v 6 Edjei la loyi laho nde ekoputakani ino lomeya, laate wadjei watuke wa Mwengei la loyi e olamu e wato kpaa, wakokelaka engele kpaa la kole eho pendja.
\v 7 Wawongoselani iwo kpaa enge ewongi la iwo: Ongo oongi lomeya, lomeya; ongo oongi liputi, liputi; ongo oongi wamowange, mowangani, ono oongi mogano, mogano.
\p
\v 8 Otidjeeni la nongo e moto te moikima, longose ndji nongo e libalano. Laate, moto ongo okomobalaka miino onde aengesi pui.
\v 9 Laate ahala o pui: otikelake eteba, otiolake moto, otiyiwake, oengiti ononi ema e moto, pe edji pui etangemi la okue la ehele engbundu: eoongi o mobale miino owe nda owe amene.
\v 10 Libalano litikelaka moto obe. Eho lenge, libalano lidjei liengesani e pui.
\p
\v 11 Kelakani ndjongo pe laate oyewini ehele engele, engele enu esusuake la ilo eengi, laate sika mokalo musu eumia lahue, oeti engele enge eumali iso wagemei.
\v 12 Likolo likia lihele, boo eumiga ahue la otani. Tolongose sambo kpaa dja likolo, tokpale wisaneli wa hoho.
\v 13 Nda la use ndjo, tosombe la wikaleli wilamu, te la lipati e litema, te la olangui, te la ekaleli mbe ewanesake wenge pe te la esombeli e soni, te la mosio pe te la djua.
\v 14 Ase mokpalani nde Likumu Yesu kilisito, otikelakeni djaho la mwemu mo wenge.
\c 14
\cl ESUKI 14
\p
\v 1 Moyambani moto kpaa ongo oti la ogemei otetelake, ase otimosambeseni la popo djinge ikoyahuelaka inde.
\v 2 Moto odji adjei la ogemei pe akolakaka ema kpaa, ase moto ongo oti la ogemei otetelake akolaka ngasi.
\v 3 Moto ongo okolakaka atimodendje moto ongo otilakaka, koto moto ongo otilakaka atimosambese moto ongo okolakaka. Laate Mwengei amoyambi ongo moto.
\v 4 Owe ndai laate omosambese motuke moeti moto? Inga okui inga oyamali emodhendji ndji likumu lande. Ase akoyamala laate Mwengei aengi omoyamalesi.
\p
\v 5 Moto odji akoeneke ate li lisio lieti li lisio. Moto odji akoeneke ate li lisio lidjei nda masio madji kpaa, moto la moto agemese pendja la mamungwene mande amene.
\v 6 Moto ongo oyewi okawoli masio akokelaka eho la loyi e Likumu, koto ongo otikelaka eho akokelaka la loyi e Likumu. Moto ongo okolakaka kpaa akolakaka la loyi e Likumu, laate akomoganaka Mwengei. Alidji moto ongo otilakaka atilakaka la loyi e Likumu, kaikoase akomoganaka Mwengei.
\v 7 Laate moto toeti ndondo esu akoyakalesaka inde amene, alidji moto tueti ndondo esu ayaguesaka la inde amene.
\v 8 Laate inga todja la mokalo, tokokalaka la mwano mo Likumu, koto inga togua, tokoguaka la mwano mo Likumu. Eho lenge edje te totoni inga te togui, todjei wato wa Likumu.
\v 9 Laate Kilisito aguali pe awongwali la mokalo la loyi eho, laate adje Likumu e wato waguake la wango wa waatonoke.
\p
\v 10 Ase ndjoni ekomosambesaka owe maangwa? Alidji ndjoni ekomodendjaka owe maangwa? La ebili ate iso kpaa tokoyamala liwoso e ngbelengo esambesake e Mwengei.
\v 11 Edhingani ate: Likumu aasi: Nda edjei mbai meemene la mokalo, mauli kpaa maimbamele mbai, koto olemo kpaa ekomogana Mwengei.
\p
\v 12 Moto la moto akosamba liwoso la Mwengei inde amene.
\p
\v 13 Totiyasambese kine iso la iso, ase huakani ate moto atibate ekikimi inga lisala liwoso la maanango.
\v 14 Iyewi pe igemei pendja ndondo e Likumu Yesu ate ema teeti ekodjaaka la onalili, ase inga moto akodhendelaka ema esi nda edje la onalili, ema eho eumi onalili atie inde.
\v 15 Laate inga maangwa akoyaokisaka magba la mboka e ema elakake, osombiti kine la libalano. La ema e owe elakake otibitese moto ongo Kilisito amogueli.
\v 16 Eho lenge, otidheeni ate waaseleni ino obe la loyi e sambo ndamu djinge ekokelakani ino.
\v 17 Laate okumu wo Mwengei einyeiti olaki la okengi, ase einyei nde sambo ndamu, logoo koto mwemu mongindji la elimo satu.
\v 18 Laate moto ongo odjei motuke mo Kilisito pe akokelaka wungo loyi agemeiyani la Mwengei pe agemeiyani la wato.
\p
\v 19 Eho lenge totuteye sambo djinge ekobataka logoo alidji sambo djinge ekotohekeleke mohandja.
\v 20 Otibitese otomo wo Mwengei sa la loyi e ilaka. Meemene wilaka kpaa wilangi, ase edjei obe olaki ema esi inga ema eho ekomobingesaka odji ekikimi.
\v 21 Edjei olamu otoni olaki mweni e nama inga okengi bino inga okeli ema esi ndjo enge ekomobingesaka miino owe ekikimi.
\v 22 Ogemei wungo wodjei owe la eho, djaa la eho la loyi e owe amene la maiso ma Mwengei. Mwemu la moto ongo otiyaganaka la loyi wungo weeni inde ate wodjei olamu.
\v 23 Ase inga odja la kokia, ayakwesia la loyi inga alaka, laate atilakaka la ogemei. Ema kpaa enge etikelame la ogemei edjei lisumu.
\c 15
\cl ESUKI 15
\p
\v 1 Iso wango wadjei la otetelake ewongi la iso tokpale olembi e wango wateteliti, pe totiyaemelese iso amene.
\v 2 Moto la moto ndondo esu amogamese miino onde la enge edjei olamu laate emohe egalela.
\v 3 Laate Kilisito atiyaemeleseli inde amene. Ase ndji ndenge edhinganali ate: Wiliko e wato wango wakootangakolaka, wikweli mbai.
\v 4 Laate sambo djinge kpaa idhinganali liwoso idhinganali laate etotiesakole iso, la ekaleli esu edjaake la egalela koto la liyakongi linge lilongoyi la madhingo, todje la mwano.
\p
\v 5 Sikandjo Mwengei ongo okohekeleke edjeeli e odjei la egalela koto liyakongi ekelate ate ndondo odjeeni la mamungwene nda enge e Yesu Kilisito adjakali la eho.
\v 6 Laate mongindji moikima koto la monoko moikima, moganani Mwengei koto Wawa e Likumu lasu Yesu Kilisito.
\p
\v 7 Eho lenge, yambanakani ndji ndenge Kilisito atoyambali iso la loyi e otwa wo Mwengei.
\v 8 Laate ikoasaka ate Kilisito aumali pendja motuke mo wango watenani kombeni la oenesi ate Mwengei adjei la omeemene pe ogemeisi mauna mango inde awahali watata wau,
\v 9 laate wapangano wamogane Mwengei la loyi e motema magba monde. Ndji ndenge edhingani: Eho lenge ikoogemeiya la hoho ndondo e miki pe ikobingela kombo e owe ndundu.
\v 10 Aaasi alidji ndjo: Djaani la mwemu, ino miki, mongindji la wato wande.
\v 11 Pe alidji: Moganani Likumu, ino miki kpaa, pe wato wa miki kpaa wamogane.
\v 12 Isaya aasi aleeti ndjo: mana mwesi akouma la liemba e Yese, pe moto ongo okopumba la osombesi miki akodja; miki wakomobatela mwano mou.
\p
\v 13 Mwengei ongo okohekeleke mwano aotumeseni ino la mwemu pe la logoo kpaa la ogemei wonu, laate otumeni la mwano la okulu e elimo satu.
\p
\v 14 Sikala ndjo wamanima, mbai amene pe igemei ate ino otumini pe la wolamu. Laate otumini la woyewi kpaa, pe ate oengini oyani simbisi ino la ino.
\v 15 Ase ikoodhingelakani la hoho ma sambo djeeti, nda ikoobundolakani ino alidji, la loyi e logoo wosungu enge Mwengei andjeneseleli mbai.
\v 16 Laate idje motuke mo Yesu Kilisito atie miki la loyi e olamu wou kpaa, iyalingesi la otomo wosatu e mboli ndamu e Mwengei, laate likao, einyei, winge miki wagemeiyane, wasatisane la elimo satu.
\p
\v 17 Eho lenge, ikoyaganaka la loyi e Yesu Kilisito la sambo e dhengi Mwengei.
\v 18 Itimeke kine alidji oaseli sambo teeti longosa ndji sambo djinge Kilisito akelali atie mbai laate miki mitemeye, la mboka e engbundu e mbai pe la otomo wo mbai,
\v 19 la okulu e wilembo pe la sambo kamwake enge ekoeneseke sambo djinge ikodja, la okulu e elimo satu, eho lenge opoti Yelusalema tee la mboka e Ililikume itiesakolali olamu mboli ndamu e Kilisito.
\v 20 La ndenge eho nde itotali mwano motiesakolake mboli ndamu, ibete winge kombo e Kilisito etiewanali, laate itimaye likolo e moboko e moto odji.
\v 21 Ase ndji ndenge edhingani: Atie wango atitiesakolamate wakoene, wango watioke wakohela kole.
\p
\v 22 Edjei alidji la loyi eho nde mbala ngbii itidjali la engele e owumake ongo atie ino.
\v 23 Ase nda sikala ndjo nda ndji gbata, itikine la moki mungo otomo otikelame pe tee ma wilanga idjei la ehoha e owumake ongo atie ino.
\v 24 Engele ekoke mbai la Esipanye, ikoanaka liwoso yo, ango ekotota mbai okendo la oki ongo, iodhendeni ino pe okeni odhei mbai la mboka mbuse e ogbeti te maa keke la mwemu e odjei mongindji la ino.
\v 25 Ase sikala ndjo ipoti oki Yelusalema laate ikelele wasatu.
\v 26 Laate wango wadjei la Masedonia pe la Akaya waemeli ohekeli wilaka wau likao atie wato wa otundake wango wadjei ndondo e wasatu wango wadjei la Yelusama.
\v 27 Iwo waemeli okeli ndjongo, ase wadjei la nongo e wasatu wango wadjei la Yelusalema. Laate inga wapagano watota pe wiho wa elimo e wango wato, wapagano iwo pe wadjei la nongo e owakeleli iwo djinge wiho kpaa wiwongi la wenge.
\v 28 Engele ekosesa mbai okeli eho pe owaumeseli iwo pukapuka eho la ndenge ewongi pendja, ikoeta atie ino ango ekoke mbai la Esipanye.
\v 29 Iyewi ate ango ekodja mbai atie ino, igeleli la mapamboyi ngbii e Kilisito.
\p
\v 30 Wamanima, sikala ndjo ikoohekelekeni ino egalela la mboka e Likumu lasu Yesu Kilisito pe la libalano e elimo satu, ate ooleni wenge mongindji la mbai la oyakongi atie Mwengei la loyi e mbai.
\v 31 Laate wato wango wati la ogemei wango wadjei la Yudeya watikele mbai obe pe wasatu wango wadjei la Yelusalema wagemeye otomo wungo ikowakelelaka.
\v 32 Ndjongo ango ekowuma mbai atie ino inga edja mwano mo Mwengei, ihane egalela mongindji la ino.
\v 33 Mwengei ongo okohekeleke logoo adje la ino kpaa. Amen.
\c 16
\cl ESUKI 16
\p
\v 1 Ikooosumakani Poibe mangasu o moli, motuke e lingomba linge lidjei la Kekeleya,
\v 2 moyambani inde wolamu ndondo e Likumu la ndenge enge ewongi la wasatu, pe laate omogameseni la sambo kpaa enge ekodja inde la ehoha e ligamesi lanu, laate inde amene pe agamesali wato ngbii, la mbai pe.
\p
\v 3 MOhekeleni Pisika mobale la Akwila, wiino wa mbai wa otomo ndondo e Yesu Kilisito,
\v 4 wango wabatali mokalo mowu la huko la loyi e molimo mo mbai, te ndji mbai amene ase mangumba kpaa e miki madji tokoahekeleke pambo.
\v 5 Hekeleni mobale la lingomba linge lidjei la monguta mowu. Hekeleni mobale la manima o mbai o libalano Epeneto, ongo odjei pukapuka e poo la Aziya la loyi e Kilisito.
\v 6 Hekeleni mobale la Malia ongo ookelelalini ino tomo tetelake.
\v 7 Hekeleni mobale la Andolonikusu la Yuniasi, wato wa liemba la mbai pe wahelani nda mbai. Wango wadjei wato wasungo ndondo e watomani koto waumoyi ngbii ndondo e Kilisito oeti mbai.
\v 8 Hekeleni mobale la Ampliatusi, miino o mbai o libalano ndondo e Likumu.
\v 9 Hekeleni mobale la Ulubano, miino osu e otomo ndondo e Kilisito, pe la manima o libalano Sitakisi.
\v 10 Hekeleni mobale la Apelesi, moto ongo ogemeiyanali ndondo e Kilisito. Hekeleni mobale la wato wa monguta mo Alisitobulu.
\v 11 Hekeleni mobale la Elodiona, moto o liemba la mbai. Hekeleni mobale la wato wa monguta mo Nalasisa wango wadjei ndondo e Likumu.
\v 12 Hekeleni mobale la Tilipana pe la Tiliposa, wali wango wakokelaka wotomo wo tetelake ndondo e Likumu. Hekeleni mobale la Pelisisi maangbasu o libalano, laate akelali tomo ngbii e tetelake ndondo e Likumu.
\v 13 Hekeleni mobale la Lupusi, moto ongo owononi ndondo e Likumu, pe la nango koto ima ndji ango.
\v 14 Hekeleni mobale la Asunikilita, Pilegona, Helemesi, pe la wamangbasu wango wadjei mongindji la iwo.
\v 15 Hekeleni mobale la pilologasa la Yulia, la Neleusi la manango o moli, pe la Olipasi, pe la wasatu kpaa wango wadjei mongindji la iwo.
\v 16 Hekeleneni mobale la ombomboni esatu. Mangomba kpaa ma Kilisito waohini ino mobale.
\p
\v 17 Wamanima, sikalandjo, ikoongoko la ino, ate huakani la wato wango wakolingesaka okawani pe sambo ndjinge ikolingesaka osakeli enge etiokane la matiesakoli djinge waotiesakolini ino, pe tonani odjei mongindji la iwo.
\v 18 Laate wato ehenge ndenge wamokelelitiaka Kilisito Likumu lasu, ase wakokelaka solo djawu amene. La eyaseli e leleke pe e emogano wakogulaka miteme e wato wango wakokosanaka pambapamba.
\v 19 Wato kpaa waewi etemia enu atie Likumu. Ndjongo iyemeli la loyi lanu, ase ibali ate odjeeni wato wa lokenge e sambo djingi widjei wolamu, ase wato wango wati la huko e sambo djinge widjei obe.
\v 20 Mbuse e ma engele keke, Mwengei ongo okohekeleke logoo akomobata etota sese e mangbanda manu. Magba masungu e Likumu lasu Yesu Kilisito edje la ino.
\p
\v 21 Timoteo, miino o mbai e otomo aohekelini mobale, la Lukiusi, Yosana la Sosipatela wato wa liemba wa mbai.
\v 22 Ase mbai Teletiusi moto odhingi ehele ekpata iyohekelini mobale ndondo e Likumu.
\v 23 Gayusi, moto ongo oyambi mbai la lingomba liesi kpaa aohekelini ino mobale. Elasita moto ongo okobaniaka wadjenge e gbata, aohekelini mobale, la Kwalatusi manano.
\v 24 Magba ma Likumu lasu Yesu Kilisito madje la ino kpaa! Amen.
\p
\v 25 Mwengei aengi otetelesi ino la ndenge e mboli ndanu enge ekotiesakolaka mbai, matiesakoli e Yesu Kilisioto, la otutei eeneseli e sekele mosatu enge eisanali engele ndai pendja
\v 26 ase enge eeneni sikala la hoho pe enge eyewisani la madhingo e watiesakoli ndondo e witondo kpaa la ookani e sombeli e Mwengei o libela laate wamogemeiye pe wamoteiye.
\v 27 Mwengei, ongo inde amene nde moto o lokenge, atote otwa la mboka e Yesu Kilisito libela la libela. Amen.