bbm_reg/51-PHP.usfm

\id PHP
\ide UTF-8
\h Wapilipo
\toc1 Wapilipo
\toc2 Wapilipo
\toc3 php
\mt Wapilipo
\c 1
\cl ESUKI 1
\p
\v 1 Polo la Timoteo, wato wa wotomu wa Yesu Kilisito, atie wasatu kpaa wango waboliani la Yesu Kilisito, wango wadjei la Pilipo, wasindjili la wakeli wa tomo.
\v 2 Magba masungu la logoo e Mwengei sangbasu, la Likumu lasu Yesu Kilisito edje la ino.
\p
\v 3 Ikowongosaka engele kpaa dombwa atie Mwengei o mbai, mbala kpaa ango ekomungwakani mbai ino.
\v 4 La oyakongi wo mbai kpaa la loi lanu, ikohaka oyakongi wo mbai la mwemu.
\v 5 La ebili ate ohalini mawo la mboli ndamu opoti lisio la poo tee sikala.
\v 6 Igemei meemene ate ongo moto opotali la ino wu wotomu wolamu, akoumesa tee gboo tee wuse wo Yesu Kilisito.
\v 7 Ewongi wolamu iobundweni ino kpaa ndjongo, la ebili ate iyokpalini la motema mo mbai, la laate ino kpaa okototakani magba masungu mongindji la mbai la ndenge ehelanini ino la ndjiki ndja mbai, edje te ndenge ekolingelelaka ino mboli ndamu, la ndenge odjeini obatesi eho la mboka e pui.
\v 8 Laate Mwengei adjei demu e mbai, ango ekookakani mbai ehoha e ino kpaa, la libalano la motema, nda ndenge Yesu Kilisito adjei la eho.
\p
\v 9 Ndenda enge ekoongoko mbai la maongi: libalano lanu lidje ndji likotalianaka la woewi wo meemene ase la lokenge wosungu
\v 10 laate olukeni oyewi sambo ndjinge iyeti kole, la ebili ate odjeni langaa ase otiwabingeseni wato wadji ekikimi tee lisio la Yesu Kilisito.
\v 11 Otumeni la pukapuka e sambo ndamu enge ekodjaka la mboka e Yesu Kilisito, la loyi e otwa pe mogano mo Mwengei.
\p
\v 12 Sikala, wamanima, ibali ino oyeweni ate sambo dja mbai isombi olamu laate mboli ndamu eke liwoso,
\v 13 ndjongo wohelani wo mbai woeneni la hoho atie wasindjili kpaa wa Likumu alidji la wadji wato kpaa ate ihelani la loyi e omokeleli Yesu Kilisito.
\v 14 Ase wamaangbasu ngbii ndondo e Likumu, wakototaka oteteli la loyi e ndjiki dja mbai, wakoeneseke mohandja ngbii alidji la otiesakoli liloba e Mwengei te la mbangi.
\p
\v 15 Meemene, wadji wato wakomotiesakolaka Kilisito la otonani pe la misio, kasi wadji la mamungwene malamu.
\v 16 Wango wa mamungwene malamu wakomotiesakolaka la libalano, la woewi ate wabati mbai ahala, la olingeleli mboli ndamu.
\v 17 Ase wango wadji wakokelaka eho la loyi e misio, la mamungwene mango malangiti. Laate wakomungwaka opumbeseli mbai wodjidji e ndjiki dja mbai.
\v 18 Nda ema? La ndenge kpaa edje te moleho inga te meemene, Kilisito akotiesakolanaka, pe la loyi laho nde ikoyemeleke. Kaiko ikodja ndji oyemeli alidji,
\v 19 laate iyewi ate eho ekohekele mbai mokalo la mboka e oyakongi wonu, ase e elimo enge etotali Yesu Kilisito.
\v 20 Eho eokani la wolambeli wo mbai la ehoha etetelake pe dombwa wo mbai ate itooka ndundu te wokeke, kasi sikala, la masio kpaa Kilisito akoganana la wenge wa mbai, edje te la mokalo mo mbai, edje te la logo wo mbai.
\p
\v 21 Laate Kilisito adjei mokalo mo mbai ase logo wodjei kole.
\v 22 Kasi inga eengi odjei la mokalo la wenge, edjei pukapuka e otomo wo mbai, kasi itiyewa oasi enge ebali mbai.
\v 23 Ilutani la ngambo iyale, kasi enge edjei mbai la ehoha eho, edjei osombami pe odjei ebete ekikima la Kilisito, laate meemene, eho nde ema enge eeti olamu.
\v 24 Kaikonde, otikali wo mai la wenge edjei la kole enu.
\v 25 Eho lenge, nda ndenge ekogemeyaka mbai loyi luho, iyewi ate ikotikala pe ikoyabata mongindji la ino kpaa laate obekeni pe odjeni la mwemu e ogemei enu,
\v 26 laate odjeni la sambo ngbii e oyagani ndondo e Yesu Kilisito la loyi e mbai la ndenge ikowongwaka alidji atie ino.
\p
\v 27 Kaikonde yasombesani la ndenge enge ewongi la mboli ndamu e Kilisito, laate edje ate idji oodhendji ino te idjiti, iyoke mboli ate okoyamalakani ngbi la elimo saa esi, la motema saa esi okosanakani mongindji la ogemei mboli ndamu.
\v 28 Otiadheleni la mbeti e mitone. Loyi luho ekoeneseke la hoho obitani wou, kasi mokalo monu; pe eho edjei elembo enge elongoyi atie Mwengei.
\v 29 Laate ototini nano ndamu e ogemeli te ndji Kilisito, kasi pe e oeni odjidji la loyi e inde.
\v 30 Laate ino pe okosanakani kindo nda enge oenelini mbai ikosanaka pe nda enge okookakani ino sikala la loyi e mbai.
\c 2
\cl ESUKI 2
\p
\v 1 Eho lenge, inga ndondo enu ma ligamesi lidjei ndondo enu laate obolianini la Kilisito, inga ma mwemu elibalano edjei, inga moto la moto akoyasumbuaka la loyi e miino onde, inga ma libalano e motma la magba madjei,
\v 2 Tumisani mbai la mwemu, la odjei la iyelo likima, la libalano likima, la molimo moiki, la lomungo liikima.
\v 3 Otikelakeni ema teeti la oswameli, inga e mogano modjangi kole. Kasi la oyadjimbisi edhendelake wadji nda wadjei likolo la ino.
\v 4 Moto kpaa ndondo e ino atiyewe sa liputi lande kasi liputi la wiino wande.
\p
\v 5 Djaakani ndondo e ino la mamungo mango madjaali Yesu Kilisito la mango,
\v 6 inde ongo odjakali nda Mwengei, kasi atitotali lomungo ma pwesake okumu, easi nda ate aume nda Mwengei.
\q
\v 7 Kasi ayawumisali pamba, la ototi ekaleli e watuke, la owumi nda wato, aumali nda wato.
\q
\v 8 Ango eumali inde la ndenge e moto, ayadjimbesali pe ademeyali tee la logoo, logoo e ekulusu.
\q1
\v 9 Eho lenge pe Mwengei amodjambali likolo, alidji amohali kombo enge eeti kombo kpaa,
\v 10 laate la kombo e Yesu mawuli kpaa ma wango wadjei likolo, pe e wango wadjei la mbume pe e wango wadjei sese e mbume e maame.
\q
\v 11 Alidji minoko kpaa migemeye la hoho ate Yesu Kilisito adjei Likumu la otwa e Mwengei Wawa.
\p
\v 12 Ndjongo, wa manima wa libalano, ndji ndenge ekotemeyakani ino wiengele kpaa, te ndji engele enge edjei mbai, kasi ngbii sikala engele enge edjeiti mbai, kelakani ndji ndjongo la loyi e mokalo monu amene, la owangi alidji la ongilimi.
\v 13 Laate Mwengei nde moto ongo, ndenge ebali inde okeli, akokelaka ndondo e ino la ebili ate ino obaleni pe okeleni.
\p
\v 14 Kelani ema kpaa te la ondungwani pe te la kokia
\v 15 laate odjeini wato wadjangi ekpeli, alidji wati la huko, wana wa Mwengei wango wadjangi ekweli ndondo e lowela wungo etangama alidji eyaimbi, ango okopumbisakani misa nda moendji mo moki.
\v 16 Nangani la otetelake e liloba e mokalo, laate itote ema eyaganake la lisio e Kilisito, la ebili ate ititilali obangu pamba, alidji itikelali otomo pamba.
\p
\v 17 Inga te ate makila ma mbai makoswana nda likao pe otomo e ogemei wonu, idjei la mwemu pe ekoemeleke mongindji la ino kpaa.
\v 18 Ino pe, ndenge kikima djaani la mwemu pe emeleni mongindji la mbai.
\p
\v 19 Ikomungolaka ndondo e Likumu Yesu, iyotomeleni sikandjo Timoteo, laate molimo mo mbai motume la mwemu ango e kooka mbai sambo djanu.
\v 20 Laaate iti la moto tueti ongo odjei la mamungwene nda inde, pe ongo okoyasumbuaka la kole enu.
\v 21 Laate wadji kpaa wakolukaka ndji olamu owu amene, te enge e Yesu Kilisito.
\v 22 Oyewini ndenge aenesali ate aongi wamobatele motema, la ebili ate nda mana la sango akelali nda motuke mongindji la mbai laate mboli ndamu eke liwoso.
\v 23 Ibundoyi omotomi etie ino mbuse e oyewi ndenge sambo dja mbai ekosomba.
\v 24 Alidji idjei la ogemeyi ndondo e Likumu ate mbai amene igeleli mbuse e ma engele ekeke.
\p
\v 25 Iyeni olamu oyotomelini ino Epapolodite, nanima pe miino o mbai e otomo pe soda nda mbai, moto oholo omotomi ino alidji motuke mo mbai pendja la ndenge e wihoha wa mbai.
\v 26 Laate adjei la ehoha e oeneni la ino kpaa, alidji adjei la magba ngbii la ndenge e ookini ino ate adjaali la ekoni.
\v 27 Adjaali la ekoni pendja, la ahue e logo; kasi Mwengei amookelali magba, te ndji la loi la inde amene, kasi la mbai pe, laate ititote magba likolo e magba.
\v 28 Eho lenge ikomotomaka gala gala, laate ango ekomoeneni ino oyemeleni, alidji magba ma mbai isile olamu olamu.
\v 29 Moyambani ndondo e Likumu la oyemeli kpaa, alidji djaakani olambeli ndenge ehele e wato.
\v 30 Laate edjei la otomo e Kilisito, adjaali pene e logo, abatali molimo monde la huko laate akele olamu eholo enu la ndenge ino amene otini ahala la okeleli mbai.
\c 3
\cl ESUKI 3
\p
\v 1 La osukisi, wamanima emeleni ndondo e Likumu. Owongoli o odhingelini ino sambo djinge edhingali mbai etitungisaka mbai, kasi edjei ate e obanyeni ino.
\p
\v 2 Huakani la wambua, huakani la wato wango wakokelaka obe. Huakani la wato wango watenani kombeni obe.
\v 3 Laate iso nde wato wango watenani kombeni olamu, iso nde tokokelaka otomo mosatu la ligamesi e elimo e Mwengei pe tokoyaganaka la Yesu Kilisito, pe totibatelaka wenge motema.
\v 4 La eho, mbai amene ikoki obati dombwa e mbai la wenge wa mbai. Inga moto mwesi ongo okobundwaka ate aengi obateli wenge motema, mbai ibateli oyeti.
\p
\v 5 Itenanaate kombeni lisiyo e mwambi, idjei moto o Isalayele, e moki mo Bezame, Moebele mana o Waebele; la enge edhendji pui idjali Mopalisai.
\v 6 La enge edhendji egalela, idjaali moenesi odjidji lingomba; la enge edhendji omeemene e pui idjali moto odjangi obe.
\p
\v 7 Te ndjongo ndji djinge pui idjakali ohekeli mbai kole, ieneli nda ema e wungake la loyi e Kilisito.
\v 8 La loyi laho, la motio mosungu eyewake Yesu Kilisito Likumu la mbai, ikodhendelaka wiho kpaa nda wiho winge wiunga. La inde igemei owungisi wiho kpaa alidji ikodhendelaka eho nda edjei osoto, la ebili ate itote Kilisito.
\v 9 Ieneni ate idjei mongindji la inde, eti la womeemene wo mbai amene, enge elongoi la pui, kasi enge elongoi la omogemei Kilisito, womeemene wungo ekolongwaka la Mwengei alidji emaemi la ogemei.
\v 10 Laate imoyewali pe okulu e obasi wonde alidji ieneli wodjidji wungo inde aeneli, igemeyali ogwi nda inde,
\v 11 laate iyene inga ikouma edje te la nda ndenge obasi wo poo tee ongo la wagwi.
\p
\v 12 Easiti ate itoti eho inga te ate iwumi moto oengi, kasi ikobiliaka la oeni inga iengi pe oheli ema ehele Yesu Kilisito pe ahelali mbai la loyi luho.
\v 13 Wamanima itienekeyo ate iheli eho, kasi edjei la ema esi ikokelaka, iwosani wiho winge widjei mbuse alidji ikokelaka ndenge kpaa laate itote wiho winge widjei liwoso,
\v 14 ikokeke obangu tee la gboo la ototi likawo e oki likolo ndenge Mwengei aweli mbai la mboka e Yesu Kilisito.
\v 15 Eho lenge, iso kpaa wango waumi wagbolo, todjei la djinge mamungo maho, alidji inga odjani la mamungo maeti e loyi esi ndjo, Mwengei okoenesani ino mamungo mango ma wongi.
\v 16 Ndenge kikima, ebete edjei iso, tosombe mboka kikima alidji tokale la ookani.
\p
\v 17 Wamanima, djani ino kpaa watuteyi wa mbai, alidji dhendakani wango wakosombaka la ndenge enge e ookani la esombeli enge etoti ino atie iso.
\v 18 La eho, wato ngbii wakoyasombisaka nda mitone e ekulusu e Kilisito; iyowaselalini la loyi ewu, pe ikokelaka sikalandjo la ilelo.
\v 19 Gboo e iwo edjei liwunga, Mwengei owu edjei solo ndjawu, otwa owu nde soni ewu, pe wakodhendelaka ndji sambo dja mu moki.
\v 20 Kasi iso todjei wana wa moki mo likolo, ongo ekomolambelaka iso Mokalesi mosu Likumu Yesu Kilisito.
\v 21 Inde akowongela alidji wenge wasu enge e magba la owumisi ndenge kikima la wenge wande e otwa la okulu enge edjei inde le eho, akobataka wiho kpaa sese e okumu wonde.
\c 4
\cl ESUKI 4
\p
\v 1 Eho lenge, wamanima wa libalano wa mbai, la wamanima wango wakookaka mbai ehoha etetelake, mwemu mo mbai pe motole mo mbai, amalani ngbi ndondo e Likumu, wamanima wa libalano.
\p
\v 2 Ikohaka mohandja la Ebodia, pe ikohaka mohandja la Setisa, wadje la limungwene likima atie Likumu.
\v 3 La owe koto, mino o mbai o wotomu, ndji ndjongo, iwongi owagamese wango wali waolali wenge wau la mbai mongindji la loyi e mboli ndamu mongindji la Kelema, la wino wa mbai wa wotomu, wango nkombo ndjawu edhingani la ahala e mokalo.
\p
\v 4 Emelekeni masio kpaa ndondo e Likumu. Iyasi alidji, emeleni.
\v 5 Laate wolamu wonu wewane la wato kpaa. Likumu aumia ahue.
\v 6 Otiyasumbweni la loi te loeti, kasi la sambo kpaa yewesani wihoha wanu atie Mweengei la oyakongi, la iyongolo pe la ndenge e omowongoseli dombwa.
\v 7 Ase logoo e Mwengei enge eyeti mamungwene kpaa ekobania mitema manu, la mamungwene manu, la ndenge e Yesu Kilisito.
\p
\v 8 Wamanima, enge etikali eho lele, sambo kpaa dja meemene, sambo kpaa dja mogano, sambo kpaa djinge iwongi, sambo kpaa djinge ilangi, sambo kpaa djinge iengi obalani, sambo kpaa djinge iyasani wolamu, inga edjeli esi elamu edjei pe inga ema esi enge eongi la mogano edja, bundwakani djinge sambo.
\v 9 Sambo djinge waotiesakolalini ino, ase ogemeyalini, ase ookalini pe oenalini atie mbai, kelakani ndji ndjongo, ase Mwengei o logoo akotinga la ino.
\p
\v 10 Idjei pendja la mwemu ngbii la ndondo e Likumu laate gboo sikalandjo osusoliani mamungwene manu la loi lo mbai, loi lungo edjaki ino omungoi, kasi odjangalini nde ekikimi.
\v 11 Eti la wodjangi wo mbai nde ekwasaka mbai ndjongo, la loi ate iyekolali, odjei la mwemu la ndenge edjei mbai.
\v 12 Iyewi pendja odjangi wiho, iyewi pendja odjei la wiho ngbii. La ema kpaa pe la sambo kpaa iyekoli ogbeti la odjei la ndjala, la odjei la wiho ngbii, la odjangi.
\v 13 La sambo kpaa idjei la wokulu la ligamesi e moto ongo okohaka mbai wotetelake.
\v 14 Inga te ndjongo, okelalini wolamu la ndenge eeneli ino wodjidji la mbai mongindji.
\p
\v 15 Ino Wapilipo, ino amene oyewini la lipotele e otiesakoli mboli ndamu, ango elongwali mbai la Masedonia, lingomba te leeti litigamesali mbai inga pe litigemeyali ate iwagamese, longose ndji ino.
\v 16 Okelalini la ndenge enu, otomelalini mbai wiho mbala epoo la ewale ongo la Tesaloniki la loi e wihoha wa mbai.
\v 17 Iyasiti ate ikolukaka likao la engbalangbala, kasi ikolukaka la engbalangbala pukapuka enge ekobekesa alidji ogumake wonu.
\p
\v 18 Ikondjali djiesi kpaa, ase idjei la wiho ngbii, iyemeli sikahala nda ekondji mbai wiho atie Epapolodi, wiho winge wilongoi ongo atie ino, malasi ma lumba malamu, likao linge ligemeyani atie Mwengei.
\v 19 Ase Mwengei o mbai akoengesa wihoha wanu kpaa, la ndenge enge eengi la ogumake wonde la otwa la mboka e Yesu Kilisito.
\v 20 Sika ahala Mwengei oosu, la sangbasu adje la otwa libela la libela. Amen.
\p
\v 21 Hekeleni mobale la mosatu kpaa ongo oyaabondji la Kilisito Yesu. Wamaangbasu wango wadjei la mbai waotomelini mobale.
\v 22 Wasatu kpaa, la oyeteli wango wadjei la monguta mo Kaisala, waotomelini mobale.
\p
\v 23 Magba masungu e Likumu Yesu Kilisito edje la elimo enu.