ach-ss-acholi_reg/63-1JN.usfm

\id 1JN
\ide UTF-8
\h 1 Lakana
\toc1 1 Lakana
\toc2 1 Lakana
\toc3 1jn
\mt 1 Lakana
\c 1
\cl Chura 1
\p
\v 1 Wan wacoyo botwu lok i kom gin mubedo tye nia i acakki piny, ma wan kikomwa wawinyo, dok bene waneno ki waŋwa. Wanene ada, dok wamulo kome ki ciŋwa, en lok me kwo.
\v 2 Kwo meno yam onen woko ka maleŋ, wan waneno. Wan doŋ kombeddi wabedo cadenne, kun watito botwu lok me kwo ma pe tum ma yam obedo bot Won, ka doŋ onen woko botwa.
\v 3 Gin ma wan waneno ki ma wawinyo en aye ma witito botwu bene, wek omi wuribbe kwedwa. Doŋ i ribbewa-ni waribbe kacel ki Won ki Wode Yecu Kricito.
\v 4 Wacoyo lok man wek yomcwinywa ocobbe maber.
\p
\v 5 Man aye lok me kwena ma yam wawinyo ki bote, ma watye ka titone botwu, ni, Lubaŋa en leŋo, dok i en pe tye ka mo macol kadi ki acel.
\v 6 Ka wawaco ni waribbe kwede kun pud wawoto ka macol, wan lugoba, timwa noŋo ada pe iye.
\v 7 Ento ka wawoto ka maleŋ, macalo en bene tye ka maleŋ, noŋo waribbe ŋat man ki lawote, dok remo pa Wode Yecu Kricito bene lwoko bal ducu woko ki i komwa.
\v 8 Ka ce wawaco ni wape ki bal, meno noŋo wabwolle abwola kenwa, lok ada noŋo pe i iwa.
\v 9 Ka watuco balwa, en genne dok kite atir, biweko balwa, dok bilwoko tim maraco ma tye i komwa ducu.
\v 10 Ka wawaco ni pe wabalo, ci wamiyo Lubaŋa doko lagoba, lokke bene noŋo pe i iwa.
\c 2
\cl Chura  2
\p
\v 1 Litinona, acoyo waraga man botwu wek pe wupot i bal; ento ka ŋat mo obalo, watye ki lakony ma cuŋ piwa bot Lubaŋa Won, en Yecu Kricito ma kite atir.
\v 2 Dok en kikome bene obedo gitum pi kwanyo balwa, pe balwa keken ento kadi wa bal pa jo ma i wi lobo ducu.
\p
\v 3 Gin ma miyo waniaŋ maber ni waŋeye en aye ni, wan wagwoko cikke.
\v 4 Doŋ dano ma waco ni eŋeye, ma pe omako cikke, noŋo lagoba, ada pe i iye.
\v 5 Ento ŋat ma mako lokke, adada noŋo mar pa dano-nu i kom Lubaŋa tye muromo. Pi lok man watwero niaŋ ada ni watye i en:
\v 6 ŋat ma waco ni ebedo i en myero olub kit kwo acel ma yam Yecu olubo.
\p
\v 7 Lurema, an pe atye ka coyo botwu cik mo manyen, ento cik macon ma yam watye kwede wa con nia i acakki piny. Cik macon meno en aye lok ma doŋ wutyeko winyone ma gitito botwu.
\v 8 Kadi bed kumeno, atye ka coyo botwu cik manyen; meno tye ada ki tuŋ bot Kricito ki tuŋ botwu bene, pien colpiny doŋ tye ka ke woko, ki ceŋ me ada doŋ tye ka ryeny.
\v 9 Dano ma waco ni etye i leŋo kun dag ominne, noŋo pud tye i colpiny aye.
\v 10 ŋat ma maro ominne bedo i leŋo, ma pe iye gin mo ma miyo dano poto i bal.
\v 11 Ento ŋat ma dag ominnie tye i colpiny, dok bene noŋo tye ka wot ka macol, kun pe ŋeyo ka ma myero ecit iye, pien colpiny noŋo oumo waŋe woko.
\p
\v 12 Acoyo waraga man botwu, wun litino ma pud wutino, pien balwu doŋ giweko woko pi nyiŋe.
\v 13 Acoyo botwu bene wun wego, pien wuŋeyo ŋat ma yam tye con nia i acakki piny. Acoyo botwu wun awobe, pien wuloyo Larac woko.
\v 14 Acoyo botwu wun litino, pien wuŋeyo Won. Acoyo botwu wun wego, pien wuŋeyo ŋat ma yam tye nia i acakki piny. Acoyo botwu wun awobe pien wutek, lok pa Lubaŋa bedo i iwu, dok bene doŋ wuloyo Larac woko.
\p
\v 15 Pe wumar lobo, kadi gin ma tye i lobo. Ka dano mo maro lobo, noŋo mar pa Lubaŋa pe i iye.
\v 16 Pien gin ducu ma tye i lobo, macalo miti me komwa ma ginywalowa kwede, ki miti marac pi gin ma waneno ki waŋwa, ki dok wakke ki jami ma watye kwede i kwowa, magi ducu pe gua ki bot Won, ento gucakke i lobo kany.
\v 17 Lobo tum woko ki mitine ducu; ento ŋat ma tiyo gin ma Lubaŋa mito ri nakanaka.
\p
\v 18 Litinona, man aye doŋ kare me agikki. Yam gitito botwu ni, lakwor pa Kricito bibino, ento kombeddi lukwor pa Kricito doŋ gubino woko mapol ata; en meno gin mumiyo waŋeyo ni, man doŋ kare me agikki.
\v 19 Gin gua woko ki botwa, pien onoŋo yam gin pe gubedo dano ma mewa; kono yam gubedo dano ma mewa, kono gumedde ki bedo botwa. Ento gin gua woko ki botwa wek onen ka maleŋ ni gin ducu pe gubedo dano ma mewa.
\v 20 Ento wun, ŋat Maleŋ doŋ owirowu woko ki moo, wun ducu doŋ wutye ki ŋec.
\v 21 Pe acoyo botwu waraga man pien ni wukwiya lok me ada, ento pien wuŋeyo, dok wuniaŋ bene ni, pe tye goba mo ma oa i lok ada.
\v 22 Doŋ aŋa ma lagoba? Ŋat ma lagoba en aye dano ma kwero woko ni Yecu pe Kricito ma Lubaŋa oyero. Meno en aye lakwor pa Kricito, en noŋo okwero Won ki Wod.
\v 23 Pe tye ŋat mo ma kwero Wod ma dok tye gin ki Won. Dano ma oye Wod, noŋo tye ki Won bene.
\v 24 Wuwek gin ma wuwinyo nia con obed i iwu. Ka inen gin ma yam wuwinyo wa con bedo i iwu, wun bene wubibedo i Wod ki i Won.
\v 25 Man gin ma en ociko me miyowa, en aye kwo ma pe tum.
\p
\v 26 Man acoyo botwu pi jo ma twero rwenyowu.
\v 27 Ento wun, moo me Cwiny Maleŋ ma yam Kricito owirowu kwede bedo doŋ i iwu, miyo pe mitte ni ŋat mo opwonywu; pien moo ma yam giwirowu kwede pwonyowu i lok ducu. En gin me ada, pe goba; macalo yam en owonyowu, wubed i en.
\p
\v 28 Kombeddi doŋ ba, litinona, wubed i iye, wek ka en dok binen, wabed ki tekcwiny, ma pe lewic makowa i nyime ka odwogo.
\v 29 Ka ce wuŋeyo ni en kite atir, ci myero wuniaŋ ada ni, ŋat acel acel ma tiyo gin ma tye atir noŋo Lubaŋa munywalo.
\c 3
\cl Chura  3
\p
\v 1 Koŋ wunen kit mar madit ma Won omiyowa, ni gilwoŋwa ni wan litino pa Lubaŋa; me atir, watye kumeno. Gin mumiyo lobo pe ŋeyowa, pien onoŋo yam pe oŋeye.
\v 2 Lurema, kombeddi doŋ wan litino pa Lubaŋa; kit ma wabibedo kwede peya onen, ento waŋeyo ni ka en binen, wan bene wabinen calo en, pien wabinene kit ma en tye kwede.
\v 3 Doŋ ŋat acel acel ma tye ki gen man ma omoko i kom Kricito, lonnye kene bedo maleŋ, macalo Kricito bene leŋ.
\v 4 Dano acel acel ma timo bal noŋo turo cik, bal aye turo cik.
\v 5 Wuŋeyo ni Kricito yam onen wek ekwany bal woko; i en kikome bal mo pe iye.
\v 6 Ŋat mo ma bedo i en pe timo bal; ŋat mo ma timo bal noŋo pe onene, dok bene noŋo pe oŋeye.
\v 7 Litinona, pe wuwek ŋat mo obwolwu. ŋat ma timo gin ma tye atir, noŋo kite atir, macalo Kricito bene kite atir.
\v 8 ŋat ma timo bal, meno noŋo dano pa Catan; pien Catan obedo ka timo bal nia i acakki piny. Gin mumiyo Wod pa Lubaŋa yam onen, en aye pi turo tic pa Catan woko.
\v 9 Pe tye ŋat mo ma Lubaŋa onywalo ma timo bal, pien kodi pa Lubaŋa bedo i iye; en pe twero balo, pien noŋo Lubaŋa munywale.
\v 10 Man aye gin ma bimiyo gineno jo ma gin litino pa Lubaŋa ki jo ma gin litino pa Catan: ŋat ma pe timo gin ma tye atir pe latin pa Lubaŋa, kadi wa ŋat ma pe maro ominne bene.
\p
\v 11 Jon 13.34 Pien man aye lok ma wuwinyo nia i acakki, ni myero wamarre kekenwa.
\v 12 Pe wabed calo Kain ma yam obedo latin pa Larac, ci oneko ominne woko. Gin aŋo mumiyo oneke? Pien gin ma en otiyo ducu obedo rac, ento gin ma ominne timo onoŋo tye atir.
\v 13 Utmegina, pe wubed ki ur ka lobo kwerowu.
\v 14 Waŋeyo ni wakato ki i to, wao doŋ i kwo, pien wamaro utmegiwa. Dano ma pe ki mar, noŋo pud odoŋ i to.
\v 15 ŋat ma dag ominne meno lanek, dok bene wuŋeyo ni, pe tye lanek mo ma kwo ma pe tum bedo i iye.
\v 16 Man doŋ miyo waniaŋ i kom mar, pien Kricito omiyo kwone piwa. Wan bene myero wami kwowa pi utmegiwa.
\v 17 Ka ŋat mo tye ki jami me lobo man madwoŋ, ce oneno ominne ma piny oloyo, ento okwero miye kony, ci mar pa Lubaŋa bedo i iye niŋniŋ?
\v 18 Litinona, pe wabedu ki mar i lok ma waloko ki dogwa keken, ento wamar dano ki mar me ada ma nen i tic.
\p
\v 19 Man bimiyo waŋeyo ni wan jo ma tye ki ada; ci bimiyo cwinywa kwe i nyime;
\v 20 ka ce cwinywa ŋolo kop loyowa, ci waŋeyo ni Lubaŋa dit kato cwinywa woko, dok ŋeyo lok ducu. Tekcwiny i nyim Lubaŋa
\v 21 Lurema, ka cwinywa pe ŋolo ni kop oloyowa wabedo ki tekcwiny i nyim Lubaŋa;
\v 22 dok bene wanoŋo gin mo keken ma walege pire, pien wagwoko cikke dok watiyo gin ma yomo cwinye.
\v 23 Doŋ cikke en ene ni, myero waye nyiŋ Wode Yecu Kricito, dok wamarre kekenwa, macalo en yam ocikowa.
\v 24 ŋat ma gwoko cik pa Lubaŋa bedo i Lubaŋa, Lubaŋa bene bedo i iye. Gin ma miyo waŋeyo ni en bedo i iwa, pi Cwiny Maleŋ ma en omiyo botwa.
\c 4
\cl Chura  4
\p
\v 1 Lurema, pe wuye kit cwiny ducu, ento koŋ wutemgi, wunen ka gin cwiny mua ki bot Lubaŋa, pien lunebi mapol ma lugoba doŋ guket gucito woko i lobo.
\v 2 Wubiŋeyo Cwiny pa Lubaŋa kit man: cwiny ducu ma tuco ni Yecu Kricito yam obino kun tye ki kom dano, meno Cwiny pa Lubaŋa;
\v 3 ento cwiny ma pe tuco Yecu kit meno, pe oa ki bot Lubaŋa. Meno cwiny pa lakwor pa Kricito ma yam wuwinyo pire, ni tye ka bino, kombeddi doŋ tye i lobo.
\p
\v 4 Litinona, wun litino pa Lubaŋa, doŋ wutyeko loyogi woko; pien ŋat ma tye i iwu-ni dit kato ŋat ma tye i lobo.
\v 5 Jo meno gin dano me lobo, en mumiyo gin ma giloko obedo me lobo, lobo bene winyogi.
\v 6 Wan jo pa Lubaŋa; ŋat ma ŋeyo Lubaŋa winyo lokwa, ento ŋat ma pe en dano pa Lubaŋa pe winyo lokwa. Meno aye gin ma miyo waŋeyo poko cwiny me ada ki cwiny me goba. Lubaŋa aye mar.
\p
\v 7 Lurema, myero wamarre kekenwa, pien mar a ki bot Lubaŋa, ŋat ma maro noŋo en latin pa Lubaŋa, dok ŋeyo Lubaŋa.
\v 8 ŋat ma pe ki mar, noŋo en pe ŋeyo Lubaŋa, pien Lubaŋa aye mar.
\v 9 Gin ma yam onyuto marre botwa en ene, Lubaŋa ocwalo Wode acel keken i lobo wek omi wabed kwo pire.
\v 10 Man en aye mar, pe ni wan wamaro Lubaŋa, ento en aye omarowa, ci ocwalo Wode me bedo gin me kwanyo bal woko ki i komwa.
\v 11 Lurema, ka Lubaŋa doŋ omarowa kit man, wan bene myero wamarre kekenwa.
\p
\v 12 Pe tye dano mo ma yam oneno Lubaŋa; ka wamarre kekenwa, ci Lubaŋa bedo i iwa, marre bene bedo muteggi i iwa.
\v 13 Gin ma miyo waŋeyo ni wabedo i iye, ki en i iwa, pien omiyowa Cwiny mere.
\v 14 Wan doŋ bene waneno, dok wamiyo caden ni, Lubaŋa Won ocwalo Wode me bedo Lalar me lobo.
\v 15 Dano ma tuco ni Yecu en Wod pa Lubaŋa, Lubaŋa bedo i iye, ki en bene bedo i i Lubaŋa.
\v 16 Man omiyo waŋeyo mar ma Lubaŋa tye kwede i komwa, dok waye ni marowa. Lubaŋa aye mar, ŋat ma bedo i mar bedo i Lubaŋa, Lubaŋa bene bedo i iye.
\v 17 Ka marwa doŋ oteggi, wabibedo ki tekcwiny i nino me ŋolo kop, pien kit macalo Yecu obedo kwede, meno bene en aye kit macalo wan watye kwede i lobo man.
\v 18 Lworo mo pe i mar, ento mar ka doŋ oteggi ryemo lworo woko; pien lworo bino pi kuro keto can, doŋ dano ma lwor, noŋo marre pud peya oteggi.
\v 19 Gin mumiyo wabedo ki mar, pien en okwoŋo marowa.
\v 20 Ka ce dano mo waco ni emaro Lubaŋa, kun dag ominne, noŋo en lagoba; pien ŋat ma pe maro ominne ma en oneno kome, pe twero maro Lubaŋa ma pe oneno kome.
\v 21 Cik man wanoŋo ki bote ni, dano ma maro Lubaŋa myero omar ominne bene.
\c 5
\cl Chura 5
\p
\v 1 Dano acel acel ma ye ni Yecu en Kricito ma Lubaŋa oyero, dano-nu latin pa Lubaŋa, dok dano mo ma maro ŋat ma onywalo latin, maro latinne bene.
\v 2 Ka wamaro Lubaŋa, ma walubo cikke bene, meno miyo waŋeyo ni wamaro litino pa Lubaŋa.
\v 3 Pien maro Lubaŋa en aye gwoko cikke. Dok cikke pe nurowa.
\v 4 pien dano acel acel ma Lubaŋa onywalo loyo lobo. Gin ma waloyo kwede lobo en aye niyewa.
\v 5 Aŋa mono ma loyo lobo? Pe ŋat ma ye ni, Yecu aye Wod pa Lubaŋa? Caden i kom Yecu.
\p
\v 6 Yecu Kricito aye ŋat ma yam obino ki pii ki remo. Pe obino ki pii keken, ento ki pii kacel ki remo bene.
\v 7 Cwiny Maleŋ tye macalo cadenne, pien Cwiny aye ada.
\v 8 Doŋ tye caden adek: Cwiny Maleŋ, pii ki remo; gin adek-ki ducu lok me cadengi orwatte.
\v 9 Wan waye lok me caden ma dano gimiyo, ento caden pa Lubaŋa dit kato megi woko Man aye lok me caden pa Lubaŋa, ma en omiyo i kom Wode.
\v 10 Doŋ ŋat ma ye Wod pa Lubaŋa tye ki caden i iye kene. ŋat ma pe ye Lubaŋa, noŋo omiyo Lubaŋa odoko lagoba, pien noŋo en pe oye lok me caden ma Lubaŋa omiyo i kom Wode.
\v 11 Caden meno en ene ni, Lubaŋa doŋ omiyowa kwo ma pe tum, dok kwo meno tye i Wode.
\v 12 ŋat ma tye ki Wod tye ki kwo, ŋat ma pe ki Wod pa Lubaŋa, pe tye ki kwo. Kwo ma pe tum.
\p
\v 13 Acoyo lok man botwu, wun jo muye nyiŋ Wod pa Lubaŋa, wek wuŋe ni wutye doŋ ki kwo ma pe tum.
\v 14 Gin ma miyo wabedo ki gen i kome en ene ni, ka walegge gin mo kun walubo gin ma en mito, ci en winyo legawa.
\v 15 Doŋ ka waŋeyo ni en winyo legawa, waŋeyo ni doŋ watyeko noŋo gin ma walego bote.
\p
\v 16 Ka ce dano neno ominne tye ka timo bal mo ma pe tero dano i to, en bilego Lubaŋa, ci Lubaŋa bimiye kwo pi jo-nu ma balgi pe tero dano i to-ni. Tye bal ma tero dano i to; pe awaco ni myero waleg Lubaŋa pi kodi bal macalo meno.
\v 17 Gin marac ducu ma dano timo, meno doŋ bal, ento tye bal mogo ma pe tero dano i to.
\v 18 Waŋeyo ni dano ma Lubaŋa onywalo pe dok bedo ka timo bal, ento Wod pa Lubaŋa gwoke maber, miyo Larac pe gude.
\v 19 Waŋeyo ni wan litino pa Lubaŋa, dok waŋeyo ni lobo ducu tye i te loc pa Larac.
\v 20 Dok waŋeyo ni Wod pa Lubaŋa doŋ obino, ci omiyowa niaŋ me ŋeyo ŋat ma en aye ada. Dok wan wabedo i i ŋat ma tye ada, pien wabedo i i Wode, en aye Yecu Kricito. Man aye Lubaŋa me ada, dok man en kwo ma pe tum.
\p
\v 21 Litinona, wugwokke, pe wuwor jogi.