Mon Jul 04 2016 14:40:42 GMT+0100 (W. Central Africa Standard Time)

16/01.txt

@@ -0,0 +1 @@
+\c 16 \v 1 Yesu ki saaŋ àni gbukɛlî tokɛl án kɛɛln-bishɛ́ɛ̀ŋɛ̂ se yé dé: «Klɛwɔ ɲɛrotɔn dyàn ni tɛ̀ŋnɛ̀n nòfelɔn jɔ dyàn se ín, jimiì ki b'à tɔŋndé fù nòfelɔnî se d'à jɔɔ̂ r'àn nòfelî leèn bin kaarn mɔ. \v 2 À nòfelɔn jɔɔ̂ ki b'án klɛwɔ ɲɛrotɔn jɔɔ̂ fɛ́ŋn k'à wú à se d'àkun fɔn mùmun náan à gbɔ mɔ dé fù ki hlɔ ɔ a? D'á w'án klɛwɔɔ̂ klɛ̀ fáâ wú, bóló ɔ bo d'à w'àkun ǹ klɛwɔ ɲɛrobé kwo hìn ká bo.

16/03.txt

@@ -0,0 +1 @@
+\v 3 À klɛwɔ ɲɛrotɔn jɔɔ̂ k'à wú á byéen wono d'àkun bè myɛ́n kwobɛ̂ kyáŋmɔ? Fù bóló ɔ bo àkun ŋmelɔn jɔɔ̂ b'àkun búurnbɛ̀. D'àkun ki fɛ́lkwoa? Dé fù faŋ wo fɔn àkun mɔ bo. D'àkun ki tɛŋn nyɛɛl klɛrɔn a? Fù flɛ́ɛ fɔn àkun to. \v 4 D'àkun fɔn án klɛ fù ri shi, àkun mùkâr ye bè gbɔ̀n li án klɛwɔɔ̂ ta, nɔkɔ́ŋl jimin k'àkun kyaŋ.

16/05.txt

@@ -0,0 +1 @@
+\v 5 À la máno tɛ̀ŋn híin, k'à ŋmelɔn jɔɔ̂ ǹ kɔ́ŋntêê fɛ́ŋn jir byéen byéen ɔ, k'à túkyɛ̂ŋlî du d'àkun ŋmelɔn jɔɔ̂ ǹ gbá kɔ́ŋn n'àkun to? \v 6 À kɔ́ŋn jɔɔ̂ k'à mɔli dé nyɛ́ɛl ti kar-kwɛŋl (100), k'à wú fù se d'àn kɔ́ŋn sɛ́bɛ̂ɛ̂ rɛn. D'à wo ɲínɛ́ɛn á munân ɔ, ki ti kúrfú (50) ɲúr. \v 7 Fù kwɔsé ki saaŋ jir má du d'àkun híin, dé gbá kɔ́ŋn n'àkun to? Fù k'à wú dé kùnmɔ bin bwarn kar-kwɛŋl (100), k'à wú fù se d'àn kɔ́ŋn sɛ́bɛ̂ɛ̂ rɛn. D'à wo kpɛ̂ŋlŋmɛn (80) ɲúr.

16/08.txt

@@ -0,0 +1 @@
+\v 8 Fù nòfelɔn jɔɔ̂ k'à lɛshu d'àkun ǹ gbɔ shɛɛŋl klɛ jɔɔ̂ ri jɛ́ɛnshi à k'á ɲɛ̀n fáâ se. Fù bóló ɔ bo ɲa yeê jimiìî r'án gbɔɛ̀ klɛɛ̀n yíse jɛ́ɛnhlɔ̀bê mɔ ki jìré Jɔnɔsɔ núkwɔ́ɔn wono gbíjîr mɔ gbɔ klɛ jimiìî to.  \v 9 Mún kwó, mún n'à lóon yíkun se dé yíi w'án hlɔtabê mɔ ŋmɔ́n kaarn nòfelî ɔ jirɛ̂bé ja jimiì to, nɔkɔ́ŋl fù mùkâr ye bè kɔ́ŋnè fɛ̀ ki bɛ don yíkun hlúké Jɔnɔsɔ ǹ faŋbéê wono dwɔn, fù mun wo kɔ́ɔŋn bo.

16/10.txt

@@ -0,0 +1 @@
+\v 10 Jiminî mun ki yɛŋntokwɔ́ɔŋntɔn ɔ gbɔ tíin mɔ, fù jiminî ki saaŋ máno yɛŋntokwɔ́ɔŋntɔn ɔ gbɔ tyɛɛ́ŋ sɔ́ɔ mɔ. Fù nì jiminî mun tɛɛ̀ŋn jimin shɛɛŋlmun gbɔ tíin mɔ, fù jiminî saaŋ máno tɛɛ̀ŋn jimin shɛɛŋlmun gbɔ tyɛɛ́ŋ sɔ́ɔ mɔ. \v 11 Fù nì klɛ̀ híin, yíkun nì tɛ̀ŋn yɛŋntokwɔ́ɔŋntê díryɔ́ŋ nòfelî gbɔ mɔ bo, Jɔnɔsɔ w'án faŋbéê mɔ ŋmɔ́n nòfelî tea yíkun to bo! \v 12 Fù nì yíkun nì tɛ̀ŋn yɛŋntokwɔ́ɔŋntê jir má kpɛŋnmɔ́ɛ̀ gbɔ mɔ bo, Jɔnɔsɔ wo yíkun fù ri tea án faŋbéê mɔ dwɔn bo!

16/13.txt

@@ -0,0 +1 @@
+\v 13 Tɔnklɛrɔn dó wo ŋmelɔn jir níin tɔŋnkwo hìn gbɔ̀n byéen bo. Fù nì klɛ̀ híin, à máâ gbɔ b'à déa à máâ gbɔ k'à tìyà tɛŋn. Fù nì kwoa bo k'á nur tɛŋn à máâ wɔ́se, k'à máâ tojakwó. Fù k'à lô ɔ dé yíkun wo tú mli hìn nòfel besé, yíi ki saaŋ Jɔnɔsɔ tɔŋnkwo bo, fù fá wo yí bo.»

16/14.txt

@@ -0,0 +1 @@
+\v 14 À Farisiyɛ̂ɛ̀ŋɛ̂ bè Yesu ǹ kɛl gbukɛlî tonáan, yì b'à kɛŋl myɛɛ̀n bóló ɔ bo nòfel gbɔ ri yì tìyà. \v 15 Yesu k'à wú yì se dé: «Yíkun n'á byéen ɔ bùkwɔ̀ɛ̀ŋ jiìrn jimin ɲáa ɲɛ̀n ŋmɔ̂n ɔ, ta, Jɔnɔsɔ bè yíkun nìryɛŋn ta gbɔɛ̀ɛ̂ shi. Fù bóló ɔ bo jimiì ri gbɔɔ̂ mun ɔ gbɔ mɔtityɛ̂ŋnmun jìrɲɛ̀n, fù ki Jɔnɔsɔ se gbɔ nìnâmun ɔ.

16/16.txt

@@ -0,0 +1 @@
+\v 16 Musa ǹ tɔ̂ŋn sɛ́bɛ̂ɛ̂ n'à tɔ́ŋrêê ǹ ɲwâr sɛ́bɛ̂ɛ̂ fɔn jimiì ɲɛjiìrn ín, ki bɛ̀ búr Yuhana fù gbârî to. Fù kwɔ́ɔn Jɔnɔsɔ ǹ Faŋbéê Twɔ́ɔŋn Nar Sɔ́ɔɔ̂ ki wú jimiì se, yì b'á ɲákpɛɛ̀ŋln yì ki dé à mɔ ɲɛ̀lokɔ̂ŋ ɔ.  \v 17 À jɔ̀nɔ̀kpárî n'à ɲáantyarî gbɔ bè kɔ́ɔŋna fɔɔrée, ki jìré à tɔ̂ŋn sɛ́bɛ̂ɛ̂ ɲwâr kôlbiîŋîs mɔ mɔ́n byéen gbɔ kɔ́ɔŋn to.

16/18.txt

@@ -0,0 +1 @@
+\v 18 Jɛnî mun nɔkɔŋl k'án mél tyɛ̀ldɛ̂mun búrè, ki mél má tyɛ̀ldé, fù ri nyɛ̀nkɛ́ɛln fù mél fâŋlî wɔ́se. Fù nì jɛnî mun nɔkɔŋl ki jɛn má ǹ mél brêmun tyɛ̀ldé, fù ri nyɛ̀nkɛ́ɛln fù mél tyɛ̀ldɛ̂munî wɔ́se.»

16/19.txt

@@ -0,0 +1 @@
+\v 19 Yesu ki saaŋ à wú dé: «Nòfelɔn jɔ dyàn ni tɛ̀ŋnɛ̀n ín, à nɛ́n wâ bè wâ ɲwáar ɲáa ɲínkâr kísɛ́ŋn, faŋbé le sɔ́ɔ bè táaŋn à se ye mun nɔkɔŋl ɲámɔkâr wúwɔ́ɔŋ wúwɔ́ɔŋ ɔ.  \v 20 Lo kaarn tɔŋn dyàn bè saaŋ tɛ̀ŋnɛ̀n, yì bè fù fɛ́ɛŋn dé Lasari. Fù jɔɔ̂ gbɛ́ɛ nɔ̀nkurn ki nwɛ́ɛl ɔ ín, à shín fɔŋn b'à jɔɔ̂ ǹ fwɔ́ɔ yéenî blɛ̀ se. \v 21 À r'à se ín k'á nya ywár à nòfelɔn jɔɔ̂ ǹ le dì fɔŋnî mɔ le sâmɛ́ɛ̀ɛ̂ rɔ ín, bwôè bè blaàn, fɛ̀ b'à gbɛ́ɛ to nwɛ́ɛ̀lî todyɛɛ̀n.

16/22.txt

@@ -0,0 +1 @@
+\v 22 À lo kaarn tɔŋn jɔɔ̂ ki bɛ̀ kúè, Jɔnɔsɔ ǹ tɔ́ŋrê ki b'à nwɔ́ɔnî gbɔ̀nno búrké Brayima tɔŋnimɔ. À nòfelɔn jɔɔ̂ ki saaŋ bè kúè, fù ki gbɔ̀n tokpɛ́è, \v 23 ki dénno búrkúnè ɲámɔjɛ̀n jaar sɔ́ɔ mɔ dabur. À nòfelɔn jɔɔ̂ ki b'á ɲáa tojìr ki Brayima ŋmɔ́n dɔ́se, fù nì Lasari b'à blɛ̀ se.

16/24.txt

@@ -0,0 +1 @@
+\v 24 À la máno tɛ̀ŋn híin, k'á myɛl tokpâr mɔ à wú dé: "Ń tɔ Brayima, ń mùnurja! À wú Lasari se d'à w'á kpɛŋnbin byéen ɔ nun tá bɛ du ń kɔŋn, ń ki ń kpra ɲíkí à nɔ, bóló ɔ bo ń fɔn ɲámɔjɛ̀n mɔ nyɛ mɔ."

16/25.txt

@@ -0,0 +1 @@
+\v 25 Kɛ̀, Brayima k'à wú à se dé: "ń tɔé, á tɛ́l ɲɛn á tɛ̀ŋnɛ̀n gbârî gbɔ mɔ díryɔ́ŋ mɔ. Á r'à shi dé mɔ́n ɲɔn kúur nɔ̀nkurn tɛ̀ŋnɛ̀n á se. Lasari híin, fù ri tɛ̀ŋn ɲámɔjɛ̀n mɔ díryɔ́ŋ wono, ki kyáŋmɔ ɲámɔgbâl ŋmɔ́n húnmɔ, ákún híin, ta ákún bè tɛ̀ŋnɛ̀n ɲámɔjɛ̀n mɔ.  \v 26 Fù n'á nɔ̀nkurn mɔ, gbólón twáŋl sɔ́ɔ ri ŋmɛ́ɛn nì yíkun dɔkârɲɛ̀n nɔkɔ́ŋl mɛ̀mun ni lɛ besé húnmɔ, yì ki don yíkun tɔŋnimɔ, yì b'à kpɛ́ hìn tɛŋn bo. Fù nì dó saaŋ be li hìn tɛŋn à kɛɛl máâ mɔ, ki bɛ ŋmɛ́ɛn tɔŋnimɔ bo".

16/27.txt

@@ -0,0 +1 @@
+\v 27 À nòfelɔn jɔɔ̂ k'à wú d'àkun n'á tɔ Brayima tonyɛɛln ki Lasari búrno àkun tɔɔ̂ sádi  \v 28 bóló ɔ bo nɔbin jɛn jir kwɛŋl tɛ̀ŋnɛ̀n àkun se, k'àkun brê fáâ todèndɛ́nké nɔkɔ́ŋl yìkun saaŋ be bɛ àni ɲámɔjɛ̀n tíkɛ́lî mɔ bo.

16/29.txt

@@ -0,0 +1 @@
+\v 29 Brayima k'àn gbukɛlî mɔli dé Musa n'à tɔ́ŋrêê ǹ ɲwâr sɛ́bɛ̂ɛ̂ mí yì se. Yì w'á kpɛŋnja fɛ̀ ǹ lóo fù ri to. \v 30 À nòfelɔn jɔɔ̂ k'à mɔli dé: "Owo, ń tɔ Brayima, jir byéen klômun ki li jimin klômɛ́ɛ̀ tyé mɔ, ki dénno àniî wúké yì se, yì b'á hlɔ̀má wúa, yì ki kár gbɔjáal to".  \v 31 Brayima k'à wú dé yì n'á kpɛŋnjà Musa ǹ lô fù ri to bo, yì w'á kpɛŋnjà à tɔ́ŋrêê ǹ lô fù ri to bo, yì b'á kpɛŋnjaa à jimin kúɲìnɛ̀n bɛ̀munî ǹ lóo fù ri to bo.»

17/01.txt

@@ -0,0 +1 @@
+\c 17 \v 1 Yesu k'à wú án kɛɛln-bishɛ́ɛ̀ŋɛ̂ se dé: «À wo kwo hìn jimiì nímɔkɛŋl gbɔɛ̀ wo yíkwóa bo. Kɛ̀, fù jimiì nímɔkɛŋl gbɔɛ̀ɛ̂ yíkwɔ́ɔɔ̂ ki bè li jiminî mun mɔ, nar la fù tɔŋnî besé.» \v 2 Fù jiminî ki tìn nyɛl denkɛŋl sɔ́ɔ to, ki gbɔn feê fíin-nun mɔ, fù yɛŋn bè la nar à to, ki jìré à jimin faŋ dwan fɛ̀ɛ̂ mɔ jir byéen nímɔkɛɛŋl (ŋmel mɔ nìnâ) gbɔ yíkwɔ̂ to fù tɔŋnî se.

17/03.txt

@@ -0,0 +1 @@
+\v 3 Yíi w'á byéen ja, yíi k'á ɲɛn fá shu!  Á tɔbin kúur mɔ jir ki gbɔjáal kwo á to, à fɛ́ŋn, á k'à sènbe. Àn klɛ̀ gbɔjáalî hlɔ̀má nì dɛ́ à se, ki kárè gbɔjáal to, á k'à solsɛ́.  \v 4 Fù nì ki gbɔjáal kwo ákún to jìr ɲáa kiin yefyɛ̂l byéen wono, à hlɔ̀má ki dé à se, ki kárè gbɔjáal to, k'á sɛbɛ ákún se jìr ɲáa kiin, à b'ákún tonyɛɛln, à solsɛ́.»

17/05.txt

@@ -0,0 +1 @@
+\v 5 À twɔ́ɔŋnlórêê k'à wú yíi Totɔn se dé: «Má búr ŋmɛ́ɛn ǹ gbɔ hlɔjaâ ta!» \v 6 Yesu k'à wú dé: «Gbɔ hlɔjaâ mun ni tɛ̀ŋnɛ̀n yíkun se, à bè sɔ́ɔ fɔn mútárídî bin se lò ín, yíkun n'à wú hìn ín àni tímɔ́n fin sɔ́ɔɔ̂ se ín d'à w'á wuno kpéké à fíin-nunî mɔ, k'à kwo yíi ǹ lô fáâ to.

17/07.txt

@@ -0,0 +1 @@
+\v 7 Yíkun mɔ gbò se tɔŋnklɛrɔn tɛ̀ŋnɛ̀n, à b'àn klɔŋ mɔ klɛwɔ klɛɛ̀n fù nì kwoa bo à b'àn yìnmɔ́ɛ̀ myɛɛ̀n. À mùkâr ye lì bɛ klɔŋn se, k'à wú à se d'à wo ɲínɛ́ɛn ki le di. \v 8 À wo fù wúa bo, à b'à wúa à se d'à wo le mɔtityɛ́ŋn àkun se, k'á tyétìn ki le tè àkun to k'à di, k'á gbɛ. Fù kwɔ́ɔn à tɔŋnklɛrɔnî bè le dia, k'á gbɛ.

17/09.txt

@@ -0,0 +1 @@
+\v 9 Fù tɔŋnî wo fulóo tea à tɔŋnklɛrɔnî to bo, bóló ɔ bo à to tɛ̀ klɛwɔ ɔ.  \v 10 Yíkun wo saaŋ máno à kwo fù fá byéenî to, yíi ri gbârî mun ye á to tɛ̀ klɛwɔɛ̀ nɔ̀nkurn kwò kɔ́ŋnè. Yíi k'à wú dé yíkun ki bin kaarn klɛwɔ klɛrê ɔ, dé mùmun ló yíkun se, dé yíi ri fù mùn klɛ̀.»

17/11.txt

@@ -0,0 +1 @@
+\v 11 Yesu ǹ dyɛwóon kɔ́ɔŋnî wono Jerisalɛmu dyɛɛ̂ mɔ kɔ́ŋnfɔn, à ri kɔ́ɔŋn ín Samari kìyɛŋnî nì Galile kìyɛŋnî tyédɔɔ̂ ta. \v 12 À dɛ́ɛ yɛŋn se dyɛ dyàn mɔ, túrɔn jir fú ki b'à hlú. Yì ki lí líè dɔ́se,  \v 13 yì k'á myɛl tɔŋnkrɔ̂ mɔ à wú dé: «Kɛlɔn Yesu, ŋmɛ́ɛn mùnurja!»

17/14.txt

@@ -0,0 +1 @@
+\v 14 Yesu ki yì ŋmɔ́n, k'à wú yì se dé yì wo don á byéen yɛnké à flɛ́klɛrêê to. Yì kɔ́ɔŋn gbâr ye, yì ki dénno kpɛ́lnjakúnè ɲɛ̂l mɔ. \v 15 À túrɔn jir fúû mɔ jir byéen ki b'à ŋmɔ́n d'àkun ni kpɛ́lnjàè híin, k'á sɛbɛ á besé, ki Jɔnɔsɔ súnkwó á myɛl tokpâr ɔ.  \v 16 Fù k'á kurkpé, k'á ɲáa hlú ɲáan ta Yesu tɔŋn, ki fulóo tè à to. Fù jɔɔ̂ ki Samari jir ɔ ín.

17/17.txt

@@ -0,0 +1 @@
+\v 17 Yesu ki dukwo dé: «À túrɔn jir fúû nɔ̀nkurn wo kpɛ́lnjà ín be a? Yì búur jir kɛlî mí fɛ́ɛŋn?  \v 18 Yì mɔ dó wo ŋmɔ́n ká bo fóro àni tɔ́ŋn jɔɔ̂ byéen k'á sɛbɛ̀ fulóo tè Jɔnɔsɔ to.» \v 19 Fù kwɔsé, Yesu k'à wú à jɔɔ̂ se dé: «Dukú á ki don, án gbɔ hlɔjaâ r'á ɲɔnlɛ.»

17/20.txt

@@ -0,0 +1 @@
+\v 20 À Farisiyɛ̂ɛ̀ŋɛ̂ ki Yesu du dé Jɔnɔsɔ ǹ faŋbéê bè bɛa fɛ́ɛŋn gbâr ye? Yesu ki yì ǹ gbukɛlî mɔli dé : «Jɔnɔsɔ ǹ faŋbéê bè bɛa bla fáâ mun mɔ, à bè tɛŋna jimiì ǹ tɛ́ŋlɛ̂n ŋmɔ́n gbɔ bo. \v 21 Yì b'à wúa d'à nɛn húnmɔ bo, fù nì kwoa bo, d'à nɛn míî bo. Fù bóló ɔ bo Jɔnɔsɔ ǹ faŋbéê ri tɛ̀ŋnɛ̀n yíkun tyé mɔ.»

17/22.txt

@@ -0,0 +1 @@
+\v 22 Fù kwɔ́ɔn Yesu k'à wú à kɛɛln-bishɛ́ɛ̀ŋɛ̂ se dé: «Ye dyàn bè fɛ́a, fù lɔɔ̂ mɔ yíkun nwɔ́ɔn bè tɛŋna Jimin Dye-Jɛn ŋmɔ́ɔn gbɔ se, à ta yefyɛ̂l byéen kwó, yíi w'à ŋmɔ́na bo. \v 23 Yì b'à wúa yíi se d'à nɛn húnmɔ, fù nì kwoa bo d'à nɛn míî, yíi be don mímí bo, yíi be túno yì besé mímí bo.  \v 24 À nì fù kwó, nɔ̀ɲal fáâ mun to ɲaàln gbɔ̀n à jɔ̀nɔ̀kpár dɔ máâ to, ki don búrké à dɔ máâ to, Jimin Dye-Jɛn saaŋ bè máno tɛŋna á bla lɔɔ̂ mɔ.

17/25.txt

@@ -0,0 +1 @@
+\v 25  Kɛ̀, à la bè da tyɛɛ́ŋ sɔ́ɔ kwoa wà, ɲa yeê jimiìî k'á ká à se.  \v 26 Gbɔɛ̀ɛ̂ mun ni klɛ̀ ín Nufu yeê mɔ, fù gbɔɛ̀ɛ̂ núkúurî saaŋ bè kwoa Jimin Dye-Jɛn fù yeê mɔ. \v 27 Nufu ǹ kúrnî mɔ dɛ́ɛ gbâr ye jimiì ri le leèn ín, yì bè lamɔ́ɛ̀ laàn. Yì r'á luìî tyɛ̀l gbɔɛ̀ klɛɛ̀n ín yì b'á dye-méèl tɛɛ̀n jɛɛ̂ to, fóro yeê mun fyɛ̂l lɔ Nufu ri dɛ́ à kúrnî mɔ, fù gbâr ye nunlô ki bɛ̀ díryɔ́ŋ dìè, marséyɛŋnmɔ́ɛ̀ nɔ̀nkurn ki kú kúè shaari.

17/28.txt

@@ -0,0 +1 @@
+\v 28 À saaŋ bè kwoa máno Loti yeê fù ri klɛ̀ fáâ to, fù gbâr ye jimiì ri lemɔ́ɛ̀ leèn ín, yì bè lamɔ́ɛ̀ laàn. Yì bè mɔ́ɛ̀ sɔɔ̀ŋn, yì bè mɔ́ɛ̀ yɛɛ̀n. Yì bè mɔ́n nukwoòn, yì bè lɔ́ɛ̀ twɔɔ̀ŋn. \v 29 Kɛ̀, Loti ri yeê mun fyɛ̂l ɔ lɛ̀ Sodɔmu dyɛɛ̂ bur, jɔ̀nɔ̀kpár mɔ lì bɛ̀ ɲɔ́bint mɔ nyɛ nɔ̀ ri tɔ́ŋn ín, marséyɛŋnmɔ́ɛ̀ nɔ̀nkurn ki kú kúè shaari.

17/30.txt

@@ -0,0 +1 @@
+\v 30 Jimin Dye-Jɛn b'á byéen yɛna yeê mun fyɛ̂l ɔ díryɔ́ŋ mɔ, fù gbɔɛ̀ɛ̂ saaŋ bè máno kwoa. \v 31 Fù yefyɛ̂lî bè jiminî mun ŋmɔ́na mɛ̀mɛ̂ fléen, à kpɛŋnmɔ́ɛ̀ b'à se à lɔ́ɔ̂ mɔ, à wo yanɲɛ̀n ki kyɛl bɛ fɛ̀ gbɔ̀n bo. Fù yefyɛ̂lî nì bè jiminî mun ŋmɔ́n klɔŋn se, à wo yanɲɛ̀n k'á sɛbɛ ká di bo.

17/32.txt

@@ -0,0 +1 @@
+\v 32 Yíi w'á tɛ́lɲɛn Loti luû to klɛ̀ fù ri mɔ. \v 33 Jiminî mun n'à ɲɛ́ɛn k'á yɛŋn marî tanyân, fù bè bwɔɔna á yɛŋn marî mɔ. Kɛ̀, jiminî mun tɛ w'á yɛŋn marî to bo, fù b'á yɛŋn marî ɲɔnlia.

17/34.txt

@@ -0,0 +1 @@
+\v 34 Mún n'à lóon yíkun se d'àni túun bwàrî se, jir níin ki bè tɛŋn shínmɔ́n mɔ́n byéen ta, má bè gbɔ̀n lia má ki jél ta. \v 35 Mél jir níin ki bè tɛŋn mɔ́n nwɔn tê yíse, má bè gbɔ̀nlia má ki jél ta. \v 36 Jɛn jir níin ki bè tɛŋn yíse klɔŋ mɔ́n byéen mɔ, má bè gbɔ̀nlia má ki jél ta.»

17/37.txt

@@ -0,0 +1 @@
+\v 37 À kɛɛln-bishɛ́ɛ̀ŋɛ̂ ki Yesu du dé: «Ŋmɛ́ɛn Totɔn, fù bè kwoa fɛ́ɛŋn tíkɛ́l nì fɛ́ɛŋn gbâr ye?» Yesu ki yì ǹ gbukɛlî mɔli tɛl mɔ dé: «Mɔ́n klô ri ŋmɔ́ɔn tíkɛ́lî mun mɔ dwɔ ri ŋmɔ́ɔn mímí.»

18/01.txt

@@ -0,0 +1 @@
+\c 18 \v 1 Yesu ki gbukɛl dyàn kɛl tɛl mɔ án kɛɛln-bishɛ́ɛ̀ŋɛ̂ se, nɔkɔ́ŋl k'à yɛ̀n yì to, dé dó b'á gbɛ́ɛ gbál á byéen to tonyɛɛl klɛfɔn fífí bo,  \v 2 k'à wú yì se dé: «Kítíkárɔn dyàn tɛ̀ŋnɛ̀n dyɛ dyàn mɔ ín, à wo Jɔnɔsɔ yànhlóon bo, à wo saaŋ jimin dó ɲáɲɛhlóon bo.

18/03.txt

@@ -0,0 +1 @@
+\v 3 Fù dyɛɛ̂ mɔ, dè-kló-mél dyàn saaŋ tɛ̀ŋnɛ̀n ín, fù bè bɛ n'à wú à se, d'à w'àkun n'á kɛ̀ŋlshìî tyé mɔ kítíî kár. \v 4 À gbɔ̀nî ŋmel ta ki bè bɛlkwó, à w'à biî n'à kɛ̀ŋlshìî tyé mɔ kítíî káar gbɔɔ̂ tohláan bo. Kɛ̀, ki la bè lɔɔndya à wú á byéen wono dé: "Hlɔ ɔ, mún wo Jɔnɔsɔ yànhlóon bo, mún wo jimin dó ɲáɲɛhlóon bo.  \v 5 Fù n'á nɔ̀nkurn mɔ, mún b'à biî n'á kɛ̀ŋlshìî tyé mɔ kítíî kárbɛ̂, ki kár mún to, à bè mún kyɛŋn ká bo. Fù bóló ɔ bo à ri gbɔ flɛ́liɲɛ̀n mún to."»

18/06.txt

@@ -0,0 +1 @@
+\v 6 Yì Totɔn k'à wú yé dé: «Yíi la àni yɛŋntokwɔ́ɔŋn kaarn kítíkárɔnî ǹ kɛl gbukɛlî yiin! \v 7 Jɔnɔsɔ ǹ jimin mɔtɔ̂ŋmɛ́ɛ̀ɛ̂ mun n'á tomyɛl klɛɛ̀n à besé, ye gbo túun gbo, d'à ki ɲukwó yìkun to, à bè ɲáro ɲukwóa fɛ̀ to bo kɛ̀? \v 8 Mún n'à lóon yíkun se d'à bè ɲukwóa fɛ̀ to ɲáro sɔ́ɔ mɔ. Kɛ̀ Jimin Dye-Jɛn mùkâr ye á sɛbɛ, à b'á sɛbɛ̀ gbɔ hlɔja ŋmɔ́na à ɲáantyarî ta a?»

18/09.txt

@@ -0,0 +1 @@
+\v 9 Jimiìî mun n'á byéen ɔ bùkwɔ̀ɛ̀ŋ jìrɲɛ̀n ín, yì w'à jimin búùrî gbɔ dwɔ̂nɲɛ̀n bo, Yesu k'à wú tɛl mɔ fɛ̀ se dé:  \v 10 «Jir níin ki dénno à tonyɛɛlklɛ-lɔ́sɔ́ɔɔ̂ mɔ tonyɛɛl klɛ ɔ, à máâ ki Farisyɛ̂ŋu ɔ ín, à máâ bè martar-hlárɔn.

18/11.txt

@@ -0,0 +1 @@
+\v 11 À Farisyɛ̂ŋ jɔɔ̂ bè líɲɛ̀n, à b'án tonyɛɛlî klɛɛ̀n á wono dé "Ń tɔ Jɔnɔsɔ, mún n'ákún fuló bóló ɔ bo mún wo tɛ̀ŋnɛ̀n à jimin búùrî fáâ to bo: Yì bè wɛ́ɛln jimiì ta, yì wo bùkwɔ̀ŋbé klɛɛ̀n bo, yì bè nyɛ̀nkɛ́ɛln, á n'à ŋmɔ́n ár'à ni martar-hlárɔnî ɛ̀.  \v 12 Ń bè nìnfwɔ́ɔŋn klɔ́ ŋmel byéen wono yefyɛ̂l níin, ń bè ń ŋmɔ̂n mɔ́ɛ̀ nɔ̀nkurn kpinar lɛɛn".

18/13.txt

@@ -0,0 +1 @@
+À martar-hlárɔnî bè líɲɛ̀n dɔ́se, à b'á mwànsùmɔ́ɲɛ̀n, à nɔ̀nkurni w'á ɲáa tɔŋnkúr hìn ki jɔ̀nɔ̀kpár yi bo. Kɛ̀, à bè la á to ŋmáanî sɔ́ɔ se á kàr mɔ ŋmɛɛ̀ln á ɲámɔɲàn se, à b'à lóon dé "Ń Tɔ Jɔnɔsɔ, mún ǹ ŋmáantɔnbéê wono ń mùnurja". Mún n'à lóon yíkun se, dé fù jɔɔ̂ r'á sɛno á sádi bùkwɔ̀ŋbé mɔ, kɛ̀, à Farisyɛ̂ŋ jɔɔ̂ wo tɛ̀ŋn bùkwɔ̀ŋ bo. Fù bóló ɔ bo tɔŋnî mun n'á byéen tokyɛɛln, fù bè ɲɛflɛ́ɛ ŋmɔ́na, tɔŋnî mun n'á byéen ɔ ɲɛflɛ́rɔn jiìrn, fù bè tokyɛla.»

18/15.txt

@@ -0,0 +1 @@
+\v 15 À ta bisháaŋn-kpɛ̀ɛ̀ŋl kwó, jimiì ri yì gbɔɔ̀n bɛ ín, Yesu ki yì totá á kpɛŋn ɔ. Kɛ̀, à kɛɛln-bishɛ́ɛ̀ŋɛ̂ ri fù ŋmɔ́n gbârî mun ye, yì ki kwɔ́ŋn à jimiìî fléen. \v 16 Yesu ki yì fɛ́ŋn, k'à wú yì se dé: «Yíi w'à jél yì ki bɛ bisháɛ̀ŋ ɔ mún se, yíi be yì tó bo, bóló ɔ bo Jɔnɔsɔ ǹ faŋbéê k'àni bisháɛ̀ŋɛ̂ kúur jimiìî fù rɔ. \v 17 Hlɔ ta mún n'à lóon yíkun se dé jiminî mun nɔkɔŋl wo Jɔnɔsɔ ǹ faŋbéê ŋmɔ́n árí bisháaŋn bo, fù wo déa à mɔ fífí bo.

18/18.txt

@@ -0,0 +1 @@
+\v 18 À Yawutuìî ŋmelɔn má ki Yesu du dé: «Kɛlɔn ɲɔn, mún ni yanɲɛ̀n ń ki myɛ́n kwo nɔkɔ́ŋl ń ki dɔ kaarn shi ŋmɔ́n?» \v 19 Yesu k'à wú à se dé: «Myɛ́n núkwɔ́ɔn ákún bè mún fɛ́ɛŋn dé ɲɔn? Jimin dó wo ɲɔn Jɔnɔsɔ byéen kwɔsé bo. \v 20 Á r'à tɔ̂ŋn gbukɛɛ̀lî shi: Be nyɛ̀nkél bo.  Be jimin marli bo.  Be ɲra kwo bo.  B'á krɔmá yɛŋntonɛ́n bo.  Á k'á tɔ n'á nɔ ɲɛflɛ́ɲɛn.»  \v 21 À jɔɔ̂ k'à wú dé: «Mún fɔn fù tɔ̂ɛ̀ŋɛ̂ nɔ̀nkurn to ń kpɛŋnjàɲɛ̀n má ń bisháaŋn gbâr ye lì bɛ̀ mɔ.»

18/22.txt

@@ -0,0 +1 @@
+\v 22 Yesu ki fù gbukɛlî náaâ se, k'à wú à se dé: «Gbɔ dyàn ni fwɔ̂ŋnɲɛ̀n yé ákún to. Don, á k'á kpɛŋnmɔ́ɛ̀ɛ̂ nɔ̀nkurn yɛè, á ki yì yɛ̀ kpɛ̂ŋlî lú dàkpɛɛ̂ŋl to, á bè nòfel ŋmɔ́na jɔ̀nɔ̀kpár mɔ. Fù jìrɛ̂mun kwɔ́ɔn á ki kpé mún ta.»  \v 23 À jɔɔ̂ ri fù gbukɛlî ná gbârî mun ye, k'á ɲámɔɲànè, bóló ɔ bo nòfelɔn tɛ́tɛ̂ ɔ ín.

18/24.txt

@@ -0,0 +1 @@
+\v 24 Yesu r'à hlɔ̀ d'à r'á ɲámɔɲànɲɛ̀n gbârî mun ye, k'à wú à se dé: «Nòfel tɛ̀ŋnɛ̀n jimiìî mun se, fɛ̀ mùn dɛ́ɛ ri jaar Jɔnɔsɔ ǹ faŋbéê mɔ! \v 25 Fù bóló ɔ bo ɲɔ̀mɛ̂ sɛ́lɛ la nar mísɛŋn dar se yé ki jìré nòfelɔn dɛ́ɛ to Jɔnɔsɔ ǹ faŋbéê mɔ.»

18/26.txt

@@ -0,0 +1 @@
+\v 26 Jimiìî mun n'àn gbukɛlî tonáan ín, fɛ̀ k'à wú dé: «Gbòɛ̀ nì gbòɛ̀ ki la à ɲɔnlɛ fɛ̀ɛ̂ rɔ kpɛ́?» \v 27 Yesu ki yì ǹ gbukɛlî mɔli dé: «Jimin ni kyɛ̀ŋnliinè gbɔɔ̂ mun to, Jɔnɔsɔ wo kyɛ̀ŋnlɛɛn fù to bo.»

18/28.txt

@@ -0,0 +1 @@
+\v 28 Piyɛri k'à wú dé: «À nɛn, ŋmɛ́ɛn n'án gbɔɛ̀ nɔ̀nkurn jél ta n̂ ki kpé ákún ta.» \v 29 Yesu ki yì ǹ gbukɛlî mɔli dé: «Hlɔ ta, mún n'à lóon yíkun se dé jiminî mun nɔkɔŋl án den jél ta, k'á lu jél ta, k'á tɔbiîŋ jél ta, k'á kwɔ̀ŋmɔ́ɛ̀ jél ta, k'á derê jél ta Jɔnɔsɔ ǹ faŋbéê ŋmɔ̂n núkwɔ́ɔn, \v 30 fù tɔŋnî bè fù tonur tyɛɛ́ŋ sɔ́ɔ ŋmɔ́na díryɔ́ŋ wono, ki dɔ kaarn shi ŋmɔ́n dwɔn.»

18/31.txt

@@ -0,0 +1 @@
+\v 31 Yesu k'à kɛɛln-bisháaŋn jir fú-níinî jàno á wɔ́se dɔkâr mɔ, k'à wú yì se dé: «Ŋmɛ́ɛn kɔ́ŋnkún nɛn Jerisalɛmu dyɛɛ̂ mɔ; à tɔ́ŋrêê ri gbɔɛ̀ɛ̂ mun nɔ̀nkurn ɲúrɲɛ̀n ín Jimin Dye-Jɛn gbɔ mɔ, fɛ̀ nɔ̀nkurn dénno máno kwokɔ́ɔŋn ki mɔyîn.  \v 32 Fù bóló ɔ bo à ri dénno tobúrkɔ́ɔŋn Jɔnɔsɔ hlɔ kaarn tê se, yì ki myɛn à to, yì k'à fɛ, yì k'á kpiyáaŋ búr à to. \v 33 Yì k'à ŋmɛ saŋbwàr ɔ, yì ki kwɔ́ɔn à kwoê. À bè ɲinɛna á kwò yefyɛ̂l tyáarɔn lɔ.»

18/34.txt

@@ -0,0 +1 @@
+\v 34 Kɛ̀, àn kɛɛln-bishɛ́ɛ̀ŋɛ̂ w'àn kɛl gbukɛlî mɔ bin bólóon gbɔ̀n bo, ki tɛ̀ŋnè gbukɛl toyâmun yì se. Yì w'à hlɔ̀ gbɔɔ̂ mun lókún ɔ bo.

18/35.txt

@@ -0,0 +1 @@
+\v 35 Yesu shùnjà blakúnî se Jeriko dyɛɛ̂ to, fù k'à ŋmɔ́n kyar jɔ dyàn bè ɲínɛ̂nɲɛ̀n à ɲɛ̂l blɛ̀ se, à bè mɔ́n nyɛɛln,  \v 36 k'à jùmɔ̂ɔ̂ jìrɛ́ɛ myɛl ná, ki dukwo à mɔfáhlɔ besé. \v 37 Yì k'à wú à se dé Nasarɛti jir Yesu ri jìrɛ́ɛ myɛl ɔ.

18/38.txt

@@ -0,0 +1 @@
+\v 38 À jɔɔ̂ k'á myɛl tɔŋnkrɔ̂ mɔ à wú dé: «Yesu, kìyɛŋntɔn Dawuda Dye-Jɛn, ń mùnur ja!» \v 39 Jimiìî mun ni kélkɔ́ɔŋn à ɲɛro ín, fɛ̀ k'à tafɛ́ d'à w'á sháaŋn yíi fléen. Kɛ̀, k'á myɛlî sɛtɔnkúr yé tokpâr sɔ́ɔ dé: «Kìyɛŋntɔn Dawuda Dye-Jɛn ń mùnur ja!»

18/40.txt

@@ -0,0 +1 @@
+\v 40 Yesu ki líè, k'à wú à jimiìî se dé yì w'à ja bɛ. À mùfɔn bè lo à to híin, k'à du dé: \v 41 «Jɔ, á r'à se ń ki myɛ́n kwo á se?» À jɔɔ̂ ki Yesu ǹ gbukɛlî mɔli dé: «Ń Totɔn, ń ɲáaâ tofli ń se!»

18/42.txt

@@ -0,0 +1 @@
+\v 42 Yesu k'à wú à jɔɔ̂ se dé: «Á ɲáaâ ri toflìè, án gbɔ hlɔjaâ r'á ɲɔnlɛ.» \v 43 À jɔɔ̂ ɲáaâ k'á toflìè fù tíkɛ́l byéenî mɔ, ki kpé Yesu ta, à bè Jɔnɔsɔ súnkwɔ́ɔn. À jimiìî nɔ̀nkurn ni fù gbɔɔ̂ klɛ̀ fáâ ŋmɔ́n híin, yì ki Jɔnɔsɔ tofɛ́ŋn.

19/01.txt

@@ -0,0 +1 @@
+\c 19 \v 1 Yesu k'á kɔ́ŋnfɔn jìré Jeriko dyɛɛ̂ mɔ. \v 2 Martar-hlárê ŋmelɔn jɔ dyàn bè tɛ̀ŋnɛ̀n, nòfelɔn ɔ ín, yì b'à fɛ́ɛŋn dé Jashe.

19/03.txt

@@ -0,0 +1 @@
+\v 3 Fù jɔɔ̂ ri Yesu ɲɛ́ɛn ín k'à shu jiminî mun ɔ. Kɛ̀, à ri fáâ mun to à ŋmɔ́na à wo fù fáshi à jùmɔ̂ɔ̂ sɔ́ɔ se bo, bóló ɔ bo jimin kurn ɔ ín, \v 4 ki túno á munân ɔ à jùmɔ̂ɔ̂ nyân, ki tímɔ́n bɛl sɔ́ɔ dyàn jà dú à ŋmɔ́n gbɔ núkwɔ́ɔn, bóló ɔ bo à bè jìrébɛ̂ mímí.

19/05.txt

@@ -0,0 +1 @@
+\v 5 Yesu mùfɔn bè lo fù tíkɛ́lî mɔ, k'á ŋmel tɔŋnkúr lɛ klɛ ɔ nɔ̀nfléen, k'à jɔɔ̂ ŋmɔ́n, k'à wú à se dé: «Jashe, kyɛl bɛ á munân ɔ, bóló ɔ bo à ri yanɲɛ̀n mún ki ń tɔ́nshîbé dé ɲa ákún sádi.» \v 6 À la máno tɛ̀ŋn híin, Jashe ki kyɛl á munân ɔ, ki Yesu hlú á sádi á gbɔmɔnar ɔ. \v 7 À jimiìî nɔ̀nkurn n'à kɔ́ŋnkúnî ŋmɔ́n híin, yì k'á yɛŋn kɔ̀ŋnɔn Yesu gbɔwú dé: «Àni jɔɔ̂ lɛ̀mun nɛn à ŋmáantɔn jɔɔ̂ sádi á tɔ́nshîbé dékɔ́ɔŋn ɔ.»

19/08.txt

@@ -0,0 +1 @@
+\v 8 Kɛ̀, Jashe ki dukú, ki líè Yesu ɲɛro, k'à wú à se dé: «À nɛn, ń Totɔn, ń bè ń nòfelî síkárbɛ̂ mɔ́n níin, ń k'à síkâr máâ teè dàkpɛɛ̂ŋl to, ki saaŋ tɛŋn árí ń ni wôɲɛ̀n jir ta, ń k'à kpɛŋnmɔ́nî kúur mɔ́n yor tè à to.» \v 9 Yesu k'à wú à se dé: «Ɲɔnlɛɛ la ɲa byɛ̀ àni denî mɔ, bóló ɔ bo ákún ki Brayima kpaŋltosɛ̂ŋn má ɔ saaŋ. \v 10 Fù bóló ɔ bo Jimin Dye-Jɛn b'à jimin jɛɛlmɛ́ɛ̀ɛ̂ ɲɛ́n, ki yì ɲɔnli.

19/11.txt

@@ -0,0 +1 @@
+\v 11 À jimiìî ki fù gbukɛlî tonákúnî se, ki tɛl má wú yé yì se. Fù bóló ɔ bo yì ri shùnjàmun ɔ Jerisalɛmu dyɛɛ̂ to ín, ki tɛŋn yì ǹ jɛ́ɛn mɔ dé Jɔnɔsɔ ǹ faŋbéê bè yɛnbɛ̀ yìkun to fù tíkɛ́l byéenî mɔ. \v 12 Fù kpɛŋnî ta, Yesu k'à wú dé: «Kìyɛŋntɔn dyàn dye-jɛn ni lɛ̀ dyɛwóon kɔ́ɔŋn ɔ, kìyɛŋn fɔŋn bɛl sɔ́ɔ mɔ; nɔkɔ́ŋl ki don kìyɛŋntɔnbé ŋmɔ́nké, k'á sɛbɛ fù kìyɛŋntɔnbéê kwo án kìyɛŋnî mɔ.

19/13.txt

@@ -0,0 +1 @@
+\v 13 À kɔ́ɔŋnî n'á to gbɔ tyé, k'á tɔŋnklɛrêê mɔ jir fú fɛ́ŋn, ki tɔŋn-kpɛ̀ŋl kur byéen byéen ɔ yì nɔkɔŋl kɛ́ŋ, k'à wú yì se dé yì w'à nɔ á mɔjìr àkun sɛblaâ n'á to gbɔ tyé. \v 14 Kɛ̀, fù jɔɔ̂ gbɔ w'àn kìyɛŋnî jimiìî tìyà à gbɔdɛ́ɛ se bo. Yì ki twɔ́ɔŋnlórê búrno à besé, dé yì wo don à wúké à dòn fɔŋnî kìyɛŋntɔn jɔɔ̂ se dé yìkun w'à jɔɔ̂ ɲɛ́ɛn ki tɛŋn yìkun ǹ kìyɛŋntɔn bo. \v 15 À mùfɔn á sɛbɛ án kìyɛŋnî mɔ, án kìyɛŋntɔnbéê ŋmɔ̂n kpɛŋn ta, k'á tɔŋnklɛrêê fɛ́ŋn, à ri tɔŋn-kpɛ̀ŋl kur byéen byéen tè ta mɛ̀mun to; nɔkɔ́ŋl k'à shu yì nɔkɔŋl á fù rɔ á mɔjìr fáâ mun to.

19/16.txt

@@ -0,0 +1 @@
+\v 16 À tɔŋnklɛrɔn túkyɛ̂ŋlî ki bɛ, k'à wú dé: "Ń Totɔn, á r'án tɔŋn-kpɛ̀ŋl kur byéenî mun tè ta mún to ín, à ri tɔŋn-kpɛ̀ŋl kur fú má dɛ́ tɔŋn ɔ." \v 17 À jɔɔ̂ k'à wú á tɔŋnklɛrɔnî se dé: "fù ri ɲukwɔ́, á ki tɔŋnklɛrɔn ɲɔn ɔ. Á tɛ̀ŋnî se yɛŋntokwɔ́ɔŋntɔn gbɔ tíin mɔ, dyɛ mɔ́n fú bè tebɛ̀ á to takɛl ɔ."

19/18.txt

@@ -0,0 +1 @@
+\v 18 À tɔŋnklɛrɔn níintɔnî ki bɛ, k'à wú dé: "Ń Totɔn, á r'án tɔŋn-kpɛ̀ŋl kur byéenî mun tè ta mún to ín, à ri tɔŋn-kpɛ̀ŋl kur kwɛŋl má dɛ́ tɔŋn ɔ."  \v 19 À jɔɔ̂ k'à wú fù à se dé: "dyɛ mɔ́n kwɛŋl bè tebɛ̀ á to saaŋ takɛl ɔ."

19/20.txt

@@ -0,0 +1 @@
+\v 20 Tɔnklɛrɔn má ki bɛ, k'à wú dé: "Ń Totɔn, á r'án tɔŋn-kpɛ̀ŋlî mun tè ta mún to ín, à nɛn. Mún n'à tityɛ́ŋn totìn yáè ín wúyáa mɔ; \v 21 fù bóló ɔ bo ákún yàn ni mún to, á se gbɔ jaarî se, á b'án ɲɛ̀n kaarn mɔ́n gbɔɔ̀n ki tɛŋn á fù, á b'án nùkwò kaarn kùnmɔ tityɛ́ɛŋn."

19/22.txt

@@ -0,0 +1 @@
+\v 22 À kìyɛŋntɔn jɔɔ̂ k'à wú à se dé "Tɔnklɛrɔn jaal, án gbukɛlî kɛl fáâ se ń b'à yɛnbɛ̀ á to d'án lô fù ri w'á nar bo. Ákún n'à shi ín dé mún se gbɔ ri jaar, á b'à shi dé mún ni ń ɲɛ̀n kaarn mɔ́n gbɔɔ̀n ki tɛŋn ń fù, á b'à shi dé mún ni ń nùkwò kaarn kùnmɔ tityɛ́ɛŋn.  \v 23 Myɛ́n núkwɔ́ɔn á wo la mún ǹ tè ta kpɛ̂ŋlî ɲɛ̀n kpɛ̂ŋl-yálɔ́ mɔ bo, ń sɛbyɛ̀munî dénno à likúna à n'á ta tɔŋnî ɔ ín be a?"

19/24.txt

@@ -0,0 +1 @@
+\v 24 Fù jìrɛ̂mun kwɔ́ɔn jimiìî mun tɛ̀ŋnɛ̀n mímí ín, à kìyɛŋntɔn jɔɔ̂ k'à wú yì se dé yì w'à kpɛŋn fù tɔŋn-kpɛ̀ŋlî sɛ́ ki teè à tɔŋn-kpɛ̀ŋl kur fú tɔŋnî to.    \v 25 Yì k'à wú dé: "Ŋmɛ́ɛn Totɔn, fù ki tɔŋn-kpɛ̀ŋl kur fú ŋmɔ̂nmun ɔ."

19/26.txt

@@ -0,0 +1 @@
+\v 26 Mún n'à lóon yíkun se dé mɔ́n bè tea mɔ́ntɔn to, à se fù ri ki tosáŋ. Kɛ̀ mɔ́n wo tɛ̀ŋnɛ̀n tɔŋnî mun se bo, à se fù tíinî nɔ̀nkurni bè sùnsùr lia à kpɛŋn.  \v 27 À kìyɛŋntɔn jɔɔ̂ k'à wú à jimin búùrî se dé: "Yíi wo mún kɛ̀ŋlshìtêê ja bɛ húnmɔ, mɛ̀mun w'à se ín mún ki tɛŋn yìkun ǹ kìyɛŋntɔn bo, yíi ki yì kprakwa ń ɲíɲra".»

19/28.txt

@@ -0,0 +1 @@
+\v 28 Yesu la máno àni gbukɛlî kɛl kɔ́ŋnè híin, ki búr à kɛɛln-bishɛ́ɛ̀ŋɛ̂ ɲɛro Jerisalɛmu dyɛɛ̂ mɔ kɔ́ŋnfɔn.

19/29.txt

@@ -0,0 +1 @@
+\v 29 Yesu n'án kɛɛln-bishɛ́ɛ̀ŋɛ̂ mùfɔn shùnjà Bɛtifase dyɛɛ̂ nì Betani dyɛɛ̂ to, Olifiye tímɔ́n fiîŋ káalî blɛ̀ se híin, ki kɛɛln-bisháaŋn jir níin tɔ́ŋ, \v 30 k'à wú yì se dé: «Yíi wo don á ɲɛro dyɛɛ̂ mɔ, yíkun mùkâr ye dɛ́ à dyɛɛ̂ wono, yíi bè sùnbaarnbin dyàn tìnɲɛ̀n ŋmɔ́na dó wo dú kɛŋn mùmun ta bo. Yíi k'à jal, yíi ki bɛ à nɔ. \v 31 Jir nì yíi dù dé yíkun n'à sùnbaarnbinî jaàln myɛ́n núkwɔ́ɔn? Yíi w'à wú à tɔŋn se d'à togbɔ ri ŋmɛ́ɛn Totɔn se.»

19/32.txt

@@ -0,0 +1 @@
+\v 32 À r'à blê jir níinî mun tɔ́ŋè, fɛ̀ dònmunî ki dénno à ŋmɔ́nké máno, Yesu ǹ lô fáâ to yì se.  \v 33 Yì rɔ dé yíi k'à sùnbaarnbinî jal, à sùnbaarn têê ki yì du dé yì r'à sùnbaarnbinî jaàln myɛ́n núkwɔ́ɔn? \v 34 À kɛɛln-bisháaŋn jir níinî k'à mɔli dé: «À togbɔ ri ŋmɛ́ɛn Totɔn se.» \v 35 À la máno tɛ̀ŋn híin, yì k'à sùnbaarnbinî jàno teké Yesu to. Yì k'án wâɛ̀ɛ̂ gbe à sùnbaarnbinî bùndùr mɔ, yì ki Yesu dú ɲínɛ́ɛn à fléen. \v 36 À kɔ́ŋnkúnî wono à jimiìî bè máno án wâɛ̀ɛ̂ mɔkìr búr dékɔ́ɔŋn à ɲɛ̂lî ta.

19/37.txt

@@ -0,0 +1,5 @@
+\v 37 À shùnjàmun kwɔ́ɔn Jerisalɛmu dyɛɛ̂ to, yì mùfɔn bè lobɛ̀ Olifiye tímɔ́n fiîŋ káalî kyɛɛlî to lo ɔ lò mɔ, à kɛɛln-bisháaŋn jùmɔ̂ɔ̂ nɔ̀nkurn k'á gbɔmɔnar se jo Jɔnɔsɔ tofɛ́ŋn gbɔ to, á myɛl tɔŋnkrɔ̂ mɔ àn klɛ̀ shɔ́gbɔɛ̀ɛ̂ ŋmɔ̂n ɔ. \v 38 Yì b'à lóon dé:
+«Kyon ki nɛ́n kìyɛŋntɔn mɔ,
+mùmun mí blaàn Diryɔŋtotɔn yin ɔ!
+Ɲámɔgbâl ki tɛŋn jɔnɔkpár mɔ,
+Fulóo ki tè Jɔnɔsɔ to nɔ̀nfléen jɔ̀nɔ̀ ɲɛ.»

19/39.txt

@@ -0,0 +1 @@
+\v 39 Farisiyɛ̂ŋ máɛ̀ k'à jùmɔ̂ɔ̂ tyé mɔ tɛ̀ŋn mɔ à wú Yesu se dé: «Kɛlɔn, à wú án kɛɛln-bishɛ́ɛ̀ŋɛ̂ se dé yì w'á sháaŋn jimiì féen.» \v 40 Yesu ki yì ǹ gbukɛlî mɔli dé: «Mún n'à lóon yíkun se dé yì ta á sháaŋnè, kàkrɔ̂ɛ̀ myɛl bè libɛ̂!»

19/41.txt

@@ -0,0 +1 @@
+\v 41 Yì shùnjà blakúnî se Jerisalɛmu dyɛɛ̂ to, Yesu ri gbârî mun ye á ɲáa bré à dyɛɛ̂ to, k'à gbɔ to. \v 42 À b'à lóon dé: «Jerisalɛmu dyɛɛ̂ ɛ̀, ákún nɔkɔŋl nì jàrfyɛ ŋmɔ́n fáâ shi ín ɲaâ mɔ mano, fù ri fín ín! Kɛ̀, kyáŋmɔ la, fù wóon n'ákún jàè, ki toyáè ákun to.

19/43.txt

@@ -0,0 +1 @@
+\v 43 Ye dyàn bè fɛ́a, fù lɔɔ̂ mɔ á kɛ̀ŋlshìtê bè kyɛla á ta, yì ki kɛ́l twɔ̀ŋn á tomliŋ kpɛ́è, yì k'á tokpârè bén kúur nɔ̀nkurn se.  \v 44 Yì b'á ŋmɛ̀ kɛ́ɛna, yì k'á mɔ jimiìî nɔ̀nkurn kwoê. Yì bè kàkrɔ̂ má jéla kàkrɔ̂ má fléen bo. Fù bóló ɔ bo Jɔnɔsɔ ri blaàn gbârî mun ye ákún núkwɔ́ɔn, á wo fù hlɔ̀ bo.»

19/45.txt

@@ -0,0 +1 @@
+\v 45 Yesu ki dé à tonyɛɛlklɛ-lɔ́sɔ́ɔɔ̂ mɔ, ki wo jo à yɛ klɛ klɔ́kɛ́lêê tó lɛ to, \v 46 à b'à lóon yì se dé: «À ri ɲúrɲɛ̀n Jɔnɔsɔ ǹ gbukɛlî ɲwâr sɛ́bɛ̂ɛ̂ mɔ dé "Mún ǹ lɔ́ɔ̂ bè tɛŋna tonyɛɛlklɛ-lɔ́." Kɛ̀, yíkun k'à nɔ shɛnflɛrê ki yíi ŋmelhlú fɔŋn jìrè.»

19/47.txt

@@ -0,0 +1 @@
+\v 47 À ri jimiì kɛɛln ín ye mun nɔkɔŋl à tonyɛɛlklɛ-lɔ́sɔ́ɔɔ̂ mɔ. À flɛ́klɛrê ŋmelêê n'à tɔ̂ŋn kɛlêê n'à dyɛ klɔ̀rêê k'à to fá ɲɛ́n kùnmɔ krɔ ɔ. \v 48 Kɛ̀, yì wo la à to klɛ fá ɲáa ɲɔn sɔ́ɔ shi bo, bóló ɔ bo jimiì nɔ̀nkurn ni kpéɲɛ̀n ín à kɔŋn gbukɛɛ̀lî ta ɲátolîbé mɔ.

20/01.txt

@@ -0,0 +1 @@
+\c 20 \v 1 Yefyɛ̂l dyàn ki bè tɛŋn, fù lɔɔ̂ mɔ Yesu ri jimiì kɛɛln ín à tonyɛɛlklɛ-lɔ́sɔ́ɔɔ̂ mɔ, à b'à Twɔ́ɔŋn Nar Sɔ́ɔɔ̂ gbɔ lóon jimiì se. À flɛ́klɛrê ŋmelêê n'à tɔ̂ŋn kɛlêê n'à klɔ̀rêê ki b'à tutwòn,  \v 2 yì k'à wú à se dé: «Ákún n'àni shɔ́gbɔɛ̀ɛ̂ klɛ faŋâ ŋmɔ́n fɛ́ɛŋn? Gbo r'à klɛ ɲɛ̂l tɛ̀ ákún to? À wú ŋmɛ́ɛn se.»

20/03.txt

@@ -0,0 +1 @@
+\v 3 Yesu ki yì ǹ gbukɛlî mɔli dé: «Mún saaŋ bè yíkun dubɛ̂ gbɔ dyàn ɔ. \v 4 Gbò ri Yuhana tɔ́ŋɲɛ̀n d'à ki jimiì tyɛl-tofénéja, à ri Jɔnɔsɔ ǹ tɔ̂ŋ to ín dàà à ri jimiì ǹ tɔ̂ŋ to ín?»

20/05.txt

@@ -0,0 +1 @@
+\v 5 Kɛ̀, yì ki kyáŋmɔ á tɛ́l mɔtɔ́ŋn kùnmɔ à mɔlɛɛ fá gbɔ ɔ dé: «Ŋmɛ́ɛn n'à mɔlɛ dé Jɔnɔsɔ ǹ tɔ̂ŋ ɔ ín, à b'à wúa dé myɛ́n núkwɔ́ɔn ŋmɛ́ɛn w'àn gbukɛlî hlɔjà bo? \v 6 Ŋmɛ́ɛn nì b'à mɔli dé jimiì ǹ tɔ̂ŋ ɔ ín, à jimiìî nɔ̀nkurn bè ŋmɛ́ɛn nina timin ɔ bóló ɔ bo yì nɔ̀nkurn n'à shi dé Yuhana ki tɔ́ŋrɔn ɔ ín.»

20/07.txt

@@ -0,0 +1 @@
+\v 7 Fù wono, yì k'à mɔli dé yìkun wo Yuhana tɔ̂ŋ tɔŋn shi jimiì tyɛl-tofénéja gbɔ ɔ bo. \v 8 Fù kpɛŋnî ta Yesu k'à wú yì se dé: «Tɔnî mun n'àni gbɔɛ̀ɛ̂ klɛ faŋâ tɛ̀ mún to, mún saaŋ bè bóló wúbɛ̂ yíkun se fù mɔ bo.»

20/09.txt

@@ -0,0 +1 @@
+\v 9 Fù jìrɛ̂mun kwɔ́ɔn Yesu ki jo tɛl dyàn lóo to à jùmɔ̂ɔ̂ se dé: «Jɔ dyàn k'án resɛ̂ŋn klɔŋ ja, k'à gbɔnɛ́n ta klɔŋ mɔ klɛwɔklɛrê kpɛŋn, ki dénno kìyɛŋn má mɔ dálkɔ́ɔŋn ɔ mímí. \v 10 À resɛ̂ŋnî mùfɔn lò, k'á tɔŋnklɛrêê mɔ jir byéen tɔ́ŋno à klɔŋ mɔ klɛwɔ-klɛrêê se dé yì k'àkun fù resɛ̂ŋn sɛ̂ŋn nin te bɛ àkun to. Kɛ̀, yì k'à resɛ̂ŋn klɔŋ jɔɔ̂ tɔŋnklɛrɔnî ja, yì k'à ŋmɛ, yì k'à kpɛŋn kwɛ̂l tó búrè.

20/11.txt

@@ -0,0 +1 @@
+\v 11 11 À resɛ̂ŋn klɔŋ jɔɔ̂ ki saaŋ tɔŋnklɛrɔn má tɔ́ŋno yé à klɔŋɔ̂ mɔ klɛwɔklɛrêê se. Yì ki fù fɛ, yì k'à ŋmɛ, yì ki saaŋ àkun kpɛŋn kwɛ̂l tó búrè. \v 12 À jɔɔ̂ k'á tɔŋnklɛrêê mɔ jir tyáarɔn tɔ́ŋno à resɛ̂ŋn klɔŋɔ̂ mɔ klɛwɔklɛrêê se yé, yì ki fù ŋmɛ̀ mɔbwɔnnɛ́n, yì k'à tó li à klɔŋɔ̂ mɔ.

20/13.txt

@@ -0,0 +1 @@
+\v 13 À resɛ̂ŋn klɔŋ jɔɔ̂ k'à wú á byéen wono dé: "Mún bè myɛ́n kwobɛ̂ yé? Ń bè ń gbɔmɔnar dye-jɛnî tɔ́ŋbɛ̂ yì se; á nì wúwɔ́ŋ yì bè fù ɲɛflɛ́ɲɛna."  \v 14 Kɛ̀, à resɛ̂ŋn klɔŋɔ̂ mɔ klɛwɔ-klɛrêê r'à resɛ̂ŋn klɔŋ jɔɔ̂ dye-jɛnî blakún ŋmɔ́n gbârî mun ye, yì k'à wú á kísɛ́nî tyé mɔ dé "À tɔ kyɛ̂ŋ gbɔn jɔɔ̂ blakún nɛn, yíi w'à jél n̂ k'à kwo nɔkɔ́ŋl à klɔŋɔ̂ ki tɛŋnê ŋmɛ́ɛn fù."

20/15.txt

@@ -0,0 +1 @@
+\v 15 Yì k'à dye jɔɔ̂ tó li à klɔŋɔ̂ mɔ, yì k'à ŋmɛ̀ kwòè. Kyáŋmɔ la, à resɛ̂ŋn klɔŋ jɔɔ̂ bè gbáno à klɔŋɔ̂ mɔ klɛwɔklɛrêê jira? \v 16 À bè bɛa ki fù klɛwɔklɛrêê kwoê, k'à klɔŋɔ̂ gbɔnɛ́n klɛwɔklɛrɔn máɛ̀ kpɛŋn.» À jùmɔ̂ɔ̂ ri fù gbukɛlî ná gbârî mun ye, yì k'à wú dé: «Jɔnɔsɔ wo n̂ ɲɔnli àniî kúur mɔ!»

20/17.txt

@@ -0,0 +1,5 @@
+\v 17 Kɛ̀, Yesu ki yì yì bɛ̀ kpɛ́è, k'à wú yì se dé: «À ri wûɲɛ̀n Jɔnɔsɔ ǹ gbukɛlî ɲûrɲɛ̀n sɛ́bɛ̂ɛ̂ mɔ dé;
+"Lɔ́ twɔŋntê ri kàkrɔ̂ɔ̂ mun gbɔ̀n feê,
+fù r'á sɛbɛ̀ tɛ̀ŋnè kàkrɔ̂ɔ̂ mun ni ɲɔn ki ɲɛn lɔ́ kpar ta."
+Fù gbukɛlî ki myɛ́n lô ɔ?
+\v 18 Jiminî mun nɔkɔŋl ki bè wô fù kàkrɔ̂ɔ̂ ta, fù tɔŋnî bè mɔ kútúr kútúr gbeêna. Fù kàkrɔ̂ɔ̂ ki bè wô jiminî mun nɔkɔŋl ta, fù tɔŋnî bè mɔ ŋmàn gbeêna.»

20/19.txt

@@ -0,0 +1 @@
+\v 19 À tɔ̂ŋn kɛlêê n'à flɛklɛrê ŋmelêê ki Yesu ja fá ɲɛ́n kùnmɔ fù tíkɛ́l byéenî mɔ. Fù bóló ɔ bo yì r'à hlɔ̀ d'àni tɛlî ki yìkun gbɔlókún ɔ. Kɛ̀, à jùmɔ̂ɔ̂ yàn bè la yì to. \v 20 Fù gbukɛɛ̀lî kɛl ɔ Yesu se, à tɔ̂ŋn kɛlêê n'à flɛ́klɛrê ŋmelêê ki jo Yesu tɛ́ŋlɛ́n gbɔ to. Fù wono yì ki dɔ̀nblírê tɔ́ŋ, fɛ̀ k'á byéen ɔ Jɔnɔsɔ gbɔɔ̂ hlɔjarɔn ɲɔn sɔ́ɛ̀ jìr, nɔkɔ́ŋl yì ki Yesu ja àkun nɔ̀nkurni kɔŋn gbukɛlî ɔ. Yì k'à nɛ́n à kòkɛ̀l ŋmelɔn jɔɔ̂ kpɛŋn, à faŋâ ri mùmun se.

20/21.txt

@@ -0,0 +1 @@
+\v 21 Fù dɔ̀nblírêê ki la à du dé: «Ŋmɛ́ɛn Totɔn, án kɛl gbukɛlî ki hlɔ ɔ, án jimiì kɛɛln gbukɛlî bè hlɔ, á wo gbɔmɔlɛɛn bo. Kɛ̀, á ri jimiì kɛɛln Jɔnɔsɔ ɲɛ́n ɲɛ̂lî kɛ́ɛl fáâ rɔ hlɔtabê mɔ. \v 22 Fù n'á nɔ̀nkurn mɔ, ɲɛ̂l tèɲɛ̀n ŋmɛ́ɛn ki martar túr Rɔmu kìyɛŋntɔn sɔ́ɔ Sesari se dàà, fù ɲɛ̂l wo tèɲɛ̀n bo?»

20/23.txt

@@ -0,0 +1 @@
+\v 23 Kɛ̀ Yesu ki yì ǹ dɔ̀nblîî tɔŋn hlɔ̀ɔ̂ se k'à wú yì se dé: «Yíi wo bɛ kpɛ̂ŋl tɔŋnbin byéen ɔ.» \v 24 Yì ri byɛ̀ fù rɔ híin, ki yì du dé: «Àniî ki gbò nìníin n'à yin ɲúrɲɛ̀n ɔ à fléen?» Yì k'à mɔli dé: «Rɔmu kìyɛŋntɔn Sɔ́ɔ Sesari ɔ.»

20/25.txt

@@ -0,0 +1 @@
+\v 25 Yì la máno à ló híin, k'à wú yì se dé: «Mɔ́nî mun ki Sesari fù rɔ, yíi wo fù tè Sesari to. Fù nì mɔ́nî mun ki Jɔnɔsɔ fù rɔ, yíi wo fù tè Jɔnɔsɔ to.» \v 26 Yì ki kyɛ̀ŋliè Yesu ǹ kɛl gbukɛɛ̀lî mɔ à ja ɔ à jùmɔ̂ɔ̂ tyé mɔ. Kɛ̀, à gbukɛlî mɔlɛɛ fáâ ki yì wonkɔ́ŋnè, yì k'á sháaŋn sháaŋnè.

20/27.txt

@@ -0,0 +1 @@
+\v 27 Sadɔsyɛ̂ɛ̀ŋɛ̂ mun wo dwɔn jimin klômɛ́ɛ̀ ɲinɛnkúnî hlɔjàɲɛ̀n bo, fɛ̀ k'á sukúr bɛ Yesu to, yì k'à du dé:  \v 28 «Ŋmɛ́ɛn Totɔn, Musa ǹ ɲwâr sɛ́bɛ̂ɛ̂ mɔ à ri ɲúrɲɛ̀n dé; "Mél tyɛ̀ldɛ̂mun dè ki kú à wo dye ŋmɔ́n bo, à dèê srɔ́ɔ jɛn yanɲɛ̀n ki fù mélî gbɔ̀n yì ki dye kwɔŋ à ɲínkartɔnî se."

20/29.txt

@@ -0,0 +1 @@
+\v 29 Ta, dye-jɛn jir kiin tɛ̀ŋnɛ̀n jɔ dyàn se ín, à klɔ̀rɔntɔnî ki mél tyɛ̀ldé, à wo dye ŋmɔ́n à se bo, à jɔɔ̂ ki kúè.  \v 30 \v 31 À níintɔnî ki bè fù mélî núkúurî gbɔ̀n dé; ki dénno loké à tyáarɔnî n'à kiintɔnî to, yì dó wo dye ŋmɔ́n à se bo. Yì ki kú kúè. \v 32 Fù jìrɛ̂mun kwɔ́ɔn, à mélî nɔ̀nkurni ki saaŋ bè kúè.  \v 33 À jimin klômɛ́ɛ̀ɛ̂ ɲinɛnfɔn dwɔn à mélî bè tɛŋna à dye-jɛn jir kiinî mɔ gbò fù? Fù bóló ɔ bo à jir kiinî nɔ̀nkurn n'à gbɔ̀n dé á lu ɔ.»

20/34.txt

@@ -0,0 +1 @@
+\v 34 Yesu ki yì ǹ gbukɛlî mɔli dé: «Ɲa yeê jɛɛ̂ɛ̂ ri méèl gbɔɔ̀n, à méèlî ki ɲínɛ́ɛn jɛɛ̂ se.  \v 35 Kɛ̀, Jɔnɔsɔ r'à wûɲɛ̀n dé jimin klômɛ́ɛ̀ɛ̂ mun ni yanɲɛ̀n ɲìnɛ̀n lɛ to à klômɛ́ɛ̀ɛ̂ tyé mɔ, fɛ̀ ki be tɛŋn àkun ǹ faŋbéê mɔ dwɔn, fù jɛɛ̂ɛ̂ bè mél gbɔna bo, à méèlî wo ɲínɛ́ɛna jɛɛ̂ se bo. \v 36 Fù jimiìî saaŋ bè kúbɛ̂ ká bo, bóló ɔ bo yì bè tɛŋnbɛ̂ árí Jɔnɔsɔ ǹ tɔ́ŋrê. Yì ki tɛŋn Jɔnɔsɔ derê bóló ɔ bo yì ri kúɲìnɛ̀nɲɛ̀n.

20/37.txt

@@ -0,0 +1 @@
+\v 37 Musa nɔ̀nkurni ri fù gbukɛl mɔ́n byéenî yɛ̀nɲɛ̀n ín à tímɔ́n fin yaanî gbɔ mɔ dé jimin klômɛ́ɛ̀ bè ɲinɛna, ki Diryɔŋtotɔn yin nɛ́n dé Brayima ǹ Jɔnɔsɔ, Ishaka ǹ Jɔnɔsɔ, fù nì Yakuba ǹ Jɔnɔsɔ. \v 38 Ta Jɔnɔsɔ ki jimin klômɛ́ɛ̀ ǹ Jɔnɔsɔ ɔ bo, Jɔnɔsɔ ki jir-lɛ̀ ǹ Jɔnɔsɔ ɔ, bóló ɔ bo jimiì nɔ̀nkurn ki jir-lɛ̀ ɔ àkun se.»

20/39.txt

@@ -0,0 +1 @@
+\v 39 Tɔ̂ŋn kɛlɔn máɛ̀ k'àn gbukɛlî mɔli dé: «Ŋmɛ́ɛn Totɔn, án gbukɛlî kɛl fáâ ri ɲukwɔ́.» \v 40 Fù jìrɛ̂mun kwɔ́ɔn jir má w'á nìryɛŋn jà ki duklɛ̀ ká bo.

20/41.txt

@@ -0,0 +1,7 @@
+\v 41 Yesu k'à wú yì se dé: «À la gbáno jà jimiì b'à lóon dé Jɔnɔsɔ ǹ Mɔtɔ̂ŋnmun Jiminî ki Dawuda kpaŋltosɛ̂ŋn ɔ? \v 42 Dawuda nɔ̀nkurni r'à wûɲɛ̀n Jɔnɔsɔ se Jɛ́l ɲɛ̂n Sɛ́bɛ̂ɛ̂ mɔ dé:
+"Diryɔŋtotɔn n'à ló ń Totɔn se dé;
+'Ɲínɛ́ɛn mún kìndíir bénî se,
+ \v 43 fóro mún k'á kɛ̀ŋlshì ɔ á níi-ɲɛn-mɔ́n jìr ɔ'."
+ \v 44 Fù se kwó Dawuda nɔ̀nkurni r'à fɛ́ɛŋn dé
+'Ń Totɔn'.
+À la gbáno tɛɛ̀ŋn Dawuda kpaŋltosɛ̂ŋn?»

20/45.txt

@@ -0,0 +1 @@
+\v 45 À jimiìî nɔ̀nkurn bè Yesu ǹ gbukɛɛ̀lî tonáan k'à wú án kɛɛln-bishɛ́ɛ̀ŋɛ̂ se à jùmɔ̂ɔ̂ ɲíɲra dé:  \v 46 «Yíi w'á byéen tɛ́ŋlɛ́n à tɔ̂ŋn kɛlêê to, yì r'á tonɛ́ɛn tonɛnwâ bɛl bɛl sɔ́ɛ̀ ɔ dɔnkɛ́ɛl ɔ. Yì ǹ ɲɛ́ɛn fù ri bè jimiì ki yì fuwú sɔ́ja wono jùmɔ̂ dɛ́ɛl ta, yì ki ɲínɛ́ɛn à tonyɛɛlklɛ-lɔ́ɛ̀ɛ̂ mɔ ɲɛro ɲínɛ́mɔ́ɛ̀ɛ̂ nì le le fɔŋn ɲɛro ɲínɛ́mɔ́ɛ̀ɛ̂ ta. \v 47 Yì b'à dè-klô-méèlî kpɛŋmɔ́ɛ̀ hláan yì kpɛŋn, ki tɛŋn yì fù. Fù nì gbukɛl tyɛɛ́ŋ sɔ́ɔ gbɔ bè yì tìyà tonyɛɛl klɛfɔn. Fù tɔ̂ŋn kɛlêê ǹ kítíî bè jakwóa tɛ́tɛ̂.»

21/01.txt

@@ -0,0 +1 @@
+\c 21 \v 1 Yesu k'á ŋmel tɔŋnkúr k'á ɲáa ɲɛn, ki nòfelê ŋmɔ́n à tonyɛɛlklɛ-lɔ́sɔ́ɔɔ̂ mɔ yì nɔkɔ́ŋl b'á fù kpɛŋntabrê bréen à kpɛŋntabrê brée dɔ́ɔ̂ mɔ. \v 2 Àkun ki saaŋ dè-klô-mél dàkpɛŋl dyàn ŋmɔ́n, fù bè kpɛ̂ŋln-byéen mɔ́n níin bréen à dɔ́ɔ̂ mɔ. \v 3 Yesu k'à wú yì se dé: «Hlɔ ta, mún n'à lóon yíkun se d'à dè-klô-mél dàkpɛŋlî ǹ brê kpɛŋntabrêê ri tyɛɛ́ŋ yé à búùrî fù ri to. \v 4 Fù bóló ɔ bo à búùrî r'á furɲɛ̀n nòfel mɔ má lɛ, yì k'à búr à dɔ́ɔ̂ mɔ kpɛŋntabrê ɔ. Kɛ̀, àni biî n'án dàkpɛ̀ŋlbêê bra ɔ, à r'á kpɛŋnjàɲɛ̀n mùmun to ín leyɛ́ɛŋn sɔŋn ɔ, ki fù nɔ̀nkurn gbɔ̀n búrè à dɔ́ɔ̂ mɔ.»

21/05.txt

@@ -0,0 +1 @@
+\v 5 Jimin máɛ̀ r'à lóon ín à tonyɛɛlklɛ-lɔ́sɔ́ɔɔ̂ gbɔ mɔ d'à mɔtityɛ̂ŋn la ɲɔn kàkrɔ̂ ɲɔn ɲɔɛ̀ ɔ, fù n'à bè mɔtityɛ̂ŋnɲɛ̀n jimiì ki Jɔnɔsɔ to tɛ̀ mɔ́n ɲɔn ɲɔɛ̀ɛ̂ rɔ. Fù wono Yesu k'à wú dé: \v 6 «Yíkun ɲáa fɔn mɔ́ɛ̀ɛ̂ mun to ɲa, ye dyàn bè fɛ́a kàkrɔ̂ má bè ŋmɔ́na kàkrɔ̂ má fléen bo, yì nɔ̀nkurn bè kìn gbeêna.»

21/07.txt

@@ -0,0 +1 @@
+\v 7 Yì k'à du dé: «Kɛlɔn, fù gbɔɛ̀ɛ̂ bè kwoa fɛ́ɛŋn gbâr ye? Fù nì fù klɛ gbɔɛ̀ɛ̂ tofyɛɛ̂ bè tɛŋna myɛ́n nì myɛ́n?»  \v 8 Yesu ki yì ǹ gbukɛlî mɔli dé: «Yíi w'á byéen tɛ́ŋlɛ́n, yíi b'à jél dó ki yíi fliŋ bo. Fù bóló ɔ bo jimin tyɛɛ́ŋ sɔ́ɔ bè bɛa mún yin ɔ, yì k'à wú dé yìkun ki Jɔnɔsɔ ǹ mɔtɔ̂ŋnmun jiminî ɔ. Yì b'à wúa dé gbâr kɔ́ɔŋnî shùnjàmun ɔ, yíi bè kpé fɛ̀ ta bo.  \v 9 Yíi mùkâr ye kɛ̀ŋl gbukɛɛ̀l nì byéen takâ gbukɛɛ̀l ná, yíi be yàntú bo bóló ɔ bo fù gbɔɛ̀ɛ̂ klɛɛ̂ ki faŋ ta ɔ wà. Kɛ̀ fù bè tɛŋna díryɔ́ŋ kɔ́ŋnkún fù tíkɛ́l byéenî mɔ bo.»

21/10.txt

@@ -0,0 +1 @@
+\v 10 Fù jirɛ̂mun kwɔ́ɔn k'à wú yì se dé: «Tɔbin kúur sɔ́ɔ má bè dukúa tɔbin kúur sɔ́ɔ má se kɛ̀ŋl ɔ. Kìyɛŋn má ki dukú kìyɛŋn má se kɛ̀ŋl ɔ.  \v 11 Ɲáan bè jira jaar sɔ́ɔ tíkɛ́l máɛ̀ mɔ, jùmɔ̂ láaŋ nì klɔ̂ ki jo tíkɛ́l máɛ̀ mɔ. Jimiì nìryɛŋn lun gbɔɛ̀ nì yàn ǹ ja gbɔ tofyɛɛ̀ bè ŋmɔ́ɔn jɔ̀nɔ̀kpár mɔ.

21/12.txt

@@ -0,0 +1 @@
+\v 12 Kɛ̀ la, fù gbɔɛ̀ɛ̂ klɛɛ̂ n'á to gbɔ tyé, yì bè yíkun jaa, yì ki yíkun búr da sɔ́ɔ mɔ. Yì bè yíkun jà nɛ́na à tonyɛɛlklɛ-lɔ́ɔ̂ mɔ gbɔ ŋmelêê kpɛŋn, yì ki yíkun mɔkpɛ́ê mɔklálɔ́ mɔ. Yì bè yíkun jaana kìyɛŋntê nì kòkɛ̀l ŋmelê se mún gbɔ núkwɔ́ɔn. \v 13 Fù bè kwoa yíkun ki mún gbɔ mɔ nínshîbé gbukɛl kɛl núkwɔ́ɔn yì se.

21/14.txt

@@ -0,0 +1 @@
+\v 14 Yíkun b'á byéen tanyân tɛ́l ɲɛ́n gbɔ búr á ŋmel mɔ bo, \v 15 bóló ɔ bo mún nɔ̀nkurni bè gbukɛl nɛ́na yíkun kɔŋn, ń ki byéen mɔbinhlɔ tɛ́l ɔ yíi kɛ́ŋ. Yíkun kɛ̀ŋlshìtê bè yíkun tyaŋn hìn tɛŋna bo, yì wo yíkun ǹ kɛl gbukɛl mɔŋmɛ hìn tɛŋna bo.

21/16.txt

@@ -0,0 +1 @@
+\v 16 À ta yíkun kwɔ̀ŋmɔ́ɛ̀ nì yíkun nɔbiîŋ nì yíkun tɔbiîŋ fù nì yíkun jirɛ̂ɛ̀ kwó, yì bè yíkun jà nɛ́na yíi kɛ̀ŋlshìtê kpɛŋn, yì ki yíi mɔ máɛ̀ kwoê. \v 17 Jimiì bè yíkun tojakwóa mún gbɔ núkwɔ́ɔn.  \v 18 Kɛ̀, à ta yíkun fléen yin bin byéen kwó, à wo jela bo. \v 19 Yíkun nɔkɔ́ŋlɲɛ̀nî wono Jɔnɔsɔ bè yíkun ɲɔnlia.»

21/20.txt

@@ -0,0 +1 @@
+\v 20 Yesu k'à wú dé: «Yíi mùkâr ye à ŋmɔ́n kɛ̀ŋlɲɛ́ntê ki bè Jerisalɛmu dyɛɛ̂ tomlì kpɛ́è, yíi k'à shu d'à dyɛɛ̂ kláa gbâr la lòɲɛ̀n.  \v 21 Fù gbârî mùkâr ye lò ki mɛ̀mun ŋmɔ́n Jude kòkɛ̀lî mɔ, fɛ̀ wo túno à káàlî mɔ. À ri mɛ̀mun ŋmɔ́n Jerisalɛmu dyɛɛ̂ wono, fɛ̀ wo tú li à dyɛɛ̂ mɔ. À lò ki mɛ̀mun ŋmɔ́n klɔŋn se, fɛ̀ be dé bɛ ká di bo.  \v 22 Fù bóló ɔ bo fù gbârî bè tɛŋna Jɔnɔsɔ nìrkyɛ̀ŋl sɛŋl gbâr, nɔkɔ́ŋl gbɔɛ̀ɛ̂ mun ni ɲúrɲɛ̀n ín Jɔnɔsɔ ǹ gbukɛlî ɲwâr sɛ́bɛ̂ɛ̂ mɔ fɛ̀ ki kwo mɔyîn.

21/23.txt

@@ -0,0 +1 @@
+\v 23 Fù lɔɔ̂ mɔ, nar la bè tɛŋna à mél funɔɛ̀ɛ̂ n'à dye ɲɔ́ méèlî besé! Fù bóló ɔ bo Isirayɛli kìyɛŋnî jimiìî la bè da kwoa fù lɔɔ̂ mɔ, fù nì Jɔnɔsɔ k'à nìrfún yì to. \v 24 Jimin máɛ̀ bè kwoa kɛ̀ŋlɲɛ́n krɔ ɔ, máɛ̀ ki jano fwɔŋbé mɔ tɔbin kúur sɔ́ɔ máɛ̀ nɔ̀nkurn tyé mɔ. Jɔnɔsɔ hlɔ kaarn tê ki Jerisalɛmu dyɛɛ̂ ŋmɛ kɛ́ê shaari. Fù gbɔɛ̀ɛ̂ bè kwoa má fù tɔbin kúur sɔ́ɛ̀ɛ̂ ǹ klɛ yefyɛ̂ɛ̀lî kwò kɔ́ɔŋnî tyé mɔ.»

21/25.txt

@@ -0,0 +1 @@
+\v 25 Yesu k'à wú yé dé: «Tofyɛɛ̀ dyɛ̀ bè ŋmɔ́na à yeê to, ki ŋmɔ́n à fwɔ́ŋnî to, fù nì ki ŋmɔ́n à sɛ̀ɛ̀ŋlî to. À fíin-nunî báan myɛl ki ná jaar sɔ́ɔ. Fù lɔɔ̂ mɔ jimiì nɔ̀nkurn bè tɛŋna wonkɔ̂ŋn mɔ, yì sekɔ̂ŋn se. \v 26 Jimin tyɛɛ́ŋ sɔ́ɔ bè kir gbeêna yànbê gbɛ́ɛ jar se à ɲáantyarî ta klɛ gbɔɛ̀ɛ̂ kìsɛ́ɛ tɛ̀ŋndɛ́ɛ se. Fù bóló ɔ bo jɔ̀nɔ̀kpár mɔ lotɔnbéèê bè yâŋna.