mnong_2020_mng_mlt_mat_book/mat/12.json

{
  "1": "Mŏng nar hư̆n, Yang Yêsu sak găn gao ju tač lŏ trĭp mŏng nar Sa-bat, ƀê̆ dăh băl ƀing kna Yang di hên nguôt hư̆n yơh hên dư̆ng hôč kao ba jêh iên sa.",
  "2": "Ƀê̆ dăh jăng jai so pơp hư̆n, băl Pha-ri-si ngơi ta Khua Yang: \"Dlăng tŏ hư̆n, băl ƀing kna Khua Yang mhŏ bruă so bhiên mhŏ mŏng nar saƀat.\"",
  "3": "Ƀê̆ dăh, Khua Yang wêh ngơi ta hên: \"So tuôm pu me dlăng bruă kăn Đawit  mhŏ, jăng jai kăn wăt ta băl nêh sak băk kăn, hên nguôt lăh?",
  "4": "hư̆n jêng bruă mtao mư̆t mŏng hih Yang Trôk jêh iên sa ƀăñ ƀrăh ngôr, hư̆n jêng ƀăñ mtao wăt ta nêh hui gre mtao so dơi sa ôh, čuôm gu nai ăn ta băl khua mhŏ yang. ",
  "5": "Mdăh ñăm tuôm pu me dlăng mŏng ră pơp bhiên čih klăh iêu, mŏng nar sa-ƀat, băl khua mhŏ yang mŏng hih ƀư̆n mhŏ tih pơp bhiên mŏng nar sa-ƀat, ăt so nai ngơp hên tih ya lăh?",
  "6": "Ƀê̆ dăh ăñ ngơi ta pu me klăh iêu ta o mau ju nau Mtao ram hĭn ta hih kôh mpŭ.",
  "7": "Ƀê̆ dăh ndă jêh dơi pu me wơng đa lăh pơp yuôm ndăp mŏng pơp ngơi ho: ‘Ăñ khơñ nuih tlŏng đač so geh pơp mhŏ yang ôh,’ năng ai so pu me phat dôih li nêh so mau pơp tih. ",
  "8": "Bơ yơng Kuôn Nêh jêng Yang nar saƀat.” ",
  "9": "Jêh iên du băh tŭk hư̆n, Khua Yang mư̆t mŏng hih kôh mpŭ hên di. ",
  "10": "Tŏ hư̆n, mau ju nau nêh djei ju đăh ti, jêh iên hên lup Yang Yêsu, klăh iêu: “Mŏng nar saƀat dơi lăm băh pơp kuôp ji mdăh so?” No di hên dơi mau truông kčŭt pơp tih Khua Yang.",
  "11": "Ƀê̆ dăh Khua Yang ngơi ta hên: “Mau ya nêh mŏng pu me, ndă kăn mau ju mlăm kuôn biêp, jêh iên ndă ĕh lăč ĕh mŏng ƀăng sô̆ geh trĭp mŏng nar sa-ƀat, so lăh kăn kŏng kjăm ĕh jêh iên đŏh tŏng tê̆ lăh?",
  "12": "Jêh hư̆n kuôn nêh ho yuôm hĭn ta kuôn biêp hư̆n ya! Kơt iên, mŏng nar saƀat dơi mhŏ bruă găl.” ",
  "13": "Jêh hư̆n, Khua Yang ngơi ta nêh hư̆n: “Ăn me yơr ti me iêu tŏ.” Nêh hư̆n yơr ti jêh iên ĕh băh rŏk, ndrơm klăh ti ju đăh.",
  "14": "Ƀê̆ dăh jêh hên du băh iên, băl Pha-ri-si juôi truông tăm dăng ta Khua Yang \n no di dơi lăm khư̆t Khua Yang.",
  "15": "Ƀê̆ dăh yơng băh gư̆t pơp hư̆n, Yang Yêsu du plăč tŭk dêh. Mau ŏk nêh hui gre Khua Yang jêh iên Khua Yang lăm băh lĕ pơp kuôp ji hên,",
  "16": "jêh iên Khua Yang ghă hên, no di ơn hên sơm Khua Yang ta nêh dơ-dêh,",
  "17": "no di lăm nư̆k pơp ngơi băh nêh têh luôr Êsai, klăh iêu:",
  "18": "“Ho jêng, dư̆k ăñ, jêng Nêh jêh ăñ săč ruăh; Nêh khăp khơñ ăñ ji, mŏng Kăn, nuih nhăm ăñ čhô̆ brơn. Ăñ jrăng tôh Yang Ngăt Găl ăñ ji tŏng Kăn, jêh iên Kăn jrăng têh sơm pơp kpă ta băl uôn lan ta ling. ",
  "19": "So kăn tŏng nhan mdăh ôr tĕh, ăt so mau nêh dơi tŏng dơk kăn ta truông mei ya.",
  "20": "So kăn wăk tơm prŏh jêh čăh; So kăn lăm khư̆t iñ kđen mơñ tôč, tăl trôh mông kăn ăn pơp kpă dơi lĕ mơt. ",
  "21": "jêh iên băl uôn lan ta ling jrăng ăn pơp čang mơn mŏng năn Kăn.”",
  "22": "Jêh hư̆n, mau nêh sak ndơp ta Khua Yang ju nau nêh yang djŏh mư̆t tiêh măt jêh iên mblo, jêh hư̆n Khua Yang lăm băh nêh hư̆n, tăl nêh mblo dơi ngơi jêh iên dơi so. ",
  "23": "Đơ băl uôn lan so pơp hư̆n nai ndrơh gơ gu jêh iên ngơi klăh iêu: “Geh ya kăn hư̆n jêng kuôn so mtao Đawit lăh?",
  "24": "Ƀê̆ dăh băl Pha-ri-si jêh hên tŏng klăh iên, hên ngơi klăh iêu: “So dơi kăn prŏh čak ndă so kăn knang ta Ƀê-ên-sê-ƀun, hư̆n jêng mtao čak.”",
  "25": "Ƀê̆ dăh gư̆t luôr pơp mĭn hên di, hư̆n Khua Yang ngơi ta hên klăh iêu: “Grăp čar mau pơp tăm jăh čar hư̆n jrăng rai, jêh iên grăp uôn mdăh hih nhăk mau pơp tăm jăh ăt so dơi ĕh gŭk kjăp ya. ",
  "26": "Ndă satan tŏng suôt ndăng satan, hư̆n jêng ĕh tŏng jăh ndăng ĕh. Ndă iên đa lăh čar ĕh dơi kjăp?",
  "27": "Jêh hư̆n ndă ăñ knang ta Ƀê-ên-sê-ƀun  prŏh čak, nêh tơm lŏ prŏh čak băh ŏh kuôn pu me? Bơ yơng hư̆n yơh hên jrăng ñjêng nêh phat dôih pu me. ",
  "28": "Ƀê̆ dăh ndă ăñ knang ta Yang Ngăt Găl Yang Trôk ăñ prŏh čak, kơt iên čar Yang Trôk jêh trôh ta pu me ru.",
  "29": "Mdăh đô̆ nă dơi mư̆t mŏng hih ju nau nêh prăl ktang jêh iên tlĕ pơp no kăn ndă di so čăp nêh prăl ktang hư̆n luôr?  Jêh hư̆n kăh, nêh tlĕ jrăng sŏk lĕ pơp no mŏng hih kăn.",
  "30": "Nêh tơm so gŭk băk ăñ jêng nêh tăm dăng ta ăñ, jêh iên nêh tơm so tăm tlăč băk ăñ jrăng rai. ",
  "31": "Yơng băh pơp ho, ăñ ngơi ta pu me, lĕ mơt pơp tih wăt pơp mgao ta Yang Trôk jrăng dơi đač ta kuôn nêh, ƀê̆ dăh nêh tơm mưč trôh ta Yang Ngăt Găl, so hôm dơi lŏ wêh đač ôh. ",
  "32": "Ndă nêh tơm ngơi pơp mgao ta Kuôn Nêh, jrăng dơi đač ta nêh hư̆n. Ƀê̆ dăh nêh tơm ngơi mgao trôh ta Yang Ngăt Găl, nêh hư̆n so lŏ hôm mau pơp dơi đač, wăt mŏng nuk ho mdăh trôh mŏng nuk ta kơi o tlak. ",
  "33": "Ndă di, tăm jhi găl ĕh jrăng mau ple găl, ndă tăm jhi djŏh ĕh jrăng mau ple djŏh ya, bơ yơng dlăng tơm jhi mơn băh ple ĕh. ",
  "34": "Wơ pôl nhuôr bêh lŭk, bơ yơng pu me  djŏh, đô̆ nă dơi pu me ngơi pơp găl? Bơ yơng jêh bêng băh nuih tŏ hư̆n ĕh lôh băh dơk ngơi.",
  "35": "Nêh găl, yơng băh nuih nhăm kăn di bêng pơp găl hư̆n ĕh jrăng lôh pơp găl, ƀê̆ dăh băl djŏh, yơng băh nuih nhăm kăn di bêng pơp djŏh, hư̆n ĕh jrăng lôh pơp djŏh. ",
  "36": "Ƀê̆ dăh ăñ ngơi ta pu me klăh iêu grăp pơp ngơi dăh dan nai krĕh ngơi, mŏng nar phat dôih, nai jrăng sơm lĕ mơt pơp ngơi dăh dan hư̆n. ",
  "37": "Yơng băh pơp pu me ngơi, nai ngơp pu me jêng nêh kpă, jêh hư̆n băh pơp pu me ngơi ya nai jrăng kmhal pu me.” \n\n",
  "38": "Jêh hư̆n, mau bar pei nau băl khua tơ-ti pơp bhiên wăt ta băl Pha-ri-si hên sak ngơi ta Khua Yang, klăh iêu: “Wơ Khua Yang, hi khơñ so Khua Yang tơm mhŏ ƀơn pơp ndrơh!”",
  "39": "Ƀê̆ dăh Khua Yang wêh ngơi ta hên klăh iêu: “Pôl nhuôr djŏh ƀai jêh iên čhơng tăt ho khơñ so ju mta pơp myang, ƀê̆ dăh so hôm mau ju mta pơp myang dơ-dêh ăn ta ĕh ôh, čuôm gu pơp myang nêh têh luôr Yô-na di gu.",
  "40": "Bơ yơng đô̆ nă jêh kăn Yô-na gŭk mŏng ndư̆l ka ram pei nar ta pei măng, Kuôn Nêh jrăng gŭk mŏng sô̆ teh pei nar ta pei măng klăh iên ya.",
  "41": "Mŏng nar phat dôih, băl Ni-ni-ve jrăng dŏk ju băk ta pôl nhuôr ho jêh iên hên jrăng kčŭt ĕh. Bơ yơng hên gư̆t niêl mlih mơn băh pơp tơ ti lăh kăn Yô-na di, ƀê̆ dăh dlăng ho, ta o mau ju nau Mtao ram hĭn ta kăn Yôna!",
  "42": "Mŏng nar phat dôih, mtao u ur băh đăh nar ñăp jrăng dŏk ju băk ta pôl nhuôr ho jêh iên de jrăng kčŭt ĕh, bơ yơng băh đăh jŏng trôk wăč sô̆, de sak iêt pơp gư̆t mĭn mtao Salômôn di, jêh iên dlăng ho, ta o mau ju nau Mtao ram hĭn ta kăn Salômôn.",
  "43": "Mông hư̆n jêh yang ƀơ̆ ĕh du băh ju nau nêh, ĕh sak trôh ta tŭk tač ndrăñ ro răñ, ĕh juôi tŭk mdei ƀê̆ dăh so dơi ĕh so, ",
  "44": "Jêh hư̆n, ĕh ngơi: ‘Ăñ jrăng lŏ wêh du ta hih ăñ lak hư̆n jêng tŭk jêh ăñ du băh iên.' Jêh trôh ta iên, ĕh so hih hôm hŏng, jêh nai wĕh ngôr jêh iên nai dăp dăng găl, ",
  "45": "Jêh hư̆n, ĕh wêh lŏ sak jêh iên ĕh lŏ ndơm băk ĕh pŏh nau yang jhat dơ-dêh đhir ngit hĭn ta ĕh ya, jêh iên ĕh mư̆t mŏng hih ĕh gŭk ju băk mŏng hih hư̆n. Jêh hư̆n pơp brêh nêh hư̆n jrăng djŏh hĭn ta luôr hư̆n ya. Bruă ĕh trôh ta pôl nhuôr djŏh ƀai ho ăt klăh iên ya.",
  "46": "Jăng jai hôm Khua Yang tơ-ti băl uôn lan, tŏ hư̆n, mei wăt ta ŏh mi Khua Yang hên kăp ta ling, juôi truông khơñ tŏng ngơi ta Khua Yang.",
  "47": "Mông hư̆n, mau ju nêh sak têh ta Khua Yang: “Tŏ hư̆n, mei khua ta ŏh mi khua di hên kăp ta ling tŏ, hên khơñ tŏng ngơi ta khua!”",
  "48": "Ƀê̆ dăh Khua Yang wêh ngơi ta nêh sak têh ta Khua Yang: “Nêh tơm jêng mei ăñ jêh iên nêh tơm jêng ŏh mi ăñ?",
  "49": "Jêh hư̆n Khua Yang yơr ti tơ-to iêu băl ƀing kna Yang di, Khua Yang ngơi: “Ho jêng, mei ăñ jêh iên ŏh mi ăñ!",
  "50": "Bơ yơng nêh tơm mhŏ geh ta pơp Bap ăñ tŏng trôk khơñ, hư̆n jêng ŏh mi ăñ, rôh mei ăñ jêh iên mei ăñ.”"
}