mnong_2020_mng_mlt_mat_book/mat/5.json

{
  "1": "Jăng jai Yang Yêsu so uôn lan ŏk, Khua Yang sak tŏng čơng yôk, Trôh ta iên Khua Yang gŭk mŏng sô̆, jêh hư̆n băl ƀing kna trôh ta tŭk Khua Yang.",
  "2": "Khua Yang pơ̆k dơk jêh iên tơ-ti hên blăh iêu:",
  "3": "Găl jôn ta nêh ƀun knap mŏng ngăt nhuôl, bơ yơng uôn Yang Trôk jêng hên di.",
  "4": "Găl jôn ta nêh ñim biêk, bơ yơng hên jrăng dơi dơn pơp jôh lih.",
  "5": "Găl jôn ta nêh lŭa gŭ, bơ yơng hên jrăng dơi dơn teh.",
  "6": "Găl jôn ta nêh hêr nguôt pơp kpă, bơ yơng hên jrăng dơi hơm le.",
  "7": "Găl jôn ta nêh gư̆t tŏng đac̆, bơ yơng hên jrăng dơi dơn pơp đac̆.",
  "8": "Găl jôn ta nêh ƀrăh ngôr mŏng nuih nhăm, bơ yơng hên jrăng so Yang Trôk.",
  "9": "Găl jôn ta nêh lăm găl, bơ yơng nai jrăng kuôl hên jêng kuôn Yang Trôk.",
  "10": "Găl jôn ta nêh nai mhŏ djŏh yơng băh pơp kpă, bơ yơng uôn Yang Trôk thêm ta hên.",
  "11": "Găl jôn ta ŏh mi jăng jai nai ngơi djŏh jêh iên nai mhŏ ƀai ta ŏh mi, wăt nai mbư̆t djăp pơp tih mblư̆ ta ŏh mi yơng băh ăñ.",
  "12": "Ăn c̆hô̆ gai jêh iên brơn mơn, bơ yơng pơp khôm ŏh mi di tŏng trôk ram ngĭn ngăn. Yơng nai jêh mhŏ djŏh ƀai ta tơm têh luôr lak ndrơm ŏh mi ya.",
  "13": "Ŏh mi jêng buôh ta teh dih. Ƀê̆ dăh, ndă buôh nga pơp tiêt, đô̆ nă dơi wêh lăm ñjêng ĕh no mau pơp tiêt? Ĕh so hôm yuôm ta lĕ broă ôh, nai jrăng čĕ ta ling jêh iên nai jrăng juôt ta jŏng.  ",
  "14": "Ŏh mi jêng pơp ang dôn teh di. Ƀơn uôn ram gŭk ta dôn yôk ĕh so dơi lư̆m ndăp ƀă.",
  "15": "Ăt so mau nêh jhu iñ kđen jêh iên ăn mŏng sô̆ mang ŭng, ƀê̆ dăh jrăng ăn tŏng tê̆ ndŏng iñ, no di đang ang ta lĕ mơt nêh mŏng hih.",
  "16": "No di ăn pơp ang oh mi đang ta măt nai, čiêng ta hên so bruă găl oh mi di jêh iên nơ-nei ta Bap oh mi tŏng Trôk.",
  "17": "Man mĭn ôh Ăñ trôh no di lăm rai pơp bhiên mdăh pơp têh luôr; Ăñ trôh so geh lăm rai, ƀê̆ dăh c̆iêng lăm nư̆k.",
  "18": "Bơ yơng Ăñ ngơi ngăn ta ŏh mi, ndă di trôk jêh iên teh ñăm tôc̆ dư̆t, so mau ju têl mdăh ju trĕh mŏng pơp bhiên dơi gao, tăl trôh lĕ mơt pơp dơi lăm jêh.",
  "19": "Klăh iên, nêh tơm mhŏ tih dŏng nê̆ mŏng pơp bhiên ho, jêh iên tơ-ti nêh dơ-dêh mhŏ blăh iên jrăng ngơp kuôn nê̆ hĭn mŏng čar Yang Trôk, Ƀê̆ dăh nêh tơm ñôt kjăp pơp bhiên hư̆n jêh iên tơ-ti ta nêh dơ-dêh nêh hư̆n jrăng dơi ngơp jêng ram mŏng čar Yang Trôk.",
  "20": "Bơ yơng Ăñ lăh ta ŏh mi gư̆t, ndă di pơp kpă ŏh mi so gao hĭn ta pơp kpă băl khua tơ-ti pơp bhiên di ta băl Pharisi, iên ngăn ŏh mi jrăng so dơi mư̆t mŏng čar Yang Trôk.   ",
  "21": "Ŏh mi tuôm tŏng ya pơp băl đưm tơ-ti lăh: \"Me so dơi lăm khư̆t nêh, jêh iên nêh tơm lăm khư̆t nêh jrăng tŭ pơp phat dôih.\"",
  "22": "Ƀê̆ dăh ăñ ăn ŏh mi gư̆t klăh iêu, nêh tơm hao nuih ta ŏh mi tơm jrăng tŭ pơp phat dôih; nêh ngơi ta ŏh mi tơm: \"Băl so yuôm\" năng ta nai phat dôih, jêh iên nêh tơm ngơi: \"Băl plư̆p\" năng ta nai čĕ mŏng war iñ.",
  "23": "Kơt iên, ndă ŏh mi jăng jai myơr pơp mhŏ yang ta jhưng mhŏ yang, mông hư̆n bhŏng kăh tôr ta ju nau ŏh mi mau pơp so găl ta tơm,",
  "24": "Ăn ndrŏh pơp myơr hư̆n ta măt jhưng mhŏ yang, luôr hĭn ăn sak lăm găl ta ŏh mi hư̆n, jêh iên sak myơr pơp mhŏ yang.",
  "25": "Ăn sak lăm găl gơñ ta nêh tơm kčŭt ŏh mi jăng jai ŏh sak băk nêh hư̆n trôh ta tŭk phat dôih. Ndă so, nêh kčŭt oh mi jrăng jao oh mi ta băl phat dôih, jêh iên băl phat dôih jrăng jao ta ka han, jêh hư̆n oh mi jrăng gŭk mŏng war.",
  "26": "Ăñ ngơi ngăn ta ŏh mi, ŏh mi jrăng so dơi du băh war tăl trôh mông jêh tăm lĕ nŏh nuôn nai.",
  "27": "Ŏh mi tuôm tŏng ya pơp tơ-ti klăh iêu: \"Man mhŏ tih dŏng tư̆r.\"",
  "28": "Ƀê̆ dăh ăñ ăn ŏh mi gư̆t klăh iêu: \"Nêh rŭng ju nau u ur jêh iên khơñ mhŏ tih ta de, hư̆n jêng jêh mhŏ tih dŏng tư̆r ta de mŏng nuih nhăm ru.\"",
  "29": "Ndă măt đăh ma lăm ndơp ŏh mi ta pơp tih, ăn liêk lat jêh iên čĕ ĕh du wăč băh ŏh mi. Yơng găl hĭn ju khăn săk jăn ŏh mi di rai lêk, ta nư̆m săk jăn ŏh mi di nai cĕ mŏng war iñ.",
  "30": "Ndă plang ti ma ndơp ŏh mi mhŏ tih, ăn ndăč lat ĕh jêh iên čĕ wăč băh ŏh mi. Yơng găl hĭn ju khăn săk jăn oh mi rai lêk, ta nư̆m săk jăn ŏh mi di so mư̆t mŏng war iñ.",
  "31": "Ăt mau pơp tơ-ti: \"Nêh tơm ndrŏh ur, jrăng ăn ta de ju pŏk ră tŏng ndrŏh.\"",
  "32": "Ƀê̆ dăh, ăñ ăn ŏh mi gư̆t klăh iêu: Nêh tơm ndrŏh ur \"so ngơp ôh pơp mhŏ tih dŏng tư̆r\" kăn yơh lăm ñjêng de jêng nêh tih dŏng tư̆r. Jêh iên, nêh gŭk de jêh nai ndrŏh hư̆n, ăt mhŏ tih dŏng tư̆r ya.  ",
  "33": "Ăt ŏh mi tuôm tŏng ya pơp băl đưm tơ-ti: \"Man ƀuôn huôk, ăn ñôt kjăp pơp ƀuôn băn di ta Yang Trôk.\"",
  "34": "Ƀê̆ dăh, ăñ ăn oh mi gư̆t, ei ru kăt săk ôh; Man kăt săk ta trôk, yơng trôk jêng jhưng Mtao Yang Trôk di.",
  "35": "Man kăt săk ta teh, yơng tĕh jêng tŭk djruông jŏng Yang di. Man kăt săk ta uôn Yêrusalem, bơ yơng uôn hư̆n jêng uôn mtao ram di.",
  "36": "Man kăt săk ta bôk tơm, bơ yơng ư̆h mi so dơi lăm ñjêng ju mlăm sei sŏk jêng buôk mdăh jŭ.",
  "37": "Ƀê̆ dăh ăn ŏh mi ngơi \"Mau ngơi mau\" mdăh \"So ngơi so.\" Lĕ mơt pơp dơ-dêh mbăč ta iên jêng trôh băh yang djŏh.",
  "38": "Ŏh mi tuôm tŏng ya pơp ngơi: \"Măt čiu măt, sêk čiu sêk.\"",
  "39": "Ƀê̆ dăh, ăñ ngơi no di ŏh mi gư̆t, man tăm dăng ta băl ƀai. Mlih ta iên, nêh tap môk đăh ma ŏh mi jêh iên ăn hlao môk đăh tŏ ta kăn.",
  "40": "Ndă nêh tơm khơñ kčŭt ŏh mi ta băl phat dôih čiêng sŏk ao ta ling ŏh mi di, ăn ta kăn sŏk hlao ao mŏng nuông.",
  "41": "Nêh tơm mhăl ŏh mi sak ju wang truông, ăn sak băk nêh hư̆n bar wang.",
  "42": "Ăn ta nêh tơm lup dăn pơp no ŏh mi, jêh iên ei ru mhŏ ñjră ta nêh tơm khơñ čan pơp ŏh mi.",
  "43": "Ŏh mi tuôm tŏng ya pơp ngơi: \"Ăn khăp khơñ ta nêh kiêu ma me, jêh iên hao nuih ta băl rŏh me.\"",
  "44": "Ƀê̆ dăh ăñ ngơi ta ŏh mi, ăn khăp ta băl rŏh ŏh mi di, jêh iên kuôl dăl ta băl mhŏ ƀai ta ŏh mi.",
  "45": "No di ŏh mi dơi ñjêng kuôn Bap băn gŭk tŏng trôk. Yơng Yang Trôk ăn nar Yang di đang ta nêh djoh wăt nêh găl, jêh iên ăn mih ta nêh kpă wăt ta nêh tih.",
  "46": "Ndă di ŏh mi khăp čuôm gu ta nêh khăp ŏh mi, kơt iên năn pơp khôm ŏh mi dơi dơn? Geh ya! Băl rư̆ng jia ăt hên mhŏ blăh iên? ",
  "47": "Ndă ŏh mi čuôm gu kôh ta ŏh mi tơm, kơt iên ŏh mi tŭk mau pơp gao hĭn ta nêh dêh? Geh ya! Băl uôn lan dơ-dêh ăt hên mhŏ blăh iên ya?",
  "48": "Hư̆n yơh, ăn ŏh mi jêng nư̆m nơn, ndrơm Bap tŏng trôk ŏh mi di jêng nư̆m nơn."
}