mnong_2020_mng_mlt_mat_book/mat/27.json

{
  "1": "Trôh ang ôi, lĕ mơt khua mhŏ yang ram jêh iên băl khua u rañ mŏng uôn lan trông čhai mnăč tăm dŏng ta Yang Yêsu no di lăm khư̆t lat Khua Yang.",
  "2": "Hên čăp Khua Yang, ñư̆p Khua Yang sak jao ta kăn khua čar Pilat.",
  "3": "Jăng jai Yuđa, nêh lhiăr Khua Yang Yêsu so nai phat dôih Khua Yang, kăn wêh ƀlŏk jêh iên kăn ñôt pei jăt prăk sak ndơp ta băl khua mhŏ yang ram jêh iên khua u rañ,",
  "4": "jêh iên ngơi: \"Ăñ jêh tih ru bơ yơng jao mham kpă.\" Ƀê̆ dăh hên ngơi: \"Bruă hư̆n so hôm yuôm ta hi! Bruă hư̆n tui si me mhŏ.\"",
  "5": "Jêh hư̆n kăn čĕ pei jăt prăk mŏng hih ƀư̆n jêh iên du hih sak rêt ko lăm khư̆t săk tơm.",
  "6": "Băl khua mhŏ yang ram dôñ prăk hư̆n jêh iên ngơi: \"Pơp bhiên so ăn ñôt pei jăt prăk ho lăm mư̆t mŏng hip hih ƀư̆n ôh, bơ yơng ho jêng prăk ênŏh mham di.",
  "7": "Hên tăm trông čhai bruă hư̆n ndăng hên jêh iên yua prăk hư̆n ruôt tač lŏ kăn muôn dlăh no di thêm tŭk tăp bư̆l ta băl năč.  ",
  "8": "Bơ yơng băh iên nai năn tač lŏ ho jêng \"Tač Lŏ Mham\" tăl trôh nar o.",
  "9": "Klăh iên jêng lăm nư̆k pơp jêh tơ-ti băh khua têh luôr Yêrêmi klăh iêu: \"Hên sŏk pei jăt prăk, jêng ênŏh băh băl kuôn tlau Israel kăm ta kăn,",
  "10": "jêh iên hên sŏk prăk hư̆n no di ruôt tač lŏ kăn muôn dlăh ndrơm klăh di pơp jêh Yang Trôk tơ-tă ta ăñ.\"",
  "11": "Mông hư̆n, Yang Yêsu dŏk ta măt khua čar jêh iên kăn lup Khua Yang: \"Gĕh ya me jêng mtao băl Yuđa?\" Yang Yêsu ngơi: \"Gĕh hui si pơp me ngơi hư̆n.\"",
  "12": "Ƀê̆ dăh jăng jai băl khua mhŏ yang ram jêh iên băl khua u rañ kčŭt Khua Yang, ƀê̆ dăh Khua Yang so wêh ngơi ju mta pơp ôh.",
  "13": "Jêh hư̆n Philat lup Khua Yang: \"So me tŏng lĕ mơt pơp nai kčŭt no di tăm dăng ta me hư̆n lăh?\"",
  "14": "Ƀê̆ dăh Khua Yang so wêh ngơi ta lĕ mơt pơp hên kčŭt, tăl trôh ta khua car ăt kăn hơ̆ hă ya.",
  "15": "Mŏng mông mar, khua čar mau pơp bhiên phưi ju nau nêh mnă ta uôn lan, nêh hư̆n hui si uôn lan ruăh. ",
  "16": "Mông hư̆n, mau ju nau mnă pĕh hing ƀai năn kăn Ƀaraƀas.",
  "17": "Hư̆n yơh, jêh hên tăm ƀư̆n, Philat lup hên: \"Nêh tơm pu me khơñ ăñ phưi ta pu me? Ƀaraƀas mdăh Yêsu, khăng kuôl jêng Yang Tŏng Tlĕh?\"",
  "18": "Bơ yơng khua gư̆t klă hên jao Khua Yang ta kăn yơng băh nuih nhăm djŏh.",
  "19": "Jăng jai khua hôm gŭk phat dôih, ur kăn yua ka han sak lăh klăh iêu: \"Ei ru mhŏ djŏh ta nêh kpă hư̆n. Bơ yơng nar o ăñ mau pơp rŭng răng ŏk ngăn yơng băh pơp mbơi ta nêh ho.\"",
  "20": "Mông hư̆n, băl khua mhŏ yang ram jêh iên băl khua u rañ jhôl trôt uôn lan dăn phưi kăn Ƀaraƀas jêh iên lăm khư̆t Yêsu.\n",
  "21": "Khua čar wêh lup hên: \"Nêh tơm Pu me khơñ ăñ phưi mŏng bar nau ho ta pu me?\" Hên ngơi: \"Ƀaraƀas.\"",
  "22": "Pilat lup hên: \"Kơt iên, năn pơp ăñ mhŏ ta Yêsu, nai kuôl jêng Yang Tŏng Tlĕh, ho?\" Lĕ mơt dư̆ng hên ngơi: \"Pŏng điñ kăn ta jhi tăm kăng.\"",
  "23": "Jêh hư̆n khua lup: \"Pơp mhŏ? Năn pơp tih kăn mau?\" Hên wêh ôr tĕh hĭn klăh iêu: \"Pŏng đĭn kăn ta jhi tăm kăng.\"",
  "24": "Jăng jai Pilat gư̆t kăn so dơi wêh mhŏ ju mta pơp ôh, ƀê̆ dăh mlih ta iên, tăl rŏng trôh pơp tŏng pŭ, jêh hân kăn sŏk dak rao ti ta măt uôn lan jêh iên kăn ngơi: \"Ăñ so mau pơp tih ta mham nêh ho ôh. Pu me mhŏ dêh yơh.\"",
  "25": "Lĕ mơt uôn lan wêh ngơi: \"Mham kăn lơi ĕh tôh ta hi jêh iên ta kuôn so hi.\"",
  "26": "Kơt iên jêng khua phưi kăn Ƀaraƀas ta hên, ƀê̆ dăh pŭ yat Yang Yêsu jêh iên jao Khua Yang no di tŭ pŏng điñ ta jhi tăm kăng.",
  "27": "Ka han kăn khua čar lăm ndơp Yang Yêsu mư̆t mŏng hih phat dôih ram jêh iên ƀư̆n lĕ khua ka han ta măt Khua Yang.",
  "28": "Hên lĕh ao Khua Yang jêh iên lăm sŏh Khua Yang ju blăh ao dak brông hăr.",
  "29": "Hên tañ ju mlăm đuôn ta luôk, jêh hư̆n lăm ndau ta bôk Khua Yang, jêh iên ăn mŏng jra ta ti ma Khua Yang. Hên pun mŏng sô̆ ta măt Khua Yang, jêh iên mưč liê̆ Khua Yang klăh iêu: \"Wơ mtao uôn lan Yuđa!\"",
  "30": "Hên c̆hŏh dak diêu ta măt Khua Yang, jêh hư̆n hên sŏk mŏng jra pơng ŏk dŏ ta bôk Khua Yang.",
  "31": "Jăng jai jêh hên mưč liê̆ Khua Yang, hên lĕh ao jhŭng băh săk jêh iên wêh lăm sŏh hư̆t ao Yang di, jêh hư̆n ndơp Khua Yang sak pŏng đĭn ta jhi tăm kăng.",
  "32": "Jăng jai du ta ling, Hên so ju nau nêh uôn Siren năn kăn jêng Simôn, hên mhăl kăn tung jhi tăm kăng Khua Yang.",
  "33": "Hên sak trôh ta tŭk nai năn jêng Gôlgôtha, lơ lang jêng \"Yôk ndŏh bôk.\"",
  "34": "Hên ăn Khua Yang ñêt nơm tăm lŭk ta dak gư̆n tăng, ƀê̆ dăh jăng jai jêh liêp, Khua Yang so khơñ ñêt.",
  "35": "Jêh hên pŏng Khua Yang ta jhi tăm kăng, hên tŏng phă blăh ao Khua Yang ta pơp tŏng đă,",
  "36": "Jêh hư̆n hên gŭk ta iên kăp gak Khua Yang.",
  "37": "Ta bôk Khua Yang, hên yông pơp kčŭt Khua Yang klăh iêu: \"Ho jêng Yêsu, mtao uôn lan Yuđa.\"",
  "38": "Mông hư̆n, mau bar nau nêh tlĕ nai pŏng băk Khua Yang, ju nau đăh ma jêh iên ju nau đăh kiêu.",
  "39": "Ŏk nêh sak găn truông ngĕh bôk mưč hêr Khua Yang,  ",
  "40": "klăh iêu: \"Hơi Yêsu, me jrăng lăm rai hih ƀư̆n jêh iên jrăng lăm ndŏk ĕh mŏng pei nar, ăn me tŏng tlĕh me tơm hi dlăng! Ndă me jêng Kuôn Yang Trôk, ăn me jư̆r băh jhi tăm kăng hư̆n.\"",
  "41": "Băl khua mhŏ yang ram wăt ta băl khua tơ-ti pơp bhiên jêh iên băl khua u rañ ăt hêr mưč Khua Yang klăh iên ya, Hên lăh:",
  "42": "\"Kăn lăm tlĕh nêh dêh ƀê̆ dăh so dơi lăm tlĕh săk kăn tơm. Kăn jêng mtao băl Israel, mông ho, yua kăn jư̆r băh jhi tăm kăng, jêh hư̆n kăh băn tip kăn.",
  "43": "Kăn knang ta Yang Trôk, hư̆n yơh mông ho lơi Yang Trôk lăm tlĕh kăn ndă Yang Trôk khơñ kăn. Bơ yơng kăn ngơi: \"Ăñ jêng Kuôn Yang Trôk.\"",
  "44": "Klăh iên ya, băl tlĕ nai pŏng đĭn băk Khua Yang ăt hên ngơi lăm prêñ Khua Yang.",
  "45": "Dŏng băh mông tal pro, pơp ngo măng guôm lĕ ju čar tăl trôh mông tal sư̆n. ",
  "46": "Năng ai mông tal sư̆n, Yang Yêsu ôr ju dŏ tĕh ngăn, klăh iêu: \"Ê-li, la-ma-sa-ƀăč-tha-ni?\" Lơ lang pơp ho jêng \"Wơ Yang Trôk ăñ ji, Wơ Yang Trôk ăñ ji, pơp mhŏ Yang Trôk ndrŏh ăñ?\"",
  "47": "Jăng jai băl ĕh dŏk mơñ ta iên hên tŏng pơp hư̆n, hên ngơi: \"Kăn kuôl Ê-li.\"",
  "48": "Mhăč rŏk, ju nau nêh mŏng hên dhul sak sŏk djhôp ñŭk mŏng dak srat, čư̆t ta bôk mŏng jêh hư̆n yơr ăn Khua Yang ñêt.",
  "49": "Băl hôm ta iên ngơi: \"Khiêp kăn hư̆n! Lơi iên răn, dlăng Ê-li sak lăm tlĕh kăn mdăh so.\"",
  "50": "Jêh hư̆n Yang Yêsu wêh ôr tĕh ju dŏ hư̆t jêh iên tôč nhăm.",
  "51": "Tŏ hư̆n, dhiêm ram mŏng hih ƀư̆n ĕh čriêk lăm ñjêng bar đăh dŏng băh tŏng tê̆ trôh mŏng sô̆, teh dih ĕh nggơ-nggăr jêh iên bôk mau čăh đang.",
  "52": "Tu môč ĕh pơk jêh iên ŏk săk jăn băl ƀrăh jêh khư̆t wêh dŏk brêh.",
  "53": "Ta kơi Khua Yang wêh brêh, hên du băh tu môč, sak mư̆t mŏng uôn ram brăh jêh iên lăm ƀlang ta ŏk nêh dơi so. ",
  "54": "Jăng jai kăn khua ka han jêh iên băl ka han gak Yang Yêsu hên so nggơ-nggăr tĕh jêh iên lĕ mơt bruă ĕh trôh, hên bhŭng tlŏh nŏh, hên ngơi: \"Nêh ho nư̆k ngăn jêng Kuôn Yang Trôk.\"",
  "55": "Ŏk băl u ur sak gre Yang Yêsu dŏng băh čar Galilê no di đru Khua Yang, hên gŭk ta iên dlăng băh wăč.",
  "56": "Mŏng hên hư̆n mau Mari Ma-dơ-len, Mari mei Yakơ jêh iên YôSep, wăt mei băl kuôn tlau Sêƀêđê di.",
  "57": "Trôh mông mho, mau ju nau nêh ndrŏng, năn kăn jêng Yôsep, băh Arimathê trôh, kăn tơm ăt jêh jêng ju nau ƀing kna Yang di.",
  "58": "Kăn sak tŏng tuôm ta Pilat dăn sŏk săk Yang Yêsu. Klăh iên, Pilat yua jao săk khư̆t ta kăn.",
  "59": "Yôsep sŏk săk khư̆t Khua Yang jêh iên sŏk mnal ƀrăh găl put,  ",
  "60": "Jêh hư̆n ăn săk khư̆t mŏng tu môč mhei kăn tơm, kăn phat tu hư̆n mŏng mau. Jêh hư̆n, kăn lơ lăm ju mlăm bôk mau ram ndăl ƀăng tu jêh iên kăn du.",
  "61": "Mari Madơlen jêh iên Mari dơ dêh mau măt ta iên, gŭk dlăng măt ta tu môč.",
  "62": "Nar ta kơi, jêng gĕh nar Prăp Mkra Pơp Găn, băl khua mhŏ yang ram jêh iên băl Pharisi tăm ƀư̆n ju băk sak tŏng tuôm kăn Pilat.",
  "63": "Hên ngơi: \"Wơ khua, hi kăh tôr klăh iêu, jăng jai kăn tlau huôk Yêsu hôm brêh kăn ngơi: \"Pei nar ta kơi, ăñ jrăng wêh brêh.\"",
  "64": "Hư̆n yơh, dăn khua ăn pơp dơi no di mau ka han gak kjăp tu môč tăl trôh nar tal pei, no di ơn băl ƀing kna kăn sak sŏk blăc̆ săk khư̆t kăn, jêh hư̆n hên ngơi ta uôn lan: \"Khua Yang jêh dŏk brêh băh tŭk khư̆t,\" jêh iên pơp huôk ta kơi ho jrăng ram hĭn ta pơp huôk luôr bôk lak.\"",
  "65": "Pilat ngơi ta hên: \"Pu me yua ka han sak gak yơh. Ăn pu me sak jêh iên gak kjăp tu môč hui si pơp mĭn pu me.\"",
  "66": "Hư̆n yơh hên sak, jêh iên gak kjăp nơn tu môc̆, hên ƀlĭt ră mtao ta bôk mau ƀăng tu jêh iên yua ka han gak. "
}