mnong_2020_mng_mlt_mat_book/mat/22.json

{
  "1": "Yang Yêsu wêh ngơi jêh iên yua pơp hơ-hôr tơ-ti ta hên klăh iêu:",
  "2": "Uôn Yang Trôk ndrơm klăh di ju nau mtao mkra pơp sông sa ta kuôn tlau kăn.",
  "3": "Mtao yua băl dư̆k sak lăm kăh lĕ mơt nêh jêh ndơm sak ta tŭk tăm sai, ƀê̆ dăh hên so sak.",
  "4": "Mtao wêh yua băl dư̆k dơ-dêh, tơ-tă klăh iêu: \"Ăn ngơi ta băl năč jêh ăñ ndơm: \"Dlăng ho, ăñ jêh prăp prê pơp sông sa. Ndrôk ram jêh iên ndrôk kuôn mă jêh mhŏ čĭ ru, grăp mta pơp jêh dăp dăng. Ăn sak tăm guôp sông sa.\"",
  "5": "Ƀê̆ dăh băl năč so đing nơn jêh iên du wăč, mau nêh sak mhŏ mir, ƀơ-ƀă lơh sa, ƀơ-ƀă tăč blŏ.",
  "6": "Mau băl dơ-dêh mơh hên ñư̆p băl dư̆k mtao di pŭ bang jêh iên lăm khư̆t.",
  "7": "Mtao hao nuih jêh iên yua ka han sak lăm khư̆t lĕ mơt băl djŏh ƀai jêh hư̆n jhu uôn hên.",
  "8": "Jêh hư̆n mtao ngơi ta băl dư̆k: \"Pơp sông sa jêh prăp prê, ƀê̆ dăh lĕ mơt băl ăñ ndơm hư̆n so năng.",
  "9": "Klăh iên, ăn pu me sak grăp truông mbăh jêh iên ndơm lĕ mơt nêh eh ndal ta pu me ăn mư̆t sông sa.",
  "10": "Băl dư̆k hư̆n sak grăp truông ram jêh iên tŏng ƀư̆n nêh tơm jêh hên tŏng tuôm, băl djŏh wăt băl găl. klăh iên dŭ sông sa bêng năč.",
  "11": "Ƀê̆ dăh jăng jai mtao mư̆t no di dlăng năč sông sa, mtao so ju nau nêh so sŏh ao kdrăp tăm sai.",
  "12": "Mtao lup kăn hư̆n: \"Wơ jôk, pơp mhŏ me mư̆t ta o, ƀê̆ dăh so me sŏh ao kdrăp tăm sai ôh?\" Ƀê̆ dăh kăn hư̆n gŭk miêt.",
  "13": "Jêh hư̆n mtao lăh ta băl dư̆k: \"Ăn čăp ti jŏng kăn ho jêh iên čĕ kăn mŏng tŭk ngo măng ta ling tŏ, tŭk jrăng mau pơp ôr ñim jêh iên kriêt sêk.",
  "14": "Bơ yơng ŏk nêh dơi kuôl, ƀê̆ dăh ƀê̆ nêh gĕh săč.",
  "15": "Mông hư̆n, băl Pharisi du băh iên jêh iên tŏng trông čhai mnăč no di dơi mblơm Yang Yêsu mŏng pơp Khua Yang ngơi.",
  "16": "Hên yua băl ƀing kna hên, ju băk ta băl gŭk tĭng ju Hêrôt sak tŏng tuôm ta Khua Yang, băl ĕh lup: \"Wơ Khua Yang, hi gư̆t ya Khua Yang jêng ngin ngăn jêh iên tơ-ti lăh truông ƀăng Yang Trôk di ta pơp kpă. Khua Yang so ăn pơp nai ngơi lăm mlih pơp Khua Yang tơ-ti, bơ yơng Khua Yang so phat dôih hui si pơp so ta ling kuôn nêh.",
  "17": "Hư̆n yơh, dăn ăn ta hi gư̆t đa lăh Khua Yang mĭn? Dơi tôh jia ta Sêsar mdăh so?\"",
  "18": "Ƀê̆ dăh Yang Yê su gư̆t pơp mĭn djŏh hên, hư̆n Khua Yang ngơi: \"Wơ băl pra mhŏ găl, pơp mhŏ pu me lông dlăng ăñ?\"",
  "19": "Ăn ta ăñ dlăng prăk tôh jia. Hên ndơp ta Khua Yang prăk ju đơniê.",
  "20": "Yang Yêsu lup hên: \"Nêh tơm rup jêh iên năn săk ho?\"",
  "21": "Hên têh: \"Kăn Sêsar di!\" Kơt iên Yang Yêsu ngơi ta hên: \"Ndă kơt iên, năn pơp kăn Sêsar ăn plŏ ta Sêsar, jêh iên năn pơp Yang Trôk di ăn plŏ ta Yang Trôk.\"",
  "22": "Jêh hên tŏng kơt iên, hên hơ̆ hă ngăn. Jêh hư̆n hên ndrŏh Khua Yang jêh iên hên du.",
  "23": "Ăt mŏng nar hư̆n, mau băl Sađusê jêng băl khăng ngơi so mau pơp wêh dŏk brêh, Sak mơñ Khua Yang jêh iên hên lup Yang Yêsu,",
  "24": "klăh iêu: \"Wơ Khua Yang, Môis tuôm tơ-ti; ndă ju nau nêh tlơ-tlau khư̆t ƀê̆ dăh so mau kuôn, ŏh kăn hư̆n jrăng sai ur mi kăn no di bă kuôn ta mi kăn di.",
  "25": "Mŏng mbar băl hi mau pŏh nau ŏh mi. Kăn mi bôk gŭk ur jêh hư̆n khư̆t ƀê̆ dăh so mau kuôn, hư̆n ñjêng lơi ur ta ŏh tal bar.",
  "26": "Nêh tal bar klăh iên ya, jêh hư̆n trôh nêh tal pei, tăl trôh ta nêh tal pŏh.",
  "27": "Trôh ta kơi, de u ur ăt khư̆t ya.",
  "28": "Klăh iên, mŏng nar wêh dŏk brêh, de u ur hư̆n jrăng jêng ur ta nêh tơm, mŏng pŏh nau ŏh mi hư̆n? Bơ yơng lĕ mơt hên jêh sai de ñjêng ur hên.\"",
  "29": "Yang Yêsu wêh ngơi ta hên klăh iêu: \"Pu me čhuai ru, yơng pu me so gư̆t pơp ngơi Yang Trôk, ăt so pu me wơng pơp myang Yang Trôk di.",
  "30": "Bơ yơng mông wêh brêh, kuôn nêh so hôm tŏng sai ƀă. Mlĭh ta iên, hên jrăng ndrơm klăh di băl myang tŏng trôk.",
  "31": "Bơ pơp wêh brêh băl khư̆t di, năng ai ñăm pu me dlăng pơp Yang Trôk ngơi ho, ngơi ta pu me lăh?",
  "32": "\"Ăñ jêng Yang Trôk kăn Abraham, Yang Trôk kăn Isăk, Yang Trôk kăn Yakôp. Yang Trôk jêng so gĕh Yang Trôk băl khư̆t di ƀê̆ dăh jêng Yang Trôk băl brêh di.\"",
  "33": "Jăng jai băl uôn lan iêt klăh iên, hên hơ̆ hă băh pơp tơ-ti lăh Khua Yang di.",
  "34": "Ƀê̆ dăh jăng jai băl Pharisi tŏng pĕh klăh iêu, Yang Yêsu jêh lăm dư̆t dơk băl Sađusê, hư̆n yơh hên tŏng ƀư̆n ju băk.",
  "35": "Ju nau mŏng băl hên, jêng khua tơ-ti pơp bhiên, lup Khua Yang ju mta no di lông dlăng Khua Yang.",
  "36": "\"Wơ Khua Yang, năn pơp tơ-tă ram ngăn mŏng pơp bhiên?",
  "37": "Yang Yêsu ngơi: \"Ăn me khăp ta Yang Trôk, jêng Yang Trôk me di, ta lĕ nuih nhăm, lĕ ngăt nhuôl jêh iên lĕ pơp mĭn me.\"",
  "38": "Hư̆n jêng pơp tơ-tă ram jêh iên yuôm ngăn ta lĕ mơt.",
  "39": "Ho jêng pơp tơ-tă tal bar ăt ndrơm klăh iên ya. \"Ăn me khăp ta nêh dơ-dêh ndrơm klăh di săk me tơm.\"",
  "40": "Lĕ mơt pơp bhiên jêh iên pơp têh luôr ăt knang băh bar pơp tơ-tă ho ya.",
  "41": "Mông hư̆n, jăng jai băl Pharisi hôm tŏng ngơi ndăng hên, Yang Yêsu lup hên ju mta.",
  "42": "Khua Yang lup: \"Đô̆ nă pu me mĭn ta Yang Krist? Nêh tơm kuôn Khua Yang jêng?\" Hên têh ta Khua Yang klăh iêu: \"Kuôn mtao Đavit.\"",
  "43": "Yang Yêsu wêh ngơi: \"Ndă kơt iên, pơp mhŏ Đavit mau Yang Ngăt Găl gŭk băk jêh iên kăn kuôl Krist jêng Yang, jăng jai kăn ngơi klăh iêu:",
  "44": "\"Yang ngơi ta Yang ăñ; ăn gŭk đăh ma Ăñ, tăl trôh mông Ăñ ăn băl rŏh kuôn mŏng sô̆ jŏng kuôn\"",
  "45": "Ndă Đavit kuôl Yang Krist jêng Yang, đô̆ nă Khua Yang dơi wêh ñjêng kuôn mtao Đavit?\"",
  "46": "So hôm ju nau nêh wêh ngơi ta Khua Yang ju mta pơp, jêh iên dŏng băh nar hư̆n, so mau ju nau nêh hôm năñ lup Khua Yang ôh."
}