mnong_2020_mng_mlt_mat_book/mat/10.json

{
  "1": "Yang Yêsu kuôl măt bar nâo băl ƀing kna Yang di trôh, jêh iên ăn ta băl hên pơp myang dơi proh yang djŏh no di proh ĕh du, jêh iên lăm bah lĕ mơ̆t pơp kuôp ji ta pơp quet viên. ",
  "2": "Ho jêng năn măt bar nâo băl ƀing kna. Luôr bôk, Simôn \"Nai krĕh kuôl jêng Pêtrôs.” Jêh iên Andrê oh kăn. Yakơ kuôn tlâo Xêbêđê ta Yôhan oh kăn di.",
  "3": "Philip ta Bathêlêmi,Thômas ta Mathiơ jêng nêh rưng jia Yakơ kuôn kăn Alphê, jêh iên Thađê.",
  "4": "Simôn Xêlôt ta Yuđa Iskariôt kăn ho jêng nêh jrăng lhiăr Khoa Yang.",
  "5": "Ho jêng măt bar nâo nêh Yang Yêsu yoa sak. Khoa Yang t’tă ta hên klăh iêu; “ Man sak truông eh ndơp tŭk băl uôn lan d’dêh gŭk, ăt so dơi sak mât mŏng uôn băl Samari.",
  "6": "Găl hĭn, ăn sak trôh ta pôl biêp suô̆ nga uôn băl Israel di.",
  "7": "Jăng jai oh mi sak, ăn têh sơm pơp ho; “Uôn Yang Trôk jêh mơñ ru.”",
  "8": "Ăn lăm bah nêh kuôp ji, lăm brêh nêh khât, lăm brah nêh dân lôt jêh iên proh yang djoh. Oh mi jêh dơn gai, hân yơ̆h ăn phă gai.",
  "9": "Man ñôt mah, kuông, mdah prak mŏng ƀap pu me.",
  "10": "Man ñôt k’dô jăng jai sak truông, mdah bar ao, jep, mdah mong jra, bơyơng nêh mhŏ brŏa năng dơi mâo pơp sông sa.",
  "11": "Grăp uôn ram mdah uôn đăm oh mi mât, ăn juôi nâo nêh găl ta tŭk hân jêh iên gŭk hih hên tal trôh nar oh mi jrăng du.",
  "12": "Tŭk hih oh mi dơi mât ăn dăn pơp đăp nang ta hih hân.",
  "13": "Ndă hih nai hân găl, pơp đăp nang oh mi di jrăng gŭk ta hên. Ƀê̆ dăh ndă hên so găl, pơp đăp nang oh mi di jrăng du ta oh mi tơm.      ",
  "14": "Ndă nêh tơm so ruôm oh mi mdăh so khơñ iêt pơp oh mi ngơi jăng jai oh mi du bah hih hên mdah uôn hên , ăn prô̆h ngôr ƀhŭl mŏng jŏng oh mi.",
  "15": "Ăñ ngơi ngăn ta oh mi, mŏng nar phat dôih, teh Sođôm ta Gômôrơ jrăng dơn pơp phat dôih nghơc̆ hĭn ta uôn hân. ",
  "16": "Dlăng tŏ hân, Ăñ jrăng yoa oh mi sak klah di biêp gŭk mŏng mbar pôl sâu r’hâo,hân yơ̆h ăn oh mi nă gei klah bê̆h jêh iên brăh găl nrơm sâm tơp.",
  "17": "Ăn ñjrăng ta kuôn nêh ! Bơyơng nai jrăng jao oh mi ta băl khoa phat dôih, jêh iên jrăng pŭ yat oh mi mŏng hih ƀân.",
  "18": "Jêh iên nai jrăng đoh ndơp oh mi trôh ta măt băl khoa kring jêh iên ta măt băl mtao bơyơng băh Ăñ, no di têh sơm ta hên wăt ta băl uôn lan c̆ar d’dêh.",
  "19": "Jăng jai nai nggruôn oh mi, man rung răng năn pơp jrăng ngơi mdah đô̆ nă ngơi, bơyơng năn pơp khơñ ngơi jrăng ăn ta oh mi mŏng mông hân.",
  "20": "Yơng so geh oh mi ô̆h jêng nêh ngơi, ƀê̆ dăh Yang Ngăt Găl Bap Ăñ ji, jêng Mtao jrăng ngơi un ta oh mi.",
  "21": "Mi jrăng jao ŏh ăn nai lăm khât, jêh iên bap jrăng  jao kuôn, Ŏh kuôn jrăng tăm dăng ta mei bap jêh iên ăn ta nai lăm khât hên.",
  "22": "Nai jrăng hao nuih ta oh mi yơng băh năn Ăñ. Ƀê̆ dăh nêh tơm dơi gĭr tal trôh tôc̆ dât, nêh hân jrăng dơi tleh.",
  "23": "Ndă nai pŭ yat oh mi mŏng uôn ho, ăn tuôt du ta uôn đah tŏ, yơng Ăñ ngơi ngăn ta oh mi, oh mi jrăng tuôt du ñăm lĕ grăp uôn băl Israel ôh ƀê̆ dăh luôr Kuôn Nêh trôh.",
  "24": "Ƀing kna ăt so ram hĭn khoa t’ti, nêh dâk ăt so ram hĭn nêh tơm hih.",
  "25": "Ƀing kna dơi nrơm khoa t’ti,nêh dâk dơi nrơm nêh tơm, dŏng iên djăp ru. Ndă kăn hih ăt nai kuôl Bêlsabul, ƀăh jai băl mŏng hih tui si hên khơñ kuôl!",
  "26": "Hân yơ̆h, man bhŭng hên, yơng so mâo ju mlăm pơp dơi lăm ndăp jrăng so dơi lăm pơl,  ăt so mâo ju mlăm pơp jêh srôm nai so dơi gât.  ",
  "27": "Pơp Ăñ ngơi ta oh mi mŏng tŭk ngo, ăn ngơi ta tŭk ang, jêh iên năn pơp oh mi tŏng muôc̆ mŏng tôr, ăn ngơi teh dơk tŏng dôn hih.",
  "28": "Man bhung băl lăm khât săk jăn bê̆ dah so dơi lăm khât ngăt nhuôl. Hân yơ̆h, ăn bhung Mtao dơi lăm rai lĕ ngăt wăt săk jăn mŏng  war iñ.",
  "29": "Geh ya! Bar mlăm sâm srai nai dơi blŏ c̆uôm gu ju lui prăk? Ƀê̆ dăh so mâo ju mlăm mŏng sâm hân eh lăc̆ mŏng teh Bap oh mi so dơi gât bă.",
  "30": "Tăl trôh ta sŏk tŏng bôk oh mi ăt jêh ngơp lĕ mơt ru.",
  "31": "Klah iên man bhung. Oh mi yuôm hĭn ta sâm srai.",
  "32": "Hân yơ̆h, nêh tơm têh sơm Ăñ ta măt kuôn nêh, Ăñ ăt jrăng têh sơm nêh hân ta măt Bap Ăñ tŏng trôk.",
  "33": "Bê̆ dăh nêh ơ̆ Ăñ ta măt kuôn nêh, Ăñ ăt jrăng ơ̆ nêh hân ta măt Bap Ăñ tŏng trôk.",
  "34": "Man mĭn Ăñ trôh no di ndơp pơp  đăp nang ta dôn teh. Ăñ trôh so ndơp pơp đăp nang, ƀê̆ dăh ñôt đao gưm.",
  "35": "Yơng Ăñ trôh no di ăn kuôn tlâo tăm dăng ta bap, kuôn u’ur tăm dăng ta mei, mŏ măn tăm dăng ta mei sai.",
  "36": "Băl mŏng hiu hên tơm jrăng jêng roh ta hên tơm.",
  "37": "Nêh tơm khăp bap mdah mei ŏk hĭn ta Ăñ nêh hân so năng ta Ăñ. Nêh tơm khăp kuôn tlâo mdah kuôn u'ur ŏk hin̆ ta Ăñ ăt so năng ta Ăñ ya.",
  "38": "Nêh tơm so tung jhi tăm kăng kăn jêh iên hui gre Ăñ ăt so năng ta Ăñ.",
  "39": "Nêh tơm juôi pơp brêh tơm jrăng nga ĕh. Bê̆ dăh nêh nga pơp brêh tơm yơng băh Ăñ jrăng dơi so eh.",
  "40": "Nêh tơm ruôm oh mi ăt nrơm klăh di ruôm Ăñ, jêh iên nêh tơm ruôm Ăñ ăt nrơm klăh di ruôm Mtao yoa Ăñ.",
  "41": "Nêh tơm ruôm khoa têh luôr yơng nêh hân jêng nêh têh luôr jrăng dơn pơp khôm nêh tơm têh luôr di, jêh iên, nêh tơm ruôm nêh kpă yơng nêh kpă jrăng dơi dơn pơp khôm nêh kpă di.",
  "42": "Nêh tơm ăn ta ju nâo mŏng băl ku sei dêt ho ñêt ju ka c̆ok dak ic̆, bơ yơng nêh hân jêng bing kna Ăñ ji, Ăñ ngơi ngăn ta oh mi, nêh hân klă ngăn yơ̆h jrăng so nga pơp khôm kăn di."
}