mnong_2020_mng_mlt_mat_book/mat/5.json

{
  "1": "Jăng jai Yang Yêsu so uôn lan ŏk, Khua Yang sak tŏng čơng yôk, Trôh ta iên Khua Yang gŭk mŏng sô̆, jêh hư̆n băl ƀing kna trôh ta tŭk Khua Yang.",
  "2": "Khua Yang pơ̆k dơk jêh iên tơ-ti hên blăh iêu:",
  "3": "Găl jôn ta nêh ƀun knap mŏng ngăt nhuôl, bơ yơng uôn Yang Trôk jêng hên di.",
  "4": "Găl jôn ta nêh ñim biêk, bơ yơng hên jrăng dơi dơn pơp jôh lih.",
  "5": "Găl jôn ta nêh lŭa gŭ, bơ yơng hên jrăng dơi dơn teh.",
  "6": "Găl jôn ta nêh hêr nguôt pơp kpă, bơ yơng hên jrăng dơi hơm le.",
  "7": "Găl jôn ta nêh gư̆t tŏng đac̆, bơ yơng hên jrăng dơi dơn pơp đac̆.",
  "8": "Găl jôn ta nêh ƀrăh ngôr mŏng nuih nhăm, bơ yơng hên jrăng so Yang Trôk.",
  "9": "Găl jôn ta nêh lăm găl, bơ yơng nai jrăng kuôl hên jêng kuôn Yang Trôk.",
  "10": "Găl jôn ta nêh nai mhŏ djŏh yơng băh pơp kpă, bơ yơng uôn Yang Trôk thêm ta hên.",
  "11": "Găl jôn ta ŏh mi jăng jai nai ngơi djŏh jêh iên nai mhŏ ƀai ta ŏh mi, wăt nai mbư̆t djăp pơp tih mblư̆ ta ŏh mi yơng băh ăñ.",
  "12": "Ăn c̆hô̆ gai jêh iên brơn mơn, bơ yơng pơp khôm ŏh mi di tŏng trôk ram ngĭn ngăn. Yơng nai jêh mhŏ djŏh ƀai ta tơm têh luôr lak ndrơm ŏh mi ya.",
  "13": "Ŏh mi jêng buôh ta teh dih. Ƀê̆ dăh, ndă buôh nga pơp tiêt, đô̆ nă dơi wêh lăm ñjêng ĕh no mau pơp tiêt? Ĕh so hôm yuôm ta lĕ broă ôh, nai jrăng čĕ ta ling jêh iên nai jrăng juôt ta jŏng.  ",
  "14": "Ŏh mi jêng pơp ang dôn teh di. Ƀơn uôn ram gŭk ta dôn yôk ĕh so dơi lư̆m ndăp ƀă.",
  "15": "Ăt so mau nêh jhu iñ kđen jêh iên ăn mŏng sô̆ mang ŭng, ƀê̆ dăh jrăng ăn tŏng tê̆ ndŏng iñ, no di đang ang ta lĕ mơt nêh mŏng hih.",
  "16": "No di ăn pơp ang oh mi đang ta măt nai, čiêng ta hên so bruă găl oh mi di jêh iên nơ-nei ta Bap oh mi tŏng Trôk.",
  "17": "Man mĭn ôh Ăñ trôh no di lăm rai pơp bhiên mdăh pơp têh luôr; Ăñ trôh so geh lăm rai, ƀê̆ dăh c̆iêng lăm nâk.",
  "18": "\tYơng Ăñ ngơi ngăn ta oh mi, ndă di trôk jêh iên tĕh ñăm tôc̆ dât, so mâo ƀơn têl mdăh ju nê̆ mŏng pơp bhiên jêh gao, tăl trôh lĕ mơt pơp dơi lăm jêh.",
  "19": "\tKlăh iên, nêh tơm mhŏ tih dŏng nê̆ mŏng pơp bhiên ho, jêh iên tơ-ti nêh dơ-dêh mhŏ blăh iên jrăng ngơp kuôn nê̆ ngăn mŏng čar Yang Trôk, Ƀê̆ dăh nêh tơm ñôt kjăp pơp bhiên hân jêh iên tơ-ti ta nêh dơ-dêh nêh hân jrăng dơi ngơp jêng ram mŏng čar Yang Trôk.",
  "20": "Yơng Ăñ lăh ta oh mi gât, ndă di pơp kpă oh mi so gao hĭn ta pơp kpă khoa tơm tơ-ti pơp bhiên ta băl Pharisi, iên ngăn oh mi jrăng so dơi mât mŏng čar Yang Trôk.   ",
  "21": "\tOh mi tuôm tŏng ya pơp băl đưm tơ-ti lăh: \"Me so dơi lăm khât nêh, jêh iên nêh tơm lăm khât nêh jrăng dơn pơp phat dôih.\"",
  "22": "\tɃê̆ dăh ăñ ăn oh mi gât klăh iêu, nêh tơm hao nuih ta oh mi tơm jrăng dơn pơp phat dôih; nêh ngơi ta oh mi tơm: \"Băl so yuôm\" năng ta nai phat dôih, jêh iên nêh tơm ngơi: \"Băl plâp\" năng ta nai čĕ mŏng war iñ.",
  "23": "\tKơt iên, ndă oh mi jăng jai yơr pơp mhŏ yang ta jhưng mhŏ yang, mông hân bhŏng kăh tôr ta ju nâo oh mi mâo pơp so găl ta tơm,",
  "24": "Ăn ndrŏh pơp yơr hân ta măt jhưng mhŏ yang, luôr hân ăn sak lăm găl ta oh mi hân, jêh iên sak yơr pơp mhŏ yang.",
  "25": "\tĂn sak lăm găl gơñ ta nêh tơm kčŭt oh mi jăng jai oh sak băk nêh hân trôh ta tŭk phat dôih. Ndă so, nêh kčŭt oh mi jrăng jao oh mi ta băl phat dôih, jêh iên băl phat dôih jrăng jao ta ka han, jêh hân oh mi jrăng gŭk mŏng war.",
  "26": "\t\tĂñ ngơi ngăn ta oh mi, oh mi jrăng so dơi du băh war tăl trôh mông jêh tăm lĕ nŏh nuôn nai.",
  "27": "\tOh mi tuôm tŏng ya pơp tơ-ti klăh iêu: \"Man mhŏ tih dŏng târ.\"",
  "28": "Ƀê̆ dăh ăñ ăn oh mi gât klăh iêu: \"Nêh rŭng ju nâo u ur jêh iên khơñ mhŏ tih ta de, hân jêng jêh mhŏ tih dŏng târ ta de mŏng nuih nhăm ru.\"",
  "29": "\tNdă măt đăh ma lăm ndơp oh mi ta pơp tih, ăn liêk lat jêh iên čĕ ĕh du wăč băh oh mi. Yơng găl hĭn ju khăn săk jăn oh mi di rai lêk, ta nâm săk jăn oh mi di nai cĕ mŏng war iñ.",
  "30": "\tNdă plang ti ma ndơp oh mi mhŏ tih, ăn ndăč lat ĕh jêh iên čĕ wăč băh oh mi. Yơng găl hĭn ju khăn săk jăn oh mi rai lêk, ta nâm săk jăn oh mi di so mât mŏng war iñ.",
  "31": "Ăt mâo pơp tơ-ti: \"Nêh tơm ndrŏh ur, jrăng ăn ta de ju pŏk ră tŏng ndrŏh.\"",
  "32": "\tɃê̆ dăh, ăñ ăn oh mi gât klăh iêu: Nêh tơm ndrŏh ur \"so ngơp ôh pơp mhŏ tih dŏng târ\" kăn yơh lăm ñjêng de jêng nêh tih dŏng târ. Jêh iên, nêh gŭk de jêh nai ndrŏh hân, ăt mhŏ tih dŏng târ ya.  ",
  "33": "\tĂt oh mi tuôm tŏng ya pơp băl đưm tơ-ti: \"Man ƀuăn huôk, ăn ñôt kjăp pơp ƀuăn băn di ta Yang Trôk.\"",
  "34": "\tɃê̆ dăh, ăñ ăn oh mi gât, ei ru kăt săk ôh; Man kăt săk ta trôk, yơng trôk jêng jhưng Mtao Yang Trôk di.",
  "35": "\tMan kăt săk ta tĕh, yơng tĕh jêng tŭk djruông jŏng Yang di. Man kăt săk ta uôn Yêrusalem, yơng uôn hân jêng uôn mtao ram di.",
  "36": "\tMan kăt săk ta bôk tơm, yơng oh mi so dơi lăm ñjêng ju mlăm sei sŏk jêng buôk mdăh jŭ.",
  "37": "Ƀê̆ dăh ăn oh mi ngơi \"Mâo ngơi mâo\" mdăh \"So ngơi so.\" Lĕ mơt pơp dơ-dêh mbăč ta iên jêng trôh băh yang djŏh.",
  "38": "\tOh mi tuôm tŏng ya pơp ngơi: \"Măt čiu măt, sêk čiu sêk.\"",
  "39": "\tɃê̆ dăh, ăñ ngơi no di oh mi gât, man tăm dăng ta băl ƀai. Mlih ta iên, nêh tap môk đăh ma oh mi jêh iên ăn rŏk môk đăh tŏ ta kăn.",
  "40": "\tNdă nêh tơm khơñ kčŭt oh mi ta băl phat dôih čiêng sŏk ao ta ling oh mi di, ăn ta kăn sŏk rŏk ao mŏng nuông.",
  "41": "\tNêh tơm mhăl oh mi sak ju wang truông, ăn sak băk nêh hân bar wang.",
  "42": "\tĂn ta nêh tơm lup dăn pơp oh mi, jêh iên ei ru mhŏ ñjră ta nêh tơm khơñ čan pơp oh mi.",
  "43": "Oh mi tuôm tŏng ya pơp ngơi: \"Ăn khăp khơñ ta nêh kiêu ma me, jêh iên hao nuih ta băl rŏh me.\"",
  "44": "\tɃê̆ dăh ăñ ngơi ta oh mi, ăn khăp ta băl rŏh oh mi di, jêh iên kuôl dăl ta băl mhŏ ƀai ta oh mi.",
  "45": "\tNo di oh mi dơi ñjêng kuôn Bap băn gŭk tŏng trôk. Yơng Yang Trôk ăn nar Yang di đang ta nêh djoh wăt nêh găl, jêh iên ăn mih ta nêh kpă wăt ta nêh tih.",
  "46": "\tNdă di oh mi khăp čuôm gu ta nêh khăp oh mi, kơt iên năn pơp khôm oh mi dơi dơn? Geh ya! Băl rư̆ng jia ăt hên mhŏ blăh iên? ",
  "47": "\tNdă oh mi čuôm gu kôh ta oh mi tơm, kơt iên oh mi tŭk mâo pơp gao hĭn ta nêh dêh? geh ya! Băl uôn lan dơ-dêh ăt hên mhŏ blăh iên ya?",
  "48": "\tHân yơh, ăn oh mi jêng nâm nơn, ndrơm Bap tŏng trôk oh mi di jêng nâm nơn."
}