mnong_2020_mng_mlt_mat_book/mat/9.json

{
  "1": "Jêh mư̆t mŏng plŭng, Khua Yang găn gao dak sĭ, jêh iên du ta uôn tơm.",
  "2": "Tŏ hư̆n, nai ndơp trôh ta Khua Yang ju nau nêh wiên jăng jai bê̆ ta bêl. Jêh Yang Yêsu so pơp đăo hên, Khua Yang ngơi ta nêh wiên: “Wơ kuôn, ăn kjăp nuih nhăm. Pơp tih me jêh đač ru.\"",
  "3": "Jêh iên tŏ hư̆n, mau nêh mŏng băl khua tơ-ti pơp bhiên hên tŏng ngơi: \"Nêh ho ngơi mgao ta Yang Trôk.\"",
  "4": "Yơng gư̆t ru pơp mĭn hên di, Yang Yêsu ngơi: \"Pơp mhŏ pu me mau pơp mĭn djŏh mŏng nuih nhăm pu me klăh iên?\"",
  "5": "Bơ yơng năn pơp ĕh lưih hĭn ngơi: 'Pơp tih me jêh đač ru,' mdăh ngơi: 'Ăn dŏk jêh iên djhoang sak'?",
  "6": "Ƀê̆ dăh no di pu me gư̆t klăh iêu Kuôn Nêh mau pơp dơi đač pơp tih mŏng dôn tĕh\" mŏng mông hư̆n rŏk, Khua Yang ngơi ta nêh wiên: \"Ăn dŏk, ñôt bêl jêh iên du ta hih me tơm.\"",
  "7": "Jêh iên nêh wiên dŏk tŏng tê̆, kăn du ta hih kăn tơm.",
  "8": "Jăng jai uôn lan so klăh iên, hên hơ̆ hă jêh iên nơ-nei Yang Trôk, bơ yơng ăn ta kuôn nêh pơp myang klăh iên.",
  "9": "Jêh du băh iên, Yang Yêsu so ju nau nêh năn kăn Mathiơ, jai gŭk mŏng hih rư̆ng jia, jêh hư̆n Khua Yang ngơi ta kăn: \"Jơ̆ gre ăñ.\" Jêh iên kăn dŏk brič kăn gre Khua Yang.\"",
  "10": "Bruă ĕh trôh jăng jai Yang Yêsu gŭk sông sa mŏng hih, jêh iên tŏ hư̆n, ŏk ngăn băl rư̆ng jia jêh iên băl tih djŏh trôh ta iên, hên gŭk sông sa jhưng băk Yang Yêsu wăt băl ƀing kna Khua Yang.",
  "11": "Jăng jai so klăh iên, băl Pha-ri-si ngơi ta băl ƀing kna Khua Yang: “Pơp mhŏ khua pu me sông sa ju băk băl rư̆ng jia wăt ta băl tih djŏh hư̆n?”",
  "12": "Ƀê̆ dăh jêh Khua Yang tŏng, Khua Yang ngơi: “So mau nêh prăl ktang ôh knang ta nai dak gư̆n, ƀê̆ dăh nêh kuôp ji kăh knang.",
  "13": "Ƀĕ dăh jêh du băh iên, ăn pu me riêm đă lăh pơp ngơi ho: ‘Ăñ khơñ nuih nhăm gư̆t tŏng đač, so geh pơp mhŏ yang ôh.' Bơ yơng ăñ trôh ta o so mau  kuôl nêh kpă, ƀê̆ dăh kuôl nêh tih djŏh!’”",
  "14": "Mông hư̆n băl ƀing kna kăn Yôhan ƀap-tit sak tŏng tuôm Khua Yang, ngơi klăh iêu: “Pơp mhŏ hi ta băl Pha-ri-si khăng ngăl sông sa, ƀê̆ dăh ƀing kna Khua Yang so mau ngăl sông sa?”",
  "15": "Yang Yêsu ngơi ta hên: “Thơp ya băl găp mi nai sak čhưn mŏng tŭk tăm sai hên ênguôt jăng jai kăn tlĕ hôm gŭk băk hên lăh? Ƀê̆ dăh trôh mông nai sŏk kăn tle hư̆n băh hên, mông hư̆n kăh hên ngăl sông sa.",
  "16": "Gao băh iên, so mau nêh rư̆m ju nhêč mnal mhei ñăm rai mbôl tŏng ao yau, bơ yơng mnal mhei hư̆n ĕh jrăng lăm čriêk ao yau, jêh iên tŭk sat hư̆n dlăng ĕh djŏh hĭn ya. ",
  "17": "Ăt so mau nêh tôh nơm mhei mŏng nhông tau yau ya. Ndă di mhŏ kơt iên, nhông ĕh jrăng đhang, nơm ĕh mañ ta ling jêh iên nhông jrăng čăh. Mlih ta iên nai tôh nơm mhei mŏng nhông tau mhei, hư̆n kăh dơi răng kriê lĕ bar mta hư̆n.”",
  "18": "Jăng jai Yang Yêsu ngơi ta hên pơp hư̆n, tŏ hư̆n, mau ju nau nêh kĕ kriê hih ƀư̆n sak mơñ ta iên, kăn čuôn krŭng ta măt Khua Yang, kăn ngơi klăh iêu: “Kuôn ur ăñ mhei khư̆t, ƀê̆ dăh dăn Khua Yang sak ta iên, bi ti tŏng săk jăn ĕh no di ĕh wêh brêh!”",
  "19": "Jêh hư̆n Khua Yang dŏk tŏng tê̆, Yang Yêsu wăt băl ƀing kna Yang di sak hui gre kăn.",
  "20": "Jêh iên tŏ hư̆n, mau ju nau u ur ĕh huôr mham trôh ta măt bar năm ru, de sak băh kơi Khua Yang, de bi tŏng tiêng ao Khua Yang.",
  "21": "Yơng de mĭn: \"Ndă čuôm gu dơi ăñ bi ta tiêng ao Yang di, ăñ jrăng dơi băh ya.\"",
  "22": "Ƀê̆ dăh jai wiêng măt iêu kơi jêh iên so nêh u ur hư̆n, Yang Yêsu ngơi: “Wơ kuôn, ei ru bhŭng; pơp đăo e jêh ĕh lăm băh e.\" Jêh iên Trĭp mŏng mông hư̆n rŏk nêh u ur hư̆n băh pơp ji. ",
  "23": "Jêh hư̆n Yang Yêsu, sak trôh ta hih nêh kĕ kriê hih ƀư̆n hư̆n jêh iên so băl ôh nŭng wăt băl pôl ŏk mhŏ sư̆k rư̆k păt iên, ",
  "24": "Khua Yang ngơi: “Ăn pu me du ta ling tŏ, bơ yơng de bô̆ ho so mau khư̆t ƀă, ƀê̆ dăh de bê̆ gu.\" Jêh hư̆n hên mưč Khua Yang.",
  "25": "Ƀê̆ dăh, jêh trơh băl hư̆n du ta ling, Khua Yang mư̆t mŏng tŏ, Khua Yang kŏng ti kuôn sei, jêh iên kuôn u ur hư̆n dŏk tŏng tê̆ rŏk.” ",
  "26": "Pơp ho nai têh sơm tar ƀar mŏng čar hư̆n. ",
  "27": "Jăng jai Yang Yêsu du băh iên, mau bar nau nêh tiêh măt gre Khua Yang, hên ôr jêh iên ngơi klăh iêu: “Wơ kuôn mtao Đawit, dăn đač hi ƀă!”",
  "28": "Jêh Khua Yang mư̆t mŏng hih, bar nau nêh ngo măt sak trôh ta Khua Yang, jêh iên Yang Yêsu ngơi ta hên: “Pu me đăo ya, ăñ dơi mhŏ bruă  hư̆n?” Hên ngơi ta Khua Yang: “Wơ Khua Yang, hi đăo!”",
  "29": "Jêh hư̆n, Khua Yang bi tŏng măt hên, ngơi klăh iêu: “Bruă ĕh jrăng trôh ta pu me hui si pơp đăo pu me di” ",
  "30": "Măt hên ang rŏk, jêh iên Yang Yêsu tơ-tă kñăm hên, klăh iêu: “Ăn pu me gŭk miêt, so dơi pu me têh ta nai ôh!”",
  "31": "Ƀê̆ dăh jêh gu hên du ta ling, hên têh bruă hư̆n tar ƀar mŏng čar hư̆n.",
  "32": "Mông hư̆n, jăng jai hên du băh iên, tŏ hư̆n, nai sak ndơp ta Khua Yang ju nau nêh mblo yang djŏh mư̆t.",
  "33": "Jêh Khua Yang suôt yang djŏh, nêh mblo dơi ngơi, jêh iên băl uôn lan so pơp hư̆n ndrơh ngăn, ngơi klăh iêu: “Ñăm tuôm so ôh bruă klăh iêu mŏng băl Israel.”",
  "34": "Ƀê̆ dăh băl Pha-ri-si ngơi klăh iêu: “Kăn trơh čak kăn knang ta khua čak”",
  "35": "Yang Yêsu sak lĕ mơt grăp uôn ram wăt uôn đăm, tơ-ti lăh băl uôn lan mŏng grăp hih ƀư̆n, lơ-lang pơp găl uôn Yang Trôk jêh iên lăm băh djăp mta pơp kuôp ji wăt grăp pơp djŭp dư̆r.",
  "36": "Jăng jai Khua Yang so băl uôn lan ŏk, Khua Yang tlŏng đač ta hên, bơ yơng jai hên tŭ pơp nai mhŏ jhat, jêh iên ndrăh ndrêng klăh di biêp so mau nêh kĕ. ",
  "37": "Jêh hư̆n, Khua Yang ngơi ta băl ƀing kna Khua Yang: “Wăt di lăh dơm riêk jêh trôh, ƀê̆ dăh nêh riêk so ŏk. ",
  "38": "Kơt iên, ăn dăn ta Khua dơm riêk no di Khua Yang yua nêh riêk sak trôh mŏng dơm riêk Yang di."
}