mnong_2020_mng_mlt_mat_book/mat/8.json

{
  "1": "Mông hư̆n, jăng jai Khua Yang jư̆r băh yôk, mau ŏk nêh uôn lan sak gre Khua Yang.",
  "2": "Tŏ hư̆n, mau ju nau nêh dư̆n lôt sak  ta iên, čuôn krŭng ta măt Khua Yang, ngơi: \"Wơ Khua Yang, ndă Khua Yang khơñ, Khua Yang ăt dơi lăm ƀrăh ăñ.\"",
  "3": "Jêh hư̆n Khua Yang yơr ti, bi ta săk kăn, ngơi: \"Ăñ khơñ! Ăn ƀrăh gơñ.\" Mông hư̆n rŏk, kăn dơi ƀrăh lĕ mơt dư̆n lôt kăn.",
  "4": "Jêh hư̆n Yang Yêsu ngơi ta kăn: \"Ăn me kăh, man têh pơp ho ta nai ôh. Ƀê̆ dăh ăn sak lăm ƀlang me tơm ta khua mhŏ yang jêh iên ăn myơr pơp mhŏ yang tui si pơp jêh kăn Mô-ih tơ-tă, klăh di ju mta pơp lăm nư̆k ta hên.\"",
  "5": "Mông hư̆n, jêh Khua Yang mư̆t mŏng uôn ram Ka-pe-na-um, mau ju nau khua ka han sak tŏng tuôm ta Khua Yang, kăn dăn ta Khua Yang",
  "6": "Klăh iêu: “Wơ Khua Yang, dư̆k ăñ ji ĕh wiên bê̆ mŏng hih, ji kôr kjham ngăn.\"",
  "7": "Yang Yêsu ngơi ta kăn: “Ăñ jrăng sak lăm băh kăn!”",
  "8": "Kăn khua ka han wêh lăh klăh iêu: “Wơ Khua Yang, ăñ jêng nêh so năng no di drông Khua Yang mư̆t mŏng hih ăñ ôh, ƀê̆ dăh băh gu dăn Khua Yang ngơi ju dơk gu, jêh iên dư̆k ăñ jrăng băh rŏk.",
  "9": "Bơ yơng ăñ tơm ăt jêng nêh gŭk mŏng sô̆ pơp dơi nêh dơ-dêh, mŏng sô̆ pơp dơi ăñ, ăt mau băl ka han ya. Ăñ ngơi ta kăn ho; ‘Ăn me sak,’ jêh iên kăn sak, ngơi ta kăn tŏ: ‘Ăn me du,’ jêh iên kăn  du, jêh iên ndă ăñ tơ-ti hên: ‘Ăn mhŏ bruă ho,’ hên mhŏ rŏk.”",
  "10": "Ƀê̆ dăh jêh Yang Yêsu tŏng pơp hư̆n, Khua Yang dlăng ndrơh ngăn jêh iên Khua Yang ngơi ta băl hui gre Khua Yang: ‘Ngĭn ngăn ăñ ngơi ta ŏh mi, ñăm tuôm ăñ so băh ju nau nêh mŏng băl Israel mau pơp đăo ram klăh iên.",
  "11": "Ƀê̆ dăh, ăñ ngơi ta ŏh mi klăh iêu jrăng mau ŏk nêh băh đăh nar lôh wăt băh đăh nar ñăp, jêh hư̆n hên jrăng gŭk sông sa ju băk kăn Abraham, kăn Isăk, jêh iên kăn Yakôp mŏng čar Yang Trôk.",
  "12": "Ƀê̆ dăh băl ŏh kuôn mŏng čar hư̆n nai jrăng čĕ mŏng tŭk ngo măng ta ling, ta iên jrăng mau pơp ôr ñim jêh iên krêt sêk.’”",
  "13": "Jêh hư̆n Yang Yêsu ngơi ta khua ka han: “Ăn me du yơh! Hui si pơp me đăo ĕh jrăng ñjêng ta me klăh iên.\" Jêh iên dư̆k kăn hư̆n ăt băh mŏng mông hư̆n ya.",
  "14": "Jêh hư̆n Yang Yêsu mư̆t mŏng hih kăn Pê-trôih, Khua Yang so mei ur kăn Pê-trôih piêm kuôp kăt jêh iên bê̆ tŏng jhưng. ",
  "15": "Khua Yang bi tŏng ti de jêh iên pơp kuôp kăt de ĕh nga rŏk, jêh hư̆n de dŏk jêh iên mhŏ bruă drông Khua Yang. ",
  "16": "Mông hư̆n, trôk jêh ngo sơ sêu ru, nai sak ndơp ŏk nêh čak lơh ta Khua Yang, Khua Yang trơh čak hư̆n ta pơp ngơi jêh iên lăm băh lĕ mơt nêh mau pơp kuôp ji ya. ",
  "17": "No di dơi ĕh lăm nư̆k pơp băh nêh têh luôr Êsai ngơi klăh iêu: “Khua Yang tơm jrăng sŏk lat pơp djhup dư̆r băn jêh iên tung añ pơp kuôp ji băn.”",
  "18": "Mông hư̆n rŏk, Yang Yêsu so ŏk mŏk băl uôn lan hên gŭk jư̆m dar Khua Yang, Yang Yêsu yua sak găn hang đăh tŏ. ",
  "19": "Jêh hư̆n mau ju nau khua tơ-ti pơp bhiên sak ta iên, ngơi ta Khua Yang: “Wơ Khua Yang, ăñ jrăng hui gre Khua Yang grăp tŭk Khua Yang sak.”",
  "20": "Yang Yêsu ngơi ta kăn: “Pik ĕh mau trôm, jêh iên sư̆m ĕh mau suôn, ƀê̆ dăh Kuôn Nêh so mau tŭk no di Khua Yang kơl bôk.”",
  "21": "Wêh mau ya ju nau nêh dơ-dêh mŏng băl ƀing kna ngơi ta Khua Yang: “Wơ Khua Yang, luôr hĭn dăn Khua Yang ăn ăñ du jêh iên tăp bư̆l bap ăñ răn.”",
  "22": "Ƀê̆ dăh Yang Yêsu ngơi ta kăn: “Ăn me gre ăñ, jêh iên lơi băl khư̆t hên tăp nêh khư̆t.”",
  "23": "Jêh hư̆n Khua Yang jư̆r mŏng plŭng, băl ƀing kna Khua Yang, sak băk Khua Yang.",
  "24": "Tŏ hư̆n, măp gu mau čal ŭ ram ĕh dŏk băh dak sĭ, tăl yak dak ĕh rŏng krăm plŭng, ƀê̆ dăh mông hư̆n Khua Yang jai bê̆. ",
  "25": "Jêh hư̆n băl ƀing kna sak mơñ, hên le Khua Yang ngĕh, hên ngơi: “Wơ Khua Yang, dăn Khua Yang lăm tlĕh hi ƀă, hi jrăng khư̆t yơh ho!”",
  "26": "Jêh hư̆n Khua Yang ngơi ta hên: “Wơ băl ƀê̆ pơp đăo, pơp mhŏ ŏh mi bhŭng?” Jêh hư̆n Khua Yang dŏk tŏng tê̆ Khua Yang ôt čal ŭ wăt dak sĭ, jêh hư̆n trôh pơp nge ngêt. ",
  "27": "Bơ băl hư̆n hên dlăng ndrơh snăk hên tŏng ngơi: “Năn nêh ho jêng, tăl ta čal ŭ wăt ta dak sĭ ăt ĕh gưt kăn ya?",
  "28": "Jêh Yang Yêsu gao ta hang dak đăh tŏ, sak ta wăl Ga-đa-ra, mau bar nau nêh yang djŏh mư̆t sak tŏng tuôn ta Khua Yang, hên răn băh tu môč tŏ, môh măt hên đhir khĕ, tăl so mau ju nau nêh năñ sak găn truông hư̆n ôh. ",
  "29": "Tŏ hư̆n, băl ĕh ôr, klăh iêu: “Wơ Kuôn Yang Trôk, năn pơp ĕh mau hi ta me hư̆n? Me sak ta o no di lăm knap hi luôr ta mông kčăh lăh?”",
  "30": "Mông hư̆n, mau ju pôl sư̆r ŏk jăng jai ĕh sa băt ĕh gŭk wăč băh hên.",
  "31": "Ƀê̆ dăh, pôl yang djŏh ĕh dăn ta Khua Yang Yêsu, klăh iêu: “Ndă Khua Yang prŏh hi, dăn Khua Yang ăn hi mư̆t mŏng pôl sư̆r tŏ.”",
  "32": "Khua Yang ngơi ta ĕh: “Sak gơñ!\" Jêh hư̆n yang djŏh du băh băl hư̆n ĕh mư̆t mŏng pôl sư̆r; jêh iên mhăč rŏk, lĕ ju pôl sư̆r ĕh tuôt băh hang tê̆ iêu mŏng dak sĭ sô̆, jêh iên ĕh krăm khư̆t mŏng dak. ",
  "33": "Mông hư̆n, đơ băl kĕ sư̆r, hên tuôt du, jêh iên hên du hih têh sơm lĕ mơt bruă ĕh trôh hư̆n mŏng uôn ram tŏ, wăt ta bruă bar nau băl yang djŏh mư̆t hư̆n ya. ",
  "34": "Jêh hư̆n mhăč rŏk, lĕ ju uôn ram hên sak no di tŏng tuôm ta Khua Yang Yêsu. Jăng jai hên so Khua Yang, hên ghă Khua Yang no di du lat băh čar hên. \n\n"
}