mnong_2020_mng_mlt_mat_book/mat/18.json

{
  "1": "Mŏng mông hư̆n, băl ƀing kna sak trôh ta Yang Yêsu, lup: \"Nêh tơm jêng ram ngăn mŏng uôn Yang Trôk o tlak?\"",
  "2": "Jêh hư̆n Khua Yang kuôl ju nau ku sei sak ta Khua Yang, Khua Yang ăn kăn gŭk mŏng mbar hên,",
  "3": "Jêh iên ngơi: \"Ngĭn ngăn, ăñ ngơi ta pu me, Ndă so pu me mlih pơp brêh jêh iên ñjêng ndrơm klăh ku sei ho, so dơi pu me mư̆t mŏng uôn Yang Trôk ƀă. ",
  "4": "Hư̆n yơh, nêh tơm lăm rôč săk tơm ndrơm ku sei ho, nêh hư̆n jêng ram hĭn mŏng Uôn Yang Trôk.",
  "5": "Ndă nêh tơm sŏk năn ăñ ruôm ju nau ku sei dêt klăh iêu, hư̆n jêng nêh ruôm ăñ.",
  "6": "Ƀê̆ dăh nêh tơm lăm păk bông ta ju nau nêh mŏng băl ku sei ho, hư̆n jêng nêh jêh đăo ta ăñ, găl hĭn ta nêh hư̆n, nai sŏk ju mlăm păl ăn ble hĕ nai kăt tŏng ko kăn, jêh hư̆n nai lăm krăm kăn mŏng dak ksĭ jru.",
  "7": "Knap mñai ta teh dih yơng băh pơp lăm păk bông! Bơ yơng pơp lăm păk bông ĕh trôh hư̆n jêng pơp krĕh mau, ƀê̆ dăh, knap mñai ta nêh tơm lăm ñjêng pơp păk bông trôh băh nêh hư̆n.",
  "8": "Kơt iên, ndă ti mdăh jŏng pu me lăm  păk bông pu me, ăn ndăč lat jêh iên čĕ ĕh du wăč băh pu me. Hư̆n jêng pơp găl ta pu me lư̆t ti mdăh lư̆t jŏng jêh hư̆n dơi dơn pơp brêh găl hĭn ta hôm nư̆m ti mdăh nư̆m jŏng jêh hư̆n nai čĕ mŏng war iñ hui hai.",
  "9": "Ndă măt pu me lăm păk bông pu me, ăn liêk lat ĕh jêh iên čĕ wăč băh pu me. Hư̆n jêng pơp găl ta pu me hôm gu ju đăh măt dơi mư̆t mŏng pơp brêh, găl hĭn ta hôm nư̆m bar đăh măt jêh hư̆n nai čĕ mŏng wăr iñ.",
  "10": "Ăn ñjrăng, ei ru pu me mưč ju nau nêh mŏng băl ku sei ho. Bơ yơng ăñ ngơi ta pu me klăh iêu băl myang băl ĕh di tŏng trôk khăng so môh măt Bap ăñ tŏng trôk.",
  "11": "[ Bơng yơng Kuôn Nêh trôh no di lăm tlĕh nêh rai nga.]",
  "12": "Đa lăh pu me mĭn? Ndă ju nau nêh mau ju hiêng mlăm biêp, ƀê̆ dăh ju mlăm mŏng pôl biêp ĕh suô̆ nga, geh ya nêh hư̆n jrăng lơi ĕh sư̆n jăt sư̆n mlăm ta dơl yôk jêh iên sak truông, kăn juôi biêp ĕh suô̆ truông lăh?",
  "13": "Ndă dơi kăn so ĕh, ngĭn ngăn, ăñ ngơi ta pu me klăh iêu kăn jrăng čhô̆ brơn ta biêp hư̆n ŏk hĭn ta sư̆n jăt sư̆n mlăm kuôn biêp so ĕh suô̆.",
  "14": "Kơt iên ya, pơp khơñ ta măt Bap pu me di tŏng trôk so mau čiêng ăn ju nau nêh mŏng băl ku sei ho ĕh nga rai ƀă.",
  "15": "Ƀê̆ dăh, ndă ju nau ŏh mi dơ-dêh pu me di mhŏ tih ta pu me, ăn sak, jêh iên têh pơp ĕh mau kăn ta pu me čuôm gu ta ju nau kăn. Ndă kăn iêt pu me, pu me jrăng wêh hôm ŏh mi tơm.",
  "16": "Ƀê̆ dăh ndă so kăn iêt, ăn ndơm ju nau mdăh bar nau nêh gre băk pu me, no di pơp ngơi băh bar mdăh pei nau nêh têh sơm bruă hư̆n čiêng ta bruă hư̆n dơi lăm klă. ",
  "17": "Jêh iên ndă so kăn čiêng iêt pŏng hên, ăn têh bruă hư̆n ta Pôl Ƀrăh. Ƀê̆ dăh ndă so kăn čiêng iêt băl Pôl Ƀrăh, ăn pu me dlăng kăn ndrơm uôn lan ta ling jêh iên băl rư̆ng jia.",
  "18": "Ngĭn ngăn, ăñ ngơi ta pu me, ndă năn pơp pu me kăt mŏng dôn teh, pơp hư̆n ĕh jrăng kăt tŏng trôk ya, jêh iên ndă năn pơp pu me rŭh mŏng dôn teh, pơp hư̆n tŏng trôk ĕh jrăng rŭh ya.",
  "19": "Lŏ ju dŏ hư̆t, ngĭn ngăn, ăñ ngơi ta pu me klăh iêu ndă bar nau nêh mŏng pu me hên ju nuih nhăm yơng ta djăp ta pơp hên dăn mŏng dôn teh, pơp hư̆n ĕh jrăng ñjêng ta hên yơng băh Bap ăñ tŏng trôk.",
  "20": "Bơ yơng u tŭk mau bar mdăh pei nau hên tăm ƀư̆n băk mŏng năn ăñ, ăñ jrăng gŭk mŏng mbar hên.",
  "21": "Mông hư̆n, kăn Pê-trôih sak ta iên, kăn lup Khua Yang: \"Wơ Khua Yang, ndă  ju nau nêh ŏh mi ăñ mhŏ tih ta ăñ jêh iên ŏk dŏ ăñ jrăng đač ta kăn? Trôh ta pŏh dŏ pŏh lăh?\"",
  "22": "Yang Yêsu lăh ta kăn: \"So ăñ ngơi ta me trôh pŏh dŏ pŏh ôh, ƀê̆ dăh trôh ta pŏh jăt ta pŏh dŏ.",
  "23": "Bơ yơng pơp ho, uôn Yang Trôk ndrơm ta ju nau nêh mhŏ mtao, kăn khơñ lăm jêh ră nuôn ta băl dư̆k kăn.",
  "24": "Mông hư̆n, jai mtao dư̆ng ksiêm ră nuôn, nai sak ndơp ta mtao ju nau nêh đuôm nuôn trôh ta măt bau ta-lư̆ng.",
  "25": "Ƀê̆ dăh so dơi kăn mau pơp čiu nuôn ôh, hư̆n yơh mtao yua kăn tăč săk kăn tơm, wăt ta ur, kuôn jêh iên djăp mta pơp no kăn mau, jêh hư̆n čiu nuôn.",
  "26": "Kơt iên kăn pun mŏng sô̆, kăn dư̆k hư̆n čuôn krŭng ta măt mtao, dăn klăh iêu: 'Wơ mtao, dăn wêh gĭr ta ăñ ƀă, jêh hư̆n ăñ jrăng čiu ta mtao djăp mta pơp.'",
  "27": "Yơng tŏng đač mŏng nuih nhăm, hư̆n yơh mtao kăn dư̆k hư̆n ăn kăn du jêh iên ndrŏh lĕ nuôn ta kăn ya.",
  "28": "Ƀê̆ dăh jêh kăn du băh iên, kăn dư̆k hư̆n tŏng tuôm ju nau nêh dư̆k dơ dêh mhŏ bruă băk kăn, pŏng knai hôm đuôm nuôn kăn ju hiêng đơ-niê, jêh iên jêh kăn mau ñư̆p pŏng ĕh kăn tlăn ko, kăn ngơi: \"Năn nuôn hôm me đuôm me čiu gơñ.\"",
  "29": "Kơt iên, pŏng ĕh čuôn krŭng kơ kôh, hư̆n jêng nêh mhŏ dư̆k băk kăn pŏng ĕh gĭr dăn ta kăn, ngơi klăh iêu: 'Dăn gĭr ta ăñ ƀă, jêh hư̆n ăñ jrăng wêh čiu ta me.'",
  "30": "Ƀê̆ dăh so kăn khơñ. Mlih ta iên, kăn ñư̆p, kăn nggruôn pŏng knai mŏng war tăl trôh mông pŏng knai čiu lĕ nuôn prăk.",
  "31": "Kơt iên, nai so bruă kăn mhŏ klăh iên, nêh mhŏ bruă băk kăn nai dlăng so găl. Hên sak ta iên, hên têh lĕ mơt bruă kăn mhŏ hư̆n ta mtao hên.",
  "32": "Jêh hư̆n, mtao yua nêh sak kuôl kăn dư̆k hư̆n trôh ta iên, mtao ngơi ta kăn \"Wơ dư̆k djŏh ƀai, jêh ăñ đač lĕ mơt ru nuôn ta me bơ yơng me kôh dăn ta ăñ.",
  "33": "Pơp mhŏ so me khơñ đač ta nêh mhŏ bruă băk me, klăh di jêh ăñ đač me?’",
  "34": "Yơng băh pơp kăn lăm mtao hao nuih, mtao kăn di jao kăn ta khua mnă tŏ tăl trôh mông kăn čiu lĕ mơt nuôn kăn hôm đuôm.",
  "35": "Ndă grăp nau nêh mŏng pu me so pu me ndrŏh tih ta ŏh mi tơm ta lĕ nuih nhăm pu me, Bap ăñ tŏng trôk ăt jrăng mhŏ ta pu me klăh iên ya.”"
}