mnong_2020_mng_mlt_mat_book/mat/16.json

{
  "1": "Băl Pha-ri-si ta Sa-đu-sê sak mơñ ta iên, bơ  yơng hên khơñ lông dlăng Khua Yang, hên pra dăn Khua Yang ăn ta hên dơi so ju mta pơp lăm năl băh trôk.",
  "2": "Ƀê̆ dăh jai mông wêh ngơi, Khua Yang ngơi ta hên: [\"Jêh mho nar, pu me lăh trôk găl, bơ yơng trôk brông.'",
  "3": "(Ôi măng dơh pu me lăh: 'Trôk djŏh, bơ yơng trôk brông, ŏk ñuôi.\" Wăt di lăh pu me gư̆t mnăč dlăng trôk nar, ƀê̆ dăh so wơng pơp lăm năl ta nŭk.)",
  "4": "\"Ju nŭk djŏh ƀai jêh iên čhơng tăt khơñ juôi pơp lăm năl, ƀê̆ dăh jrăng so hôm ăn ju mta pơp lăm năl ta ĕh ôh, čuôm gu pơp lăm năl băh kăn Yôna.\" Jêh hư̆n Khua Yang yĕh băh hên, Khua Yang du băh iên.",
  "5": "Jêh trôh ta hang đăh tŏ, ƀê̆ dăh băl ƀing kna so trôh hên triêu ƀăñ ôh.",
  "6": "Mông hư̆n, Yang Yê-su ngơi ta hên: \"Ăn răng jêh iên ñjrăng ta pei băl Pha-ri-si jêh iên băl Sa-đu-sê.\"",
  "7": "Ƀê̆ dăh, hên tŏng ngơi ndăng hên klăh iêu: \"Bruă hư̆n yơng so băn triêu ƀăñ ju băk.\"",
  "8": "Ƀê̆ dăh jêh gư̆t pơp hư̆n, Yang Yê-su ngơi: \"Wơ băl ƀê̆ pơp đăo, pơp mhŏ pu me tŏng ngơi ndăng pu me klăh iêu hư̆n jêng yơng băh băn so mau ƀăñ?",
  "9": " Ñăm pu me gư̆t wơng jêh iên so kăh tôr prăm mlăm ƀăñ ăn ta prăm bau nau nêh sa jêh iên pu me lŏ dôñ djăh ĕh ŏk bai hôm khăñ?",
  "10": "Mdăh pŏh mlăm ƀăñ ăn ta puôn bau nau nêh, jêh iên ŏk bai hôm khăñ pu me dơi dôñ?",
  "11": "Pơp mhŏ so dơi pu me wơng pơp hư̆n so mau ăñ ngơi ta pu me yơng ta ƀăñ hư̆n ƀă? Ƀê̆ dăh ăn răng yơng ta pei băl Pha-ri-si wăt ta băl Sa-đu-sê di.",
  "12": "Mông hư̆n kăh hên wơng klă mơ, so mau Khua Yang yua hên răng yơng ta pei mŏng ƀăñ ƀă, ƀê̆ dăh yơng ta pơp tơ-ti lăh băl Pha-ri-si ta băl Sa-đu-sê di.",
  "13": "Mông hư̆n, jêh trôh mŏng teh uôn Sê-sa-rê Phi-lip, Yang Yê-su lup băl ƀing kna Khua Yang, klăh iêu: \"Nai lăh nêh tơm Kuôn Nêh jêng?\"",
  "14": "Jêh hư̆n hên têh: \"Mau ƀê̆ nêh ngơi jêng kăn Yôhan Ƀap-tit, ƀơ-ƀă ngơi jêng Ê-li, jêh iên băl ƀơ-ƀă mơh ngơi jêng Yêrêmi mdăh ju nau mŏng khua tơm têh luôr.\"",
  "15": "Khua Yang ngơi ta hên: \"Bơ pu me lăh ăñ nêh tơm jêng?\"",
  "16": "Kơt iên, jai wêh lăh, kăn Si-môn Pê-trôih ngơi: \"Khua Yang jêng Yang Tŏng Tlĕh, Kuôn Yang Trôk brêh hui hai.\"",
  "17": "Mông hư̆n, jai wêh lăh, Yang Yêsu  ngơi ta kăn: \"Si-môn, kuôn Yô-na, găl jôn ngăn ta me, bơ yơng so geh băh lŏng săk jêh iên mham ôh ăn me gư̆t, ƀê̆ dăh hư̆n jêng Bap ăñ ji tŏng trôk tê̆.",
  "18": "Ƀê̆ dăh ăñ ngơi ta me klăh iêu, me jêng Pê-trôih, jêh iên tŏng bôk mau ho, ăñ jrăng lăm ndŏk Pôl Ƀrăh ăñ ji, jêh iên grăp ƀăng uôn khư̆t jrăng so dơi mblăh Pôl hư̆n ôh.",
  "19": "Ăñ jrăng jao kliêng khuă Uôn Yang Trôk ta me, năn pơp me kăt mŏng teh ĕh jrăng kăt tŏng trôk ya, jêh iên năn pơp me rŭh mŏng teh tŏng trôk ĕh jrăng rŭh ya.",
  "20": "Jêh hư̆n, Khua Yang ghă băl ƀing kna no di tlĕh hên têh ta nêh dơ dêh gư̆t Khua Yang jêng Yang Tŏng Tlĕh.",
  "21": "Dŏng băh mông hư̆n, Yang Tŏng Tlĕh Yê-su dư̆ng ăn băl ƀing kna Yang di gư̆t klă pơp Khua Yang jrăng sak trôh ta uôn Yêrusalem, jêh iên tŭ ŏk pơp knap mñai mŏng ti băl khua u rañ, băl khua mhŏ yang ram wăt ta khua tơ-ti pơp bhiên, jêh hư̆n nai lăm khư̆t, jêh iên lŏ wêh dŏk brêh mŏng nar tal pei.",
  "22": "Jêh iên kăn Pê-trôih đŏh Khua Yang tŭk dêh, mông hư̆n Pê-trôih ƀuăh Khua Yang, klăh iêu: \"Wơ Khua Yang, Yang Trôk lăm ƀlang nuih nhăm băn dhư̆n ta Khua Yang. So mau bruă klăh iên dơi trôh ta Khua Yang ƀă.\"",
  "23": "Ƀê̆ dăh Khua Yang wiêng iêu kơi ngơi ta Pê-trôih: \"Wơ Satan, ăn du ta kơi ăñ! Me jêng bôk mau lăm păk jŏng ăñ, bơ yơng so me mĭn ta bruă Yang Trôk di ƀă, ƀê̆ dăh mĭn gu ta bruă kuôn nêh.\"",
  "24": "Jêh hư̆n, Yang Yêsu ngơi ta băl ƀing kna Yang di: \"Ndă nêh tơm khơñ hui băh kơi ăñ, nêh hư̆n jrăng săl săk kăn tơm, jêh iên tung jhi tăm kăng kăn, jêh hư̆n gre ăñ.",
  "25": "Bơ yơng nêh tơm khơñ lăm tlĕh pơp brêh kăn ĕh jrăng nga, ƀê̆ dăh nêh tơm lăm nga pơp brêh kăn yơng băh ăñ jrăng lŏ dơi so ĕh.",
  "26": "Bơ yơng năn pơp yuôm ta ju nau nêh ndă dơi mau lĕ dôn teh, ƀê̆ dăh kăn nga pơp brêh? Mdăh năn pơp nêh hư̆n jrăng sŏk no di dơi tăm nggăl pơp brêh kăn?",
  "27": "Bơ yơng Kuôn Nêh jrăng trôh mŏng  pơp guh ang Bap Khua Yang di wăt ta băl myang Yang di. Jêh iên mŏng mông hư̆n, Khua Yang jrăng khôm ta grăp nau nêh hui si bruă hên mhŏ.",
  "28": "Ngĭn ngăn, ăñ ngơi ta pu me klăh iêu mau ƀê̆ nêh jai dŏk ta o, mau nêh jrăng so găn gao pơp khư̆t luôr ta hên so Kuôn Nêh trôh mŏng čar Yang di.”"
}