mnong_2020_mng_mlt_mat_book/mat/27.json

{
  "1": "Trôh ang ôi, lĕ mơt khoa mhŏ yang ram jêh iên băl khoa u rañ mŏng uôn lan trông čhai mnăč tăm dŏng ta Yang Yêsu no di lăm khât lat Khoa Yang.",
  "2": "Hên čăp Khoa Yang, ñâp Khoa Yang sak jao ta kăn khoa čar Phi lat.",
  "3": "\tJăng jai Yuđa, nêh lhiăr Khoa Yang Yêsu so nai phat dôih Khoa Yang, kăn wêh ƀlŏk jêh iên kăn ñôt pei jăt prăk sak ndơp ta băl khoa mhŏ yang ram jêh iên khoa u rañ,",
  "4": "\tjêh iên ngơi: \"Ăñ jêh tih ru bơ yơng jao mham kpă.\" Ƀê̆ dăh hên ngơi: \"Broă hân so hôm yuôm ta hi! Broă hân tui si me mhŏ.\"",
  "5": "\tJêh hân kăn čĕ pei jăt prăk mŏng hih ƀân jêh iên du hih sak rêt ko lăm khât săk tơm.",
  "6": "\tBăl khoa mhŏ yang ram dôñ prăk hân jêh iên ngơi: \"Pơp bhiên so ăn ñôt pei jăt prăk ho lăm mât mŏng hip hih ƀân ôh, bơ yơng ho jêng prăk ênŏh mham di.",
  "7": "\tHên tăm trông čhai broă hân ndăng hên jêh iên yoa prăk hân ruôt tač lŏ kăn muôn dlăh no di thêm tŭk tăp bâl ta băl năč.  ",
  "8": "\tBơ yơng băh iên nai năn tač lŏ ho jêng \"Tač Lŏ Mham\" tăl trôh nar o.",
  "9": "\tKlăh iên jêng lăm nâk pơp jêh tơ ti băh khoa têh luôr Yêrêmi klăh iêu: \"Hên sŏk pei jăt prăk, jêng ênŏh băh băl kuôn tlâo Israel kăm ta kăn,",
  "10": "\tjêh iên hên sŏk prăk hân no di ruôt tač lŏ kăn muôn dlăh ndrơm klăh di pơp jêh Yang Trôk tơ tă ta ăñ.\"",
  "11": "Mông hân, Yang Yêsu dŏk ta măt khoa čar jêh iên kăn lup Khoa Yang: \"Gĕh ya me jêng mtao băl Yuđa?\" Yang Yêsu ngơi: \"Gĕh hui si pơp me ngơi hân.\"",
  "12": "Ƀê̆ dăh jăng jai băl khoa mhŏ yang ram jêh iên băl khoa u rañ kčŭt Khoa Yang, ƀê̆ dăh Khoa Yang so wêh ngơi ju mta pơp ôh.",
  "13": "\tJêh hân Philat lup Khoa Yang: \"So me tŏng lĕ mơt pơp nai kčŭt no di tăm dăng ta me hân lăh?\"",
  "14": "Ƀê̆ dăh Khoa Yang so wêh ngơi ta lĕ mơt pơp hên kčŭt, tăl trôh ta khoa car ăt kăn hơ̆ hă ya.",
  "15": "\tMŏng mông mar, khoa čar mâo pơp bhiên phưi ju nâo nêh mnă ta uôn lan, nêh hân hui si uôn lan roăh. ",
  "16": "Mông hân, mâo ju nâo mnă pĕh hing ƀai năn kăn Ƀaraƀas.",
  "17": "\tHân yơh, jêh hên tăm ƀân, Philat lup hên: \"Nêh tơm pu me khơñ ăñ phưi ta pu me? Ƀaraƀas mdăh Yêsu, khăng kuôl jêng Yang Tŏng Tlĕh?\"",
  "18": "\tBơ yơng khoa gât klă hên jao Khoa Yang ta kăn yơng băh nuih nhăm djŏh.",
  "19": "Jăng jai khoa hôm gŭk phat dôih, ur kăn yoa ka han sak lăh klăh iêu: \"Ei ru mhŏ djŏh ta nêh kpă hân. Bơ yơng nar o ăñ mâo pơp rŭng răng ŏk ngăn yơng băh pơp mbơi ta nêh ho.\"",
  "20": "\tMông hân, băl khoa mhŏ yang ram jêh iên băl khoa u rañ trôt jhôl uôn lan dăn phưi kăn Ƀaraƀas jêh iên lăm khât Yêsu.\n",
  "21": "\tKhoa čar wêh lup hên: \"Nêh tơm Pu me khơñ ăñ phưi mŏng bar nâo ho ta pu me?\" Hên ngơi: \"Ƀaraƀas.\"",
  "22": "\tPhilat lup hên: \"Kơt iên, năn pơp ăñ mhŏ ta Yêsu, nai kuôl jêng Yang Tŏng Tlĕh, ho?\" Lĕ mơt dưng hên ngơi: \"Pŏng điñ kăn ta jhi tăm kăng.\"",
  "23": "\tJêh hân khoa lup: \"Pơp mhŏ? Năn pơp tih kăn mâo?\" Hên wêh ôr tĕh hĭn klăh iêu: \"Pŏng điñ kăn ta jhi tăm kăng.\"",
  "24": "\tJăng jai Philat gât kăn so dơi wêh mhŏ ju mta pơp ôh, ƀê̆ dăh mlih ta iên, tăl rŏng trôh pơp tŏng pŭ, jêh hân kăn sŏk dak rao ti ta măt uôn lan jêh iên kăn ngơi: \"Ăñ so mâo pơp tih ta mham nêh ho ôh. Pu me mhŏ dêh yơh.\"",
  "25": "\tLĕ mơt uôn lan wêh ngơi: \"Mham kăn lơi ĕh tôh ta hi jêh iên ta kuôn so hi.\"",
  "26": "Kơt iên jêng khoa phưi kăn Ƀaraƀas ta hên, ƀê̆ dăh pŭ yat Yang Yêsu jêh iên jao Khoa Yang no di tŭ pŏng điñ ta jhi tăm kăng.",
  "27": "Ka han kăn khoa čar lăm ndơp Yang Yêsu mât mŏng hih phat dôih ram jêh iên ƀân lĕ khoa ka han ta măt Khoa Yang.",
  "28": "\tHên lĕh ao Khoa Yang jêh iên lăm sŏh Khoa Yang ju blăh ao dak brông hăr.",
  "29": "\tHên tañ ju mlăm đuôn ta luôk, jêh hân lăm ndâo ta bôk Khoa Yang, jêh iên ăn mŏng jra ta ti ma Khoa Yang. Hên pun mŏng sô̆ ta măt Khoa Yang, jêh iên mưč liê̆ Khoa Yang klăh iêu: \"Wơ mtao uôn lan Yuđa!\"",
  "30": "Hên c̆hŏh dak diêu ta măt Khoa Yang, jêh hân hên sŏk mŏng jra pơng ŏk dŏ ta bôk Khoa Yang.",
  "31": "\tJăng jai jêh hên mưč liê̆ Khoa Yang, hên lĕh ao jhŭng băh săk jêh iên wêh lăm sŏh hât ao Yang di, jêh hân ndơp Khoa Yang sak pŏng điñ ta jhi tăm kăng.",
  "32": "\tJăng jai du ta ling, Hên so ju nâo nêh uôn Siren năn kăn jêng Simôn, hên mhăl kăn tung jhi tăm kăng Khoa Yang.",
  "33": "\tHên sak trôh ta tŭk nai năn jêng Gôlgôtha, lơ lang jêng \"Yôk ndŏh bôk.\"",
  "34": "\tHên ăn Khoa Yang ñêt nơm tăm lŭk ta dak gân tăng, ƀê̆ dăh jăng jai jêh liêp, Khoa Yang so khơñ ñêt.",
  "35": "\tJêh hên pŏng Khoa Yang ta jhi tăm kăng, hên tŏng phă blăh ao Khoa Yang ta pơp tŏng đă,",
  "36": "\tJêh hân hên gŭk ta iên kăp gak Khoa Yang.",
  "37": "\tTa bôk Khoa Yang, hên yông pơp kčŭt Khoa Yang klăh iêu: \"Ho jêng Yêsu, mtao uôn lan Yuđa.\"",
  "38": "\tMông hân, mâo bar nâo nêh tlĕ nai pŏng băk Khoa Yang, ju nâo đăh ma jêh iên ju nâo đăh kiêu.",
  "39": "Ŏk nêh sak găn truông ngĕh bôk mưč hêr Khoa Yang,  ",
  "40": "klăh iêu: \"Hơi Yêsu, me jrăng lăm rai hih ƀân jêh iên jrăng lăm ndŏk ĕh mŏng pei nar, ăn me tŏng tlĕh me tơm hi dlăng! Ndă me jêng Kuôn Yang Trôk, ăn me jâr băh jhi tăm kăng hân.\"",
  "41": "Băl khoa mhŏ yang ram wăt ta băl khoa tơ ti pơp bhiên jêh iên băl khoa u rañ ăt hêr mưč Khoa Yang klăh iên ya, Hên lăh:",
  "42": "\t\"Kăn lăm tlĕh nêh dêh ƀê̆ dăh so dơi lăm tlĕh săk kăn tơm. Kăn jêng mtao băl Israel, mông ho, yoa kăn jâr băh jhi tăm kăng, jêh hân kăh băn tip kăn.",
  "43": "\tKăn knang ta Yang Trôk, hân yơh mông ho lơi Yang Trôk lăm tlĕh kăn ndă Yang Trôk khơñ kăn. Bơ yơng kăn ngơi: \"Ăñ jêng Kuôn Yang Trôk.\"",
  "44": "\tKlăh iên ya, băl tlĕ nai pŏng điñ băk Khoa Yang ăt hên ngơi lăm prêñ Khoa Yang.",
  "45": "\tDŏng băh mông tal pro, pơp ngo măng guôm lĕ ju čar tăl trôh mông tal sân. ",
  "46": "\tNăng ai mông tal sân, Yang Yêsu ôr ju dŏ tĕh ngăn, klăh iêu: \"Ê-li, la-ma-sa-ƀăč-tha-ni?\" Lơ lang pơp ho jêng \"Wơ Yang Trôk ăñ ji, Wơ Yang Trôk ăñ ji, pơp mhŏ Yang Trôk ndrŏh ăñ?\"",
  "47": "\tJăng jai băl ĕh dŏk mơñ ta iên hên tŏng pơp hân, hên ngơi: \"Kăn kuôl Ê-li.\"",
  "48": "Mhăč rŏk, ju nâo nêh mŏng hên dhul sak sŏk djhôp ñŭk mŏng dak srat, čât ta bôk mŏng jêh hân yơr ăn Khoa Yang ñêt.",
  "49": "\tBăl hôm ta iên ngơi: \"Khiêp kăn hân! Lơi iên răn, dlăng Ê-li sak lăm tlĕh kăn mdăh so.\"",
  "50": "\tJêh hân Yang Yêsu wêh ôr tĕh ju dŏ hât jêh iên tôč nhăm.",
  "51": "\tTŏ hân, dhiêm ram mŏng hih ƀân ĕh čriêk lăm ñjêng bar đăh dŏng băh tŏng tê̆ trôh mŏng sô̆, tĕh dih ĕh nggơ-nggăr jêh iên bôk mâo čăh đang.",
  "52": "Tu môč ĕh pơk jêh iên ŏk săk jăn băl ƀrăh jêh khât wêh dŏk brêh.",
  "53": "\tTa kơi Khoa Yang wêh brêh, hên du băh tu môč, sak mât mŏng uôn ram brăh jêh iên lăm ƀlang ta ŏk nêh dơi so. ",
  "54": "\tJăng jai kăn khoa ka han jêh iên băl ka han gak Yang Yêsu hên so nggơ-nggăr tĕh jêh iên lĕ mơt broă ĕh trôh, hên bhŭng tlŏh nŏh, hên ngơi: \"Nêh ho nâk ngăn jêng Kuôn Yang Trôk.\"",
  "55": "\tŎk băl u ur sak gre Yang Yêsu dŏng băh čar Galilê no di đru Khoa Yang, hên gŭk ta iên dlăng băh wăč.",
  "56": "\tMŏng hên hân mâo Mari Ma-dơ-len, Mari mei Yakơ jêh iên YôSep, wăt mei băl kuôn tlâo Sêƀêđê di.",
  "57": "\tTrôh mông mho, mâo ju nâo nêh ndrŏng, năn kăn jêng Yôsep, băh Arimathê trôh, kăn tơm ăt jêh jêng ju nâo ƀing kna Yang di.",
  "58": "\tKăn sak tŏng tuôm ta Philat dăn sŏk săk Yang Yêsu. Klăh iên, Philat yoa jao săk khât ta kăn.",
  "59": "\tYôsep sŏk săk khât Khoa Yang jêh iên sŏk mnal ƀrăh găl put,  ",
  "60": "\tJêh hân ăn săk khât mŏng tu môč mhei kăn tơm, kăn phat tu hân mŏng mâo. Jêh hân, kăn lơ lăm ju mlăm bôk mâo ram ndăl ƀăng tu jêh iên kăn du.",
  "61": "Mari Madơlen jêh iên Mari dơ dêh mâo măt ta iên, gŭk dlăng măt ta tu môč.",
  "62": "\tNar ta kơi, jêng gĕh nar Prăp Mkra Pơp Găn, băl khoa mhŏ yang ram jêh iên băl Pharisi tăm ƀân ju băk sak tŏng tuôm kăn Philat.",
  "63": "Hên ngơi: \"Wơ khoa, hi kăh tôr klăh iêu, jăng jai kăn tlâo huôk Yêsu hôm brêh kăn ngơi: \"Pei nar ta kơi, ăñ jrăng wêh brêh.\"",
  "64": "\t\tHân yơh, dăn khoa ăn pơp dơi no di mâo ka han gak kjăp tu môč tăl trôh nar tal pei, no di ơn băl ƀing kna kăn sak sŏk blăc̆ săk khât kăn, jêh hân hên ngơi ta uôn lan: \"Khoa Yang jêh dŏk brêh băh tŭk khât,\" jêh iên pơp huôk ta kơi ho jrăng ram hĭn ta pơp huôk luôr bôk lak.\"",
  "65": "\tPhilat ngơi ta hên: \"Pu me yoa ka han sak gak yơh. Ăn pu me sak jêh iên gak kjăp tu môč hui si pơp mĭn pu me.\"",
  "66": "\tHân yơh hên sak, jêh iên gak kjăp nơn tu môc̆, hên ƀlĭt ră mtao ta bôk mâo ƀăng tu jêh iên yoa ka han gak. "
}