mnong_2020_mng_mlt_mat_book/mat/21.json

{
  "1": "Jăng jai hên trôh mơñ uôn Yêrusalem, jêh iên trôh ta Ƀê-pha-yê, ta yôk Ôliwơ, mông hư̆n Yang Yê-su yua bar nau ƀing kna,",
  "2": "ngơi ta hên: \"Ăn sak mư̆t mŏng uôn ta măt pu me tŏ hư̆n, jêh hư̆n pu me jrăng so rŏk ƀơn ƀle hĕ mei nai kăt ta iên, ju băk ta kuôn ĕh. Jêh pu me lĕh sei kăt, ăn ndơp ĕh trôh ta ăñ o.",
  "3": "Jêh iên ndă mau nêh ngơi ta pu me, ăn pu me ngơi klăh iêu: 'Khua Yang khơñ yua ĕh' jêh iên mhăč rŏk nai jrăng ăn ĕh.",
  "4": "Bruă ĕh trôh hư̆n, no di dơi lăm nư̆k pơp ngơi băh băl têh luôr ngơi ru, klăh iêu:",
  "5": "\"Ăn ngơi ta kuôn u ur Siôn di: Tŏ hư̆n, Mtao pu e trôh ta pu e, ta pơp luă gŭ jêh iên hao ƀle hĕ, hư̆n jêng hao tŏng ƀle hĕ kuôn, kuôn ƀle hĕ mei di.\"",
  "6": "Mông hư̆n, băl ƀing kna sak, jêh iên mhŏ hui si pơp jêh Yang Yê-su tơ-tă ta hên.",
  "7": "Hên têk ƀle hĕ mei wăt ƀle hĕ kuôn, jêh hư̆n hên lŏk ao jhŭng hên di tŏng săk ĕh, jêh hư̆n Khua Yang gŭk tŏng iên.",
  "8": "Mông hư̆n, ŏk mŏk băl uôn lan hên lŏk ao jhŭng hên di ta truông, jêh iên ƀơ ƀă nêh hên kŏh mbăh jhi jêh iên lŏk ta truông sak.",
  "9": "Jêh hư̆n,  băl uôn lan sak luôr jêh iên sak băh kơi Khua Yang hên ôr tĕh, klăh iêu: \"Hô-sa-na Kuôn mtao Đawit! Găl jôn ta Mtao trôh mŏng năn Khua Yang! Hô-sa-na mŏng tŭk jua hĭn!\"",
  "10": "Jêh Khua Yang mư̆t mŏng uôn Yêrusalem, lĕ ju uôn hên ndrăt gơ-gu, hên tŏng lup: \"Nêh tơm kăn ho jêng?\"",
  "11": "Jêh hư̆n băl uôn lan têh: \"Ho jêng nêh têh luôr Yê-su trôh băh Na-sa-ret, wăl Ga-li-lê.\"",
  "12": "Yang Yê-su mư̆t mŏng hih ƀư̆n, jêh hư̆n Khua Yang prŏh lĕ mơt băl tăč blŏ mŏng hih ƀư̆n, jêh iên lơ̆ jhưng băl mlih prăk wăt jhưng băl blŏ sư̆m tơp.",
  "13": "Khua Yang ngơi ta hên: \"Mau pơp čih. Hih ăñ nai ngơp jêng hih kuôl dăn, ƀê̆ dăh pu me lăm ñjêng ĕh jêng tŭk băl blăč.\"",
  "14": "Jêh hư̆n mau ŏk băl tiêh măt jêh iên kuet wiên sak ta Khua Yang mŏng hih ƀư̆n, jêh iên Khua Yang lăm băh hên.",
  "15": "Ƀê̆ dăh jăng jai băl khua mhŏ yang ram jêh iên khua tơ-ti pơp bhiên, hên so lĕ mơt bruă myang Khua Yang mhŏ hư̆n, wăt ta pơp băl ku sei nơ nei mŏng hih ƀư̆n, klăh iêu: \"Hô-sa-na kuôn mtao Đawit,\" hên hao nuih ngăn.",
  "16": "Hên lup Khua Yang: \"So Khua Yang tŏng pơp băl uôn lan ngơi lăh?\" Yang Yê-su ngơi ta hên: \"Tŏng ya! Ñăm tuôm pu me dlăng ră ngơi klăh iêu: 'Yang Trôk jêh dăp luôr pơp nơ nei mŏng dơk băl ku sei dêt jêh iên băl ŏh nga hôm pu,' lăh?\"",
  "17": "Jêh yĕh băh hên, Khua Yang du băh uôn ram sak trôh ta uôn Ƀê-tha-ni jêh iên mdei ju măng ta iên.",
  "18": "Trôh ôi tŏng o, jăng jai wêh du ta uôn ram, Khua Yang nguôt.",
  "19": "Jăng jai so ju mlăm tơm jhi ara ta kêng truông, Khua Yang sak trôh ta tơm ĕh jêh iên so mau ƀơn ple tŏng ĕh ôh čuôm gu mau ha. Khua Yang ngơi ta jhi: \"Nơn nan dŏng băh mông ho jrăng so hôm mau ple ta tơm me ƀă,\" jêh iên mhăč rŏk, tơm ara hư̆n ro prĕh.",
  "20": "Jêh so klăh iên, băl ƀing kna dlăng ndrơh khĕ, hên ngơi: \"Năn pơp ĕh mhŏ tơm jhi ara mhăč rŏk ro prĕh klăh iên?\"",
  "21": "Jêh hư̆n bŏh dơk hên, Yang Yê-su ngơi ta hên: \"Ngĭn ngăn, ăñ ngơi ta pu me, ndă pu me mau pơp đăo jêh iên so đing, pu me jrăng dơi mhŏ so mau čuôm gu ta tơm jhi a ra ôh, ƀê̆ dăh ndă pu me ngơi ta yôk ho: Ăn đơk tŏng tê̆ jêh iên čĕ mŏng dak sĭ, bruă ĕh jrăng jêng klăh iên.",
  "22": "Grăp pơp, năn pơp pu me dăn mŏng mông kuôl dăn ta nuih nhăm đăo, pu me jrăng dơi dơn.",
  "23": "Jêh iên jăng jai jêh Khua Yang mư̆t mŏng hih ƀư̆n, băl khua mhŏ yang ram wăt băl khua u rañ mŏng uôn lan sak tŏng tuôm ta Khua Yang jai mông Khua Yang tơ-ti, hên lup: \"U băh tŭk me sŏk pơp dơi no di me mhŏ bruă ho, jêh iên nêh tơm ăn ta me pơp dơi hư̆n?\"",
  "24": "Ƀê̆ dăh khua Yang wêh lăh, Yang Yêsu ngơi ta hên: \"Ăñ khơñ lup pu me ju mta pơp ya, jêh iên ndă pu me dơi wêh lăh ta ăñ, ăñ jrăng têh ta pu me gư̆t u băh tŭk ăñ sŏk pơp dơi no di mhŏ bruă ho.\"",
  "25": "Pơp ƀap-tem kăn Yôhan di u băh tŭk ĕh trôh? Băh trôk mdăh băh kuôn nêh?\" Jêh hư̆n hên trông čhai ndăng hên, klăh iêu: \"Ndă băn ngơi: 'Băh trôk' kăn jrăng ngơi ta băn: Ndă kơt iên pơp mhŏ so pu me tĭp kăn?\"",
  "26": "Ƀê̆ dăh ndă băn ngơi: 'Băh kuôn nêh,' băn lŏ bhŭng ta băl uôn lan, bơ yơng lĕ mơt nêh hên dlăng kăn Yôhan jêng khua têh luôr.",
  "27": "Jêh hư̆n hên wêh lăh ta Yang Yê-su, hên ngơi: \"So hi gư̆t.\" Khua Yang wêh lăh ta hên: \"Ăt so ăñ têh ta pu me gư̆t ya u băh pơp dơi ăñ sŏk no di ăñ mhŏ bruă ho.",
  "28": "Ƀê̆ dăh, đa lăh pu me mĭn? Ju nau nêh mau bar nau kuôn tlau, jêh iên kăn sak tuôm ta kuôn tlau ram, kăn ngơi: 'Wơ kuôn tlau, nar o ăn me sak mhŏ bruă ta mir ño.'",
  "29": "Ƀê̆ dăh mông kăn wêh lăh, kăn ngơi: 'Ăñ ơ̆ sak,' ƀê̆ dăh ta kơi hư̆n, kăn mlĭh pơp mĭn, kăn lŏ sak.",
  "30": "Ƀê̆ dăh jêh hư̆n kăn lŏ sak tŏng tuôm kuôn tlau tal bar, ăt kăn ngơi klăh iên ya. Jêh hư̆n kuôn kăn bŏh dơk, kăn ngơi: \"Wơ bap, lơi ăñ sak\" Ƀê̆ dăh ta kơi so kăn sak.",
  "31": "Nêh tơm mŏng bar nau kuôn tlau hư̆n hên mhŏ hui si pơp bap hên khơñ?\" Hên lăh: \"Kăn kuôn bôk.\" Yang Yê-su ngơi ta hên: \"Ngĭn ngăn, ăñ ngơi ta pu me klăh iêu băl rư̆ng jia ta ur čhơng tăt jrăng sak mư̆t mŏng uôn Yang Trôk luôr ta pu me.",
  "32": "Bơ yơng kăn Yôhan jêh trôh ta pu me hui truông kpă, ƀê̆ dăh so pu me tĭp kăn, bơ băl rư̆ng jia ta ur čhơng tăt hên tĭp kăn. Ƀê̆ dăh khă jêh pu me so ta măt tŭ mơh, ăt pu me so čiêng niêl mlĭh jêh iên tĭp kăn ya.",
  "33": "Ăn lŏ iêt ƀơn pơp hơ-hôr dơ-dêh. Mau ju nau nêh tơm teh, kăn tăm ju lôk mir ple ño, pêr nêr jư̆m dar mir hư̆n, sir ƀăng păt dak ño mŏng iên, lăm ndŏk tư̆m năk jêh iên ăn băl dư̆k tăm ño hên mưn ĕh, jêh hư̆n kăn sak čar dơ-dêh.",
  "34": "Mông hư̆n, mơñ trôh dơm lêh ple, kăn yua băl dư̆k kăn sak trôh ta băl tăm ño no di sŏk dơn kao nga kăn di.",
  "35": "Ƀê̆ dăh băl tăm ño hên ñư̆p băl dư̆k kăn, hên pŭ nêh ho, lăm khư̆t nêh tŏ, jhăng mau nêh tê̆.",
  "36": "Kăn tơm mir wêh yua băl dư̆k dơ-dêh sak, ŏk hĭn ta băl luôr, ƀê̆ dăh ăt băl ĕh mhŏ ta pŏng hên ndrơm klăh iên ya.",
  "37": "Ƀê̆ dăh trôh ta kơi dư̆t, kăn yua kuôn tlau kăn tơm sak ta hên, ngơi klăh iêu Bôm lăh hên jrăng mpŭ ta kuôn tlau ăñ.'",
  "38": "Ƀê̆ dăh jăng jai băl tăm ño so kuôn tlau hư̆n, hên trông čhai ndăng hên: 'Ho jêng kuôn tlau dơn ngăn. Jơ̆, băn lăm khư̆t kăn jêh iên sua lĕ mơt ngăn drăp kăn.'",
  "39": "Jai mông hên ñư̆p kuôn tlau hư̆n, hên čĕ kăn ta ling mir ño jêh iên lăm khư̆t lat.",
  "40": "Kơt iên, jăng jai kăn tơm mir ño trôh, đa lăh kăn jrăng mhŏ ta băl tăm ño hư̆n?\"",
  "41": "Hên ngơi ta Khua Yang: \"Kăn jrăng lăm rai lĕ mơt băl djŏh ƀai hư̆n lăm khư̆t ta pơp so tŏng đač, jêh iên ăn băl tăm ño dơ-dêh mưn hư̆t mir, hư̆n jêng băl jrăng ndơp ple kao kăn geh ta dơm lêh hên di.\"",
  "42": "Yang Yê-su ngơi ta hên: \"Năng ai ñăm tuôm pu me dlăng pơp ho mŏng Ră Ƀrăh: \"Bôk mau jêh băl lăm ndŏk hih ndrŏh lat, ĕh jrăng jêng bôk mau kêng hih. Bruă ho trôh băh Yang Trôk, jêh iên ĕh bêng pơp myang ta măt băn.\"",
  "43": "Yơng băh pơp ho, ăñ ngơi ta pu me gư̆t klă nai jrăng sŏk lat čar Yang Trôk băh pu me jêh iên nai jrăng ăn ta uôn lan dơ-dêh jrăng mau ŏk ple kao hĭn mŏng čar hư̆n.",
  "44": "Nêh tơm ĕh bông ta bôk mau ho jrăng rai lêk. ndă bôk mau ĕh lăč geh ta nêh tơm, ĕh jrăng dlăn lêk nêh hư̆n.",
  "45": "Jêh hên tŏng pơp hơ-hôr băh Khua Yang, băl khua mhŏ yang ram wăt băl Pha-ri-si, hên gư̆t rŏk Khua Yang čiêng ngơi ta hên.",
  "46": "Jăng jai hên juôi truông ñư̆p Khua Yang, hên lŏ bhŭng ta băl uôn lan ŏk, bơ yơng băl uôn lan dlăng Khua Yang jêng khua têh luôr."
}