mnong_2020_mng_mlt_mat_book/mat/21.json

{
  "1": "Jăng jai Yang Yêsu jêh iên băl ƀing kna trôh mơñ uôn Yêrusalem, mông trôh ta Ƀêphayê, ta yôk Ôliwơ, jêh iên Yang Yêsu yua bar nau băl ƀing kna,",
  "2": "klăh iêu: \"Ăn sak mư̆t mŏng uôn ta măt pu me tŏ, pu me jrăng so rŏk ƀle hĕ nai kăt ta iên ju băk ta kuôn ĕh. Ăn lĕh sei kăt jêh iên ndơp ĕh trôh ta ăñ.",
  "3": "Ndă mau nêh ngơi ta bruă hư̆n, ăn pu me ngơi: \"Khua Yang khơñ yua ĕh\" jêh iên mhăč rŏk nêh hân jrăng ăn pu me têk ĕh sak băk.",
  "4": "Bruă ho jrăng trôh no di lăm nư̆k pơp têh luôr jêh ngơi klăh iêu:",
  "5": "\"Ăn ngơi ta kuôn u ur Siôn di. Tŏ hư̆n, Mtao me trôh ju băk me, luă gŭ jêh iên hao ƀle hĕ jêng ƀle hĕ kuôn, kuôn ƀle hĕ mei di.\"",
  "6": "Băl ƀing kna sak mhŏ hui si grăp pơp Yang Yêsu jêh tơ-tă ta hên.",
  "7": "Hên têk ƀle hĕ mei jêh iên ƀle hĕ kuôn, jêh hư̆n hên lŏk ao hên tơm no di Yang Yêsu gŭk tŏng iên.",
  "8": "Ŏk mŏk uôn lan hên lŏk ao hên ta truông, lĕ mơt băl dơ-dêh kŏh mbăh jhi jêh iên lŏk ta truông sak.",
  "9": "Jêh hư̆n lĕ uôn lan sak ta măt Yang Yêsu ndrơm klăh di băl sak ta kơi Khua Yang hên ôr tĕh: \"Hôsana Kuôn mtao Đavit! Găl jôn ta Mtao trôh mŏng năn Khua Yang! Hôsana mŏng tŭk jua hĭn tŏng tê̆!\"",
  "10": "Jăng jai jêh Yang Yêsu mư̆t mŏng uôn Yêrusalem, lĕ mơt ju uôn hên ndrăt gơ-gu, hên tŏng lup: \"Nêh tơm kăn ho jêng?\"",
  "11": "Băl uôn lan têh: \"Ho jêng nêh têh luôr Yêsu trôh băh Nasaret, wăl Galilê.\"",
  "12": "Jêh hư̆n Yang Yêsu mư̆t mŏng hĭh ƀư̆n. Khua Yang prŏh lĕ mơt băl tăč blŏ mŏng hĭh ƀư̆n du băh iên, lơk jhưng băl mlih prăk jêh iên jhưng băl blŏ sư̆m tơp.",
  "13": "Khua Yang ngơi ta hên: \"Mau pơp čĭh. Hĭh Ăñ jrăng gĕh năn jêng hĭh kuôl dăn, ƀê̆ dăh pu me lăm ñjêng ĕh jêng tŭk băl blăč.",
  "14": "Mông hư̆n, mau ŏk băl tiêh măt jêh iên kuet wiên trôh ta Khua Yang mŏng hĭh ƀư̆n, jêh iên Khua Yang lăm băh hên.",
  "15": "Ƀê̆ dăh jăng jai băl khua mhŏ yang ram jêh iên khua tơ-ti pơp bhiên so lĕ mơt bruă myang Khua Yang mhŏ, wăt ta pơp băl ku sei nơ nei mŏng hĭh ƀư̆n, klăh iêu: \"Hôsana kuôn mtao Đavit,\" hư̆n hên hao nuih ngăn.",
  "16": "Hên lup Khua Yang: \"So Khua Yang tŏng pơp băl uôn lan ngơi lăh?\" Yang Yêsu ngơi: \"Tŏng! Ndă kơt iên ñăm pu me tuôm dlăng pơp ngơi: \"Yang Trôk jêh dăp luôr pơp nơ nei mŏng dơk băl ku sei dêt jêh iên băl ŏh nga hôm pu lăh?\"",
  "17": "Jêh iên Yang Yêsu ndrŏh hên, du băh uôn ram sak trôh ta uôn Ƀêthani jêh iên mdei ju măng ta iên.",
  "18": "Trôh ôi tŏng o, Khua Yang wêh du ta uôn ram, Khua Yang nguôt.",
  "19": "So ju mlăm tơm jhi ara ta kêng truông, Khua Yang sak mơñ ta tơm ĕh ƀê̆ dăh so mau ƀơn ple ôh čuôm gu ha. Khua Yang ngơi ta jhi: \"jrăng so hôm mau ple ta me ƀă.\" Mhăč rŏk, tơm ara hư̆n ro prĕh.",
  "20": "Jăng jai băl ƀing kna so klăh iên, hên hơ̆ hă tŏng ngơi: \"Năn pơp ĕh mhŏ tơm jhi ara mhăč rŏk ro prĕh klăh iên?\"",
  "21": "Yang Yêsu ngơi klăh iêu: \"Ăñ ngơi ngăn ta pu me, ndă pu me mau pơp đăo jêh iên so đing, ăt pu me dơi mhŏ gao hĭn bruă trôh ta tơm jhi ara, wăt ndă pu me ngơi ta yôk ho ăn yĕh băh yôk ho jêh iên čĕ mŏng dak sĭ, ăt bruă jrăng jêng klăh iên.",
  "22": "Grăp pơp pu me khơñ mŏng mông kuôl dăn ta nuih nhăm đăo, pu me jrăng dơi dơn.",
  "23": "Jăng jai Yang Yêsu jêh mư̆t mŏng hĭh ƀư̆n, băl khua mhŏ yang ram jêh iên khua urañ mŏng uôn lan trôh tŏng tuôm ta Khua Yang jăng jai Khua Yang tơ-ti, jêh iên lup: \"U băh tŭk me sŏk pơp dơi no di me mhŏ bruă ho? Nêh tơm ăn ta me pơp dơi hư̆n?\"",
  "24": "Yang Yêsu ngơi klăh iêu: \"Ăñ ăt jrăng lup pu me ju mta. Ndă pu me dơi wêh lăh ta ăñ, ăt ăñ jrăng ngơi ta pu me gư̆t u băh tŭk ăñ sŏk no di dơi mhŏ bruă ho.\"",
  "25": "Pơp ƀatem kăn Yôhan u băh tŭk trôh, băh trôk mdăh băh kuôn nêh?\" Hên trông čhai ndăng hên: \"Ndă băn lăh băh trôk kăn jrăng ngơi ta băn, ndă kơt iên pơp mhŏ so pu me đăo ta kăn Yôhan?\"",
  "26": "Ƀê̆ dăh ndă băn ngơi: \"Băh kuôn nêh, ăt băn bhŭng ta uôn lan ŏk, bơ yơng grăp nau nêh hên dlăng kăn Yôhan jêng khua têh luôr.",
  "27": "Kơt iên hên sak ngơi ta Yang Yêsu klăh iêu: \"Hi so gư̆t.\" Khua Yang wêh lăh ta hên: \"Ăñ ăt so têh ta pu me gư̆t, ăñ mhŏ lĕ mơt bruă ho u băh pơp dơi ăñ sŏk.",
  "28": "Ƀê̆ dăh đa lăh pu me mĭn? Ju nau nêh mau bar nau kuôn tlau. Kăn sak tuôm ta kuôn tlau ram jêh iên ngơi: \"Wơ kuôn tlau, nar o ăn me sak mhŏ bruă ta mir ño.\"",
  "29": "Kuôn kăn hư̆n ngơi: \"Ăñ ơ̆ sak!\" ƀê̆ dăh ta kơi hư̆n, kăn mlĭh pơp mĭn jêh iên sak",
  "30": "Jêh hư̆n kăn bap tŏng tuôm kăn kuôn tlau tăl bar jêh iên ăt kăn ngơi klăh iên ya. Kăn kuôn tlau ho ngơi: \"Ư! Wơ bap, lơi ăñ sak\" Ƀê̆ dăh kăn so sak.",
  "31": "Nêh tơm mŏng bar nau kuôn tlau hư̆n mhŏ hui si pơp bap hên khơñ? Hên lăh: \"Kăn kuôn bôk.\" Yang Yêsu ngơi ta hên: \"Ăñ ngơi ngăn ta pu me, băl rư̆ng jia jêh iên băl čhơng tăt jrăng sak mư̆t mŏng Uôn Yang Trôk luôr ta pu me.",
  "32": "Bơ yơng Yôhan jêh trôh ta pu me hui truông kpă, ƀê̆ dăh pu me so đăo ta kăn, bơ băl rư̆ng jia jêh iên băl čhơng tăt hên đăo ta kăn. Bruă jêh pu me so ta măt, ăt pu me so čiêng niêl jêh iên đăo ta Yôhan.",
  "33": "Iêt ƀơn pơp hơ-hôr dơ-dêh ya. Mau ju nau nêh, kăn jêng tơm tĕh. Kăn tăm ju lôk mir ple ño, Pêr nêr jum dar, sir ƀăng păt dak ño, lăm ndŏk tư̆m năk jêh iên ăn ta băl dư̆k tăm ño hên mhŏ, jêh hư̆n kăn sak čar dơ-dêh.",
  "34": "Jăng jai mơñ trôh dơm lêh ple, kăn yua băl dư̆k kăn sak trôh ta băl dư̆k tăm ño no di sŏk dơn ple kao kăn di.",
  "35": "Ƀê̆ dăh băl dư̆k tăm ño hư̆n ñâp băl dâk kăn, pŭ nêh ho, lăm khư̆t nêh tê̆, jhăng mau nêh tŏ.",
  "36": "Kăn tơm mir wêh yua băl dư̆k dơ-dêh sak, ŏk hĭn ta luôr, ƀê̆ dăh băl dư̆k tăm ño ăt mhŏ ta pŏng hên ndrơm klăh iên ya.",
  "37": "Jêh hư̆n, kăn tơm mir yua kuôn kăn tơm sak tŏng tuôm ta hên, yơng kăn mĭn klăh iêu: \"Hên jrăng mpŭ ta kuôn ăñ.\"",
  "38": "Ƀê̆ dăh jăng jai băl dư̆k tăm ño so kuôn tlau hư̆n, hên trông čhai ndăng hên: \"Ho jêng kuôn tlau dơn ngăn. Jơ̆! Băn lăm khư̆t kăn no di sua lĕ mơt ngăn drăp ho.\"",
  "39": "Hư̆n yơh hên ñư̆p kuôn tlau hư̆n, čĕ ta ling mir ño jêh iên lăm khư̆t lat.",
  "40": "Kơt iên, jăng jai kăn tơm mir ño trôh, đa lăh kăn jrăng mhŏ ta băl dư̆k tăm ño hư̆n?\"",
  "41": "Hên têh: \"Kăn jrăng lăm rai lĕ băl djŏh ƀai hư̆n lăm khư̆t ta pơp so tŏng đač, jêh hư̆n ăn băl dư̆k tăm ño dơ̆-dêh mhŏ bruă ta mir ño, jêng băl jrăng ndơp ple kao ĕh gĕh dơm lêh.\"",
  "42": "Yang Yêsu ngơi ta hên: \"Năng ai ñăm pu me tuôm dlăng pơp ho mŏng Păng Ră Ƀrăh lăh: \"Tak mau băl ndŏk hĭh jêh ndrŏh lat, ĕh jrăng jêng tak mau kêng hĭh. Ho jêng bruă Yang Trôk, jêh iên jêng bruă myang ta măt băl băn.\"",
  "43": "Hư̆n yơh, ăñ ngơi no di pu me gư̆t, Čar Yang Trôk di jrăng sŏk băh pu me jêh iên jao ta uôn lan dơ-dêh jrăng mau ŏk ple kao.",
  "44": "Nêh tơm ĕh bông ta bôk Mau ho jrăng rai lêk. Ndă Mau lăč gĕh ta nêh tơm, ĕh jrăng dlăn lêk nêh hư̆n.",
  "45": "Jăng jai băl khua mhŏ yang ram jêh iên băl Pharisi tŏng pơp hơ-hôr Yang Yêsu di, hên gư̆t Khua Yang čiêng ngơi ta hên.",
  "46": "Ƀê̆ dăh jăng jai juôi truông ñư̆p Khua Yang, hên ăt bhŭng ta uôn lan ŏk, bơ yơng băl uôn lan dlăng Khua Yang jêng khua têh luôr."
}