mnong_2020_mng_mlt_mat_book/mat/16.json

{
  "1": "Băl Pharisi ta Sađuse trôh lông dlăng Khua Yang, hên mau mnăč khơñ dăn Khua Yang ăn ta hên dơi so ju mta pơp lăm năl băh trôk.",
  "2": "Ƀê̆ dăh Khoa Yang ngơi ta hên: Di lăh nar jâr ta mho pu me lăh trôk jrăng găl, bơ yơng trôk brông!",
  "3": "Mŏng mông ôi ưm, pu me lăh: \"Trôk nar o djŏh, bơ yơng trôk brông jêh iên ŏk ñuôi.\" Pu me gư̆t mnăč dlăng trôk nar, ƀê̆ dăh so wơng pơp lăm năl ta nŭk.",
  "4": "Ju nŭk djŏh ƀai jêh iên čhơng tăt khơñ juôi pơp lăm năl, bê̆ dăh jrăng so hôm ăn ju mta pơp lăm năl ôh, čuôm gu pơp lăm năl ta kăn Yôna. Jêh hư̆n Khua Yang du băh hên.",
  "5": "Băl ƀing kna trôh hang đăh tŏ, ƀê̆ dăh hên wăr tôr so triêu ƀăñ.",
  "6": "Yang Yêsu ngơi ta hên: \"Ăn răng nư̆k jêh iên ñjrăng ta pei băl Pharisi wăt ta băl Sađuse.\"",
  "7": "Băl ƀing kna tŏng ngơi ndăng hên klăh iêu: \"Hư̆n yơng băn so triêu ƀăñ ju băk.\"",
  "8": "Yang Yêsu gư̆t klăh iên, hư̆n ngơi: \"Wơ băl ƀê̆ pơp đăo, pơp mhŏ pu me tŏng ngơi ndăng pu me! Bơ yơng băn so ñôt ƀăñ ju băk dơh?",
  "9": "Gĕh ya! pu me ñăm wơng mdăh so kăh tôr prăm mlăm ƀăñ ruông prăm bau nau nêh sa, jêh iên pu me dôñ djăh ŏk bai hôm khăñ?",
  "10": "Mdăh pŏh mlăm ƀăñ ăn ta puôn bau nau nêh sa, jêh iên ŏk bai hôm khăñ pu me dơi dôñ?",
  "11": "Đô̆ nă ŏh mi so dơi wơng pơp hư̆n, so mau yơng băh ƀăñ hư̆n no di ăñ ngơi ƀă? Ƀê̆ dăh ăn ñjrăng ta pei băl Pharisi di jêh iên wăt băl Sađuse.",
  "12": "Mông hư̆n kăh hên wơng, Khua Yang so ngơi ăn hên ñjrăng ta pei mhŏ ƀăñ, ƀê̆ dăh ăn ñjrăng ta pơp tơ-ti lăh băl Pharisi di wăt ta băl Sađuse.",
  "13": "Mông hư̆n, jăng jai Khua Yang Yêsu trôh mŏng wăl mơñ uôn Sêsarê philip, Khua Yang lup băl ƀing kna klăh iêu: \"Nai lăh nêh tơm Kuôn Nêh jêng?\"",
  "14": "Hên têh: \"Mau ƀê̆ nêh ngơi jêng Yôhan Ƀaptit, ƀơ-ƀă ngơi jêng Êli, băl ƀơ-ƀă mơh ngơi jêng Yêrêmi mdăh ju nau mŏng khua tơm têh luôr.\"",
  "15": "Khua Yang lup hên: \"Bơ pu me tơm? Lăh ăñ nêh tơm jêng?\"",
  "16": "Ngơi ta Khua Yang, Simôn Pêtrôs lăh: \"Khua Yang jêng Krist, Kuôn Yang Trôk brêh hui hai.\"",
  "17": "Khua Yang Yêsu wêh ngơi ta kăn klăh iêu: \"Simôn! Kuôn Yôna, găl jôn ta me. Bơ yơng so gĕh băh lŏng săk mdăh băh mham nôh ƀlang pơp ho ta me gư̆t, ƀê̆ dăh jêng Bap ăñ ji tŏng trôk.",
  "18": "Ăñ ăt ngơi ta ŏh mi gư̆t, me jêng Pêtrôs jêh iên mŏng bôk mau ho! Ăñ jrăng lăm ndŏk Pôl Ƀrăh ăñ ji. Lĕ ƀăng ñjang uôn khư̆t jrăng so dơi mblăh ta Pôl hư̆n ôh.",
  "19": "Ăñ jrăng jao ta me kliêng khuă Uôn Yang Trôk. Năn pơp me kăt mŏng tĕh ĕh jrăng kăt tŏng trôk, jêh iên năn pơp me rŭh mŏng tĕh ĕh jrăng dơi rŭh tŏng trôk.",
  "20": "Jêh hư̆n Khua Yang Yêsu tơ-tă băl ƀing kna, so dơi ăn nai gư̆t ôh Khua Yang jêng Krist.",
  "21": "Dŏng băh mông hư̆n, Yang Tŏng Tlĕh Yêsu dư̆ng ngơi ta băl ƀing kna pơp Khua Yang jrăng sak trôh ta uôn Yêrusalem, dơn ŏk pơp knap mñai mŏng plang ti băl khua hih ƀư̆n, khua mhŏ yang wăt ta băl tơ-ti pơp bhiên. Jêh hư̆n ăn nai lăm khư̆t, trôh nar tal pei wêh dŏk brêh.",
  "22": "Yơng băh iên Pêtrôs đŏh Khua Yang jêh iên ƀuăh klăh iêu: \"Wơ Khua Yang, so mau bruă klăh iên trôh ta Khua Yang ƀă. Čang mơn pơp hư̆n so dơi trôh ta Khua Yang ôh.\"",
  "23": "Ƀê̆ dăh Khua Yang Yêsu wiêng ta Kơi jêh iên ngơi ta Pêtrôs: \"Wơ Satan, ăn du ta kơi Ăñ! Me jêng bôk mau lăm păk jŏng Ăñ, bơ yơng me so mĭn ta bruă Yang Trôk di, ƀê̆ dăh me mĭn gu ta bruă kuôn nêh.\"",
  "24": "Jêh hư̆n Yang Yêsu ngơi ta băl ƀing kna Yang di: \"Ndă nêh tơm khơñ gre ăñ, nêh hư̆n jrăng săl săk kăn tơm, jêh iên tung jhi tăm kăng kăn, hư̆n kăh gre ăñ.",
  "25": "Bơ yơng nêh tơm khơñ lăm tlĕh pơp brêh tơm, ĕh jrăng nga, ƀê̆ dăh nêh tơm lăm nga pơp brêh kăn yơng băh ăñ, jrăng dơi so ĕh.",
  "26": "Bơ yơng năn pơp yuôm ta ju nau nêh! Ndă dơi mau lĕ dôn tĕh, ƀê̆ dăh nga pơp brêh kăn? Mdăh năn pơp nêh hư̆n dơi sŏk no di dơi tăm nggăl pơp brêh kăn?",
  "27": "Bơ yơng Kuôn Nêh jrăng trôh ta pơp guh ang Bap di, wăt ta băl myang yang di. Mông hân, Khua Yang jrăng khôm ta grăp nau nêh hui si bruă hên mhŏ.",
  "28": "Ăñ ngơi ngăn ta ŏh mi, mau ƀê̆ nêh mŏng mbar ŏh mi hên dŏk ta o, nư̆k ngăn yơh jrăng so găn gao pơp khư̆t tăl trôh mông so Kuôn Nêh trôh mŏng čar Yang di."
}