{
  "1": "Jêh Yang Yêsu ngơi lĕ pơp hư̆n, Khua Yang ngơi ta băl ƀing kna:",
  "2": "\"Pu me gư̆t ru hôm bar nar jrăng trôh Mar Găn Gao, jêh iên nai jrăng jao Kuôn Nêh no di păng đĭn ta jhi tăm kăng.   ",
  "3": "Mông hư̆n, băl khua mhŏ yang ram jêh iên băl u rañ mŏng uôn lan hên tŏng ƀư̆n ju tŭk mŏng hih khua mhŏ yang ram, năn kăn jêng Kai Phe.",
  "4": "Hên ju băk trông čhai mnăč no di ñư̆p muôč Yang Yêsu jêh iên lăm khư̆t Khua Yang.",
  "5": "Bơ yơng hên ngơi: \"So dơi mhŏ bruă ho mŏng mông Mar Găn Gao,  no di ơn lăm ñjêng pơp tăm pŭ mŏng uôn lan.\"",
  "6": "Mŏng mông Yang Yêsu gŭk ta Ƀêthani mŏng hih kăn Simôn, nêh dư̆n lôt.",
  "7": "Jăng jai Khua Yang gŭk ta jhưng sông, mau ju nau u ur ñôt gri yuôm mŏng iên bêng dak ƀau kăh sak trôh ta tŭk Khua Yang, jêh iên truôč tŏng bôk Khua Yang.",
  "8": "Ƀê̆ dăh jăng jai băl ƀing kna so klăh iên, hên hao nuih jêh iên ngơi: \"Pơp mhŏ lăm le pơp no klăh iên!\"",
  "9": "Ndă tăč dak ƀau kăh ho jrăng dơi mau ŏk prăk jêh iên phă gai ta băl knap mñai.",
  "10": "Ƀê̆ dăh Yang Yêsu gư̆t klăh iên, hư̆n yơh lup hên: \"Pơp mhŏ pu me lăm dlĕh ta de u ur ho? Bơ yơng de mhŏ bruă găl ta ăñ.\"",
  "11": "Pu me khăng mau băl knap gŭk băk răn ƀăn, ƀê̆ dăh pu me so dơi mau ăñ răn ƀăn ôh.",
  "12": "Jăng jai de tôh dak ƀau kăh ho ta săk ăñ, jêng de mkra ta pơp tăp bư̆l ăñ hư̆n.",
  "13": "Ăñ ngơi ngăn ta pu me, u ta tŭk Pơp Găl ho dơi dơp trôh mŏng tar ƀar tĕh dih, bruă de u ur ho jêh mhŏ ăt nai jrăng ngơi ya no di kăh tôr ta de.",
  "14": "Mông hư̆n, ju nau mŏng măt bar nau băl ƀing kna, năn kăn jêng Yuđa Iskariôt, sak tŏng tuôm ta băl khua mhŏ yang ram.",
  "15": "kăn lup: \"Ŏk nŏh pu me khôm ta ăñ no di ăñ jao nêh hư̆n ta pu me?\" Hên mkă ta kăn pei jăt prăk.  ",
  "16": "Dŏng băh mông hư̆n, kăn juôi mông gĕh no di jao Khua Yang.",
  "17": "Mŏng nar tal muôi mar sa ƀăñ so mau pei, băl ƀing kna sak trôh lup Yang Yêsu: \"U ta tŭk Khua Yang khơñ hi prăp prê ta Khua Yang pơp sa Mar Găn Gao?",
  "18": "Khua Yang ngơi: \"Ăn mư̆t mŏng uôn ram tŏng tuôm ta ju nau nêh jêh iên ngơi ta kăn, Khua Yang ngơi: \"Mông Khua Yang mơñ trôh, Khua Yang jrăng sa Mar Găn Gao mŏng hĭh me ju băk ta băl ƀing kna Yang di\"",
  "19": "Băl ƀing kna mhŏ hui si pơp Yang Yêsu tơ-tă jêh iên hên prăp pơp sa Mar Găn Gao.",
  "20": "Trôh mho, Khua Yang gŭk sa ju băk ta măt bar nau ƀing kna.",
  "21": "Jăng jai hên sa, Khua Yang ƀlang ta hên: \"Ăñ ngơi ngăn ta pu me, ju nau nêh mŏng pu me jrăng lhiăr ta ăñ.\"",
  "22": "Hên bêng pơp ênguôt jêh iên grăp nau hên dư̆ng lup Khua Yang: \"Wơ Khua Yang, năng ai so gĕh ăñ ôh?\"",
  "23": "Khua Yang ngơi: \"Nêh tơm djrut ti mŏng bơng ho băk ăñ, hư̆n jêng nêh jrăng lhiăr ta ăñ.",
  "24": "Kuôn Nêh jrăng sak, hui si pơp jêh čĭh ta Khua Yang. Ƀê̆ dăh knap mñai nêh tơm lhiăr ta Kuôn Nêh! Găl hĭn nai so lai săk ta kăn.\"",
  "25": "Yuđa, nêh jrăng lhiăr Khua Yang, wêh ngơi: \"Wơ Khua Yang, gĕh ya ăñ mhŏ bruă hư̆n?\" Khua Yang ngơi: \"Me tơm jêh ngơi pơp hư̆n!\"",
  "26": "Jăng jai hên hôm sông, Yang Yêsu sŏk ƀăñ lăh găl jêh iên phĭč. Khua Yang jao ta băl ƀing kna jêh iên ngơi: \"Ăn pu me sŏk jêh iên sa. Ho jêng săk jăn ăñ ji.\"",
  "27": "Khua Yang ñôt kčok lăh găl, jêh hư̆n ăn ta hên jêh iên ngơi: \"Ăn grăp nau ñêt yơh.\"",
  "28": "Bơ yơng ho jêng mham tăm tlăc̆ ăñ ji, jêng mham jêh tôh ta ŏk nêh no di dơi đač un pơp tih hên.  ",
  "29": "Ƀê̆ dăh ăñ ngơi no pu me gư̆t, dŏng băh mông ho, ăñ jrăng so hôm wêh ñêt dak ño ho ôh, tăl trôh nar ăñ jrăng ñêt dak ño mhei băk pu me mŏng Čar Bap ăñ ji.\"",
  "30": "Jêh hên muñ pơp muñ ƀrăh, hên sak ta yôk Ôliu.",
  "31": "Mông hư̆n, Khua Yang Yêsu ngơi ta hên: \"Măng ƀê̆, lĕ mơt pu me jrăng păk bông bơ yơng băh ăñ, yơng mau pơp čih: \"Ăñ jrăng pŭ nêh tơm năk jêh iên biêp mŏng pôl jrăng ndrăh ndrêng.”",
  "32": "Ƀê̆ dăh jêh ăñ wêh dŏk brêh, ăñ jrăng sak luôr pu me trôh ta Galilê.",
  "33": "Ƀê̆ dăh Pêtrôis ngơi ta Khua Yang klăh iêu: \"Dilăh lĕ mơt nêh păk bông bơ yơng Khua Yang, ăñ ăt so dơi păk bông ya.\"",
  "34": "Yang Yêsu ngơi ta kăn: \"Ăñ ngơi ngăn ta me, măng ƀê̆ rŏk, luôr ta iêr ndrau, me jrăng ơ̆ ăñ pei dŏ.\"",
  "35": "Pêtrôis ngơi ta Khua Yang: \"Wăt tơ dăh ăñ khư̆t băk Khua Yang, klă ngĭn ngăn ăñ ăt so ơ̆ Khua Yang.\" Lĕ mơt băl ƀing kna hên ngơi klăh iên gơ-gu.",
  "36": "Jêh hư̆n Yang Yêsu sak băk hên trôh ta tŭk năn ĕh jêng Getsemane, jêh iên Khua Yang ngơi ta băl ƀing kna: \"Ăn gŭk ta o jăng jai ăñ sak đăh tŏ kuôl dăn.\"",
  "37": "Khua Yang ndơm Pêtrôis wăt ta bar nau kuôn tlau Sêƀêđê sak băk Khua Yang, Khua Yang dư̆ng nguôt nư̆ng jêh iên rŭng răng.",
  "38": "Khua Yang ngơi ta hên: \"Ngăt nhuôl ăñ srăč nư̆ng tăl trôh khư̆t. Ăn gŭk ta o jêh iên kăp ñjrăng băk ăñ.\"",
  "39": "Khua Yang sak wăč ƀê̆ dŏng nê̆, čư̆p măt mŏng sô̆ jêh iên kuôl dăn. Khua Yang dăn: \"Wơ Bap ăñ ji, ndă di dơi, ăn kčŏk ho du băh ăñ. So hui pơp mĭn ăñ ôh, ƀê̆ dăh hui si pơp Bap khơñ.\"",
  "40": "Jêh hư̆n Khua Yang sak trôh ta tŭk băl ƀing kna ƀê̆ dăh so hên hôm bê̆, hư̆n yơh Khua Yang ngơi ta Pêtrôis: \"Ju mông gu ăt pu me so dơi kăp ñjrăng băk ăñ ya lăh?",
  "41": "Ăn kăp ñjrăng jêh iên kuôl dăn no di so ĕh lăč pu me mŏng pơp mblơm. Ngăn ya! Ngăt nhuôl khơñ ƀê̆ dăh lŏng săk dư̆r djup.\"",
  "42": "Khua Yang wêh sak dơ̆ bar jêh iên wêh kuôl dăn, klăh iêu: \"Wơ Bap kuôn di, ndă kčŏk ho so dơi tlaih băh kuôn jêh iên ăn kuôn ñêt, ăñ dăn pơp Bap khơn dơi ñjêng.\"",
  "43": "Khua Yang wêh trôh jêh iên ăt so hên hôm bê̆, bơ yơng măt hên jŏk krư̆p.",
  "44": "Hư̆n yơh, Khua Yang lơi hên ta iên sak kuôl dăn dơ̆ pei, pơp kuôl dăn ăt ndrơm klăh iên ya.",
  "45": "Jêh hư̆n Yang Yêsu sak trôh ta tŭk băl ƀing kna jêh iên lup hên: \"Pu me ăt hôm bê̆ jêh iên mdei lăh? Tŏ hư̆n! Mông jêh trôh ru jêh iên nai jrăng jao Kuôn Nêh mŏng plang ti nêh tih djŏh.",
  "46": "Ăn dŏk gơñ, jơ̆ sak! Tŏ hư̆n, nêh lhiăr ta ăñ jêh trôh ru.",
  "47": "Jăng jai Yang Yêsu hôm ngơi. Tŏ hư̆n, Yuđa ju nau mŏng măt bar nau ƀing kna trôh. Sak ju băk ta kăn mau ju pôl ŏk ngăn ñôt đao jêh iên kbăk, bơ yơng băl khua mhŏ yang ram jêh iên băl u rañ mŏng uôn lan yua hên sak trôh.",
  "48": "Kăn nêh lhiăr ta Yang Yêsu jêh ăn ta hên ƀơn pơp lăm năl, klăh iêu: \"Nêh tơm ăñ čư̆m, nêh hư̆n yơh. Ăn pu me ñư̆p kăn hư̆n.\"",
  "49": " Mhăč rŏk, kăn trôh ta tŭk Yang Yêsu jêh iên ngơi: \"Dăn kôh Khua! Jêh iên kăn čư̆m Khua Yang",
  "50": "Yang Yêsu ngơi ta kăn: \"Wơ jôk! Bruă me sak mhŏ ăn me mhŏ yơh.\"Jêh hư̆n hên răn ñư̆p Yang Yêsu jêh iên čăp Khua Yang. ",
  "51": "Tŏ hư̆n, ju nau mŏng băl mau măt băk Yang Yêsu yơr ti sŏk đao srĕh kăn dư̆k khua mhŏ yang ram di, tĕ tôr ju đăh pŏng kuôn nai.  ",
  "52": "Yang Yêsu ôt kăn hư̆n: \"Ăn sruôk đao me mŏng druôm ĕh gơñ, bơ yơng lĕ mơt nêh tơm ñôt đao jrăng khư̆t ta đao.",
  "53": "Mdăh, năng ai me mĭn ăn so dơi dăn ta Bap ăñ, no di Bap ăñ yua rŏk ta ăñ khăñ ta măt bar pôl băl myang lăh?",
  "54": "Ƀê̆ dăh ndă kơt iên đô̆ nă jrăng jêng pơp ngơi mŏng druôm Ră Ƀrăh klăh iêu, pơp ho jrăng trôh klăh iên no di lăm nư̆k?",
  "55": "Mông hư̆n, Yang Yêsu ngơi ta băl pôl ŏk: \"Pu me triêu đao jêh iên kbăk trôh ta o, no di ñư̆p ăñ ndrơm klăh di ñư̆p nêh blăč lăh? Grăp nar ăñ gŭk tơ-ti mblang mŏng hih ƀư̆n ram pơp mhŏ so pu me ñư̆p ăñ.",
  "56": "Ƀê̆ dăh lĕ mơt bruă ho trôh no di lăm nư̆k pơp ngơi băl tơm têh luôr. Mông hư̆n lĕ mơt băl ƀing kna ndrŏh Khua Yang tuôt du gơ-gu.",
  "57": "Băl ĕh ñư̆p Yang Yêsu sak ndơp Khua Yang trôh ta tŭk khua mhŏ yang ram Kai-phe, tŭk băl khua tơ-ti pơp bhiên jêh iên băl khua u rañ jêh tăm ƀư̆n ju băk.",
  "58": "Ƀê̆ dăh Pêtrôis gre Khua Yang wăc̆ wăč trôh ta jŏng gung khua mhŏ yang ram. Kăn mư̆t mŏng nuông jêh iên gŭk băk ta băl ka han kĕ no di dlăng đô̆ nă jrăng jêng.",
  "59": "Mông hư̆n, băl khua mhŏ yang ram jêh iên lĕ ju pôl phat dôih juôi pơp lăm huôk kčŭt Yang Yêsu, no di hên dơi phat diôh lăm khư̆t Khua Yang.",
  "60": "Hên so dơi juôi ju mta pơp ôh, wăt mau ŏk nêh dŏk ta iên ngơi mc̆ĕh. Ƀê̆ dăh ta kơi hư̆n, mau bar nau nêh sak ta măt.",
  "61": "Kčŭt klăh iêu: \"Kăn ho tuôm ngơi, Ăñ dơi lăm rai hih kôh mpŭ Yang Trôk di jêh iên wêh lăm ndŏk ĕh mŏng pei nar.\"",
  "62": "Khua mhŏ yang ram dŏk lup Khua Yang: \"So me wêh ngơi lăh? Hên juôi truông ngơi huôk kčŭt me tŏ hư̆n?",
  "63": "Ƀê̆ dăh Yang Yêsu ăt gŭk miêt. Khua mhŏ yang ram ngơi ta Khua Yang: \"Ăñ tơ to Yang Trôk Brêh Hui Hai mhăl me ăn ngơi ta hi gư̆t, gĕh ya me jêng Yang Tŏng Tlĕh, Kuôn Yang Trôk mdăh so?\"",
  "64": "Yang Yêsu ngơi: \"Me tơm ngơi klăh iên. Iên tŭ, ăñ ngơi no pu me gư̆t, dŏng băh nar o, pu me jrăng so Kuôn Nêh gŭk ju đăh ma Mtao Pơp Myang jêh iên trôh ta ñuôi tŭk tŏng trôk.\"",
  "65": "Mông hư̆n, băl khua mhŏ yang ram čriêk ao hên jêh iên ngơi: \"Kăn ho ngơi mgao ta Yang Trôk. Pơp mhŏ băn wêh hôm juôi nêh kčŭt? Iêt hư̆n! Mông ho jêh pu me tŏng pơp ngơi mgao hư̆n ru.",
  "66": "Đô̆ nă pu me mĭn? Hên Ngơi: \"Kăn ho năng khư̆t.\"",
  "67": "Jêh hư̆n hên c̆hŏh ta măt Yang, pŭ yat Khua Yang, mau ƀă nêh tap môk Khua Yang,",
  "68": "lông! Wơ Yang Tŏng Tlĕh, dlăng me ngơi pơp têh luôr ta băl hi. Nêh tơm pŭ yat me hư̆n?\"",
  "69": "Mông hư̆n, Pêtrôis jăng jai gŭk ta ling jăng gung, mau ju nau de u ur dư̆k trôh tŭk kăn, de ngơi: \"Me ăt gŭk băk Yêsu, nêh Galilê ya ăñ so.\"",
  "70": "Ƀê̆ dăh kăn Pêtrôis so dơn ta măt băl ĕh mŏng iên klăh iêu: \"So ăñ gư̆t năn pơp e ngơi hư̆n.\"",
  "71": "Jăng jai kăn sak trôh ta ƀăng jang, ju nau nêh u ur dêh so kăn jêh iên têh ta băl mŏng iên: \"Kăn ho ăt gre băk ta Yêsu uôn Nasaret ya.\"",
  "72": "Kăn ăt so dơn jêh iên kăt săk, klăh iêu: \"Ăñ so tuôm gư̆t kăn hư̆n ƀă!\"",
  "73": "Păh pê băh iên, băl nêh gŭk mơñ ta iên sak ngơi ta kăn Pêtrôis: \"Gĕh ru, me jêng ju nau mŏng băl hên, bơ yơng pơp ngơi me tơm kčŭt me.\"",
  "74": "Dŏng băh iên kăn dư̆ng tăm păh, jêh iên kăt săk: \"Ăñ so tuôm gư̆t nêh hư̆n,\" mông hư̆n rŏk iêr ndrau.",
  "75": "Jêh iên Pêtrôis wêh kăh pơp Yang Yêsu jêh ngơi: \"Luôr ta iêr ndrau, me jrăng ơ̆ ăñ pei dŏ.\" Jêh hư̆n, kăn du ta ling jêh iên ôr ñim srăč nư̆ng ngăn."
}